Yesaya 2:2 - Eipomek2 Tonda, sirya daknamle talak ara, Allah el si erena ati, domik aik tuba aubuk mutuku deice ara, weik mambul mutuku unamle. Mutuku-mutuku nirya, weik mutuku aubuk bukni, amutuku tonok ara, weik mambul mutuku kipnamle. Yerusalem mutuku dana-dana tam bukuk mutuku ara, mitik mambul bukni, amutuku tonok ara, weik mem mutuku erebuka tiknamle. Winibuka tiklyopura, mutuku dana-dana unyak ninye, ayala-ayala nang yupa weik tonun, bulubuka amutuku dilyanamake. အခန်းကိုကြည့်ပါ။ |
Yesaya 2:2
56 ပူးပေါင်းရင်းမြစ်များ
Ara, mutuku sirya, im sirya nirya noutam unyak nang arye, ‘Allah el siuk erenamabe’ tenen, bulubikceura, Yerusalem mutuku neika yanamak talak ara, Allah ati, si erenamake. Tonda atalak ara, yuk mutuku nang yala-yala nirya ap, sik ninye deiyok nang ap, sik nirya arye, Allah Yahweh ati, diba tenebikirye, el si tonok, pia erenamake.
Nun ni Allah Yahweh bira, aning-aning nirya talibuka, deice tam ulirye, Pia Mikip Weiknye ulul ati ara, nun nirya arye el tibuk, ‘Se, anda pia telebuk ulyame,’ nyabuka, el siuk pia erenamabe. Ara, Allah el kanye delilul weik asik noutam ara, Yerusalem mutuku noutam arye, el siuk erenamabe. Anyasik ara, Allah arye, ‘Na mutuku’ tenen, wipdeiamuk mutuku dup, wini talak babye, tuba abuke. Amutuku ara, pia teleb, Lekuk ulule.
Anggun weik mutuku kon deice ululum nang ara, yata deiyok ati, Sion mutuku eiplumce, ‘Se, yata ati, Allah arye nun mutuku kum weibuk do?’ teneplumce, malye kanye boplum do? Ara, sikda, Allah el si Yahweh arye, ‘Sion mutuku noutam ara, amutuku akunum kanye deipmana ati, nara amutuku noutam pia-pia aunamne,’ tenebukce, akunum wibuka ati, nun like,’ teneplum do?
Na ni Allah, ance nun ninye deiyoknye ati, melipminya deice arye, elda ninye deiyoknye Raja kibuka, talinamle talak arye, talinamle mutuku ara, keting yangan tam arye, dipdongobuka, keting wekelban tam nirya ap, talipliba, lo weik unamle. Ara atam, weik laut mekwen dam arye dipdongobuka, otam laut mekwen tam nirya ara, elce talinamle. Winipliba, anoutamak nirya ara, pia weik mutuku unamle. Aning atonun, keting yangan tam biyuk weik mek, el si Efrat mek dam arye, dipdongobuka, keting wekelban tam nirya ara, mutuku-mutuku nirya, ‘Ance melipminba, elcuk amutuku nirya talinamle’ tenen, moropkine.
Aminyan sirya talak ara, tukwak mutuku im sirya, mutuku sirya, unyak ninye, ance kwepdeiamlum ninye yala nirya ara, an si eren ati, an damuk yanganamake. Se, Allah anda aning-aning nirya talimince, deice tam erebuka, Pia Mikip Weik Deiyoknye ulyama ati, tukwak ninye nirya, an urasin din sukum akunum yaceura, sik nirya arye, kutam tuku deice deibuka kanupdongobuka, an si atibuk erenamake. Tonda, an ap, an mikip ap, an pia teleb si ulyamnye ap ati, “Anirya ara, pia telebe,” nyabuka, an siuk erenamake.
Allah arye tenyamuk talak akunum kiplyopura, Daud birye deibukba, deipdanin yangalamikca ani, deibikceba, aminyan talak Raja kipnamlanye biti, im sirya, mutuku nirya unamak nang arye, el tibuk dinamake. Sik im sirya, mutuku sirya nirya, unamak nang nirya ara, el anye ulamlyakuk yakirye, ‘Se, anye nun ton biktibyeʼ tenen, el dam yakirye, el tibuk, si erenamake. El anye unamla ak ara, pia telebuk upnamle ati, ninye mutuku sirya, im sirya nirya eibicopura, ‘Se, el ulyak ara, pia telebe,ʼ tenenamake.
