Aning nirya winipnamne deiyok ara, tilila ati kume. Sik Israel ninye arye, nati ‘Nun like’ tenen, bataklamnikce, sik nirya ara isa si erena ati, nintong teleb ning bobuka uku dongolamikce, isa si erelamik. Aning atonun, sik taruk arye, kat ning dobuka sik isa si eren ning urasin atonun ning memebikce, aning ati, ‘Nun ni,’ nyabuka si erelamik. Winilamika ati ara, na yu weik unulule. Ati, na yu ara uku dilamle touk weik upnile. Ati, sik Yehuda yala nang ap, aninye unyak mutuku ap ati, weik ikin ning sik nong deice delinamne. Na yu ara kum bataknamne, pia tuba unamnila ati ara, aninye dipkoprob wenepnamnarya.
Yeremia 1:16 - Eipomek16 Ara talye ati, kume. Na mapu, sik Yerusalem unyak ninye ara, sik malyeukirye, na batakaninyaka dekna ati, na Allah arye aninye wenepnamne. Ara, sik malye ninguk unyakce, na aminyan kibuka yanininyake ap, tonda, sikce kam ning obuka bobikirye, talye kwemdina daunyak isa ati, arinyak ning ap, talye ning bukni, sikce isa urasin atonun ubuka, memelinyak ning deibikirye, si erenyak ning ap, aning nirya wininyaka ati, sik deice ikin ning deipnirye, mikip arye wenepnamne.” အခန်းကိုကြည့်ပါ။ |
Yeremia 1:16
44 ပူးပေါင်းရင်းမြစ်များ
Akunum wekuk ati, nabi Asarya birye, ‘Ninye deiyoknye Raja Asa abataknamneʼ tenen, biyuk. Biyukce nyabuk, “Se na deiyoknye Asa ap, Yehuda mutuku noutam unyak nang nirya ap, tonda Benyamin yala nang nirya ap ati, nyapsine! Moubuka kekeplulume! Allah Yahweh anggun dam usulule. Atonun, anggun babye el dam ululume. Ati, anggunce Allah Yahweh ati, El nyasilye yupu nirya adiparyuk moubuka dolonamabe, aninguk talinamabe ati, melipsilyame nyabuka moropmunyeura, elce anggun dam yanuka melisiliba, el ap neika unamlume. Bukni, anggunce elti, kum kekepmunyakarye, batakmunyeura, elce anggunti melina kumce, batakanamsile.
Tonda, Ahas elce sik Israel nang talina ati, ninye deiyok kibuka, Raja-Raja kilamik nang arye, malye winin ning weik winilamik touk, el Ahas babye, Bahal isa si erena ati, talye ning urasin atonun, patung memepdeiamukce, isa si ati si erelamuk. Aning winilamuk talak noutam ara, el deiamuk mapu ton obuka, isa si erena ati, uku sekuka dongolamuk. Aning winilamuk ning ara, minop talak sik Kanaan mutuku noutam ulamik nang arye, yuk-yuk ning si erena ati malye pil dolamik ning ara, Allah arye, ‘Na tenen nang, Israel nang arye amutuku nirya talipnamakʼ tenen, sik Kanaan mutuku nang inibuka yakdonokamuk. Bukni, Ahas birye malye ning talebuka, si erelamik touk, el babye apiluk dolamuk.
Sik Yahudi yala nang nirya, Yehuda tam babye, Israel tam babye, na Allah ati dipkoprob diba kum tenelamikce, na ap, na yupu ap batakuka, isa si erena atibuk ulamik. Sikce amalye wininuk, winilamik ning nirya ati ara, nati yu kililamnike. Winilamnikba, Yerusalem mutuku unyak nang ati, yu upnukba, derepse. Atenepse ning ara, min kum winipmanto,” Allah arye nyabuk.
