Sik Yahudi yala nang nirya, Yehuda tam babye, Israel tam babye, na Allah ati dipkoprob diba kum tenelamikce, na ap, na yupu ap batakuka, isa si erena atibuk ulamik. Sikce amalye wininuk, winilamik ning nirya ati ara, nati yu kililamnike. Winilamnikba, Yerusalem mutuku unyak nang ati, yu upnukba, derepse. Atenepse ning ara, min kum winipmanto,” Allah arye nyabuk.
Yeremia 4:4 - Eipomek4 Anggunce na anggun ni koproba Allah dam, nyalin yupu nyapdeiamuk ning moubuka talipnamlume. Tonda se, sik Yehuda yala nang ap, Yerusalem mutuku ululum nang ati, ayupu nyapsine. Anggunce, ‘Nara Allah el ninguk wininune,’ tenenamlume. Aning kum winipmunyopura, na yu, uku buk dilamle touk unilye ning ara, anggun deice deipnamsine. Winipsinyeba, uku buk dilamle touk unamle ning ara, ninye yuk nang arye, tangapmanto kum upnamake. Winipnamak ning nirya ara, anggun malye un deice aryuk, ikin anggun dam yanganamsile. အခန်းကိုကြည့်ပါ။ |
Yeremia 4:4
36 ပူးပေါင်းရင်းမြစ်များ
Allah arye, sik Israel yala nang ati, dirina atonun, kiplya deice arye sik melilule. Elda, sik Dirina Deiyoknye ulul bukni, aminyan talak ara, weik uku buk atonun upnamle. Allah ara, pia dipkoprob ululnye bukni, aminyan talak ara, yu weik upliba, elda weik uku buk atonun upnamlarya. Weik uku buk dilamle touk uplyopura, tonok sum arye, atalye palamle tace ning nirya ap, mutmuta nirya ap ara, el uku arye, atalye ning nirya dibuka, sirya dakdopnamle.
Dipkoprop minop talak ara, Allah arye Asyur mutuku ninye deiyoknye, Raja Asyur biti, ‘Anye opnirye, el nong dobuka uku dongona ati ara, akunum kintinip deiamuk. Dipkoprop aninye deiyoknye Raja Asyur mutuku nang ati, auku dinamlak akunum kintinip deiamuk. Asukum ara, tuku pum palibuk ning ap, uku dinamlak pala ap, el uku dan yo toubuka deibuk ning ap, akunum weik tonun kintinip deibuk. Aning nirya akunum kintinip deibuka anya arye, atalak ara, Allah Yahweh el yu deice arye, el si mikip arye pong nyapliba, pito weik tonun welepmalya deice arye, auku seklyopura, uku buk weik tonun dinamle.
Kekepnululume! Anggun Yerusalem mutuku noutam ululum ninyeo, adiparyuk buklulume! Anango, anggun nirya buklulume! Anggun Yerusalem ululum nang ara, tikuka kintiniplulume! Nara Allah, na yu upnukba, kanye imun ning deice arye, wenelamsise ning ara, anggunce akunum doproplume. Winipmanto ara, yu weik mek, kanye wangalamak ning arepsisiba, aning nirya dibuka, sirya daklamlume. Mitik tonun babye, kum dikdongobuka batakmalume. Aning nirya akunum dinmaluma ani, anggun kanye walwalaplumba, tukwak sakmanto ulume.
Narye anggun mal olan ninye ati, lo arepneba, yanuka opsikirye, kam tuba unamak nang ara, tapu koubuka, sik mutuku tamubuka bobinamsiake. Anggunda kum bikamlum ninye, pera mutuku yu ninye noutamak, bobuka deipsinyopura, ninye asik nang atonun ulamunce, anggunda amutuku nang ati, talye pil dobuka melina nanguk ulamunce, sik amu tamuk ikin kanye bobuka, unamlume. Anggunce, ‘Se, yata ning ati, ikin unmasil do?’ kum tenenamlume. Ara, na yu ara, uku buk dilamle atonun unulula ati, nyapne. Auku buk dininto unmalye ning ara, yatanye birye tangap dongoptu do? Pia kume. Weik uku pia dilamle touk, na yu ara, kum kum danamle. Allah arye nyabuk.
