Allah arye, Israel ninye ati, bico tenebuka meliamuknye bira, nati nyapnuke. Ara, mutuku yangan keil lelilamsil touk, Allah arye Israel ninye ati, pia melibuka kaliklamuk. Elce nyapdeipnuke. “Yatanye do, Allah ati, ilil ulya deice arye, ninye talina deiyoknye kina ati, malye winina kum aryuk, pia diksukum ulamlirye, Raja ululnye bira winilule.
Yeremia 22:3 - Eipomek3 Na Allah Yahweh arye, anggun nirya ati nyapsine. Anggunce, yuk nang sik dam ara, diksukum teleb piluk donamlume. Ara, narye, ‘Aning wininamlum. Aning ara, pia kum wininamlume,’ nyapdeipsise yupu atouk winibuka, pia diksukumuk wininamlume. Tonda, ninye yupu bokolin talak ara, dipkoprob sik winilamak touk bikmunce, teleb kibuka yupu nyapmunce, wenepnamlume. Talye-talye winina kume. Mikip unyak nang arye, anggun amu tamuk unyak nang ati, ikin ning, sik nong deice deibikcopura, anggun deiyok nang arye, aikin unyak nang ati, lobuka melipmunce, lyelinamlume. ‘Teleb mutuku noutamuk uptibyeʼ tenen, yuk mutuku arye, anggun mutuku yanuka, tikilyangan nang ap, tonda winiryuk nenmace nang ap, yuwak kilapu ati, ‘Sik ning alubuka doproptibyeʼ tenen, pia kum moronamlume. Tonda, ‘Anang ati, yanipdongobuka optibyeʼ tenen, sik dam ikin ning kum delinamlume. Tonda, yata nang do nirya, sikce deiyok kum ati, malye kum winipmace buk, anggun deiyok nang arye, anang ati, talye lukparabuka, kum opnamlume. Sikda, malye kum wininyak nang ati, amutuku noutam arye, ninye kum onamlume. အခန်းကိုကြည့်ပါ။ |
Yeremia 22:3
49 ပူးပေါင်းရင်းမြစ်များ
Tonda, Raja Manasye birye, weik malye uamuk ning ara, sik malye kum ulamikce, talye kanye bobuka ulamik ninye, Yerusalem mutuku noutam daulamik ninye, weik tonun obuka, batakamuk ning, deken ati ara, Allah arye, lo arebukba, sik pera mutuku yu nang arye yanuka, Yehuda tam ulamik ninye yakuka, dokwetebik. Allah Yahweh arye, Raja Manasye birye, Raja kiamuk talak noutam arye, malye ulamukopura, ‘Luba kipnirye, kum lyepnamne,’ tenebuka ati, Yehuda tam ulamik ninye nirya ara, adiparyuk batakuk.
Tonda, pia malye winin nang arye, sik ni ap, sik nin ap, pia kum ulamdiceba, kwaknamne mapu ara, alubuka dolonyake. Ara, yuk kilapu arye, kwaknamne mapu ati, moum yung tuba arebice talak ara, mikip arye amapu dolonyake. Tonda, aning-aning kum talenyak nang, talye bona utotoa kum nang arye, yo bok pataplyopura, malye nang dam binuka, “Tia ati arepsutume,” nyabuka morobikiba, arebikcopura, dolonyake. Bukni, aminyan talak, sik bona utotoa kum nang, ayo bok tamubuka arepmanto kum ubikcopura, sik malye winin nang arye, sik mitik mapu ara, alubuka dolonyake. Ara, sik ning doprobicopura, abona utotoa talina kum nang arye deibikce mi ara, aning pununa ati, alubuka dolonyake.
Anggun Israel yala nang nirya ara, Allah ati, “Anda pia teleb ulyame,” nyabuka, mot deice arye, el siuk erenamlume. Ara, im deice arye, dua deice bukuka banmalanye, nun ni Allah ati, kanye lon mot nyamunyak arye, el siuk erenamlume! Nun ni koproba Allah, el si ara, Yahweh ulule. Ati, Allah Yahweh el dam yamunyopura, kanye deibuka unamlume.
