Bukni, Yotam birye, talye isa si erena ati, amutuku noutam ulamik ninye arye memepdeiamikce, si erelamika ara, ulubuka kum batakamuk. Tonda, el ap, Yehuda tam ulamik ninye ap arye, talye isa si erena ati, domba ato ning, ton obuka, aning nirya boyangalamikce, isa ati arelamik. Tonda, sikce aisa si erebuka kina ati ara, siltong teleb nyana ati ara, boyanuka uku dongolamik. Bukni, Yotam birye, mitik tonun teleb pil dobuk ning ara, ani. Ara, Allah Yahweh si erena ap, el arelyakana ap ati, domik aik eitam bublan ara, malye ubuka ati, elce nyaibukba, el pil melin nang arye, bublan lipsisikuka teleb kipdeibik.
Yehezkiel 9:2 - Eipomek2 Nyabukba, lengdar mapsa deice arye dinmase talak ara, sik amutuku kalikina deiyok nang nirya ara, adiparyuk like tonok nakub barye (6) nang, Allah Yahweh el si eren aik dam yangan bisik bublan tam, dabu tam arye kibuka, yanganmekba eipse. Sik anang yayik talak ara, sik yuk-yuk yin taleamik ning ara, adiparyuk sik taruk deice arye, talipdakuka yayik. Sik ayayik kan-kan arye, ninye tonoknye ton, baju pia teleb namin ning, el si kain lenan ongopmoknye bira, yupu seken ning ap, talipdakuka yayuk. Winibikopura, sik anang nirya ara, adiparyuk, Allah si eren aik urasin tam, kam ning opnarye, uku dongonak, el si mesba, pia teleb kat ning si, perunggu deice arye kintinibuka deiamikak, asukumuk wekmekce, binuka tikmek. အခန်းကိုကြည့်ပါ။ |
Yehezkiel 9:2
21 ပူးပေါင်းရင်းမြစ်များ
Winibukopura, Allah si eren aik dam bukni, bai tam bisik bublan dam ara, tonok ning ton deibuk. Ara, ‘Malye winibibiba, nun namin kipnamsil’ tenen, ‘Kam ning obuka, dobukapna arye binuka, aning deice uku dapnamabe’ tenen, pala keil lelebuka yangapdeibuk. Tonda, aning deice arye, Allah arena ati, gandum din ning ton dobuka uku dalamuk. Aning nirya ara, Allah arye elti, ‘Aning ara winibuka pil dopnamlyame,’ nyapdeibuk touk winibuk.
Nyabukce, ayupu ton nyabuk. “Ara, na Allah arye utam unyak ninye ap, sik weik deiyok nang ap, sikti, yukupniba, yanamak talak ara, na mikip sik deice arepnibuk, aninye mikip weik deice yakirye, Yerusalem mutuku nirya yanuka, alabuka doprobikirye unamake. Aninye deiyok nang nirya arye, sik ninye deiyok nang bulamak ning bobuka, Yerusalem mutuku weik cang keil poka dobuka, antanap dongobik poka dam deipnamake. Ara, apoka bublan mikip kipdeibikce, wekelbace bisik bublan dam ara, sik bulamak ning deipnamake. Winibikirye, sik nirya arye, Yehuda mutuku noutamak asik donyak mutuku nirya ap, amutuku unyak ninye ap, akeil deibuka dobik ning ap ara, sik ayanamak yu ninye aryuk, yanuka alapdobikirye unamake. Wininamak talak ara, amutuku nirya ati, malya kipnamake.
Ati ara, narye outam unyak nang, yuk-yuk nirya ati, “Yehuda mutuku nang olyalulume,” nyabuka, yukupnamne. Tonda, na pil dopnamnilanye bira, Babel mutuku nang, sik ninye deiyoknye, Raja Nebukadnesar biti yukupnamne. Yukupnyeba, sik nirya neika yanamake. Narye lo arepnamna deice arye, olyakirye, Yehuda mutuku unyak nang nirya ap, Yerusalem weik asik noutam ululum Israel nang ap, sik ulumik dana-dana mutuku bukni, anggun dam unyak yuk-yuk yala nang nirya ap ara, yanuka, obuka sirya daknamsiake. Narye anggun nirya ati, lakakip deipsinyeba, anggun mal olan nang arye yanuka opsikirye, sice buklopnamsiake. Winibikceba, yuk nang nirya arye aning eipnamake. Eibikirye, ‘Se, yu nang arye anang obuka sice buklopmaka ara, ilil upsile,’ tenebikirye, yok kum-kum dakanamle. Atalak arye dipdongobuka, doyanamle talak nirya ara, yuk nang nirya arye, anggunti, akutubuka nalisikceba, anggun opnamsiak nang nirya ara, alye weik dakanamlume. Aning ara, pia kume kum danamsile. Na Allah Yahweh arye aning akunum nyapmasina ati, aning nirya ara, dipkoprob nong upnamle!
Wininmekba, yuk nang eibikce, laka nyalbanmekba, Yehuda mutuku yuk-yuk ninye deiyok kibuka, taleamik nang nirya, sik dam binuka nyabikba, kekebikce, sik amutuku nirya ninye deiyoknye, Raja el aik dam arye batakuka, Yerusalem mutuku noutamak, Allah el si eren aik dam yayik. Yayikce, anyaik bublan el si ara, Winiryuk Bisik Bublan nyalamik bublan dam, deiyok nang bulamak deice yanuka bukik.