Bukni, an ap, ance deipminba, deipdanin banamak ninye nirya arye, na si bataknumunce, yuk isa siuk erepnin bamunyopura, wenepnamsine. Aning atonun, narye, ‘Aning ara wininamlume, aning ara pia kum winipnamlume nyapdeiamse yupu ap, ‘Aning ara mem ning nyapdeiamse yupu ap nirya, yanipmunce eibuka batakmunyopura, wenenamsine.
Aning dem kum bukni, nun amutuku-amutuku noutam, aunyabak nirya ara, nunce, ‘E, aning ara, nun ni koproba aluleʼ tenen, isa si erena ati, memebuka deilinyab ning, patung weik kintinibuka deiamupu ning talinyabe. Tonda, nun taruk arye, ninye urasin atonun kibuka, memebuka deibibyeura, aninguk si erebibirye, el si erena ati, nun asok tuku deice deibibirye, aisa ati, si erenyabe. Nun taruk tatang arye, aning kintinibuka deiamupu bukni, atalye ning ati, si erenyabe.
Tonda, amutuku nang nirya obukabikce, sik anang arye, si erelamik ning babye, dobuka uku dongobikba, uku arye dibukba kum uamuk. Ura, sik si erelamik ning ara, dipkoprob talye ninguk ubuka anya arye, an Allah atonun kum uamuk. Sikce si erelamik ning ara, ninye taruk arye puturubuka deiamik ning ara, yo ap, keil ap arye puturubuka deiamika ati, winibukba aning babye mikip kum uamukba, sik Asyur mutuku nang arye aning nirya sikce buklobikba, kum dayuk.
Tonda, amemenyak yo tonok aniryuk dobukabikirye, ninye uku peikna ap, roti kwaning dana ap, tup ning dana ap, ayo uk bokuka uku sekuka dabikirye, kanye deibuka unyake. Tonda ayo aniryuk bokuka, uku sekuka, tup ning obikirye dabuka dibikiba boulule. Ayo aryuk bokuka, uku sekuka uku peiklamiceba, sik nong teleb kiplirye, dipmace ning ara teleb ulilule. Bukni, ayo aniryuk ton ning ara, talye ning ati kintinibuka deibikirye, “Nun ni koproba Allah,” nyabuka, gutam tuku dipdongobuka, isa si erenyake. Tonda, ayo deice aniryuk kam kum ulul ning ati moubuka deibikirye, “Nun ni koproba, ance nunti, lyepsilyame,” nyabuka moronyake.
“Sikda pia tuba-tuba kam ning obuka, isa si erena ati kintininyak wa win dam bobikirye, kam ning binuka obuka uku dongonyake. Tonda, isa si eren ati, siltong teleb ning dobuka, keil bulubuka yangabica deice deibuka, uku dalbanyake. Awininyaka ara, ‘Nun ni Allah eipsilirye, kel biksilyak’ tenen, kum duknunyake. Nati ara, ‘Allah daupmalye’ tenen, laka aryuk isa si erenyake. Winyaka ati, nara weik tonun yu unulule.
Talye ning ati, “Nun deiyok ning,” nyabuka, si erenyak ning nirya ara, nong kum upnamle. Ati ara, aning nirya memebikce, sik anang babye, aning ati, “Nun ni koproba ani,” nyabuka si erenyak nang babye, tilila yupu uk nyalanyake. Ati, anggunce talye ning nyabuka nalimunce, malye kibuka akutunamlume. Allah arye, ‘Atalak akunuma,’ tenyamuk ning akunum yalyeura, aning nirya ara, Allah arye kum kipdeipnamle. Ati, aning yala-yala nirya ati ara, anggunce nalibuka akutunamlume.
Aning nyapmasina deiyok ara ani. Ara, sik yuk-yuk mutuku unyak nang ara, sik min arye talibuka winipnin yanganyak ning ara, tilila ninguk ulula ati, aning ara, nong kum upnamle. Sikce bai mutuku tikilul yo webukabikirye, talye kam ning do, ninye do, aning urasin atonun kibuka memena ati, ayo dobuka, weik kel nang, sik dam boyangaceba, anang arye talye kam ning urasin atonun, puturubuka memenyake.