Raja Daud birye deiamukba, dadeipdanin yangakirye, deiyok kibuka, talilulum nang nirya ara, diksukum un ninguk wininamlume. Ara, asum-asum nirya, pia pi dobuka, teleb piluk donamlume. Mikip ukirye, sik amu tam talinyak nang, sik ning dopropnamakca ati, anang ikin ning deibikirye dolonyak ning ara, anggun deiyok nang arye, teleb kibuka, yupu lipsisikmunce, amalye unyaka ara, bataknamake. Asum-asum nirya ara, ninye yupu teleb kibuka lipsisikuka bokeipnamlume. Aning tuba kum winipmunyopura, anggun amalye upmunya deice arye, na Allah ara, anggun malye tuba winimunya ati, na yu weik unulul ning ara, uku buk weik dilamle atonun unilirye, anggun malye winilulum nang ati, auku dipnamsile. Anggun tuba malye winilulum ning ati, yu weik upniliba, uku buk dilamle touk ning ara, min kume, kum danapnamle. Pia dinauk upliba, anggun nirya dibuka, sirya daknamsine.
Dipkoprop nyapsine. Nara Allah, naryuk, anggun Yerusalem mutuku ululum nang ati, opnamsine! Ara, na mikip weik taruk deice aryuk, anggunti yanuka opnamsine. Tonda, tuba-tuba narye anggunti, yu weik unulul ning ara, pia weik tonun, mek langdilamle atonun unulule. Narye anggunti, yu weik unulula ati, derepsinirye, wenebuka oplopnamsine.
Anggun nirya moubuka dipdelulume. Allah Yahweh arye, sik malye wininyak ninye ati, yu tenelul ning ara, kumanya balamle atonun ubuka, sik aninye deice, ikin ning yangalule. Anggun malye-malyeuk winilulum ninye ara, Allah el yu arye, wenepnamsil ning ara, anggun nong deice talye karin arye yanuka opnamsile.
Na walwal bukni, ayupu nyapnalam sum ara, kekebikirye, ‘Se, nun dipkoprob malye unyabe’ tenen, sik aninye malye wininyak ning nirya bataktingce, Allah ati moropnamak do, kum do? Ara, sik aninye nirya arye, ‘Se nun ni Allah, nun malye wininyap ning batakikirye, an damuk tamubuka yanamabe. Ance nun malye ning kilipsutumce, lyepsutum tenen, moropkiyabe,’ nyabuka, Allah ati, moropnamak do, kum do? Nun walwal bukni, dinauk unaname. Ara, urdem ati kum nyapkine. Sik Israel ninye ap, Yehuda yala ninye ap arye, pia malye weik wininyaka ati, Allah el yu weik upliba, ‘Sik wenena ati, ikin weik ning, sik nong deice deipnirye, sikti, opnamne,’ nyapdeibuk ning ara, mitik kume. Weik wenen ning kintinipmala ati, nyapkine. Ati ara, Allah arye nyapdeipnukba, laka nyapmakinba, ance sekmalam yupu dobuka, Allah el si eren aik binuka yinipnalyame, nyapkine,” Yeremia birye, Baruk biti nyabuk.
Dipkoprop ning ara nyapnusine. Isa mer si erena ati, anggunce domba ato ning obuka, arelbalamlumce, aning deice anggur mek dikilongolamlum ning ara, Allah arye eibuka bikamuka ati, aning kum bataksutue. Kume, anggun amalye winimunya deice arye, Allah elti, yu kililulume. Tonda, Allah arye sikti, ‘Kume, amutuku nang, pia malye wininyak ning ara, tuba kum eiptinye. Aning nirya ara, na lik weik unululule,’ tenyamuk. Ati, minop talak arye dipdongobuka, anoutam talak ap, wini talak ara, anggun mince ulamlum mutuku nirya ara, Allah arye akunum malye kibuka bataksuka ati, oldemuk ubuk. Ara, amutuku tuku pum tam arye, aning-aning ton tuba kum palamukce, tuba kum palule. Tonda, ninye ara, amutuku noutam tuba kum unyake. Tonda, yuk nang arye, sik mutuku malye winipnin balamuk ning eibikirye, ‘Se, amutuku noutam ara, Allah arye subuk nang, ikin weik ulamik touk, anggun babye atonun unamlume,’ nyabuka, yuk nang ati sunyake. Tonda, yuk nang arye eipsikcopura, anggunti nalinamsiyake.
