Sik mapmeka, berekukopura, du kil arye, el weit kil ati nyabuk. “Ambusum lukunyan ara, nun ni koproba ap, na ap mapmanume. Alukunyan babye atonun, anggur mek arepnimnyeba, weika arye deiplyopura, el kanye wangalamak talak noutamak arye, ‘An babye neika mapturumba, mi boptumba, aminyan talak nun yala kum dalyak’ tenen atia,” nyabuk.
Yeremia 3:3 - Eipomek3 Ati ara, tuku teleb kina ati, im deice arye mek arepnulum ning nirya ara, kum donoknamle. Tonda, mok im deice arye, amutuku ati mok ton pia kum arepnamle. Anda talye yolamikce kilapu urasin atonun ulyam buk, alye kum ukulula atia. အခန်းကိုကြည့်ပါ။ |
Yeremia 3:3
28 ပူးပေါင်းရင်းမြစ်များ
Ance sikti, bico tenebuka, teleb una ati winilalum ning ara, luba kiyamike. Tonda, sik dam ninye winipmanto kum pil dolalum ning nirya ara, tuba kum tenilamikce, luba kiamik. An nyalalum yupu yanibikce, mandipna kanye bobikce kwalilamikce, ‘Mesir mutuku tuba tamubuka bobisiliba, sik amu tam talye pil don nang unamap’ tenen, sik bidamnye arye, ninye deiyoknye wipdeibik. Malye weik winilamik bukni, Allah anda ninye nirya malye wininyak ning namin kina deiyoknye ulyame. Min pola kum wenesilyamce, an kanye aryuk weik bico tenepsimince, weik arye melisilyame. Bico tenesiminye ning ara, weik arye bico tenesilyame. Winilyama arye, nun apu yapu kum bataklamlume.
Ninye ton dipkoprob ninguk winilulnye bira, ‘Teleb una ara ani, malye ning ara ani’ tenen, el wininamle ning nirya moubuka tenelya deice aryuk, aning nirya tenebuka kintinililule. Bukni, malye ninguk winilulnye bira, ‘Yuk ninye kel biknicak’ tenen, ilil pia kum kanye bobuka weik winiplirye, erepdanuka kwalilule. Dipkoprop el wininamle ning min kum tenepmale bukni, el urasin ara, ilil una kum kili sal wininyak touk kibuka, talye lukparabuka balule.
‘Na anggur tapu duk weik moupnamnil’ tenen, anggur tapu taruk seklopniba, kwapu youbuka, duk weik mouptu bukni, aning ara, kum seklopnamne. ‘Duk weik moupnamnil’ tenen, pinga kum deipnamne. Anggur wa ara, ‘Dauplye’ tenen, bataknamne. Anggur wa wilamse mutuku nirya ara, talye yo mutmuta ap, tace ning ap, beteklirye pabuka kwiniklyopura, anggur tapu bok ton kum eipnamake. Talye ninguk papnamle. Tonda, narye dua ap, mok ap ati, “Memepdoplulume,” nyapniba, mok ara, asukum ton kum sakuka, kum pulyanamle.
Nun ni Allah, nun kele. Mutuku-mutuku nirya arye, kwemdina ning Isa Mutuku Dongonye si erenyak ning ati, ‘Mok arepsilyame,’ nyabuka moroptibye babye, mok kintinibuka kum arepsutue. Tonda, im noutamak ulul ning aryuk, mok tukwak mutuku kum dopkweteptue. Aning nirya kum bukni, Allah ancuk, nun patapsilye ning nirya arisilyame. Ati ara, nunce an deiceuk, nun kanye delinyabe. An dem aryuk, aning-aning nirya arisilyame.” Israel ninye arye, Allah ati ayupu nyabik.