Tonda, anang arye, ‘Sik teleb ninguk talibuka, diksukumuk wininyak nang ara, yanibuka opnamabe,’ tenebikirye, tonok kong bulupdeibikirye, anang arye neika olbanyake. Winibikirye, ninye yupu lipsisikuka bokolin talak ara, amalye wininyak nang arye, deiyok kum upmalibuk, yuk teleb wininyak nang ati, “Malye winipmaka ati, adiparyuk anang opnamabe,” nyabuka, tilila yupu nyabikirye, onyake.
Ninye asik nang, anggun dam aunamak nang ati ara, ikin ning pia kum delinamlume. Aning kum bukni, melibuka umunce, anang ati, diksukumuk unamlume. Awinamluma deiyok ara, ani. Ara, anggun Israel nang babye, Mesir mutuku noutam ulamlum talak ara, anggun babye, ninye asik nang atonun ulamlumba, Mesir mutuku nang arye, anggun nong deice ikin weik delilamsikce, malye kililamsika ati, nyapsine.
Anggunda minop talak arye, ‘Aninye sik teleb tuku ani, yuk ninye sik wa wiliba tuku ara ani’ tenen, keil dobuka, tuku ati wilibuka ikdongamik keil ara, dobuka yuk tam donokna pia meme. Tonda sik kwangnamne mapu ati arelamik tuku noutamak binuka wa wena kume. ‘Amapu ara, mikip kum mapu anya arye, sik tuku ubula doproptibye’ tenena pia meme. ‘Sik kwaknan mapu, atuku noutamak wa wibikirye, kounamak’ tenen, kintinibuka deiamik mutuku noutamak ara, anggun wekna pia kume.
Tonok ning ara, kanye talima erelakirye, ‘Yuk nang ara, nunti, sikda pia weik nang tenesinyake,’ tenelakirye, anang sik asing erebukabikirye, ninye kisok dup-dup diprebakiba, Allah el lik ulule. Bitinye ning ara, sitang deice arye tilila yupu nyanyak ninye ara, Allah el lik ulule. Winilye ning ara, deiyok ning ton kum upmalibuk, ninye sik taruk deice arye, oltakanyak ninye ara, Allah el lik ulule.
Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.
Na Allah arye anggun Israel ninye ati nyapsine. Anggunce nati, ‘Elce melipnamsil’ tenen, din dina kumce si tebuka umunce, teleb winipmunyopura, aning ara, mitik teleb bukni, dipkoprob pia teleb unamlum tenepse ning ara atia. Mikip nang arye yuk talye nang ati, deiyok kum wamlibuk, yu ubikirye tapu koubuka delinyak ninye ara, ‘Anang ati bico tenepmunce anang loltakanamlum’ tenen nyapsise. Tonda aninye ara deiyok kum wamliba, rantai tapu arye tapu koubuka, wenena aik dongonyak ninye ati, ‘Anang ati bico tenepmunce, loltakanamlum’ tenen, nyapsise. Tonda mutuku-mutuku nirya talibuka unyak weik deiyok nang arye, sik amu tam nang nong deice ikin ning delinyak ning ara, kum danaipmunce, aninye ati lobuka melipnamlulume. Winipmunyopura, na Allah arye anggunti kanye delinamsine. Talye kanye deibuka, din dina kumce si tebuka una ara kume.
Tonda, ‘Teleb unamlum’ tenepse ning ara, atia. Anggun din ning aupmasilyopura, bokukapmunce sik din kum nang ati bokuka arepnamlulume. Tonda, bona utotoa kum ati talye bisikak balsusulamak ninye ap, ninye asik nang ap ati, ‘Nun aik wekuka yamunyeba, nun ap din neika dibuka unamabe. Nun aik manna teleb uka,’ nyabuka unamlume. Tonda sik baju ongona kumce, nong banang uk ulamak nang ati, anggun baju bokukapmunce, melibuka arepnamlume. Tonda anggun kwit capu ap, anggun yala nang ap, aning-aning nirya pataplyopura, sikti, batakna kumce melibuka arepnamlume. Winipmunyopura, na Allah arye anggunti kanye delinamsine.
