Tonda, sik nirya arye, sik ni Allah Yahweh arye, “Aning ara, wininamlume, aning ara, pia kum wininamlume,” nyalilamuk yupu nirya ara, yanilamikce, kirikuka sik kanye aryuk, kat ning el si ara, perunggu arye dobuka, aning si erena ati, sapi basam mi urasin atonun memebuka, bitinye puturubuka deiamikce, aning si erelamik. Tonda, isa si Asyera, aisa kil, el si erebuka kina ati, cang weik yo ton ikukabikce, aisa si erelamik. Atonun tonda, isa si Bahal ton erelamik. Tonda, im deice noutam arye, mikip weik ulye ning nirya ara, ‘Aning ara, ilil weike,’ tenelamikce, aning si ton erelamik.
Yeremia 8:2 - Eipomek2 Aning ara, dipkoprob malye ning ninye pia winipman kum ning bukni, atalak ara sik mal olan nang arye, min arye akunum diamikak, tuku pum tam weiamik nang, sik yok bulubuka, tukwak deipnamak nang ara, tuku pum tam arye, lukuka kata deiplopnamake. Winibikceura, ila tamubuka, tuku pum tam kum weipnamake. Ara, ninye arye sik dei yalamak atonun, tuku deiceuk deiplopnamake. Ninye arye, talye bam ning do, yuk malye ning do, tukwak talye lubakibuka donoklamak atonun, anang yok nirya ara, talye tukwak, deice anyuk aupnamle. Deiyok ara, sik mal olan nang arye, amutuku akunum diamikba weilamik nang ati, pia malye kipdeibibyeba, ‘Sik yala nang, tuba kam unyak nang ara, alye weik dakdanamakʼ tenen, anang yok lukuka, tuku deice kata sukum bataknamake. Ton deiyok ara ani. Ara min talak, sik amutuku ulamik nang arye, na Allah ati bataknarye, keting ap, kurya ap, tonda wala ap ati, ‘Nun ni ani,’ nyabuka, aning ati, si erelamika winipnamake. Ati sirya talak ara, sik akunum diamik nang yok ara, talye lakak lukuka, tuku deice batakikceba, kata sukumuk bataknamle. ‘'Amutuku nang, sikda talye-talye ning dam, si erelulum ning ap, kanye deiplumce, aning amu tam pil domlum ning ap, talye ning ati, si erebuka pil melibuka domlum ning ap, tonda, ‘Se, nun wininamap ning ara, anggunce peterepsululume,’ nyabuka, morolulum ning ap, aulula ati, akunum diamikak, tuku pum tam weiamik nang, sik yoka nirya lukuka, kata sukum tuku deice bataknamake. Ara, sik mal olan nang arye, ‘Sik Yehuda mutuku tuba kam unyak nang nirya, alye weik dakdanuka unamakʼ tenen, akunum winibikceura, ayok ara, tamubuka tuku pum tam kum weipnamake. အခန်းကိုကြည့်ပါ။ |
Yeremia 8:2
32 ပူးပေါင်းရင်းမြစ်များ
Minop talak, Yehuda tam ulamik ninye arye, isa si erelamika ara, Manasye el li Raja Hizkia birye, obuka batakamukce, akunum kum daneiyamuk. Winyamuk bukni, el mi Manasye birye, Raja kina ati tikukabukce, Bahal, aisa si erena ati arelyanganak mesba ara, tuba tamubuka dobukce, memepdeiamuk. Tonda, isa si ton Asyera, aisa si erebuka kina ati, weik cang yo urasin, teleb kibuka puturubukabukce, ikukba, aning dam isa si erelyangalamik. Ara, Israel mutuku noutam, Raja kibuka taleamuknye, Raja Ahab birye, memepdeiamukce, si erelamuk touk ubuka, Manasye babye aning deiamukce, isa si erelamuk. Tonda, Manasye elda, im deice ap, im noutam ap, kam ulamle mikip ning ton, ‘Sikda pia weik mambulʼ tenen, sik si erelamuk.
