Yoel 2:13 - Eipomek13 “Anggunce, ‘Se, nun malye wininyap ning dekna ati, nun ni Allah arye wenepnamsil do?’ tenen, anggun baju bol deice ning, kwiribuka batakalulum ning ara, bataknamlulume. Talye bol deice ning kum bukni, anggun talima pum tam, malye tenemunye ning nirya batakmumce, ikin kanye bobuka, engepmunce, tamubuka anggun ni koproba Allah Yahweh, na dam anyuk yalulume. Ara, ‘Allah elce nun malye winibibye ning ati, adiparyuk kum opnamsil’ tenen, yanululume. Ara, urdem ati kum nyapsine. Nara, ninye malye wininyak ning ati, adiparyuk minopce wenepnirye, kum onune. Dipkoprop anggun malye winina dekna ati, adiparyuk wenebuka oplopsitinye bukni, ‘Sikce tamubuka, na dam yanamak do, kum do?’ tenen, disunune. Nara ninye ati kanye talima areniliba, bico tenen, nimalyap arye, anggunti disinirye, kalikuka tuba-tuba melisunune. Winisununa ati, anggun malye ululum ning batakmunyopura, ‘Narye aninye ati wenebuka opnamsine,’ tenepse ning ara, tuba ton batakname.” Allah arye nyabuk. Ayupu nyabukba, nabi Yoel arye nyabuk. အခန်းကိုကြည့်ပါ။ |
Yoel 2:13
41 ပူးပေါင်းရင်းမြစ်များ
Yakub engenmokce, mambul kanye bopmukce, el baju kwiliklobukce, ‘Na mi Yusup akunum dipmale’ tenen, atalak weika arye engena ap, malye kanye bona ap, pia unmok. Tonda, amutuku ninye arye, ‘Yuk nang eipsikirye, ‘Se, sikda ninye dipmaka ati engenmake,’ tenenamsiyak’ tenen, ongolamik baju ton, Yakub birye ongobuk.
Ura, Elia birye, Raja Ahab biti, Allah arye nyapdeipmok yupu laka nyanmok talak ara, anang nirya kekenmekbuk, Elia birye akunum nyapdeibukopura, Ahab kekebukce el baju ongopmok ning kwiribuka batakukce, pia malye baju dobuka, el nong deice kalupdayuk. Winibuka deiyok ara, ‘Na akunum malye upse,’ tenen, ilil kanye bobuka lak kibuk. Winibukce, malye kanye bobuka, din dina kumce, din bulung uk unmok. Tonda asum arye deiyok koubuka, bisik banmok talak babye ara, malye baju aryuk ongopdongobuka, ‘Nara dipkoprob pia malye ulamsinye’ tenen, ilil unmokba, bouku sukubukba unmok.
Minop talak Allah el si Yahweh arye, Israel ninye ati, ‘Aning ara wininamlulume, aning ara ton kum wininamlulume,’ nyapdeiamukba sekuka delilamik buku ara, Safan birye, Yosia el kekena ati yininmokba, Yosia kekebukopura, malye kanye bobukabukce, ‘Se, ayupu ara ikine’ tenen, ninye deiyoknye el nong bol deice pia teleb baju ongolamuk ning ara kwiribuka, kwiliki bataklobuk.
“Minop talak, Allah narye, Israel ninye ati, ‘Aning ara wininamlume, aning ara kum wininamlume,’ nyapse. Tonda, nyapse. ‘Na yupu kum kekepmunyopura, winibuka-winibuka wenepsinirya, ikin ning anggun nong deice delinamsine. Winipsinirya, anggun mutuku ap, anggun nirya ap ara, obuka sirya daknamsine,’ nyapdeiamse. Anda anyamse yupu winiryuk kekeplum talak ara, talima mitang upkuke. Winipkukba, anda Yosia birye, ‘Se, nun apu yape ap, nun ap ara, dipkoprob malye weik ulamupue,’ tenyamlume. Utenyamlum, ‘Ati, nun ni Allah, el si Yahweh arye, nyapnamsil yupu moubuka kekenamabe’ tenen, talima kintiniplumce, ikin kanye bona ati, an baju kwilikloplumba, malye kanye boplumce, na dam yanuka engebuka, nati moropnulume. Aning nirya ara, na Allah arye, akunum eipkise. Aning nirya winipluma ara, nara Allah, na si Yahweh arye, nyapkine. Ance moropmanilam yupu ara, akunum kekepkine.”
