Anggun anang ara, adiparyuk bimunce, na ap, Israel yala nang ton tuba aunyak nang nirya ap, tonda Yehuda tam mutuku noutam unyak nang ap ati, ‘Abuku wangamik bukni, winiryuk eipmap buku, Allah arye nyapdeiamukba, abuku noutam sekamuk ning ati, yata wiripnamap do?’ tenen, Allah dam ati binuka asipdenamlume. Ara, Allah arye nunti akunum yu uplirye, ikin ning nun nong deice akunum deipnamsile. Deiyok ara, Allah arye, ‘Winamlume,’ nyamuk ning ara, nun apu yapu arye ton, abuku noutam sekamuk touk, pia kum winilamik touk, nun wini talak unyap nang babye, kum wininyabe. Ati ara, yata wiripnamap do?” nyabuk.
Yehezkiel 7:8 - Eipomek8 Wini talak ara, na yu weik unilya deice arye, anggunti kanye imun weik ning arepnusine! Dipkoprop, yu weik unilye ning nirya ara, anggun nong deice deipsinirye, wini talak wenepnusine! Winipsinyopura, anggunda ‘Se tenen, imun kanye bopnamlume. Ati, narye, ‘Awinin ning ara, na pia song ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenepnamsine. Tonda, anggunce malye-malye winin ninguk, weik talibuka winilamlum touk, anggun tamulina ati, yupu bokeipsinirye, weik tonun wenepnamsine. အခန်းကိုကြည့်ပါ။ |
Yehezkiel 7:8
35 ပူးပေါင်းရင်းမြစ်များ
Aning kum bukni, nunce moropkiap ning ara, ‘An Allah ati, diba tenena kumce, kel kum bikamkik nang, yuk-yuk mutuku nang ara, sik deiceuk an yu teneplum ning ara, weik tonun delinalam’ tenen, moropkiabe na nio. Sik ayuk mutuku nang arye, anti, diba tenebuka, kum bikamkikce, ance nyasilyam yupu, pia kum talinyake. Tonda, ayala yuk-yuk nang ap, sik deiyok-deiyok nang ap arye, ‘Allah Yahweh, elcuk melibuka lyepsutue’ tenen, an si erebuka, anti pia kum morokinyake. Ati, sik yala yuk-yuk nang ati, wenebuka opnalame. Aning ati tenebuka, moropkiabe na nio.
Anggun Israel ninye arye, na yupu nirya bataknuluma ati, yu weik upnukce, narye anggun wenena ati, pia kanye imun weik ning arepsise. Winibuka na yu deice arye, anggun mal olan nang ati lo arepsiba, yayikce anggunti, obuka sirya daksik. Winipsika deice arye, winipmanto ara weik uku arye aning-aning nirya dilirye sirya dakuka dilamle touk, upsuk bukni, anggunda tuba moubuka kum teneplume. Na Allah arye, Israel ninye anggun wenena ati, weik imun kanye bon ning arepsisiba, sirya dakmanto kipsuk bukni, tuba moubuka kum tenelulume. Ikin upsutuba, adeice arye na tam tamubuka yanutum bukni, winipsuka babye, aning nirya moubuka kum tenelulume.
Aninguk kum bukni, an ap, ance deipminba, dadeipdanin banamak mapu ap, tonda an taliplumba, an amu tam pil yuk-yuk talibuka donyak ninye ap, anggun nirya ara, malye winimunya anya arye, wenebuka opnamsine. Ara, anggun deiyok kibuka, amutuku taliplum nang arye, malye winimunyeba, Yerusalem mutuku unyak ninye ap, Yehuda mutuku noutamak daunyak ninye ap, malyeuk wininyaka ati, narye amutuku noutamak, ikin weik ning, anggun nong deice deipnamsine. Winipnamne ning ara, yata talak arye, “Anggunce tuba malyeuk winipmunyopura, anggun malye winilulum ning dekna ati, kanye weik imun ning arepsinirye, mikip arye wenepnamsine,” nyalamsise. Bukni, amutuku ninye nirya arye, na nyalamse yupu kum kekelamnik. Ati, ‘Aikin ning nirya ara, dipkoprob anggun nong deice deipnamsine,’ nyapne. Allah arye nyabukba, Yeremia birye, kekebuk.
Sik Israel ninye arye, pia malye weik tuba wininyaka ati ara, na si ara, Allah Yahweh arye nyapsine. Nara, aning-aning nirya deice tam talibuka, Weik Erena Deiyoknye ununa anya arye, narye, ‘Winipnamne,’ tenepnye touk, wininune ati ara, na weik arye wenepnamsine. Nara sikti, lik kanye bobuka, yu weik unulula anya arye, amutuku unyak ninye ap, amutuku ap ati, mikip weik deice arye, wenena ning weik arye arenamsine. Weik mek makau arye, mek kwebikirye, tonok talak aniryuk amek nirya dikiltaklamak atonun, sik deice wenen ning weik arye, aninye ati arenamne. Ara, na si erena ati dobik aik ara, weik yu deice arye, dakuka bataknamne. Tonda, amutuku noutamak unyak ninye ap, amutuku unyak kam ning nirya ap, bai tam palamle yo nirya ap, tonda ninye arye koulamak ning nirya ap, ninye arye weinyak kam ulul ning ayala-yala nirya ap, kum kipdeipnamne. Na yu ara, weik uku dinmalirye, kum tangapmanto ulamle touk, weik uku dopkwetepniba, amutuku noutam ulul ning nirya, uku dinamle. Auku ara, ninye arye kum tangapnamake. Pia dilamlya ani, aning nirya diplyak arye, sirya daknamle. Allah arye, Yeremia biti laka nyabuk.