Tonda, amutuku talibuka unyak ninye deiyok nang nirya arye, sik amu tam pil dobuka melin nang ati, ‘Tuku pum tam mekwen sumur palibik mutuku elbinamlume. Elbimunyeura, mekwen mitik anun ton aupmalya ak, eipmunyopura, mek kwebuka boyanamsulume,’ nyabuka, dibikiba elbanamake. Bukni, mek sumur palyamica ak, delilamle mek nirya, akunum ceprobukba, akunum kum ubuka anya arye, mek kum kwepnamake. Winibikirye, sik bopmace mek din makau ara, talyeuk tamubuka, boyakirye ilil uplirye, asing bi lulupnamle. Ati, ‘Nun deiyoknye birye, yatato nyapnamsil do?’ tenen, malye kanye bobikirye, sik kisok talepdakirye, sik nong nirya kanupdongobuka yanamake.
Atalak ara, mok ton pia kum cepnamle ati, amutuku tuku noutamak nirya ara, kel-kel aplirye, sesal sepnamle. Winiplyopura, wa wibuka yala ning kulamak ninye nirya, malye kanye bobikirye, kisok talibuka, kanupdongopnamake. Ara, ‘Se, nun koun ning nirya koulusulul’ tenen, malye kanye bobikirye, kisok kanupdongopnamake.
“Yeremia ance kitilongolamak buku ton dopropmince, abuku noutamak ara, narye an dam Israel yala ninye ap, Yehuda yala ninye ap, tonda ninye yuk mutuku ninye nirya ap, sik malye wininyak ning wenena ati, ‘Winibuka ikin ning, sik nong deice deipnamne,’ nyabuka, laka nyapdeiamkise yupu ara, seknulyame. Ara, minop talak Raja Yosia birye, ninye deiyoknye ulamuk talak arye, minopce nyapdeiamkise yupu arye, dipdongobuka, asum nyapkin yupu nirya ara, seknulyame nyapkine.”
Anggun awinilulum nang arye, anggun kanye talima namin upsutuba, anggunce, “Se, nun ni koproba Allah ati, dipkoprob ilil asa unamabe. El yupu uk kekebikirye, aninguk talibuka wininamabe,” nyaptum bukni, aning kum tenebuka nyalulume. Tonda, anggunce, “Se, nun ni koproba Allah aryuk, mok li talak ara, mok aresilyeba, mok celule. Tonda, aketing tamun, aketing tamun nirya, mok li ap, dou man ning deiyok koun talak ap, mok li sirya daklyeura, wa wibuka koumice ning, lin talak ap ara, Allah arye teneplirye, elcuk asum-asum nirya, teleb kibuka arisulule,” nyapmatume. Allah arye, ‘Winipnamakeʼ tenen, ‘Akunum kintinip deiamuk touk, tuba aresululʼ tenen, na Allah ati, si erebuka dopnutum bukni, aning babye, pia kum tenelulume.
Nyapnukba, na Yeremia birye tamubuka nyapse. “Se na ni Allah Yahweh. Na kele, ance, ninye ati, Yata wirinamak do?’ tenen, patakulul ning ara, anti diba tenebuka, pia dib yupu nyana ap, diksukum winin ning ap, yupu. Anda Allah arye, sik malye wininyak nang akunum wenebuka opsi bukni, sikda, ‘Dipkoprop Allah arye winisululeʼ tenen, ikin kanye bobuka kum unyake. Tonda, sik wenena ati, ikin ning weik deipsulumce, opsulumba, ninye weik akunum diamik bukni, aning babye sikce kel kum bikinyake. Sikda, kama weik tuba abuka deice arye, ance, ‘Aning wininamlume, aning ara pia kum wininamlume,’ nyapsuluma babye, aning kekena kum aryuk, sik malye wininyak ning ara, kum bataknamake. Winipmanto ara, sik urasin ara, kat keil atonun kibuka unyaka ati, ance nyasilyam yupu pia kum kekenyake. Sik malye wininyak ning batakuka, tamubikirye, diksukum winin bisik kum banyake,” nyapse.