Asekmok ning ara, Israel nang sik deiyoknye birye akunum yinibukopura, “Se, na ilil upnil. Nara Allah mikipnye atonunye ununa ati, asurat sekuka dopdeipmanil do? Nara Allah atonunye kum ati ara, dipmatunye ap, uk dinmatunye ap ara, pia kam kum bukeiptibye. ‘Anye Naaman el barye suse kwetepnamle,’ tenepmanilce, na dam dopdeipmanil ara, kum winiptinyopura, yu upliba olyanamnile, tenepne. Na kanye ara, elce tenepmanila ara, ‘Anye obuka sirya daknamne,’ tenepmanilce, yu kipdeipmanil, tenepne,” nyabuk. Nyabukce, ilil kanye bobukce, el ongolamuk baju yu asa arye, kwiliklobuk.
Ayupu ninye deiyoknye kekebukopura, pia ilil kanye bobukce, bico ubukba, el ongolamuk baju kwiribuka kwiliklobukce, acang keil poka deice banmok talak ara, el tam nang arye, eipmek. Eipmeka ati ara, elda Raja bukni, el kwilikmal baju amu tam ongopmo ning ara, ninye dibikiba, engelamak talak ati, malye baju ongolamak ningak ongopmoka ara, aninye nirya arye, eibikce, ‘Se, aning ara, mambule,’ tenebik.
Sik aninye, ‘Allah arye lyepdopnamsilʼ tenen, anti morobikcopura, nun ni Allah, an im deice ulyamnye kekepminyeura, an amu tam unamap nang, nun Israel nang nirya ati, nun malye unyap ning nirya ati, namin kipsimince, lyelonamsilame. Tonda, an amu tam unyap nang, nun malye un ning ap, ance wibuka deiplum nang, nun Israel nang nun malye unyap ning ap ara, namin kibuka lyenamsilyame. Wininamak talak ara, ance, ‘Teleb bisik ara ani, teleb unamlum ning ara ani,’ nyapminyeba, kekebibyak arye, nun abisikuk dukdongobuka banamabe. Ance nunti teleb yupu nyamsulumce, ‘Amutuku talebuka unamakʼ tenen, areamsulum mutuku, amutuku deice arye weik mok arepsiminyeba, mok pia celamlyebuk, nunce amutuku talebuka pia unamapʼ tenen, moropkine.
Ance sikti, bico tenebuka, teleb una ati winilalum ning ara, luba kiyamike. Tonda, sik dam ninye winipmanto kum pil dolalum ning nirya ara, tuba kum tenilamikce, luba kiamik. An nyalalum yupu yanibikce, mandipna kanye bobikce kwalilamikce, ‘Mesir mutuku tuba tamubuka bobisiliba, sik amu tam talye pil don nang unamap’ tenen, sik bidamnye arye, ninye deiyoknye wipdeibik. Malye weik winilamik bukni, Allah anda ninye nirya malye wininyak ning namin kina deiyoknye ulyame. Min pola kum wenesilyamce, an kanye aryuk weik bico tenepsimince, weik arye melisilyame. Bico tenesiminye ning ara, weik arye bico tenesilyame. Winilyama arye, nun apu yapu kum bataklamlume.
