Allah arye nyaplyeba, anang arye el nyalul yupu moubuka kekebicopura, sik malye ning batakikirye, Allah el amu tam ubikirye, elti, melibuka pil donyake. Winibuka teleb winibikcopura, anang ara, aminyan talak, sik tuba kam unamak talak nirya ara, talye kanye bobuka unamake. Tonda, sikce pil donamak ning nirya ara, nong weik upliba, telebuk unamake. Sikda teleb kanye bobuka unamake.
Yeremia 7:23 - Eipomek23 Atalak ara, narye anggun apu yapu melibuka boyangalamsirye, nyapse yupu ara, ani. Nara, anggun ni koproba Allah ununa anya arye, narye nyasinye yupu uk kekepmunce, moubuka talinamlume. Narye nyasinye yupu talibuka winimunyeura, narye anggunti, pia melinamsine. Adeice arye, ‘Anggunda, na mapu koprop unamlume,’ nyalamse. Tonda, narye anggunti, “Abisik binamlume, abisik kum binamlume. Aninguk wininamlulume. Aning ara, pia kum wininamlume,” nyabuka nyalilamse yupu, ‘Dipkoprop ninguk winipmunyopura, anggun wininamlum ning nirya ara, telebuk unamsile,’ nyalamse. Na Allah arye, anggun apu yapu ati, ayupu uk nyalamse. Winilamsi buk, ayupu kekebuka yangalamik talak ara, pia telebuk winipnin yangalamik. အခန်းကိုကြည့်ပါ။ |
Yeremia 7:23
38 ပူးပေါင်းရင်းမြစ်များ
Nun ni Allah Yahweh, ance ninye kum winipmanto ning ap, pia mambul pil ap, aning-aning nirya, akunum domlum ning ara, nunce eibuka, kum nukmanto unyabe. Tonda, ance nunti, ‘Aninye ati, winibuka melinamne,’ tenesimince, arenamsilam ning ara, nunce kum nukuka kel biktibye. Ance nunti, teleb kilinamsilam ning nirya ara, dipkoprob kum nuktinye. Ance nunti, meliamsulum ning ap, aminyan talak teleb kilinamsilam ning ap ara, pia weik winilula ati ara, nukdetinya babye, aning nirya ara, kum nukmanto unune.
Atalak ara, Allah, el si Yahweh arye Israel ninye ati ayupu nyabuk. “Anggunda na Yahweh arye nyapnusin ning nirya ara pia wininamlulume. Ara, narye nyasunun yupu moubuka kekepmunce, na tenenye touk diksukumuk winipnamlulume. Ara, narye anggunti, ‘Aning ara winibuka-winibuka unamlume,’ nyabuka deipnirye, aresunun yupu nirya, moubuka kekepmunce, dobolbanamlume. Aning atonun narye anggunti, ‘Aning kum unamlume’ nyasunun yupu mem yupu nirya kekepmunce, aning nirya kum winipmunyopura, narye melinamsine. Ara, Mesir ninye anggun ona ati, weik kanye imun ning ap, uk deiyok ning ap arepse touk, anggun Israel ninye ati ara, pia kum arepnamsine. Auk ara, aning-aning nirya kum dipnamsile. Ara, nara anggun ninye deiyoknye, Allah ununa ati, na Yahweh arye anggunti kwetepsinirye, lyebuka kam bukuka deipnamsine,” Allah el si Yahweh arye Israel ninye ati nyapdeibuk.
Tonda, Musa arye nyabuk. “Allah el si Yahweh arye nyapsuke. Akwaneng ning el si ara manna bulubuka, ikin bitinye libukapmunce, dokola deipnamlulume. Telebak deipmunyopura, dapia unamlume. Ara, aminyan doryanamle talak noutamak ara, manna ning deipmalumba, anggunce deiplumbuk dadeipdanin, banamak ninye nirya ara, sik bidamang aning dilyanganamak. Ara, Mesir mutuku noutamak, narye lobuka boyasise talak, yini mutuku noutamak arye manna kwaning arepsiba, dinmalum ning ara, anggun mapu nirya kel kipnamaka ati, nyapsine,” Allah arye nyabuk.
