Aninguk kum bukni, Allah Yahweh arye, “Anyaik ara, na Allah, na si eren aik ulule. Yerusalem mutuku noutam pia anunamla ati, anyaik ara, mambul weik ulule. Na ninguk ulule,” nyapdeiamukce, teleb yupu nyabuka deice arye, anyaik teleb kipdeibuk. Nyapdeiamuk bukni, sik Yehuda tam ulamik nang, sik imam-imam nang, sik deiyok-deiyok nanguk, amutuku noutam talye daulamik Yehuda yala nang nirya ap, sik nirya aryuk, Allah arye, ‘Wininamlume, aning ara kum wininamlume,’ nyapdeiamuk yupu yaniltaknauk ulamikce, Allah ati kum talebuka dobolbalamik. Tonda, sik Israel nang ulamik mutuku dana-dana tam ulamikce, Allah kum bikamik nang arye, pia malye weik ulamik ning ara, Israel nang arye, ‘Nun babye, aning talebuka unamabe,’ tenelamikce, malye ning pia weik ulamik. Ara, sik imam-imam nang arye, malye ulamik atouk, amutuku ulamik nang nirya babye, sik deiyok nang arye ulamik touk kibuka, talye isa siuk erebuka ulamik. Aning nirya winilamika deice arye, Allah Yahweh, el si eren aik malye kipdeiamik.
Yeremia 5:6 - Eipomek6 Se, sikda bicoe! Mandipna kanye bobikirye, malye ninguk talibuka wininyaka ati ara, kanye imun ning, sik dam yanamlarya! Winipmanto ara, bai tam ulye kam ning, yu weik pus, el si ara Singa Pus, atonun yalirye, sik nong nirya opsilyeba dipnamle. Tonda, mek ap, ninye ap, pia kum mutuku ulye ning, el si ara Serigala kus do, pia yu kam do, aning yalirye, amutuku nang nirya obuka, sirya daknamle. Winipmanto ning ton, bai mutuku yu weik ulye ning, el si ara, Macan Tutul pus, amutuku noutam domik asik unyak nang ati, ‘Obuka dipnunʼ tenen, yanuka, kalikinamle. Ati ara, yata nang do nirya, anyasik noutam arye, ubuka bai tam balyopura, ayu ning arye, sik banamak nang onamle ati, moubuka kaliknamlarya! Aning winipnamle deiyok ara, sikce. Ara, sikda, malye ning weik talibuka wininyaka atia. Tonda, sikce Allah ati, “Naio, an tam nanguk unamabe. Ance nyasilyam yupu uk, moubuka talipnamabe,” nyalamik bukni, asum-asum nirya, Allah ati, kanupdobuka, Allah arye, ‘Wininamlume. Aning ara, pia kum wininamlume,’ nyadeipyamsuk yupu yaninyaka ati, ikin ning weik, sik dam yanamlarya! Na Yeremia birye nyapse. အခန်းကိုကြည့်ပါ။ |
Yeremia 5:6
38 ပူးပေါင်းရင်းမြစ်များ
Winibikopura, Esra birye, sik anang kan-kan tikukabukce, sik nirya ati nyabuk. “Anggunda, kunum malye winilulume. Nun ni Allah arye, ‘Wininamlume, aning ara, pia kum wininamlume,’ nyapdeiamsuk yupu ap, el ap ati, yaninauk ululume. Ara, anggunce Israel mutuku noutam ara, yuk malye winin ning ton, winilulum bukni, anggunce yuk dana-dana tam mutuku kilapu dobuka, doluluma deice arye, pia malye winin ning ton, tabakuka winipmalume. Ati, anggun malye winilamunyeba, pia weik kipninbalyopura, aning deiyok upmalya ati, Allah arye weik tonun wenepnamsile.
Narye nyabuka moropse. “Se, na ni Allaho. Diba na ni Allah, nara dipkoprob mambul kanye bopnarye, alye weik upmanile. An morona ati ara, na kisok erebuka an dam dina ara, na pia ilil ati, kum winiptinye. Deiyok ara, nun malye unyap ning ara, pia weik tonun tabaknin basiliba, weik tonun nepnin basilirye weik usulule. Winipmanto ara, nun malye winin ning ati, adiparyuk wenebuka opnamsutum deiyok ning ara, nun kisok bisibuka, im deice binmanto akunum ulule,’ tenepne.
