Yehezkiel 8:16 - Eipomek16 Nyapnukce, adiparyuk Allah arye, na boyanuka, Allah Yahweh el si eren aik domik ning, lilun dam bobinuke. Ara, anyaik dam wekelban bisik bublan, botopdeiamika dam bobinuka ara, ani. Ara, Allah el si erena ati, kam ning opnarye, uku dongona ati, kintinip deiamik ning, el si mesba, otam upmokba eipse, atalak ara, anyaik kup-kupak unmek nang ton eipse. Asukum ara, ninye yupa ara, pia weik, dua puluh lima (25) nang unmekba, eipse. Sik aunmek nang ara, Allah el si eren aik, Pia Teleb Lek Aik, sik donga tam unmokba, sikce asukum wekmekce, keting panalyangan tam, urasin deibuka, sik kutam tuku dipdongobuka, keting panalyangan tam unmekce, si erebuka kinmekce, keting si erenmekak, eipse. အခန်းကိုကြည့်ပါ။ |
Yehezkiel 8:16
29 ပူးပေါင်းရင်းမြစ်များ
Raja Ahas bira, apil nirya akunum winibukopura, minop talak Allah arye, “Na si erenamnuluma ati, kat ning, el si perunggu deice arye, domba ato ning opmunce, uku dongonamlumak ati, el si mesba ton memepdeipnamlume. Aning ara, na Allah Yahweh, na si eren aik, bai tam bukni, urasin dam deipnamlume,” nyapdeiamuk. Aning dobuka, intinip deiamik ning ara, Ahas bira nyaibukba, el melin nang arye, Allah si eren aik urasin tam deibikce, kat ning el si perunggu arye, memebik mesba dobuka, yukak deibik. Ara, perunggu deice moubuka deibikce, deiamik mesba ara, anyaik urasin dam bukni, anyaik wekelbana ati, bublan dam deiamikak arye, dobuka kisikukapmunce, anyaik bublan atam, otam ara, winiryuk memebik mesba deiamikak ubukba, anoutam bukni, utam ara, aperunggu mesba dobuka deibik. Akunum delilbiyikce, winiryuk memepdeiamik ninguk, Allah Yahweh si erena ati deibik.
Tonda, Yosia birye apil ton dobuk. Ara, minop talak Yehuda yala ninye deiyok nang arye, sik balye deice bukuka balamik basam, el si ara kuda, aning ton dobuka Allah el aik bublan dam deiamik. Winilamika deiyok, ara ani keting ara, ‘Nun ni’ tenen, keting si erena ati, kuda basam ton dobuka delilamik. Akuda basam delilamikak ara, Allah el si eren aik wekna ati bublan dam delilamik. Akuda basam ara, tonok deiyoknye el si Natan-Melek, el ulamuk aik dam delilamik. Bukni, Yosia birye nyabukba, akuda basam dobukabikce, yukak delilbiyik. Winilamika ati, Yosia birye nyapdeibukba, kuda basam kirikuka tuku deice balamik ning, el si ara kereta kuda, aning babye dobuka uku dongobuk. Akereta basam babye, sik malye nang arye, keting ati tenelamikce, ‘Nun ni,’ nyabuka akereta basam dobuka arelamik. Winilamika ati ara, Yosia birye akereta nirya dobuka uku dongobukba dibuk.
Tonda minop talak Israel ninye taleamika deiyok nang, Raja nang arye, wibuka deiamikba, isa si erena ati wibuka deiamika deiyok nang, malye imam nang nirya ara, Raja Yosia birye batakuk. Amalye imam nang arye, minop talak diprongobuka atalak ara, sik isa si erena ati, Yerusalem mutuku dana-dana tam ap, Yehuda tam noutam bukni, yuk ninye asik domik mutuku dam ap, mutuku kon deice welebuka balamikce, nintong teleb ning dobuka uku dongolamikce, isa si erelamik. Isa Mutuku Dongonye si erelamik ning ara, Bahal si ap, tonda isa sisibuka keting ap, wala ap, kurya ap, tonda im deice tam ulul ning ati, ‘Nun ni yape’ tenen, aning nirya ati si erelamik. Ati, sik malye imam nang arye, isa si erelamik nang nirya ara, Raja Yosia birye anang nirya kum daneibuk.