Nyabukopura, ayupu ton dukdongobuka nyabuk. Nara, Allah Yahweh arye nyapsine. “Na dipkoprob nyapsine. Aminyan talak ara, sik tuba malyeuk wininyak nang nirya ati, weik tonun wenepnamsine. Sikda, yuk nang arye, nunti, ‘Allah el ‘Naʼ tenen nang unyake, ‘Tenenansiak’ tenen, min arye nyalamsise touk, anggun ninye den bol mouse tam sekelulum bukni, anggun talima noutam ara, malye winin ning, aupmasili buk winilulume. Aning atonun winilulum nang ara, aminyan talak anggun dengna dopropnalume.
Tonda, narye, ‘Winina kume,’ nyapdeisise bukni, anggun amul dam kisok potong akunum koplirye, Mesir mutuku ap, Yudea mutuku ap, Edom mutuku ap, Amon mutuku yala nang ap, Moab mutuku noutam ululum nang ap ati, nyapsine. Tonda, anggun mek kum ati, ninye kum unyak mutuku bukni, pala weik pata mutuku noutam ululum nang arye, ‘Nun isa mer arye, kanye deipsiting’ tenen, anggun amul deice tam, kisok potong kolulum nang babye, anggun Israel nang yala nirya, amutuku noutam nirya ululum nang babye, anggun nirya ati, weik tonun wenepnamsine. Deiyok ara, anggunce, ‘Yuk nang arye nunti, ‘Allah el mapu koproba unyake, tenenansiak’ tenen, anggun mapu den bol mouse ning sekelulum bukni, dipkoprob anggun talima noutam ara, malye winin ning pia tuba upsuka ati, nyapsine. Aning atonun, anggun Israel yala nang nirya babye, anggun mapu den bol mouse ning sekelulum bukni, dipkoprob anggun talima noutam ara, malye winin ning pia tuba aupsukba, malye ululume. Anggun nirya ati, wenepnamsinarya, nyapsine.” Allah arye nyabuk.
Israel nang arye pia malye weik ulamik ati, Allah el yu pia weik ubukura, ‘Sion mutuku ap, amutuku unyak nang nirya ap ara, tonok ning babye kum bataknune,’ tenebukce, lo arebukba, sik mal olan nang arye, uku dinibikba, amutuku nirya uku arye dibuka sirya dakuk. Asukum nirya ara, ‘Nun aik mikip kipnamsileʼ tenen, sik aik amu tam deiamik keil babye, uku dibukba, sice uk buklobuk.
Ati ara, narye anggunda. malye pia weik winimunce, talye-talye nang ap yolalamlum ning ap, anggun mapu weik olamlum ning ap ati ara, narye wenebuka, ikin kipdeipnamsine. Ara sal ap, kilapu ap, talye-talye mal olan nang ap, ninye ona deiyok nang ap ati, weik tonun wenebuka olamak touk, narye anggunti, weik tonun wenebuka opnamsine. Ara, na yu upnuk ning ap, ‘Sikda ‘Naʼ tenen nang unyak bukni, yuk ning ati si erenyake’ tenen arye, malye kanye bopse deice arye, anggun tibuk, adiparyuk wenebuka opsinyeba, dipnamlume.
Ati ara, se anggun Israel yala nango. Anggun malye winimunye ning nirya batakmunce, ‘Allah arye, nun kanye ap, talima ap, winiryuk ning arepsutue’ tenen, nati moronamnulume. Winibuka morolamnumunyopura, winiryuk kanye ap, talima ap, punubuka arepsinyopura, kam pia uptume. Kumopura, yata deiyok ati, ‘Dauaple, nun dipna babye, teleb uka,’ tenelulum do? Anggun Israel yala ninye, dipna ara, na like, nyapsine.
