Dipkoprop teleb ninguk winipminyopura, narye kanye deibuka, ‘Telebe’ kum tenepnamakin do? Bukni, teleb ninguk kum winipminyopura, kanye moupnulyame. Malye winina deiyok ning, mining dam upmakile. Isa Mutuku Dongonye arye, tonok aik pum bukmace ninye ati, ‘Se, aninye malye kipdeipnune’ tenen, pia patapliba, bublan dam bukuka, pia kalikuka dilamle touk, malye kipdeipmanto akunum upmakile. Bukni, an adiparyuk malye kibuka, amalye una ara, bataknulyame,” Allah arye nyabuk.
Yeremia 3:12 - Eipomek12 Allah Yahweh arye, ayupu ara, na dam yanuka nyapdeipnuke. “Ance Israel mutuku nang, kekenak binuka nyapnamlyame,” nyapdeipnuke. Ayupu ara, ani. Se, Israel nango, pia ikin kanye bobuka kum ululum nang ati nyapsine. Tamubuka na damuk yanamlume. Nara anggunti, pia bico tenenanye unune. Tonda, anggunti tuba yu pia kum teninamsine. အခန်းကိုကြည့်ပါ။ |
Yeremia 3:12
45 ပူးပေါင်းရင်းမြစ်များ
Raja Pekah bira, Israel tam ninye taleamuk talak ara, Samaria mutuku noutam ulamuk talak, Asyur mutuku ninye talibuka, ninye deiyok ulamuknye, Raja Tiglat-Piliter, elce, Naftali yala nang ulamik mutuku ap, Gilead yala nang ulamik mutuku ap, Galilea mutuku ap, malye kibukce, sik mutuku tuku nirya yanuka alupdobuk. Tonda, ‘Israel tam unyak ninye opnirye, sirya daknamne,’ tenebukce, sikti, olyayuk talak ara, elce alubuka doprobuk mutuku si, ton ning ara, ani. Ara, Iyon asik ap, Abel-Bet-Makha asik ap, Yanoah asik ap, Kedes asik ap, Hazeron asik ap, winibuka anyasik-anyasik ap, sik mutuku nirya ara, malye kibukce, binuka alupdobuk. Winibukce, amutuku-amutuku noutam ulamik ninye nirya ara, tomobuka tapu koubukabukce, ‘Sikda na ikin pil dipniba, na piluk donamniyakʼ tenen, Asyur mutuku wenen asik bobinuka deibuk.
Ati ara, Allah Yahweh arye, sik ulamikak ara, pia moubuka kum kaliklamukce, ‘Sikda na dam ton kum unamake. Bataknyopura, sik yukakuk unamake,’ tenelamukce, lo ton kum areamukba, sik Asyur tam nang arye, yanuka obuka sirya dakik. Winibika deice arye, ‘Sik aninye teleb mutuku unamakʼ tenen, areamuk mutuku noutam ara, bobukabukce, donokuk. Ara, min talak, Allah el yupu nyapdeiamuba, kekebikce, el yupu laka nyalamik nang, sik nabi-nabi nang ara, sik deice wenen yupu nyapdeiamukba, sikce Israel ninye dam yanuka, laka nyalamik bukni, aning kum kekelamikba, ayupu nyapdeiamuk touk ubuk. Ara, “Israel ninye anggunce, na nyapdeiamsise yupu moubuka kum talipmunyopura, anggun dengna ati ara, anggun nong deice ikin ning yaliba, dopropnamlume,” nyaibukba, nabi nang arye, laka nyalamik touk winibuk. Ati ara, Israel mutuku ulamik ninye ara, Asyur mutuku yu weik nang arye, tomobuka tapu koubukabikce, sik mutuku tamubuka, wenen aik dongona ati, Asyur mutuku bobinuka delilbiyik. Abobinuka delilbinamikak ara, aulamik touk, abuku sekmap talak babye, tuba aunamake.
