Yeremia 4:1 - Eipomek1 Allah arye, el mapu koproba Israel nang ati, nyabuk. Anggunda, nun ni Allah dam tamubuka yanuyabe,’ tenepmunyopura, adiparyuk yanululume. Winibuka yanamlum ning ara, Anggunda min talak arye, talye-talye ning ati, Nun ni Allah,” nyabuka, si erelamlum ning ara, na yu unulule. Ati, anggun adiparyuk aning batakmunce, tamubuka yamunyopura, natibuk moubuka talipnumunce, na siuk erenamnulume. အခန်းကိုကြည့်ပါ။ |
Yeremia 4:1
38 ပူးပေါင်းရင်းမြစ်များ
Aning atonun ninye sik kanye aryuk, Yerusalem mutuku bukni, keting yangan tam isa si erena ati, aik domik ning daklobukce malye kipdeibuk. Aning ara, Yerusalem mitik eitam bukni, mutuku si ara, ‘Pia Malye Un mutuku,’ nyabuka si silamik. Amutuku deice isa si erena ati domik aik uluplobuk. Aning ara, minop talak ninye deiyoknye Salomo birye, sik Sidon tam ulamik ninye talibuka si erelamik isa si Asytoret, el si erena ati domuk ning ara, uluplobuk. Tonda, sik Moab tam ulamik ninye talibuka si erelamik isa si Cemus, el si erena ati domuk ning ara, uluplobuk. Tonda, sik Amon tam ulamik ninye talibuka si erelamik isa si Molek, el si erena ati domuk ning ara, uluplobuk. Aisa mer nirya ara, pia malye weik ulamika ati, Allah el kanye ara, ‘Aisa nirya ara pia na like,’ tenelamuk.
Ura, Raja Yosia birye, kum daneibuk ning ara ani. Allah el yupu minop buku noutam arye, ayupu nirya, ‘Wininamlume,’ nyapdeiamukba sekeiamik yupu awamuk touk winibuk. Abuku ara, Allah el si Yahweh, el si eren aik pum tam deiamik bukni, wangamikba, Allah el aik pum tam pil dona deiyoknye imam Hilkia birye eibukce, abuku dobuka Yosia biti arebuk. Arebukba, abuku eibuka kel bikukce, isa si erelamik nang nirya yakuka dopkwetebuk. Ara, ‘Yata wiripnamap do? Yata wiripnamsil do?’ tenen, isa mer ati morolamik deiyok nang ap, tonda akunum diamik nang, sik kanye asilena deiyok nang ap, kir dona deiyok nang ap, ‘Nun ni’ tenen, kat ning dobuka memebuka sik aik pum tam delilamikce si erelamik ning nirya ap, yakuka dopkwetebukce, sik bon ning nirya ap, isa urasin atonun memebuka delilamik ning nirya ap, dobuka uku dongobukba dibukce kum dayuk. Winilamikak ara, Yehuda yala ninye ulamik mutuku nirya ap, weik asik Yerusalem noutam nirya ap, aning nirya kum daneibukce, dalubuka donokuk.
Oded el mi nabi Asarya birye, ninye deiyoknye Raja Asa biti, ayupu laka nyabukce, aminyan talak winipnamuk ning ati laka nyamuk ning ara, Asa birye ayupu kekebuk. Kekebukopura, el kanye pia deibuka si erebukce, ilil tenena kumce, kil-kil weik ubuk. Kanye deibukura, Yehuda tam noutam nirya ap, Benyamin yala nang sik ulamik mutuku noutam nirya ap, ninye arye, ‘Nun ni koproba aniʼ tenen, isa si erena ati, aik dobuka deiamikak nirya ara, Asa birye uluplobukce, aning kisikdakuka pia yuk karen ak binuka deibuk. Tonda sik Efraim mutuku nirya obuka kum danamik mutuku-mutuku dana-dana tam nirya ara, sik aninye babye isa si erena ati, kintinip deiamikak nirya ulubuka kisikdakuka yukak deibuk. Asa birye, ‘Winipnulume,’ nyapdeiamukba, el pil don nang arye, winibuka pil dolamik ning ara, adiparyuk Allah Yahweh, si erena ap, el arena ap ati delina ati, mesba ara, minop talak malye kiyamik bukni, Asa birye amesba tonap tuba lipsisikuka dobukce, teleb kipdeibuk. Amesba ara, Allah Yahweh el si arelban aik dam bukni, urasin tamuk, aning memepdeibukce dobuk.