Aning nirya akunum nyabikba, Ayub kekebukopura, el adiparyuk tikdobukce, weik imun kanye bopmuka ati, el cang baju ongopmok ning kwiribuka, kwiliklobuk. Tonda, el kisok potong lyeklobuk. Aning deiyok ara, ‘Yata deiyok ati, aikin kanye bon ning upmanil do?’ tenebukce, winibuk. Winibukopura, ‘Allah moropnun’ tenen, Ayub adiparyuk kanupdongobuka, gutam tuku dipdongobuka, Allah el si erebukce yupu nyabuk.
Allah el si Yahweh arye, ninye nirya ati, kanye talima arisiliba bico tenenanye ulula anya arye, nun malye wininyap ning ati, adiparyuk wenebuka oplopsutu bukni, minopce yu upliba, kum wenesulule. Aning kum bukni, weik tonun bico tenepsilirye, ‘Winibuka teleb kipdeipnamsine,’ nyabuka, nyalin yupu deice arye nyasilye yupu nirya ara, aninguk dipkoprob, tuba-tuba winisulule. Elce nunti, weik tonun bico tenesulul ning ara, nukmanto kum ulule.
Tonda, Allah arye, ‘Se, ‘Naʼ tenen nang, kum ubikcak’ tenen, elce sikti, “Sikda wininamlume. Winipmunyopura, narye pia teleb kipdeipsiniba, telebuk unamlume,” nyapdeiamuk nyalin yupu ara, tonap bikuke. Aning tuba tenenauk ulamuka ati, sikti, bico tenebukce, sik dam yanuka lyeprobuk. Deiyok ara, Allah arye, “Anggun ti, weik tonun bico tenesinirye, pia teleb kipdeipsiniba, pia telebuk unamlume,” nyapdeiamuk yupu, akunum nyabuka ati, adeice arye, tamubuka Israel nang lyeprobuk.
Malye ning nirya batakuka, diksukumuk winikirye, Allah el amu tam unyak ninye ara, sikce, “Se, nun ni Allah Yahweh, melipsilyame,” nyabuka morobikce talak nirya ara, Allah kekeplirye, sik morobikce ning atonunuk, kibuka melilule. Sik ikin ning weik ulamlya noutamak, elce lyebuka doproplirye, sik ikin ulamlye ning nirya, kum kipdeipliba, teleb kanye bobuka unyake.
Bukni na ni Allah, na kele, anda aning-aning nirya talimince, tenesimince, deice tam erebuka, mikip weiknye ulyame. Bukni, nun malye winin ning ati, adiparyuk oplopsutum buk, namin kinauk usilyamce, telebuk kilisilyame. Tonda, nun malye wininyap ning ati, minopce yu kum tenesilyame. Tonda, ance, ‘Weik tonun pia bico tenesimince, pia teleb kilinamsine,’ nyabuka, nyalin yupu deice ara, weik tonun nyasilyam ning nirya ara, batakna kumce, pia teleb kibuka kilisilyame. Tonda, ance, aning nirya ati ara, narye, ‘Winipnamsine, winipnamsine,’ nyabuka, nyasilyam atonun kibuka, pia tuba melisilyame.