Nara Allah pia kam tuba ununye birye, nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, narye anggun wenena ati, na mikip weik taruk ara, na yu upmanilye deice arye, anggun Israel nang ati, moubuka talipsinirye, anggun deiyoknye unamsine. Ninye deiyok talipnirye, anggun deice tam Raja unamsine. Anggunda, na amu tamuk ulamunce, na yupu uk kekenamlume.
Ninye weik akunum obikceura, na Allah babye, kanye deipnirye, na taruk bokbokapnamne. Winipnamne ara, na yu kum upnamnile. Anggun malye ululum nang, weika arye, akunum wenebuka opnyeura, na kanye yu weik tenenun ning ara, kum kipnamnile. Aning nirya ara, pia dipkoprob nong upnamlarya! Na Allah Yahweh, aning-aning deice tam erebuka Pia Mikip Weik Deiyoknye Ununa ati, ayupu akunum nyapsina ati, dipkoprob aning nirya ara, nong upnamle nyapsine. Allah arye, na Yeheskiel biti, ayupu nirya nyapnuke.
Ura, adomon yupu nong ara, nyapnusine. Anggunda, moubuka kekepnululume! Yerusalem mutuku ululum nango, anggunda pia malye un ning weik, malye winilamlum bukni, ‘Anang ara, tonap teleb kipdeipnamne,’ tenepsirye, pi dobuka piripdese bukni, anggunda mandipna kanye bobuka, umunya deice arye, anggun nong deice akunum malye kililamunyeba, narye anggunti kum teleb kipdeipsitinye. ‘Aning kum winipmanto,’ tenepse ati batakse. Bukni, anggun nong deice tuba malye dem usulule. Winisulula ati, sik malye ulamika ati, na weik yu arye, pia weik tonun wenepnamne. Ikin deice arye wenelamnya ani, na yu arye, ‘Winibuka anang wenepnamne,’ tenyamse ning, anggun deice deipnirye, ayu ning akunum kum kipyeura, sirya tam ara, narye tamubuka tonap, teleb kipdeipnamsine.
Sik anang ara, malye winin ning, pia weik wininyaka deice arye, na si eren aik pia malye weik kililanyake. Na si erena ap, na si erebuka kina ap ati, sikce domba basam opnarye, abasam el meta ap, ining ap tuba arepnulum bukni, anggunce apia malye-malye weik ululuma deice arye, aning nirya, pia malye kililulume. Tonda, sik Israel yala nang arye, yuk yala nang, talye-talye daunyak nang ara, sik den bama mouse kum sekenyak bukni, sikce, ‘Kume, Allah el si eren aik dam talye mangkau asa wektume,’ nyaluluma deice arye, pia malye ululume. Aning atouk, anang ara, yuk mutuku ninye asik nang unyakce, narye, ‘Aning ara, wininamlume, aning ara, pia kum wininamlume,’ nyapdeiamsise yupu ati, diba kum tenebikirye, yanininyake. Tonda, na siuk kum ereninyaka ati, na dam pia kum yanmanto nang unyake. Sikda, den bama mouse kum sekikirye, sik kanye talima ap, sik nong nirya ara, malye tuba unyaka ati, na dam kum yatinge. Ati, sik Israel nang arye, na si erena ati, kam ning nirya obuka, ining ap, meta ap dobuka, nati arelyanganinyak talak ara, sik aninye asik nang ap ansinipmunce, na si eren aik dam kum yatume. Amalye ning weik winimunya deice arye, na si eren aik, pia malye kipdeipnuluma deice arye, na pia like unulule. Narye sik Israel nang ati, ‘Aninguk wininamlume, aning ara, pia kum wininamlume. Winipmunyopura, naryuk, winibuka kaliksinirye, pia melinamsine,’ nyabuka, nyalin yupu deice arye nyapdeiamsise ning nirya ara, anggunce akunum yaniltanauk ululume.
