Yeremia 9:3 - Eipomek3 Sik abulubuka unyak nang arye, talye tilila yupu nyana ap, talye-talye kanye bobuka, malye weik winina ap, aninguk talibuka wininyakce, dipkoprob ning ton, pia kum wininyake. Sikce aning wininyaka deice arye, winipmanto ara, ninye arye, ‘Yuk nang opnuyap’ tenen, yin talibuka, mal olalal balamaka atonun wininyake. Amutuku nang nirya ara, teleb kibuka un ning deice arye, talibuka kum wininyake. Sik tilila yupu nyanyaka deice arye, amutuku noutam mikip weik nang akunum unyake. Sikce, diksukum winin ning ap, dipkoprob yupu nyana ap ara, pia min talibuka kum unyak bukni, malye winin ninguk talibuka, malyeuk pia winipnin banyake. Dipkoprob ning ara, sik amutuku nang ara, na Allah Yahweh ap, narye wininun ning ap ati, moubuka kum bikininyake. အခန်းကိုကြည့်ပါ။ |
Yeremia 9:3
43 ပူးပေါင်းရင်းမြစ်များ
Diksukum unyak ninye arye, ‘Aminyan talak wininamabe,’ tenebuka, winipnin banamak ning ara, teleb winin ninguk tenebikirye, unamake. Bukni, sik malye ninguk talibuka unyak ninye arye yuk nang ati, ‘Wininamlulume, wininamlume,’ nyabuka nyanyak yupu ara, tilila ninguk ulule. Malye winin ninye arye, tenenyak ning nirya ara, tilila ninguk ulula anya arye, aninye arye nyanyak yupu ara, pia kum kekenamlulume.
Wininamak talak ara, amutuku noutam unamlum nang ara, yanipsiceba, ikin weik unamlume. Ninye deiyok nang arye, yuk nang ati, yupu nyabicopura, aning nirya ton, kum kekepdakirye, sik yupu ara, talye yanilanuk unamake. Aning atonun, ton tam nang arye, sik dam unyak nang ati, yanilanuk unamake. Anggun mutuku mapu arye, anggun mutuku wisi nang ati, ‘Sik wisi nang arye, nyalamsice yupu ara, kum kekenamake. Anggunda, talye nanguk ululume,’ nyabuka, malye yupu nyanamake. Tonda, pia amu tam ukirye, malye-malye unyak nang arye, sik pia teleb, diksukumuk unyaka deiyok nang ati, malye yupu nyabikirye, ‘Anggunda mambul nang kum ululume. Sikda bataknyapeʼ, nyabuka nalinamake.
Winibukba narye nyapse. ‘Se, bicoe. Nara daopnutuba, diptinye. Aning ara, talye ati kum nyapne. Deiyok ara, pia mambul ning eipman bukni, nara malye yupu nyananye unune. Tonda, na unye mutuku noutam neika unyap ninye nirya babye, malye yupu uk nyapdabirye, malyeuk unyabe. Wininyap bukni, na malinye birye, na asing arye pia mambulnye elinmane. Na malye ning aunilye bukni, aning-aning deice tam ulirye, ninye deiyok talibuka ululnye, Weik Raja akunum eipmane. Ara, aning-aning nirya talilirye, im deice yin talin malaikat nirya, sik weik deiyoknye ulirye, weik erena ap, mikip weik ap ululnye, Allah el si Yahweh akunum eipmana ati, na dipnamne,’ nyapse.
Allah arye sikti, wenena weik ning arebuka deice arye, sikda kanye imun ubuk. Winipmanto ara, amutuku noutam, sik malye winilamik ning ara, talye palamle ning ap, tatce ning ap atonun ubukba, uku buk dilamlirye, atalye ning nirya, dilolamle atonun ulamik. Tonda, ninye arye, bai mutuku noutam, uku sekiceba, weik uku buk ara, bai mutuku nirya dilamlirye, weik tulum im tam bukuka welelamle touk, ubuk. Ara, Allah arye sik malye winilamik ning ap, sik ap, obuka kum kipdeibukce, winibuk.