Narye nyalin yupu nyapnusina ara, winiryuk yupu kuma. Ara narye minop talak Israel nang sik apu yapu mesir mutuku ulamik talak ikin weik asa ulamik buk narye bobuka yanamse talak arye sik dam akunum yanuka nyapdeiamse. Sik Mesir mutuku ulamik talak ara, pia ikin weik ulamika ati, winipmanto ara, ninye arye besi ning ati, ‘Teleb kipdeipnamapʼ tenen, uku weik dilamlirye pia buppu ulamle sukum besi dongobikiba, abesi deice malye ning palipmalye ning uku arye dipliba besi teleb kililamle touk, Israel ninye ati Mesir mutuku ulamik talak arye sik nong deice ara, ikin ning areamse. Atalak ara, narye sik apu yapu ati, nyapdeiamse ninguk, ‘Anyapsin yupu nirya moubuka kekepnumunce aninguk talibuka diksukumuk unamlume,’ nyapdeiamse. Narye sikti, ‘Aning ara wininamlume, aning ara, pia kum wininamlume,’ nyapdeiamse touk dipkoprob winipmunyopura, narye anggun Israel yala nang ara, na mapu koproba unamlume. Tonda nara, anggun ni koproba Allah unamsine,” nyalin yupu deice arye nyamse.
Min talak anggun apu yapu, Mesir mutuku noutam ikin weik ulamikba, boyanuse talak arye dipdongobuka, ayupu nyapnin yangalamse ani, wini talak babye, narye anggunti, ayupu tuba nyasunune. Ara, narye anggunti, ‘Aning ara wininamlume. Aning ara, pia kum wininamlume,’ nyabuka, yupu mikip weik arye nyasunun yupu ara, moubuka kekepmunce, wininamlume. Ati, min arye anyamse yupu uk, arup babye, na mapu, asukum unmalum nang ati, tuba tonap, ayupu yanuka nyapdeipsine.
Winipmanto ara, ninye baju bumang celana ongobikirye, deiyok deice delilamak touk, Yehuda yala nang ap, Yerusalem mutuku nang ap ara, ninye arye bumang celana deiatinga deibuka, nong kitipdongobuka, koulongolamak touk, ‘Sikda na deiceuk unamakʼ tenen, patanulule. Adeice arye sikda, na mapu unyak nang nirya arye, na si bikina ap, na si erena ap, wininamaniake,’ tenenune. Bukni, na mapu sikce, na yupu kum kekeninyake. Allah arye nyabuk.
Anggun tuba pia telebuk wininmalum talak, aning-aning nirya talibuka, kanye deibuka, telebuk wininmalum talak ara, na Allah arye, ‘Anggunda kanye mouplulume! Malye winin ning ara, bataknamlume,’ nyabuka, akunum yanuka nyapsisirye, wenen yupu nyapdeiamsise. Bukni, anggunce, na yupu kum kekamnulume. Anggun minop talak arye, winipnin yangalamlum touk, wini talak babye, aninguk tuba winilulume. Anggunce, ‘Allah ara, dipkoprob nyasulule,’ kum tenelulume.