Tonda minop talak Israel ninye taleamika deiyok nang, Raja nang arye, wibuka deiamikba, isa si erena ati wibuka deiamika deiyok nang, malye imam nang nirya ara, Raja Yosia birye batakuk. Amalye imam nang arye, minop talak diprongobuka atalak ara, sik isa si erena ati, Yerusalem mutuku dana-dana tam ap, Yehuda tam noutam bukni, yuk ninye asik domik mutuku dam ap, mutuku kon deice welebuka balamikce, nintong teleb ning dobuka uku dongolamikce, isa si erelamik. Isa Mutuku Dongonye si erelamik ning ara, Bahal si ap, tonda isa sisibuka keting ap, wala ap, kurya ap, tonda im deice tam ulul ning ati, ‘Nun ni yape’ tenen, aning nirya ati si erelamik. Ati, sik malye imam nang arye, isa si erelamik nang nirya ara, Raja Yosia birye anang nirya kum daneibuk.
Ninye malye ninguk talibuka wininyak nang nirya ara, pia kum bikamika atonun, teleb winin ning ara, pia kum kel bikinyak do? Malye ninguk talibuka wininyak nang arye, din ning el si roti minop dibikirye, sirya dakalamak touk, na Allah ara, na mapu koproba, sik nirya ara, minop obuka, sirya dakanyake. Tonda, nara Allah, na si Yahweh ati, ‘Naio yata yupu nyapsiminba, aninguk talibuka wininamap do?’ tenen, nati pia kum morokinyabe.
Ati ara, ‘Allah ance, sik Midian tam nang nirya oplum touk, aolyanamsiak nang ati, atonun obuka sirya daknalameʼ tenen, moropkine. Aning atonun, ance ninye si Sisera ap, Yabin ap, weik mek balamuk, el si ara Kison mekin dam, kunum opmumnye atonun, wini talak nunti olyangan nang babye, oplopnalameʼ tenen, moropkine.
Aninguk kum bukni, tonok ning ton nyapnune. Winipmanto ara, ninye tonoknye birye keting tamun yupa weik deice arye, kam ulamlya ani, el mapu nirya ara, yupa pia weik, seratus mapu deiptu bukni, aning-aning nirya ati, kanye kum deiptopura, aning nirya ara talye ning atonun ulule. Ara, el kam ulamlya ani, el wisi danan keting tamun kiplye bukni, el anye bira, kam una ara, kanye deibuka, pia kum unamle. Tonda, el pil dolamlye ning ati, kanye kum delilule. Tonda, el akunum diplyopura, el kwit capu arye, el nong dobuka, teleb kibuka kum weibikcopura, aning babye, pia malye diamuka. Ati ara, narye ato ning tenenun ning ara, ani. Kilapu arye, mi winiryuk deipmakibuk, kam una kumce, minop dibilamak mapu ara, pia teleb. Deiyok ara, sik adibinyak mapu ara, mitik ikin ulule. Bukni, bona talinanye bira, ikin weik ulule,’ tenepne. Deiyok ara, ani. Bona weik talelul ning ap, mapu weik delilul ning ap ati, kanye kum delilula ati, elda ikin weik ulule, tenepne.
Tonda, atilila yupu nyana nabi-nabi arye nyalamikba, sik yupu kekelamikce, ‘Dib,’ tenelamik ninye babye, din patana ap, mal oldana ap deice arye, dipnamake. Adipnamak ninye, sik nong dobuka, Yerusalem mutuku bisik talye donoknamake. Teleb ubuka kum weipnamake. Weik kanye imun ning weik arye, sik aninye nong deice deipneura, weik arye dipnamak bukni, winipniba sik mapu ap, sik kilapu ap, sik yala nang nirya ap arye, adipnamak ninye kum weipnamake. Nirya opnirye, sirya daknamna ati nyapsine. Winipnamna deiyok ara, sik aninye arye, malye winilamik ning dekna ati winipnamne,” Allah arye nyabuk.