Narye anggunti kum melipnyeura, Yehuda tam unyak nang babye, Yerusalem mutuku unyak nang babye, domba basam totoa obuka, sik isa ati arebikirye, aning ati, si erenyak ning dam bikirye, “Se, nun ni yapu, melipsulume!” nyabuka, bin morobikirye, engenamake. Nyabuka morobikirye, engenamak bukni, ikin ning, sik deice areplyeba doropnamak ning ara, sik si talye erenyak ning arye, yanuka kum melibuka lyepropnamsiake.
Nara, Allah Yahweh, im deice yin talin malaikat nirya ara, sik deiyoknye ununa ati, na mikip weiknye unune. Ati, narye Israel yala nang ap, Yehuda tam ululum nang ap, moubuka deiamsisirye, teleb kipdeipsise. Bukni, narye, ‘Winibuka wenepnirye, malye kipdeipnamsinʼ tenen, akunum kintinipse ning ara, arepnamsine. Ara, narye anggun deice, ikin ning deipyeba, kanye imun upnamle. Ikin ning, sik deice areplyeba, dopropnamlum nang ara, anggun malye winilulum ning, menenga ati dopropnalume. Ara, anggun atam ululum nang nirya arye, Bahal isa, pia malye ning ati, ‘Nun deiyoknye,’ nyabuka, si erelulumce, kam ning obuka, arelbalamluma deice arye, narye anggunti, yu upnilyeba wenepnamsine. Allah arye, na Yeremia ati nyapnuke.
Na Allah Yahweh arye nyapsine. Anggunce nati, akunum bataknulume. Anggunce, ‘Kume, aminyan talak nun malye winin ning batakuka, telebuk wininamabe’ nyanululum bukni, tuba malyeuk winiluluma anya arye, dipkoprob wenepnamsine. Minopce, ‘Namin kipniba, aminyan teleb winipnamak do?’ tenen, dinauk ulamsise bukni, wini talak ara, na lik unulula ati, tunim abuka kum unamne. Narye, ‘Anggun wenena ati, anggun opnamsin’ tenen, kintinyamsise ning ara, kum bataknamne. Wini talak arepnamsine.
Asipkikcopura, an Yeremia birye, tamubuka sik Israel yala nang ati, nyapnulyame. Allah arye nyapsile. “Ara, anggun wini talak ululum nang, anggun apu yapu nang arye, na Allah ati akunum bataknikce, talye ning ati melibuka balamikce, ‘Nun ni,’ nyabuka, isa si erelamikce, atalye ning atibuk, si erelamika ati wenepnamsine. Winilamik bukni, narye, “Aning ara, wininamlume. Aning ara, pia kum wininamlume,” nyapdeipsiba, Musa birye sekamuk yupu ara, moubuka kum taleamikce, nati akunum donga tamubuka batakamnika atia. Aning nirya ara, anggun wenena ati, anggun nong deice, ikin ning deipnamsine. Anirya ara, Israel nang, sik kekenak laka nyapmince, ‘Allah arye nyapdeipmasile,’ nyabuka, laka nyapnalyame.
Se, Allah anti, an mapu Israel nang, nun nirya arye, ‘Nun ni Allah Yahweh el dem melibuka lyepropnamsile,’ tuba tenenamabe. Nun kanye pum tam nirya ara, an deiceuk deilinyabe. Ton nang ara, anti, batakanamkiak nang ara, ikin ning, sik dam yalyeba, dipkoprob alye upnamle. An Allah ati, ‘Nun likʼ tenen, batakikirye, yuk bisikuk banamak nang nirya ara, dibikcopura, sik akunum dibikce, unyak nang unyak mutuku uk, tuku amu tam, sik dam wekelbinamake. Ara, talye ati kum bukni, sik anang arye, an Allah ati akunum batakikce, donga tam kilongokinyaka ati, dibikcopura, akunum diamik nang dam binuka unamake. Na nio, anda Allah Yahweh, Kam Una Deiyoknye ulyame. Winipmanto ara, anda tukwak mutuku nang nirya ati, kam mek pu atonunye, Allah Yahweh ulyame. Bukni, sik malye wininyak nang arye anti, batakinyake.
