Nyabukce ayupu ton dukdongobuka nyabuk. “Naie, winipmanto ‘Ninye deiyoknye dam nyapnun’ tenen, bisik tuba banmanye talak arye, Allah el si Yahweh, el Dib Kanye arye bobuka yuk mutuku delilbikiliba, ‘Tuba atikmala’ tenen, ninye deiyoknye Ahab dam binuka nyapniba, yalirye, yanuka dipdelamkiliba, kum eipkilyopura, ‘Ahab birye, ‘Tilila nyapmanilama,’ nyabuka na opnilyak’ tenen, nyapkine. Bukni na nio, na mitik talak arye Allah el si Yahweh ati, el siuk erepnin yangalamse, ani wini talak babye tuba si erenune. Ati biknilyame na nio. Nara an amu tam atonunye unye bukni, anyapmanilam ning ara, na ilile.
Yehezkiel 8:3 - Eipomek3 Anye eipse talak ara, elcuk min taruk deice arye, talipmanuka atonun kibuka bibikukce, na kisok potong yanuka talipnuke. Anye birye winibuka talipnukba, adinmase talak aryuk, Allah el mikip weik Allah, el Pia Teleb, Lek Dip Kanye arye erepdakuka, pia im deice tam bobinukba eipse, ara pia im deice tam uamuk bukni, tukwak tam mutuku-mutuku sirya, im sirya nirya ara, utam uamukba, eipse. Tonda atalak aryuk, Allah arepnuk lengdar deice arye, Allah el Pia Teleb, Lek Dip Kanye arye, Yerusalem mutuku bobinuke. Ara, Yerusalem mutuku noutam bukni, Allah Yahweh, el si eren aik dam bobinuke. Ara, anyasik dabu tam, (arah utara) lilun botopdeiamik bisik bublan dam deipnukba eipse. Abobinuka deipnuka dam ara, isa si eren ning, ninye arye urasin atonun puturubuka, ikdeiamik ning, el si ara patung berhala, tikamuk. Adeiamik ning ati ara, Allah el yu weik uamukba, ‘Na tenen nang ara, na tibuk si erepnitinge. Yuk ning ati, si ton pia eremna meme,’ tenelamuk. အခန်းကိုကြည့်ပါ။ |
Yehezkiel 8:3
39 ပူးပေါင်းရင်းမြစ်များ
Raja Ahas bira, apil nirya akunum winibukopura, minop talak Allah arye, “Na si erenamnuluma ati, kat ning, el si perunggu deice arye, domba ato ning opmunce, uku dongonamlumak ati, el si mesba ton memepdeipnamlume. Aning ara, na Allah Yahweh, na si eren aik, bai tam bukni, urasin dam deipnamlume,” nyapdeiamuk. Aning dobuka, intinip deiamik ning ara, Ahas bira nyaibukba, el melin nang arye, Allah si eren aik urasin tam deibikce, kat ning el si perunggu arye, memebik mesba dobuka, yukak deibik. Ara, perunggu deice moubuka deibikce, deiamik mesba ara, anyaik urasin dam bukni, anyaik wekelbana ati, bublan dam deiamikak arye, dobuka kisikukapmunce, anyaik bublan atam, otam ara, winiryuk memebik mesba deiamikak ubukba, anoutam bukni, utam ara, aperunggu mesba dobuka deibik. Akunum delilbiyikce, winiryuk memepdeiamik ninguk, Allah Yahweh si erena ati deibik.
“An kekepsimince biklyame. Na nio, nunda an amu tam pil don nang atonun unyabe. Sik mikip-mikip nang ara lima puluh nang aunmake. Ati ara, anang ati yupu nyapminba, an ni koproba Elia biti elbinune. Nun walwal bukni, winipmanto ara, Allah el si Yahweh, el Dib Kanye arye, Elia bobuka biyuk mutuku deice do,ura, yuk lyu mutuku do, dabinuka batakmalula. Ati ara, elbinuyake,” nyabuka, Elisa biti nyabik. Nyabik bukni, Elisa birye, “Kume, elbana ati, yupu kum nyapnulume,” nyabuk.
