Yohanes 11:55 - Eipomek

⁵⁵ Efraim mutuku uk, daulamika ani, sik Yahudi yala nang weik kwalina talak, Kaplina ati Kwalina talak akunum dam ubuk. Atalak dam ubuka anya arye, dana-dana tam nirya arye, Yahudi yala ninye bulubuka, weik asik Yerusalem mutuku welebik. Yerusalem mutuku biyik deiyok ara, ani. Ara, Musa arye, el sekamuk yupu mem yupu noutamak, ‘Allah arye kanye deipsilibuk, el si erena aik wektibye’ tenen, “Winibuka, winibuka anggun nong mek kekuka teleb unamlulume,” nyapdeiamuk touk, ‘Kaplina ati Kwalina sum min kum yanmalye talak ara, mek kekibirye, nun kanye talima kintinipnamabe’ tenen, Yerusalem bulubuka banmek.

Yohanes 11:55 ပူးပေါင်းရင်းမြစ်များ

Kejadian 35:2

Nyabuka ati, Yakub birye, el mapu ap, kilapu nirya ap, el neika ulamik ninye nirya ap ati, nyabuk. “Anggunce talilulum isa si erena ap, malye winin ning nirya ap, batakmunce, diksukumuk unamlulume. Tonda, wini talak ongopmalum baju, kwiriplobuka winiryuk ninguk ongoplulume.

Ayub 1:5

Akunum kwalibuka dipdopneura, Ayub mapmana beren tam arye bukdopna arye, el mapu sik yuk-yuk ati nukuka, domba basam opnarye, Allah morona ati memepdeiamukak, bobuka uku dalbalamuk. Winilamukce, sik ni Ayub birye tenelamuk ning ara, ‘Na mapu sik mangkau arye malye upmak do? Tonda sik kanye talima noutamak arye, ‘Allah ati mambul kume,’ tenepmak do?’ tenen, amalye winipmanto ning, ‘Winipmak do?’ tenen, aning pununa ati, kam ning obuka, Allah ati arelamuk. Aning ati ara, ‘Narye Allah moropneba, sik Allah dam malye wininyak ning nirya lyepnamle’ tenen, winilamuk.

Mazmur 26:6

‘Nara malye winin ning, pia kum winilamse ning ara, biknamniak’ tenen, bikilina ati, na taruk mek liknyeura, yuk nang eipnikirye, aning bikininyake. Wininye ning ara, kam ning opnarye, an Yahweh arena ati kintinilamik ning, el si ara mesba, antanap dongobuka memepdeibika dam banamne.

Keluaran 19:10

Nyabukba, Allah el si Yahweh arye, Musa biti nyabuk. “Ati bimince, sikti, melipminba, arup ap, ambusum ap ara, ‘Talya nanguk ati kum unamabe, Allah el ‘Naʼ tenen, ninye, pia teleb nanguk ati unamap’ tenen, kintinip deipnamake. Tonda, sik baju nirya, mek likuka kintinip deipnamake. An babye winipnamlyame.

Bilangan 9:10

Ance Israel ninye ati, nyapnulyame. Winipmanto ara, anggun damnye do, anggun ap neika ulalum nang arye do, anggunce deipmunyeba dadeipdanin banamak nang arye do, anoutam arye akunum dipmalinye, el nong bol pipmunyopura, anggunda akunum malye updeipdanmalume. Bukni, Kaplibuka biluma ati Yuna ara, mambul weik sum ati, akwalina ara, dipkoprob kwalinamlume, kum bataknamlume. Aning atonun, pera mutuku binuka, daunmamunye bukni, yuk mutuku aunmamunya babye, Allah el si erena ati, adiparyuk Kaplibuka binamlum sum yuna akunum uplyopura, Israel ninye yunamaka ara, melibuka kwalinamlume. Aning ara mambul weik sum ati, dib koprop kwalinamlume, kum bataknamlume,” nyabuk.

Bilangan 9:6

Winibik bukni, atalak ara anggun Israel ninye kan-kan noutam arye, yate wiribuka nang ton, dipmangu nang sik bol akunum pimek. Abol pipmek nang ara, malye akunum updeipdanmeka ati, Allah el dam kum yangalamik. Tonda, Allah el si erena ati, yuna kum kwalipmek. Ati, adiparyuk asum Kaplibuka binamlum yuna kwalipnamek ning ara, Se, nun ton kum melipmapyeura, kum dipnamabe,’ tenebik. Ati sik anang arye, Se yate wiriptibye do?’ tenen, adiparyuk Musa ap, Harun ap, sik damuk binuka asipdeyik.

