Nyabukba, Allah el si Yahweh arye, Kain biti tamubuka nyabuk. “Kume. Anyapmalam tonun kum winipnamkile. Yatanye do, Kain biti oplinye bira, narye nyapdeipniba, anye biti kwang dakuka opnamake. Ara, tonok talak uk kume, tekbarye nukuka, kwang dakalanamake,” nyabuk. Allah arye nyabukce, ‘Yata ninye do nirya, Kain eibikirye, obicak’ tenen, yupu sekelongona ati, Kain el nong deice ara, pitin kilina ning deibuk.
Yehezkiel 9:4 - Eipomek4 “Anda, Yerusalem mutuku weik asik noutam dana-dana tam nirya ak, binulyame. Biminyopura, anyasik noutam unyak nang nirya dipdemince, yata nang do nirya, Israel yala nang pia malye-malye weik wininyak ning ap, na Allah arye, ‘Aning ara, pia na like,’ tenenun ning bukni, amutuku nang arye, pia mem ning wininyakba, eibikirye, sik kanye talima noutam arye, ‘Se, aning ara, kum winiptinge, aning ara pia malye wininyakeʼ tenen, talima uk diliba, engenyak nang nirya ara, sik dam binulyame. Biminyopura, anang sik urasin tam bukni, sik asok deice tam ara, lak bikna ati, tanda sekdeipnamlyame.” Allah arye, kain lenan ongopmoknye, seken ning lipmoknye biti, nyabuk. အခန်းကိုကြည့်ပါ။ |
Yehezkiel 9:4
29 ပူးပေါင်းရင်းမြစ်များ
“Anye bira, na ikin weik upnile. ‘Allah el si Yahweh arye, yata nyapnamsil do?’ tenen, na melina ati ara, anggun bimunce Allah arye, nyalye yupu lak nyan nang dam binuka asipdenululume. Ara, winiryuk eipmakce arepmaniyak buku ara, winira aupmasila ati, na ap, na amu tam unyak ninye ap, Yehuda yala ninye nirya ap ara, ‘Yata wirinamap do?’ tenen, binuka asipdenamalulume. Deiyok ara, ani. Allah el aik pum tam pil dona deiyoknye Hilkia bira, Allah arye, nyapdeiamuk yupu nyapdeibukba, sekuka deiamik buku, wangapsuk bukni, winiryuk eibukce arepnuke. Tonda, Allah arye, abuku noutam nyapsuk yupu ara, nun apu yapu nirya arye, moubuka kekena kumce, ayupu talibuka kum ulamike. Malye weik ulamika ati, nun ni koproba Allah arye, derepsilirye, ‘El yu ara, uku buk dilamle atonun ubuka weik arye, wenepsilyak’ tenen, nyapsine. Aning ara, tilila ati kume. Minop talak arye, dipdongobuka, wini talak babye, nun apu yapu ara, Allah arye, nun Israel nang ati, ‘Wininamlulume,’ nyapdeiamsuk yupu atonun ning ton kum kekelamikce, talibuka kum dobolbalamik. Ati ara, ‘Allah arye, yata nyapnamsil do? Tonda, nun yata wiripnamap do?’ tenen, Allah el yupu lak nyana deiyok nang dam binuka asipdenululume,” Raja Yosia birye, el pil dona deiyok nang ati nyapdeibuk.
Allah ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, yuk ninye batakikirye, yanibicopura, na eipnirye weik arye, engenmanye talak ara, na asing maka ara, mek pu dobuka balamle tonun unulule. Yuk ninye arye, an yupu yaninyaka anya arye, engena weik arye engenune. Ara, ‘Se, yata deiyok ati, Allah el nyalye yupu yaniltanyak do?’ tenen, engenune.
Bukni, anggun Israel ninye ara, domba basam ining dobuka, anggun bublan deice ap, bublan itam ap, likdeipmunce, laka kilin ning deipmunyeba eipnamsine. Anggun aik eipnyopura, anggun aik ara kaplipsinirye, ilil kanye bon ning kum arepnamsine. Ara, anggun winiryuk mapu ara, kum opnamne. Bukni, sik aik bublan deice domba ining kum likmace ninye, Mesir mutuku ninye ara, sik winiryuk mapu ap, kam uning weik ning ap, nirya opnamne.
