Yesaya 11:3 - Eipomek

³ Winilirye, kanye deibuka unamle ning ara, Allah el si Yahweh ati, ilil tenebuka kanye lamapdongobuka unamle. Anye birye, ninye ati yupu lipsisikuka bokolinamle talak ara, talye nong bol deice ninguk eibuka, yupu kum lipsisikuka bokolinamle. Aning atonun, talye amul deice kekeplye ninguk, ‘Akunuma’ tenen, yupu kum lipsisikuka bokolinamle.

Yesaya 11:3 ပူးပေါင်းရင်းမြစ်များ

2 Samuel 14:17

Tonda, na akunum tenepse ning ara, ani. Ara, ninye deiyoknye Raja ance, nati, ‘Melipnamkine,’ nyapnuniminye yupu ara, dipkoprob anyalin yupu nyapdeipnunilam ning ara, melipnamnile. ‘Na kanye kwa dipnamnil,’ tenepse. Ara, talye ati kum nyapkine. Na kanye ara, nia anda, Allah el pil don nang malaikat atonunye ulyama ati, anda dipkoprob akunum kel bikmince, ‘Aning ara, teleb ning, aning ara, malye ning,’ tenepminyakarye, nyasilyame. Ati an si erelyamnye, Allah Yahweh arye, tuba kalikuka melipkilyeura, an wininalam ning nirya ara, ‘Telebuk unamleʼ tenen, Allah morokunune,” aTekoa mutuku kil arye, Daud biti ayupu nyabuk.

2 Samuel 14:8

Nyabukura, ninye deiyoknye Raja arye, akil ati nyabuk. “Anda, tamubuka, an asik binulyame. Aning nirya ara, narye yupu tenipnirye, anti, ‘Winipnamlyame,’ nyapdeipnamakine,” nyabuk.

1 Raja-Raja 3:28

Aning winibuk ning ati, ninye arye nyanmekba, Israel ninye kekebikce utenebik. ‘Se, nun Raja Salomo wininmal ning ara, elcuk kum tenebuk. Nun ni Allah arye, weik kel kina deiyok ning arebukba, adeice arye Salomo birye, ‘Dipkoprop teleb winina ara ani, diksukum ning ara ani,’ akunum tenebukce, akilapu bitinye ati, yupu teleb ubuka bokipmale,’ tenen, kel kibik. Winibuka tenelamikce, ‘Se nun Raja Salomo bira pia weik mambulnye,’ tenelamikce ilil ulamuk.

1 Raja-Raja 3:9

Ati na ni ance kel bikna deiyok ning arepniminba, na talimak weknutopura, an wiamlum ninye ati, ‘Sik winibice ara, malye ning ara ani, teleb ning ara ani,’ tenebuka, nyaptibye. Anyapmakin ara, talye ati kum nyapne. Yatanye birye, teleb ubuka an wiamlum ninye talipturye deiyoknye kiptu do? Na dem aryuk kum winiptinye,” Salomo birye Allah ati nyabuk.

Ayub 12:11

Winipmanto ara, nun nirya kele. Nun amul arye, yupu moubuka kekebibirye, ‘E, aning ara telebe, aning ara, malye,’ tenebibyak arye, kel bikinyabe. Awininyaba atonun, nun din dina babye, sitang deice arye dipdebirye, ‘E, adin ning ara, to nyalul bukni, aning ara, to kum ulula ati, malye din ulule,’ tenenyabe. Bukni, anggun na dam yanmalum nang ara, aning babye, bita kum bikmalum do?

Ayub 34:3

Aning ara, talye ati kum nyapsine. Anggun kele, ninye arye din akunum dobuka dibikirye, ‘Adin ara, teleb dinʼ tenen, dipdekirye, kel bikinyake. Aning atonun, ninye kel weik bikin yupu deice arye nyabikcopura, moubuka kekebikirye, ‘E, aning nyapmaka ara, dipkoprob yupu nyapmake,’ tenenyabe.

Amsal 2:5

Winibuka elamunya ani, eipmunyopura, Allah Yahweh el winilul ning ati, moubuka bikmunce, anggun ilil unamsile. Tonda, Allah el pia weik kel bikna deiyok ning talibuka ulul touk, anggun babye, pia weik kel bikna deiyok ninguk, talibuka unamlume.

Amsal 2:9

Ati ara, anggunce, Allah ati dib tenepmunyopura, anggunda ninye ati bico tenebuka melin ning ara, kel bikinamlume. Tonda, ninye ati, yupu lipsisikuka bokolinalum ning ara, tilila yupu nyana kum aryuk, dipkoprob yupu uk nyanamlume. Tonda, ‘Teleb una ara, ani’ tenen, moubuka tenepmunce, kel biknamlulume.

