Yohanes 1:13 - Eipomek

¹³ Allah el mapu kililamsuk nyapmasina ara, talye ninye arye deibiceba, dadeipdanin yangalamak ninye atonun ati kume. Tonda, ninye sik kanye aryuk, ‘Mapu deipnuyap,’ tenelamak atonun winina deice arye kume. Tonda sal arye, ‘Nun kilapu arye mapu deipnamsiyak,’ tenelamaka atonun ati kum nyapne. Aning kum bukni, aninye nirya ara, Allah arye sikti, ‘Na mapu unamak’ tenen, wipdeiamsuk deice arye, Allah el mapu koprop kililamsuke.

Yohanes 1:13 ပူးပေါင်းရင်းမြစ်များ

Kejadian 25:22

Ribka mi bomuk talak ara, kwa bitinye mapu bomuka anya arye, akwa bitinye mapu arye, el mun pum bisik pikibuka donmarikba, Ribka birye, ‘Se, awinipmanil ning ara, yata deiyok arye upmanil do?’ tenen, Allah el si Yahweh ati morobukce, asipdeyuk.

Kejadian 25:28

Sik ni koproba Isak bira, bai mutuku mana obuka dalamak ning anyak, kanye pia deibuka, patalamuka anya arye, elda Esau binyak kanye deiamukce, ulamuk. Ulamuk bukni, Ribka bira, el mi Yakub binyak, kanye weik deiamukce, ulamuk.

Kejadian 27:33

Nyabukura, Isak kekebukce, mambul kanye bobuka, sirim talibukce nyabuk, “Se, aning ara, min talak ara, yatanye birye, bai tam ulye ning kunum obuka, yubuka boyanmanil do? Arup, an min kum yanmamu talak, aning dobuka dipmanue. Dipmanurye, anye biti, ‘Pia telebuk wininamle’ tenen, teleb yupu nyabuka, el nong deice deipmane. Winipmana ati ara, anyapmanu yupu, dipkoprob nong upnamle. “Allah arye melipliba, elda pia teleb unamle,” nyabuka, Isak birye nyabuk.

Kejadian 27:4

Na dina ati, kanye delinun ning, an kele anya arye, ance obuka boyaminye ning kalibuka, na patanilye touk, yubuka deipnimince, boyanamnilyame. Ara, na dipnamne atia. Akunum dipnyopura, na dipnamne talak arye dopropnalam ning ati, laka nyapkinirye, ‘Teleb unamlam’ tenen, teleb yupu ton nyapdeipnamkine,” Isak birye, Esau biti nyabuk.

Mazmur 110:3

An oldan ninye ati, obuka bisipnalam talak ara, ance talilyamba, an amu tam unyak ninye nirya ara, sik kanye teniltona kum diparyuk, an dam yakirye, an ap, sik ap, neika ansinibuka, yuk mutuku ninye ati, olbinamlume. Winipmanto ara, lukunyan talak kurya dei sakuka, mutmuta deice palilamle atonun, asum-asum nirya, an amu tam unyak yin talin kam nang arye, ‘Nun ni ap, neika malye nang ati olbinamap’ tenen, an damak tuba-tuba yanganamake. Na Allah arye melisinirye, an amu tam, yin talin nang ap, an ap mikip kipdeipsiniba, an oldan ninye ati, mal olbinamlume.

Matius 3:9

Tonda, anggunce, ‘Kume, nun deipkirik deiyoknye bira, Abraham usulula ati, Allah arye kum wenepnamsile,’ tenebuka kum nyapnamlulume. Aning ara, tenena kume. Allah arye, ‘Abraham el mapu na doproptinye’ tenen, pataptopura, talya ubuk keil arye bobuka, Abraham el mapu ton kintinipdeiptue.

Yohanes 3:3

Nyabukura, Yesus arye domon yupu atonun yupu deice arye tamubuka nyabuk. “Na dipkoprop nyapkine. Yata nang do nirya, nun ni yapu arye winiryuk deipsikikba, winiryuk mapu ulamap touk, nun kanye talima noutamak ara, Allah arye ila tamubuka tonap winiryuk ninye atonun deipnamsile. Kanye talima winiryuk ninye atonun kum deipsilyopura, Allah lyepsilirye, nun kanye talima talinamsil ning nirya ara, aninye kum eibikirye kum dopropnamake,” nyabuk.

1 Korintus 3:6

‘Yala ning bongopnamle’ tenen, doklamak touk, narye minopce Allah yupu deiyok koubuka peterelamsise. Winilamsibuk, wa deiyok ninye arye, ‘Yala ning paplirye, nepnamle’ tenen, doklamak ning dam mek kwebuka diklamak touk, Apolos arye aminyan ara, dukdongobuka, Allah yupu peterelamsuke. Winibuka pil dolamnumu bukni, Allah el mikip deice aryuk, adoklamnumu ning kwakuka bongobukce nebuke. Doklamnumu ning nebukce, duk moubuka wisibuke. Aning nirya deiyoknye bira, Allah el uka, nun bitinye kume.