Aik pumuk unamluma deiyok ara ani. Alukunyan ara, Allah el si Yahweh arye, ‘Mesir mutuku unyak ninye, sik winiryuk mapu opnamne tenen, Mesir mutuku noutam nirya binamale. Bilirye, anggun aik dipdesiliba, anggun aik bublan dam dana-dana ap, bublan deice tam ap, ining likmamunyeba eiplyopura, anyaik dam kaplibuka talye mangkau asa binamle. Ara, Allah arye, ‘Kume nyapliba, ninye on malaikat arye, anggun aik wekuka, anggun winiryuk mapu kum opnamle. Bukni, ining ton kum deipmace aik ara, kaplibuka kum binamle. Anyaik ara wekuka, sik winiryuk mapu opnamle.” Allah arye nyabuk.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Anggunce na Yeremia nyapdeipsin yupu, kum kekepnumunyopura, na adiparyuk, ninye babye kum banyakak dabinirye engenamne. Ara, sik kanye talima erena deice arye, maknya kilanyaka ati, nyapne. Na asing maka langdipnilirye, saknamnile. Ara, winipmanto ara, anggunda, Allah el weilul domba atonun ululum bukni, yu nang arye anggunti opsikirye, tomobuka sik mutuku tamubuka bobicak arye, wenen aik dongopnamsiaka ati, aning eipnirye engenamne, nyapsine. Nabi Yeremia birye, nyabuk.
Tonda, ninye arye deipkiknye, an Yeheskiel bira, ‘Se,’ nyabuka, malye nyabuka ngalukunamlyame. Ara winipmanto, ninye ton weik kanye imun upmalya ati, talima daksakmalyeba, ‘Se,’ nyabuka, ngaluklirye, malye nyalamle atonun, an babye atonun winipmince, sik dam malye nyabuka ngalukuminyakarye, pia engenauk unalame.
Tonda, na Allah Yahweh, aning-aning nirya talibuka, deice tam erebuka, Pia Mikip Weik Ununye birye nyapkine. Yeheskiel anda, adiparyuk, an taruk bokmince, an yan ara, tuku deice mikip arye yanipnulyame. Winipminyopura, engepmince, weik yupu deice arye nyapnulyame. ‘Se, anggun nirya moubuka teniplulume! Israel yala nang arye, anggun malye una ap, narye, ‘Aning ara, pia malye aning ara, winina telebe nyapsa ati, aning ara, pia kum wininamlume,’ nyabuka, lak nyapse ning bukni, sikce amalye winin ninguk, talibuka winilamik. Ati ara, narye, ninye oldana ap, kanye imun weik uk, yala-yala arepnamne ning ap, kanye imun weik din patana arepnamne ning ap deice arye, Israel nang, pia weik tonun dibinamake.
Nyanmokba, na Yeheskil birye, kekenmasiba, Allah arye, sik yuk-yuk nang, sik Yerusalem kalikina ati yanmek yin nang nirya ati, ayupu ton nyabuk. Ara, “Aseken ning lipmalinye bira, Yerusalem weik asik noutam eipnuminye talak ara, sikda eluk melibuka, amutuku noutam nirya bobimunce, Yerusalem mutuku weik asik noutam unyak nang nirya ara, moubuka dipdemunce, anye birye, sik urasin deice lak kina ati, seken ning kum sekmalye nang ara, adiparyuk oplopnulyame. Tonda, anang nirya ati ara, sikce ‘Se, anang ara, pia bicoe ati, kum opnuyabe’ tenen, kum bataknamlume. Amutuku unyak nang nirya ara, opnamalyame.
Winipnalam talak ara, wisi nang ap, wisi kilapu ap, wel nang ap, wel kilapu ap, mitik mapu ap, kilmapu ap, sik nirya ara, opnamalyame. Winibuka opnalam bukni, aning moubuka kekepnamalulume. Yata nang do nirya, akain lenan ongopmalinye birye, ninye tonoknye babye, sik urasin deice lak kina ati, seken ning akunum sekdeipmalye nang ara, bol ton kum pipnamlume. Seken ning, sik urasin deice akunum wamlye nang ara, olana meme. Ati ara, wini talak asukum noutam arye, na si eren aik dam arye, deiyok koupnamalume,” Allah arye, sik yin talin nang ati nyabuk. Nyabuk talak aryuk, sikda ninye olana ati, deiyok koubikce, Israel nang ninye deiyok nang nirya, Allah el si eren aik urasin dam tikmek nang kan-kan arye, kong kibuka wipmekce, opnin banmekba eipse.
Tonda aning atonun, anggun mek dina ati, anggur mek ara, mek makau arye kwepmunyeba, langdiplyopura, weik arye dilulume. Tonda, anggun nong bol deice, pia teleb una ati, nintong teleb mek likilalulume. Talye kanye bobuka, aning nirya winilulum bukni, Israel ninye nirya malye wininyak ning ati, mambul kanye bobuka ulamtum bukni, aning ara, pia kum tenelulume. Anggunce, ‘Se, nun apu koproba, Yusup birye deiamukba, dadeipdanin yangalamikce, nun dam unyak Israel ninye ara, yata ning deiyok ati, malye ulilanyak do?’ pia kum tenelulume.