Asukumuk, Sion mutuku deice, Allah arye, weik kalina kwalibuka kintinip deipnamsile. Allah Yahweh ara, aning-aning deice tam erebuka, mikip weik ulinye birye, im deice yin talin malaikat talilule. Elda, mikip weiknye birye, mutuku sirya, im sirya nirya unyak nang, sik din ati, weik kalina kwalibuka kintinip deipnamsile. Elce pia teleb-teleb din ning, ap, tup kalimna ap, meta ap, yok noutam wamlye ning ap, tonda anggur duk yu mek, pia to ning ap, wibuka teleb ninguk kintinip deiplirye, kwalibuka arepnamsile.
Atalak ara, weik lelim nyalamle ning, el si terompet, lelim weik tonun pong-pong nyaplirye, yukupliba, sik Israel nang, minop talak Asyur mutuku noutam bobinamikba, daulamika ani, sik bisik wangamuk nang ap, tonda Israel mutuku noutam, Allah arye sik apu yapu malye ulamik ning ati, inibuka donokamukba, bindomikce, Mesir mutuku noutam binuka ulamik nang ap, sik anang nirya ara, terompet lelim kekepnamake. Kekebikirye, adiparyuk tuba tonap tamubuka, Yerusalem mutuku weik asikuk yakirye, pia teleb lek aikuk, Yerusalem mutuku deice tamubuka yakirye, sik ni koproba Allah Yahweh, el siuk yanuka erenamake.
Bukni, anggun Allah el mapu koprop, Yudea tam ululum nang ara, kanye deipmunce, kanye deilin mot uk nyapnamlume. Ara, winipmanto ara, ‘Allah el si erebibirye, el si erenak, mutuku kon deice binamapʼ tenen, teleb kanye deipmakirye, kwalina lukunyan talak kwalibikirye, kanye deilin mot nyabuka balamak touk, anggun Yudea tam nang babye, atalak ara kanye deipmunce, kanye deilin mot nyapnamlume. Tonda winipmanto ara, sik Israel nang arye, Allah el si eren aik bunukca ati, bung-bung nyan ning el si seruling bopnarye nyapnin balamak touk, anggun Yudea tam nang babye, atalak uk aning atonun ubuka kanye deilin mot nyapnin banamlume.
Allah arye, el amu tam pil melibuka dolulunye, nati nyapnuke. “Na mi anda weik mambul pil dopnamnilam bukni, ‘Aning mitik uplyak’ tenen, weik ikin ning ton nyapnukine. Ara, Israel ninye, sik apu koproba Yakub birye deiamukba dadeipdanin yangalamik ninye ara, yuk pera mutuku yu nang arye, obuka sirya dakikce, tapu koubuka sik mutuku tamubuka bobinamike. Winilamik bukni, ance pil donmaminya ani, aninye tuba tonap, dekenamnululume. Yuk nang arye Israel yala ninye weik tonun, bobinamikba, kum danin balamikba, na Allah arye kalikuka melilamsiba, tuba kam unyak ninye ara, an pil dominya deice arye, aninye dobuka weik tonun, na dam ila tamubuka boyanganamnilyame. Na Allah arye, anti, dirina kina deiyoknye kipdeipkiniba, ance Yahudi yala kum ninye ara kunuknak atonun unyak bukni, anggunce, sik talima dirin kilinamlume. Winipnamluma deice arye, na dirina ara Yahudi yala kum ninye sik deice arepneba, moubuka tenebikirye, nati kel kipnamake. Na dirina sik arepneba, adirina eibikirye, sik kanye deipnamaka deice arye, sikce ninye mutuku-mutuku nirya ap, mutuku sirya im sirya daunyak ninye ap, peterebikiba, kekebuka kel kibikirye, sik malye unyak ning batakicopura, narye ninye weik lyepnamne.” Allah arye nyabuk.