Aninguk apia winilamuka ani, aminyan talak yayuk keting tamun ara, Samaria mutuku ulamik ninye ati, obuka malye kibuk. Ara, Raja Hosea birye, ninye deiyoknye kibuka, Israel tam taleamukce, mapnin balamuka ani, keting tamun toupne barye (9) kibukura, Asyur mutuku Raja arye, amutuku noutam binuka, alubuka doprobukce, el ap, el yin talin nang ap arye, amutuku ulamik ninye nirya tomobik. Anyasik nirya doprobikce, Israel tam ulamik ninye nirya tomobuka, tapu koubuka, sik bidaman mutuku Asyur mutuku bobiyik. Raja Salmaneser birye nyapdeibukba, el yin talin nang arye, Asyur mutuku noutam bukni, Israel ninye bokukabikce, ton tam ninye ara, bokuka Hala mutuku noutam delilbiyik. Ton tam ninye ara, Gozan mutuku noutam bukni, balamuk mek si, Habor mek lilun dam delilbiyik. Ton tam ninye ara, bokukabikce, Madai mutuku asik dobuka, ulamik mutuku dam delilbiyik.
Israel ninye bokukabikce yuk-yuk ulamik talak ara, tonoknye el si Hosea birye Israel ninye bukni, eitam mutuku ulamik ninye taleamukce sik Raja ulamuk. El li koproba ara, Ela ulamuk. Atalak ara, Hosea birye Israel ninye eitam mutuku ninye taleamuka ani, keting tamun winilye akunum ubukopura, atalak arye, deiyok koubuka Yehuda mutuku noutam, outam ulamik ninye, sik ninye deiyoknye Raja Hizkia ulamuk. El li koproba ara, Ahaz ulamuk. El lin bira, Zakaria el kilmu Abia ulamuk.
Anggun tamubuka, Allah Yahweh el dam yatumce, elce, “Wininamlume,” nyasilye touk, umunyeura, teleb uptume. Winiptum toura, anggun kayapu nang ap, anggun mapu ap nirya ara, anggun mal olan nang arye tapu koubukabikce, tomobuka wenen aik dongobikak, unyak nang nirya ara, abobinuka deibik nang, sik talima Allah arye pil doptuba, sikce tapu koubik nang ati, bico uptuba, tamubuka lopdeipsitingba, sik mutuku tamubuka asukumuk yanganamake. Anggun ni Allah el si Yahweh ara, ninye ati bico teneplirye, nun melina ati, teleb kilina deiyoknye ulule. Anggunce Allah el dam yatumura, elce anggun kum bataksutue. Dipkoprop dopropsilirye, melinamsile.” Raja Hizkia birye nyapdeibukba, ayupu nirya ara, surat deice arye sekik.
Bukni, Allah ati ilil upliba, el amu tamuk ukirye, elti, talinyak ninye ara, aninye ati ara, Allah el si Yahweh arye, sikti, bico tuba tenepsilirye, melisulule. Allah Yahweh arye, “Weik tonun bico tenesinirye, pia teleb kipdeipnamsine,” nyabuka nyalin yupu deice, “Winibuka aning arenamsine, winibuka wininamsine,” nyalamsulul ning nirya ara, pia kum batakalule. Ara, aning-aning min kum kwepdeiamuk talak arye, dipdongobuka, wini talak ap, tonda, dounamle talak ap ara, pia ati, bico tenepsilirye, teleb kilinamsile. Tuba-tuba aninguk, nong kibuka teleb kilinamsile. Tonda, aninye arye deibikiba, dadeipdanin banamak mapu babye, Allah arye diksukum kibuka melimsilirye, sikti, teleb ulinamle. Aninye ati, pia kum bataknamle.
Allah el si Yahweh arye, ninye nirya ati, kanye talima arisiliba bico tenenanye ulula anya arye, nun malye wininyap ning ati, adiparyuk wenebuka oplopsutu bukni, minopce yu upliba, kum wenesulule. Aning kum bukni, weik tonun bico tenepsilirye, ‘Winibuka teleb kipdeipnamsine,’ nyabuka, nyalin yupu deice arye nyasilye yupu nirya ara, aninguk dipkoprob, tuba-tuba winisulule. Elce nunti, weik tonun bico tenesulul ning ara, nukmanto kum ulule.