Bukni, wini talak ara, na akunum malye upniba nong upnilyopura, ance, ‘Anye akunum malye unmal do?’ tenen, yata talak do nirya, ance pia nati ebuka dobolbalamnulume. Winipmanto ara, bai tam yu weik ulamlye pus, el si singa arye, ilil kum aryuk, ‘Yata ning ton obuka diptinyeʼ tenen, malye kanye bobuka, dobolbalula atonun unilyame. Tonda, winipniminyopura, ‘Anye biti, ikin ning el nong deice deipnamaneʼ tenen, an mikip weik deice arye, mambul ning na dam deliniminya deice arye, wenebuka onilyame.
Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.
Min kum lyepdopsuluma deiyok ara, ani. Ara, dipkoprob, nunce Allah an dam pia malye weik unyabe. Ance, ‘Aning ara wininamlume, aning ara pia kum wininamlume,’ nyapdeiamsulum yupu ara, yaninauk unyabe. Nun kele, nun malye weik unyaba dekna ara tamubuka, nun diamuk malye ulisulule. Dipkoprob nun bidamnye, an yupu batakuka, tuba-tuba malye wininyap ning ara, moubuka kel bikinyabe.
Nyabukura, Yeremia birye, ayupu nyabuk. Se, nun ni Allah. Ance talye ati, kum nyapmasilame. Dipkoprop nun Israel ninye ara, malye-malye ning weik unyaba deice arye, akunum lak upsilak, yuk nang nirya eibikirye, “Diba, sik Israel ninye ara, malyeuk wininyake,” nyasinyake. Diba, nun ni Allah, nun babye malye wininyap ning, dekna arye wenepnamsilame. Nunce antibuk, malye wininyap anya arye, merekuka wenepnamsilame. Kumopura, an si ati, yuk nang nirya arye, malye nyapnamake. Nyabuka wenepnamsilam bukni, “Naio ance nunti, lyepropnamsilame,” nyabuka moropkiyabe. Ara, ‘An si tuba erenamkiap’ tenen, nyapkine.
Israel ninye sik oldan nang arye sikti, weik yu ning, el si singa kus yalirye, bai tam kam ulul ning obuka dilamle touk, unyake. Ara, yuk pera mutuku ninye, yu ninye arye yanuka, sik olonyaka ati nyapne. Tonda, Israel ninye unyak mutuku ara, yuk nang arye, uluplobikirye, malye kilinyake. Tonda, sik asik dobuka unyak mutuku nirya ara, uku dongobikiba, uku arye dibuka sirya dakliba, amutuku noutamak ara, Israel ninye ton pia kum unyake. Lo uk ulule.
Awinipmasil ning ara, urdem ati kum winipsile. Anggun kele. Anggunce, malye winimunya dekna arye, anggun dam ikin ning nirya yalaba dopropmalume. Deiyok ara, na Allah arye anggun bisik balalum talak ara, melibuka bobalamsise bukni, anggunce nati balye tam kipnulumce, bataknuluma deice arye, wini talak ikin ning anggun dam akunum yale.
Tonda anggun malye un ninguk, talibuka winimunya deice arye, anggun dam wenen ning yanmasile. Aikin ning anggun dam yanmasil ning ara, anggunce na Allah ati bataknuluma deice arye dopropmalume. Ati wini talak ara, ikin doproplumce, kanye imun upmasile deiyok ara, anggunce na Allah Yahweh ati, kibuka si erena kum deice arye, ikin doproplume. Na kele, anggun Israel ninye nirya arye, na Allah ati, ‘Se Allah ara nun weik deiyoknye ulula ati, malyeuk ubibyopura, weik arye wenepnamsile,’ tenena kumce, nati si erebuka, ilil kum ulule. Ayupu nirya nyapmasin ning ara, na Allah Yahweh aning-aning nirya talibuka deice tam unune. Na Allah Yahweh ara, aning-aning nirya talinirye, im deice yin talin malaikat nirya, sik weik deiyoknye kibuka ununye birye nyapsine. Allah arye nyabuk.