Matius 26:1

Yesus arye ayupu nirya akunum nyabukopura, el mapu 12 nang ati nyabuk.

Matius 26:2

“Anggun kele. Yahudi yala nang sik Kaplina ati Kwalina sum ambusum arye ubuka ambusum or upnamale. Atalak ara, nara, Ninye Mi Koprop Atonunye bira, ‘Malye nang arye wanwanun yo deice deibuka opnamak’ tenen, inipraka binamniyake,” Yesus arye nyabuk.

Markus 14:1

Yahudi yala nang Allah ati arena deiyok nang ap, Musa sekamuk yupu dobuka peteren deiyok nang ap, anang nirya arye, ‘Yesus tapu koubuka, yata wiribuka optibyeba, yuk nang kum kel biksitinge,’ tenebuka yupu sisikinmek. Utenenmek bukni, Yahudi yala nang Kaplina ati Kwalina sum ap, Nena Kum Roti Kwalina sum ap, liki bitinye kum upmok talak ati, anang kan-kan yuk nang arye nyabik.

Lukas 22:1

Yahudi yala nang Kaplina ati Kwalina sum, el si ara Paskah sum ap, Nena Kum Roti ati Kwalin sum ap, dam ubuk.

Yohanes 12:1

Sik Yahudi yala ninye arye weik Kaplina ati Kwalina ati, ‘Naku barye sum tonap akunum mabibyopura, kwalipnamabe’ tenen, kintinibik sum ara, Yesus arye Betania mutuku biyuk. Betania mutuku ara, Lazarus diamukba, Yesus arye kam bukeibuk mutuku anyuka.

Yohanes 13:1

Atalak ara, sik Yahudi yala ninye arye, Kaplina ati Kwalina ati, ambusumto yupnamek sum ubuk. Atalak ara, Yesus arye, ‘Tukwak mutuku bataknirye, na Ni Koprop Allah dam binamne’ tenen, akunum kel bikamuk. Yesus ara, tukwak mutuku ulamuk talak noutamak nirya ara, el wipdeiyamuk nang, sik 12 nang ati, bico tenebuka melilamuk bukni, el tukwak mutuku ulamuk talak sirya dakmanto ubuka anya arye, atalak ara, ‘Na mapu arye, nun ni Yesus pia weik arye bicoe tenepsilirye, talima arisulule, tenebikirye, kel kipnamak’ tenen, elce alukunyan winibuk ning deice arye peterebuk. Aning ara, ani.

Yohanes 18:28

Anirya akunum winibukura, sik Yahudi yala deiyok nang arye, Yesus dobuka bobikce, imam Kayapas el aik batakuka, amutuku talyamuknye, Roma mutuku weik deiyoknye Gubernur Pilatus dam bobiyik. Bobiyik bukni, Pilatus el weik aik kum wekelbiyik deiyok ara ani. Ara sik Yahudi yala ninye arye tenelamik. ‘Weik Kaplina ati Kwalina dipnamibye talak ara, sik Yahudi yala kum ninye ap, sik ning ap talibibyopura, nun talima noutam malye upsiliba, kwalina kum dibibyeura, Allah derepsilyak’ tenen, Pilatus el aik kum wekik.

Yohanes 2:13

Mapmeka ani, sik Yahudi yala ninye arye weik yuna talak, Kaplina ati Kwalina talak akunum dam kibukura, Yesus ap, el wepdeibuk nang ap, Yerusalem mutuku biyik.

Yohanes 2:6

Sik yupu talipmek aik ara, nong weik kat mek makau naku barye kintinibuka deipmekba aupmok. Amek makau ara mek ton min kum kwebuka deipmek. Amek makau ara, sik Yahudi yala ninye arye, ‘Allah derepsilyak’ tenen, ‘Musa nyapsuk touk nun taruk mek likinamap’ tenen, deililamik atonun ning uamuk. Tonok mek makau pum bisik, winipmanto mek pia weike, 100 liter mek kwebuka dikildongolamik.

Yohanes 5:1

Sik nirya daulamika ani, aminyan talak ara, Yesus ara, ‘Yahudi yala ninye arye, Yerusalem mutuku kwalipnamakak ara, na ton binune’ tenen, Galilea tam batakuka, Yerusalem mutuku welebiyuk.

Yohanes 6:4

(Amutuku biyik talak ara, sik Yahudi yala ninye arye Kaplina ati Kwalina kwalilamik sum akunum dam ubuk.)