Allah Yahweh, anda tukwak ninye nirya ati, weik arye kanye talima arekiliba, bico tenenanye ulyame. Ati, nun malye wininyap ning ati ara, adiparyuk wenebuka oplopsutum bukni, an adiparyuk, minopce yu tenebuka, kum osilyame. ‘Malye wininyak ninye arye, sik malye winin ning batakikirye, na damuk tamubuka yatinge,’ tenesilyame. Ance nun tukwak ninye nirya ati, bico tenesimince, pia tuba-tuba melisiminye ning ara, pia kum batakasilyame. Ance tenelamsulum touk, asum-asum nirya, pia melisilyame.
Ati ara, nun ni Allah Yahweho, yata sum arye ton, nun malye ulamupu ning ati, yu upkiliba, ‘Anang ati, na likʼ tenen, wenepnamsilam do? Anda pia, malye kanye bonamsilam do? Ance, ‘Na tenen ninye, Israel nang arye, yuk talye ning ati, Nun ni,’ nyabuka, si erelamika ati, weik uku buk dilamle touk, an yu weik upkiliba, pia malye kanye uk bobuka, wininamsilam do?
Bukni na ni Allah, na kele, anda aning-aning nirya talimince, tenesimince, deice tam erebuka, mikip weiknye ulyame. Bukni, nun malye winin ning ati, adiparyuk oplopsutum buk, namin kinauk usilyamce, telebuk kilisilyame. Tonda, nun malye wininyap ning ati, minopce yu kum tenesilyame. Tonda, ance, ‘Weik tonun pia bico tenesimince, pia teleb kilinamsine,’ nyabuka, nyalin yupu deice ara, weik tonun nyasilyam ning nirya ara, batakna kumce, pia teleb kibuka kilisilyame. Tonda, ance, aning nirya ati ara, narye, ‘Winipnamsine, winipnamsine,’ nyabuka, nyasilyam atonun kibuka, pia tuba melisilyame.
Narye an Allah Yahweh ati, ‘Melibuka lyepdopnilyame!’ nyabuka, morokununa deiyok ara, ani. Ara, anda aning-aning nirya talimince, deice tam erebuka, mikip weik deiyoknye ulyam bukni, ance kanye deipsimince, nun malye wininyap ning ati, namin kipsimince, kum danalilyame. Anda pia telebnye ulyama atia. Tonda, yata ninye do nirya, sikce antibuk, ‘Naio, ancuk melibuka lyepsilyame!’ nyabuka, morokinyak nang ati, lyepmince, pia teleb kililyame. Tonda, anda, ‘Weik tonun bico tenesimince, pia telebuk kilinamsine,’ nyapdeiamsulum yupu ara, weik tonun nyasilyama ati nyapkine.
Yata ninye do nirya, ‘Nun malye ulamupu ning, yuk nang arye kel biksicak’ tenen, sik malye winilamice ning kum batakikirye, tuba malye winin ninguk dungnubuka ulamice ninye ara, aminyan talak teleb kum upnin banamake. Bukni yata ninye do nirya, sik malye ulamice ning nirya ati, ‘Na malye winipse ning ara ani,’ nyabuka, laka arye laka nyabikirye, amalye un ning bataklamaka ninye ara, Allah arye sik malye unyak ning ati, aninye adiparyuk wenebuka oplomtu bukni, bico teneplirye, sik malye unyak ning nirya kum kipdeiplirye, aninye ati melibuka teleb ulinamle.
Na Allah arye nyapsine. Se anggun Israel ninye ara, ‘Naʼ tenen, ninye tenesenun bukni, anggunda na yupu bisibuka malye weik winipmunce, nati yaninululume. Bukni, wini talak ara tamubuka na dam anyuk yanululume, nyapsine. Narye anggun Israel ninye ati pia bico tenesununa ati, ‘Na dam tamubuka yanululume,’ nyapsine.
Ati anggun malye ululum ning nirya yamubuka dopropniba, dua balamle atonun upnamle. Tonda, kumanya mikip arye pubuka dopliba, dua yukak bobalamle touk, anggun malye winilulum ning nirya yukupdopnirye, kum kipdeipniba, anggun dam kum unamle. Anggun malye winilamlum noutam arye, dekuka lopdeipsisirye, lyepsisa ati, na dam tamubuka yanganamnulume.” Allah arye Israel ninye ati nyabuk.