Asyera isa kil, el urasin atonun ubuka, dobuka kintinip deiamik ning ara, Allah si eren aik noutam deiamuk. Allah Yahweh arye, Raja Daud ap, el mi Salomo ap ati, sik deice nyapdeiamuk. “Amutuku noutam ara, Yerusalem mutuku ati, anyasik kota Yerusalem ap, amutuku noutam, na si eren aik dopnamlumak ara, na Allah Yahweh, na si asukum pia erenamniyake. Ura, Israel yala ninye unyakak ara, asik weik aupmal bukni, anyasik Yerusalemuk wipdeipne. Sik dua belas (12) nang, yala-yala yuk ukirye, sik unyak mutuku yuk-yuk aulamikca babye, ‘Yerusalem mutuku tonok ati, na si eren aik ara, asukum dopnamakʼ tenen, akunum wibuka akwamse,” Allah arye nyapdeiamuk.
Tonda, sik Israel yala nang arye, “Nun ni ani,” nyabuka, talye ning ap, isa ap ati, diba tenelamikce, aning atibuk, si erelamikce, mutuku kon deice, isa si eren aik dolamika ati, Allah arye sikti, yu weik ulamuk. Allah arye, ‘Kume, ‘Naʼ tenen nang arye, na siuk erepnitinge. Yuk talye ning ati, si kum erenamake,’ tenebuka ati, sikce talye ning ati, “Nun ni ani,” nyabuka, isa si erelamikba, Allah ara, yu weik ubukba, yu kanye bolamuk.
“Yata ning do nirya, urasin atonun puturubuka, aning ati kisal dobuka, gutam tuku dipdongobuka si erena meme. Anggun ni Allah ara na Yahweh uka. Ati yuk talye ning si erena meme. Na mapu arye yuk ning nirya ati, ‘Nun ni’ tenen, si erebikcopura, na malye kanye bobuka pia yu unune. Nati, ‘Nun like’ tenen, malye-malye nyaninyak nang ara, sik wenepnirye, sikce deipnamak mapu ap, sik mapu deipnamak mapu ap, amapu babye deipnamak mapu ap ara, sik deipkirikdop nang ninye dika bitinye do, winilye do nirya ara, tuba wenenamne,” Allah arye nyabuk.
Aninguk kum bukni, tonda, minop talak sikce na Allah ati, “Nun ni koproba Allah, el siuk erenamabe,” nyabuka, teleb weik aik ara, dolamikce, “Anyaik ara, Allah el aik pia unamle,” nyalamik. Bukni, sikce anyaik pum isa si eren ning dobuka deibikce, talye isa ati, si erelamika deice arye, na si eren aik akunum malye kibuka yanipnike. Ati, wini talak ara, anyaik pum tam ara, ninye yakirye, na si ton pia kum erepnitinge. ‘Aning ati ara, na pia lik weik,’ unulule.
Allah el si Yahweh arye, ayupu ton nyabuk. Yehuda tam ululum ninye ara, pia weik malye akunum winilulume. Anggun malye winilulum ning ara, na tuba eilisunune. Ara, anggunce, ‘Nun ni koproba,’ nyabuka, Isa Mutuku Dongonye si erenyaka, eipnirye, na Allah arye, ‘Sikda, pia malye wininmake,’ tenesunune. ‘Aning ara, na pia like,’ tenenun ning bukni, sik Israel nang arye, akunum dopropmakce, na Allah si eren aik noutamak yanuka deipmake. Anyaik ara, na si dobuka, anyaik deice deipsirye, ‘Anyasik noutamak ara, na siuk erenamake,’ tenelamse bukni, anggunce pia malye ning ap, Isa Mutuku Dongonye si erena ati, taliplum ning ap dobuka, na aik noutamak deipmaluma deice arye, na aik akunum malye kipdeipmalume. Winira, na si eren aik ara, akunum anggunce malye kipdeipmanulume.
Ara, atalak ara, keting tamun yupa weik, yupa tonok kepdopnye pamubarye (tiga puluh tahun 30) ubuk. Dumu wala arye, like pamu sum (tanggal 5) ubuk sum ara, Atalak ara, Babel mutuku ninye deiyoknye, Sisinanye Nebukadnesar ap, el yin talin nang ap arye, Israel ninye tongobuka tapu koubikce, Babel mutuku bobinamsikba, daulamua ani, keting tamun pamubarye, akunum kibukopura, mek si Kebar mek lelun unmase. Ara, na Yehezkiel ap, Babel mutuku nang arye, yuk Israel ninye bobuka delilbalamik ninye ap, Kebar mek lilunak unmapu. Atalak ara, Allah arye, im deice bublan kukibukba, weik mambul ning ton, laka kipsukba, narye eipse.