Sikce aning nirya akunum winibikcopura, nara, Yerusalem mutuku noutam bukni, na si eren aik pum tam arye, ‘Sik si ap, sikce winilamik ning ap ara, ninye nirya tuba teninamakʼ tenen, lak bikilin ning ton deipnamne. Yuk nang nirya ara, aning eibikirye, bikikcopura, ‘Se, sik asi sekeiamuk nang ara, dipkoprob mambul teleb weik nang ulamik. Allah el mapu koproba babye, mitik mambul unyak bukni, dipkoprob anang ara, pia teleb mambul weik nang ulamik,’ tenenamake. Tonda ‘Teleb ning ara, nunce mapu ap, kilmapu ap, deiptibyeba, nun si pia tuba aupnamsil bukni, dipkoprob weik mambul ning ara, Allah arye anang, sik lak kilin ning deibuka ati, sik si pia tuba tenenamabe,’ tenebuka nyanamake. Na Allah arye, sik anang si dobuka, na aik pum tam deipniba, anggun si aupmasilyopura, tuba bikinamsine. Winibuka anggun si akunum deipnyopura, narye anggunti, kum bataknamsine, Pia ati, aupnamsile, nyapsine.
Narye aninyasik nang nirya dobuka, Sion pia lek teleb aik bobinamne. Na aik ara, ‘Ninye nirya arye, na Allah ati, anyaik yanuka moronamniakeʼ tenen, deipsa ati, narye lo arepniba, anyaik wekuka moronamniak talak ara, pia teleb kanye kipdeipsiniba, pin-pin kanye bobuka unamake. Tonda, na si erena ati, sikce domba ato ning obikirye, ‘Allah arye, nun malye winin ning kum kibuka deipnamsilʼ tenen, na mesba deice arye, uku dongobikirye, arenamniak ning ap, tonda sikce nati teleb aren ning ap, arepnicopura, sik ninye nirya arye, nati morolyangana ati wininamle,’ tenyamse. Akunum tenyamsa ati aning ara, dipkoprob nong kunupnamlarya nyapsine!
Winipliba, ninye mutuku-mutuku nirya arye, sik deice weik dirin ulul ning eibikirye, kanye weik deibuka sik dirinak uk dilyanamake. Tonda sik dam arye weik dirina lak koprop uplyopura, yuk pera mutuku ninye, sik ninye deiyok kibuka talinyak nang Raja-Raja nang weik tonun, adirina lak uplya eibikirye, kanye talima lipdopliba, sik adiparyuk yanganamake. Ara, pia teleb kipdeipsiniba, aning dilyanganamaka ati nyapsine.
“Bukni, na Allah Yahweh ati batakuka malye ululum ninye arye, ‘Na si amutuku deice erenamniyak’ tenen, wipdeiamse mutuku, Sion mutuku pia teleb ak. ‘Amutuku ara weik mambule,’ kum tenemunce batakalum nang anya arye, na si eren aik batakuka kum wekelulum nang ara, narye wenepsiniba ikin weik unamsile. Anggunce winilulume. ‘Aminyan nun unamap ning ap, talinap ning ap, teleb kilinamsil ning’ tenen, isa si bitinye sik si ara, Gad ap, Meni ap ati, din ning aning-aning nirya ap, anggur mek ap, kintinibuka delilulume. Aisa si erelulum ninye nirya ara, wenebuka onamsine.
Narye wibuka deipnamne nang arye, amutuku nirya peterepra banamaka noutam arye, anggun kayapu nang, Israel yala nang ton, amutuku-amutuku noutam arye dobuka, Yerusalem mutuku tamubuka boyanamake. Ara, ninye arye, Allah el si erena ati, deken ning boyanuka arelamaka atonun, sik yuk-yuk mutuku nang boyakirye, na Allah Yahweh ati, arelyanganamniyake. Tonda, anang ara, bobukabikirye, na wibuka deiamse mutuku dup, Yerusalem pia teleb lek mutuku boyanamake. Boyanamak ning ara, kuda basam balye deice buna ap, keledai basam balye deice buna ap, unta basam deice ap, kuda basam arye libuka bobanyak kereta perang deice ap, anang libuka boyanganamake. Sik amutuku nang boyakirye, na dam boyanamake. Aning ara, winipmanto ara, anggun Israel nang arye, na Allah ati, na si erena ati, gandum ning bulubuka kintinibikirye, teleb lun ning, mek loknopura, aning deipnirye, na si eren aik dam boyangalamik touk wininamake. Ara, gandum duk libuka, teleb ning deice arelyangalamika atonun, sik yuk-yuk mutuku nang boyakirye, na dam boyanganamake.