Ayupu nyabukura, narye tamubuka Allah Yahweh ati, ‘ “Naio, diba anyapmasilam atonun, winipnamsilamʼ tenen, anti, ‘Telebe,ʼ nyabuka, moropkiyabe!” nyapse. Nyapseura, Allah Yahweh arye, na Yeremia ati, tonap ayupu nyapdeipnuke. “Narye nyapnukin yupu bobuka, sik Yehuda tam mutuku noutam nirya unyak nang ap, Yerusalem weik asik dobuka unyak nang ap, sik dam bimince, ‘Ayupu kekepnuyakʼ tenen, abisik-abisik nirya baminyakarye, anyapdeipnukin yupu nirya ara, sik kekenak laka nyapre banamlyame. Sik ti ance nyapnulyam yupu ara ani. Allah arye anggunti, “Aning ara wininamlume. Aning ara, pia kum wininamlume,” nyapdeiamsise atonun, dipkoprob winipmunyeura, “Narye sik Israel yala nang ati, teleb kilinamsile,” nyabuka, nyalin yupu deice arye nyapnusin yupu ara, moubuka kekeplulume. Kekeplum ning ara, adiparyuk moubuka talipmunce, wininamlume. Tonda ayupu ara, ani.
Bukni, sik Yehuda yala nang ara, narye akunum dobuka yukak deipnyopura, daulamikca ani, aminyan talak ara, narye tamubuka, Israel yala nang ati, tuba ton bico tenepnirye, sikti, lyepdopnyopura, narye anang nirya dobukapnirye, tamubuka sik mince ulamik mutuku, sikti, areyamse mutuku uk, bobinuka deipnamne. Tonoknye babye, kum bataknamne.
Minop talak ara, ayupu nyalamik bukni, aminyan talak ara, aning batakuka winiryuk yupu nyanamake. Ara, “Sik Israel ninye arye, mapu deiamikba, dadeipdanin yangalamik Israel ninye nirya ara, yuk pera mutuku daulamik bukni, Allah el si Yahweh arye, aninye lyebukce, sik mutuku tamubuka boyayuke. Ara, minop talak malye winilamikba, sik wenena ati dopdeibukba, dana-dana tam pera mutuku noutamak ap, utam pera mutuku noutamak ap, daulamik bukni, Allah lyebukce boyayukura, sik mutuku noutamakuk, teleb ubuka, pia aunamake. Allah ara, pia Kam Una Deiyoknye ulule.” Aninguk nyanamake. Tuba tonap, ‘Allah arye Israel ninye lyebuka, Mesir mutuku noutamak arye boyanamsuke,’ tenebuka kum nyanamake.
Allah Yahweh arye Nyabuk. “Winipmanto, sal tonok ton, kil akunum domlye bukni, ‘Akil bataknun,’ teneplirye akunum batakalule. Winibuka bataklyopura, akil yuk nang doprobikceura, min domlinye birye, tamubuka kum doproptue. Aning winina ara, amutuku nirya malye uptue. Israel nang, yuk kilapu ati weik tonun moun dilalumce, ubula yolalamlum ati ara, wini talak na Allah dam tamubuka yatum do? Aning ara kum winiptume.” Allah arye nyabuk.
Allah Yahweh arye nyabuk. Se, na mapuo, anggun nirya pia malye ululum nang, tamubuka na dam yanamlume nyapsine. Anggunda ‘Naʼ tenen nang ululume. Narye Anggunda tamubuka boyanamsine. Ara, weik asik dobuka unyak mutuku noutam arye, ninye tonok ton dopropnamne. Tonda, tonok yala nang ulamikak arye, ninye bitinye nang dopropnamne. Winipnirye tamubuka, Sion mutuku konuk yanuka bodeipnamsine.
Atalak ara, Yehuda yala nang ap, Israel yala nang ap, epdanuka neika tonok unamake. Tonda, outam dabu mutuku bobuka donokamik nang babye, tamubuka yakceura, neika tonok unamake. Sik anang nirya ara, narye sik apu yapu ati, areamse mutuku uk tamuyanuka deipnyeba, sikce amutuku pia talibuka, sik mutuku koproba, kibuka unamake.