Ura, an du yapu ap, an weit yapu ap, tonda an tam nang ap, sik nirya arye, an nyalyam yupu kum kekekirye, ‘Elda nun lik ati, Yeremia eluk opnamabeʼ tenen, yupu talikikirye, ‘Olyanamabe,’ nyakinyake. Ati ara, sik anang arye, an dam yanuka, teleb yupu nyapkikca babye, sik yupu kekepmince, diba tenena kume! Allah arye na Yeremia biti, nyapnuke.
Yosia birye, yuk nang ati ara, teleb kililamukce, elce imun kanye bolamik nang ap, bona utotoa kum nang ap ati, aning-aning kum talilamik nang ap ati, teleb kibuka melilamukce, yupu lipsisikin talak ara, sik bona utotoa kum nang ati, elce teleb kililamuk. Ati ara, el winilamuk ning nirya ara, nong telebuk winilamuk. Ati, an babye, bita tenipdelyame. Na Allah ati, diba tenebuka, nati dipkoprob bikininyak nang ara, dipkoprob ninguk wininyakce, yuk ikin unyak nang ap, daunyak nang nirya ati, telebuk kilinyake. Sikce yuk nang ati, tilila yupu nyabuka, ikin ning sik nong deice kum delinyake.
Atalak arye dipdongobuka doyanamle talak ara, tonoknye birye, el kwit yuknye biti, ‘Anda Allah si kel biknalame,’ nyabuka, peterelamik atonun, tuba kum wininamake. Ara, weik nang babye, mitik nang babye, na siuk akunum kel bikikirye, ‘Nun ni koproba,’ nyabuka, na damuk unamake. Ara, urdem ati kum bukni, deiyok ara, sik malye winilamice ning babye, narye pia kum kipdeipnamne. Aning nirya ara, kilipnirye, kum kipdeipnyopura, tuba tamubuka tonap, sik malye winin ning nirya kum tenepnamne. Ayupu ara, na Allah Yahweh arye, akunum nyapsine ati, dipkoprob nong upnamle,” Allah arye nyabuk.
Allah Yahweh arye ayupu ton nyabuk. “Na mapu Sikda, pia walwal nang unyake. Sikda nati, kum bikininyake. Sikda amul kunukne nang atonun unyake. Sikda mitik tonun babye, ton moubuka kum bikinyakce, malye un ning weik tonun bikinyak nang unyake. Adeice arye teleb kibuka una ara, kum bikinyakce, nong kum ulule.”
Nyapseura, na Yeremia birye tenenun ning ara, nyapse. Ara, “Se, na ni Allah, sik amutuku noutam unyak nang ara, dipkoprob talye kankan nang unyakce, pia walwal nanguk unyake. Sik wininyak ning nirya ara, walwal deiceuk wininyak ati, an Allah arye, ‘Aninguk wininamlume. Teleb winin ning ara, ani,’ nyabuka nyasilyam yupu ara, sikda dipkoprob, moubuka kum bikicak arye, kum bikinyake. Anda, sik Allah ulyam bukni, ance, “Diksukum bisik ara ani,” nyabuka, peterepsulum ning ara, “Kel bikna kum arye, dipkoprob kum wininyake,” nyapse.
Nyapsirye, aning ton tenepse. Wini talak ara, weik nang, sik bona talin nang dam binirye, “Sik ap, yupu talipnamabe,’ tenepse. Na kanye ara, ‘Dipkoprop sik bona talin nang ara, sik si erenyak Allah arye, “Aning ara wininamlume. Aning ara, pia kum wininamlume,” nyapdeibuk yupu ara, sikce akunum kel bikamikce, ‘Aninguk talibuka wininyake,’ tenepse. Bukni, anang dam bisirye, yupu talibupuura, akunum kel bikse. Ara, sik anang babye atonun, an Allah arye, ‘Wininamlume,’ nyapdeiamsulum yupu nirya ara, sikce, ‘Aning ara nun lik, Allah arye nyasulul ning ara, nun like,’ tenebuka, ayupu yaninauk wininyake. Ayupu ara, moutalibuka kum wininyake. Winipmanto ara, ninye arye, ‘Tapu arye, nun sapi basam kirikibirye, telebak libuka bobinamapʼ tenen, tapu kirikmace bukni, asapi basam balye potong tiklirye, yu uplyeba, atapu buluploplirye, el teneplye touk, yukak balamle touk, sik anang babye, sik kanye tenen ninguk wininyake.