Awinipnamne ning ara, talye ati kume. Deiyok weik aupmale anya arye, ayupu ton laka nyapnusine. Tonok ning ara, anggun mutuku ululum ninye arye, na batakanululuma ati, wenepnamsine. Tonda, na si eren aik ap, ‘Naʼ tenen, mutuku Yerusalem ap ara, anggunce pia malye ulilulume. Ara, anggun wini talak ululum ninye ap, anggun apu yapu ap, Yehuda mutuku ninye, anggun weik deiyok Raja nang ap arye, anggun si kel bikna kumce, Isa Mutuku Dongonye si talye erena ati, kam ning obuka, arelyangalulume. Winiluluma deice arye, amutuku noutamak ara, akunum malye kipdeiplulume. Aning atouk, amutuku unyak ninye ton, malye kum winipmake buk, anggun deiyok nang arye, aninye weik arye talyeuk oltakalulume. Winipmanto ara, mek kwebikirye, weik mek makau pum bisik dikdongobikiba, mek langdiplirye, balamle atonun, ‘Naʼ tenen, mutuku noutamak ara, ninye weik olamikba, ining pia weik saklamukce, aulule.
Raja Daud birye deiamukba, dadeipdanin yangakirye, deiyok kibuka, talilulum nang nirya ara, diksukum un ninguk wininamlume. Ara, asum-asum nirya, pia pi dobuka, teleb piluk donamlume. Mikip ukirye, sik amu tam talinyak nang, sik ning dopropnamakca ati, anang ikin ning deibikirye dolonyak ning ara, anggun deiyok nang arye, teleb kibuka, yupu lipsisikmunce, amalye unyaka ara, bataknamake. Asum-asum nirya ara, ninye yupu teleb kibuka lipsisikuka bokeipnamlume. Aning tuba kum winipmunyopura, anggun amalye upmunya deice arye, na Allah ara, anggun malye tuba winimunya ati, na yu weik unulul ning ara, uku buk weik dilamle atonun unilirye, anggun malye winilulum nang ati, auku dipnamsile. Anggun tuba malye winilulum ning ati, yu weik upniliba, uku buk dilamle touk ning ara, min kume, kum danapnamle. Pia dinauk upliba, anggun nirya dibuka, sirya daknamsine.
Bukni, anda Raja Yoyakimo! An winiminye ning ara, pia urasin yuk ulule. Ance teniminya ara, ‘Kume, tilila yupu nyaptinya deice arye, aning-aning nirya ara, naryuk bona weik doproptinirye, bona talinanye uptinye,’ tenelyame. Tonda, ninye malye kum winipmakibuk, talye olyame. Winibuka ance talilyam mutuku nang nirya ati, sik deice ikin ning ap, yu weik ning ap, malye kililyame. Yuk daunyak nang ati, yaninauk winilyame!
Sik amalye wininyak nang ara, telebuk kibuka ukirye, sik nong pou weik unyake. Sik urasin babye, pia teleb unyake. Bukni, sik anang arye, malye wininyak ning ara, pia tenipmanto kum ning wininyakce, pia kum batakmanto unyake. Pia malye-malye aupto babye, sik tenepce touk, talye luparabuka wininyake. Sik anang arye, talye kwaknamne mapu ati ara, ‘Aminyan ara, amapu teleb kibuka unamakʼ tenen, diksukum kibuka, teleb winin ning arye kum melinyake. Amapu ati, yupu bokikce talak ara, diksukum kibuka kum nyanyake. Tonda, aning atonun, talye kankan uk unyak nang, aning-aning kum talenyak nang ati, yu nang arye malye winipnuce talak ara, anang arye, ‘Anggun bataksue, akankan nang ati, malye kilina kume,’ nyabuka, yupu kum sekenyake. ‘Sikda, dauplye,’ tenebikirye, yupu nyabuka, kum melinyake.