Rasul 21:24

Anang dumbarye nang dopminyak arye, sik kanye ak malye winipna ati, ‘Allah damak yatibye’ tenen, tuba tamubuka lipsisikil delinamak pil ara, ance meliplyame. Ance melipminyak arye sik kanye talima lipsisikil delinamak pil ati, Allah arenamak ning ara, deklyame. Tonda, apil dekna ati ara, ance melipmince dekuka arepminyopura, sik potong koptinge. Winipminya deice arye, yu nang arye anti minipdeipkik yupu ara, ninye nirya, ‘Ayupu ara, talye nyabik’ tenen, kel biknamkiake. Tonda, winipminye deice arye ninye nirya arye Allah arye, ‘Wininamlulume aning kum wininamlulume,’ nyapdeibukura, Musa sekamsuk yupu nyasilye touk, Paulus arye winipmal ati, ‘El babye, ayupu moubuka talilule’ tenen, kel biknamkiake.

Rasul 21:26

Nyabikopura, mapmeka, berekukura, Paulus arye adumbarye nang dobukce, sik talima ak malye winipnarye lipsisikildelin pil ara, el ap, neika dobik. Dobikce Paulus ara, Yahudi yala nang, sik malye ulamik ning dekna ati, Allah arilbalamik aik wekukopura, ayupu nyabuk. “Ura talima ak malye upnirye, ‘Tuba tamubuka lipsisikuka delinamap’ tenen, atalak nirya talye pil dolamibya ani, sirya akunum uplyopura, adumbarye nang, sik talima ak malye upnarye tuba tamubuka lipsisikil delina ati, Allah ati arin ning ara, asum atalak arye arepnamabe,” nyabuka lak nyabuk. Nasaret nang winilamik touk, adumbarye nang babye, ‘Winipnamabe,’ tenebik bukni, anya arin ning kum ati, tenipdebuka batakalongolamikura, Yerusalem mutuku sik deiyok nang arye Paulus ati, ayupu nyabik. “Ance anang melina ati, aning dekuka melipnamlyame,” nyabik.

Rasul 24:18

Yasirye, na talima ak malye upnirye lipsisikuka delin pil ara, sirya akunum dakseura, telebuk ulamsirye nun Yahudi yala nang, nun malye wininyap ning dekna ati, Allah arenyap aik weksirye, Allah si erena ati, teleb ning arinmasibuk, sikce eipnike. Anyaik wekseura, sik eipnike talak ara, na ap, yuk nang tonap neika kum wekelbeipu. Tonda, na ap, yuk nang tonap yu upsuk ati, wabuka kum opdapue.

1 Korintus 11:28

Aning ati ara, yatanye do nirya, ‘Amek ap, adin ning roti ap, dipnun’ tenen, kintinipnulye talak ara, ‘Na talima ak ara, malye winin ning tuba aupmanil do, kum do?’ tenen, moubuka tenipdelirye, atalak aniryuk malye winin ning nirya akunum bataklyopura, aminyan denamle. Talye kanye bobuka dena meme. Anggun talima ak malye ning tuba aupmalye bukni, talye kanye bobuka dipmunyopura, Allah arye, anggunti wenepnamsile.

Yakobus 4:8

Allah el tam kipdopmunyopura, Allah elce anggun dam unamle. Sik malye ning paliplibuk, taruk mek liklamak touk, anggun malye winimunye nang ara, anggun malye ning batakanamlulume. Anggun kanye bitinye kisululbuk, kanye bokoltosulul nang ara, anggun kanye talima noutam malye upsilye ning nirya batakanamlulume. Allah arye nyasilye yupu kekebuka wininamlulume. ‘Tonok kanye bobuka unamlum’ tenen, nyapsine.

1 Samuel 16:5

Nyabikbuk, Samuel birye, tamubuka nyabuk. “Diba. Narye, anggun teleb ulina ati yanmane. Tonda, na kam tuba ulamle ning dobuka, Allah el si erena ati arepnune. Ati, anggun malye ning nirya batakuka, anggun kanye talima kintinipmunce, mek kekmunce, teleb baju akunum ongopmunyopura, anggun ap, na ap, neika Allah ati kam ning obuka, elti, arebibirye, el si erenamabe,” nyabuk. Nyabukce, Samuel birye, Isai ap, el mapu ap, ‘Allah ati kam ning arepting’ tenen, teleb kipdeibukba, sik kanye talima noutamak ara, teleb tenen kintinibikce, sik yuk-yuk kintinibikopura, anang ati nyabuk. “Ura, anggun ap, na ap bulubukap, Allah el si erena ati, ining ulamle ning obuka, neika arepnuyabe,” nyabuk.