Se, anggun nirya, Allah dam akunum bataklum nang ara, tuba tamubuka, el damuk yanamlume. Elce anggun teleb kipdeipsilirye, malye ning nirya ara, lyepdosilirye, kum kipdeipsilyeba, el yupu moubuka talipmunce unamlume. Winipmunyopura, anggunce nyanamlume. “Diba, winida nun akunum tamubuka, Allah Yahweh, el dam yayabe. Ati, dipkoprob elda nun ni koproba Allah,” nyanamlume.
Na tenepse ara, ‘Apil nirya dolamlya ani, akunum bataklyopura, tamubuka na Allah dam yatue,’ tenepse. Bukni, tamubuka kum yaturye, tuba pia talye yolamak kil atonun ulule. Adeiyok ara, narye elti, dona kumce bataknirye, el akil ati, “Anda bilyame!” nyabuka yakdoknamle. Aning winipnyeba, Israel yala nang, sik kwit Yehuda yalanye, el babye, aning eipnamle bukni, ilil kum upnamle. El babye tuba, pia talye yolamak kil atonun ulule.
Aning ara, talye ati kum nyapsin bukni, deiyok ara, naryuk anggunti yanuka lyepropsinirye, anggun ap neika unamabe. Narye anggun wenena ati, yuk-yuk mutuku noutam yakuka, dopkwetcamsise mutuku nang nirya ara, wenebuka opnyopura, sice buklopnamnarya! Bukni, anggunda, na mapu koproba ara, ‘Naʼ tenen nang ululuma ati, tuba tonap yakuka donoknyeba, yuk-yuk mutuku noutam, kum binuka unamlume. Anggunda, pia ati amutuku uk unamlume. Winipnamsin bukni, anggunce minop talak malye-malye weik winilamlum ning ati ara, dipkoprob wenepsinirye, deken ning arepnamsine. Dipkoprop anggun malye winilamlum ning ara, talye Luba kum kipnamne. Amalye winilamlum ning ati, ‘Daupmalye,’ kum nyaptinye. Aning kum bukni, anggun malye winilamlum touk, anggun deken ning ton, wenebuka arepnamsine. Bukni, winibuka wenepsinirye, tamubuka teleb kipdeipnamsine. Narye anggun Israel nang ati, kume kum daneipnamsine. Ayupu ara, na Allah Yahweh arye akunum nyapdeipsine.
Nyabukce, ayupu ton nyabuk. “Israel ninyeo, anggunda na tuba bico tenesunune. Anggunda, pia na kanye deilin ninye ululume. Anggun wenena ati, ‘Na dam tamubuka yanamlum do?’ tenen, ikin weik ning, anggun nong deice deilisunun bukni, ato ning babye, narye anggunti, tuba bico tenesunune. Anya arye, narye anggunti, pia bico tenesunune. Anggun malye winilulum ning ati, talye lukparabuka opsitinya bukni, anggunti tuba bico tenesununa anya arye, obuka sirya kum daknamsine.” Na Allah Yahweh arye nyapsine.
Nyabukce, ayupu ton nyabuk. “Anggun balamunye bisik nirya ara, lak lelin ning ati, yo bata cepdeipnamlume. Winipmunce, anggun minop talak yangalalum bisik ara, ‘Dan bisik arye yanamupu do?’ tenen, moubuka teninamlume. Ara, aning moubuka kel bikamunyopura, anggun Israel ninye nirya ara, na kanye deilin kil atonun ululuma anya arye, anggun minop ulamlum mutuku uk tamubuka, yanuka unamlume, nyapsine.”
Na Allah Yahweh arye nyapne. Mutuku sirya utam daunyak ninye ap, mutuku sirya, im sirya, dana-dana tam daunyak Israel ninye nirya ap, tamubuka boyanirye, sik nirya bulubuka, tonok sukumuk deipnamne. Sik Israel ninye dobuka boyanganye talak ara, talye ninye ap, yok malye nang ap, asing kun nang ap, tonda mi kabul kum deipmakce kilapu bukni, mun pum bomice kilapu ap, sik nirya melibuka boyanganamne. Neika yanganamake. Winipnamak talak ara, amutuku noutamak, ninye yupa pia weik upnin banamake.