Asipkikcopura, an Yeremia birye, tamubuka sik Israel yala nang ati, nyapnulyame. Allah arye nyapsile. “Ara, anggun wini talak ululum nang, anggun apu yapu nang arye, na Allah ati akunum bataknikce, talye ning ati melibuka balamikce, ‘Nun ni,’ nyabuka, isa si erelamikce, atalye ning atibuk, si erelamika ati wenepnamsine. Winilamik bukni, narye, “Aning ara, wininamlume. Aning ara, pia kum wininamlume,” nyapdeipsiba, Musa birye sekamuk yupu ara, moubuka kum taleamikce, nati akunum donga tamubuka batakamnika atia. Aning nirya ara, anggun wenena ati, anggun nong deice, ikin ning deipnamsine. Anirya ara, Israel nang, sik kekenak laka nyapmince, ‘Allah arye nyapdeipmasile,’ nyabuka, laka nyapnalyame.
Ara ani. Amutuku noutam unamak nang nirya ara, kanye imun weik uk dina deiyok ning yalirye, amutuku noutam unamak nang, pia weik tonun dipnamake. Adipnamak nang ara, sik kayapu nang arye, anang ati kum engenamake. Tonda, amutuku yuk nang ara, anggun mal olanmamunya ani, ninye on parang arye opnamsiake. Ton nang ara, sik din ning kum daliba, din patan deice arye, dipnamake. Tonda, sik dipnamak nang, sik tam nang arye sik nong dobuka, tuku palibuka, teleb kibuka kum weipnamake. Sik adipnamak nang nong ara, talye tuku deiceuk, dana-dana tam batakikiba, lyupnamle. Ara ninye arye, tuku deice talye oplomikiba saklamle touk, unamake. Ati ara, anang akunum dibikcopura, sik nong ara, talye tuku deiceuk bataksikiba, im tam lakuka balamle maka ap, bai mutuku talye daulamle kam ning aryuk, adipnamak nang, sik nong dobuka dinamake.
Weik sisi nang babye, mitik sisi nang babye, talye kankan nang babye, amutuku noutamuk weik tonun dipnamake. Sik adipnamak nang ati, kanye imun upliba, ‘Se, bicoeʼ tenen, ukirye ton kum engepnamake. Tonda, sik nong bobuka, tuku palibikirye, teleb kibuka kum weipnamake. Tonda, sik adipmakce nang, sik kayapu nang arye, ‘Se nun kayapu dipmaka ati, sikti, bouku peipnamapʼ tenen, malye kanye bobuka, nong bol deice, dila kum dopnamake. Tonda, sik Israel yala nang arye, sik kayapu dipmakce nang engebuka, bouku peina ati winilamlum touk, anggun kisok potong nirya ara, kobuka, delo dem kum unamlume.
Tonda, Allah arye nyapnuka ati, nyapsine. “Yehuda tam ninye, sik deiyok-deiyok nang, sik weik asik ap, Yerusalem mutuku aik dobuka, unyak ninye arye domik aik ap, Topet mutuku pia malye ulye touk, kipdeipnamsine. Ara, anggun nirya arye, amutuku noutamak, Isa Mutuku Dongonye si erena ati, siltong teleb ning ap, kam ning ap, obuka arelbamunye ning ap, anggun asik deice, keil yangabuka, taplakuka deipmunce, uku dongomunye ning ap, aning nirya winiluluma deice arye, Tofet mutuku nirya, malye kililamlume. Tonda, anggun asik deice tam arye, ‘Siltong teleb ning uku dabibiba, im deice tam unyak isa mer arye, kurya talinyak isa, yuk isa ayala-yala nirya ap, kekenamsiyake’ tenen, uku dalulume. Aning atonun, anggur mek teleb ning kwebuka, kwemdina ning isa, si erena ati, ‘Nun deiyoknye,’ nyabuka, binuka arelbalamunce, si erelulume. Aning nirya winiluluma deice arye, anggun mutuku malye kilimunye touk, aminyan talak ara, na Allah arye anggunti, wenepsinirye, obuka malye kipdeipnamsine. Narye anggunti, obuka wenepnamne. Allah arye nyapdeipnukba, nyapsine.” Yeremia arye nyabuk.
