Tonda, urasin teleb ning, emas arye laka ongon ati, anyapmakin yupu sekuka deipmunce, Harun bira, anyaik pil donamle talak nirya ara, el kisok deice koupdongopnamle ning, el si serban taram tam, koupdongobikcopura, aning pia ongonamle. Ayupu sekuka moupdeipmamunye ning ara, Harun el kisok kalulamak bukni, el asok deice tam deipnamlume. Winibuka deiplyopura, anggun Israel ninye arye, malye wininyak ning deiyok ara, el Harun deice winipnamlume. Ara, Israel ninye arye, ‘Allah arye nun malye unyap ning namin kipsilirye, lyepnamsilʼ tenen, kam un ning obuka, nati arelyanganam ninyak ning, aning-aning weik aupnamle bukni, anggun malye wining deiyok ara, Harun el deice uk deipniba, aupnamle. Ati ara, laka kina ati, emas deice amambul yupu sekuka deipminba, Harun el kisok deice ongonamle ning ara, na Allah Yahweh, ayupu eipnirye, sik nirya ati, ‘Telebe, Israel ninye sik malye ning kum kipdeipnam narya. Ati, na dam yatinge,’ tenenamle. Tonda, adeice arye, sik Israel ninye malye unyak ning aupmalibuk, teleb aren ning, na Allah Yahweh dam arelyanamnulum ning nirya babye, ‘Teleb,’ tenepnirye dolonamne.
Yohanes 1:29 - Eipomek29 Anang arye Yohanes ati asipdeyik sum bukni, mapmeka, anyuku sum ara, Yesus arye Yohanes el dam yanganmokba, Yohanes eibukce, nyabuk. “Ninye mutuku-mutuku nirya, sik malye winin ning kum kilina ap, ‘Sik kum dipnamak’ tenen, pununa ap deiyoknye, Allah arena ati Domba Mi Atonunye bira, ayanmal atia. အခန်းကိုကြည့်ပါ။ |
Yohanes 1:29
65 ပူးပေါင်းရင်းမြစ်များ
Malye nang arye obik bukni, Allah el si Yahweh arye, minop talak danirye, ‘Anye bira imun kanye bobuka dadipnamle,’ tenelamuk touk, nun pununa ati dipsuke. Tonda Allah Yahweh arye tenelamuk touk, el nong uk dibuka deice arye ninye malye wininyak ning nirya kum kipdeibukce, tukwak ninye sik malye winina ati dibuke. Akunum dibuk bukni, kam buklirye, el unamle talak babye weik malamlirye, elce deipliba dadeipdanin banamak ninye eipnamle. Anye deice arye, Allah Yahweh arye, ‘Wininamne,’ tenelamuk ning nirya, anye pil dopliba, dipkoprob nong upnamle.
Allah el si Yahweh arye, wipdeibukba, pil donamlanye bira, imun kanye bobuka, ikin deice aryuk ulamikca ani, akunum obikiba dipnamle. Aning akunum winiplyopura, kam bukuka kanye deiplirye, imun kanye bomuk ning, nong upnamle ning eilyopura, elce, ‘Na akunum upne,’ tenen, kanye deipnamle. El imun kanye bobuka unamla deice arye, ninye tukwak ninye weik, elce sikti, ‘Akunuma, narye aninye ati, akunum teleb kipdeipmane,’ nyapdeipnamle. Adeice sik kanye talima teleb ulinamle. Na Allah ati pil donamnilnye birye, ninye mutuku-mutuku nirya malye wininyak ning wenena ati, el nong deice uk dobuka deipdanamle. Winipnamla deice arye, na Allah arye ninye mutuku-mutuku nirya noutam arye ninye weik namin kipnirye lyepropnamne.
Allah el wipdeibuknye bira, nun malye ning lyena ati, yu nang arye yu ubukba ikin ning weik el nong deice deibik. Bukni, yupu nyana kumce, talye tunim altaknauk ubuke. Elce tamubuka, ‘Yata deiyok ati wininmaniak do?’ nyabuka, malye yupu kum nyabuk. Domba basam opnamaca ati, dobuka bobanmace talak yupu kum talamle touk ubuk. Tonda domba basam potong kon nang arye, el potong konmace talak, yupu tana kumce, kanye lamapdongobuka dakeiyam asa arye, kintinililamle touk ubuk. Ara, yu nang arye elti, malye yupu weik nyanmek talak ara, elda ayupu kekena kumce, talye kanye bobuka ulamuk.