Sikce wininyak nang nirya ara, dipkoprob pia ninye kum winipnamting ning akunum malye wininyaka ati, sik wininyak ning ati, alye uptue bukni, sikda pia mandipna nang unyaka ati, sikda, ‘Seʼ tenen, ilil tenen ning ap, alye un ning ap, kum ubuk nang unyake. Ati, na Allah arye, sik anang wenena ati ara, sik mal olan nang arye, yuk nang obikiba, sakuka dibinyak touk, sik anang babye, obikiba, sakuka dipnamake. Narye sik anang wenepnyopura, sik nirya ara dipnamake. Narye lo arepniba, sik mal olan nang arye, sice buklopnamake.
Tonda, adeiyok nang nirya arye, “Se, nunda malye winin ning talibuka wininyap bukni, nunda dipkoprob ilil kum upsutue. Nun awininyab ning nirya ati ara, alye kum dakdanamabe,” nyabuka, mania kanye weik bonyake. Wininyaka ati ara, na Allah arye dipkoprob nyapsine. ‘'Amutuku nang wenepnamsin talak ara, anggun mutuku deiyok-deiyok nang babye, weik arye wenepnamsine. Narye lo arepnyeba, anggun mal olan nang arye, mal olyanamsiak talak ara, adeiyok nang babye obikiba, sakuka dipnamake. Anggun amutuku ululum nang ati, opsikiba saklamlum touk, sik adeiyok nang nirya babye sakiceba, amu tamuk unamake.
Nyabukura, na Yeremia birye, tamubuka Allah ati asipdese. “Se na nio, amutuku unyak nang nirya ati wenepnalam ning ap, amutuku-amutuku nirya, malye kipdeipnalam ning ap ara, yata nang arye, aning moubuka teneptingce, bikting do? Awinipnamle ning nirya ati, moubuka bikmantonye ton, aunmal do? Tonda, anda Allah Yahweh arye, awinipnalam ning ara, minop talak arye, yatanye biti laka nyaplumba, kekebukce, yanuka laka nyapsutuba, biktibye do? Yatanye birye, adeiyok ning ati, an Allah arye, amutuku-amutuku nirya, tuku malye kipdeipsiminba, pia oldemuk upnamle ning ara, laka nyapsutumura, biktibye do? Tuku malye uplyopura, tuku pum tam arye palamle ning nirya, kel-kel abuka sesal seplirye, koluplyopura, mek pia kumak, pata mutuku atonun upnamle ning ap, amutuku noutam ninye nirya ton, kum banamak ning ap, asik oldemuk upnamle ning ap ara, Allah ance yatanye biti akunum laka nyalamlumba, nunti yanuka laka nyapsutu do? Kume, ninye aryuk aning nirya, kum laka nyapsitinge.” Na Yeremia birye, Allah ati nyabuka asipdesiba, Allah Yahweh arye tamubuka nyapnuke.
‘Na nyanye yupu kekepnitinge,’ tenenamlam bukni, an kayapu Israel yala ninye ara, an nyanamlam yupu, pia kum kekenamkiyake. Ara, talye ati kume. Sikda, na Allah arye nyanye yupu babye, pia kum kekeninyake. Sik Israel ninye nirya ara, kanye tenina, kat kibuka anye arye, mandipna kanye bobuka, tatdayuk ninye unyakce, ‘Nun like,’ nyanyaka ati, na yupu babye, kekena kum unyake, nyapkine.” Allah arye Yehezkiel biti, laka nyabuk.
Anggunda, ‘Nunda, teleb weik nanguk unyabe. Allah el amu tam kum unamabe,’ tenebuka, pia kwalibuka erelalum bukni, narye anggun wenena ati, weik ikin ning ara, anggun nong deice deipsinyopura, malye kanye bobuka, ikin asa uk unamlume. Ara, narye anggunti, winibuka wenepsinyeura, adeice arye, na Allah ati biknamnulume. Ura, besi ning kum bulakmanto ulye touk, narye na kanye yuk kum tenenamne. Anggun wenena ati, ‘Mok ton pia kum cenamleʼ tenen, yupu sekdongobniba, mok pia kum cenamle. Winipnyeura, tuku nirya kelkelaplirye, atuku nirya ara, pia katauk uplyeba, yala ton, pia koupmanto kum unamle. Ara, kat ning el si tembaga atonun, anggun tuku babye, pia kat unamle.