Ati, narye, ‘Aning ara wininamlume, aning ara, pia kum wininamlume,’ nyapdeipse yupu ap, narye sikti, Teleb una ara, winibuka teleb unamlume,’ nyamse yupu ap, tonda ‘Asum atanggal deice arye, akwalya kwalinamlume. Anggun malye un ning kum kina ati, winibuka-winibuka pil donamlume,’ nyamsise yupu ap, Israel nang sikce, na nyapdeipse yupu nirya ati, diba tenebikceura, moubuka talibikirye, dukdongobuka, yupu uk talebuka diksukumuk uceura, anggun deipkirikdop nang ati, ‘Amutuku nirya arepnamsine,’ nyamse mutuku noutam arye, asum amutuku noutam unyak nang ati, ‘Amutuku batakuka, yuk mutuku bilulume,’ pia kum nyapnamsin bukni, amutuku noutamuk pia aunamake.” Aning nirya ara, Allah arye, sik Israel nang ati nyabuk.
Aning nirya akunum sirya nyabikopura, Raja Yosia birye, amutuku nang arye, talye nong kum ning bukni, sikce, ‘Nun ni melipsilyame,’ nyabuka, si erelamik ning, Israel nang arye talilamik mutuku nirya uamuk ning nirya ara, ulubuka batakikce, kum kipdeibuk. Winibikce, amutuku nang nirya ati, “Nun ni koproba Allah, el si Yahweh, el tibuk si erenamlume,” nyabuk. Nyabukura, ‘Diba, wininamabe,’ tenebikce, Yosia tuba kam ulamuk talak noutam nirya ara, amutuku nang nirya arye, sik apu yapu nang arye si erelamik Allah, el si Yahweh, el tibuk diba tenebuka, diksukumuk ulamik.
Na Allah arye nyapsine. Se anggun Israel ninye ara, ‘Naʼ tenen, ninye tenesenun bukni, anggunda na yupu bisibuka malye weik winipmunce, nati yaninululume. Bukni, wini talak ara tamubuka na dam anyuk yanululume, nyapsine. Narye anggun Israel ninye ati pia bico tenesununa ati, ‘Na dam tamubuka yanululume,’ nyapsine.
Nyabukba, Allah el si Yahweh arye, Yeremia biti tamubuka nyabuk. “Dipkoprop nyapkine. Ance na damak tamubuka yaminyopura, narye an dopropkinirye, melipnamkine. Winipkiniba, anda na damak tonap umince, na pil donanye unalame. Narye anti, weik mambul yupu nyapkiniba, ance ayupu kekebuka dopropmince, ‘Ayupu ara, deiyok aupnamle,’ nyabuka nyanamlyame. Talye tilila yupu ara, kum nyanamlyame. Ati, sikce, malye yupu nyapnamkiyake ning ara, kum kekenamlame. Winipminya deice arye, na yupu nyaipneba, na yupu laka nyana deiyoknye, nabi tuba unalame. Winiminyeura, sik Israel ninye nirya ara, tamubuka an damuk yakirye, ance nyanalam yupu kekenamake.
Na Allah arye aninye ati, weik wenen ning arepneba, mutuku-mutuku daunyak ninye, aning eibikirye, ilil weik upnamle. Ilil weik upliba, sik nirya arye, ‘Se, Israel nang ara, nun like. Malye winililamikba, Allah arye wenebuk ning ara, ikin weik anya arye, aning ara, nunce tonap kum teniptibye,’ tenenamake. Na Allah arye, winipnamne ning nirya ara, urdem ati kume. Ara, Hizkia el mi Manasye, elce Yehuda yala ninye, sik ninye deiyoknye, Raja talibuka ulamuk talak, Yerusalem mutuku noutamak, aRaja arye, weik malye winilamuk ning dekna ati, wenepnamne.” Allah arye nyabuk.
Ati ara, an Yeremia birye, sik Israel ninye ati, nyapnalyame. Wini talak ara, ‘Yehuda yala ninye ap, Yerusalem mutuku unyak ninye nirya ap ati, binuka obisipnamne,’ tenenyak ning ara, binuka laka nyapnulyame. ‘Ara, kiri tuku dobuka ngolol makau teleb uka memelinye ulye touk, sik amutuku unyak ninye wenena ap, ona ati, nun ni Allah, el si Yahweh arye, sik wenen ning akunum memelule. Anggun nong deice, weik ikin ning delinamsil ning ara, akunum memepdeipsuke.’ Ati, ance, sik Israel ninye ati, ‘Anggun malye winilulum ning nirya ara, batakmunce, diksukumuk teleb ubuka wininamlume,’ nyabuka, aninye dam binuka, laka nyapnulyame,” Allah arye, Yeremia biti nyabuk.