Sik Israel ninye nirya ara, pia mandipna kanye bobokirye, na nyanye yupu nirya, yaniltanauk wininyake. Sikce na Allah ati, ‘Nun like,’ tenekirye, batakaninyake. Sik ap, yuk nang ap, neika banyak nang ara, pia malye wininyaka anya arye, sik kayapu nang ara, yuk ninye ati, minina yupu nyanyake. Sik babye atonun wininyake. Aninye, sik kisok yung, pia kat ninye anya arye, na yupu kum kekelninyake. Sik kanye tenina ara, pia kat ning, besi ap, perunggu kat ulamle atonun ninye unyake. Ati sik nirya arye, tilila yupu nyana ap, minina yupu nyana ap, ubula dona ap, wininyake. Awininyak ninye ara, sik talima noutamak ara, pia malye winin ninguk, pia talibuka wininyake.
Bukni, anggun Israel ninye arye, anabi nyalamik yupu ton, kum kekelamlume. Anggun apu yapu arye, sik nabi nyalamik yupu, kum kekelamik touk, anggun atalak ululum ninye babye, tuba kum kekelulume. Sik nabi-nabi nang arye, na yupu anggun dam nyalilamikba, anggun deiyok nang arye, mandipna kanye bobuka lamikce, kat kanye bobuka winilamik touk, anggun wini talak ululum ninye babye, pia weik arye malye winibuka, mandipna kanye bobuka, ulamaka atonun, anggun babye mandipna kanye bobuka ululume. Sik minop talak ulamik ninye ara, malye winilamik bukni, anggun wini talak ululum Israel ninye ara, pia weik arye tabakuka malye-malye ninguk winilulume. Anggun deiyok nang arye, malye winilamik ning ara, mitik anun uka. Anggun wini talak ululum ninye, malye winilulum ning ara, pia weik, nyabuk. Ara, Allah arye, sik Israel ninye ati, wenebukce nyabuk.
Sik anang ara, tilila yupu boyanuka, sik mining dam unyak nang kekenak bakirye nyanyake. Anang nirya ara, tilila yupu uk nyanyake. Sik kan-kan noutam ara, tonoknye babye, dip yupu pia kum nyalule. Sikda, talye-talye yupu nyapnin banyaka ati, sik si bambol deice arye, nyanyak yupu ara, pia ati, talye tilila yupu uk nyanyaka ati, sik malye unyak ning ara, pia wininyaka ati, namin asa ubikirye, malye winin ning min kum batakmanto unyake.
Sik anang arye nyanyak yupu ara, ninye arye mal marabikiba, yuk nang obuka delamak touk, yupu nyalinyake. Sik amalye yupu nyanyak nang arye, nyanyak yupu ara, pia tilila yupu uk nyanyake. Sik anang arye, sik kayapu nang ap, sik mining dam unyak nang ap ati, ‘Nun yupu kekebikirye, nunti kanye deipnamsiak,’ tenebikirye, ‘Tenepce arye, teleb kibuka kekepnamakʼ tenen, yupu uk nyanyake. Bukni, dipkoprob sik kanye talima noutam ara, ‘Duknubikirye, anang opnamabe,’ tenenyake. Wininyaka deice arye, sik tilila yupu nyanyaka deice arye, wena webuka kalikilanyake.
Atalak ara, Raja nang bitinye arye, ‘Amutuku tuku nirya ara, nun bitinye aryuk taliptinimnye,’ tenenamdaka ati, sik bitinye ara, tonok meja dam bukdikirye, kwaning neika dipdikirye, yupu talinamdake. Kekena teleb yupu nyapdanamdak bukni, dipkoprob sik talima noutam ara, yu ulamlebuk, neika unamdake. Tonda, “Winipnamne,” nyabuka, tilila yupu uk nyapdanamdake. Bukni, sik bitinye arye, ‘Winiptinimnye, winiptinimnye,’ tenebuka, kintinipnamdak ning nirya ara, nong kum kiplirye, aning nirya kum danamle. Aning nong kum upmala deiyok ara, ani. Ara, Allah arye, ‘Aning ara, atalak uptue. Aning ara, yuk talak ton winipnamle. Anang bitinye ara, kum unamdake’ tenen, akunum kintininyamuk talak ara, dam akunum upmala ati, sikce, ‘Winiptinimnye,’ tenebuka, kintinipnamdak ning nirya ara, nong pia kum kiplirye, aning nirya kum danamle.
