Winibiceura, sik Yerusalem mutuku, tuba kam unamak nang arye, anyasik domikce bukni, bisik bublan wekelbanak ati, weik keil poka noutam, bisik bublan potopdeibikak ara, kat ning besi arye, bublan el si, Pintu Gerbang dobik dam, bulubuka wekelbikirye, yupu weik arye malye nyabikirye, engenamake. Winipmanto ara, kilapu baju kwiripdobiceba, bananguk bukikirye, tuku deice bukuka engelamak atouk kibuka, anggun Yerusalem mutuku nang babye wininamlume. Ara, Allah arye wenepsilirye, ikin ning weik arepsilyopura, anggun babye, aning atonun kibuka, imun kanye bobuka, engenamlume. Allah arye, sik Israel yala nang nirya ati, ayupu nyabuk.
Yeremia 14:2 - Eipomek2 Weik kanye imun dou li maplirye, mek nirya kum uplye talak ara, Yehuda yala ninye, asik dobuka unyak mutuku nirya ara, dipmanto upnamake. Winipnyopura, amutuku unyak ninye nirya, weik kanye imun upliba, ikin kanye bobuka, tuku deice mabuka, ngalukunamake. Tonda, Yerusalem mutuku unyak ninye nirya arye, mambul kanye bobikirye, ‘Se, nun yanuka melipsilyame,’ nyabuka, malye nyanamake. အခန်းကိုကြည့်ပါ။ |
Yeremia 14:2
30 ပူးပေါင်းရင်းမြစ်များ
Nyabikopura, nabi Yeremia birye, nyabuk. Na kanye noutam ara, pia malye unulule. Ara, na mutuku ninye, sik talima uk weik dilula ati, na babye, imun kanye bopsirye, talima uk dinulule. Winipmanto ara, ninye dibikceba, anggun kayapu nang arye, baju koubukabikirye, aik bukikirye, weik arye engelamak touk, na babye pia imun kanye bobuka unune. Winilyeba, na talima daksaknilye, Ura, yata wiripnamsil do?’ tenena ati, na kanye tenen ning arye, kum tenenipmanto unune.
Ikin ning sik nong deice delilamukba, yupa weik ton tam ara, diplamik bukni, yupa mitik tonunuk ton kam tuba ulamik. Akilisal nirya kum dibik bukni, sik nong deice nirya, weik arye neplirye, torok atonun moulamle ning, el si ara tumor, areamukba, akilisal sik nong deice moulamuk. Amoulamuk tumor ara, sal konduk kim dam ap, kilapu konduk dam ap, uk nebuka moulamuk. Winilamukba, sik amutuku ulamik kili sal arye, “Se, na nio ance yanuka melipsilyame,” nyabuka, yupu weik arye ngaluklamikce, malye yupu nyabuka morolamike.
Nyabukba, Allah Yahweh arye, ayupu ton dukdongobuka nyabuk. Israel nang nirya ara, na yupu pia kum kekelamikce, aninguk talibuka, kum ulamika ati ara, na Allah arye, ‘Anggunda, na yupu kekepnululume!’ nyapdeiamsise talak ara, sikce na yupu kum kekelamnik touk, sikce nati, ‘Se, nun ni Allah melibuka lyepsilyame!’ nyabuka, morolamnik talak babye, narye anggun yupu pia kum kekelamsise. Na, Allah Yahweh, im deice yin talen malaikat nirya talibuka, sik weik deiyoknye ununye birye, nyapsine.
Aning ati ara, na Allah Yahweh arye, anggunti ayupu nyapsine. Ara, sik malye weik wininyak ning ati, menenga deknirye, ikin ning dobuka, sik deice deipyeba doropnamake. Winipnirye, sik deice aikin ning deipnamaka ara, kum lyepdanmanto upnamake. Aikin ning ara dipkoprob, sik nong deice yanuka dopropnamake. Sikce, nati, ‘Se, nun ni Allaho, ance nun dam yanuka lyepsutume,’ nyabuka moropnitingce, engeptinga babye, ayupu kum kekepnamsine. Anggun ti, kum lyepropnamsine.
Wini talak wa win dam nirya ara, wa wibuka kouamik ning nirya, akunum malye kibuka kum danmale. Ati tuku babye malye kanye bobuka engelule. Ara, talye ati kume, yakong atonun ning gandum ap, anggur tapu duk ap nirya ara, akunum koluplirye, kum kipdeipnule. Tonda, nintong teleb leplirye, tilil weik ulul yo, el si zaitun yo babye, akunum kum dale nyabuk.