Nun ni yapu ara, Allah Yahweh arye, ‘Winipnamlume, aning ara, kum winipnamlume,’ nyapdeiamuk yupu ara, moubuka kum taleamikce, elti, batakuka yaninauk ulamik. Sikce Allah el kanye teleb un pil ton, kum dolamik. Tonda, Allah ati donga anibuka batakamikce, Allah el si eren aik ati ton, ‘Kume anyaik kum wekenamabe, nun lik,’ tenelamikce, anyaik mingne kum kililamik.
Aning nirya akunum winibikopura, Allah Yahweh el si eren aik bai tam bukni, anyaik dam keting yangan tam ara, imam-iman nang nirya wekmantoak ara, ninye deiyoknye Raja Salomo birye, ‘Asum ara, yuk una ati kum bukni, Allah Yahweh el si erena ati, arenuyab ning nirya ara, asukumuk arenuyabʼ tenen, anyaik dam lo teleb kipdeibukce, aning-aning nirya Allah ati arebuk. Asukum arebuk ning deiyok ara, Allah Yahweh si eren ati, kam ning obuka uku dabuk. Tonda, ninye arye wa wibuka koulamak din ning gandum ap, basam kop ap teleb ning ap, ‘Allah ap, ninye ap, teleb kibuka neika unamap tenen, elanak ati, aning nirya boyanuka, uku dabuka si erebuk. Ara, keil arye taplakuka yangalin ning mesba ap, teleb kat ning el si tembaka deice, Raja Salomo birye domuk ning ara, aning uku dana ak ara, weik arye kum domuk. Anyak dam lo noutam arebuka deiyok ara, min talak ara, Salomo birye tembaga mesba memepdeibuka deice arye, aning nirya ara, neikop arye arepman kum ati, anyaik dam lo noutamuk arebuk.
Ara, anggun nirya arye yo dobuka, puturubuka deipmunce, aning ati, ‘Nun ni koprop,’ nyabuka si erelulume. Aning atouk, talye urasin teleb keil dobuka deipmunce, ‘Nun nin bira ani. Elce nun deipsuke,’ nyabuka, si erelulume. Adeice arye, anggun diamuk alye dakdanamlume. Ara, urdem ati kum nyapsine. Anggunce nati, balye tamuplumce, nati batakanululume. Na dam kum yangalulume. Nara, anggun balye tam atonun, akunum deipmanulumce, na batakuka banululum bukni, anggun urasin ara, na tam atonun tuba elinululume. Deiyok ara, na nyasinye yupu nirya batakanumunce, na si kum erenululum bukni, ikin ning anggun dam yasilye talak nirya ara, imun kanye bopmunyopura, natibuk, ‘Se na nio, ance melibuka lyepsilyame,’ nyabuka, tuba moronululume. Wininumunba, anggun moropmanumunye touk, ubuka lyesunune.
Sik amutuku nang nirya ara, na Allah ati akunum bataknikce, donga karikuka, yukak dinyake. Teleb ning ara, na dam yanmatingce, na urasin tam yanuka, moropmaniting bukni, sikce nati bataknike. Narye sikti, peterepsirye, Teleb ning ara ani, malye ning ara ani. Aning wininamlume. Aning ara, pia kum wininamlume,’ nyabuka peterelamsa ani, tuba peteresunun bukni, sikce na yupu kekebikirye, moubuka kum talinyake. Na yupu pia yaninauk winininyake.