Asum ara, Allah arye mutuku sirya, im sirya nirya unyakce, malye winilamik nang opnamle nang ara, sik nong nirya, tukwak weik uplirye langdipnamle. Ara otam im sirya, ap mutuku sirya, dana-dana tam ap, anoutam ap, ninye weik opliba dipnamak nang, sik nong langdipnamle. Allah arye ninye weik tonun oplyopura, yuk nang arye adipmakce nang ati, eibikirye, ‘Se, sikda bicoeʼ tenen, malye kanye bobuka ukirye, kum engepnamake. Tonda, tonoknye babye, oplopmalye nang, sik nong bobinuka, kum weilbinamake. Anang nong, ‘Daupmalyeʼ tenebuka, opmaliba dipnamak nang, sik nong bobinuka, tuku pum kum weipnamake. Kume, tuku deiceuk batakikiba, talye kam ulul ning, dei siriklopliba, tuku deice lak sukum talye uplirye, tong welelamle atonun, upnamle.
Winibikirye, amutuku lyu nirya dana-dana tam nirya ara, na Allah Yahweh ati, lipsisikuka dobikirye, na si erena ati arepnamniake. Amutuku nirya ara, ‘Naʼ tenen mutuku,’ ati, pia talinamne. Ara, wini talak ara, uku dilamlye atu yamul balamakak ap, dipmakce ninye, sik nong weilbanyak sukum ap, kintinip deibikirye, anirye dipdongobuka, otam ulul yini mutuku ap, weik lyuak, el si Kidron mek lilun ap, tonda keting yangan tam dipdongobuka, cang keil poka, bublan bisik botopdeibikce, abublan si, Kuda Basam Bublan nyabik bublan dam nirya ara, lipsisikuka dobikiba, ‘Amutuku nirya ara, na ning uka,’ nyabuka talinamne. Yerusalem mutuku weik asik nirya akunum lipsisikuka dobikcopura, pia tonap kum ulupnamake. Yuk ninye arye, amutuku tuba tamubuka, tonap malya kum kipnamake. Na aryuk taliniba, pia aunamle,” Allah arye nyabuk.
Ati ara, na Allah Yahweh arye, anda Yehuda tam talibuka ulyamnye, Raja Yoyakim biti, nyapkine. Se, Raja Yoyakim, anda ninye deiyoknye ulyam bukni, yuk nang arye anti, oplopkicopura, an kayapu nang arye, an nong dobuka, kum weipnamake. Aning kum bukni, an nong doprobikirye, bai tam talye lakak donokikiba, keting deice noutamak ara, keting diplirye, buppu weik upliba, sesal lebuka lyupnamkile. Tonda, lukunyan noutamak ara, arukna an nong deice palipkilibuk, arukna weik upnamle. Winipnamkiyaka ati ara, ance deipminba, dadeipdanin banamak nang ara, amutuku talina ati, ninye deiyok nang ton, kum kipnamake. An mapu noutamak, tonoknye babye, minop talak Raja Daud birye bulamuk ning deice, kum buknamle. An yalanye birye, amutuku pia kum talinamle.
Se, anggun Israel yala kilapu, engena kel kilapu nirya ara, na Allah Yahweh arye nyapnusin yupu kekeplulume. Anggun kilapu nirya ati nyapsine. Na Allah Yahweh arye, nyapdeipnusin yupu uk kekepmunce, kanye imun upsiliba, engena deice, dit nyalulum ning ara, anggunce delilulum kilmapu ap, ton anggun kayapu yuk kilapu ap, imun kanye bobuka, dit nyaluluma ara, peterenamlume. Winipmunba, akilapu nirya arye dukdongobuka, adit nyapnin banamake. Ara, sik kanye imun uplye talak, amot uk nyanamaka ati, peterelanamlume.
Anggun kanye imun upsiliba, engebuka mot nyanamluma deiyok ara, ani. Ara, dibina deiyok ning ara, nun aik abilinga kin-kin bisik ap, aik abilinga noutam jendela botopdeibupu bisik kin-kin ap, abisik kin-kin nirya arye wekuka, ninye un dam yangalule. Ayangalul ning ara, talye kankan unyak nang, sik aik ap, weik ninye deiyok nang unyak aik, urasin pia teleb aik, istana nyanyak aik ap, akunum wekelyanamsile. Ninye yupa weik akunum dibinyaka ati, anggun mapu bisikak arye, bikbik abuka wininamak ning ap, tonda sik wel nang arye dengna ati, din ning deibikiba, ninye arye bulubuka, din ning dekenyakak ap, tuba kum yanganyake.