Aning atonun, na mapu koproba, Yakub birye deiamukba, dadeipdanin banamak nang ap, tonda Raja Daud birye deiamukba, dadeipdanin banamak nang ati, ‘Winipnamsine,’ nyapdeiamuk yupu deice nyapdeipsise ning ara, punubuka kum bataknamne. Ayupu babye, pia talipnamne. Ati, Raja Daud birye deiamukba, dadeipdanin banyak nang kan-kan arye, tonoknye Raja wipdeipyopura, na mapu koproba, pia talipnamle. Ara, sik apu yapu mambul weik nang, Abraham ap, Isak ap, tonda Yakub ap, sikce deiamikba, dadeipdanin, banyak nang nirya ara, Daud el tamnye birye, pia talipnamle. Deiyok ara, narye na mapu koproba ati, bico tuba tenenune. Sik malye winilamik ning ati, adiparyuk wenebuka optinye bukni, aning kumce, na kanye aryuk, bico tenepnirye, sik malye ning namin kibuka kilipnamnarya. Winipnyopura, na mapu ara, telebuk kipdeipniba, minop talak, pia teleb ulamik touk, tuba tonap, telebuk kipdeipniba, telebuk unamake.
Allah arye, el mapu koproba Israel nang ati, nyabuk. Anggunda, nun ni Allah dam tamubuka yanuyabe,’ tenepmunyopura, adiparyuk yanululume. Winibuka yanamlum ning ara, Anggunda min talak arye, talye-talye ning ati, Nun ni Allah,” nyabuka, si erelamlum ning ara, na yu unulule. Ati, anggun adiparyuk aning batakmunce, tamubuka yamunyopura, natibuk moubuka talipnumunce, na siuk erenamnulume.
Nara, ton ap tenenun ning ara ani. Ara, Allah elce tuba nunti pia bico tenesulule. Tonda, Allah elce nunti, “Winipnamsine, anggunce na yupu talibuka upmunyeura, narye anggunti winibuka-winibuka teleb kipdeipnamsine,” nyabuka, nyalin yupu deice arye nyapdeipsuk ning nirya ara, kum bataknamle. Aning nirya dipkoprob nong upnamle. Allah arye, ‘Na tenen nang ati ara, tuba telebuk kipdeipnamsine,ʼ tenesulul ning ara, min kum winipmanto. Aning ara, pia ati aunamle.
Ati ara, an Yeheskiel birye, nyabuka lak nyanamlyame. Nara, Allah Yahweh, aning-aning nirya talibuka, pia deice tam erebuka, Pia Mikip Weik Deiyoknye unirye, nyapsine. ‘Naʼ tenen, nang, sik Israel yala nang nirya ara, anggun yuk pera mutuku noutam, bobinuka deipyamsise nang ara, wini talak narye, sik anang nirya, yuk-yuk mutuku aulamlumak arye bulupdeipsine. Anggun tuba kam ululum Israel yala nang bobuka, anggunti areamsise mutuku koproba, Israel mutuku noutamuk yanuka, tamubuka deipnamsine.
Nyapminyopura, an Yeheskiel birye, sikti, ayupu ton tabakuka nyapnalame. “Na Allah ara, dipkoprob pia kam unune. Aning ara, dip ulamle touk, adeice arye, adipkoprop yupu ton nyapsine. Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Sik malye wininyak nang ara, sik tuba malyeuk unyak talak aryuk, dekenyak nang ara, na kanye kum delinune. Kanye teleb unulul ning ara, ‘Sik malye unyak nang arye, sik malye winin ning ara, bataktingirye, tamubuka na dam yakirye, teleb aryuk ubikirye, kam unamakʼ tenen, kanye deibuka teninune. Ati ara, “Se, anggun Israel yala nango, anggun tuba malye winilulum ning ara, adiparyuk batakmunce, tamubuka na damuk yalulume! Yata ning deiyok ati, malye winipmunye deice aryuk, anggunda dipnamlum do?” nyabuka laka nyapnalame.