Anggun anang nirya ara, yu kanye tenepsinirye, anggun deice ikin weik ning deipnamsina deice arye, kel biknamake. Winibikirye, yata nang do nirya, yuk pera mutuku noutam daunyak Israel nang ara, kanye imun weik uk, dinamla deice arye dipnamake. Yerusalem mutuku tuba sik damuk unyak Israel yala nang ara, yuk mutuku yu yin talin nang arye, sik dam yakirye, parang ya bopmaca arye oplopnamake. Sik Israel yala nang bukni, akanye imun ning bitinye deice arye, biknamak bukni, sik kum dipnamak nang arye biknamake. Ara, batakniba, sik tuba kam unamak nang ati, sik mutuku noutam kanye imun weik din patana deice arye, dibinamake. Aning-aning ikin ning nirya ara, na yu weik upnamnila deice arye, sikti wenen ning arepnamne.
Wininyaka ati ara, nara, na yu weik tuba unilya ati, sik nong deice, ikin weik ning deipnamne. Tonda, narye sik anang ati, ‘Se sikda bicoe, ‘Naʼ tenen, nang unyaka ati, sik malye wininyaka ara dauaplye’ tenen, talye kanye bobuka, namin kipnamane, kum nyapnamne. Tonda, narye sik anang ati, kum namin kipnamne. Sikti, weik tonun wenepnamne. Tonok nang babye, kum bataknamne, sik nirya ati, pia ikin weik ning, sik deice deipnirye, wenepnamne. Wenebuka opnyopura, sik Israel nang arye, yupu weik tonun, nati moronmaniyak talak ara, mikip arye yukubuka, engenamaka babye, dipkoprob na pia kum kekepnamne! Allah arye, na Yeheskiel biti, nyapnukba, kekepse.
Winimunyopura, aning dekna ati, narye weik tonun wasinerye, wenebuka ikin weik ning, anggun nong deice deipnamsine. Ara, anggun malye winimunye ning dekna ati, tekbarye deice arye wenepnamsine. Ara, ‘Tujuh kali lipat deice arye,’ nyalamak atonun, pia weik kanye imun ning, weika arye arenamsine. Ara, ikin ning min talak yambul anun areamsise ning atonun kum bukni, aminyan ning ara, pia weik imun kanye bonuk, na Allah aryuk, kanye imun weik ning, na Allah aryuk arepnamsine.
Tonda, anggun ap, anggun apu yapu nang ap, punun deiyok nang ap, malye weik winilamlumba, narye min talak ulamik nang ap, anggun wini talak ululum nang nirya ap, anggun wenena ati, lo arepsinyeba, yuk pera mutuku yu nang arye, malye kipsikirye, dobuka yuk pera mutuku delilbinamsiake. Winilamsikiba, sik mal olan nang ulamik mutuku ak daulamik. Winilamika ati, anggun apu yapu nirya ati, sikce deiamikba, dadeipdanin banamak nang nirya ara, atonun malye winina ap, na yupu malye kina ap, aninguk winilamik. Yuk pera mutuku ak daulamikce buk, aminyan talak ara, anang arye sik malye winilamik ning ap, na Allah arye nyapdeiamse yupu yanibuka, mandipna kanye bobuka ulamikce ning nirya ap, tamubuka tenebikirye, ‘Se, nunda dipkoprob malye winilamupu,’ tenebikirye, ‘Winida diksukum kibuka, wininamapʼ tenebikirye, ‘Winida moubuka unamapcaʼ tenen, na si erebikceura, narye ton, tamubuka tenenamsine.
Ati ara, anggun Israel ninye nirya ara, tonap tuba tamubuka, na Allah Yahweh damuk yanamlulume. Yamunyopura, anggun pia tuba kamuk unamlum bukni, na dam tamubuka kum yamunyopura, Allah na yu ara, uku dilamle atonun unulula ati, anggun apu koprop, Yusup arye deiamukba, dadeipdanin yangalamik nang, anggun Israel yala ninye nirya, sirya daknamsine. Winipmanto ara, uku dibuka sirya daklamle touk, anggun wenena ati, kum daneipnamsine. Tonda, Betel mutuku unyak nang babye, auku arye diplirye, sirya daknamle. Adinamle uku ara, yatanye birye tangap dongopturye, aninye lyeptu do? Pia kuma ati, ‘Allah arye wenepsilyak’ tenen, nyapsine ati, anggun kanye mouplulume, nyapsine.