Aning nirya ara, na Allah Yahweh arye nyapmasina ati, anggun kekepmunce, laka nyapnamlume. Ara, sik yuk pera mutuku yu nang, lo arepniba yakirye, sikti, yanuka obikirye, sirya dakanamsiake. Yuk pera mutuku nang arye, yanuka obikiba, dipnamak nang ara, maning palamlak ton, tuku deice saknamake. Dibikirye, sakicopura, yuk nang arye, sik nong dobuka, ninye wein dam kum weilbinamake. Ninye pia weik tonun yanuka opnamaka ati, talye bama ning, talye mutuku donokolbalamak touk unamake. Ara, sikti, yu tenebuka, mal olan nang arye opnamak nang, sik nong ara, mining damuk, tuku deice bataknamake. Yuk nang arye yanuka, adipmakce nang, nong kum dobuka weilbinamake. Winipmanto ara, teikuka el bama lanyak ning, el si gandum duk doprobikirye, el yok ap, bama ap ara, mining dam bulakuka, talye batakikirye, tamubuka kum dololamak touk, wininamake. Ninye obikiba, dipnamak nang sik nong ara, talye kata sukumuk bataknamake. Kum weilbinamaka ati nyapsine. Aning ara, sik yuk mutuku yin talen nang arye, Israel nang pia weik tonun opsikiba, upnamle ning ati, laka nyapsine. Ati, anggunce anggun kayapu nang ati, adiparyuk, sik dam laka nyapnamlume. Allah arye nyabuk.
Winipkinyopura, an nong ap, aikan ap nirya dobuka, mek pia kum sukum, padan gurun noutamuk donoknamsine. Winipsinyopura, an ap, ikan ap ara, ninye kum sukum noutam arye sakuka unamlume. Yuk nang arye ton, anggunti, ‘Sik Mesir nang ara pia malye weik nang,’ tenen, anggun nong nirya ara, bulubuka, tuku lukikirye, teleb kibuka kum weipnamsiyake. Anggun nong nirya ara, narye dobuka arepsinyeba, anggun yanina ati, tukwak talye bai tam kam ulul ning ap, talye lakuka balamle maka ap arye, anggun nong dipnamsile.
Nara, Allah Yahweh, aning-aning nirya talibuka, deice tam erebuka, pia mikip weik ununye birye, ayupu akunum nyapdeipmakina ati, dipkoprob nong upnamlarya! An ap, an tam kipdopnamkiyak yin talen nang ap nirya ara, yuk nang arye anggunti opsikiba, tukwak saknamlume. Ara, ninye arye, wa wilamakak do, talye dauamlye tuku pala mutuku do, tuku deice uk sakuka pulbimunce, dipnamlume. Ninye arye kum weipnamsiyake.
Winipnamne talak ara, na adiparyuk lo arepniba, sik yu yin talin nang arye, sik Israel nang bukni, isa si erenyak nang, weik tonun obikirye, sik ongon ning ara kitibuka, isa si erelulumak urasin tam denebuka deipnamake. Tonda, narye lo arepsiniba, sik opnamak nang, atalak aryuk, sik isa si erenyak mesba-mesba damuk, sik yok babye, asukumuk yamupdeipnamake.
Nyapnukce, adiparyuk Allah arye, na boyanuka, Allah Yahweh el si eren aik domik ning, lilun dam bobinuke. Ara, anyaik dam wekelban bisik bublan, botopdeiamika dam bobinuka ara, ani. Ara, Allah el si erena ati, kam ning opnarye, uku dongona ati, kintinip deiamik ning, el si mesba, otam upmokba eipse, atalak ara, anyaik kup-kupak unmek nang ton eipse. Asukum ara, ninye yupa ara, pia weik, dua puluh lima (25) nang unmekba, eipse. Sik aunmek nang ara, Allah el si eren aik, Pia Teleb Lek Aik, sik donga tam unmokba, sikce asukum wekmekce, keting panalyangan tam, urasin deibuka, sik kutam tuku dipdongobuka, keting panalyangan tam unmekce, si erebuka kinmekce, keting si erenmekak, eipse.