Nunce, ‘Wininamabe,’ nyabuka, nyalin yupu deice nyapdeiamupu yupu deice arye, akunum nyapdeibupu ning nirya ara, kum bataknamabe. Nunce aning nirya, adiparyuk winipnamapca! Ara, nunce Allah si erena ati kum bukni, yuk-yuk ning ati, im deice ulul ninye deiyok kil, el si erena ati, teleb aren ning bobinuka arelbanamabe. Tonda, ‘Aren ning pia teleb upnamleʼ tenen, aning deice ara, anggur mek ton dikilongonamake. Aning nirya ara, nun isa kil, el si erena ati, arelbanauk wininamabe. Aning wininamaba ara, nun wini talak unyap nang ap, Yehuda yala nang, nun apu yapu ap, ninye deiyok kibuka, nun mutuku taleamsik nang, nun Raja-Raja nang ap, sik amu tam pil dona deiyok kiamik nang ap, aning atonun ulamik. Tonda, Yerusalem mutuku noutam bisikak balamik nang ap, tonda Yehuda mutuku noutam asik domikce daulamik nang ap, nun nirya arye, min talak isa kil si erelamupu touk, wini talak babye, el si tuba erenamabe. Winibipya babye, nun deice ikin ning kum yanamsile. Atonun, minop talak, isa si erelamupu talak ara, nun pil dolamupu ning nirya ara, telebuk uamuk. Tonda, nun din ning yala-yala weik awamukba, weik tonun dipnarye, telebuk ulamupu. Ati ara, nun nirya arye, aninguk talibuka wininamabe.
An babye kel bikilyame. Sikce malye wininyak ning ara, laka nyapnamkine. Ara, sik mapu arye, uku dalamak, yo dobuka bobikirye, sik ni yapu arye, dobuka uku danyake. Akunum uku dabiceura, sik kilapu arye, din ning el si roti memen ning arye tabakuka, dabicopura, sik isa kil ati, “Nun deiyok kil ani. Elda im deice deiyok kil ulula ati, el si erepnuyabe,” nyabuka, si erenyake. Sik Isa Mutuku Dongonye si erenyak ning ati, din ning, el si kue dabuka, memelinyake. Tonda, anggur tapu duk, purubuka memelinyak mek dobuka, kwemdina ara, daunyak isa ap, ninye arye puturunyak ning ap ati, ‘Nun ni koproba,’ nyabuka, si erenyake. Winibuka malye wininyaka deice, narye, ‘Yata deiyok ati, talye ning si erenyak do?’ tenen, na kanye talima uk dinilirye, yu pia weik unulule.
Aning ara, dipkoprob malye ning ninye pia winipman kum ning bukni, atalak ara sik mal olan nang arye, min arye akunum diamikak, tuku pum tam weiamik nang, sik yok bulubuka, tukwak deipnamak nang ara, tuku pum tam arye, lukuka kata deiplopnamake. Winibikceura, ila tamubuka, tuku pum tam kum weipnamake. Ara, ninye arye sik dei yalamak atonun, tuku deiceuk deiplopnamake. Ninye arye, talye bam ning do, yuk malye ning do, tukwak talye lubakibuka donoklamak atonun, anang yok nirya ara, talye tukwak, deice anyuk aupnamle. Deiyok ara, sik mal olan nang arye, amutuku akunum diamikba weilamik nang ati, pia malye kipdeibibyeba, ‘Sik yala nang, tuba kam unyak nang ara, alye weik dakdanamakʼ tenen, anang yok lukuka, tuku deice kata sukum bataknamake. Ton deiyok ara ani. Ara min talak, sik amutuku ulamik nang arye, na Allah ati bataknarye, keting ap, kurya ap, tonda wala ap ati, ‘Nun ni ani,’ nyabuka, aning ati, si erelamika winipnamake. Ati sirya talak ara, sik akunum diamik nang yok ara, talye lakak lukuka, tuku deice batakikceba, kata sukumuk bataknamle. ‘'Amutuku nang, sikda talye-talye ning dam, si erelulum ning ap, kanye deiplumce, aning amu tam pil domlum ning ap, talye ning ati, si erebuka pil melibuka domlum ning ap, tonda, ‘Se, nun wininamap ning ara, anggunce peterepsululume,’ nyabuka, morolulum ning ap, aulula ati, akunum diamikak, tuku pum tam weiamik nang, sik yoka nirya lukuka, kata sukum tuku deice bataknamake. Ara, sik mal olan nang arye, ‘Sik Yehuda mutuku tuba kam unyak nang nirya, alye weik dakdanuka unamakʼ tenen, akunum winibikceura, ayok ara, tamubuka tuku pum tam kum weipnamake.
Akunum adiparyuk nyapdeipmok touk, kain lenan ongopmoknye birye, abiyukopura, aning el si Kerub ara, iknapye dam tam, Allah Yahweh el si eren aik dam tam, arah selatan tam tikmek. Sik atikmekba, anye birye, Allah el aik dam biyukopura, Allah el si eren aik tam nirya ara, dua bum tonok yayukce, lelipdongobukba eipse.