Aning atonun, yata winiryuk ning kiplye talak arye, owala winiryuk wala kipnamle talak, anoutam talak nirya ara, ninye nirya yanuka, na si erenamniyake. Tonda, talye pil dona kumce, na si eren sum, Sabat sum kiplye talak arye dipdongobuka, ominggu kipnamle Sabat sum, anoutam talak nirya ap nirya ara, tukwak nang mutuku sirya, im sirya nirya unyak nang noutam ara, ton nang bulubukabikirye, na si erena ati, Yerusalem mutuku noutamuk bukni, na dam yanamakirye, na siuk erenamake. Na Allah Yahweh arye nyapmasina anya arye, aning nirya ara dipkoprob nong upnamlarya!
Allah arye nyabukba, nabi Yeremia birye, tamubuka nyabuk. Na ni Allah Yahweh, anda erebuka ulyamce, mikip kilinilyame. Na kanye imun unilye talak ara, na ni anda, na mikip kelinilyamnye ulyame. Tonda, imun kanye bobuka, unun talak do, ikin ning yanuka unilye talak do, na mal olan nang arye opmanto uninyak talak do nirya ara, ancuk melibuka kalikinilyame. An damuk yanuka dungnubuka uniba, yuk nang arye kum opnitinge. Telebuk wininune. Tukwak mutuku im sirya, mutuku sirya, unyak nang nirya ara, ‘Elcuk melibuka lyepdopnamsilʼ tenen, an damuk yanganamake. Mutuku sirya, im sirya nirya unyak nang, an dam yakirye, nyanamake. “Nun apu yapu arye talibuka, si erelamik ning ara, nong kum ning, talye ninguk talibuka si erelamik. Tilila yupu uk, diba tenebuka taleamikce, dipkoprob nong kum upnamle ning, ninye kum melipmanto ninguk talibuka winilamik,” nyanamake.
Allah Yahweh ara, el yu ubukba, ‘Amalyeuk wininyak ninye ara, wenebuka opnamne’ tenen, kintinibuk ning ara, pia kum bataknamle. Kume, Allah arye, ‘Winipnamne,’ tenelamuk touk, aning nirya ara, akunum uplirye, sirya daklyeura, bataknamle bukni, aning nirya min kum winipmalye talak ara, dipkoprob kum bataknamle. Wini talak ara, moubuka kel kum biknamlum bukni, doyanamle talak, sirya talak ara, Allah el mapu nirya ara, ‘E, deiyok ani,’ tenen, pia moubuka kel biknamake.” Yeremia birye nyabuk.
Minop talak, Yehuda yala ninye ati, ninye deiyoknye kibuka taleamsuknye, el si ara Hizkia, elce taleamsuk talak noutamak ara, Allah yupu nyapdeipliba, laka nyananye, el si Mika, mutuku si Moresyet mutukunye birye, nyabuk. Atalak ara, nabi Mika birye, amutuku ulamik ninye ati, nyamuk. “Allah Yahweh, aning-aning nirya deice tam, weik erebuka ululnye birye, el yupu nyapdeipnukba, yanuka nyapsine. Allah Yahweh ara, aning-aning nirya talilule. Im deice yin talin malaikat nirya, sik weik deiyoknye ulule. Allah arye nyapdeipnuk yupu ara, ani. ‘Sion mutuku ara, wa win dam atonun upnamake. Tonda Yerusalem mutuku asik dobik ning ara, yu nang arye yanuka, uluplobikiba, asik oldemuk upnamle. Tonda, Allah el si erena ati domik aik, uluplobikiba, dauamlya ani, aminyan talak ara, amutuku dupak, talye palamle yo noutamak tiknamle. Anyasik uluplobikiba, talye aikuk upnamle atia.’ Allah arye nyapdeipnuk yupu nyapsine,” nabi Mika birye, nyabuk.