Narye an Allah Yahweh ati, ‘Melibuka lyepdopnilyame!’ nyabuka, morokununa deiyok ara, ani. Ara, anda aning-aning nirya talimince, deice tam erebuka, mikip weik deiyoknye ulyam bukni, ance kanye deipsimince, nun malye wininyap ning ati, namin kipsimince, kum danalilyame. Anda pia telebnye ulyama atia. Tonda, yata ninye do nirya, sikce antibuk, ‘Naio, ancuk melibuka lyepsilyame!’ nyabuka, morokinyak nang ati, lyepmince, pia teleb kililyame. Tonda, anda, ‘Weik tonun bico tenesimince, pia telebuk kilinamsine,’ nyapdeiamsulum yupu ara, weik tonun nyasilyama ati nyapkine.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Anggun teneipdelulume. Anggun din dina kumce si tebuka umunye talak nirya ara, anggunce, ‘Nun ti kekeplirye arepnamsil’ tenen, ululum bukni, anggun malyeuk winiluluma deice arye, anggunce anggun bidamnye atibuk imun kanye bolilalulume. Na tenepmase ning ara, ‘Teleb ning ara, tonok sum aryuk, na amu tamukirye, telebuk unamake. Yuk talak nirya ara talye urdemuk unamak,’ tenelamsise do? Aning pia kume. Kum yanuka doplirye maning loklamle touk, anggun kisok kanupdongobuka, kwelalulume. Tonda, malye baju kitibuka mutuku deice mapmunce, uku sice butbuta dobuka anggun kisok ap, nong deice ap delilalulume. Winilulum ning ara, ara ‘Din dina kumce si tebuka umunye talak ara, Allah arye telebe tenepnamsil’ tenen winilulum do? Anggunce, ‘Din dina kumce si tebuka una ara, dipkoprob ning ani,’ tenebuka winilulum do? Winimunye ning ara, nong bol deice ninguk winilulum bukni, anggun talima noutam ara malyeuk ulildalalume. Talye-talye uk winimunye ning ara, ‘Allah Yahweh eipsilirye, kanye deipnamsil’ tenen, winilulum do? Anggunda ‘Aning ara telebe,’ tenelulum bukni, nara aning atonun kum tenenune. Na Allah Yahweh arye, anggun winilulum ning ati, kanye kum delisunune.
Na Allah Yahweh arye nyapsine. “Tukwak mutuku noutam ulul ning nirya ap, im noutam ulul ning nirya ap ara, na taruk koproba arye, kwepdeipsiba ulule. Kanye talima erena kum, ‘Se nun malye unyabe’ tenen, ilil upliba, nimalyap asa unyak ninye ati, na kanye delinune. Tonda, sik malye unyak ning batakikirye, narye, ‘Aning ara wininamlulume, aning ara, kum wininamlulume,’ nyalisinye yupu nirya ara, moubuka kekebikirye, talibuka unyak ninye ati, na kanye delinune.” Allah arye, Israel ninye ati nyabuk.
Na walwal bukni, ayupu nyapnalam sum ara, kekebikirye, ‘Se, nun dipkoprob malye unyabe’ tenen, sik aninye malye wininyak ning nirya bataktingce, Allah ati moropnamak do, kum do? Ara, sik aninye nirya arye, ‘Se nun ni Allah, nun malye wininyap ning batakikirye, an damuk tamubuka yanamabe. Ance nun malye ning kilipsutumce, lyepsutum tenen, moropkiyabe,’ nyabuka, Allah ati, moropnamak do, kum do? Nun walwal bukni, dinauk unaname. Ara, urdem ati kum nyapkine. Sik Israel ninye ap, Yehuda yala ninye ap arye, pia malye weik wininyaka ati, Allah el yu weik upliba, ‘Sik wenena ati, ikin weik ning, sik nong deice deipnirye, sikti, opnamne,’ nyapdeibuk ning ara, mitik kume. Weik wenen ning kintinipmala ati, nyapkine. Ati ara, Allah arye nyapdeipnukba, laka nyapmakinba, ance sekmalam yupu dobuka, Allah el si eren aik binuka yinipnalyame, nyapkine,” Yeremia birye, Baruk biti nyabuk.
Asum aryuk, Sikhem mutuku nang ap, Silo mutuku nang ap, tonda Samaria mutuku nang ap, yupa weik delapan puluh (80) nang arye, Mespa mutuku yayik. Sik anang nirya ara, sik bam potong nirya ara, akunum kobuka kipmikce, sik ongopmik baju nirya ara, akunum kwilikdobuk ongopmik. Sik nong bol deice ara, dila-dilauk upmok. Winibuka winipmekce, anang nirya arye, ‘Allah el si erebibirye, elti, teleb ning arepnamapʼ tenen, Allah el arena ati, din ning el si gandum ap, tonda nintong teleb ning el si kemenyan ap, libuka boyanmikce, amutuku domik Allah Yahweh, el si eren aik dam boyanmik.
