Yohanes 10:28 - Eipomek28 Narye na mapu ati, kam pia una deiyok ning arepnibuk, pia kam unamake. Sik pia kum dipnamake, kume, kumdanamake. Yata nang do nirya, na mapu na taruk pum bisik talinibuk, yuk nang arye dalubuka kum dopropnitinge. အခန်းကိုကြည့်ပါ။ |
Yohanes 10:28
60 ပူးပေါင်းရင်းမြစ်များ
Tonda, yu nang arye nati, ‘Anye bira, opnuyap’ tenen, ninye onak akunum kintibikce, ninye on ning, el si jaring, dungnubuka deibika noutam arye, ‘Ance lobuka lyepnamnilam’ tenen, moropkine na nio! Aning ara, talye ati, kum morokunune. Kume, ‘Na on nang arye, opnikcak’ tenen, an damuk yanuka unune. Tonda, anda, na Lyena Deiyoknye unilyama ati, antibuk morokunune na nio.
Aning ara, talye ati kum nyapsine. Deiyok ara, ani. Sik diksukumuk wininyak ninye ara, Allah el si Yahweh arye, sik aninye ati, weik arye bico tenelirye, pia melilule. Tonda, yata ninye do nirya, nun ni koproba Allah ati, ‘Elda weik mambulnye ulula anya arye, el amu tamuk ubirye, elce nyalul yupu moubuka talibibirye, diksukumuk wininamabe’ tenen, telebuk wininyak ninye nirya ara, Allah arye, pia kum bataknamle. Aninye ap, sikce deibikceba, dadeipdanin banamak ninye babye, Allah arye aninye nirya ati, pia kalikuka melinamle. Bukni, sik malye winin ninguk, talibuka malyeuk wininyak ninye ap, sikce deibikceba, dadeipdanin banamak ninye nirya babye, Allah arye aninye ati, wenebuka oplyopura, sik nirya kum upra banamake.
Aning ara, talye ati kum nyapsine. Deiyok ara ani. Diksukumuk wininyak ninye ara, yuk nang arye, sikti, malye kipdeibikiba, ikin upmatu babye, aminyan talak, tuba tamubuka tonap, teleb upnamake. Aning atonun, yu nang arye, like tekbarye ubuka, sik teleb unyak ninye ati, malye winibicopura, mambul kanye bobuka ikin upmatu babye, aminyan talak tuba tamubuka dukdongobikirye, telebuk upnin banamake. Diksukum wininyak ninye ara, teleb wininyak bukni, malye wininanye bira, weik kanye imun ning, el damak yalyopura, atalak aryuk, malye kanye bobuka batakalule.
Bukni, dan ninye do nirya, ‘Israel ninye optibye,’ tenen, ninye on ning kintinibikirye, olyasiting bukni, kum winipmanto upnamake. Aning atonun, dan nang do nirya, anggun Israel ninye ati, ‘Malye kum winipmakibuk malye yupu sik deice nyapnuyabe,’ tenepnamsiyak nang ara, urdemuk unamake. Sikce nyanamsiak yupu ara, talye urdemuk nyanmatinga babye, nong kum upnamle. Tonda ayupu nyanamsiyaka deice arye malye kum kipdeipsitinge. Narye melipsiniba, anggun Israel nang arye amalye yupu talamak nang ati, yupu sekmunyeba, yupu kum asa unamake. Nara Allah Yahweh arye anggun Israel ninye ati nyapsine. Arup nyapmasin yupu nirya ara, na amu tam unamlum nang melipsiniba, dolonamlulume. Yuk ninye arye anggunti, malye yupu nyanamsiak bukni, na Allah arye anggunti pia melipsiniba, teleb upmunyopura, yuk mutuku ninye nirya arye, kel biknamake. Ara, ‘Se, Israel ninye ara, dipkoprob Allah el ‘Naʼ tenen, ninye unyake,’ tenen, kel biknamake. Narye dekna arin ning ara, pia teleb una deiyok ning arepsiniba, telebuk unamlume. Allah arye Israel ninye ati nyabuk.