Winibikce talak ara, Yerusalem mutuku ati, “Amutuku ara Allah el unak,” nyanamake. Nyabikirye, mutuku-mutuku nirya unyak nang, bulubuka amutuku yakirye, na si yanuka erenamniake. Sik talima noutam aryuk mandipna kanye bobuka, si erenyak ning ara, batakikirye, ton ap kum wininamake. Aning winibikce talak ara, Allah el siuk erenamake.
Allah arye Israel ninye lyeproplyopura, sik aninye Sion mutuku deice yakirye, atalak ara, kanye deibuka, pin-pin asa arye, teleb mot sepnin yanganamake. Ara, Allah arye sik un ning, teleb ning nirya areplibuk, aning deice kanye deibikirye, kanye teleb mot senamake. Allah arye sikti, arenamle ning ara, ani. Yakong atonun ning, el si ara gandum ap, anggur tapu duk ap, anggur duk teikuka, anggur din mek kwepnamake ap, tonda sapi basam ap, domba basam ap, kambing basam ap nirya arepnamle. Winipliba, sik mutuku ap, sik ap, pia teleb unamake. Winipmanto ning ara, ninye arye koulamak ning mekinak kouamikiba, bok teleb ulamle touk, sik kounamak ning nirya ara, ton pia kuoluna kum unamle. Teleb uk ulirye, weik unamle. Winibuka unamle anya arye, tuba tonap ikin kum unamake. Telebuk unamake.
Na Allah arye, ayupu nyapmasina nirya ara, dipkoprob winipnamle. Bukni, doyanamle talak ara, narye Moab mutuku noutam nirya ap, Moab mutuku unamak nang ap ati, tuba tamubuka, teleb kipdeipnamnarya! Ayupu nirya ara, na Allah Yahweh arye, akunum nyapdeipmasina ati, aning nirya ara, dipkoprob nong upnamle! “Ati ara, na Allah Yahweh arye, sik Moab nang ati, wenebuka opnamne ning ati ara, akunum nyapsine. Ton ap dukdongobuka kum nyapnusine. Akunum nyapne. Allah Yahweh arye nyabukba, nabi Yeremia birye sekuk.
Aning nirya ara, dipkoprob, anyapmasin ning atouk winipnamne. Bukni, aminyan doyanamle talak ara, Elam mutuku tamubuka teleb kipdeipyeba, sik min talak, pia telebuk ulamik touk, tuba tonap teleb kipdeipniba, anang arye teleb kanye bobuka, telebuk unamake. Ayupu nirya ara, na Allah Yahweh arye, akunum nyapdeipne. Allah arye nyabuk.
Ati na Allah aryuk, sik Babel mutuku noutam ara, isa el si Bel, si erenyaka ati wenepnamne. Ati, sikce isa Bel el si erelamikce, yuk mutuku ninye talilamik ning nirya, alubuka dopromik ning nirya ara, tamubuka, sikce aning dobuka, yuk mutuku ninye ati, tuba tonap arenamake. Aning winipniba, sik mutuku sirya, im sirya nirya unyak nang arye, ‘Isa Bahal el si erepnamabʼ tenen, Babel mutuku yangalamik touk, tuba tonap kum yanganamake. Bel isa ati, batakicak arye, el si pia kum erenamake. Ati, sik Babel mutuku nang arye domik weik cang keil poka nirya ara, narye dakuka, sice buklopnamne. Nara, Allah arye, ayupu akunum nyapdeipne.
An Gog ap, an tam yin talen nang ap arye, na mapu koproba, sik Israel yala nang dam binuka ona ati sik mutuku banamlume. Amutuku banamluma ara, winipmanto weik kumanya ap, mok ap yanulye talak yangalamle touk ubuka, anggun nirya yamunce, Israel nang dam yanuka opnamlume. Na Allah arye tenyamse talak dam akunum kiplyopura, narye an ap, an tam nang ap dopdeipniba, ‘Naʼ tenen, mutuku ap, ‘Naʼ tenen, nang ap, anggunce binuka opnamlume. Narye an deice, Israel nang ati wenepnirye, oplopnyopura, sik dana-dana tam unyak nang yuk-yuk ning nirya, narye winipnamne ning winipniba, eibikcopura, ‘Se, Allah ara, dipkoprob pia mikip weiknye ulule. Elda, malye winin ning pia kumce, pia teleb leknye ulule. Aning ara akunum eibuka bikmabe,’ tenepnikirye, na Allah ati, moubuka biknamniake.
