Yohanes 1:18 - Eipomek

¹⁸ Minop talak arye dipdongobuka, wini talak noutamak nirya arye, nun tukwak ninye arye, Allah el urasin pia kum elilamubu. Bukni, nun ni Allah, el ulyak ululnye, el Mi Koprop, Allah ap neika ururaknye bira, Yesus arye Allah el ulul ning laka elilule. Yesus el ulamuk ning ap, yupu nyalamuk ning ap deice arye, Allah el ulul ning lak kibuka laka nyalamsuke.

Yohanes 1:18 ပူးပေါင်းရင်းမြစ်များ

Kejadian 16:13

Sik yupu talipdarikura, atalak arye dipdongobuka otalak nirya ara, Hagar birye, Allah el si Yahweh ati, “Na tuba dinulul Allah,” nyabuka, tuba-tuba sisilamukce nyalamuk. Ayupu nyalamuk deiyok ara, Hagar birye “Kume, na tuba dinulul Allah ara, narye ton eipse,” nyalamukce, ayupu nyalamuk.

Kejadian 18:33

Allah el si Yahweh arye, ayupu nyabukopura, ‘Sodom mutuku obinun’ tenen, bisik banmok ati, Abraham biti yupu ton kum nyabuk. Abraham ara, tamubuka, el tia aik cang kain tenda aik domukak tamubuka biyuk.

Keluaran 23:21

Anggunda bisik banamlum talak niryada, narye dopreipsise malaikat, elce nyapsilye touk, moubuka kekepmunce, talibuka unamlume. Atalak nirya ara, elce nyapsilye yupu kum yaninamlume. Amalaikat ara, na si el deice akunum deipse ati, elce nyapsilye yupu yanipmunyopura, anggun malye upmunye ning ara, namin kum kipnamsine. Anggun ti wenepsilirye, ikin ning anggun nong deice deilinamsile.

Keluaran 24:10

Welebiyikce dinmikba, Israel nang sik deiyoknye Allah, el yan amu tam ara, teleb keil pala deice tikmokba, el dirina ara, im kalum dalamla atonun winipmokba eibik.

Amsal 8:30

Atalak noutamak nirya ara nara, Allah el pil melinanye atonun ulamsirye, na pia weik kel bikna deice arye dilamsibuk, aning-aning nirya kwepdeiamuk. Allah el dam asum-asum nirya tikuka dilamse talak nirya ara, kanye deibuka, telebuk ulamse. Allah ara, na dam ulamukba, nun neika ulamnuma ati ara, pin-pin asa arye, kanye deibuka ulamse.

Yesaya 40:11

Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.

Ratapan 2:12

Winikirye amapu nirya ara, pia mitanguk ulula ati, amapu nirya arye, sik nin yapu ati, “Se nun nin yapu, nun din ap, mek ap ati, adiparyuk arepsilyame,” nyabuka, engena deice arye moronyake. Sik amapu arye, winipmanto, ninye olakceba, suse dila weik wamlye nang arye, bisikak sakuka poulbikirye, dipmanto ulamak atonun unyake. Amapu arye wininmace bukni, amapu sik isin kum kipnin balamlyeba, sik nin yapu arye, iribuka bolamice deiceuk dibinyake.

Bilangan 12:8

Winilula ati ara, Musa ap, na ap nun neika epdanimirye, yupu sisikinyame. El ti ara, narye yupu laka nyalinune. Musa biti, domona yupu ning ton kum nyalinune. Tonda, yuk nang nirya kum bukni, na yupu tanmanye talak ara, Musa el uk ara, na nong urasin kum dilinulul bukni, kanye dem ara, elinulule. Aning nirya ati ara, anggunce Musa elti, malye yupu nyapmarum ning ara, yata ati ilil kum upmasil do? Yata deiyok ati, el deice malye yupu nyarumunya arye yanirurum do? Musa ara, na pil dolulnye ulula atia, nyabuka, Allah el si Yahweh arye, Harun ap, Miryam ap ati wenebuk.