Na Allah Yahweh arye, anggun nirya ati nyapsine. Anggunce, yuk nang sik dam ara, diksukum teleb piluk donamlume. Ara, narye, ‘Aning wininamlum. Aning ara, pia kum wininamlume,’ nyapdeipsise yupu atouk winibuka, pia diksukumuk wininamlume. Tonda, ninye yupu bokolin talak ara, dipkoprob sik winilamak touk bikmunce, teleb kibuka yupu nyapmunce, wenepnamlume. Talye-talye winina kume. Mikip unyak nang arye, anggun amu tamuk unyak nang ati, ikin ning, sik nong deice deibikcopura, anggun deiyok nang arye, aikin unyak nang ati, lobuka melipmunce, lyelinamlume. ‘Teleb mutuku noutamuk uptibyeʼ tenen, yuk mutuku arye, anggun mutuku yanuka, tikilyangan nang ap, tonda winiryuk nenmace nang ap, yuwak kilapu ati, ‘Sik ning alubuka doproptibyeʼ tenen, pia kum moronamlume. Tonda, ‘Anang ati, yanipdongobuka optibyeʼ tenen, sik dam ikin ning kum delinamlume. Tonda, yata nang do nirya, sikce deiyok kum ati, malye kum winipmace buk, anggun deiyok nang arye, anang ati, talye lukparabuka, kum opnamlume. Sikda, malye kum wininyak nang ati, amutuku noutam arye, ninye kum onamlume.
Narye sikti, kanye talima winiryuk ning arepninyeba, sikce na Allah ati, ‘E, nun ni Allah, elda dipkoprob Yahweh, el ukaʼ tenen, moubuka biknamake. Winibikceura, sikda na mapu koproba unamake. Tonda, nara sik ni koproba Allah unamne. Winipyeba, sik malye wininyak ning nirya, batakikcak arye, sik kanye talima nirya ara, dobuka, na deiceuk deibikirye, na siuk erenamniake.
Bukni, sik malye winilamice ning ati, wenen ning akunum arepnyopura, aminyan talak, narye winiryuk nyalin yupu, sik Israel ninye dam nyapdeipnamne ning ara, atia. Minop talak narye, ‘Aning wininamlulume. Aning ara, kum wininamlume,’ nyabuka, yupu deice nyaiamse ning ara, aminyan talak ara, ayupu moubuka tenenyak, ninye ara, yuk-yuk sik talima noutamak deipniba, moubuka tenenamake. Minop talak ara, keil deice sekuka arepse bukni, aminyan talak ara, sik talima pum tam sekuka deipnamne. Winipnirye, nara sik ni koprop Allah unamne. Sikda, na mapu koprop pia aunamake.
Ance, nun apu yapu ati, atam tuku nirya areplumba, amutuku wekuka, talibikce ulamik. Bukni, sik anang arye, amutuku tuku dobuka, unyak talak ara, ance, sikti, “Aning-aning talibuka, unamlume. Aning ara, pia kum wininamlume,” nyapdeiamsulum ning ara, aning nirya kum talibuka ulamik. Tonda, ance, “Aning-aning wininamlume. Teleb winina ara, ani,” nyapdeiamlum ning ara, kum talibuka winilamik. Tonok ning babye, teleb kibuka kum winilamik. Sikce malye-malye weik winilamika ati ara, ance sik anang deice, ikin weik ning ap, kanye imun ning ap, nirya dopdeipminba, sik deice yalyeba dolokirye, imun kanye bobuka unyake.
Nyabuk bukni, Yeremia birye tamubuka, Raja Zedeikia biti nyabuk. “Kume, na deiyoknye, anyaplam ning ara, sikce kum winipnamkiyake. An bobuka, Babel mutuku nang dam binuka, wenebuka kum opnamkiyake. Dipkoprop Allah el si Yahweh arye, nyapdeipnuk yupu uk, akunum nyapkine. Anyapmakin touk, Allah arye nyapdeipkuk yupu kekepmince, aninguk winipminyopura, aning nirya ara, telebuk unamkile. Tonda, an kum opnamkiyake.