Ara, na Allah arye wipdeiamse ninye, ‘Naʼ tenen nang, Israel ninye nirya arye, nati akunum batakalongoninyake. Wininyakce, talye ning ati, ‘Nun ni koproba anye,’ nyabuka, dipkoprob kum melipmanto ning bukni, sik nirya arye, Isa Mutuku Dongonye siuk kibuka, si erenyakce, siltong teleb ning ap, kam ning ap dobuka, uku danyake. Minop talak, narye sikti, ‘Abisik teleb ubuka banalyame,’ nyabuka, peterelamse bisik ara, batakuka, talye malye winin bisikuk banyake. Winipmanto ara, weik karayong bisik, diksukumuk una ati, teleb bisik yabuka deiamse ning batakuka, talye bai tam kwalin bisikuk banyake.
Awinipnamne ning ara, talye ati kume. Deiyok weik aupmale anya arye, ayupu ton laka nyapnusine. Tonok ning ara, anggun mutuku ululum ninye arye, na batakanululuma ati, wenepnamsine. Tonda, na si eren aik ap, ‘Naʼ tenen, mutuku Yerusalem ap ara, anggunce pia malye ulilulume. Ara, anggun wini talak ululum ninye ap, anggun apu yapu ap, Yehuda mutuku ninye, anggun weik deiyok Raja nang ap arye, anggun si kel bikna kumce, Isa Mutuku Dongonye si talye erena ati, kam ning obuka, arelyangalulume. Winiluluma deice arye, amutuku noutamak ara, akunum malye kipdeiplulume. Aning atouk, amutuku unyak ninye ton, malye kum winipmake buk, anggun deiyok nang arye, aninye weik arye talyeuk oltakalulume. Winipmanto ara, mek kwebikirye, weik mek makau pum bisik dikdongobikiba, mek langdiplirye, balamle atonun, ‘Naʼ tenen, mutuku noutamak ara, ninye weik olamikba, ining pia weik saklamukce, aulule.
Aning ara, urdem ati kum nyapsine. Na mapu koprop Israel ninye arye, pia malye un ning bitinye talibikirye, malye weik unyake. Tonok ning ara, malye unyaka deice arye, sikda na bataknikirye, balye tam kilongoninyake. Nara ninye nirya ati, kam un mek pu atonunye unune. Bukni, sikce nati batakaninyake. Bitinye ning ara, mekwen lukamiki bukni, delilamlye ani, tuku dilikamlye bisik arye, mek weklamlya ani, amek nirya celdolamle. Aning atonun, sik bidamnye kanye aryuk tenebuka si erenyak ning ara, talye ninguk talibuka si erenyak bukni, aning arye sikti, kum meliptue. Yuk talye ning ati si erebikirye, nara bataknikirye, si kum ereninyake, Allah arye nyabuk.
Awinipmasil ning ara, urdem ati kum winipsile. Anggun kele. Anggunce, malye winimunya dekna arye, anggun dam ikin ning nirya yalaba dopropmalume. Deiyok ara, na Allah arye anggun bisik balalum talak ara, melibuka bobalamsise bukni, anggunce nati balye tam kipnulumce, bataknuluma deice arye, wini talak ikin ning anggun dam akunum yale.