Matius 11:27

Allah morobukopura, el yupu kekenmek nang ati ayupu ton nyabuk. Na ni Allah arye, ‘Na mi Yesus, aning-aning nirya talibuka deiyoknye unamle’ tenen, akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel biktinge. Allah el Mi Koprop kanye talima ulye ning ara, Allah elcuk kel bikilulue. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el talima noutamak ulye ning ara, tukwak ninye ton kum bukni, nauk ara, el Mi Koprop arye kel bikinune. Tonda, ‘Narye peterenunba, na ni ulye ning kel kipnamak’ tenen, wibuka deipse nanguk, na ni Allah arye pataplyeba, tenelul ning kel biktinge.

Lukas 10:22

Allah morobukopura, el yupu kekenmek nang ati, ayupu ton nyabuk. “Aning-aning nirya ara, na ni Allah arye akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel kiptinge. Allah el Mi Koprop kanye talima ulul ning ara, Allah elcuk kel kilule. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el kanye talima noutamak tenelul ning ara, nara, el Mi Koprop arye kel bikinune. Bukni, yuk nang ton kum biktinge. Tonda, ‘Narye laka nyabuka peterenyeura, na ni kel kipnamak’ tenen, wibuka deipse nanguk, na ni Allah arye tenelul ning kel biktinge.” Yesus arye nyabuk.

Yohanes 1:14

Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.

Yohanes 12:41

Allah el yupu laka nyalamuknye, nabi Yesaya arye, minop talak ayupu nyamuk ning ara, Yesus pia teleb winipnamuk ning moubuka tenyamukce, aning nirya min kum winibuk talak, Yesus winipnamuk ning ati, laka nyalilamuk.

Yohanes 13:23

Winibukba, Yesus ati kanye talima pia deiamuknye bira, Yesus dam bukmok.

Yohanes 14:9

Nyabukura, Yesus arye nyabuk. “Pilipuso, anggun ap, na ap, asum-asum yupa weik neika akunum ulamubu bukni, anda moubuka min kum kel bikamnulum do? Yatanye do nirya, na elilamnuknye birye, na Ni Koprop Allah ati akunum elilamuke. Nun bitinye ara neika ati, ance, ‘An Ni Koprop Allah laka kipdeipsutume,’ nyapmanilama ara, yata ati do?

Yohanes 17:26

Narye na mapu ati an winiminye ning nirya peterelamsiba, kel bikinyake. Aning akunum winilamse touk, sikti, tuba unamne. Deiyok ara ani. Ara, ance nati, weik arye kanye deiamnulum touk, ance sikti, kanye weik arye delinamlyame. Tonda na ap, sik ap, talima dukdongobuka neika unamabe. Nara, sik talima ak unamne. ‘Aning-aning nirya, moropmakin ning nirya winipnamle’ tenen, akunum moropkine, naio.” Yesus arye ayupu nyabuka, el li Allah ati morobuk.

Yohanes 17:6

Yesus arye nyabuka Allah ati morobuk. Naio, tukwak mutuku noutamak bukni, ance wibuka areamnulumba, narye wibuka deiamse ninye ati, narye an si ap, an winiminye ning ap, sik kel bikna ati, laka nyalamsiba, akunum kel bikamkike. Ance aninye nirya talyamlume. Talyamlumce, aninye dobuka nati areamnulume. Aninye ara, an yupu kekebuka dobolbanyake.

Yohanes 3:11

Dipkoprop nyapkine. Na ap, na mapu nirya ap, nun nirya arye asing elilamuburye, akunum kel bikamubu ning nirya ap, ‘Anang kekenamak’ tenen, lakak nyanyap bukni, Anggun Farisi ninye ara, nun yupu diba tenebuka kum dololulume.