Atalak ara, Babel mutuku tuba ulamse talak bukni, lengdar atonun mapsirye dinmasiba, Allah arye na bobuka, Israel nang ulamik mutuku noutam bobinuke. Winipnukba, amutuku noutam weik tonun bukamuk mutuku kon deice binuka deipnuke. Atalak ara, narye dana-dana tam dinmasiba, na dam bukni, weik asik atonun ning, weik ning domika, ara weik kota kilamak mutuku atonun ton, iknapnye tam (arah selatan) awamukba eipse.
Ati, na an dam yanamna deiyok ara, ani. Ara, sirya talak, an mutuku nang, sik Israel nang ara, sik dam winipnamle ning ati, laka nyapkinyeba, moubuka kel biknamlama atia. Ara talye ati kume, anda lengdar mapmoma deice arye eipmalam ning ara, atalak winipnamal ning ati kume. Aning nirya ara, aminyan talak, sirya daknamle talak yanamle ning ati, aning tukwak upmauba, lengdar deice arye eipmalame,” nyabuka, malaikat deiyoknye Mikhael birye, nyapnuke.
Bukni, Allah im deice ululnye birye, duknun ning nirya ara, elcuk talibuka ulirye, lak kilisulul ati, duknuna ning ap, aminyan talak winipnamle ning ap ati, elcuk lak lepkutue. Wini talak ara, weiknye Nebukadnesar, an kel biknamnilyame. Allah arye lengdar mana ning aripkuka deice arye, aminyan dowinipnamkil ning ati, akunum lak lepkuke. Ati ara, lengdar maplum ning ap, tonda, ‘Lengdar do, dipdip do?’ tenena deice, eiplum ning ap, nong ara, narye lak nyapnukine.” Daniel birye nyabuk.
Atalak aniryuk, apatung nirya sakukce, amemamik ning, kat ning emas ap, perak ap, kiri tuku kat ning ap arye, memamik ning nirya ara, dakuka uluplobuk. Uluplobukce, kumanya yayukce, uluplobuk ning nirya ara, pubukba, erepdakuka bindobuk. Tuku libuka yamultaklamak atonun winibukce, sikce buklobuk. Atalak ara, asem maplirye, sesal lemlya beras kala koklobikiba, kumanya yalirye bobuka balamle touk, weik kumanya mikip yayukce, aning nirya bobuka bindobuk. Tonok ning babye, ton kum batakuk. Bukni, apatung obuk keil ara, weik mutuku bulamle touk winibukce, im sirya, mutuku sirya nirya erepdobuk.” Daniel birye nyabuk.
“Naio ance min talak arye, winipmoba eipmom ning ara, nong ara laka nyapkine. Ara, weik mutuku yangan keil noutamak, teleb uka dana-dana kibuk ning ara, ninye taruk deice arye kum winibik. Aweik keil cobuka sakuk ning ara, kat ning besi ap, tembaga ap, kira tuku ap, perak ap, emas ap deice arye memamik patung yanuka, siknibuka nirya oplobuk. Awinibuk ning ara, Allah el mikip weiknye birye anti, ‘Kel kipnamle’ tenen, laka nyapkuke. Ara, an ninye deiyoknye winipnamkil ning ati, laka nyapkuke. Ati ara, an lengdar mapmalumce, eiplum ning ap, narye, ‘Nong ani,’ nyapmakin yupu ap ara, pia diba tenebuka kel biknamlyame. Ara, pia dipkoprob yupu nyapmakina atia.” Daniel birye, Babel mutuku ninye deiyoknye, Nebukadnesar biti nyabuk.