Ura, anggun Israel yala ululum nang ara, amutuku tuba ulamunyopura, na Allah arye anggun dobuka, erepdeipsinirye, teleb kipdeipnamsine. Erepdeipsinyopura, tamubuka anggunti, kum dobuka dopkwetepnamsine. Winipmanto ara, narye anggun dobuka, amutuku noutam kipdeipnamsine. Kipdeipsinyopura, tonap, atukwak arye wenebuka kum bataknamsine. Aning kum bukni, telebuk unamlume. Winipnamsina deiyok ara, ani. Ara, narye anggunti, pia bicoe tenesunune. Ara, anggun malye weik winilamluma ani, narye anggun wenena ati, ikin weik ning yala nirya, anggun deice akunum dobuka deipsiseba, dopromluma ati, narye bico tenesunune.
“Anda, Yerusalem mutuku weik asik noutam dana-dana tam nirya ak, binulyame. Biminyopura, anyasik noutam unyak nang nirya dipdemince, yata nang do nirya, Israel yala nang pia malye-malye weik wininyak ning ap, na Allah arye, ‘Aning ara, pia na like,’ tenenun ning bukni, amutuku nang arye, pia mem ning wininyakba, eibikirye, sik kanye talima noutam arye, ‘Se, aning ara, kum winiptinge, aning ara pia malye wininyakeʼ tenen, talima uk diliba, engenyak nang nirya ara, sik dam binulyame. Biminyopura, anang sik urasin tam bukni, sik asok deice tam ara, lak bikna ati, tanda sekdeipnamlyame.” Allah arye, kain lenan ongopmoknye, seken ning lipmoknye biti, nyabuk.
Winipnamap ning ara, nun walwal bukni, Allah arye, ‘Opnamne,’ nyapdeiamsuk ning ara, ‘El kanye tamupliba, el yu, nun nong deice deipnamsil do, kum do?’ tenenmabe. ‘Bico tenepsuturye, yu kanye weik bosilye ning ara, batakturye, lyepsetue’ tenen, nyanmabe. Namin kipsuturye, lyepsilyopura, nun kum dipnamabe,” nyabuk. Niniwe mutuku weik deiyoknye birye, ayupu nyabuka dopdeibukba, el taleamuk nang nirya kekebik.
Derebukce, Allah el si Yahweh ati, morobukce nyabuk. “Ance Niniwe mutuku ninye kum opmalam ara, yata ati do? Na ni Allah, an si Yahweh ati nyapkine. Aning ara, na asik batakuka, amutuku yanuse talak ara, ‘Allah arye dipkoprob Niniwe mutuku ninye kum opnamle,’ tenebuka, kum nyalamse do? Adeiyok ati ara, na adiparyuk, bai sakuka, Tarsis mutuku minopce binamse. Nara, an winilyam ning, akunum kel bikamkise. Ara, Allah anda ninye malye ubica babye, adiparyuk kum oltakalyame. An kanye aniryuk, bico tenebuka lyesilyame. Tonda, minopce yu kum ukulul bukni, ninye malye winilamice ning ara, namin kisilyamce, weik arye bico tenesilyame. Anda ninye nirya ati, weik arye bico tenesilyame. Ati ara, malye wininyak nang arye, sik malye winin ning batakicopura, anda, ‘Ninye opnaman,’ tenepmanan ning ara, aning batakuka, teleb ulinanye usilyame,” Yunus birye Allah ati, nyabuk.
Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.