Se, na Allah arye wipdeiamse ninye nirya anggunda, na dam anyuk yamunce, na yupu moubuka kekenamlulume. Na dam yamunce, kekepnumunyopura, narye anggunti dipkoprob pia kam un ning arepsiniba, anggun dib kanye ara pia kam unamlume. Anggun apu koproba Raja Daud biti, ‘Bico tenepkinirye, pia melinamkine,’ nyapdeiamse ning ara, anggun Israel ninye ati bico unilya ati, batakna kumce, pia dipkoprob aninguk wininamsine. Awininamsin ning ara, min kum, kum danmanto ning pia aunamle. Kum bataknamsine.
Anggun malye winilamlum deiyok nang ara, Israel ninye ton kum kalikinamlulume. Narye, winiryuk nang wipdeipnirye, sik deiyok kibika talipnamak nang deipniba, sikce Israel ninye talibikirye, kalikinamake. Ara, domba weina deiyok nang arye, sik domba basam ati, teleb ubuka weilamak touk, anang arye Israel ninye ati, teleb ubuka kalikikirye melinamake. Atalak ara, na mapu tonoknye babye, kum wangapnamake. Tonda, ‘Se, yata wiriptibye do?’ tenen, ilil kum unamle. Aning ara, dipkoprob winipnamne. Na Allah Yahweh arye nyapsine anya arye, aning ara nong upnamle.” Allah arye nyabuk.
Israel ninye arye, ‘Se, nun telebak utibye’ tenen, engebuka dilamik ninye ara, morolamikba, na Allah ara, pia weik yukak ulamse bukni, sik dam lak kibuka yanamse. Sik ti nyapse. Ara, se anggun Israel ninye ati, minop talak arye anggunti, pia bico tenelamsisirye, kum bataknamsine. Ati, wini talak arye dipdongobuka, doyanamle talak nirya ara, anggunti bico tenesinirye, pia kalikuka, tuba melinamsine.
Atalak arye dipdongobuka doyanamle talak ara, tonoknye birye, el kwit yuknye biti, ‘Anda Allah si kel biknalame,’ nyabuka, peterelamik atonun, tuba kum wininamake. Ara, weik nang babye, mitik nang babye, na siuk akunum kel bikikirye, ‘Nun ni koproba,’ nyabuka, na damuk unamake. Ara, urdem ati kum bukni, deiyok ara, sik malye winilamice ning babye, narye pia kum kipdeipnamne. Aning nirya ara, kilipnirye, kum kipdeipnyopura, tuba tamubuka tonap, sik malye winin ning nirya kum tenepnamne. Ayupu ara, na Allah Yahweh arye, akunum nyapsine ati, dipkoprob nong upnamle,” Allah arye nyabuk.
Tonda, atalak ara, anggun dam narye pia nyalina teleb yupu nyapdeipnamsine. Narye anggunti tuba tonap, pia kum bataknamsine. Anyapdeipnamne yupu ara, pia min kume kum danmanto bukni, pia teleb kilinamsine. Narye, ‘Anggunda tuba tonap bataknikcakʼ tenen, narye anggun kanye tenen ning ap, anggun talima ap, tamubuka teleb kipdeipniba, anggunda na Allah ati ilil upsiliba nati si erenamnulume. Sikda na si pia erenikirye, yuk talak ara na dam arye batakuka, pia pera sukum kum binamake.
‘Anang ati, diba kum tenenamlulume,’ nyapmasina ara, urdem ati kum nyapmasine. Deiyok ara ani. Aminyak talak yanamak nang ton nang arye, ‘Nunda Kristus unyabe,’ nyanamake. Ton nang arye, ‘Kume, nunda Allah el yupu ap, aminyan winipnamle ning ap ati, lake nyana deiyok nang unyabe,’ tilila ati nyanameke. Aning ara, ‘Sik yuk nang arye, nun mambul pil eipsikirye, dib tenebuka melipnamsiak’ tenen, ninye arye winipmanto kum pil donamake. Aninye ara, isa mikip deice arye, ninye arye kum winipmanto pil donamake. Ton nang ara, ‘Apil dolamipyeba yuk nang eipsikirye, ‘E, anang ara, dipkoprop Allah el mikip deice aryuk apil donyake,’ tenepnamsiak’ tenen, mambul pil ton donamake. Apil-afil nirya dopnamak ning ara, Allah el min arye wipdeiamuk ninye ara, ‘Allah batakuka, nunuk melipnamsiak’ tenen, yanuka pil donamake. Sikti lila yupu nyan nang arye wininamak bukni, Allah wipdeiamuk ninye arye, atilila ning dib kum tenenamake. Aninye ara, Allah el ‘Na’ tenen, ninye unyaka anya arye, tilila ning ap, tilila yupu ap ati dib kum tenenamake.