Tonda tamubuka Allah el dam yamunce, anggun kanye imun usilye ning nirya boyamunce, Allah ati moronamlulume. Moronamlum ning ara ani. “Se, nun ni Allah, ‘Nunce anti moropnuyap yupu ara kekepsutume’ tenen, moropnukiyabe. Ara, nun malye wininyap ning ap, tenepye ning ap nirya ara, ‘Ance namin kipsimince, nun malye winin ning kum daneipsiminyopura, nunti teleb kipdeipnamsilam’ tenen, moropkiyabe. Winibuka teleb kipdeipsiminyopura, nun nirya arye tuba tonap, an siuk erenamkiabe. Aning ara, nyalina yupu deice arye nyapkipye touk, dipkoprob wininamabe.
“Seʼ', anggun malye winipmarume. Yata deiyok ati, Israel nang arye, ‘Nun malye winipmapu ning pununa ati, Allah arye biklirye, namin kubuka, kum daneipnamsilʼ tenen, boyanmangu kambing basam nirya ara, uku dongopmarumba, uku dipmale. Awinipmarum ning ara, teleb kume. Teleb ning ara, anggun ton bokuka dopropmatumce, pia teleb sukumuk, Allah el si eren aik urasin tam, pia teleb lek sukum dam bobinmatumce, aning dipmatuma. Deiyok ara, ani. Akambing basam arepmangu ning ara, Allah el kanye ara, ‘Aning ara, pia teleb lek ning ulule,’ tenelule. Tonda, Allah arye, alek ning ara, sik imam nang dinamake. Imam-imam nang arye, akambing tup dipmak deice arye, ‘Israel nang, sik malye wininyak ning kilibuka, sikti, teleb kipdeipnamleʼ tenen, arisulule. Israel nang, aning arepmangua deice arye, ‘Allah arye, nun malye ning ati, wenebuka oplopsutu bukni, aning arebikcopura, punupnamsile. Allah arye nun malye winin ning kilibuka, teleb kipsilirye, lyepdopnamsilʼ tenen, arepmangue.
Allah arye Yehuda tam unyak nang ati, tonap teleb kipdeipnamle talak ara, sik malye ulamik ning ap, tuba malye unyak ning ap ati, kum daneipnamne. Ara, Yerusalem mutuku weik asik noutam unyak nang ap, tonda Daud birye deibukba, dadeipdanin yanamak nang ap ati, narye arepnyeba, weik mek balamle atonun kibuka, banamle. Winipmanto ara, abanamle mek ara, sik malye winin ning nirya, mek likuka lyenamle. Ara, Daud tam nang ap, Yerusalem mutuku noutam unyak nang ap arye, malye wininyak ning ap, isa si erenyakce wininyak ning nirya ara, narye lyebuka, kum daneipnamne.
Allah Yahweh arye, Harun biti nyabuk. An ni koproba arye, deiamsuk mapu nirya ap, an ap, an mapu ap, tonda, sik Lewi yala nang nirya ap ara, na si erena ati, doltakne tenda aik noutam bukni, pia teleb aik, ninye arye malye-malye weik winibikcopura, sik amalye winipmakce ning ati dekna ara, sik Lewi yala nang nirya arye, ikin ning weik dolonamlume. Bukni, na si eren aik pum tam, pil don ning ara, yuk ninye arye, malye ning weik winibiceura, amalye winipmakce ning ati dekna ara, an ap, ance deiamlum mapu ap, narye wenepsiniba, anggun dem, ikin ning dolonalume.