Titus 3:5

Nun Lyena Deiyoknye, elce lyepsuka deiyok ara, nun teleb ubuka, diksukum pil weik dolamubu deice arye, pia kume. Aning deice arye, pia kum lyepsuk bukni, nun malye winin ning ati, talya merekuka obuka bataksutu bukni, nunti kanye arepsukce, bicoe tenepsuk deice arye, el minang kanye aryuk, wibuka lyepsuke. Ninye arye, deliltakne ning dobuka, mek liklamak atonun, Allah arye, nun malye winin ning kilipsukce, winiryuk delilamak mapu atonun ubuka deipsuka deice arye, kunum lyepsukce, teleb kibuka deipsuke. Tonda, Allah El Dib Kanye arye, nun kanye noutamak wekuka pil dopsukba, kanye winiryuk ning atonun punubuka deipsuka deice arye, lyepsukce, teleb kibuka deipsuke.

Yakobus 1:18

Allah el kanye tenena deice aniryuk, dopropsukce, el dipkoprop yupu deice arye, el mapu kipdeipsuke. El dipkoprop yupu deice arye, el mapu kipdeipsuka ara, aning-aning nirya kwepdeibuk noutam arye, utenyamuk. ‘Na mapu koprop kipdeipse nang ara, sikda minop nang atonun, weik mambul unamake. Aning-aning nirya ara, winiryuk ning kintinibuka deipnamne bukni, na mapu ara, minop atonun unamake,’ tenyamsuke. Utenyamsukce, nun dobuka, el mapu kipdeipsuke.

1 Peterus 1:23

Wininamluma deiyok ara, Allah arye anggun kanye talima winiryuk ning atonun ubuka arepsuka ara, talye kum ulul ning deice arye kume. Aning kum bukni, Allah el kam ulisulul yupu, min kum uptu ura, pia unamle yupu deice arye, winiryuk ninye atonun ubuka deipsuke.

1 Peterus 1:3

Nun Deiyoknye Yesus Kristus, el Li Koprop Allah ati, “Telebe,” nyabuka, el si pia erenamabe. ‘Telebe’ tenen, nun malye winina ati, adiparyuk wenebuka opsutu bukni, bico tenepsukce namin kipsuke. Winipsukce, winiryuk ninye atonun akunum kipdeipsukce, pia kam una deiyok ning akunum arepsuke. Winiryuk ninye kipsuka ara, Yesus Kristus dibuk bukni, kam bukeibuka deice arye, el mapu kilisulule. Winisululbuk, nun kanye talima Allah el deiceuk deibuka, kam pia unamabe. Wininap ning ati, kanye teniltona kum aniryuk, ‘Aning ara, pia dipkoprop unamabe’ tenen, kanye deibuka unyabe.

1 Peterus 2:2

Winiryuk deibice mapu, sik nin yapu moum ati pia patalamle touk, Allah el pia teleb yupu, talima ak wisibuka teleb ulisulul yupu ati, pia patanamsile. Winibuka patapsilyeura, kekebuka dolonauk upmunyopura, Allah arye lyepsuk ak, el ap talima dukdongobuka umunya ara, pia wisipnin balamlya ani, telebuk unamsile.

1 Yohanes 3:9

Allah el lyeplirye, winiryuk kanye tenen ning ap, winiryuk talima ap, dongolul ninye ara, Allah el kanye sik talima ak tuba ulula ati, aninye arye tuba-tuba el yupu yanibuka, malye kum uptinge. Sik kanye tenen ning ap, talima tenen ning nirya ap, Allah lyebukce winibuk ninguk akunum arepsuka ati, sikce tuba malye kum uptinge.

1 Yohanes 4:7

Na kayapu, nun nirya arye, bico tenebuka melilanauk unamabe. Ara, bico tenena ap, melina ap, deiyok ning ara, Allah arye arisulula ati, nyapne. Anggunce yuk ninye ati, bico tenebuka makulamak ninye ara, Allah arye sik kanye tenen ning, akunum kam bukeibukura, sikce ‘Allah diba’ tenen, talibuka unyake.

1 Yohanes 5:1

‘Ninye mutuku-mutuku nirya lyeplirye, taliplibuk, dobolbanamaknye, Yesus eluk ulule’ tenen, diba tenenyak ninye nirya ara, sik kanye tenen ning ap, sik talima ap, dipna atouk ulamuk bukni, Allah arye akunum kam bukeibuk. Tonda nun Na ni Allah ati, sik kanye deibice ninye nirya ara, el Mi Koprop babye, sik kanye deilinyake.

1 Yohanes 5:18

Nun kele, Allah arye sik talima kam bukeibuk ninye nirya ara, tuba-tuba malye kum wininyake. Allah el Mi Koprop wibuka deibuknye bira, Yesus, elce aninye ati, ‘Malye winibicak’ tenen, pia melibuka kalikilule. Yesus arye sikti, winiplyopura, pia Malye Deiyoknye, Isa Mutuku Dongonye, malye kum kipdeipsutue. Ton, dalubuka kum dopropsutue.

1 Yohanes 5:4

Yata ninye do, nirya, sikce diba tenebikbuk, Allah arye sik talima kam bukeibuk ninye nirya ara wininyake. Ara, talye diba tenena kum ninye, sik wininyak ning ap, tenen ning ap, patalamle ning ap, diba tenena ninye arye, aning nirya yaniptabik. Allah diba tenenyak nang arye, tukwak malye ning ara, akunum yaniptabik ati, ‘Allah el yupu nirya dobolbana ara, ikine usulule,’ kum tenenyake. Allah el yupu uk dobolbanyake. Allah arye sik kanye tenen ning ap, talima ap, akunum kam bukeibuka ati, Allah el yupu kanam aryuk dobolbanyake. Ikine kume. Amalye winina nirya yaniltana deiyok ning ara, nun diba tenebibya deice aryuk, aning nirya bisibuka yaniltanyabe.