Winibuka daulamica ani, doyanamle talak ara, Israel ninye tuba tamubuka, sik ni koprop Allah Yahweh atibuk enamake. Winibuka elamikirye, Allah Yahweh el dam yanuka unamake. Tonda, sik deiyoknye bira, Daud birye deibukba, dadeipdanin yangalamik ani, Allah arye tonok deiyoknye, wibuka deipliba, ‘Anye, nun ninye deiyoknye, Raja unamsil’ tenen, el dam tamubuka yanganamake. Winibikcopura, sirya talak, sikce nati ilil upliba, ‘Se, nun ni Allah, elda weik mambulnye’ tenen, el amu tam unamake. Winibikirye, el siuk erebikcopura, Allah Yahweh arye, aning-aning nirya, weik arye yamubuka, sikti arenamle. Ara, sirya talak wininamak ning ati, laka nyapkine. Allah arye nabi Hosea biti, laka nyapdeibukba, sekuk.
Wini talak ara, amutuku noutam arye, mutuku kon ap, lu mutuku ap ansinibuka aubuk bukni, aminyan talak ara, amutuku nirya weik lu kipdeipnamle. Ara Geba mutuku noutam bukni, dabu tam, utara mutuku asukum dipdongobuka, Rimon mutuku iknapye dam, eitam mutuku nirya ara, weik pala lu mutuku uk kipdeipnamle. Winibuka deipnamle bukni, Yerusalem weik asik upnamlak ara, mutuku kon deice uk pia aupnamle. Ara, Allah arye amutuku weik erebuka deiplyeba, tonok mutuku kon deice uk tuba aupnamle. Amutuku noutam el pala ara, ani. Ara, Yerusalem weik asik dana-dana antanap dongobuka, domik keil poka noutam bukni, wekelyangan bisik botopdeiamik bublan, el si ara, Benyamin yala nang wekelban ati bublan bisik, weik pala bisik bublan dam arye dipdongobuka binamlya ani, minop talak botopdeiamik weik pala bisik bublan, asukum dipdongobuka binamlya ani, akeil poka domikak ara, el si ‘Minop Wekelban Bisik Bublanʼ, asukum dipdongobuka binamlya ani, minop talak domik cang keil aik el si ara, Menara Hananel, anoutam arye dipdongobuka binamlya ani, Israel nang taleamuknye, ninye deiyoknye Raja arye, el anggur duk mek kintinip deiamukce, anggur duk purulamukak binuka dipnamle. Ati, weik pala lu mutuku kwepdeipnamle ning ara, pala weik upnamle.
Aning nirya akunum winiplyeura, atalak ara, Allah Yahweh arye, mutuku sirya, im sirya unyak nang ati, ninye deiyok kibuka, Raja ulirye, tukwak nang nirya talenamle. Atalak ara, tukwak mutuku nang nirya arye, biknamake. Ara, ‘Se, diba, nun ni koproba Allah ara, el tonok ulule. Allah el si Yahweh ara, eluk ululeʼ tenen, moubuka tenebikirye, el siuk erenamake.
Nyabuka morolamaka atouk, yuk mutuku nang weik tonap, mutuku sirya, im sirya nirya arye, ninye yala-yala yuk-yuk nang ap, pia mikip weik unyak nang ap, weik tonun Yerusalem mutuku uk, yanganamake. Sik anang nirya arye, yanganamaka deiyok ara, ani. Ara, sikce na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, sik im deice tam unyak yin talen malaikat nirya, sik deiyoknye ununa ati, sikce na si erena ati yakirye, “Naio, melipsilyame!” nyabuka, nati moropnikirye, na siuk erenamniake.
Nara, Allah Yahweh arye nyapsine. Nara, tuba tamubuka, Sion mutuku uk, yanamne. Ara, nara weik asik domikak, Yerusalem mutuku noutamuk unamnarya! Ninye nirya arye, amutuku ati, ‘Se, sik Yerusalem mutuku unyak nang arye, Allah ati, pia diba tenebikirye, el tibuk talibuka ukirye, el siuk erenyake,’ nyanamake. Tonda, na Allah Yahweh, im deice yin talen malaikat nirya ara, sik weik deiyoknye unune. Na mutuku koproba ara, Sion mutuku ati, ninye nirya arye, ‘E, amutuku ara, dipkoprob pia teleb lek mutuku ulule,’ nyanamake. Nara Allah Yahweh, amutuku noutam yanirye, amutuku pia unamne.