Bukni, sik Lewi yala nanguk ara, atalak arye deiyok koubuka, na si eren pil dona ati, sapi bol arye doltakne tenda aik, kintinibuka domikce noutam, pil donamlume. Tonda, anyaik noutam unamle pil nirya ara, anggun Lewi yala nang aryuk, apil deiyok talibuka donamlume. Israel nang arye, anyaik ati, malye updeibikcopura, anggun Lewi yala nang aryuk, tuba tonap teleb ulin piluk donamnyake. Aning ara, wini talak arye, dipdongobuka, dounamle talak noutam nirya ara, anggun ap, anggunce deiplumba, dadeipdanin banamak Lewi nang nirya ara, aninguk talibuka unamnyake. Tonda, sik Israel yala nang, yuk-yuk ning nirya ati, amutuku noutam arye bokuka, wa tuku ton arepneba, dopropnamake. Bukni, sik Lewi yala nang ara, Israel nang unamak mutuku noutam ara, sik wa wina ati, tuku ton, na arepneba, anggunce wa tuku talibuka, kum unamlume.
Musa birye, Allah nyapmok touk winibuk. Ara, kat ning el si ara, tembaga dobukabukce, ninye on kwatima urasin atonun puturubuka kintinibukce, cang yo deice deibukopura, yata ninye do nirya, kwatima akunum si topmekak bukni, Musa birye tembaga dobuka, puturubuka deibuk kwatima urasin atonun ning, dinmek nang nirya ara, adiparyuk kum dibik, kam ulamik.
Maria arye sal mi deipnamle. Deiplyopura, el si Yesus nyapnamlyame. Yesus nyapnamlama deiyok ara, ‘Elda Ninye Lyenanye ulule,’ tenena ati nyapnamlyame. Allah el mapu nirya sik malye wininyak ning ap, malye tenenyak ning ap ati, ‘Allah arye wenebuka oplyak’ tenen, Yesus arye aning nirya kum daneiplirye, ninye weike lyepnamla ati, ami el si Yesus nyanamle.” Malaikat arye Yusuf ati nyabuk.
Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.
Allah arye diba tenen ninye nirya ati, kam pia bukeipnamsila deiyok ara nyapnusine. Ara, Allah arye ninye mutuku-mutuku nirya ati, bico tenenyamsukce, kanye weik arye areamsuka ati, el Mi Koprop tonokuk ulamuk bukni, tukwak ninye lyena ati arepsuke. Ara, ‘Yata ninye do nirya, el Mi Koprop ati, diba tenebicopura, pia kum dipnamak bukni, bol koplobuka kam una deiyok ning arepnibuk, pia kam unamak’ tenen, el mi tonok arepsuke.
Amutuku ninye dib tenebikce, akil ati nyabik. “Kume, nun ka kilo. Arup ara, ance nyapmasulum yupu deice aryuk dib tenebupu bukni, wini talak ara, elce peterepmasilba, nun babye kekepmapa ati, winira nun kele. Anye bira talinye kume. Elda dipkoprop ninye mutuku-mutuku nirya Lyena Deiyoknye ulule. ‘Yuknye kume, el akunuma,’ tenepmabe,” nyabik.
Im deice arye yayuk roti kwaning, kam una deiyoknye bira, ara na uka. Akwaning nyapmasina ara, dobuka diplinye bira, nong dipmalya babye, pia kam unamle. Domon yupu deice arye, kwaning nyapmasina ara, na nong atia. ‘Ninye mutuku-mutuku nirya lyepnebuk, kam unamak’ tenen, na nong arepsine.” Yesus arye nyabuk.
Aning ati ara, Allah el laka teleb yupu weik mambul deiyoknye bira, elce nyapdeipnukba, anggun kekena ati peterepsise touk, tonap nyapnusine. Minop talak Allah el yupu laka nyalamik nang arye, sekeiyamsik touk, Yesus Kristus arye, nunti, ‘Sik malye winina ap, tenena ap ati, kum kipdeipnirye lyepnamne’ tenen, nun pununa ati dibuk.
Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.
Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.