Akunum adiparyuk nyapdeipmok touk, kain lenan ongopmoknye birye, abiyukopura, aning el si Kerub ara, iknapye dam tam, Allah Yahweh el si eren aik dam tam, arah selatan tam tikmek. Sik atikmekba, anye birye, Allah el aik dam biyukopura, Allah el si eren aik tam nirya ara, dua bum tonok yayukce, lelipdongobukba eipse.
Aning nirya, akunum winibukba eibukopura, aning ara, Allah el Pia Teleb, Lek Dip Kanye arye, na Yeheskiel biti, inibuka bobinukce, mitik otam deipnuke. Elce deipnuka ara, Allah Yahweh el si eren aik dam bukni, keting panalyangan tam ara, keil arye cang poka domik, anyasik dam wekna ati, bisik bublan botopdeiamik ning ara, bisik bublan dam deipnuke. Asukum ara, narye dilamsak, bisik bublan dam bulubuka tikmek nang ton, eipse. Ara, anang nirya ara, dua puluh lima (25) nang unmikak eipse. Aunmeka noutam ara, sik amutuku taleamdik nang, deiyok nang bitinye eipse. Ara, ninye si Asur, elce deiamuknye Yaazanya ap, tonda Benaya elce deiamuknye Pelaca ap, unmikak, narye eipse.
Ati ara, tukwak kipdeipmok talak ara, Allah el Pia Teleb, Lek Dip Kanye arye, na Yeheskiel erepnukba, lengdar mapsa deice arye, adiparyuk tamubuka, Babel mutuku noutam bukni, min talak, sik Babel mutuku yin talin nang arye, Israel nang nirya obikce, ton tam nang ati, tapu koubuka, sik mutuku, Babel mutuku tamubuka bobinuka deiamikba, ninye asik nang atonun ubuka ulamikak, amalaikat arye, na bobinuka deipnuk. Winipnukura, aeipmasi lengdar nirya ara, adiparyuk kum dayuk.
Nyalongoyuk talak aryuk, Allah el Dib Kanye arye, na dobuka ereipnuke. Winipnuk talak arye, na balye tam arye, yupu weik asa arye ton nyabukce, lelim weik lenmokba kekepse. Nun ni Allah, anda im deice tam ulyam mutuku ara, ei unyak malaikat nirya arye, an si erebikirye, ‘Allah ara, pia telebuk ulule, nyanamak’ tenen, patanulule.
Lelim weik kekepse talak ara, Allah el Dib Kanye arye na dobuka, welebinukce, yukak binuka deipnukopura, adiparyuk Allah Yahweh, el mikip, na kanye talima pumak moubuka talipnuke. Winipnuk talak ara, na kanye pun tam ara, ‘Yata deiyok ati do?’ tenen, na kanye boktopnukce, malye kanye bobuka engepsirye, mitik anun ton, teniltonauk tuba upnuk.
Atalak ara, Babel mutuku tuba ulamse talak bukni, lengdar atonun mapsirye dinmasiba, Allah arye na bobuka, Israel nang ulamik mutuku noutam bobinuke. Winipnukba, amutuku noutam weik tonun bukamuk mutuku kon deice binuka deipnuke. Atalak ara, narye dana-dana tam dinmasiba, na dam bukni, weik asik atonun ning, weik ning domika, ara weik kota kilamak mutuku atonun ton, iknapnye tam (arah selatan) awamukba eipse.
Tonda, minop talak ara, sik Israel yala nang, sik deiyok-deiyok nang arye, sik aik domikce, bisik bublan dana-dana tam, yo deibuka domik ning ap, abublan wekelban bisik yanina ak ap, na aik dam atonun domik. Winilamika ati, sik aik otam, na aik atam ara, tonok keil poka domik bukni, sik aik ara, pia mening dam ubuka ati, winilamika deice arye, na leknye si ati, pia malye kililamnike. Winilamnik ning nirya ara, narye, ‘Aning-aning nirya, pia na like. Aning nirya ara, pia na likʼ tenenun bukni, aning tenina kumce, talye mangkau asa, malye winin ning weik ulamik. Winilamika ati, sikti, yu weik upnukba, amutuku ulamik nang nirya obuka, sirya dakse.