Tonda anggun malye un ninguk, talibuka winimunya deice arye, anggun dam wenen ning yanmasile. Aikin ning anggun dam yanmasil ning ara, anggunce na Allah ati bataknuluma deice arye dopropmalume. Ati wini talak ara, ikin doproplumce, kanye imun upmasile deiyok ara, anggunce na Allah Yahweh ati, kibuka si erena kum deice arye, ikin doproplume. Na kele, anggun Israel ninye nirya arye, na Allah ati, ‘Se Allah ara nun weik deiyoknye ulula ati, malyeuk ubibyopura, weik arye wenepnamsile,’ tenena kumce, nati si erebuka, ilil kum ulule. Ayupu nirya nyapmasin ning ara, na Allah Yahweh aning-aning nirya talibuka deice tam unune. Na Allah Yahweh ara, aning-aning nirya talinirye, im deice yin talin malaikat nirya, sik weik deiyoknye kibuka ununye birye nyapsine. Allah arye nyabuk.
Anggunce memebuka deipmunce, si erelulum isa mer ara, dan tam unyak do? Ikin ning anggun dam yalyopura, imun kanye bolulum talak ara, anggunce puturubuka deiamlum ninguk, sikti, ‘Se yanuka lyepsilyame,’ nyabuka moropnamlume. Atalye ning arye, anggunti dipkoprob lyepsiting toura, sik Isa Mutuku Dongonye si erelulum ning aniryuk, anggun ikin ning upsilye talak ara, aning arye lyepnamsitinge. Narye kume. Aning ara, urdem ati kum nyapsine. Se anggun Israel yala ninyeo, anggun asik dolulum mutuku, weik arye dolulum touk, anggunce talye Isa Mutuku Dongonye siuk weik arye erelulum ning ara, kum nukmanto. Ati, sik Yehuda yala ninye unyak mutuku noutamak ululum ninye nirya ara, Isa Mutuku Dongonye si weik arye ereluluma ati, wenepnamsine.
Narye na mapu koproba anggun wenena ati, ‘Winipnamsine,’ nyapdeipse yupu ara kum bataktinye. Ati ara, tukwak mutuku nirya ara, ikin uplyeba kanye ikin uplyopura, ninye nirya arye weik engenamake. Im deice tam nirya ara kunuknamle. Aning nirya winipnamla deiyok ara, ani. Na Allah arye, ‘Sik wenena ati, atalak ara winipnamsine, winipnamsine,’ nyabuka, akunum nyapdeipse ati, narye teinibuka nyapdeipse ning ara, kum kipdeiptinye. Na kanye tenyamse ning ara, punupnirye, kum bataktinye. Nyapdeipsuk talak uk akunum yalyopura, aning nirya dipkoprob nong upnamlarya!
Nunce, ‘Wininamabe,’ nyabuka, nyalin yupu deice nyapdeiamupu yupu deice arye, akunum nyapdeibupu ning nirya ara, kum bataknamabe. Nunce aning nirya, adiparyuk winipnamapca! Ara, nunce Allah si erena ati kum bukni, yuk-yuk ning ati, im deice ulul ninye deiyok kil, el si erena ati, teleb aren ning bobinuka arelbanamabe. Tonda, ‘Aren ning pia teleb upnamleʼ tenen, aning deice ara, anggur mek ton dikilongonamake. Aning nirya ara, nun isa kil, el si erena ati, arelbanauk wininamabe. Aning wininamaba ara, nun wini talak unyap nang ap, Yehuda yala nang, nun apu yapu ap, ninye deiyok kibuka, nun mutuku taleamsik nang, nun Raja-Raja nang ap, sik amu tam pil dona deiyok kiamik nang ap, aning atonun ulamik. Tonda, Yerusalem mutuku noutam bisikak balamik nang ap, tonda Yehuda mutuku noutam asik domikce daulamik nang ap, nun nirya arye, min talak isa kil si erelamupu touk, wini talak babye, el si tuba erenamabe. Winibipya babye, nun deice ikin ning kum yanamsile. Atonun, minop talak, isa si erelamupu talak ara, nun pil dolamupu ning nirya ara, telebuk uamuk. Tonda, nun din ning yala-yala weik awamukba, weik tonun dipnarye, telebuk ulamupu. Ati ara, nun nirya arye, aninguk talibuka wininamabe.