Se wini talak ululum Israel nango, anggunce na anyapmasin yupu moubuka kekepnululume. Narye anggunti ara, mek kum ati ninye kum ulamik mutuku atonun ubuka, ikin ninguk deipsisa ati, bataknulum do? Akumopura, anggun ululum mutuku ara, kuna daklamle atonun, dirina ap, kel bikna deiyok ning ap, kum arelamsisa ati, bataknulum do? Aning kum winipsisa ati do? Anggun ti narye, teleb kibuka kalikuka melilamsise. Bukni, anggunce nyanululume. ‘Kume, nunda talyeuk ubirye, nun tenenyap ninguk wininamabe. Allah el amu tam bukuka kum unamabe. El nyasilye yupu ara, pia kum kekenamabe. Tonda el dam ara, tamubuka kum banamabe,’ nyanululume. Aning ara, yata deiyok ati do?
Ura, Allah elce derepsukce, anggun ulamlum mutuku nirya ara, malye kipdeipmasile. Winipsiliba, anggun mutuku nirya ara, ninye ton una kumce, talye tuku lo dem upnamle. Ara, anggun mal olan nang, ya mikip weik arye, ya sekuka bataksike. Winipmanto ara, bai ulamle singa kus, el ulamlak arye batakuka, ‘Na din ati, kam ning obuka dipnunʼ tenen, yukak balamle touk, “Allah ara, yu weik ubukba, el ulamle mutuku arye batakuka, tukwak mutuku yanuka opsuke. Ara, el mapu dam arye, batakuka biyuka ati, nyapsine. Yeremia birye, sik Yudea mutuku ulamik nang ati, nyabuk.
Minop talak, anggunti bico tenyamsisirye, ‘Nuncuk anggun melibuka lyepropnamsiabe,’ nyabuka, kanye deiamlum nang nirya ara, anggunti akunum luba kipsikce, bindobike. Sik ayuk-yuk mutuku nang arye, anggun Israel nang ati, tonap tamubuka, pia kum teninamsiake. Sikce, ‘Anang ara, dauaplye,’ akunum tenesinyake. Aning babye, talye ati kum bukni, deiyok ara, anggun malye weik winilamlum ning ati, na Allah arye anggunti yu upnukba, ‘Ikin weik ning arepnuneʼ tenepsirye, anggun mal olan nang ati lo arepsiba, mikip arye opsika deice arye, wenepsise. Anggunce malye winin ning weik winilamluma ati ara, merekuka wenebuka opsise. Ara, anggunce pia malye weik winilamlum ning ap, malye-malye ning talibuka, pil dolamlum ning ati, ikin weik wenen ning arepsise.
Ati ara, anggunda, yata ati, anggun ikin usulul ning ati, ‘Se yata ati, Allah arye imun ning arepsukba, ikin weik unyap do?’ nyabuka, ngalukunmalum do? Anggun uk ap, kanye imun kanye ap, usulul ning ara, min kum lopmanto ulule. Ati, anggunce, ‘Se, lopropsutue,’ kum tenenamwinilume. Ara, anggunce, pia malye weik winilamlum ning ap, malye-malye ning talibuka, pil dolamlum ning ap ati, ikin weik ning akunum anggun dam arepsise.
Yehuda yala nang, sik mal olan ati yanamak nang ara, winipmanto, Singa kus duknubuka ulamlya ani, ‘Din ton obuka diptinye’ tenen, elamle atonun, Yehuda nang, anggunti, yu tenesinyak nang ara, akunum kintinibuka yanamake. Ara, Yehuda mutuku nang, asik dobuka ulamikce mutuku nirya, daklobikba, asik oldemuk uplirye, tunim apnamle. Ninye ton amutuku pia kum unamake.
Tonda, Yordan mek biyuka, lilun tam, bai tam arye, weik yu singa arye ubuka, domba basam sik maning dilamakak, tikilyakirye olamle touk, na babye, talye karin arye, Edom mutuku yanamne. Winibuka tikilyanirye, sik Edom nang ati, sik mutuku noutam unamakak arye, yakuka dopkwetepniba, sik bikbik abuka bindopnamake. Akunum bindobikcopura, na Allah arye, ‘Anye wibuka deipnamne,’ tenenye touk, amutuku noutam talibuka ulirye, ninye deiyok kibuka, yupu nyanamlanye biti, wipdeipnamne. Aning ara, talye ati kum nyapsine. Na mikip weik unye touk, yatanye ton aulul do? Tonda, yatanye do, ilil tenena kumce, mikip kanye bobuka ululnye birye, na tenepman ning ati, ‘Kume aning ara, kum kiptume,’ nyabuka, yupu seknutu do? Aning atonun, yata ninye deiyoknye ton, na yupu yanipnuturye, malye kipnutu do? Kume, tonoknye babye, pia ton kum ulule. Nara, na tenenye touk wininune.