Ance nati, Weik Ninye Deiyoknye winina deiyok ning arepnulum deice arye, ninye mutuku-mutuku nirya ati, sik deice tam upniba, sikda na amu tam unyake. Winibdeipnuluma ara, talye ati kume. Ara, ance, ‘Na akunum wipdeiyamse ninye, na mi ati areamse ninye nirya ati ara, bol koplobuka pia kam una deiyok ning arenamle’ tenen, ance nati, ninye deiyok ning areamnulume.
Yata nang do nirya, Allah el Mi Koprop ati, diba tenebicopura, Allah arye kam una deiyok ning ariliba, pia kam unamake. Bukni, Allah el Mi Koprop ati, ‘Nun like’ tenen, batakice ninye nirya ara, Allah arye aninye ati, yu kiplirye, weik arye wenebuka opnamle ati, kam un ning kum dopdopnamake. Sik dibikibuk, tuba tamubuka tonap, kam pia kum unamake. Allah arye aninye wenena ati, el yu sik deice tuba delinamle. Yohanes arye ayupu nirya nyabuk.
Bukni, yata ninye do nirya, narye arebsinye mek dobuka dibikcopura, tuba tamubuka tonap mek kum patapnamle. Anggun mek patana kum bukni, na arebsinye mek dopropmunyopura, anggun kanye talima noutamak arye, mek pu atonun upsilyeura, mek pu doplirye, panabuka saklamle atonun winipnamsile. Winipnin balamlya ani, aminyan talak ara, pia kam unamlume,” Yesus arye nyabuk.
Yesus arye ayupu nyabukce, ayupu dukdongobuka nyabuk. Na dipkoprop yupu nyapsine. Yata ninye do nirya, na yupu kekebikirye, na dopdeipnuknye Allah ati, dib tenebiceura, akunuma, adiparyuk kam pia una deiyok ning doprobikirye, kam pia unamake. Sirya talak ara, Allah arye aninye wenebuka kum opnamle. Ara, diba tenena ninye ara, sikce diamikce ninye tam batakuka, kam pia unamak ninye tam akunum kilonyaka ati nyapsine.
Narye nyapsine. Talye lyupmanto din ning ati, ‘Kanye deibuka dopropnamap’ tenen, pil dona meme. Aninguk tenena kum bukni, nara Ninye Mi Koprop Atonunye arye, din ning atonun ning arepsitinye aning ara, arepsiniba dopropmunyopura, aminyan pia kam unamlume. ‘Aninguk doproptibye’ tenen, pil donamlulume. Ninye Mi Koprop Atonunye ati ara, nun ni Allah arye elti, kanye akunum deibuke,” Yesus arye nyabuk.
Sik Stefanus keil donokuka, tuba onmek talak ara, Stefanus arye Allah ati morobuk. “Na ni Yesus anda na ni koprop ulyama ati ance na kanya talima dopropnilyame,” nyabukopura, sakukabukce gutam tuku dipdongobukce, weik yupu arye ayupu nyabuk. “Naio, sik amalye unmak ning ati ara, ‘Ance kum wenepnamlyame’ tenen, moropkine,” nyabuk. Stefanus ayupu nyabukopura, adiparyuk dibuk.
Ura, nun akunum kel bikupe. Tonoknye Adam birye malye winibuka, adeice arye ninye im sirya, mutuku sirya nirya dipri yangalamika ani, tuba dibinyabe. Bukni, pia teleb ning babye, akunum kel kinyabe. Ara, Allah weik arye bico tenyamsukce, el kanye aryuk talye arisilye ning akunum kintinyamsuke. Ara, Allah arye nun malye winin ning kilipsilirye, lyesulule. Elcuk, “Anggunda diksukum un ninye,” nyabuka, teleb kibuka kilisulul ning ara, akunum kintinyamsuke. Ati, adiksukum una deiyok ning kintinipsuk ning ara, dipkoprop diba tenebuka doprobice ninye ara, kam pia unamake. Ara Yesus Kristus ap, kanye talima dukdongobuka neika unamake deice arye, el mikip arisilya deice arye, malye winin ning nirya malye kiyamikirye, telebuk unamake.
