Yesaya 66:1 - Eipomek1 Na Allah Yahweh im deice bukuka ununye birye nyapsine. “Winipmanto ara, tukwak mutuku ninye deiyok nang arye, weik bun ning deice bukikirye, yupu bokolilamak touk, nara, im deiceuk, pia bukuka unune. Im deice ununa anya arye, tukwak mutuku ara, yan dikdik sena ati delilamak touk, unune. Ati, yata wiribuka aik doptumba, anyaik pum tam dikdik sebuka uptinye do?” အခန်းကိုကြည့်ပါ။ |
Yesaya 66:1
20 ပူးပေါင်းရင်းမြစ်များ
Morobukce ayupu ton nyabuk. “Bukni, dipkoprob Allah anda atukwak mutuku noutamakuk ulamtum do? Kume, im deice babye weik mutukue. Tonda im deice pia eitam babye, dinap weik aulul bukni, Allah anda amutuku babye, kum suktalipnamtume. Anda weik mambulnye biti nyapkine. Ati ara, aning atonun, na dopse aik ara, pia mitik aik dopse ati, anyaik pum tam babye kum uptume. Anda tonok sukumuk kum ulyama ati nyapne.
Amutuku noutam unyak nang arye nyapsik. “Nun kayapu nang, anggun nirya kekeplulume! Nun nirya arye, neika bibirye, Allah el tia talak ati ululak, Yerusalem mutuku binamabe! Yerusalem mutuku bibyeura, Allah el si erena ati, nun nirya arye, nun kisok tuku deice dipdongobuka, kanupdongobuka, Allah el siuk erenamabe. Winipmanto ara, Yerusalem mutuku, Allah el tia ati, didik sen mutuku noutam ulula ati, Yerusalem mutuku bibirye, el si uk erenamabe.
Bukni, nun ni Allah, el si Yahweh bira, aning-aning nirya talibuka, ninye deiyoknye ulirye, el mikip ara, pia weik ulule. Allah Yahweh, aning-aning nirya talilulak ara, im deice arye, pia teleb takhta deice bukuka, yupu bokolisulule. Ati ara, yata ning do nirya, elcuk disulule. Ati, tukwak mutuku unyak nang nirya, sikce wininyak ning, yuk-yuk ning nirya babye, elcuk elilirye, bikisulule.
Morobukce ayupu ton dukgobuka nyabuk. “Bukni, Allah anda atukwak mutuku noutamuk ninye ap neika uptum do? Kume, im ap, im deice bukni, pia eitam im alip tam bukni, eitam deice tam babye, pala weik mutuku ulul bukni, aning noutam babye, kum uptume. Anda pia weik mambulnye ulyama ati im tam babye, tukwak tam babye, dipkoprob suktaleptue. Ati ara, atonun narye dopkise aik babye, pia mitik aikuk dopsa ati, anyaik noutam babye, dipkoprob suktaleptuba, asukum pia kum uptume. Ara an tonok kum ulyamnye biti nyapkine.
Bulubuka yayikopura, ninye deiyoknye Raja Daud tikukabukce, aninye nirya ati nyabuk. “Na kwitcapu ap, amutuku-amutuku noutam ulamlumba, narye talisunun nang nirya ap ati, na nyapnun yupu ara, moubuka kekepnamlume. Minop talak ara, na Daud birye, ‘Allah Yahweh nyapdeiamuk yupu sekuka deibik ning ara, pia teleb marikna pum tam dongolamik ning, el si Peti Perjanjian, aning dobuka delina ati, pia teleb aik dopnamne,’ tenelamse. Tonda, ‘Nun ni koproba Allah Yahweh, el si erena ap, elda aning-aning nirya deice tam ulirye, el ap, el mambul ning ap, pia aunamle aik dopnamane,’ tenelamse. Winibuka tenelamse ati ara, akunuma Allah Yahweh el aik dona ati, pia teleb ning yuk-yuk ning nirya ara, akunum kintinibuka delinune.
Ati ara, nun Israel yala nang nirya arye, nun si erenyap Allah, el si Yahweh ati, “Anda pia teleb ulyame,” nyabuka, el si weik tonun erenamabe. Wininamap talak arye, Allah el si eren aik domik mutuku kon deice, amutuku dam yanganamabe. Amutuku deice yapyopura, el si erebibirye, kutam tuku deice dipdongobuka, kisok kanubuka, el pia diksukumuk teleb winilul ning tenebuka, el siuk erenamabe. Aning wininamap talak ara, talye ati kume. Deiyok ara, nun ni Allah Yahweh, elda pia teleb leknye ulula ati, el siuk erebibirye, el ulye mutuku kon dam yapyopura, kutam tuku dipdongobuka, kisok kanupdongobibirye, el siuk erenamabe.
Nyabikopura, Yesus arye el mapu nirya ati tamubuka nyabuk. “Allah el si erena ati weik aik domika nirya dipdelulume. Weik cang keil pala arye deibuka welebikce, anyaik dobik keil nirya ara, aminyan ara uluplobiceura, keil deice tonok ning babye kum bataknamake. Anirya daklobikiba, singsinga bulamla atonun upnamle,” nyabuk.
Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Ati ara, yatanye birye, ‘Kume, na dungnupnyopura, Allah arye na wininye ning kum eipnamnile,’ tenelul do? Kume, na Allah Yahweh ara, im deice babye, tukwak mutuku nirya babye, aununa anya arye, aning-aning nirya dinune. Ati ara, tonoknye babye, ton kum duknuptue. Anirya dinauk ununa anya arye, dungnuptuma babye, eilisunune.
Na teninun ning ara, Allah Yahweh el si eren aik ati, narye dopnamne ning ara, weik aik ap, tonda pia urasin teleb kibuka dopnamne. Winipnamna deiyok ara, yuk nang im sirya, mutuku sirya nirya arye, ‘Nun ni koprobaʼ tenen, yuk talye ning ap, isa ati si erenamak ning ara, talye ulul bukni, nun si erenyap Allah ara, weik mambul ap, mikip weik ap ulule.
Libanon mutuku buru tam ubukba, ‘Ara nun dokola ning,’ tenenyak ning nirya ara, bobuka anggun dam anyuk boyanganamsiyake. Anggun boyanganamsiak ning ara, pia dekna weik yo, urasin teleb yo, aning si ara, Berangan yo ap, Cemara yo ap, Eru yo ap nirya ara, bobuka anggun dam boyanamake. Boyakiba, urasin teleb yo dopmunce, nara Allah, na si eren aik urasin teleb ubuka dopnamnulume. Tonda na Allah yanilyanganamnak ara, na si eren aik ara, pia urasin teleb ubuka memep deipmunyeba, narye anyaik dirina weik deipnirye, teleb kipdeipnamne.
ကြော်ငြာတွေ