Atalak ara, na Allah arye, Yerusalem asik domikce noutam nirya ara, ‘Na min kum wenebuka opman nang ara, dan sukum duknukmak do?’ tenen, epnamne. Winipmanto ara, ton nang arye, ‘Anang opnuyapʼ tenen, ninye duknukmanto sukum nirya binuka, upna ubuka bobikiba, dirina uplya deice arye, eibuka banyak atonun, na babye atonun winipnamne. Ara, Yerusalem mutuku noutam nirya epra binamne. Tonda, sik Yerusalem mutuku unyak bona utoto talena arye, na Allah ati, ‘Kume, Allah Yahweh, elda nun dam malye wininyap ning babye, teleb wininyap ning babye, ton dipkoprop, ton kum elisulula ati, nun malye wininyap ning ati, kum wenepnamsile. Nun teleb winiyap ning ati, ‘Telebʼ kum nyapnamsile. Nunce malye winipmabye babye, elce, ‘Aning ara, malye,’ nyabuka, ‘Kum wenepnamsile,’ tenenyake. Anang ara, sikce sik pedamnye atibuk, ‘Nunda, mambul bona utotoa talen nang unyapa ati, Allah arye, yata wiripsutu kuma. Kume, el ara, aning-aning nirya ara, kum winisululnye ulula,’ tenenyaka atia. Ati sik winibuka tenenyak nang nirya ara, wenebuka opniba, dipnamake.
Ati ara, na Allah arye, kanye deipsinirye, anggun kanye ikin ning ap, yu nang arye, opsikce, sice bukuka bataklamsik ning ap, kum dasuk ning nirya ara, aikin usilye ning nirya, yangalamsuk ning ara, narye kum kipdeipnamsine. Winipmanto ara, weik kwalya kwalibuka dinmakirye, kanye deibikirye, pia kanye kil-kil mot nyalamak touk, anggunti lyepropsinirye, teleb kipdeipsinyopura, anggun nirya arye, kanye deipnamlume. Deiyok ara, ani. Ara, minop talak, ikin weik ning, anggun deice uamuk talak ara, yuk tam ninye arye anggunti, malye nyabuka, akutulamsik bukni, aning ara, tuba kum wininamake. Naryuk aning nirya kiliplopniba, pia telebuk kipdeipnamsine.
Allah arye Israel ninye ati, weik arye wenebuka, Israel ninye kan-kan, sikce Allah ati, tuba ilil ulamukba, diba tenebuka ulamik ninye arye, bulubuka yupu talipmikce, yupu nyalanmikba, Allah el si Yahweh arye, sik talipmek yupu kekebuk. Sik tuba dib tenen, kili sal ap, sik kayapu dib tenen ninye ap arye, amambul yupu buku dobuka sekik. Ara, ‘Nun ni koproba, Allah Yahweh ati, tuba dib tenebuka elti, ilil tenebuka unyap ninye ara, nun si abuku noutam sekenamabe. Tonda, Allah ati kanye deibuka ubirye, tuba-tuba tenebuka, el siuk erenyap ninye ara, nun si abuku noutamak sekenamabe. Aning sekibirye, luba kina kumce, pia tuba tenenauk unamabe. Tonda Allah arye, aning eiplirye tuba tenenamsile,’ tenebikce, dib tenen ninye si abuku noutamak sekik.
Winipmanto ning ara, basam amul sekikceba, yuk nang eibikirye, ‘E abasam ara, el ning’ tenen, kel biklamak touk, Allah arye nunti lakilin ning arepsuke. Ara, yuk ninye arye, nunti, ‘Anang ara, Allah el ning, tenepnamak’ tenen, Allah arye el lak kilin ning nun deice deipsuke. Winipsukce, ‘Aminyan talak ara, winipnamle ning, dipkoprop winipnamsile, tenepnamak’ tenen, kil taruk muruna atonun ning ati, minopce el Dib Kanye dobuka, nun talima ak dongopsuke. Ara, minopce areamsuk ning ati nyapsine.