Na Allah arye, sik anang nirya ati, imun weik ning arepnyeba, yuk mutuku sirya, im sirya nirya unyak nang, eibikirye, ilil uplyeura, ‘Se, sikda pia malye nang unmake,’ tenebuka, kanye delinamake. Narye sik anang wenepnyopura, yuk-yuk mutuku nang arye, anggunti utenenamsiake. ‘Se, sikce malye winilamik ning ara, teleb nang arye kum winiptinge! Sikda, alye weik dakalanamake! Winipyeba, yuk mutuku nang arye sikti, nalibuka akutunamake. Analibuka akutunamak nang arye, sik kayapu yuk nang ati, wanamak talak ara, sikce ayupu nyanamake. “Allah arye Israel nang ati, malye kibukce, supdongobukba, pia malye weik unyak touk, narye anti, malye kipkinirye, pia supkine,” nyabuka nyalanamake. Ara, na Allah arye, sik Yehuda tam unyak nang bataknirye, yakdonoknyeba, yuk-yuk mutuku sakuka dabikirye unamakak nirya ara, amutuku-amutuku unyak nang nirya arye, sik Yehuda mutuku nang ati nyanamake.
Ara, sik nabi nang arye, anggun dam nyapdeiamsik ning ara, “Malye ning nirya talibuka winilulum ning ap, tenelulum ning nirya ara, adiparyuk batakmunyopura, na Allah Yahweh arye, lo arepsinye deice arye, amutuku tuba unamlume. Ara, anggun apu yapu nang ati, ‘Ateleb mutuku arepnamsine. Arepsinyeba, dopropmunyopura, amutuku talipmunce, pia aunamlume,’ nyapdeiamuk yupu deice arye, nyapdeiamse ning ati nyapne. Ara, amutuku ara, na Allah Yahweh arye, anggun apu yapu nang ap, anggun asukum ululum nang ap ati, akunum arepsise mutuku ati, ‘Amutuku uk pia talibuka uptingʼ tenen, nyamsise.
Allah Yahweh arye Nyabuk. “Winipmanto, sal tonok ton, kil akunum domlye bukni, ‘Akil bataknun,’ teneplirye akunum batakalule. Winibuka bataklyopura, akil yuk nang doprobikceura, min domlinye birye, tamubuka kum doproptue. Aning winina ara, amutuku nirya malye uptue. Israel nang, yuk kilapu ati weik tonun moun dilalumce, ubula yolalamlum ati ara, wini talak na Allah dam tamubuka yatum do? Aning ara kum winiptume.” Allah arye nyabuk.
Allah Yahweh arye, ayupu ara, na dam yanuka nyapdeipnuke. “Ance Israel mutuku nang, kekenak binuka nyapnamlyame,” nyapdeipnuke. Ayupu ara, ani. Se, Israel nango, pia ikin kanye bobuka kum ululum nang ati nyapsine. Tamubuka na damuk yanamlume. Nara anggunti, pia bico tenenanye unune. Tonda, anggunti tuba yu pia kum teninamsine.
Allah Yahweh arye nyabuk. Se, na mapuo, anggun nirya pia malye ululum nang, tamubuka na dam yanamlume nyapsine. Anggunda ‘Naʼ tenen nang ululume. Narye Anggunda tamubuka boyanamsine. Ara, weik asik dobuka unyak mutuku noutam arye, ninye tonok ton dopropnamne. Tonda, tonok yala nang ulamikak arye, ninye bitinye nang dopropnamne. Winipnirye tamubuka, Sion mutuku konuk yanuka bodeipnamsine.
Se, anggun nirya, Allah dam akunum bataklum nang ara, tuba tamubuka, el damuk yanamlume. Elce anggun teleb kipdeipsilirye, malye ning nirya ara, lyepdosilirye, kum kipdeipsilyeba, el yupu moubuka talipmunce unamlume. Winipmunyopura, anggunce nyanamlume. “Diba, winida nun akunum tamubuka, Allah Yahweh, el dam yayabe. Ati, dipkoprob elda nun ni koproba Allah,” nyanamlume.