Ura, sik anang ara, winiyaka ati ara, na Allah Yahweh arye, sik anang awininyak ning nirya ati, kum kipdeiptinye do? Tonda, amutuku noutam unyak nang, sik pia malye weik wininyak ning nirya ati ara, narye wenebuka kum kwang daknamne do? Kume, dipkoprob anang ara wenebuka kwang daknamnarya. Sik menenga ati, imun kanye bon ning arepnamsine.
Anggunda, pia malye weik winilulum ati ara, anggun ton tenenipdelulume! Na Allah arye, anggun malye ning weik winilulum nang ati, kum wenebuka optinye do? Tonda, sik amutuku noutam unyak nang arye, malye-malye weik wininyak ning ati, kum kwang dakuka weneptinye do? Kume, aning ara, dipkoprob wenebuka kwang daknamnarya!
Ninye tukwak unyak nang, yala-yala nirya ara, walwal nang atonun unyake. Nunda, pia moubuka tenina kum nang atonun unyabe. Ton nang arye, dengna kat weik ning, el si emas memebuka, delina kel nang arye, sik alye dakikirye, sik urasin ara, duknulonamake. Deiyok ara, sikce memenyak ning ara, ‘Aning ara, nun ni koproba arye melinamsilʼ tenen, talye ning, el si ara, patung berhala, memenyak bukni, aning ara, nong pia kum ninguk memenyake. Aning ara isin ap, kam una ap, pia kum ning buk memenyaka ati, atalye ning arye, pia kum melinamake.
Ara, urdem ati kum nyapkine. Yeremia an asing arye, Yehuda yala ninye asik dobuka unyak mutuku noutamak, sik malye-malye ning pia weik wininyaka ara, kum elilyam do? Tonda, Yerusalem mutuku noutamak bakirye, malyeuk wininyak ning nirya ara, kum elilyam do? Aning elilyam bukni, moubuka kum bikilyam do?
An babye kel bikilyame. Sikce malye wininyak ning ara, laka nyapnamkine. Ara, sik mapu arye, uku dalamak, yo dobuka bobikirye, sik ni yapu arye, dobuka uku danyake. Akunum uku dabiceura, sik kilapu arye, din ning el si roti memen ning arye tabakuka, dabicopura, sik isa kil ati, “Nun deiyok kil ani. Elda im deice deiyok kil ulula ati, el si erepnuyabe,” nyabuka, si erenyake. Sik Isa Mutuku Dongonye si erenyak ning ati, din ning, el si kue dabuka, memelinyake. Tonda, anggur tapu duk, purubuka memelinyak mek dobuka, kwemdina ara, daunyak isa ap, ninye arye puturunyak ning ap ati, ‘Nun ni koproba,’ nyabuka, si erenyake. Winibuka malye wininyaka deice, narye, ‘Yata deiyok ati, talye ning si erenyak do?’ tenen, na kanye talima uk dinilirye, yu pia weik unulule.
Utenemunya deice arye, anggun tuba malye winilamlum ning ara ani. Anggunda, ubula dona ap, ninye talye ona ap, kilapu talye yolana ap, tilila yupu lena ap, minina yupu lena ap deice arye, ‘Dib nyapmabe,’ nyana ap, tonda, Isa Mutuku Dongonye si, Bahal ati, kam ning obuka uku dalbana ap, tonda sik deiyok ning kel bikna kum diparyuk, talye kwemdina ning ati, ‘Nun ni,’ nyabuka, si erena ap, winimunce, malyeuk tuba winilulume.