Tonda, Kristus el pil dopsuka deice arye, Allah bico tenesilirye, el kanye aniryuk melibuka tuba-tuba lyesiliba, nun lyen ning dopropbibirye, nun kanye talima bokoltona kumce, pia batakna kumce, aninguk talibuka unyabe. Yesus arye lyepsuka ara, kume kum dasutue. Aning babye, Yesus diba tenenyaba deice arye unyabe. Tonda, ‘Allah arye el pia teleb ulul ning nirya, arepsiliba, nun babye pia telebuk wininamap’ tenen, kintinibibirye, kanye deibuka dinauk unamabe.
Allah arye tukwak ninye ati, weika arye bico tenelamsuka deiyok ara, nyapnusine. Ninye im sirya, mutuku sirya nirya, malye winilamika deice arye dibinauk upra yangalamika ani, malye winina ap, dipna ap amu tam ulamik. Bukni, Allah bico tenenyamsukce, Allah el kanye aryuk, “Sikda diksukum un ninye,” nyabuka, teleb kibuka delisulule. Minop talak ara, malye winina ap, dibina ap mikip weik ulamuka anya arye, ninye nirya aning amu tam ulamik. Wini talak ara, Yesus pia diksukum ulamuka deice arye, kam una deiyok ning arisulul ati ara, Allah elcuk bico tenesilirye, talye melisulul ning amu tam unyabe. Nun Deiyoknye Yesus Kristus diksukum ulamukce, mambul pil dopsuka deice, Allah arye, “Sikda diksukum un ninye,” nyabuka, teleb kilisululba, pia kamuk unamabe.
Wini talak ara, nun kele. Kristus obikba el ining biyuka deice arye, nun malye un ning nirya kilipsukba, Allah arye, “Yesus apil dobuk deice arye aninye ara, diksukum ninye ubuka deipsine,” nyabuka teleb kipdeipsuke. Aning ati ara, nun kele. Yesus ap kanye talima dukdongobuka unyaba deice, Allah arye malye winin nang nirya ati, yu upliba sikti, lepsisikuka bokeiplirye, amalye winin ninye obuka sirya daknamle talak ara, Kristus arye nun diba tenenyap ninye ati lobuka lyepnamsile.
Aning ara talye kum nyapsine. Deiyok ara nyapnusine. Ara, nunce dengna ning dolona ati, pil dobibiba, sik pil deiyok nang arye menenga ning, yo bok arisinyak touk, malye winin ninguk tenebuka, pia malyeuk winipra balamibyopura, sirya talak ara dipnamabe. Dibibyopura, Allah ap neika pia kum unamabe. Bukni, Allah bico tenesilirye, el kanye aryuk talye arisilye ning ara, nyapnusine. Ara, nun Deiyoknye Yesus Kristus ap, talima dukdongopsuk deice arye, sirya talak ara kam bukeipsilyeba, Allah ap pia kam unamabe.
Ura, na kayapo, weik mambul yupu ara nyapnusine. Yata ninye do nirya, Yesus Kristus ati diba tenebikirye, el ap kanye talima dukdongobuka neika unyak ninye nirya ati ara, Allah arye, “Anggunda malye winilulume,” nyabuka kum wenepnamsile. Yesus ap kanye talima dukdongobuka unyak ninye nirya ati ara, Allah arye, kum bataknamsile.
Ayupu ara talye ati kum nyapsine. Deiyok ara ani. Ara, minop talak Allah arye akunum tenebuka kel bikamsukce, ‘Sikda, na mapu unamake anya arye, aninye teleb kipdeipniba, na Mi Kopropa el teleb kibuka ulul touk, sik babye atonun unamak’ tenen, akunum wibuka deiamsuke. ‘Unamake’ tenen, wipdeiyamsuka deiyok ara ani. Ara, Allah arye, ‘Na mi kopropa Yesus Kristus ara, minyuma du mi atonunye ulyopura, el weit yapu ara, noutam mapu atonun kibuka tabaknin bakirye, weik upra banamake,’ tenyamsukce, wipdeiyamsuka ati nyapsine.