Tonda, tuba-tuba na Allah arye, na amu tam pil donyak nang, ara na yupu laka nyana ap, aminyan winipnamle ning, laka nyanyaka deiyok nang, sik nabi-nabi nang ara, sik dam dopdeipyeba, anggun dam yanarye, anggunti laka nyalamsik. ‘Anggun malye winilulum ning batauka, Allah dam tamubuka yalulume,’ nyabuka, yupu nyasinyake. Tonda, anggun malye dekna ning ara, batakuka, diksukum winin ninguk talibuka telebuk unamlume. Tonda, sik nirya ara, talye ning ati, ‘Nun ni koproba ani,’ nyabuka, isa si erelulum ning ara, adiparyuk bataklulume! ‘Allah arye nyasilye yupu, moubuka talipmunyeura, elce melipsilyeba, anggun apu yapu ap, anggun ap ati, akunum areamsuk mutuku, teleb mutuku noutam ara, keting tamun yupa weik deice arye, asukum teleb kibuka unamlume,’ nyasinyake. Bukni, na Allah arye, anggun Israel nang ati, nyapdeiamse yupu ara, kum kekenululumce, ayupu moubuka kum talilulume. Tuba malye ninguk talibuka winilulume.
“Sekminyeura, ayupu lakak arye nyabikiba, Yehuda yala ninye kekebikirye, sik malye ning batakikirye, ‘Na dam tamubuka yanamak do, kum do?’ tenen, dinamne. Ara sikce, ‘Se, nun malye wininyaba dekna ara, Allah arye kanye imun ning, nun dam deipnamsila ati nyapsuke,’ tenebikirye, ikin kanye bobikirye, sik malye wininyak ning batakuka, na damuk tamubuka yacopura, narye, ‘Ikin ning, sik dam deipnamne,’ tenepse ning ara, bataktinye. Kumopura, kume.” Allah arye Yeremia biti, nyabuka laka nyabuk.
Anggunce na anggun ni koproba Allah dam, nyalin yupu nyapdeiamuk ning moubuka talipnamlume. Tonda se, sik Yehuda yala nang ap, Yerusalem mutuku ululum nang ati, ayupu nyapsine. Anggunce, ‘Nara Allah el ninguk wininune,’ tenenamlume. Aning kum winipmunyopura, na yu, uku buk dilamle touk unilye ning ara, anggun deice deipnamsine. Winipsinyeba, uku buk dilamle touk unamle ning ara, ninye yuk nang arye, tangapmanto kum upnamake. Winipnamak ning nirya ara, anggun malye un deice aryuk, ikin anggun dam yanganamsile.
Ayupu nyapdeipsilanye bira, Israel ninye ati kalikuka melilulnye, anggun ni koproba Allah, mikip weik ulirye, aning-aning nirya talibuka deice tam, Weik Erenanye birye nyapsile. Elda, im deice unyak yin talin malaikat nirya talibuka, sik weik deiyoknye ulule. Elce nyapsile. Anggunce malye-malye weik winilulum ning nirya batakmunce, telebuk winimunyopura, anggun ap, na ap anyaik ansinipdabirye, teleb ubuka neika utibye. Kumopura, kume.
Anggun malye-malyeuk winilulum ning nirya batakmunce, diksukum telebuk winimunyeura, na Allah arye, anggun apu yapu ati, ‘Ateleb mutuku noutamak ara, tuba-tuba pia aunamak’ tenen, arelamsise mutuku noutamak ara, anggun wini talak ululum ninye ara, na ap neika unamabe. Ara, minop talak arye, ‘Naʼ tenen, nang Israel ninye, anggun deipkirikdop nang ati, arelamsiba, talibuka ulamik mutuku ara, ‘Anggun babye aunamlum’ tenen, nyapsine.
Anggun yuk-yuk pera mutuku noutam arye, boyasinirye, tamubuka asukumuk, akunum deipnyopura, anang nirya arye, Yerusalem mutuku nirya ara, tuba tamubuka, teleb kilinamake. Ara, amutuku dam akunum tamubuka yakceura, anggun atam ululum nang arye, ‘Nun ni ani’ tenen, talye ning talibuka, si erelulum isa ap, isa si erena ati, memebuka deiplum ning ap, sik aik ap, sik patung ap, pia malye yupu nyalulum ning ap, yu kanye bolulum ning ara, kum kilinamake. Ara, na Allah arye, ‘Aning nirya ara, na pia lik,’ tenenun ning nirya ara, atalak yanganyak nang arye, aning nirya obuka, sice buklopnamake. Sikce aning nirya ara, adiparyuk bataknamake.