Ati, Allah Yahweh arye nunti, ‘Winipnamne. Amutuku binuka unamake,’ nyabuka, nun dam nyapnamsil ning ara, teleb yupu do, ikin yupu do, aning nirya kekebibirye, aninguk talibuka wininamabe. Nun kanye ara, Allah Yahweh arye, ‘Aning ara, wininamlume. Aning ara, pia kum wininamlume,’ nyapdeipnamsil yupu kekebibirye, ‘Aninguk talibuka winibipyopura, nunce wininamap ning nirya ara, telebuk unamsile,’ tenepmabe. Ati nunce anti, ‘Allah moropsilyame,’ nyabuka, moropmakiyaba deiyok ara, ani. Ara, ‘Allah Yahweh arye, nyapnamsil yupu, moubuka talibibirye, aminyan talak ara, nunce pil donamap ning ap, wininamap ning nirya ara, telebuk unamsilʼ tenen, moropkiyabe. Ati ance nunti, ‘Allah moropsilyame,’ nyabuka, moropkiyabe. Sik Yehuda mutuku nang arye, ayupu yanuka nyabikce, na Yeremia dam moropnike.
Aweik asik donyakak unyak nang nirya ara, Allah arye do, ninye arye do, ‘Aning ara, wininamlume Aning ara, pia kum wininamlume,’ nyabuka, wenena yupu nyaptinga babye, amutuku ninye arye, ayupu pia kum kekenyake. Atonun, Allah arye, ‘Aning ara, malye wininmaluma ati, aning ara, pia bataknulume,’ nyaptua babye, mandipna ubikirye, ‘Dauplye,’ tenen, pia kum kekebikirye, kum bikmanto unyake. Tonda, amutuku noutam unyak nang ara, sik kanye nirya dobuka, Allah el deice pia kum delinyake. Tonda, sikce, ‘Allah Yahweh aryuk, melibuka lyepropnamsileʼ tenen, diba kum tenenyaka ati, elti kum moronyake. Tonda, sikce, ‘Nun si erenyap Allah, el dam ton tamubuka yanamabe,’ pia kum tenenyake.
Ura, aminyan talak ara, sik yuk pera mutuku noutam arye unyak nang ara, teleb arin ning arenamaka deice arye, na Allah, si eren aik dona ati, melinamake. Ton nang arye, asukumuk yanuka, anyaik melibuka donamake. Winilamikca ani, anyaik akunum dobuka sirya dakikcopura, sik Israel nang nirya arye, na Allah Yahweh arye, winipnamne ning deice arye, moubuka biknamlume. Ara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ululnye birye, na nabi Zakaria dam yanuka, yupu nyapdeipnukba, anggun dam yanuka laka nyapsise ning ara, bikmunce, diba tenenamlume. Narye, ‘Aning-aning ara, Allah arye winipnamsile,’ nyabuka, laka nyapsise ning nirya ara, dipkoprob nong upnamlarya! Ara, anggun si erelulum Allah Yahweh arye, aning-aning nirya talibuka, deice tam erebuka, Pia Mikip Weik Deiyoknye ululnye birye, nyapsilye yupu nirya, moubuka kekepmunce, batakna kumce, aninguk dipkoprob talibuka winipmunyopura, elce, ‘Winipnamsine,’ nyabuka, nyalin yupu deice nyapdeiamsuk ning nirya ara, dipkoprob nong upnamle. Aning nirya ara, na nabi Zakaria birye, dipkoprob nyapsine.
Zakaria birye nyabuk. Aning ara, Allah Yahweh arye, minop talak Yerusalem mutuku namin arye, tunim abuka winilamlumba, aning-aning nirya, telebuk winilamsuk talak ara, ayupu ara, nyapdeiamukba, anggun nabi-nabi nang arye, nyapdeiamsise yupu ara, atia. Tonda, anggunda telebuk ulamlum touk, anggun dam arye, dana-dana mutuku noutam domik mitik asik ulamik nang babye, telebuk ulamik. Atalak noutam babye, anggun dam anyuk kum ulamik bukni, ton tam ara, iknapye tam, (arah selatan) Negeb tam ap, keting kumulban tam, (arah barat) mutuku kon bukamukak, Shepela mutuku babye, sik atam ulamik nang babye, teleb ton ulamik. Atalak ara, Allah arye, ayupu atonun ton, nyapdeiamsuke.