Yesaya 33:6

Allah arye anggun Israel mutuku ninye ati melisilya deice arye, pia teleb kibuka unamlume. Ilil una pia kum diparyuk, kanye lamapdongobuka unamlume. Elce arenamsila deiyok ning ara, mitik tonun kum bukni, pia weika arye arenamsile. Ara, ninye lyena deiyok ning ap, aning nirya kel kina deiyok ning ap, ‘Wininamaba,’ tenebikirye, dipkoprob una deiyok ning ap arenamsile. ‘Aning nirya doproptibnye,’ tenepmunyopura, anggun ni koproba Allah Yahweh atibuk, ilil upsiliba, el siuk erebuka kisal donamlulume. Winibuka umunyopura, aning nirya arenamsile. Kumopura, kume.

Yehezkiel 45:8

Atuku nirya ara, sik Israel mutuku talebuka unamaka deiyok nang arye talepnamake. Tonda narye, wipdeipneba, Israel nang nirya talebuka, unamaka deiyok nang arye, sik amu tam unamak nang, na mapu koproba ati, sik nong deice, ikin ning kum delinamake. Aning kum bukni, amutuku noutam weik tonun arelnunyeba, Israel yala nang arye, atuku talibikirye, talye mangkau asa teleb arye unamake. Sik ninye deiyok nang arye malye ton, kum kipdeipnamake.

Mika 4:3

Mutuku-mutuku nirya daunyak ninye, sik wininyak ning ati, Allah aryuk yupu bokeipnamle. Ara, pia weik mutuku ati, negara nyanyak sukum unyakce, mikip weik unyak ninye ap, pera mutuku yuk-yuk daunyak ninye nirya ap, dam mutuku unyak ninye nirya ap ati, yupu bokeipnamle. Tonda atalak ara, mal olanyak ninye nirya arye, sik mal olan ati talinyak ning, aning-aning nirya dobuka deibikirye, urdem darapdongobuka, teleb kanye bobikirye unamake. Sik mal olan ati, talilamik yin ap, parang ya ap, besi tace ning ap nirya dopdobikirye, uku dongobikiba, uku buppu arye mitang kiplyopura, wa win ning ap, yo duk dakna ning ap, kintinibuka delinamake. Deiyok ara, atalak ara, ninye im sirya, mutuku sirya nirya arye, ‘Mal olan ati, weik kel kina deiyok ning ara, nun like. Aning tonap kum kel kinamabe’ tenen, unamake. Ati, sik olana ati, kintinilinyak ning nirya ara, kum kipdeipnamake.

Lukas 2:52

Allah arye Yesus ati, kanye deibukce, pia melilamukura, Yesus el nong ap, Allah arye winin ning kel kina deiyok ning ap, weik winilamukura, ninye nirya arye elti, kanye delilamik.

Yohanes 2:25

Yesus arye, ‘Se, anang arye, “Yesus ara dipnye ulule,” nyapniting’ tenen, kum patalamuk. Ninye talima noutamak ulul ning ara, el akunum bikamuka ati, aninye nirya ati, kanye deibuka dib kum tenebuk, ‘Sik dib nang, teleb unyake’ tenen, sikti, el kanye kum delilamuk.

Yohanes 7:24

Anggunda, nong bol deice ninguk eibuka, yupu bokolilulumce, “Aning teleb, aning malye,” nyalulum ning ara batakmunce, dipkoprop noutamak ninguk tenebuka, diksukum yupu uk bokolinamlulume. Yesus arye nyabuk.

Ibrani 5:14

Bukni, Allah yupu pia nong noutamak, tup ning atonun ning ara, talima akunum wisibuk ninye arye, kekebuka doproptinge. Aninye ara, atalak nirya, pia moubuka tenekirye, diksukum unyaka deice arye, ‘Aning malye, aning teleb’ tenen, dipkoprop teleb kibuka wibikirye, kel bikinyake.

1 Samuel 16:7

Utenebuk bukni, Allah el si Yahweh arye tamubuka, Samuel biti nyabuk. “Ancuk eipmince, ‘Anye bira, el urasin teleb, el nong ara, cang weik ati, pia telebnye ulule,’ tenebuka, wibuka erelina kume. Narye, anye akunum batakmana ati, kum wipdeipnune. Deiyok ara, nyapnukine. Ara, na Allah arye, ninye nong ap, sik urasin ap, eipnirye kum erelinune. Ninye arye, nong bol deice ning eibikirye, ‘Aning mambule, anye bira telebe,’ tenelamaka atonun, kum tenenune. Tonda, ninye arye urasin ara, elilalulum bukni, nara Allah, na Yahweh arye, anggun talima pum tam moubuka elisunune,” nyabuk.