Ati ara, malye-malye ning pia weik wininyaba deice arye, malye-malye winin ning weik tapaknin balule. Adeice arye, nun mutuku noutamak, aning-aning nirya kounamap ning nirya babye, pia kum papsilirye, kum danin banamsile. Nunce wa wibuka, yala ning kounyaplulum bukni, teleb ubuka kum palule. Tonda, nun mutuku talye kam ulul ning ap, maka im deice lakuka balamak ning ap, tonda amutuku mekwen pum noutam ulul ning mek pum bal ikan ap nirya ara, dibuka kum danin banamake. Winibicopura, nun amutuku unyap ninye nirya ara, awininyak ning nirya eibibirye, malye kanye bobuka unamabe. Allah arye, nun Israel ninye ati nyapsile. Hosea birye nyabuk.
Winibukba, anyasik antanap dongobuka wiamik poka noutam bukni, ninye weik wekelyangan bisik bublan nirya ara, kat ning el si besi arye, kintinyamik ning nirya ara, dakuka tukwak batakik. Tonda abublan dam wekelyanganak ati, kintinilamupu ning nirya ara, nun mal olan nang arye, aning nirya dakuka batakik. Winipsekura, nun mal olan nang arye, nun ninye deiyoknye Raja ap, el amu tam pil yuk-yuk deiyok kibuka, ulamik weik nang ap nirya ara, anang bobuka, sik pera mutuku ulamik ninye, yuk mutuku nang, sik mutuku bobuka deibikba, amutuku nang arye talinyake. Adeice arye, Allah elce nyapdeibukba, sekamuk ning ara, ton kum peteresinyake. Tonda, Allah el yupu nyapdeiplyeba, laka nyana deiyok nang, sik nabi-nabi nang ara, wini talak Allah arye, sik dam ton yanuka kum nyalule. Tonda, lengdar malamaka deice arye, Allah Yahweh arye, ‘Winipnamlume-winipnamlume. Aminyan talak ara, aning ton yanamle ati, winipnalumeʼ nyabuka, min talak nyalamuk touk, tuba ton kum lak nyalula ati, anabi nang arye, nun Israel ninye ati, ton kum laka nyasinyake.
Tonda ance, yuk pera mutuku yu ninye nyapminba, talye karin arye, sik aik dam yakibuk eibikirye, sik amutuku ninye nirya, ilil upnamle. Winipmanto ara, ‘Yu weik nang, ubula dona ati yakibuk, sik aik unmace ninye eibikirye, ilil weik upliba, engelamak touk, winipnamak’ tenen, nyapne. Ara, amutuku ninye arye, ‘Anye biti opnuyap’ tenen, yupu talinyaka ati nyapne. Winipmanto ara, na sakuka bulyanganyaka ati, sikce akunum tuku palibuka kintinipnik. Aning atonun, sikce nati, wena pum bisik wekna ati, akunum kintinibuka delininyake. Ati ara, aninye nirya ara, ance wenepnalame, na nio.
Yata sum arye tonap wininmapya ani, amutuku noutam ara, silal lepropnamle do? Tonda, wa win sukum tikilul yo mutmuta nirya ara, yalakuka kolupnamle do? Tonda, talye kam unyak ning ap, maka nirya ara, amutuku nang nun malye wininyaba deice arye, akunum dibik. Dibikopura, nunce ayupu nyanyabe. Ayupu nyananyap ning ara, “Nun ubirye, teninamap deice arye wininamap ning ara, Allah arye kum elinamsile,” nyanyabe. Na Yeremia birye, Allah ati nyapse.
Narye na mapu koproba anggun wenena ati, ‘Winipnamsine,’ nyapdeipse yupu ara kum bataktinye. Ati ara, tukwak mutuku nirya ara, ikin uplyeba kanye ikin uplyopura, ninye nirya arye weik engenamake. Im deice tam nirya ara kunuknamle. Aning nirya winipnamla deiyok ara, ani. Na Allah arye, ‘Sik wenena ati, atalak ara winipnamsine, winipnamsine,’ nyabuka, akunum nyapdeipse ati, narye teinibuka nyapdeipse ning ara, kum kipdeiptinye. Na kanye tenyamse ning ara, punupnirye, kum bataktinye. Nyapdeipsuk talak uk akunum yalyopura, aning nirya dipkoprob nong upnamlarya!