Aning kum bukni, sikce anang urasin atonun patung-patung ati, sik deice ongon baju, dengna weik baju, narye anggunti, areamsise ninguk, kwiriploplumce, abaju dobuka, anggunce memeplum isa si eren ning, el si patung delilamlum ning, ‘Malye kiplyak’ tenen, singipdongoplume. Aning nirya winipmunyeura, aminyan talak, ‘Talya ning isa si erepnamap’ tenen, aning dobuka, tukwak deipmunce, sik minyak zaitun mek ap, nintong teleb nyan ati, el si dupa ap, dobuka aning dam delilulume. Aning nirya ara, dipkoprob na si erena ati, arepnamnutum bukni, anggunce, talye isa si erena ati, amambul ning boyanuka arepmunce, isa siuk erelulume.
Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsine. Ati, na nyapmasin touk, dipkoprob winipsinyeura, aning dipkoprob upnamlarya. Na tenyamse talak akunum kiplyeura, aning nirya winipnamnarya. Anggun malye umunye ning ara, narye kum lubakipnamsine. Tonda, anggun wenen noutam ara, ‘Se, daupmalye, aning ara, akunum bataknulume,’ pia kum nyapnamne. Tonok malye winilamlinye babye, kum bataktinye, anggun nirya wenepnamsine. Tonda kum lyepdopnamsine. Tonda, ‘Se, anggunti ara, bicoe,’ kum tenepnamsine. Anggun malye winilulum ning yala-yala nirya, awininamluma atonun, anggunti wenebuka opnamsine. Nara, Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsina ati, aning nirya dipkoprob nong upnamle. Allah arye, na Yeheskiel biti, nyapnuke.
‘Yukupniba, na dam yanamake,’ tenyamse bukni, tuba tamubuka tonap, ‘Na dam tamubuka yalulume,’ nyamsiba, sik amul deiceuk kekelamik bukni, nati batakalamnikce, mitik yukakuk binuka ulamik. Na dam tamubuka kum yangalamik. Na mapu koprop Israel ninye ara, ‘Isa Mutuku Dongonye si erenamap’ tenen, isa si ara Bahal dobuka, Bahal isa el si eren aik pum tam, el urasin atonun ning puturubuka memelamikce, Bahal el si ati erelamik. Winilamikce, isa el si Bahal ap, yuk-yuk talye ning ati, ‘Nun ni koproba ani,’ nyabuka, patung atonun kintinibuka delilamikce, aning si erena ati, siltong teleb ning uku dongobuka, aisa si erelamik.
Dipkoprob nyapsine. Asapi basam urasin atonun, memebuka deiamlum ning ara, dipkoprob na Allah unye touk, pia kum ulule. Aning ara, kam ulirye, mikip pia kum ulule. Asapi basam urasin atonun patung ara, Israel tam unyak nang kan-kan arye, tonoknye el taruk arye, aning puturupdeibukce, anggun dam boyanuka arepsuke. Atalye ning ara, na Allah atonun, pia kum ulula ati, aning ara, sice buklopnamsine!
Atalak, Allah Yahweh el yupu ara, liman oplirye, lelim lelamle atonun, lelim weik leplirye, el mapu mal olbanuce nang ati, ‘Winiplulume,’ nyabuka, yupu arepnamle. Ninye olbinamak nang ara, yupa pia weik, nukmanto kum upnamaka anya arye, sik anang ara, Allah elce nyaplye touk, ubuka mal olbinamake. Dipkoprop nyapne. Allah Yahweh arye, ‘Yehuda tam ninye malye ulamik ning dekna ati wenepnamne,’ tenebuk sum, akunum uplyopura, tonoknye babye, kum darapdongobuka dakeiyam asa, kum uptinge. Ara, pia kanye imun sum kipnamla ati, nyapsine. Nabi Yoel birye nyabuk.
Ayupu nyabikopura, atalak ara, ninye taruk arye puturupdeipnarye, el si erena ati delilamak touk, nun apu yapu arye sapi mi urasin atonun puturubuka deibik. ‘Aning el si erebuka kisal donamap’ tenen, sik kam ulamuk ning obuka arilamikce, sik taruk deice aryuk puturubuka deiamik ning ati, weik kwalya yubik akarye, aning si erelamik.