Ati ara, diba nara, anggun ni koproba Allah Yahweh, aning-aning nirya talibuka, deice tam erebuka, pia mikip weiknye unirye, ayupu ara nyapsine. Na dipkoprob pia kam unye touk, anyapnusin ning ara, dipkoprob upnamle. Dipkoprop wenepnamsila deiyok ara, ani. Anggunce na si eren aik pum tam, Pia Teleb Lek Aik ati, pia malye updeipnamlume. Anggunce, pia malye weik ning, talibuka winilulum ning ap, talye ning ati, ‘Nun ni koprobaʼ tenen, isa si erebuka moromunye ning ap deice arye, na si eren aik, akunum malye kilinamlume. Winimunya ati ara, narye anggun nirya ati, pia bico tenena kumce, wenebuka oplopnamsine. Tonda, narye anggunti, ‘Se, anggunda ‘Naʼ tenen, nang umunya anya arye, bico tenepsinirye, anggunti teleb kibuka melilamsise touk, tuba kum wininamsine. Aning kum bukni, oplopsinirye, kum kipdeipnamsine.
Israel yala nang ara, sikce memebuka deiamikce, talilamik urasin pia teleb kwerya ara, cicin do, gelang do, permata do, aning nirya ati, sikce, ‘Se, aning nirya ara, urasin pia teleb ning ululule,’ tenelamik. Tonda, ato ning boyanuka, talye ning bukni, sikce, ‘Nun ni bira aniʼ tenen, isa si erena ati, urasin teleb ning ton, memebuka delilamik. Winilamik bukni, na Allah arye, ‘Aning ap, aning dobuka malye ning, sikce puturubuka delinyak ning nirya ap ara, na pia like,’ tenenune. Ati ara, na Allah arye, aning sik talinyak urasin teleb ning emas ap, perak ap ati, ‘Aning nirya ara, na pia like,’ tenenune. Aning talinyaka ara, na dam ton boyakirye, nati telebe nyabuka, na si kum ereninyak diparyuk, nati ton kanye kum delininyake.
Aeipse talak ara, Allah arye nati nyapnuke, “Se anda ninye arye deipkiknye, an urasin ara, tamubuka dabu tam, dipdelyame,” nyapnukba, dinmase. Dabu tam dinmasiba, anyasik bisik bublan botcamika dam ara, aisa si erena ati, memepdeiamik ning otam ara, ninye urasin atonun memebuka, aisa si erena ati deiamik ning, el si patung berhala eipse. Adeiamik ning ati, Allah el yu weik uamukba, ‘Na tenen nang ara, natibuk si erepnitinge. Yuk ning ton si erena ati ara, pia meme ati, na like,’ tenelamuk.
Nyabukba, lengdar mapsa deice arye dinmase talak ara, sik amutuku kalikina deiyok nang nirya ara, adiparyuk like tonok nakub barye (6) nang, Allah Yahweh el si eren aik dam yangan bisik bublan tam, dabu tam arye kibuka, yanganmekba eipse. Sik anang yayik talak ara, sik yuk-yuk yin taleamik ning ara, adiparyuk sik taruk deice arye, talipdakuka yayik. Sik ayayik kan-kan arye, ninye tonoknye ton, baju pia teleb namin ning, el si kain lenan ongopmoknye bira, yupu seken ning ap, talipdakuka yayuk. Winibikopura, sik anang nirya ara, adiparyuk, Allah si eren aik urasin tam, kam ning opnarye, uku dongonak, el si mesba, pia teleb kat ning si, perunggu deice arye kintinibuka deiamikak, asukumuk wekmekce, binuka tikmek.
Allah ati bataklamikce, amutuku noutamak ulamik ninye si erelamik isa mer, pia malye-malye isa mer, sik siuk erelamika deice, Allah arye Israel ninye ati, yu kilina ap arye, weik ulamukce, malye kanye bolamukce, sikti, kanye wililamuk. Isa mer nirya ati, pia malye unyaka anya arye, Allah arye, ‘Aning ara na like,’ tenelamuke.