Allah arye nyapdeibukba, Musa arye sekeiyamsuk yupu, mem yupu nirya moubuka talibikirye, diksukum kibuka kum dobolbanyak ninye ara, “Allah arye weneplirye, oplopnamle,” nyalamuk yupu aupmale. Bukni, Kristus arye nun tukwak mutuku ninye ati, el bidamnye nong arepdayukba, yu nang arye obikba, nun malye ulamubu ning lyepnamsuka ati dibuka deice arye, lopdeipsukce lyepsuke. Minop talak ara, mem yupu amu tam ulamububa, amem yupu arye tapu koulamsuk bukni, Yesus arye pil dopsuka deice arye akunum loplopsuke. Anyapmasin yupu ara, talye ati kum nyapsine. Ara, Allah yupu sekamik yupu noutamak aubuk yupu deice arye kel kinyabe. Ayupu ara ani. ‘Wanwanun yo deice deibuka olamak ninye ara, Allah arye aninye ati wibukaplirye, wenebuka oplopnamle.’ (Ulangan 21:23) Aning ati ara, kel kinyabe. Nun malye winina ati, Allah arye talye luparabuka oplopsutu bukni, Kristus wanwanun yo deice obikba, dibuka ara, talye ati kume. Nun malye winina ning pununa ati, dibukce lyepsuke.
Yesus elce, ‘Ninye mutuku-mutuku nirya sik malye unyak ning kum daneipnirye, dekuka lyepnamne’ tenen, elce el nonguk arepsukbuk obik. Ara, nun malye winin ning ati, talye oplopsutu bukni, Yesus arye nun pununa ati dipsuke. Allah arye, ‘Teleb talak ara, atalakuk,’ tenyamuk touk winibuk. Allah arye, ‘Ninye nirya lyeptinye’ tenen, patalamuka ara, awinibuka deice arye akunum lak kipdeipsuke.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.
Arup nyapmasin yupu nirya aning ati ara, Allah arye Yesus ati, ninye atonun ubuka deibukba, Yesus ara el weit yapu atonun ninye, tukwak ninye atonun dayuk. Ninye atonun dayuk ning deiyok ton ani. Ara, ninye malye un nang ati, bico tenyamsukce, Allah ap, ninye ap, ansinilina pil dona deiyoknye upsuke. Nun malye winin ning ati, talye luparabuka oplopsutu bukni, bico tenyamsukce, ‘Batakna kum arye, teleb ubuka lyena pil donamsin’ tenen, ninye nong atonun dayuk. Ton deiyok ara ani. Ara, Allah arye Yesus ati, ‘Ninye atonun uplirye, tukwak ninye sik malye winin ning kum kipdeiplirye, sik pununa ati, dipnamle,’ tenyamuka ati, Yesus ara, ninye nong atonun dayuk.
Aning atonun, Allah arye, ‘Ninye tukwak ninye weik, sik malye winin ning kum daneipnamle’ tenen, like tonok talak aryuk Kristus dopdeibukba, malye nang arye Yesus obika deice arye, nun malye winin ning nirya akunum kilibuka kum kipdeipsuke. Aminyan talak ara, Yesus Kristus ila tuba tonap, tukwak mutuku dam kutukuka tikilyanamle bukni, atalak ara, ‘Malye winin ning, na nong deice deipnikiba kilipnamne,’ tenena ati kum yanamle. Aning kum bukni, bitinye talak yanamle deiyok ara, sikce, ‘Yesus dipkoprop dolyanamsil’ tenen, elti, diba tenebuka, dinauk unyak ninye ati, lyebuka dolyanamsile.
Allah arye nunti, dalubuka opsutu bukni, nun opsutu ning nirya ara, Yesus Kristus arye dobuka, el nong deice deipdayukce, wanwanun yo deice delil bisukce dibuk. Nun malye un ning ati dipsuk ning ara, talye ati kume. Ara, sik yupa ninye malye un ning kum teneptingce, kum pataptu touk, nun babye, malye ning patana ap, malye winina ap, pia kum arye, ‘Diksukumuk unamak’ tenen, dibukce lyepsuke. Sikce Yesus ati obikak, dibuk deice arye, nunti akunum teleb ubuka deipsuke.
‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.
Nun malye tenenyap ning ap, malye wininyap ning ap, kum ubuka delina ati, akunum deksukce, lyebuka deipsuke. Allah arye nun malye unyap ning ati wenebuka opsutu bukni, ‘Sik opnyak’ tenen, nun pununa ati, Allah tenyamuk tok, sik malye nang arye, Yesus obikbuk, el ining binmoka deice arye, nun malye winin ning nirya kilibuka, kum danalisulula ak, Allah arye namin kilisulule. Ara nun malye wininyap ninguk kume. Ninye mutuk sirya im sirya nirya sik malye wininyak ning babye kiliplirye, lyelule.