Aning ati ara, anggunda na mapu koproba, sik Israel nang ara, yata ati, asum-asum nirya, mania kanye bopmunce, malye winin ninguk, pia talibuka winilamunya ani, na dam batakuka banululum bukni, ila tamubuka, na dam pia kum yangalulum do? Anggunda, talye ning ati bukni, ‘Aninguk diba tenebuka, pia kalinamapʼ tenen, tilila yupu uk, tuba talinyake. Sikda, na Allah dam, tamubuka kum yanganyake.
Ura, anggun nirya tenenipdelulume! Bangau maka babye, el kanye aryuk, ‘E, atalak akunum kiplyopura, na mutuku koprop tamubuka yanamneʼ tenen, bikilule. Tonda yalma ap, borom-boromanye maka ap ara, yuk-yuk yala maka ap, ‘Amutuku ulamepya ani, teleb talak akunum kiplyeura, anirye koubuka, nun mutuku koproba tamubuka binamapʼ tenen, akunum bikinyake. Bukni, nara Allah, na mapu koproba nirya ati, narye, “Aning ara wininamlume. Aning ara, pia kum wininamlume,” nyapdeipsise yupu ara, anggunce moubuka kum bikilulume.
Sik mal olan nang nirya, akunum winibicopura, akunuma tenebikirye, kwalinyake. Winibuka kekebice kili sal nirya ara, na Allah Yahweh arye, anggun nong deice, ikin pia weik ning deipnamsine. Ara, anggun malye winin ning weik arye winimunya atia. Amutuku noutamak unyak ninye ara, malye diamuk winibuka, yupu yanin nang unyake. Tonda, sik mapu nirya, sik mal olan nang dam bakirye, dobuka donokolbanyake.
Aning winimunya deice arye, anggun asik noutam, ninye balamikak nirya ara, anggun bidamnye, anggun urasin teleb un ning ara, malye kilamlumce, yuk talye balamik nang ap, ubula yolalamlume. Winimunya talak ara, yata barye nang do nirya, anggun nong atibuk, ninye ton baca epmunyopura, bimunce, ‘Amio, na ap neika maptinimnye do?” nyabuka, moropmunce, anang bobuka bobalamlume. Winimunya deice arye, anggun ap, talye daulamik nang ap, neika ubula malamlum ning ara, tabaklumce, pia weik tonun, malye ulamlume. Anggun ap, talye nang ap, yolanauk ulamlume.
Aninguk kum bukni, sik Israel nang unyak mutuku noutam, ninye deiyok kibuka, taleamikce ulamik touk, tuba unyak deiyok nang babye, pia malye weik wininyake. Winipmanto, bai tam ulamle yu kam arye, ulamle ning obuka, si tobuka dilamle touk, unyake. Ara, sikce ‘Se, nunda yo bok pia weik ton doproptibnye’ tenen, malye winina ap, tilila yupu nyana ap, ninye ona ap, ikin ning dobuka, yuk nang nong deice delina ap, wininyaka deice arye, ubula dolokirye, bona talin nang unyake.
“Min yuma weleyayuk ning, el urasin ara, weik yu kuse atonun ning, el si singa kus, aning ara singa atonun uamuk bukni, el pol belyamuk ara, Maplya maka pol atonun uamuk. Winyamuka bukni, na tuba dinmasiba, talye karin arye, el pol nirya kum dayuk. El pol kum ubuk tam ara, ninye winilamak touk, yan bitinye arye yanibuka tikukce, ninye kanye bolamak touk ubuk.
“Abitinye panabrik ninguk, dinmase bukni, kam ning yuk ning ton, winilye ning panabuk. Aning ara, weik yu kuse atonun bukni, el potong ara, mirin ning panabuk. El si ara, macan tutul nyalamak ning. Apanabuk ning, el balye tam ara, maka pol atonun dumbarye uamuk. Tonda, el kisok babye, dumbaryeuk uamuk. Winyamuk ning welebuk. Awelebuk ning ati, ‘Ninye im sirya, mutuku sirya nirya talipnamle’ tenen, mikip deiyok ning arebuk.