Atalak ara, narye anggun apu yapu melibuka boyangalamsirye, nyapse yupu ara, ani. Nara, anggun ni koproba Allah ununa anya arye, narye nyasinye yupu uk kekepmunce, moubuka talinamlume. Narye nyasinye yupu talibuka winimunyeura, narye anggunti, pia melinamsine. Adeice arye, ‘Anggunda, na mapu koprop unamlume,’ nyalamse. Tonda, narye anggunti, “Abisik binamlume, abisik kum binamlume. Aninguk wininamlulume. Aning ara, pia kum wininamlume,” nyabuka nyalilamse yupu, ‘Dipkoprop ninguk winipmunyopura, anggun wininamlum ning nirya ara, telebuk unamsile,’ nyalamse. Na Allah arye, anggun apu yapu ati, ayupu uk nyalamse. Winilamsi buk, ayupu kekebuka yangalamik talak ara, pia telebuk winipnin yangalamik.
Aning kum bukni, yata nang do nirya, sikce ‘E, mambul weik ning ani, mambul weiknye bira ani,’ tenenamak talak ara, sikce anyapnusin ninguk tenenamake. Tonda, tukwak mutuku, talye daulye ning nirya ati, ‘Aning ara, mambule,’ pia kum tenenamlume. Aning nirya kum bukni, anggunce na Allah Yahweh ati, diba tenepnulumce, na ap, na wininye ning ap, moubuka biknamnulum nang ara, angguncuk, ‘E, mambul weik ning ara, Allah Yahweh el uka,’ tenepmunce, aning deice aryuk, kanye pia delinamlume. Ara, anggunce na Allah ati, “E, Allah arye bico tenesilirye, elce, ‘Aning ara wininamlume, winipmunyopura, narye melisinirye, pia teleb kipdeipnamsine,’ nyabuka, nyalin yupu deice arye nyapdeipsuka deice arye, teleb kibuka melisulule. Elce winilye ning nirya ara, diksukum una ap, teleb ning winin deice aryuk, ninye yupu lipsisikuka bokosilirye, tuba-tuba melisulule,” nyaptingce, na si erepnitinge. Nara Allah Yahweh arye, anggunti pia bico tenesinirye, pia kum batakasunune. Narye, anggun tukwak mutuku sirya, im sirya nirya ululum nang ati, melisinye ning nirya ara, bico tenena ap, dip yupu nyana ap, malye winin ning pia kumce, diksukum winin deice arye melisunune. Tonda, na Allah arye, ateleb winin ning nirya ap, ‘Diksukum winin ning nirya ap ara, telebe uka’ tenen, na kanye delinune. Aning ara, na si Allah Yahweh arye ayupu nyapsine, nyabuk.
Tonda, yuk bona utotoa talina kum nang arye, anye bira el yo bok do, yuk ning do, tia talak ati doprobikirye, sik patan ning dekuka doprobikirye, dabolamica talak ara, elce sik nong deice, ikin ning weik delilule. Tonda yuk nang ati, ikin pil arukulule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniakce, tenepnamsil’ tenen, el ning dekna pununa ati, areamice ning ara, amalye ululnye birye, ubula dololule. Sikce el ning, tia talak ati dopromice ning, tuba tamubuka arebicopura, elce sik ning tamubuka kum arelule. Tonda, amalye ululnye bira, yuk nang, sik ning talye ubula dololule. Tonda, yuk nang din patana ap, baju kum ati, nong banang una ap, ulamice talak ara, elce melibuka kum arelule. Tonda, anye birye, amutuku unyak Israel ninye arye, Isa Mutuku Dongonye si erebikirye, ‘Nun ni yapu ukirye, melinamsiyak’ tenen, aisa urasin atonun ubuka memamice ning ati, el asing dilamlirye, ‘Aning ara, nati melinamnile,’ tenelule. Atonye bira, pia malye weik ulule. Ati, na Allah arye, ‘Aning ara, na pia like,’ tenenun ninguk, winilule.
Tonda yuk nang arye, el yo bok do, yuk ning do, tia talak ati doprobikirye, dabolamica talak ara, elce sik nong deice, ikin ning ton kum delilule. Yuk nang ati, ikin pil kum dilule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniak ca, tenepnamsil’ tenen, el bona ning pununa ati, areamikce ning ara, ateleb ululnye birye, ubula kum dololule. Sikce el ning tia talak ati dopromice ning, tamubuka arebicopura, elce sik ning tia talak ati, dadeiamlye ning dobuka, adiparyuk tamubuka arelule. Tonda, ateleb ululnye bira, yuk nang ning, talye ubula kum dololule. Tonda, yuk nang din patapliba, elce melibuka arelule. Yuk nang ton, baju kum ati, nong banang ulamice ninye ati, melibuka arelule. Atonye bira, pia telebnye ulule.