Yohanes 6:46

Allah im deice arye dopdeibuknye, elcuk Allah elilamuk. Yuk ninye nirya arye, Allah pia kum elilamik. Allah arye wipdeibukce, sik ak dopdeibuknye, eluk Allah eililule.

2 Korintus 4:4

Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.

Ulangan 4:12

Winibuk talak ara, uku buk noutamak tikukce, Allah el si Yahweh arye, el yupu weika arye anggunti nyabuk bukni, el nong ara, kum eiplume. Dipkoprop elce nyanmok yupu kekeplum bukni, el nong ara, kum eiplume.”

Kolose 1:15

Allah el ulye touk, el Mi Koprop Yesus babye, pia dipkoprop atouk ulule. Allah ara, ninye asing arye kum eipmantonye ulule. Allah arye aning-aning nirya kintinibuka, deiamuk. Bukni, winipmanto ning ara, ninye arye winiryuk mi deibikceura, ami arye anggun ning nirya talibuka ulamle touk, Allah el Mi Koprop Yesus ara, deiyok kouna deiyoknye pia weik mambulnye ulule. Ulirye, aning-aning nirya talibuka, deice tam ulule.

1 Timotius 1:17

Aning ati ara, nun ni Allah, elda Weik Ninye Deiyoknye, Sisinanye minop dorapce dipdongobuka noutam talak ap, wini talak ap, aminyan do unamle talak ap nirya, pia unamle. Elda, pia kam ulul anya arye, kum diptue. Ninye asing arye pia kum eiptinge. Dipkoprop Allah ara, el tonoka, yuk ton kum ulule. Ati ara, ninye nirya arye, adiparyuk atalak babye, aminyan talak nirya babye, ‘El ti si erebuka, el si weik arye erepnamak’ tenen, Allah moronune. ‘Aning ara, dipkoprop unamle’ tenen, pia patanulul anya arye, Amin nyapne. Akunuma.

1 Timotius 6:16

El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.

Yosua 5:13

Ara Yosua ap, Israel nang ap, Yeriko mutuku dam binuka unmek talak ara, tonok sum Yosua birye, Yeriko mutuku tam binuka dinmokba, ninye tonok, el urasin tam tikmokce, ninye on ning parang ya talipmokba, Yosua birye eibuk. Eibukce, anye dam biyukce, asipdeyuk. “Anda nun melina ati yalam do, nun ona ati, nun oldan nangak, melipnamsilamnye do?” nyabuka asibuk.

1 Yohanes 4:12

Yata nang do nirya, ninye arye Allah el nong babye kum elilamubu bukni, nunce bico tenebuka melilanauk winibibyopura, Allah nun talima noutamak usulule. Tonda winibibyopura, elce bico tenena deiyok ning arisilibuk, nun talima ak usilirye, wisisulule.

1 Yohanes 4:20

Yatanye do, nirya, “Nara, Allah ati kanye delinune,” nyalul bukni, elda mening dam ninye ati, bico tenena kumce, like tenebuka, kum melilinye bira, anye bira, winilye ning ap, el nyalye ning ap, anirya tililanyeuk ulule. ‘Aning ara yata ati do?’ tenena kume. Ara mening dam unyakba dilye ninye bukni, bico kum tenelule. El mening dam dilye ninye bicoe kum tenelula ati, el asing arye kum dilye ning ara, bico kum teneptue. Ati ara, Allah el dam aulyeba, elce kum dilulnye anya arye, Allah ati, kanye kum deiptue.

1 Yohanes 4:9

Allah arye utenebuk. ‘Yesus pil dopnamle deice arye, sik pia kam bukuka, Yesus mikip deice unamak’ tenen, Allah el Mi Koprop tonokuk ulamuk bukni, nun tukwak mutuku noutamak, nun tukwak nang nirya ati, Yesus akunum arepsuke. Yesus arepsuka deice arye, ‘Allah arye nunti, pia bico tenesulule’ tenen, kel kinyabe.

1 Yohanes 5:20

Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.