Aning ara, urdem ati kum nyapsine. Winipmanto ara, bai tam nong weik ulul kuse, yu kuse el si ara, singa kuse arye, kam ulamle ning oploplirye, dilamle atonun, narye anggun nirya ati, wenebuka opsinirye, sirya daknamsine. Winipsinya deice arye, lo arepneba, yuk pera mutuku ninye, yu ninye arye, anggun dam yakirye, malye kibikirye, tapu koubuka, sik mutuku tamubuka bobinamsiake. ‘Winipnamak’ tenen, na Allah arye, lo akunum arepneba, yuk mutuku ninye nirya arye, anggunti kum lyepsitinge. Narye akunum bataksinirye, pia memepdopniba, nara anggun dam kum unamne.”
Nyabukce, ayupu ton dukdongobuka nyabuk. “Sik Kasdim yala ninye ara, sik kuda basam ara, pia minopce balolule. Yuk nang arye, ‘Kume bai tam ulamle kus atonun ning, el si macan tutul nyanyap ning ara, weik bikbik abuka balule,’ tenenyake. Bukni, narye dipkoprob nyapsine. Sik Kasdim ninye talinyak kuda basam ara, pia pola banyake. Bura tam pus, el si macan tutul, elda moubuka balule. Tonda winipmanto ara, bai kam ara, lukunyan banmalyopura, pia yu weik arye, ayam obuka dilul bukni, sik Kasdim mutuku nang arye, sik kuda basam deice bukuka yanganyaka ara, yu pia weik. Bai kam ara, el yu mitik anunuk ulule. Winipmanto ning ton, Bip maka on maka arye, ayam eiplirye, ‘Amaka obuka dipnun’ tenen, yukak arye, pia pola lakuka yangalul atonun, sik Kasdim yin nang babye, atonun wininyake. Ara, sik kuda basam balye deice bukikirye, pera mutuku arye, yuk nang dam minopce yakirye, onyake.”
Amutuku noutam weik asik talibuka unyak ninye deiyok nang ara, yu singa kus arye, weik yupu weik tonun nyaplirye, yuk kam ning obuka, dilamle touk, sik adeiyok nang arye, weik yupu nyabikirye, ‘Nunda yata ning ton, ubula doproptibye do?’ tenen, malye weik wininyake. Tonda, amutuku unyak nang malye winipdakiba, amutuku deiyok nang arye, ‘Sik malye winipdanmace ning ati, yupu bokeipnamabeʼ tenen, bulubikirye, yupu bokolina ati, deiyok nang ara, winipmanto unyake. Ara, bai tam yu ulamle kam, dina weik tonun pataplirye, aupmalye ning obuka diplirye, sirya daklamle touk, unyake. Tonda, ayu kam winiplirye, ‘Adin ara, kwal deipmanya ani, beren tam talak ton, tamubuka yanirye, dipnamne,’ pia kum tenelamle touk, amutuku yupu bokolina deiyok nang babye, adiparyuk yuk nang talinyak ning, alubuka dolonyake.
Ati dipkoprob nyapsine. Anggun wini talak ululum nang atouk, minop talak babye, anggun ni yapu arye, Allah nyapdeiamuk ning, pia kum kekelamik atouk, anggun Ruben yala nang ap, Kat yala nang ap, anggun babye kum kekelamlume. Adeice arye, malye kiplumce Allah el yupu yaniplumakarye, pia malye weik kiplume. Ati anggun babye, anggun ni yapu malye ulamik atonun anggun babye wininulume. Adeice arye Allah Yahweh, el yu ara mitik tonun aubuk bukni, wini talak ara el yu ara weik tonun tonap upliba, anggun Israel nang deice ikin ning weik tuba-tuba upmasile.
Kam ulul ning pia malye ning eipsa ara, el nong ara yu weik kuse, el si ara macam tultul atonun anya arye, el potong ara, botbotokna potong tikamuk. El yan tang ara, bai tam ulamle ning, el si ara beruang ato ning anya arye, el yan tang ara pala weik ubukce, el taruk kala ara jang weik ubuk. El si ara, yu weik kuse singa kus atonun ubuk. Weik Mem Kwatima Urasin Atonye birye, ‘Laut mekwen pum tam arye yanmal ning melipnunil’ tenen, el weik mikip ap, el ninye deiyok ning ap, el talyamuk ning ap, laut mekwen noutamak arye panabuka, tikilyanmok malye kam ulul ning deice deibuk.