Aning nirya, akunum winibukba eibukopura, aning ara, Allah el Pia Teleb, Lek Dip Kanye arye, na Yeheskiel biti, inibuka bobinukce, mitik otam deipnuke. Elce deipnuka ara, Allah Yahweh el si eren aik dam bukni, keting panalyangan tam ara, keil arye cang poka domik, anyasik dam wekna ati, bisik bublan botopdeiamik ning ara, bisik bublan dam deipnuke. Asukum ara, narye dilamsak, bisik bublan dam bulubuka tikmek nang ton, eipse. Ara, anang nirya ara, dua puluh lima (25) nang unmikak eipse. Aunmeka noutam ara, sik amutuku taleamdik nang, deiyok nang bitinye eipse. Ara, ninye si Asur, elce deiamuknye Yaazanya ap, tonda Benaya elce deiamuknye Pelaca ap, unmikak, narye eipse.
Ati, na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, nyapne. Ance na ap, na si ap ati, aminyan kipdeipnulumce, batakuka lubakipnulume. Ance akunum batanuluma ati, anda, ‘Sal ap maptibyeʼ tenena ap, pia malye-malye weik una ap, malye un ning patana ap ulamluma ati, adeice arye, an yuk ikin deipdalume.
Aning nirya akunum winibukopura, anye birye lengdar mapmasa deice arye, na bobinuka, Allah el si eren aik dam bobinuka deipnukba, aning ton eipse. Asukum ara, Allah el si eren aik mening dam bana ati, yuk tam bisik arye ubuka, wekelbana ati domikce, bublan ton botopdeiamik bisik memebuka botopdeiamik ning eipse. Awekelbana ati bisik bublan ara, cang keil arye deibuka domik aik ara, iknapnye tam (arah selatan) wekelban bisik bublan ati, pina arye deibuka kiklipdeyukura, el cang ap, el pala ap ara, otam bublan wekelban bisik nirya kiklipmok meter atouk kibuk.
Aning akunum kiklipdeyukopura, abisik bublan kirikuka bikyukce, keting panalyangan tam botopdeiamikce, cang weik aik wekelbana ati, bisik bublan dam wekuk. Ara, bai tam keil poka kirikuka biyukce, cang weik aik wekelbana ati, bai tam arye, aik tam wekelbana bisik ara, anyaik welena ati moropdeiamik ning welebuka biyuk. ‘Acang aik binunʼ tenen, kintinibuk talak ara, anyaik wekenak bisik bublan yanina ati, pala keil memebuka deiamikce domik ning ara, kiklipdeyuk. ‘Apala keil, el lebar yata barye ubuk do?’ tenen, kiklipdeyukura, akeil arye dipdongobuka otam ara, tonok pina arye, kiklipdeyukura, 3.12 meter kibuk.
Tonda, minop talak ara, sik Israel yala nang, sik deiyok-deiyok nang arye, sik aik domikce, bisik bublan dana-dana tam, yo deibuka domik ning ap, abublan wekelban bisik yanina ak ap, na aik dam atonun domik. Winilamika ati, sik aik otam, na aik atam ara, tonok keil poka domik bukni, sik aik ara, pia mening dam ubuka ati, winilamika deice arye, na leknye si ati, pia malye kililamnike. Winilamnik ning nirya ara, narye, ‘Aning-aning nirya, pia na like. Aning nirya ara, pia na likʼ tenenun bukni, aning tenina kumce, talye mangkau asa, malye winin ning weik ulamik. Winilamika ati, sikti, yu weik upnukba, amutuku ulamik nang nirya obuka, sirya dakse.
Yim sapi basam akunum arepmunyeura, sik imam nang arye, Israel nang malye winilamikce ning nirya ati, ‘Allah lyeplirye, kum kipdeipnamsilʼ tenen, uku dongonamak ning ara, asapi opmakce talak arye, ining ton dobuka, na si eren tenda aik, keting panalyangan tam bisik bublan dana-dana tam, yo deibuka dobik ning nirya ara, likuka deibikirye, anyaik teleb kilinamake. Aning atonun, mesba el kup-kup ak dumbarye babye, tonda anyaik koproba tam wekelyangan bisik bublan, keting panalyangan tam ara, ikuka tikiebik tikin yo babye, aning deice arye ining likuka deipnamake. Winipnamaka deice arye, anyaik bublan teleb kilinamake.