Anggunce, el yupu moubuka kum talimunce, aning yanibuka, kum dobolbamunyopura, anggunda malye winin ninguk, talibuka winilamunce, anggun ni koproba Allah ati, “Nun like,” nyabuka batakmunyopura, anggun dam ara, dipkoprob teleb una deiyok ning ton, kum unamsile. Winipsilirye, anggun dam ara, kanye imun una deiyok ninguk, talibuka ulamunba, ikin ninguk yanganamsile. Ara, ‘Se, yata wiriptibye doʼ tenen, ilil weik unamlume. Tonda, yata pil don ning do nirya, ‘Aning winipnuyabeʼ tenen, apil-apil nirya piripdemunba, winipmanto kum uplyopura, pia kanye teniltonauk unamlume. Tonda, anggun kam una ati, lo ton weik tonun kum arepnamsile. Adeice arye, anggun nirya ara, kum daneipnamsile. Yu nang arye, anggun nirya ati, obuka kum daneipnamsiyaka atia. Aning nirya winipnamsila deiyok ara, anggun deice auple. Ara, anggunce na Allah ati, ‘Nun likeʼ tenen, akunum yaniplopmanuluma ati, nyapsine.
Winibuka noutamak arye, Allah el si Yahweh arye, yupu tonok Musa biti nyabuk. “An dipnalam talak, akunum dam kipmala ati ara, an apu yapu diamik touk dipminba, sik ton weiamik sukumuk, tuku lukicopura, sik ap dikdik senamlume. Dipminyopura, Israel ninye talipluma batakminyopura, sikce nati, ton bataknikiba, sik binamak mutuku unyak ninye arye si erenyak Isa Mutuku Dongonyeuk, talibuka si erenamake. Na atibuk, ‘Nun ni koproba Allah,’ kum tenenamniyake. Winibicopura, narye sikti, ‘Dipkoprop wininamsine, aning ton wininamsine,’ nyapdeiamsise yupu ara, batakuka yanipnamake. Yuk ning siuk erepnamake atia.
Ati ara, moubuka tenipdenamlulume. Minop talak arye diprongobuka, wini talak babye, Allah arye anggunti, akunum teleb ubuka meilyamsuk bukni, anggunce Allah el si Yahweh ati, batakdongobuka, yuk mutuku nang arye, Isa Mutuku Dongonye si erenyak ning, anggun babye, aning talibuka, si erepmunyopura, elce anggun malye winipmunyopura, aning ara, ‘Dauplye’ tenen, kum namin kipnamsile. Elce tamubuka, pia kanye imun ning, anggun nong deice deipsilirye, wenebuka opsilirye, sirya daknamsile,” Yosua birye, aninye ati nyabuk.
Ura, tukwak ninye yupa winilye bokuka deibikba, tonok yupa ara, akunum oplobik bukni, tukwak mutuku ninye yupa bitinye tuba kam unmek. Sik kam unmek ninye arye, sik bidamang taruk deice arye, malye-malye winilamik ning ap, isa mer si erelamik ning ap, dekna weik ning dobuka, ninye urasin atonun puturubuka, ‘Nun ni kopropa’ tenen, memebuka deipnarye, si erelamik ning ap, anirya ati ara, sikce, ‘Se, nun malye winilamubu’ tenen, kum batakdongobik. Amalye ning talibuka tuba unmekba eipse. Ninye urasin atonun ning puturubuka deiamikce, si erelamik ning ara, dekna weik ning emas ap, perak ap, besi ning ap, urasin teleb keil ap, yo ap deice arye puturubuka deiyamik bukni, aning-aning nirya ara, kam kum ulamuk ning anya arye, bisik bana ap, asing elina ap, yupu kekena ap, yupu nyana ap pia kum ulamik. ‘Nun ni koprop anye’ tenen, puturubuka deiyamik ning nirya ara, talyeuk ulamik.
ကြော်ငြာတွေ