Dipkoprop Allah Yahweh ara, minopce yu upliba, adiparyuk kum wenesulule. Bico tenepsilirye, namin asa aryuk melisulule. Bukni, el babye, mikip weiknye ulule. Ati ara, yata nang do nirya elti, ‘Nun likʼ tenebikirye, pia malye winibikcopura, sik wenenak arye batakliba, talye kum wininamake. Allah arye, sik malye uning ati, ‘Daupmalyeʼ tenen, talye namin kum kilule. Aning kum bukni, yu weik upliba, mikip arye anang ati wenepnamlarya. Dan mutuku do nirya, Allah Yahweh banamle mutuku noutam, el pil doplyopura, amutuku noutam ara, mikip weik kumanya dolamle. Tonda weik mok ap, kum ap, bebeya laklamle ning ap, ulule. Winipmanto ara, Allah Yahweh, el yan yanibuka, banamla sukum arye, atu sung-sunga ara, dua bum atonun unamle.
Ayupu ton nyabuk. “Nun ni Allah, ance nyapdeiamsulum ning ara ani. ‘Nara anggun ni Allah Yahweh unune. Na minpola yu kum unulule. Narye anggunti, bico tenena ap, melina ap usune. Ati ara malye wininyak ninye ap, nati yanininyak ninye ara, sik malye ning batakicopura, anang nirya ara, namin kinune. Namin kinamne bukni, dipkoprob kekena kumce, malye pia wininyak nang ati wenenune. Tonda, sik ni yapu arye malye weik winibicopura, dodeipranin, banamak mapu generasi ke tiga ap, ke empat ap, ati ikin ning sik nong deice deibuka wenepnamne.’ Winibuka nyapdeiamsulume,” nyabuka, Musa birye morobuk.
Ura, Allah arye anggun nirya ati, ‘Se, sik malye winin ning bataknamak do?’ tenen, bico tenesilirye, adiparyuk minopce wenebuka kum osulule. Aning kum bukni, tia talak atibuk namin kisilya deiyok ara nyapnusine. Ara, Allah arye nun tukwak unyap ninye nirya ati, ‘Se, na namin asa arye teleb ubuka melipsiniba, lo tuba awaplyopura, adeice arye sik malye wininyak ning moubuka tenebikirye batakikcopura, tamubuka na tam kipropnamak do?’ tenen, kalikuka disulule. Winisulul bukni, anggun dan do? Aning, moubuka kum tenelulumce, ‘Talya luparabuka malye winin ninguk talibuka wininamap’ tenen, ululum do? Anggunce, aning tenelulum do? ‘Allah bico tenesilirye, adiparyuk wenebuka kum osulul ning ara, elce, ‘Lo arepniba, sik malye winin ning bataknamak’ tenen, patalyeba namin kisilya ara, mambul kum ati, dauplye,’ tenemunce malye tuba winilulum do?
Malye-malye weik winilamubu ning ap, malye tuba wininyap ning ap ati, wenebuka oplopsutue. Akunum opmasutu bukni, Allah arye, nun nirya ati, pia weik arye, bico tenepsukce, lyepsuke. Lyepsukce, Kristus ap, talima dukdongopsuka deice arye, kam bulina atonun, teleb kipdeipsukce lyepsuke. Allah arye, nun malye winina ati talye oplopsutu bukni, ‘Se sikda bicoe’ tenen, namin kibuka mitang asa arye, kanye talima arisilya ara, mitik tonun arye kume. Weika arye, bico tenesulule.
“Wininalyame,” nyapmakina deiyok ara, ani. Ara, nun nong mikip kilana ati, bik-bik ana ap, mikip arye pil dona ap ara, mitik teleb bukni, Allah pia diksukumuk ulye touk, nun babye teleb koprop una ati, adiparyuk kel bikna ara, weik mambul. Diksukum ubya deice arye, yuk winin ning nirya noutam melisulule. Nun kele, diksukumuk ubibyopura, wini talak tukwak unyap talak babye, aminyan im deice binuka unamap talak babye, melibuka teleb keipdeipnamsile. Weik mambul ning ara, ‘Allah diksukum ulul touk, na babye diksukumuk unamne’ tenen unamabe.
ကြော်ငြာတွေ