Tonda, anggun Yerusalem mutuku ululum nang ara, anggun ni yapu ap, anggun nin yapu ap ati, ‘Telebe,’ nyabuka, sik yupu kum kekemunce, sikti kum kanye delilulume. Tonda, ninye asik nang, yuk karin mutuku arye yanuka, anggun mutuku noutam, sik ap neika ululum nang ati, ikin ning weik, sik nong deice delilulumba, ‘Seʼ tenen, imun kanye bobuka unyake. Tonda youwak kilapu ap, sik ni yapu dibikba kwaknamne mapu yanuka unyak mapu ap ara, anggun dam unyak buk, talye yupu nyaplopmunce, kum melilulume. Batakalulume.
Ura, nara, Allah Yahweh, aning-aning nirya talibuka, deice tam erebuka, mikip weik ununye birye nyapsine. “Ara, anggun ninye deiyok nang, Raja-Raja nang arye, malye-malye winilulum ning ara, akunuma. Anggunce malye-malye winimunye ning ara, bataknululume! Se, sik Israel nang, anggun deiyok nango. Anggun amu tam unyak nang ati, olana ap, yu uplyeba yupu arye malye nyalulum ning ap, ikin ning, sik nong deice delilulum ning ap, awinilulum ning deice arye, sik kanye dakalsakasulule. Ati, aning nirya ara, adiparyuk bataknululume! Aning ara, batakmunce, pia teleb diksukum un ninguk wininamlume! Tonda, narye, ‘Wininamlume, aning ara, pia kum wininamlume,’ nyapsise touk, pia teleb ning ati wininamlume. Aning atonun, tuba-tuba ‘Naʼ tenen nang, sik tibuk, sik unamak tuku noutam arye, tuba kum yakalkwetenamlyame. Aning babye, bataknulyame! Nara, Allah Yahweh, aning-aning nirya talibuka, deice tam erebuka, mikip weik ununye birye, anggun ninye deiyok nang ati, akunum nyapsine.
Bukni, aning nirya winipnamle talak ara, Mesir mutuku nirya ara, mutuku patauk kiploplirye, tuku nirya babye, mikdopnamle. Tonda, Edom mutuku nirya babye atonun, tuku sesal leplirye, mutuku patauk kiplibuk, pia malye mutuku kipnamle. Amutuku bitinye noutamak ara, ninye ton pia kum unamake. Ara, urdem ati kume. Sik amutuku ninye arye, Yehuda yala ninye nirya ati, yanuka olyangalamikba, sik ining talye saklamuka, dekna ati wenepnamne. Ara, malye winin ning ton, kum winilamik touk, Mesir mutuku nang ap, Edom mutuku nang ap arye, Israel ninye nirya olamika ati, wenebuka opnamne.
“Anggunda, ‘Pia dipkoprob unamap’ tenen, diksukumuk wininamlulume. Ara, ‘Teleb upmak do, kum do?’ tenen, yupu talina ap, yupu bokolin talak ap nirya ara, diksukum yupu uk talibuka wininamlulume. Atalak ara, bona utotoa kum ninye ati, ‘Se, bicoe, sik malye ning daupmalye,’ tenebuka winina kume. Tonda, ‘Sik weik tonun melipnamabe,’ tenebuka winina meme. Aning atonun, bona weik talin nang babye ati, ‘Malye winipnamak bukni, sikda bona weik talin nang ati, daupmalye’ tenen, anang ati, ilil tenena pia meme. Bona utotoa kum nang babye, bona weik talin nang babye, diksukum ubuka, yupu teleb kibuka, lipsisikuka bokolinamlulume. Sik malye winibice nang ati, ‘Na kwit capu awinipmace,’ tenebuka, ‘Sik malye ning daupmalye’ tenena kume. Yuk ninye nirya ati, diksukum yupu uk, talibuka lipsisikuka bokolinamlulume,” Allah arye nyabuk.