Wini talak unyak nang ara, wininyake. ‘Ninye arye el bidamnye kil batakuka, yuk kil ubula neika malamak touk, nati diba’ tenena kumce, na batakuka yuk ning eibuka, dobolbanyakce, pia malye-malye wininyake. Wininyaka ati, anggun babye, sik anang kan-kan umunce, na nong ap, na yupu ap, ati, ‘Nun opsicak’ tenen, anggun ilil ati alye upsile bukni, bataknumunyopura, na Ninye Mi Koprop Atonunye birye aminyan sirya talak, anggun babye, bataknamsine. Ara, na ni el urasin pia teleb ulirye, dirina weik ulya atonun, na babye atonun unyopura, Allah arye dirina kipdeibukura, im deice unyak nang, malaikat ap, ansiniprobibyopura, tukwak yanamap, talak ati nyapsine.” Yesus arye awekmek nang ati nyabuk.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
Ura, yata mutuku ninye do nirya, yuk nang arye Allah el laka teleb yupu, ninye lyen yupu peterebikiba, kekebikirye dib tenebicopura, Allah el mikip deice arye aninye lyelule. Allah el yupu ati tuba-tuba dib tenenyak ninye ara, Allah arye aninye ati lyelule. Minyuma ning ara, Yahudi yala ninye lyelule. Aminyan talak ara, Yunani yala ninye babye kekebuka dib tenebicopura, lyelule. Ati ara, ‘Allah el lak teleb yupu, ninye lyena yupu dobuka peterenamne do, kum do?’ tenen, alye kum dakalanune. Teniltona kum diparyuk, kanye deipnirye, pia pi dobuka peterenauk unune.
Aninguk kum bukni, amalye winilamik ninye arye, ‘Allah ap, el ulul ning nirya ap ati, tonap kum tenenamabe. Aning nirya ara nong kum danamle. Allah el ulul ning yala-yala nirya ara, tuba kum tenenamabe. Elda nun like,’ tenyamika ati, Allah arye aninye nirya ati, lik ubukba, ‘Sik aninye daulamica ani, dipnamake’ tenen, batakukba, sik pia malye tenelamik ning deice arye tapu koupdongamukba ulamik. Winilamikba, Allah arye, “Winina meme,” nyasilye ning nirya talibuka winilamik dib arye, pia malyeuk upra balamik.
‘Ninye dibiceba, tuku palibuka tuku pum tam dongopmace bukni, deice tam moubuka tuku kum siknipdongopmakiba, atuku pum tam arye tong weik arye welelamle touk, unyake. Ara, tukwak mutuku unyak nang nirya, sik si bam bol deice arye pia malye-malye yupu nyabikirye, tilila yupu weika arye nyaltakanyake.’ (Mazmur 5:9) ‘Tonda, ninye on kwatima duknubuka mapmalya arye, si topsilirye, yu maka tulupdongopliba, ninye dibilamak touk, ninye nirya sik malye yupu nyanyaka deice arye, ninye weik opra bakibuk dibinyake.’ (Mazmur 140:3)
Anango, anggun kan-kan arye, ton ninye ara, Allah el winilul ning ap, el yupu ap ati, moubuka min kum kel bikamikce, walwal ninyeuk tuba unyake. Aning ati, anggun Korintus mutuku ninye ara, anggun kanye walwal kipsukba, talye-talye ninguk tenepnin banmalumce, malye weik ululum bukni, pia teleb ning ara, anggun adiparyuk aning nirya batakuka, tuba tamubuka kanye moubuka unamlume. Anggun malye winilulum ning nirya batakuka diksukumuk unamlume. Ayupu nyapmasina nirya ara, ‘Kekepmunyopura, se tenen, alye dakdanamak’ tenen, na Paulus arye, nyapsine.
Winibuka unamlum talak nirya ara, yuk nang arye, ‘Aning ara, nun like’ tenen, yaninamsiake. Wininamsiak bukni, aninye ati, ilil pia kum unamlulume. Ilil pia kum umunye deice arye, anggun yanisikce nang ati, laka kinamlulume. Diba tenena kum nang arye, kel kipnamak ning ara, ani. Ara, diba tenenyak ninye ara, Allah arye, lyebuka dopropnamle bukni, sik diba tenena kum ninyeuk ara, kume. ‘Se, Allah arye wenebuka oplopnamsile’ tenen, kel kipnamake. Ara, sik malye nang kel kipnamak ning ati nyapsine.