Winipsiniba, anggun unamlum mutuku nirya, ulul ning nirya pia teleb upnamle. Tonda, anggun unamlum mutuku noutamak babye, tuku teleb arepnamsine. Winipnyopura, yuk pera mutuku unyak ninye mutuku-mutuku nirya eipsikirye, ‘Se, sikda teleb kanye bobuka, pin-pin asa arye unyake,’ nyanamsiyake. Na Allah Yahweh, aning-aning nirya ap, im deice yin talin malaikat nirya ap ara, sik weik deiyoknye birye nyapsina ati, dipkoprob winipnamle.
Nyabukopura, Bileam birye ayupu ton dukdongobuka Balak biti nyabuk. “Wini talak ara na mutuku uk tamubuka binune. Bukni, na mutuku min kum binmanye talak ara, Israel ninye arye, Balak an taliplumba unyak ninye ati, aminyan talak ikin ning sik nong deice deipnamak ning ara, laka nyapnukine,” Bileam birye Balak biti nyabuk.
‘Allah el nyasilya ara, aning-aning nirya kum upnamle talak akunum dam uplyopura, narye ninye mutuku-mutuku nirya ati, na Dib Kanye weika arye arepnamne. Sik mapu ap, sik kil mapu ap, arye, Allah el yupu lakak ani, nyanamake. Sik kam nang ara, tuba bukmakce diparyuk lengdar atonun ning eipnamaka deice arye, na yupu laka nyanamsine. Sik wisi nang ara, lengdar mapmakce deice arye, na yupu laka nyanamsine.
Winilamuk bukni, wini talak ara nun sirya talak unyaba noutamak ara, Allah arye nunti, el Mi Kopropa deice arye, nyasulule. Allah arye el Mi Kopropa ati, ‘Aning-aning nirya dobuka arepniba, weik ninye deiyoknye ulirye, aning nirya pia talinamle’ tenen, wibuka deibuk. Tonda, Allah arye im ap, tukwak mutuku ap, aning-aning nirya ap, elce nyapdeibukba, el Mi Kopropa pil dobuka deice arye kintinipdeiyamuk.
Anirya dinmasibuk, aminyan ara tonoknye ton, tekbarye malaikat arye, el terompet deice lelim nyabukura, im deice tam noutamak nirya, weik yupu arye nyanmekba, kekepse yupu ara, ani. Ayupu nyanmek. “Tukwak mutuku im sirya, mutuku sirya nirya talibuka ninye deiyoknye nang nirya ara, nun Ni kopropa Allah ap, elce dopkwetepsuk Ninye Lyena Deiyoknye Kristus ap, sik bitinye arye akunum malye kibuka, aning nirya talidurake. Ati wini talak arye dipdongobuka, aminyan doryanamle talak babye, aning-aning nirya taliprikirye, Weik Ninye Deiyok nang pia unamrake.”
Aning eipsopura, aning ton eipse. Weik deiyok nang bun ning deice bukmek kili sal ton eipse. Allah arye aninye ati, yupu lepsisikuka bokolina deiyok ning akunum aribuk. Ara, ‘Yuk kili sal ati yupu lepsisikuka bokeibikirye, wenepnamak’ tenen, Allah arye aninye ati yupu lipsisikuka bokolina deiyok ning aribukba, deiyok nang bun ning deice bukmekbuk eipse. Tonda, minop talak Yesus ap, el yupu ap ati diba tenelamikce, Allah el yupu dobuka peterelamikba, yu nang arye, ‘Nun like’ tenen, sik ngang sekeltakalamik ninye, dib kanye weik aunmekak eipse. Aninye sik dib kanye nirya kam bukikce, keting tamun yupa weik 1.000 tahun deice arye, Kristus ap, sik ap arye, aning-aning nirya talibuka deiyok nang ulamikce talilamik. Anyapmasin ninye ara, talye ninye kume. Ara, Pia Malye Kam Ululnye ap, el urasin atonun ning ap ati, si kum erelamik. Tonda, anye el laka kilin ning, el nomor ara sik asok deice ap, sik taruk deice arye kum seklamik ninye ati nyapsine.
ကြော်ငြာတွေ