Ati ara, Israel yala ninye ululum mutuku noutamak nirya ara, ninye nirya arye, imun kanye bobuka ikin deice uk ululume. Tonda Libanon mutuku noutamak unyak ninye nirya ara, akunum obuka sirya dakmasiakba, amutuku nirya malyeuk ulule. Aning atonun, Saron mutuku weik lu pala mutuku ara, pia teleb wa wiamik bukni, Asyur mutuku nang arye, kirye dibuka uku sice kiplobikba, wini talak ara, amutuku nirya lo uk ulule. Tonda, weik kebi yo tikamlya koluplirye, kumanya arye, ayo bok nirya dakuka balamle touk, Basan mutuku ap, Karmel mutuku ap noutamak ulamuk teleb ning nirya, akunum dalubuka dakuka bobiyik. Amutuku-amutuku nirya ara, talye yini mutuku lo uk ulamle touk ulule.
Aning atonun, anggur duk moulamle tapu ara, sesal selule. Winilula ati, anggur duk babye kum danin balamya ani, anggur duk teikicak arye, kanye walwalanmek ton, kum memeptinga ati, aning babye kum kipnin balule. Tonda, anggur mek ara adiparyuk kum dopropmanto ulula ati, aning dikikirye kanye delinyak nang nirya ara, malye kanye uk bobuka unyake. Atalak ara, sik bouku sukuna deice uk ukirye, pia ‘Se,’ tenenauk unamake.
Se, na nabi Yesaya babye, sik Moab tam nang ati, bico tenepnarye, engenmane! Moab mutuku ulamice nang ara, sik mutuku batakuka, bai sakuka bikirye, Zoar mutuku ap, tonda Elgat-Selisia mutuku ap, ‘Duknupnamapʼ tenen, bikbik abuka binamake. Yuk Moab tam nang ara, Luhit mutuku lu bisik welebakirye, engepnin binamake. Ton nang ara, Horonaim mutuku welebacebuk, ikin ning, sik dam akunum yalyeba, sik mal olan nang arye, sik mutuku nirya akunum sice buklomica ati, weik arye malye nyabuka, ngaluknin binamake.
Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.
Sik anang arye, ninye deiyok kibuka talinyaka mikip deice arye, Allah nyasulul yupu yaninyaka ati, sik amu tam talye bona utotoa talina kum nang ati, ikin weik, sik nong deice deibikceba, ‘Se, aning-aning winiptibyeʼ tenen, ikin kanye bobikirye, engenyak ning ara, Allah akunum kekelula ati, sik deiyok nang ati wenelule. Imun kanye bobuka engenyak nang ara, Allah kekeplirye, sik dam yanuka, lobuka lyelolule.
“Ambusum aketing atonun akunum upliba, Benyamin yalanye ton nyapniba, an dam yanamale. Yalyopura, epdanamarume. Epdarumunyopura, anye biti Israel ninye, sik ninye deiyoknye kipnamla ati, wipdeipnamalame. Deiyok ara, Pilistin nang arye, na ninye, Israel ninye talibuka, sik nong deice ikin ning delinyakba, Israel nang arye, ikin kanye bobuka engenyake. Engenyaka ara, na ton kekenune. Ati, ayanamalanye Saul bira, ‘Israel ninye sik ninye deiyoknye, Raja kipnamal’ tenen, erepdeipminyopura, elce Israel ninye ikin asa unyak ati ara, lyepnamle,” Allah arye Samuel biti, laka nyabuk.
Tonda, ‘Ance melipsiminyeba, nunce weinyap sapi basam kil nirya babye, mi bomica ani, mapu pia weik, nukman kumto, delinamsiak’ tenen, moropkine na nio! Tonda, aweinyab sapi basam ara, melibuka kalikinamsila ati, ‘Akil sapi basam nirya arye, min yuma mapu tonok babye, pia ton kum delinamak’ tenen, moropkiabe. Tonda, ‘Nun mal olan nang arye, yanuka kum opnamsiakʼ tenen, moropkiabe. Tonda, nun weik asik dobupu noutam nirya ara, ‘Ikin weik upsilyeba, nun Israel yala nang nirya ara engebuka, kum ngaluknamap’ tenen, moropkiabe na nio. Tonda na nio, ‘Aning atonun, yu nang arye nunti ton winipsikcak’ tenen, ‘Ance melibuka kalikinamsilamʼ tenen, moropkiabe na nio!
Anggur mek nirya mitik uplyeba, aning nirya dipdobikceura, akunum kum dalya ati, amutuku unyak nang nirya ara, bisik noutamuk bakirye malye nyabuka ngaluknin banyake. Tonda, minop talak kanye deibuka ulamik touk, tuba kum unyake. Amutuku-amutuku nirya noutam ara, kanye deibikirye, teleb Kanye bobuka, pia kum unyake.