Aning eipse talak ara, Allah Yahweh arye, pia teleb kain baju lenan ongopmoknye biti, nyabuk. “Otam tikmak Kerub-Kerub, sik yan amu tam, aupmal bisik arye wekmince, roda-roda aupmal noutam, binuka weknulyame. Asukum wekminyopura, uku kalum aupmal noutam arye, kalum ton dopropmince, an taruk arye talipnulyame. Akalum dopropminyopura, dobukapmince, amutuku Yerusalem mutuku deice tam, im noutam arye, utam yamupminyeba, Yerusalem asik deice saknamle,” nyabuk. Nyabukba, adiparyuk nyapdeipmok touk, anye birye wininmokba, nara moubuka bita, dinmase.
Anye eipse talak ara, elcuk min taruk deice arye, talipmanuka atonun kibuka bibikukce, na kisok potong yanuka talipnuke. Anye birye winibuka talipnukba, adinmase talak aryuk, Allah el mikip weik Allah, el Pia Teleb, Lek Dip Kanye arye erepdakuka, pia im deice tam bobinukba eipse, ara pia im deice tam uamuk bukni, tukwak tam mutuku-mutuku sirya, im sirya nirya ara, utam uamukba, eipse. Tonda atalak aryuk, Allah arepnuk lengdar deice arye, Allah el Pia Teleb, Lek Dip Kanye arye, Yerusalem mutuku bobinuke. Ara, Yerusalem mutuku noutam bukni, Allah Yahweh, el si eren aik dam bobinuke. Ara, anyasik dabu tam, (arah utara) lilun botopdeiamik bisik bublan dam deipnukba eipse. Abobinuka deipnuka dam ara, isa si eren ning, ninye arye urasin atonun puturubuka, ikdeiamik ning, el si ara patung berhala, tikamuk. Adeiamik ning ati ara, Allah el yu weik uamukba, ‘Na tenen nang ara, na tibuk si erepnitinge. Yuk ning ati, si ton pia eremna meme,’ tenelamuk.
Nyabukopura, atalak aryuk, pia namin teleb baju, el si kain lenan ongopmoknye birye, tamubuka yayukce, Allah ati yanuka lak nyabuk. Ara elce, “Na ni Allah, ance, ‘Aning winipnamlame. Aning ton kum winipnalame,’ nyapdeiamuk touk, aning nirya ara, adiparyuk akunum winibuka, sirya dakmane. Tonok babye, kum batakse,” nyabukba kekepse.
Mesba dam tikmek talak ara, Israel nang arye, si erelamik Allah, el si Yahweh, el pia teleb una ap, mikip ap ulya deice arye, lak kina ati, el weik dirina uamukak arye, panayanuka tikuk. Ara, Allah si eren aik pum tam, Pia Teleb Lek Aik noutam arye deiamik ning, si Peti Perjanjian deice tam, malaikat urasin atonun kibuka, kat ning emas arye, puturubuka deiamik ning, el si Kerub bitinye, dana-danatikdik sukum, adirina min arye, awamuka arye lopdakuka, asukum arye welebuka, Allah si eren aik wekelban bisik, bublan wekelbalamik tam binuka tikuk. Adirina ara, asukumuk yanuka tikukba, Allah Yahweh arye winipmokba, teleb namin baju, si kain lenan ongopmokce, yupu seken ning lipmoknye biti, yukubukce, ayupu ton nyabuk.
Aning akunum kintiniplyopura, atalak wininamle ning ara, ani. Allah el si eren aik bukni, mambul aik el si ara, Pia Teleb Lek Aik min kum binulye talak ara, mem aik pia teleb lekak weknamla ati, min yuma ara, el nong nirya mek kekenamlule. Mek keklyopura, Allah ap, ninye ap, ansinilina deiyok nang ongolamice baju, pia lek baju ongonamlule. Ara, el baju amu ning babye, tonda baju alip tam ning babye, pia lek ulul baju uk ongonamlule. Winiplirye, alek baju yala ninguk bukni, cang ning dobuka, el deiyatinga koulongonamlule. Winiplyopura, el kisok nirya, kurun baju aryuk kitinamlule. Akurun baju kum ongoplyopura, na Pia Teleb Lek Aik kum wektue. Allah arye nyabuk.
Na, Amos birye dinmasiba, Allah Yahweh ara, kam ning obuka arelyangalamik dam yanuka tikmokba eipse. Ara, keil pala taplakuka deiamik dam, Allah eluk yanuka tikukba, narye akunum winibuka eipsiba, Allah el si Yahweh arye, ayupu ton nyapdeipnuk. “Narye na si erena ati domik aik, ayukumna nirya ara, na taruk mikip arye, ayo deiyok dam kwiniplopnamne. Winipniba anyaik atolonga nirya ap, ayukumna yo ap, amsuna nirya ara, loknamle. Winiplirye anyaik ikuka domik ayukumna nirya ara, ulubuka saklirye, ninye kisok deice pulbiliba, ninye nirya dipnamake. Atalak arye, sik kum dipmakce nang ara, mal ap, parang ya ap, doyanuka olan makca deice arye, obuka sirya daknamne. Winipnamne talak ara, tonoknye babye, ton leibuka yuk tam kum binamle. Tonda tonoknye babye, pia kum bataknamne. Sik malye unyak ninye nirya, obuka sirya daknamne.
Anyaik kuklobukba, Allah el im deice tam si eren aik pum tam arye, sik tekbarye malaikat arye, ninye wenena ati, weik kanye imun ning tekbarye bobuka yanmekba, eipse. Amalaikat sik baju ara, pia kurun teleb ning dirin weik baju ap, sik taram deice ara pia teleb poron cang baju pakupmek ning ap, emas urasin ato ning ketepmek ning ap, ongopmekba, eipse.
ကြော်ငြာတွေ