Ati ara, nara Allah Yahweh, aning-aning nirya talibuka, deice tam erebuka, pia mikip weik ununye birye, ayupu nyapsine. Wini talak ara, narye sik Israel yala nang, sik pununanye Yakub birye deiamukba, dadeipdanin yangalamikce, aunyak nang ati, bico tenenamne. Winibuka tenipnyopura, anang mince pia teleb ulamik touk, tuba ton ap teleb kipdeipnamsine. Tonda, Israel yala nang nirya ara, sik malye ulamik ning ati, adiparyuk sik dekena ati, wenebuka optinirye, sirya dakmatinye bukni, aning kumce, bicoe tenepnirye, sikti, tuba tonap telebuk kipdeipnamne. Sik nirya ara, telebuk unamake. Tonda, ‘Tukwak nang arye na ap, na si ap ati, malye nyapninyakʼ tenen, na pia teleb ununa ap, na pia lek si ati, moubuka tenipnirye, kaliknyopura, sikce na si ati malye kum nyapnamniake. Na siuk pia erenamniake.
Nabi Hosea birye, sik Israel ninye ati, nyabuk. Ara, na kayapu, anggun Israel ninye ati nyapsine. Wini talak ara, nun nirya arye, nun malye wininyap ning batakuka, tuba tamubuka, nun ni koprop Allah Yahweh, el damuk binuyabe. Nun malye wininyap ning wenena ati, weik arye wenyamsuke. Bukni, nun malye wininyap ning batakibirye, el dam tamubuka bibyopura, Allah arye kanye deipsilirye, kwetelinamsile. Tonda, nun wenena ati, pia kanye imun weik suse areamsukba, suse dilamsuk ning nirya babye, elcuk suse kweten ning arye likdongobuka, kitipdongopnamsile. Winipsilirye, nun suse kwetelinamsile.
Ura, anggun malye-malyeuk ulamlum ara, arup nyapmakin ning atonun, ikin ning weik, anggun wenena ati wininamsine. Winibuka wenepsinyeura, daulamunya ani, doyanamle talak aning nirya tamubuka, tonap moubuka tenenalume. Ara, sik punun deiyok nang, sik minop talak ulamik nang arye, malye winilamik ning ap, sik anang arye delilamikce, dadeipdanin yangalamik nang ap arye, malye winilamik ning ap, ura, anggun anoutam talak babye, malye wininmalum ning ap ati, ‘Se, nun nirya ara, dipkoprob pia malye weik tonun winilamupu ati, wini talak ara, nun ni koproba Allah bikeipsilirye, nun malye winin ning nirya kum kipdeipsutue,’ tenenamlume. Tonda, aning atonun tenelamlum ning ara, anggunce na yupu yanibuka, mandipna kanye deibuka ulamlum ning ap, anggunce, ‘Kume, Allah ara, nun like,’ tenelamlum ning ap nirya ara, lak sukum arye laka nyanamlume. Aning nirya, tamubuka tenebuka bikinamlume.
Anggun wini talak ululum Israel nang ara, anggun apu yapu minop talak ulamik touk, kum unamlume. Minop talak ara, narye nabi-nabi nang dopdeipsiba, sikda, narye, ‘Winipnamlume,’ nyapdeipse yupu ara, anabi nang, sik apu yapu dam binuka laka nyalamik. Ara, ‘Narye im deice unyak yin talen malaikat, sik weik deiyoknye kibuka ununye birye, na Allah arye nyapsine. Wini talak ara, anggunce pia malye weik winilulum bukni, aning nirya batakmunce, na Allah dam tamubuka yamunce, diksukumuk wininamlume,’ Nyapdeipse bukni, sikce ayupu nyapdeiamse ning ati, ‘Nun like,’ tenelamikce, dipkoprob kum winilamik. Ati ara, na Allah Yahweh arye nyapsine.
Anggun ap, anggunce deipnamlum mapu ap, ‘Nun ni koproba Allah, el si Yahweh, el dam tamubuka bibirye, elce nyapdeiamsuk ninguk, talibuka aninguk wininamabe,’ tenepmunye ning ara, anggun kanye talima nirya ap, anggun nong ap, Allah el deiceuk deipnamlulume. Ara, narye arup arye, ‘Wininamlulume,’ nyapmasin touk, Allah arye nyapdeiamsuk ning, moubuka kekepmunce, aninguk talibuka wininamlulume.
ကြော်ငြာတွေ