Ninye lyena yupu ara, minop talak Allah arye duknyamuk bukni, wini talak ara akunum laka kibuka deipsuk. Ara, minop talak arye dipdongobuka doryanamle talak nirya unamlanye Allah arye el yupu laka nyana deiyok nang nabi-nabi nang ati “Winipnamlulume,” nyalilamukba, sikce sekuka delilamik yupu nunce dobuka, peterenyaba deice arye, laka ulule. Allah arye laka kipdeipsuka deiyok ara ani. ‘Ninye im sirya, mutuku sirya nirya arye, Yesus Kristus el laka teleb yupu, ninye lyena yupu kekebikirye, diba tenebikcopura, el yupu uk talibuka dobolbanamak’ tenen, laka nyalilamsuke.
Winibuka unyap talak ara, Allah yanin ninye nyanyak yupu nirya ap, sikce, ‘Yuk nang Allah dib tenepnamak’ tenen, sik bidamang kanye erebuka tenepce arye nyanyak yupu ap nirya ara, bisibuka, kum kibuka delinyabe. Winibuka pil donyapa deice arye, nun kanye tenena ap, yuk ninye sik kanye tenena ap, tamupsilyopura, Kristus arye, ‘Wininamake,’ tenesilye touk, ansinibuka tenebibirye, el yupu kekebuka, aninguk talibuka elti, dobolbanyabe.
Arup narye anggunti, ‘Teleb winin ninguk wipnamlume,’ nyapmasin ning ara, ani. Anggunce el si erelamlum Allah Yahweh arye, anggunti, ‘Aning wininamlume. Aning ara, pia kum wininamlume,’ nyapdeiamsuk yupu dobuka, anggunti arup arye akunum nyapmasin yupu uk, aninguk moubuka talipmunyopura, Allah arye anggunti, pia teleb kilinamsile.
Tonda, anggun ni koproba Allah, el si Yahweh arye, nyasilye yupu nirya ap, Allah el nong koproba ap ati, dib tenebuka unamlulume. Eluk melibuka dobolbanamlulume. Allah ati, ‘Elda weik mambule’ tenen, el siuk erenamlulume. Allah arye, ‘Aning wininamlulume,’ nyabuka, nyasilye yupu moubuka kekenamlulume. El amu tam upmunce, el pil ati, pia donamlulume. El tibuk talibuka dobolbanamlume. Musa birye, Israel ninye ati nyabuk.
Musa birye nyabukce, ayupu ton nyabuk. “Aminyan winipnamle ning, laka nyanyak nang, nabi nang do, lengdar deice kel bikuka, laka nyanyak nang do, yuk talye ning si ati, ‘Nun ni koproba,’ nyabuka, ‘Aning si erenamabe,’ nyabice nang ara, anang tomopmunce, adiparyuk oplopnamlulume. Deiyok ara, ani. Anang arye, Allah kum tenebuk yupu, yanuka nyanyake. Sikce, ‘Anggun ni Allah Yahweh batakuka, yuk talye ning si erenamlulume,’ nyabuka, peterenyaka ati, “Anang ara, oltakanamlulume!” nyapsine. Tonda, Allah el si Yahweh arye, ‘Aning ara, wininamlulume. Aning ara, kum wininamlulume,’ nyapdeiamsuk yupu ati, ‘Anggun kekena kumce, yaniplopnamlume,’ nyabuka, malye yupu nyanyaka ati, anang tomopmunce, onamlulume! Ura, anggun kele, Mesir mutuku tuba ninye asik nang atonun ulalum talak, ikin pil weik anggun nong deice delilamsikba, ikin weik ubuka engelalum bukni, anggun ni koproba Allah, el si Yahweh arye, lobuka lyepsuk. Lyepsukce, ateleb mutuku boyasuka anya arye, elti, pia kum bataknamlulume. Sik malye nang arye, tilila nyapnamsiak nang oplopnamluma deice arye, anggun Israel ninye noutamak pia malye ning kum kibuka deipmunce, sirya dakmunyopura, sik malye nang si kiliplopnamlume.” Musa birye, Israel ninye ati nyabuk.