Min talak dodarapce, Allah arye, ‘Malye winibikceba, narye sik wenena ati winipnamne,’ tenebuka kintinyamukce, “Anggun dam ati winipnamne,” nyabuka, laka nyalilamsuk ning ara, wini talak akunum winipsuk. Allah elce nunti, bico tenena kum aryuk, dakuka bataksukce, atu buklopsuke. Ara, Allah elce nun mal olan nang, sik deice mikip arebukba, yan obuka bisipsike. Allah elce nun mal olan nang ati, ‘Kanye teleb kipdeiplirye, lo arepnyeba, Israel nang obikirye, malye kipnamake,’ tenyamuk touk, elce mikip arebukba, nun mal olan nang arye, nun ulamupu mutuku nirya ara, dakuka atu buklopsikce, teleb kanye bobuka ukirye, dipdanuka karye onyake. Elce, sik mal olan nang deice, mikip weik areamukba, sikce nunti, obuka malye kipsikce, nyek-nyek nyabuka nalisikirye, kanye delinyake.
Nun mal olan nang arye, sik mal ara, yin deice deibuka, nun marana ati, kintinibikce touk kibuka, Allah arye nun menenga ati, akunum wenebuka kum kilisulule. Ura, Yerusalem mutuku ukceba, nunce anggunti, weik arye bico tenenyap nang, nun mapu silip nirya ara, Allah elce anang nirya obuka, sirya dakeipnamsile. Ara, Allah arye nunti, yu uplyeba uapsilirye, Yerusalem mutuku unyap nang ara, wenebuka sirya dakasulule. Ara uku buk beleplirye, aning-aning nirya diplirye, kum kililamle touk uplirye, Yerusalem mutuku deice, weik ikin ning akunum arepsilyeba, dibuka sirya dakmasile.
Israel nang arye pia malye weik ulamik ati, Allah el yu pia weik ubukura, ‘Sion mutuku ap, amutuku unyak nang nirya ap ara, tonok ning babye kum bataknune,’ tenebukce, lo arebukba, sik mal olan nang arye, uku dinibikba, amutuku nirya uku arye dibuka sirya dakuk. Asukum nirya ara, ‘Nun aik mikip kipnamsileʼ tenen, sik aik amu tam deiamik keil babye, uku dibukba, sice uk buklobuk.
Bukni, yata nang do nirya, sik anang arye tuba-tuba, ‘Nun ni ani’ tenen, talye ning talibuka, si erenyak isa ap, isa si erena ati, memebuka deilinyak ning ap, aning si eren aik ap, patung ap, pia malye yupu nyanyak ning ap, yu kanye teninyak ning ara, aning nirya, pia talibuka unamak nang ati ara, weik tonun wenepnamsine. Ara, anggunce pia malye weike winiluluma deice arye, kanye imun weik dobuka, anggun nong deice delinamsine. Winapnamne deice arye, sik malye wininyak nang ati, wenepnirye, sirya opnamnarya! Nara Allah Yahweh, aning-aning nirya talibuka, eitam erebuka, Pia Mikip Weik Deiyoknye ununa ati, aning nyapmasin touk, dipkoprob nong upnamlarya, nyapsine. Allah arye nyabukba, na Yeheskiel birye, kekepse.
Aning atonun ton. Winipmanto ara, na Allah arye, yu weik upnilyeba, imun kanye bona ara, amutuku noutam arepnyeba, ninye weik nukmanto kum dipmakcebuk, tuba tamubuka, amutuku noutam, ninye ap, sikce talibuka weinyak kam ning ap nirya ara, diptingba, aning nirya kum kipdeiptinye. Winiptinyeba, sik min talak, pia diksukumuk winilamik nang winilye, Nuh ap, Daniel ap, Ayub ap, amutuku noutam ubtinga babye, sikce yuk nang nirya, pia kum lyepdeiptinge. Tonda, sik mining mapu babye, kum lyepdeiptinge. Akum bukni, sik pia diksukum unyak deice arye, sik nong atibuk lyepdatinge. Dipkoprob ning ara, sik nong atibuk, naryuk lyepdeiptinye. Nara, aning-aning nirya talibuka, Pia Mikip Weik Deiyoknye unune. Tonda, na Kam Pia Una Deiyoknye ununa ati, akunum nyapmasin yupu, ‘Winiptue,’ tenipnyopura, dipkoprob aninguk upnamle!