Dipkoprop bico tenena ning ara ani. Ara, nunce mankau ulamuburye, Allah ati kanye kum diamube. Winilamubu bukni, nun malye unyap ning nirya awamukbuk, ‘Sik pununa ati, Na Mi Koprop Yesus obikce deice arye, sik malye ning punupnamle’ tenen, Allah elce bico tenepsukce, el Mi Koprop arepsuke. Winipsuka ara, dipkoprop bico tenena ning ara ati, nyapne.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
“Allah el mapu nirya ara, Domba Mi Atonye, el ining sik lyena ati arebuk deice arye, Isa Mutuku Dongonye malye kibik. Tonda, aninye arye, “Ninye lyena ati laka teleb yupu ani,” nyabuka lak akarye, peterelamika deice arye, Isa Mutuku Dongonye malye kibuka nirya obik. Aninye nirya arye, ‘Kume, nun kam unyaba ara weik mambule, nun kam una ara nun dokola ati ara, opsicak ati, Allah yupu nyanyaba ara bataknuyabe’ tenen, ilil kum ulamuk. ‘Malye nang arye opsica babye, telebe uka,’ tenelamik. Aning nirya winilamika deice arye, Isa Mutuku Dongonye ati, malye kibuka ulamik.
Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.
Min nyapmasin ning eipsopura, na Yohanes arye aminyan eipse ning ton laka nyapnusine. Ara tonok weik mutuku dup, el si ara Sion mutuku, Domba Mi Atonye ap, elce akunum lyebuk ninye ap, sik yupa weik 144.000 ninye ap, amutuku dup deice tikmeka, eipse. Sik 144.000 ninye nirya ara, Domba Mi el si ap, el Li Kopropa Allah el si ap, sik asok deice sekdeiyamuk ning ara, eipse.
Ara talya ati kume. Allah arye aninye nirya ati, yu pia weik upliba, weneplirye, sik nong deice ikin ning pia weika arye deiplirye, opnamle. Awininamle ning ara, winipmanto ning ati nyapne. Ara, yu weik arye ninye kanye wangalamak mek kwebuka, urdem mek ap tabakna kumce, tonok mek makau pum bisik weika arye dikdongobikiba, langdelsaklamle touk, Allah arye aninye weika arye wenenamle ning ara, ikin pia weik upliba, lyepdanmanto kum unamake. Allah arye kumasan bol kel, el si ara belerang, ara, uku buk tin weika arye dipliba, keil but-buta tong ara, siltong atonun weik lelamle ning dobuka, aninye sik nong deice deipliba, uku arye sik nong bol dilamliba, uk dilamlya ati pia donmakirye, engenamake. Engebuka donmakibuk, Domba Mi Atonye ap, Allah el im deice pil don nang, sik pia diksukum unyak malaikat nirya ap arye dinamake.
Aninye ara, sik yupa weik 144.000 unmek ninye ara, tukwak mutuku ulamik talak noutamak nirya ara, malye ning aning-aning nirya talibuka kum ulamika ati, talye yoltaklamek kilapu ap ubula kum yolalamikce, teleb diksukumuk ulamik. Domba Mi Atonye birye menekuka balibuk, el aminyan dobolbalamak ninye nirya ara, sik yupa weik 144.000 unmek ninye ara, adiparyuk elti, dobolbanyake. Tukwak ninye im sirya, mutuku sirya nirya noutamak arye, Domba Mi Atonye birye dekuka lyelamukce, Allah el si erena ati aninye dobuka Allah ati areamuk. Ara, wenye kwaning yongobuka, ‘Allah el si erepnamap’ tenen, arelamak touk, Allah el ap, Domba Mi Atonunye ap, sik bitinye si erena ati, sik yupa weik 144.000 unmek ninye dekuka lyelamukce, Allah ap, Domba Mi Atonye ap ati areamuk.