Anggun ap, anggunce deipnamlum mapu ap, ‘Nun ni koproba Allah, el si Yahweh, el dam tamubuka bibirye, elce nyapdeiamsuk ninguk, talibuka aninguk wininamabe,’ tenepmunye ning ara, anggun kanye talima nirya ap, anggun nong ap, Allah el deiceuk deipnamlulume. Ara, narye arup arye, ‘Wininamlulume,’ nyapmasin touk, Allah arye nyapdeiamsuk ning, moubuka kekepmunce, aninguk talibuka wininamlulume.
Tonda, kam una deiyok ning wipmunyopura, ‘Anggunce anggun ni koproba Allah, el si Yahweh ati, kanye deipmunce, el nyalul yupu moubuka kekepmunce, eluk talibuka, dukdongobuka unamlum’ tenen, nyapsine. Wininamlum ning deiyok ara, Allah el si Yahweh ara, anggun Kam Una Deiyoknye ulula ati nyapsine. Winipmunyopura, anggun wekelbinamlum mutuku noutamak ara, anggun koproba ap, tonda anggunce deiplumba, dadeipdanin banamak ninye nirya ap, kam unamlum talak ara, lo weik arepnamsile. Ara, anggun apu yapu nang, Abraham ap, Isak ap, Yakub ap ati, Allah arye, ‘Amutuku arepnamsine,’ nyabuka, nyalilamuk mutuku ‘Bina unamlum talak ara, weik winipnamle,’ tenena ati, aning ara nyapsine. Musa birye Israel ninye ati, nyabuk.
Winiplyopura, aminyan talak, anggunda minop talak ulalum touk, Allah el si Yahweh arye, ‘Aning ara, wininamlulume. Aning ara, kum wininamlulume,’ nyapdeiamuk ninguk, tuba tonap kekepmunce, tamubuka batakamlum ning ara, el nyapdeiamsuk touk, dukdongobuka wininamlulume. Ara, arup arye nyapmasin ninguk, kekepmunce, moubuka talibuka wininamluma ati nyapsine.
“Nun ni koproba, Allah el si Yahweh arye, Sinai mutuku deice, el yupu nyapnuk talak ubuk ning ati ara, tonap tuba laka nyapnusine. Anggun kele, Sinai mutuku dam buluplum buk, Allah arye nyapnuke. ‘Ance nyapminba, sik Israel ninye nirya bulubikiba, na yupu nyapnamne. Deiyok ara, sik unamak mutuku noutamak, tonda sik kam unamak talak nirya ara, na ati biknikirye, na si diamuk erenamniyake. Tonda, sikce sik mapu nirya ati, ‘Allah arye el nyasilye yupu kekebuka talinamlulume,’ nyabuka peterelanamake.’ Allah arye nyapnuke,” Musa birye nyabuk.
Tonda namin asa arye umunce, Allah arye, ‘Aning ara, wininamlulume. Tonda aning ara, kum wininamlulume,’ nyabuka, el yupu nyapdeibukba, asum arye narye anggunti, peteresinye ning nirya ara, kekenamlulume. Ara, arup arye dipdongobuka, dorunamle talak nirya ara, Allah arye nyalul yupu, pia moubuka talibuka wininamlume. Aninguk winipmunyopura, aminyan talak nirya, anggun ap, anggunce deipmunyeba, deipdanin banalum ninye nirya babye, telebuk wininamlume. Tonda, winipmunyopura, Allah arye wini talak arepnamsil mutuku, binuka unamlum talak ara, keting tamun pia weik talibuka unamlume. Allah arye, ‘Aninye ara, amutuku pia talibuka unamak’ tenen, arepnamsile.” Musa birye, Israel ninye ati nyabuk.