Allah Yahweh aning-aning nirya talebuka, deice tam erebuka, mikip weik ululnye birye, nyabuk. “Na Allah si erena ati tenda aik kintinibuka dobik ning, keting yangan tam arye wekelbana ati, abisik bublan botobikak ara, atam kibuka bana ati bublan ara, pia moubuka, tirikinamluma ara, aminggu-aminggu nirya, sum like nakub barye deice arye, talye pil donyak talak arye, abublan ara tirikdongopnamlume. Bukni, abisik bublan tirikilongona kukna ati ara, na Allah, na si eren sum, talye pil pia kum donamlum sum, Sabat sum deice ap, tonda winiryuk wala tiklamle talak ap, ‘Allah arenamabʼ tenen, aning kintinilinamak talak aryuk, abisik bublan ara, kukunamnyake.
Eipsiba, Allah Yahweh arye, nati asipdenuke. “Se anda ninye koprop arye deipkiknye, anda aning ara, moubuka eilinmalam do?” Aning akunum eipmalam ning ara, dipkoprob malye upmal bukni, aminyan talak ara, pia weik tonun malye unyak ning, ton ap eipnamalame. Aning babye, pia na like,” Allah arye, na Yehezkiel biti nyapnuke.
Tonda imam-imam nang, Allah Yahweh el si eren aik talibuka, pil donyak nang ati nyapnamalyame. “Anggun nirya arye, Allah el yupu nyan aik koproba noutamak ap, bai tam atolonga lalinak ap, wekmunce engebuka, Allah el tibuk moronamlulume. Ara, ‘Se, na ni Allah, an tenen ninye oltakana kume. Nun ti bico tenepsimince, melibuka lyepsilyame,’ nyabuka moronamlulume. Tonda, anggunce anggun ni Allah Yahweh ati, nyabuka moronamlulume. ‘Nunda an mapu koproba unyabe. Ance nun nirya opsiminyopura, yuk mutuku ninye nirya eibikirye, ‘Sik ni koproba Allah ara, dan mutuku ulul do? Yata ati aninye kum melilul do?’ nyabuka, malye nyapsikirye, yep-yep anamsiyake,’ nyabuka, Allah ati moronamlulume. ‘Yuk mutuku ninye nirya arye, malye nyapsicak’ tenen, Allah moronamlulume,” nyabuka, Yoel birye nyapdeibuk.
Tonda, anggun anye ap, akil ap arye, tukwak mutuku talye ulye ning do, isa do, ato talye ning, ‘Nun ni koproba aniʼ tenen, si erebikcopura, anye babye, pia malye winilule. Aning atonun, na Allah si erebuka kina ati kum bukni, sikce kutam tuku dipdongobuka kinyak ning, keting do, wala do, kurya do, aning ati si erebikirye, ‘Nun ni koproba aniʼ tenen, atalye ning ati kanye deibuka si erenmakiba, yuk nang arye aning eibuka bikikirye, sik deiyok nang ati lak nyabikiba, moubuka kekenamlume. Deiyok ara, awinin ning nirya ati, nun ni Allah arye, “Meme,” akunum nyapdeiamsuke.
Nyabukce, ayupu ton dukdongobuka nyabuk. “Yuk ning urasin atonun memebuka deipmunce, aning si erena meme, nyapmasin yupu deiyok ton ani. Ara, sik im deice unyakba eiplum ning ati, ‘Si erebuka malye winipmunyak’ tenena ati nyapne. Ati ara, pia winina meme. Ara, keting ap, wala ap, kurya ap, Allah arye kwepdeibukba, im deice ulul ning nirya babye, eipmunce, ‘Se, aning ara, mambul ati ara, aning si erenamabe,’ tenen ati nyapne. Allah el si Yahweh arye, aning-aning nirya kwepdeibukba, yata mutuku do nirya, ninye mutuku-mutuku nirya arye, aning talye elinyake. Ati ara, aning-aning nirya, si erena meme, nyapne.
ကြော်ငြာတွေ