Asukum tikmek talak ara, Allah el amu tam bukuka pil dolamuknye Musa birye sekuka nyalamuk motuk senmek. Amot ara, Musa birye, Domba Mi Atonunye biti tenelamukce, amot sekuka deibukce nyalamuk. Aning atonun sik alaut mekwen damak atikmek ninye arye, Musa sekamuk mot senmekba, kekepse. Amot deice nyanmek yupu ara, ani. Nun ni Allah, anda aning-aning nirya malye kibuka, aning nirya deice tam umince, weik mikipnye, ulyame. Yuk mikip ulul ning nirya ara, mikip mitikuk ulul bukni, anda nun Weik Deiyoknye ulyame. Weik mambul pil dolyam ning ara, ninye winipmanto kum ning, sirya dakna pil dolamluma nirya ara, ‘Aning ara diksukum ulule,’ tenenyabe. Ance uminye ning ap, dib nyaminye yupu ap nirya ara, ‘Pia telebuk ulule,’ tenenyabe. Ance diksukum ubuka winiminye ning ap, dipkoprop nyalyam yupu ap nirya ara, pia telebuk ulule. Minop talak babye, anoutamak talak babye, aminyan yanamle talak babye nirya ara, aulul ning nirya ap, ninye ayala-ayala nirya ap weik deiyok talilulnye bira, an tonok uminya ati ara, anda weik Ninye Deiyoknye, Raja ulyame.
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Ayupu kekepse talak ara, tonok malaikat arye nati nyapnuke. “Anyapnukin yupu ara, seknamlyame. Ayupu ara, ani. Domba Mi Atonye, el kil dopnamal talak ati, weik kwalya kwalibuka deipnamak ning ati, elce anggunti yukupsilirye, ‘Anggunda yalulume, yamunyeura, neika dipnamape,’ nyapnamle ninye ara, Allah arye aninye ati pia teleb updeipliba, kanye deibuka telebuk unamake. Anyapkin yupu ara, dipkoprop Allah elcuk nyapmanilba, nyapkine,” nyapnuk.
Anyasik dana-dana tam domik cang keil poka amu tam ara, aik ayukumna kopropa ikuka dolamak touk, weik mutuku yangan keil atonun, deiyok keil yuk-yuk 12 deiyamikak eipse. Adeiyok keil urasin laka upmokak ara, yuk-yuk bukni, ninye si 12 ton sekuka deiamik ning eipse. Aninye si 12 nang ara, Domba Mi Atonye, ‘Na yupu dobuka peterena deiyok kouna deiyok nang unamak’ tenen, wipdeiyamuk Rasul nang, sik si akeil deice yuk-yuk, sik si sekuka deiyamika upmokba, eipse.
Atalak nirya ara, malye ning tonok babye, Yerusalem Winiryuk mutuku noutamak pia kum boyanamake. Tonda, malye wininyak ninye ap, tilila ning wininyak ninye ap anyasik noutamak pia kum wekelyanamake. Amutuku noutamak ara, sik malye winin ninye kum yanmanto bukni, Domba Mi Atonye birye talilye buku, Kam Pia Unamak Ninye Si Sekna Buku, abuku noutamak sik si akunum sekiamuk ninyeuk ara, sikda Yerusalem Winiryuk mutuku wekelyakirye, anyasik noutamak pia unamake. Na Yohanes arye nyapne.
Ayupu kekepseura, tonok malaikat na damak yanmok. Anye bira, sik tekbarye malaikat arye, karu mek makau tekbarye talipmekak, amek makau pum weik kanye imun ning, tekbarye talipmek ning kan-kan bukni, tonok malaikat na dam yayukce, “Anda yalyame. Domba Mi Atonunye kil dopnul ning ara, kapdeipkiniba, eipnulame,” nyapnuke.
Nyapnukba dipdesirye, ayanmoknye eipse. Anye bira, el nong urasin ara, Domba Mi atonun upmok. Domba Mi atonun upmok bukni, akunum obuka deiamna atonun kibuk. Elda, aweik mambul bun ning deice tam tikmokbuk, sik dumbarye kam unmek ning ap, sik 24 deiyok nang ap nirya arye, el noutamak tikmokbuk, sikce dana-dana tam nirya tikuka warikdongobuka, tikmekba eipse. Domba Mi atonunye domba basam atonun, yang el kisok deice tikamukba, eipse. El asing ara, tekbarye ubuk. Atekbarye asing, ‘Sik nong noutamak deiyok tenebuka, kel biknamak’ tenen, uamuk ning ara, ani. Ara, Allah elce dopdeiamukba, tekbarye dib kanye arye tukwak mutuku, im sirya, mutuku sirya melibuka banyak ati, uamukak eipse.