Nyabukopura, ayupu ton dukdongobuka nyabuk. Narye anggun wenena ati, weik ikin ning dobuka, anggun nong deice deipsinyopura, adeice arye, amutuku unyak nang nirya ara, imun kanye bobikirye, walwal uplya ati, asing kun nang arye, dengkepdanin balamak touk, upnamake. Ara, sik babye, na Allah dam malye pia weik ulamak ning dengna ati, narye wenebuka opsiniba, sik aopmace nang, sik ining ara, mek balamle touk, ubuka binamle. Tonda, na dopdeipnamne yu nang arye, sik nong opmakce ning ara, ninye tuku deice deiplomakce touk, sik anang nong ara, sakuka tuku deice poulbikirye, asukumuk talye lyupnamle. Sik anang nong ara, tuku pum tam kum weipnamake.
Aning atonun, yata nang do nirya arye, im noutam ulul ning ara, keting ap, wala ap, tonda kurya ap ati, ‘Aning arye melinamsiakʼ tenen, aning si erenyake. Aning ati, si erenyak nang nirya ara, wenebuka opnirye, sirya daknamne. Anang ara, kat ning arye, aik duma lu kibuka donyak ning deice tam arye welebuka, im noutam ulul ning ati, si erenyake. Anang babye, obuka sirya daknamne. Tonda, yuk yala nang bukni, sikce, na Allah ati, ‘Naio an siuk erenyabe,’ nyabuka, nyalin yupu nyapnik bukni, talye nyaltakna ati, sikce talye isa si, Milkom isa si ap, tabakuka erenyak nang nirya babye, opnirye, pia kum daneipnamne.
Sik winilamikura, Allah arye, ‘Sik yuk daunyake,’ tenebukce, im deice ulamle ning, keting ap, wala ap, kurya, ‘Aninguk ara, si erepnamake’ tenen, batakal dongolamukce, mangkau kilongolamuk. Aulamuk ning nirya, Allah el yupu laka nyalamik nabi-nabi nang sekdeibikce, nyalilamik touk aupmale. Sik sekamik yupu ara, ani. ‘Anggun Israel nango, mek kum ati, ninye kum ulamikak, keting tamun yupa weik, 40 tahun deice arye balamlum talak ara, na si erebuka kina ati, kam ulamuk ning ololalum ning ap, teleb ning talye arilamlum ning ap, nati boyangalamnulum do? Kum do? Na kanye ara, natibuk kum boyangalamnulume.
Tonda, anggun anye ap, akil ap arye, tukwak mutuku talye ulye ning do, isa do, ato talye ning, ‘Nun ni koproba aniʼ tenen, si erebikcopura, anye babye, pia malye winilule. Aning atonun, na Allah si erebuka kina ati kum bukni, sikce kutam tuku dipdongobuka kinyak ning, keting do, wala do, kurya do, aning ati si erebikirye, ‘Nun ni koproba aniʼ tenen, atalye ning ati kanye deibuka si erenmakiba, yuk nang arye aning eibuka bikikirye, sik deiyok nang ati lak nyabikiba, moubuka kekenamlume. Deiyok ara, awinin ning nirya ati, nun ni Allah arye, “Meme,” akunum nyapdeiamsuke.
Nyabukce, ayupu ton dukdongobuka nyabuk. “Yuk ning urasin atonun memebuka deipmunce, aning si erena meme, nyapmasin yupu deiyok ton ani. Ara, sik im deice unyakba eiplum ning ati, ‘Si erebuka malye winipmunyak’ tenena ati nyapne. Ati ara, pia winina meme. Ara, keting ap, wala ap, kurya ap, Allah arye kwepdeibukba, im deice ulul ning nirya babye, eipmunce, ‘Se, aning ara, mambul ati ara, aning si erenamabe,’ tenen ati nyapne. Allah el si Yahweh arye, aning-aning nirya kwepdeibukba, yata mutuku do nirya, ninye mutuku-mutuku nirya arye, aning talye elinyake. Ati ara, aning-aning nirya, si erena meme, nyapne.
ကြော်ငြာတွေ