Anggun mapu nirya arye, anggun ni yapu nirya ap, anggun nin yapu nirya ap arye, sik nyabikce yupu, moubuka kekemunce, aning talibuka wininamlume. Ayupu ara, narye anggun ni Allah Yahweh arye, nyapdeipsise touk wininamlume. Anggunce ayupu kekebuka winimunyopura, anggun kam una ara, keting tamun tonap, lo weik tonun arepnamsine. Tonda, anggunce ayupu kekebuka winimunyopura, anggun ni koproba Allah narye, ‘Ateleb mutuku arepnamsine,’ nyalin yupu deice arye, nyapdeiamsise mutuku ara, amutuku talibuka unamlum talak ara, teleb updeipsiniba, teleb kanye bobuka umunce, telebuk unamlume.
Se, sik Israel nang ara, arupce, ‘Allah arye nyapmal yupu kekebibirye, moubuka talibibyeura, pia aunamabe,’ nyapmaka ara, sikce tuba aning atonun kanye bobikirye, tuba winiptingura, narye sikti, teleb updeipsiniba, sikda pia teleb unamake. Ara, na yupu moubuka kekebikirye, natibuk, ‘Se, Allah ara, mambul weiknye ululeʼ tenen, ilil upliba, natibuk si erebuka ukirye, na ap, na nyapman yupu ap atibuk kekebuka, nimalye arye, amu tamuk upnin bacopura, anggun ap, anggunce deipnamlum nang nirya ap ara, pia ati, telebuk unamake.
Anggunce si erelamlum Allah, el si Yahweh arye anggunti, “Aning wininamlule. Aning ara, pia kum wininamlume,’ nyapdeipmasil yupu nirya ara, aninguk moubuka talipmunyopura, kam unamlume. Tonda, Allah arye anggunti, winiryuk arepmasil mutuku binuka, amutuku nirya malye kibuka, talipmunce, unamlum talak ara, ayupu uk talibuka winimunyopura, anggun keting tamun yupa weik tonun arepsiliba, pia telebuk unamlume.” Musa birye, sik Israel nang ati nyabuk.
“Anggun Israel ninyeo, na yupu moubuka kekepnululume. Anyapnusin yupu nirya ara, moubuka kekepnumunce, pia talibuka wininamlume. Winipmunyopura, amutuku noutamak unamlum talak nirya ara, aning-aning nirya telebuk unamsile. Tonda, anggun ni koproba Allah, el si Yahweh arye, anggun apu yapu ati, nyalilamuk touk, anggun yala nang amutuku weik ubikirye, bona utotoa talin nang weik unamlume. Ara, Allah arye domon yupu nyabuka deice, amutuku ara, sapi basam weik ulamlaba, moum yung weik upnamle. Tonda, mong mek ap arepsiniba, dipmunyopura, kanye deibuka unamlume. Adomon yupu deiyok ara ani. Amutuku noutamak upnamle ning nirya ara, weik uplirye, telebuk unamla ati nyapsine.” Musa birye, Israel ninye ati nyabuk.
Nyabuk bukni, Samuel birye, tamubuka nyabuk. “Allah el birye, ‘Aning winiptinge,’ tenesilye ning ara, namin asa arye, el amu tam una teleb do? Akam ulul ning dobuka, Allah ati uku dalbana teleb do? Pia weik teleb ning ara, dan do? Allah arye nyasilye yupu, kekebuka dobolbana ara, pia teleb ning atie. Mitik teleb ning ara, anggun malye winin ning, namin kina ati, kam ning obuka, uku dalbana uka. Aning atonun, mitik teleb ning ara, domba basam meta dobuka, uku dalbana bukni, weik teleb ning ara, Allah arye nyasilye yupu kekebuka, dobolbana uka.
ကြော်ငြာတွေ