Abuku dobuka bobukopura, sik dumbarye kam unmek ning ap, sik 24 deiyok nang ap, ‘Si erepnamap’ tenen, Domba Mi atonunye, el urasin tam gutam tuku dipdongobuka bukmek. Sik 24 deiyok nang nirya arye, yuk-yuk talipmek ning ara, ani. Tonok ning ara, pong-pong ana gitar atonun ning, el si ara kecapi ap, pum weik makau urasin atonun bukni, emas arye memamik ning ton talipmek. Amakau pum bisik ara, nintong teleb ning dongobuka, uku sekmeka arye tulum welenmok. Atulum welenmoka, ‘Nong noutamak deiyok tenebuka biknamak’ tenen, uamuk ning ara ani. Ara, Allah arye wiamukba, elti, diba tenenyak ninye arye, Allah ati moronyak yupu arye Allah dam welelamla ati winibuka, eipse.
Domba Mi Atonye birye, Allah taruk deice bopmok buku dobuka, abuku noutamak denepdongamuk yo pea ato ning, tekbarye awamuk bukni, tonok ning daklobuka yokeibuk ak, eipse ning ara nyapnune. Minyuma yo pea atonun ning dakukura, sik dumbarye kam unyak ning bukni, tonoknye birye, weik yupu deice arye, “Yalyame,” nyabuk. El yupu nyabuka ara, liman arye lelim weik nyalamle touk ubukba, kekepse.
Duknubikce, pia ilil weik ubukba, nyanmek. “Se, nun mambul weik upsile. ‘Anggun amutuku kon ap, weik keil nirya ap, nun nong deice sakuka, singnipsutumce, opsutum’ tenen, moropseabe. Ara talye ati kume. Deiyok ara, weik Ninye Deiyoknye, bun ning deice bululnye, Allah arye eipsilirye, wenepsilyak ati ara, nun minopce sakuka opsutumce, siknipsutume,” nyabuka moropseabe. Tonda, ‘Domba Mi Atonye, yu weik upliba, weika arye wenebuka opnamsile’ tenen, ati ara, anggun amutuku kon ap, weik keil nirya ap, “Nun nong deice sakuka singnipsutumce opsutume,” nyabuka moropseyabe.
Asipdenukbuk, narye, “Na walwal bukni, anda kele,” nyapse. Nyapsiba, anye birye ayupu tamubuka, laka nyapnuke. “Kume, sik aninye ara talye nang kume. Sirya talak noutamak ara, malye nang arye, Allah el mapu nirya ati, ‘Nun like’ tenen, ikin ning pia weika arye, sik nong deice delilamikba, imun kanye weik bolamik bukni, Allah pia kum bataklamik. Kanye darapdongobuka, Allah elti, diba tupa tenelamik. Domba Mi Atonye obikba, el ining biyuka deice arye, sik malye winin ning nirya kum kipdeibukce, pia diksukumuk kipdeibuk. Winipsuka ati ara, sik nirya arye pia teleb koprop kurun baju ongopmake,” nyapnuke.
Aning ara talya ati kume. Deiyok ara, weik Ninye Deiyoknye bun ning noutamak bululnye, Domba Mi Atonye birye, sik deiyoknye pia unamle. Ara, domba wein nang arye, sik domba bico tenebuka, pia teleb kibuka weilamak touk, elce sikti, namin asa arye melibuka unamle. Elce minopce menekuka balibuk, sikda el aminyan tam dobolbaceura, Kam Una deiyok mek pu dam bobanamsile. Aninye sik mambul kanye bobuka, asing maka saknamle ning ara, Allah arye anang ati engena deiyok ning kum kipdeipnamsile. Kum kibuka deiplirye, asing maka cepdeipnamle ninye ara, tuba tonap pia kum engenamake.” Anye birye nyabuka laka nyapnuke. Na Yohanes arye nyapsine.