Ara talye ati, kum nyapsine. Deiyok ara, ani. Allah Yahweh arye, tukwak mutuku, im sirya, mutuku sirya nirya, sik malye wininyak ning ati, wenebuka opnamle sum, dipkoprob yanamal ati, anggunce moubuka kekeplulume! Allah el yu uplyeba, weik tonun wenepnamsil sum, min kum yanmalye talak aryuk, anggun malye winilulum ning, adiparyuk batakuka, Allah el dam tamubuka yalulume. Aning kum winipmunyeura, gandum duk teikikceba, el bama tukwak sakuka, kouluplyeba, kum arye pubuka bobalamle touk, Allah el yu weik, anggun dam yanuka deipnamsiliba, yuk mutuku yu nang arye, anggun obuka, tapu koubikirye, anggun mutuku noutam arye, yuk pera mutuku bobinamsiake. Atalak ara, Allah el yu ara, uku buk dilamla atonun ubuka, malye kanye bobuka, weik tonun wenebuka, opnamsila ati nyapne.
Ura, Musa sekamuk mem yupu talibuka, dipkoprop dobolbalamtumtoura, Allah el mapu una ati, laka kilin ning, den bam bol deice ning sekelulum ara, mitik teleb upsutu bukni, Allah el mem yupu yaniltanauk winipmunyopura, anggun den bam bol mouse ning sektinga babye, ‘Deiyok pia kum upsuka atia,’ tenebuka anggunda talye nang atonun kibuka ululume.
Winipmunye talak ara, anggun ni Allah, el si Yahweh arye, anggun talima pum tam mambul pil donamsile. Ara, mitik mapu, ‘Allah el ninguk wininamak’ tenen, sik den bam bol sekenyak touk, Allah arye anggunti, winiryuk kanye talima arenamsile. Ara, anggun ap, anggunce deipnamlum mapu ap nirya ati, Allah el si Yahweh arye, elti, pia dib tenen kanye arepnamsile. Arepnamsil ning deiyok ara, ‘Anggun kanye talima ap, anggun nong ap, na Allah ati tamubuka arepnamniyake. Tonda, pia unamak’ tenen, winiryuk kanye talima arepnamsile.
Aning nirya winipnamana deiyok ara, ani. Na yu ara, uku buk dilamle atonun kibuka, dipra balamlya ani, akunum dibuka binamik nang mutuku, tukwak amu tam babye, dipra banamle. Na yu, uku buk atonun ning ara, tukwak mutuku nirya babye, ninye koulamikce ning nirya babye, ninye talinyak ning nirya babye, dipnamle. Ton ning ara, weik mutuku nirya, tuku pum tam babye, uku diplirye, sirya dakuka anirya dipnamle. Ara, ninye arye, ‘Amambul ning min kum winipmanto ning,’ tenenyak ning nirya ara, narye kum kipdeipnamne. Allah arye nyabuk.
Ara, Yahudi yala ninye arye, ‘Aning ara, Allah el mapu unamake’ tenen, sal den bam bola mouse ning seklamaka atonun kum bukni, Kristus arye, ‘Aninye ara, na’ tenen ninye, na mapu koprop unamake,’ tenepsukce, nun malye ning lyepdeisukce, winiryuk talima arepsukce, winiryuk ninye atonun ubuka teleb kipdeipsuke. Teleb kipdeipsuka ara, laka kilina ati winipsuke. Winipsuka ara, ninye taruk arye pil dolamak ning atonun kume. Aning kum bukni, nunda talye tukwak ninye anya arye, ‘Kristus arye nun kanye talima malye ulamsuk ning ap, nun kanye ap, malye’ tenen ning nirya ap, kum kipdeipsukce, teleb ninguk arepsuke.
ကြော်ငြာတွေ