Aning atouk, ‘Malye winin ning ara, nun like’ tenen, pia diksukumuk unamlume. Yata malye winin ning do nirya, malye ning nirya batakmunce, ‘Aning ara, nun like’ tenen, malye ning pia kum wininamlulume. Winibuka umunyopura, dinamlume. Winipmunyopura, nara, Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggunti, melinamsine. Telebuk winimunyopura, narye minopce wenebuka kum opsinirye, tuba tamubuka, tonap bico tenepsinyopura, Yusup el yala ninye ati, teleb updeipnamsine. Ara, anggun apu koproba, Yusup birye deiamukba, dadeipdanin yangalamika ani, wini talak babye ululum Israel ninye ati, na Allah Yahweh arye anggunti, bico tenesipnirye, melinamsine.
Bukni, pia teleb ning ara, diksukum teleb ubuka winin ninguk talibuka unamlume. Na patapnil ning ara, weik mek mikip arye balamle atonun, teleb winin ninguk, diksukumuk winimumnyeura, kanye delinamsine. Tonda, mek lilun talyeuk balamle atonun, anggunce tilila yupu nyana kumce, ‘Malye winipmalinye bira, malye winipmale,’ nyabuka, yupu bokolinamlulume. Teleb wininmalinye biti ara, ‘Teleb wininmale,’ nyabuka, yupu lipsisikuka bokolinmalulume. Winipmunya deice arye, telebuk ubuka, pil donamlume. Aning ara, batakana kum bukni, mek lia bukuka balamle atonun unamlulume. Winipmunyopura, narye anggunti, kanye delinamsine. Na Allah arye nyapsine.
Tonda, Yerusalem mutuku noutam unyak ninye nirya ati, yupu lipsisikuka bokolina talak ara, diksukumuk ubuka, yupu kum bokolilulume. Anggun ninye deiyok kibuka, amutuku talilulum deiyok nang nirya arye, sik malye winipmace ninye ati, wenelamtum bukni, aninye arye, “Nun winipmap ning ara, namin kipsilyame,” nyanyake. Ara, yupu sekelana ati, yo bok arebikiba, tilila yupu deice aryuk nyalulume. Aning atonun, Allah el si eren aik noutam talibuka, pil donyak nang, anggun imam-imam nang arye, “Nunda yo bok weik arepsikiba doprobibyopura, amutuku noutam unyak ninye nirya ati peterenamabe,” nyalulume. Tonda, Allah el yupu nyapdeipliba, sik Allah yupu laka len ap, aminyan winipnamle ning ati lak lena ap, ati unyak nang nabi-nabi babye, “Yo bok arepsumunba, dopropmapya deice arye, Allah Yahweh elce nyapmasil ning ara, lak lepnamsiyabe,” nyanyake. Wininyak diparyuk sikce tenenyaka ara, ‘Kume, Allah Yahweh, nun dam ausulula ati, ikin ning nun dam kum yanganamsile. Telebuk unamabe,’ tenekirye nyanyake. Utenenyak deice, Allah arye kanye imun ning dobuka, sik nong deice delinamle.
Kume, aning-aning nirya, akunum winiptibya babye, adeice arye, pia kum lyepnamsile. Bukni, nun ni Allah Yahweh arye, nun tukwak mutuku unyap ninye nirya ati tenesilya ara, ‘Na kanye delina ati ara, wininamake,’ tenesulule. Utenesilya ati, el minop talak akunum laka nyapdeiamsuk ara, ani. Yata ninye do nirya, pia diksukum teleb kibuka unyakce, yuk ninye nirya ati, bico tenelakirye, kanye talima, amu tam nimalyap asa kanye deibuka, telebuk unamake. Wininyakce, Allah el amu tamuk unyakce, kanye talima erena kumce, Allah ap, kanye talima dukdongobuka, neika ubicopura, Allah arye aninye ati, kanye delinamle. Aning ara, ‘Wininamake,’ tenesulule.