Tonda, amalye winilulnye birye, yuk ninye sik patana ati, uang yo bok areplye talak ara, elce ayupu uk, nyalule. “Na uang yo bok dopropmunce, nati tamubuka, min kum arepmanumunye talak noutamak ara, ‘Yo bok ton tabakuka arepnamnulume,’ nyapnamsin touk, uang yo bok tonap tabakuka, weik arye arepnamnulume. Anggunce na yo bok dopropnulum touk kume. Nara, weik arye tonap tabakuka dolona ati, weik arye arenamnulume,” nyalule. Aning ati ara, amalye wininanye kam pia unamle do? Kume, dipkoprob kam pia kum unamle. Na Allah arye, ‘Aning nirya ara, na pia like,’ tenenune. ‘Aning nirya ara, pia malye,’ tenenirye, anggunti, ‘Winina meme,’ nyapdeiamsise ning ara, elce talye mangkau kibuka winilula anya arye, anye bira dipkoprob wenebuka opnyopura, dipnamlarya. Diplyopura, el ining ara, el kisok deice upnamle. El ining ara, el bidamnye nong deiceuk paleplirye banamle. El malye ulula deice arye, wenebuka opnamna anya arye, el dipna deiyok ara, el bidamnye arya.
Pia malye weik ulamik bukni, wini talak arye deiyok koubuka, sikce isa mer si erenyak ning ara, adiparyuk batakanamake. Tonda, sik ninye deiyok nang, Raja-Raja dipniba, na aik dam poka kup-kup ak, tuku lukuka weilamik ning ara, adiparyuk dobuka, pera otam bobinamake. Anyapman touk, dipkoprob winibikcopura, nara sik kan-kan pia ati aunamne.
Na mapu Israel ninyeo, anggunce na batakanululuma ati, winipmanto yupu nyapnusine. Wini talak ara, anggunda na kil atonun kum ululume. Tonda, na ara anggun akanye kume. Ati ara, talye-talye yolamak kilapu arye, ‘Urasin teleb kilapu tenepsikirye, se, akilapu ara yoptibye, tenenamsiyak’ tenen, sik asok deice mil ning ap, bi ning ap likdakirye, teleb baju ongolamak touk, anggun Israel ninye arye, malye weik winilulume. Talye-talye yolamak kilapu arye, ninye yuk nang ap, talye yoldakirye, sik akanye yapu bataklamaka touk, anggunce malye winin ninguk tenibuka umunce, na batakuka, talye ning, Isa Mutuku Dongonye siuk, ‘Nun ni koproba’ tenebuka, isa si erelulume. Awinimunye ning nirya ara, batakanamlulume.
Sik anang nirya arye, na Allah ati batakaninyak bukni, tuba-tuba isa, el si ara dewa-dewa, tonda Bahal ati, dipkoprob mikip kum ning, talye ninguk ulul bukni, el si erenyake. Aisa ara, sikti, pia kum meliptue. Winipmanto ara, sik anang ara, ‘Mal dopnamapʼ tenen, yin talibuka pipnamak bukni, yin malye arye mal dopmanto kum ulamak touk unyake. Tonda, sik talibuka unyak ninye deiyok nang nirya ara, kwalina deice arye, maknya kintinin yupu nyanyake. Wininyaka ati ara, lo arepniba, yu nang yakirye, pia yu parang boyanuka, aya arye sik anang nirya ara, opnamake. Bukni aning nirya ara, narya, winipniba, sik Mesir mutuku unyak nang nirya arye, Israel yala nang ati, akutunamake. Aning nirya ara, Allah arye nyabuk.
Allah Yahweh arye, “Yehuda tam unyak ninye, weik arye wenepnamne,” nyabuk bukni, ayupu nyabuk talak ara, nyabuk. “Anggun malye winilulum ning nirya, batakmumce, anggun kanye talima nirya, na deiceuk deipmunce, ‘Se nunda malye winilamupu ninye’ tenen, din dina kum arye, si tebuka umunce, nati ngalukuka engepnumunce, moropnumunyopura, kekepsinirye, lyepropnamsine,” nyabuk. Nyabukce ayupu ton nyabuk.