Tonda atonun, anggun wa wibuka koulamlum noutam, mok ton kum arelamsisirye, mok pia cena kum li areamsise. Anggun wa koulamlum ning ara, wala winilye tonap, akunum uptopura, anggun wa wibuka kouamlum ning, yongobuka lilamtum bukni, mok kum arelamsisa ati, anggun wa wibuka kouamlum ning nirya ara, koululamuk. Tonda, anggun asik dobuka, ulamlum mutuku noutamak ara, ton ninye arye, wa wibuka kouamik wa win dam ara, mok arelamse. Bukni, ton aik ninye ara, wa wibuka kouamik wa win dam ara, mok kum arelamse. Winilamsiba, ton tam nang, sik wa wibuka koulamik ning ara, nong ulamuk bukni, ton tam ninye, sik wa wibuka koulamik ning nirya ara, koulunauk ulamuk.
Winibuka winilamse talak ara, ton mutuku ninye ara, mek pia patalamukce, sik nong ara, mitanguk ulamik. Winilamuka ati, ‘Se, mek diptibye’ tenen, ton mutuku nang arye, ton mutuku binuka dipdeyik bukni, pia kum boubuk. Sik mek pia tuba patanauk ulamuk. Aning nirya ara, narye anggun wenena ati, ikin ning arelamsise bukni, anggunda tuba tamubuka, na dam pia kum dobolyanganulume. Na Allah Yahweh arye nyapsine.
Allah Yahweh arye, nabi Sefanya dam yanuka nyabukba, nabi Sefanya birye nyabuk yupu ara, ani. Se, anggun amutuku noutam ululum nang nirya ara, anggun malye winimunye ning ati, alye dakalana ap, ilil tenen ning ap ara, pia kum usulul nang ululume. Anggun nirya ara, neika bulupmunce, ayupu kekebuka nimalyap arye, moubuka biknamlume!
Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.
Tonda, anggun wenena ati, na Allah arye dou mana li arepsisiba, tuku ap, amutuku dup deice nirya ara, tuku akunum sesal sepropsuke. Ara, wini talak babye, aminyan doyanamle talak babye, anggun kouamlum yakong atonun ning, el si ara gandum, wa wimunyak ap, anggur wa win dam ap, zaitun yo duk wa win dam ap, tonda el biyuk tuku deice arye, palamle ning ayala-yala nirya ap, tonda ninye nirya ap, talye kam ulamak ning ayala-yala nirya ap, tonda ninye arye talibuka, winilamlum ning ayala-yala nirya ara, kum kipdeipnamsile. Anggun wenena ati, aning-aning nirya, malye kipdeipnamsine. Allah arye, Israel ninye ati, nyabuk.
Na kayapo, anggun kan-kan bukni, ton ninye arye, wini talak mambul yupu nyasilinye ati, ‘Nun like’ tenen, el ap, el nyasilye yupu ap, ati batakuka, ‘Kum kekebicak’ tenen, moubuka kalekelanamlulume. Ura, teneipdelulume. Minop talak ara, sik deiyoknye, talye tukwaknye birye, “Winina meme. Anggun kanye mouplulume,” nyalamukba, sik kum kekelamik ninye ara, kum lyepdanmanto ulamikba, Allah arye sik kum kekelamik ninye wenebuka oltakalamuk. Wini talak ara, im deice ululnye birye, nun nirya ati, “Winina meme. Anggun kanye mouplulume,” nyabuka wenesulula anya arye, sik minop talak ulamik ninye kum lyepdanmanto ulamika ati, wini talak arye mambul yupu nyasilinye batakipyopura, nun yata wiriptibya deice arye, lyepdatibye do? Kume, aning ara, kum winipmanto. Wini talak im deice arye nyasilinye batakipyopura, dipkoprop Allah arye aninye wenebuka oplopnamle. Aning ara, kum namin kipnamle.
ကြော်ငြာတွေ