Sik dipkoprob Allah kum bukni, Isa Mutuku Dongonye si erenyaka deice, na ning ara, ‘Se, yata ati, na siuk tuba kum erenyake’ tenen, sikti bouku sukupnukce, malye kanye bonune. Tonda, talye ning, Isa Mutuku Dongonye si erenyaka deice arye, yu weik unulule. Sik wininikca ati ara, na minop talak kum wiamse ninye bukni, talye yala ninye melipnyopura, Israel ninye arye, ‘Se, yata ati do? Nun kum melisulul bukni, yuk talye yala ninye melilula ara, yata ati do?’ tenen, talima wilibuka, malye kanye bonamake. Aning atonun, yuk yala ninye ara, dipkoprob nati, teleb ubuka, min kel bikamnik ninye bukni, sikti melilamniba, Israel ninye arye, ‘Yata ati do?’ tenen, yu upnamle.
Aning kum wininamluma deiyok ara, nun ni koproba Allah, Yahweh, elda uku buk arye, malye ning nirya dilamle atonye ulule. Tonda el mapu ara, yuk-yuk ning ton, si erebikcopura, elce pia yu weiknye ulule. Anggunce, yuk ning si erepmunyopura, aning ara namin kibuka, talye dem arye kum bataktue.” Musa birye Israel ninye ati, ayupu nyabuk.
Anggunce anyapmasin ning atonun ati, si pia kum erenamlume. Tonda, aning yala-yala nirya ara, si erena ati, anggun kutam tuku deice dipdongobuka, si pia kum erenamlume. Nara anggun ni Allah Yahweh ara, aning atonun kum unune. Nara, anggun ni koproba Allah unune. Nara, Yahweh unune. Anggunda, ‘Naʼ tenen nang ululuma anya arye, anggunce yuk talye ning ati, ‘Aning arye, melipnamsilʼ tenen, si eremunyopura, pia malye kanye bobuka, anggunti, yu weik upnamnile. ‘Na tenen nang ara, na si tonok ati, erenamniyake,’ tenenuna ati, nyapsine. Yata nang do nirya arye, atalye ning ati, si erebikirye, nati, ‘Nun like,’ tenebikirye, na yupu yanipnamniyak nang nirya ara, pia ati wenepnin balamnya ani, sik anang arye deibikiba, dadeipdanin, balamikca ani, daunamak mapu nirya babye, pia ati wenenamnarya. Ara, el li birye deipliba, el mi arye deipnamle mi, anye mi arye deipnamle nang, anang arye dadeipnamak mapu babye, ninye dika like winilye ning ap, tonda ninye dika dumu ning ap, dotalak unamak nang, sik dam ikin ning deibuka, wenenauk wininamne. Ara, talye ati kum bukni, nati, ‘Nun lik,’ tenebikirye, na yaninamniyak nang ati, nyapsine.
Ura, ‘Yuk talye ning si erena pia kume,’ nyapmasin yupu deiyok ara, ani. Ara, urdem ati, kum nyapsine. Anggun noutamak ulul Allah ara, el si Yahweh arye, anggunti, ‘Na ninye, na mapu koprop unyake,’ tenesulula ati, anggunce, ‘Nun ni,’ nyabuka, yuk talye ning si erepmunyopura, Allah el yu, anggun nong deice deipsilirye, wenepnamsile. Tukwak mutuku noutam unamlumak nirya, wenebuka opsilyak arye, ‘Anggun nirya, sirya daksilyak’ tenen ati, nyapsine. Allah elda, yuk-yuk ning ulamla atonun una kumnye.” Musa birye, Israel ninye ati nyabuk.
Israel ninye arye nyabik bukni, Yosua birye tamubuka aninye ati nyabuk. “Kume, angguncuk, ‘Allah el amu tam ubirye, el siuk erenamabe,’ tenepmalum bukni, aning ara minopce, talye kanye bobuka, kum nyaptume. Deiyok ara, Allah el si Yahweh, elda pia diksukum, kurun kopropuk ululnye. Elce el talilul ninye ati, ‘Na ninye, sikce yuk ning ati, si pia kum ereptinge’ tenen, aning nirya dilulnye binya arye, yuk ning ati talibikirye, si erebikcopura, el yu weik ulule. Tonda, anggunce, Allah el nyalye yupu yaniplopmunce, malye winin ning winimunyopura, amalye winipmunya ati, namin kum kipnamsile.
ကြော်ငြာတွေ