Diba, na mutuku ara, sik yuk mutuku nang arye, ninye deiyok kibuka talibikce, pia asik oldem kipdeipnik ning ara, akunum elinune. Amutuku noutam nirya ara, sik yuk mutuku nang arye, ninye deiyok kibuka talibikce, pia malye kipdeibikba, ‘Se,’ nyabuka ngaluklirye, malye nyalule. Amutuku tuku nirya ara, kata sekeltakalamak mutuku noutam, pia oldem ubukba, ninye ton amutuku ati, kum eilinyake. Ninye kum ulamak mutuku atonun ubuke.
Tonda, anggun winimunye ning ati, Allah arye wenebuka opsiliba, alye weik dakalanamlume. Winipmunyeba, yuk-yuk yala nang eipsikirye, aning kekebuka biknamsiake. Yata mutuku noutam arye do? Tukwak mutuku im sirya, mutuku sirya unyak nang arye, anggunce, ‘Se,’ nyabuka, engenamlum ning ara, laka kipliba kekenamake. Tonda, anggun Mesir mutuku nang arye, ngalukunamluma lelim ara, ninye mutuku sirya, im sirya nirya arye, kekenamsiake. Deiyok ara, narye opsinyuopura, ilil una ati, anggun yin talin nang nirya arye, yan dum duksiliba, ton yin nang arye, ton yin nang deice poulbikiba, anggun neika daksakuka, tuku deice poulbinamlume.
Winibuka nyabik ning ara, talye ati kume. Deiyok ara, Yerusalem mutuku asik dobupak arye, weik cang keil poka dobuka, antanap dongobupu ning ati ara, Allah arye, ‘Sik Israel nang wenena ati, narye aning nirya dakuka bataknamne,’ tenyamuk. Utenebuk ati, Allah arye, weik cang poka domupuak nirya ara, cang tapu arye kiklipdeyukce, ‘Sik mal olan nang ati, lo areplyeura, sikce apoka nirya ara, dakuka sice buklopnamake,’ tenyamuk. Aning tenebuk touk, ubuk weik cang keil poka dobuka, antapdongobupu ning babye, amutuku asik dobuka ulamupu nang kalikna ati, dobuka deiamupuba, kaliklamsik cang asik ap nirya ara, dakuka batakupuba, nun weik asik oldemuk ubuk. Winipmanto ara, ninye arye weik imun kanye boyakirye, ‘Seʼ tenen, enganauk ulamak touk, anyasik nirya ap, apoka ap ara, malye weik ubuk.
Tonda, anggun wenena ati, na Allah arye dou mana li arepsisiba, tuku ap, amutuku dup deice nirya ara, tuku akunum sesal sepropsuke. Ara, wini talak babye, aminyan doyanamle talak babye, anggun kouamlum yakong atonun ning, el si ara gandum, wa wimunyak ap, anggur wa win dam ap, zaitun yo duk wa win dam ap, tonda el biyuk tuku deice arye, palamle ning ayala-yala nirya ap, tonda ninye nirya ap, talye kam ulamak ning ayala-yala nirya ap, tonda ninye arye talibuka, winilamlum ning ayala-yala nirya ara, kum kipdeipnamsile. Anggun wenena ati, aning-aning nirya, malye kipdeipnamsine. Allah arye, Israel ninye ati, nyabuk.
Ati, se anggun wa wibuka yala koululum ninye nirya ap, anggur tapu talilulum ninye nirya ap ara, malye kanye bopmunce, ngalukuka engeplulume. Tonda, wa wina kel bikimunce, wilulum nang nirya babye, engeplulume. Ara, anggun kouamunye ning, gandum ap, jelai ap, duk moupliba lilulum ning nirya ara, malye kiplirye, kum lipnamlume ati, engenamlulume.
Ati, sik Israel ninye nirya ati nyapminyeba, din dina kumce, si tebuka ukirye, ‘Dipkoprop asum ara, weik mambul sum’ tenen, ninye weik bulubuka yakirye, yupu talipnamake. Atalak ara, amutuku ninye deiyok nang ap, wisi-wisi nang ap, tonda Yehuda yala nang ap nirya ati, yukupmunyeba, sik nirya arye, Allah el si eren aikuk bulubuka yakirye, Allah Yahweh el tibuk, ‘Se, nun ni Allah Yahweh, ance melipsilyame,’ nyabuka moronamake.
ကြော်ငြာတွေ