Anggun wini talak ululum Israel nang ara, anggun apu yapu minop talak ulamik touk, kum unamlume. Minop talak ara, narye nabi-nabi nang dopdeipsiba, sikda, narye, ‘Winipnamlume,’ nyapdeipse yupu ara, anabi nang, sik apu yapu dam binuka laka nyalamik. Ara, ‘Narye im deice unyak yin talen malaikat, sik weik deiyoknye kibuka ununye birye, na Allah arye nyapsine. Wini talak ara, anggunce pia malye weik winilulum bukni, aning nirya batakmunce, na Allah dam tamubuka yamunce, diksukumuk wininamlume,’ Nyapdeipse bukni, sikce ayupu nyapdeiamse ning ati, ‘Nun like,’ tenelamikce, dipkoprob kum winilamik. Ati ara, na Allah Yahweh arye nyapsine.
Ati ara, sik Lewi yala nang arye, nyanamak ning ara, ani. “Allah el si Yahweh arye, talye ning si erena ara, pia malye weik ati, aning ara, na like. ‘Aning ara, pia malye,’ tenenun ning ati tenebuka, memebuka delina ati, keil ap, yo ap, tonda logam deice arye memebuka deibikirye, dungnubuka, si erenyak nang ara, Allah Yahweh arye anang ati, kanye imun weik ning, sik nong deice deipnamle. Ati, anggun Lewi yala nang arye, malye winin ninguk yasilyeba dolonamlume. Allah nyasilya deice arye, ikin ning anggun dam pia aunamsile,” nyabuka, yupu deice arye sunamsiake. Ayupu Israel nang nirya kekebikirye, diba tenebikirye, sikce tamubuka, “Yo, dipkoprob nyapmasuluma ati, akunuma nyababe,” nyabuka, nyanamake.
Ura, luba kina meme. Malye winipmunyopura, ikin ning weik upsiliba, anggun kanye talima pum tam arye, ‘Se, yata wiripnamap do?’ tenen, malye kanye bobuka upmunyopura, anggun ni koproba Allah, Yahweh ati, pia se tenepnamlume. Yahweh el dam tamubuka yanamlulume. El ti, diba tenebuka, pia tenenauk upmunce, el yupu kekebuka dobolyamunyopura, Allah el si Yahweh arye anggunti, tuba tonap melinamsile.
Nyabukopura, Yosua birye ayupu nyabuk. “Ati ara, nun ni koprop Allah, el si Yahweh ati, ilil tenebuka unamlume. Allah arye nyasilye yupu nirya, moubuka kekepmunce, aninguk talibuka unamlume. Tonok ning babye batakana kume. Minop talak arye, anggun ni yapu, pia pera mutuku Efrat mek koubuka, otam ulamik talak ara, talye ning Isa Mutuku Dongonye el siuk erelamik ning nirya ara, bataknamlume. Tonda, anggun ni yapu arye, Mesir mutuku noutamak ulamik talak arye, Isa Mutuku Dongonye si erelamik ning nirya ara, bataknamlume. Yata yuk ning do nirya ati, ‘Nun ni koprop,’ nyabuka, yuk talye ning si, pia kum erenamlume. Allah el si Yahweh, el tonok ati, el talibuka, el amu tam ulamunce, el siuk erenamlume. El tonoka.
Ati ara, Israel nang sikce talye aisa mer, sik urasin atouk ubuka puturubuka deiamikce, si erelamik ning nirya ara, ulubuka batikik. Batakikce, Israel nang ara, Allah el siuk erebik. Winibikopura, Israel nang ikin ning delilamikba, kanye imun kanye bobuka ulamik ning ara, Allah arye aning eibuka kel bikukce, ‘Se, sik tuba ikin kanye bobuka unyaka ara, kum bataktinye, melipnamne,’ tenebukce, kanye deibuk.
Engebuka morolamika ani, Samuel birye, Israel ninye ati nyabuk. “Ura, anggun kanye talima nirya bobuka, ‘Allah el si Yahweh deice deibibirye, el damuk tamubuka yanuyabe,’ tenepmunyopura, anggun adiparyuk winipnamlulume. Ara, yuk mutuku yala nang arye, si erenyak Isa Mutuku Dongonye, anggun babye aisa si erelulum ning ara, bataknamlulume. Tonda, aning atonun, isa el si Astoret, el urasin atonun memebuka deiamik ning ara, batakuka, el si ton kum erenamlulume. Aning nirya batakuka, anggun talima ap, nong ap, kanye ap nirya ara, Allah el si Yahweh ati arepmunce, Yahweh atibuk, el si erenamlulume. El amu tam bukuka, el piluk donamlulume. Winipmunyopura, Pilistin nang arye, anggun talipsikba, ikin kanye bobuka ululum ning ara, Allah arye lyepdopnamsile,” nyabuk.
ကြော်ငြာတွေ