Dipkoprop, Allah elda, ninye tukwak ninye ati, bico tenelule. Allah arye, pia diksukum ninye nirya ara, el mapu kibice nang ara, elce talibuka melilule. Sik nirya ara, Allah el yan dam gutam tuku dipdongobuka, el si erenyake. Tonda Allah arye, ‘Wininamlulume,’ nyapdeiamuk yupu ati, dib tenebuka talibikirye, dobolbanyake.
Tonda dipkoprop na kele, anggun talima noutamak, teleb pil deiyok koubsuknye bira, Allah el uka. Allah arye pia apiluk dopnin balamsilirye, melilamsilya ani, aminyan talak sirya daknamsile. Ara, Yesus Kristus arye ninye yupu bokolina ati, yanamle talak ara, Allah arye anggun talima noutamak teleb pil dosilye ning ara, sirya daknamsile ati nyapsine. Aning nirya ara, na dipkoprop weik kel anya, weik kanye deibuka, anggunti Allah morosunune.
Sik malye nang ati ara, winipnamle bukni, anggun Tesalonika ninye ati ara, nun adiparyuk, “Telebe,” nyabuka, Allah moronamsinyabe. Na weit yapu atonun nang, na Paulus arye nyapsine. Allah arye anggunti, el kanye deipsukce, aning-aning nirya kweipdeibuk talak danerye, ‘Aninye ara, na ning,’ tenyamsukce wipdeiamsuke. Wipdeiamsuk deiyok ara, talye ati kume. Ara, ‘Allah, na Dib Kanye arye, anggun talima noutamak pil dopsilirye, teleb kilisulul ning ap, sikce na dipkoprop yupu ati, dib tenenyak ning ap, deice arye, lyepnamne’ tenen, wipdeiamsuke.
Weik malye ulamse bukni, Yesus Kristus arye nati, ‘Aweik malinye talye merekukua optinye bukni, luba kipnilirye, kanye arepnibuk, melibuka lyepnyopura, yuk nang eibikirye, Kristus ara, bico tenesululnye, dib tenepnitinge’ tenen, lyepnuke. Kristus arye, malye winin ninye ati, bico tenesilirye, ‘Se aminyan diba tenepnitinge’ tenen, minop wena kum arye, namin kisilirye, kum batakasulule. Ati, aning atonun winipnuka deice arye, yuk nang ton eibikirye, ‘E Yesus dipkoprop namin kisulule’ tenen, kel binamake. Kel bikmakcopura, Yesus ati, dib tenebikibuk, bol koplobuka pia kam una deiyok ning dopropnamake. Yesus arye, ‘Paulus ati winipse ning, yuk ninye ton eibikirye, kel biknamak’ tenen, nara winipmantonye ati, winipdeibnuke.
‘Apil donamle’ tenen, wipdeipnuka ati, apiluk donuna ati ara, yuk ninye arye, ‘Nun lik’ tenen, ikin ning weika arye, na nong deice delininyak ati ara, na kanye mambul kanye bobuka, ikin unulule. Bukni, ikin ning na nong deice upnilya babye, narye, ‘Se’ tenen, alye kum dakanune. Ura, talye ati kume. Deiyok ara, ani. Na kanye teniltona pia kum aniryuk, na diba tenyamsinye bira, na kele. Narye Allah ati, ‘Pia moubuka kalikinamnel’ tenen, el deiceuk deiamse ning nirya ara, min kum kum datue. Wini talak arye dipdongobuka, Yesus tamubuka el yanamle talak bukni, anoutam talak nirya ara, Allah arye moubuka kaliknilirye, dinamnile. Na Paulus arye nyapne.