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Musa sekamuk yupu peterena deiyok nang ap, anggun Farisi nang ap ara, anggun talima noutamak malye ning aupmasilibuk, ‘Teleb nang tenepnamsiyak’ tenen, nong bola deiceuk teleb ululume. Winiluluma ati, anggun bico, Allah arye wenebuka opnamsile. Anggun malye winimunye ning ara, ani. Aning-aning nirya ara, ‘Allah elcuk aresulule’ tenen, pia mitik ning bukni, kuma ap, babok ap, erica ap bokuka, seper sepuluh dobuka, Allah el si erena ati ton, arerurume. Winilulum bukni, weik mambul winin ning ara, batakalongolulume. Anggun batakamunye ning ara, ninye bico tenebuka talima arena ap, ‘Na kayapu’ tenen, batakana kumce, kanye deibuka pil dana ap, ninye arye dipkoprop winipmakce touk, yupu bokolina ap, yupu bokolin talak diksukum yupu nyana ap, anirya ara, batakalulume. Allah yupu noutamak ara, ayupu nirya aubuk bukni, anggunce aning nirya batakalulume. Ati, ‘Teleb nang tenepnamsiyak’ tenen, mitik ning dobuka, Allah ati, seper sepuluh bokuka aremunya ara, teleb bukni, aning batakna kumce, weik mambul ning babye winiptume. Weik mambul ning babye, winipmunyopura, ‘Telebe,’ nyapsitinye bukni, anggunce weik mambul ning batakalulum ati, ‘Anggunda tuba malye winilulume,’ nyapsine.
Nyabukce, ayupu ton nyabuk. “Anggun mutuku noutamak unyak bukni, tikilyangan nang ap, kwaknamne nang ap ati, diksukumuk wininamlulume. Tonda, youwak kilapu arye, sik patan ning kum upliba, yuk nang ning, tia dopropnamake ati, anggun ning tia arepmunce, ‘Dipkoprop tamubuka, na ning arepnamnil’ tenen, youwak kilapu, sik nong deice ongolamak baju dolona meme. Ato ninye nirya ati ara, ‘Meme, sik talye nang ati, dauplye, sik ning ubula doproptibya babye, yata nang arye nyapsiting do?’ tenen, sik ning ubula dolona meme. Anang nirya ati ara, diksukum ubuka yupu lipsisikuka peterenamlulume.
Anggun babye, Israel ninye noutamak, tonoknye birye yuknye biti, ubula doproplirye, tapu koubuka taleamlirye, ‘Anye bira, talye ning atonun ulule,’ teneplyopura, aminyan talak taliplinye dobuka, yuk nang ati dekeipmali bukni, sikce anye dobuka bobikcopura, pia malye weike. Tonda, aning atonun, tonoknye birye, yuknye ubula dobuka, tapu koupdongoplirye, ‘Na mambul pil talye urdemuk pil danamnilame,’ nyaplyopura, aning babye pia malye. Yatanye do nirya, aning atonun winibicopura, yuk nang ubula doplinye bira, adiparyuk oplopnamlulume. Aning ara, batakna meme. Atonye opmunyopura, winipmunye deice, anggun Israel ninye noutamak, malye ning kum danaipmunce, sirya daknamlulume. Musa birye nyabuk.
Yata nang do, ton malye winibikirye derepdacopura, sik nirya yupu lipsisikuka bokolina aik bikirye, ‘Yatanye malye upmal do?’ tenen, winamake. Sik yupu lipsisikuka bokolina deiyok nang aryuk, yupu nirya kekebikirye, “Dipkoprop anang ara, malye upmaka anya arye, wenebuka opnamabe. Bukni, anang ara, malye winina kum, telebuk upmaka anya arye, batakdongopnamabe,” nyabuka yupu bokeipnamake.
Tonda, yatanye do nirya, ninye asik nang ap, tonda mitik winiryuk nenmakce nang ap, yuwak kilapu ap, sik ning ubula doproplinye ap, yupu lipsisikuka bokolin talak ara, deiyok kum upmalibuk, malye yupu nyaplyopura, aning ara, “Teleb kum unamle,” nyabuka, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.
Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake.
ကြော်ငြာတွေ