Atalak noutam nirya ara, malye wininyak nang ap, tilila yupu tenepce arye, nyalamak nang ap, malye akunum wininyak bukni, weik arye tonap, tabakuka pia malye wininyake. Sikce yuk nang ati, ‘Tilila ning ati diba tenepnamak’ tenen, tilila yupu talye tenepce arye nyanyake. Aning atonun yuk nang arye aninye ati, tilila yupu nyakibuk, aninye diba tenenamake.
Na kayapum, anggunti, bico tenesunune. Otalak arye, ‘Anang ati surat seknamne,’ tenyamsise. Asurat noutamak ara, Allah lyepsukce, el ap, kanye talima dukdongobuka neika unyap ning ati, ‘Laka nyabuka seknamne,’ tenyamsise bukni, yuk nang arye, “Tilila yupu peterena nang anggun kan-kan noutamak yanmake,” nyapmekbuk, kekepsirye, ‘Aning ara, weik mambul anya arye,’ winira utenepne. Ara, ‘Aminyan talak kume, tilila yupu peterena ati, ayupu ara, adiparyuk yupu seknune’ tenen, asurat sekeipmasine. Wini talak sekmasin yupu deiyok ara, ani. Ara, tilila nang yupu peteresiceura, malye ning yuk tenena deice arye, Allah yupu akunum diba tenemunye ning batakmunyeura, malye upsilyake. Malye upsilyak anya arye, ‘Allah arepsuk yupu uk, pia moubuka talibuka unamlulum’ tenen, ayupu sekeipmasine. Allah yupu diba tenebupu ning ara, tonok talak aniryuk Allah arye nun diba tenenyap ninye ati akunum arepsuka ati, yuk talak arye, yuk yupu tonap, kum tabakalinamsile. Akunum arepsuk ninguk diba tenebuka talinamlulume. Yuk yupu tabakuka diba tenena meme.
“Allah el mapu nirya ara, Domba Mi Atonye, el ining sik lyena ati arebuk deice arye, Isa Mutuku Dongonye malye kibik. Tonda, aninye arye, “Ninye lyena ati laka teleb yupu ani,” nyabuka lak akarye, peterelamika deice arye, Isa Mutuku Dongonye malye kibuka nirya obik. Aninye nirya arye, ‘Kume, nun kam unyaba ara weik mambule, nun kam una ara nun dokola ati ara, opsicak ati, Allah yupu nyanyaba ara bataknuyabe’ tenen, ilil kum ulamuk. ‘Malye nang arye opsica babye, telebe uka,’ tenelamik. Aning nirya winilamika deice arye, Isa Mutuku Dongonye ati, malye kibuka ulamik.
Simson birye, nyabuka ati, el kil arye, kwalina kwalilamik karin ara, tekbarye sum noutamak nirya arye, pia bukuka engena uk unmok. Tek barye sum deice arye tuba moronauk ulamukce, engenauk unmoka ati, like tekbarye sum arye, Simson lik ubukba, el kil ati adomon yupu deiyok laka nyabukba, bikuk. Bikukce, adiparyuk aning bobuka, akil arye el makal nang ap, el tam nang ap ati, laka nyalbiyukba, sik nirya babye, kel bikik.
Yosua ap, neika ulamik nang, atalak Israel nang kam tuba ulamik ninye keting tamun yupa weik daulamik bukni, aminyan talak sik nirya dipnin balamika ani, nirya kum dayik. Atalak ulamik ninye nirya dibikce, sirya dakik bukni, sikce delilamik mapu ara, tuba kam ulamikce, nebra balamik. Ati aminyan talak erepdeibik nang nirya ara, Allah ati moubuka kum tenelamik. Sikce, dipkoprob Allah el si Yahweh ara, kum kel bikamik. Tonda, Allah arye minop talak Israel ninye ati melilamukce, ninye kum winipmanto ning winilamuka ara, sik asing koprop arye kum elilamika ati, sik kum biklamik.
ကြော်ငြာတွေ