Yesus ara, pia kam unamla anya arye, ‘Allah ap talima dukdongobuka unamap’ tenen, Yesus ati diba tenebuka, el deiceuk Allah el dam yanamak ninye nirya ara, Yesus arye pia lyebuka sirya dakasulule. Ninye lyena pil ara, etekdop asa ubuka don pil dosulule. Tonok ning babye kum batakalule. Winisilya deiyok ara, ani. Ara, pia kam ulirye, elti, diba tenenyak ninye ara, ‘Allah arye, elti, diba tenepce ninye melinamle’ tenen, Allah dam bilirye, yupu pia melibuka nyalule. Nun melina ati, Allah ati tuba morosulule.
Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.
Kam Una Deiyoknye, Yesus tukwak mutuku yayukba, eibupopura, Yesus arye nun 12 nang wipdeiamsuke. Winyamsuk talak arye, el ulamuk ning nirya ati, laka nyabuka peterenyabe. Pia Kam Una Deiyoknye bira, el Li Allah ap neika deiulamrik bukni, nun dam yayukura, elilamupe. Elilamuburye, tonda, Pia Kam Una Deiyoknye, Yesus ati, laka nyabuka peteresinyabe.
Anang ara, nun batakuka nun kan-kan arye yukak bindobik bukni, nun kanye ap, sik kanye ap neiktoto kume. Nun diba tenebuka, nun kanye tenenyap atouk nang ulamtingtoura, nun batakna kumce, nun ap neika ulamtibye. Bukni, sikce nun batakuka bindobikce, yuk tam kipdobikbuk, eibupurye, sik ulamik ning kel kibupe. Ara, ‘Aning sik kan-kan danerye, tonoknye babye ton, nun diba tenebuka kanye tenenyap touk, sik babye, diba kum tenenyaka’ tenen, kel bikamubu.
Na si ara, Yudas arye, Yakobus el weit koprop arye ayupu sekeipsene. Nara, nun deiyoknye Yesus Kristus arye, talipnukura, el piluk donune. Ayupu sekeipsin nang ara, nun ni Allah wipsukce, bico tenesilirye, nun du Yesus Kristus arye, ‘Malye ning arye, malye updeiplyak’ tenen, melibuka kalikisulule. Anggunti ayupu sekeipsene.
Allah arye anggunti, bico tenesulula anya arye anggunce, ‘Allah arye, tuba kanye delinamsil’ tenen, elti anggun talima ap, nong ap, arepmunce, el ap, el yupu ap demuk talibuka dobolbanamlulume. Tonda, ‘Dan talak dolyanamsil do?’ tenen, talima kintinibuka dinamlulume. Yesus arye min kum dolyanmasilye talak ara, Allah ati diba tenebuka talipmunce, dobolbanamlulume. Nun malye wininyaba ati, nun deiyoknye Yesus Kristus arye, ‘Bita merekik’ tenen, talye lubaparabuka weneplopbataksutu bukni, bico tenepsukce, nun ap, el ap, neika pia kam unamaba ati, diba dolyanamsile.
Allah arye anggun nirya ati, ‘Yuk malye bisik bimunyak’ tenen, talibuka balirye, melibuka disululnye ulule. Allah, el melisilirye deice arye, malye kum winiyabe. Ara, pia ati, kalikuka melisulula atia. Tonda, Allah arye el mikip arisilirye, el melisilya deice arye, pia daulamibya ani, sirya talak ara, nun nonge dopsilirye, malye ning nirya pia kum kipdeipsilyopura, el dam ara, pia teleb dirina damak deipsilyeura, kanye deibuka, pia telebuk unamabe.
Ninye ton, Allah ati, ‘Nun ni koproba ani,’ tenekirye, batakna kumce, el yupu moubuka talibikirye, dobolbanyak ninye ara, sik pia namin kanye bobuka ulamak ninye ara, Allah Yahweh arye, sikti, kalikilirye, pia teleb ubuka melinamle. Bukni, malye un ninguk, pia talibuka unyak ninye ara, amu tam deipliba, sikda kuna sukumuk pia unamakeʼ. Aning kum kipdeiplyopura, ninye arye kum elinamake. Aning ara, talye ati kume. Ninye nirya ara, sik mikip deice aryuk, teleb ubuka kum unamakeʼ. Allah arye melisilya deice arye, teleb unamabe.
ကြော်ငြာတွေ