Tonda, anggunce amalye ning tuba winilamunyebuk, eipnyopura, ‘Se’ tenen, malye kanye bopnyopura, adeice arye, ‘Allah arye kanye imun kanye arepnilibuk, alye dakdanamne do?’ tenen, ilil upnile. Sik Korintus mutuku noutamak unyakce, malye-malye winilamik ning ati, “Se, nun malye wininyabe,” nyabuka, sik malye winin ning kum batakik ninye eipnyopura, malye kanye bopnirye, na talima ikin unamnile. Sik malye unyakce kum batakanyak ning ara, ani. Ara, talye ubula yolana ap, Allah el winilul ning tenena kumce, pia malye-malye winina ap ati, ‘Mambul’ tenena kumce, talye kanye bobuka wininyaka anya arye, na alye dakdanamne.
Tonda, anggun winimunye ning nirya ati, winibuka tenenamlulume. Winipniba, Allah El Dib Kanye arye, kekebuka eipnilirye, ‘Se, sik malye wininmake,’ tenepnilirye, ‘Malye kanye boplyak’ tenen, malye una kumce, pia diksukumuk unamlume. Allah El Dib Kanye ara, talye ati kum arepsuk bukni, basam amul seklamak atonun, Allah El Dib Kanye arepsuka deice arye, urasin kintinilina atonun winipsuke. Ati, adeice arye, nun kele. ‘Akunum lyepsukce, deksuka ati ara, daulamibya ani, sirya talak weik mambul sum ara, sirya memeproplirye, teleb kipdeipsilirye, el dam bobinamsil’ tenen, bikinyabe.
Aninye ara wininyak bukni, Allah arye nyapsuk yupu ara, min kum upsutue. Winipmanto ara, pia teleb ayukumna yo, gat yo iknabuk, pia gat ulamle atonun, Allah arye nyapsuk yupu ara, min kum kum datue. Allah el yupu noutamak sekamik yupu deice arye, lak kipdeipsuke. Ayupu ara, ani. ‘Allah arye, ‘Aninye na mapu unamake’ tenen, akunum wipdeiamsuk ninye ara, el akunum kel bikamsuke.’ (Bilangan 16:5) Tonda, ‘Yata nang do nirya, “Allah ati akunum diba tenepsa ati, el mi unune,” nyanyak nang nirya ara, adiparyuk malye winin ning nirya ara, batakikirye, balye tamubuka diksukum bisikuk banamake.’
Min nyapmasin ning eipsopura, na Yohanes arye aminyan eipse ning ton laka nyapnusine. Ara tonok weik mutuku dup, el si ara Sion mutuku, Domba Mi Atonye ap, elce akunum lyebuk ninye ap, sik yupa weik 144.000 ninye ap, amutuku dup deice tikmeka, eipse. Sik 144.000 ninye nirya ara, Domba Mi el si ap, el Li Kopropa Allah el si ap, sik asok deice sekdeiyamuk ning ara, eipse.
Aning eipsopura, aning ton eipse. Weik deiyok nang bun ning deice bukmek kili sal ton eipse. Allah arye aninye ati, yupu lepsisikuka bokolina deiyok ning akunum aribuk. Ara, ‘Yuk kili sal ati yupu lepsisikuka bokeibikirye, wenepnamak’ tenen, Allah arye aninye ati yupu lipsisikuka bokolina deiyok ning aribukba, deiyok nang bun ning deice bukmekbuk eipse. Tonda, minop talak Yesus ap, el yupu ap ati diba tenelamikce, Allah el yupu dobuka peterelamikba, yu nang arye, ‘Nun like’ tenen, sik ngang sekeltakalamik ninye, dib kanye weik aunmekak eipse. Aninye sik dib kanye nirya kam bukikce, keting tamun yupa weik 1.000 tahun deice arye, Kristus ap, sik ap arye, aning-aning nirya talibuka deiyok nang ulamikce talilamik. Anyapmasin ninye ara, talye ninye kume. Ara, Pia Malye Kam Ululnye ap, el urasin atonun ning ap ati, si kum erelamik. Tonda, anye el laka kilin ning, el nomor ara sik asok deice ap, sik taruk deice arye kum seklamik ninye ati nyapsine.
Tonda asul kwising ati nyabuk. “Tukwak mutuku ulul maning ap, mutmuta ap, yo kan-kan ap, paplirye, palamle ning nirya ap ara, bok ara, kum dipnamlume. Aning bok dibuka malye kum kipdeipnamlulume. Bukni, Allah el pitin kilin ning sik asok deice kum wamlye ninye ara, weik arye si tonamlulume. Bukni, Allah arye, ‘Aninye ara na tenen nang’ tenen, laka kilin ning, sik asok deice sekuka deibik ninye ara, si tona meme. Bukni, Allah el laka kilin ning, sik asok deice kum ulamle ninye ara, weika arye si tonamlulume.
ကြော်ငြာတွေ