Bukni, wini talak ara, ayupu nyapsine. Narye anggun ikin ning deibuka wenepnamsin ning ara, deiyok talye ati kume. Ara, anggun min wel ulamlum talak arye, ‘Nun ni Allah arye, weik tonun melilamsuk,’ tenena kumce, pia malye weik ninguk talibuka, pia weik tonun winilamlum ning ara, na yu arye wenepnamsine. Anggunce moubuka tenina kum, pia malye un ninguk talibuka, winilamluma deice arye, wenelamsise. Anggunce malye weik winiluluma atonun, narye weik ikin ning, anggun deice deipnamsine. Nara Allah Yahweh, aning-aning talibuka, deice tam erebuka, Pia Mikip Weik Deiyoknye birye, nyapsine ati, aning ara, dipkoprob nong upnamle! Se, anggun ton tenipdelulume! Anggun pia malye un ninguk, talibuka winilamlum ning nirya ara, aupmal bukni, aninguk kume! Tonda, anggunce ton tabakuka talye yolana weik ulamlume! ‘Aning-aning nirya ara, narye pia lik’ tenen, lik weik unulule. Aning nirya ara, pia malye un ning ati, na pia like. Allah arye, sik Israel nang ati nyabuk.
Allah arye, sik Israel yala nang ati nyabuk. Ura, dipkoprob nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye nyapsine. “Ara, anggun Yerusalem mutuku ululum nang, anggun wenena ati, weik ikin bobuka, anggun deice deipnamsine. Aning ara, angguncuk, pia malye weik winilamlum ning deice aryuk, wenepnamsine. Anggunda, pia malye winilamlum touk, narye pia ikin weik ning kipdeipsinya deice arye, wenepnamsine. Min talak ara, narye anggun Israel yala nang nirya ati, ‘Winibuka melipnamsine. Tonda, narye, ‘Aning ara, winipnamlume. Aning ara, pia kum winipnamlume,’ nyapdeipsinyeura, aninguk talibuka winipmunyeura, weik tonun ton melinamne,’ nyabuka, nyalin yupu deice arye nyapdeiamsise. Nyapdeiamsise bukni, angguncuk aning nirya ara bataknulume. Narye nyalin yupu arye nyapdeiamsise ning ara, anggunce, ‘Aning ara, nun like. Aning nirya kum talibuka wininamabe,’ nyaplumce, yanilamnuluma deice arye, malye weik ululume.
Ati ara, na Allah Yahweh, aning nirya talibuka, deice tam Pia Mikip Weik Erena Deiyoknye uninye birye, ‘Winipnamne,’ tenepnye touk, wininuna anya arye, narye nyapsine. Se, anggun Israel yala ninye nirya ati, narye yupu bokdeipsinirye, wenepnamsine. Narye dipdesinirye, anggun malye winilamunye ning aupmasilye touk, wenepnamsine. Diksukumuk winilamunye ning aupmasilye touk, teleb kipdeipnamsine. Yatanye do, yata kil do nirya, anggun winilamunye touk, yupu bokeipnamsine. Anggunda, ‘Se nun malye wininyap ning deice arye wenepsilirye, opsilyak’ tenen, anggun malye winilulum ning nirya ara, batakmunce, aminyan tamubuka, yuk teleb bisikuk binamlulume. Winipmanto ning ara, keil yan dum duklirye, opsilyopura, kote saklamak atonun, anggun malye winilulum ning dekna ati, ‘Wenepsinirye, opsinyak’ tenen, nyapsine.
Aning-aning nirya nyapdeipse bukni, sik Israel nang nirya ara, aweik kata mutuku noutam, padang pasir mutuku noutam arye balamik talak nirya ara, ‘Allah nyasilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina mem ning,” nyapdeipse yupu nirya ara, “Anggun nirya arye, ayupu moubuka taliplumakarye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik ulamikce, malye winilamik. Malye weik winilamik ati ara, narye, ‘Ura akunuma, apata mutuku noutam aryuk, anggun malye winin ning ati, yu weik usilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.
Nyapse bukni, wini talak, sik wel nang arye winilamik. Sik atalak wel Israel nang nirya arye, aweik kata mutuku noutam, padang pasir mutuku noutam arye, tuba ulamik talak nirya ara, ‘Allah nyapsilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina malye ning,” nyapdeipse yupu nirya ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,’ nyapdeiamse yupu nirya ap ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik winilamikce, malye ulalamik. Malye weik ulamika ati ara, narye, ‘Ura akunuma, akata mutuku noutam aryuk, sik malye winin ning ati, yu weik upnilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.
Nara Allah pia kam tuba ununye birye, nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, narye anggun wenena ati, na mikip weik taruk ara, na yu upmanilye deice arye, anggun Israel nang ati, moubuka talipsinirye, anggun deiyoknye unamsine. Ninye deiyok talipnirye, anggun deice tam Raja unamsine. Anggunda, na amu tamuk ulamunce, na yupu uk kekenamlume.
Ayupu nirya, mikip arye nyapse bukni, sikce na nyapse yupu kekena pia kumce, ‘Allah arye nyapsilye yupu kum wininamabeʼ tenen, nati bataknike. Winipnyopura, anggun kan-kan noutam arye, tonoknye babye, sikce si erelamik isa si, patung-patung pia malye winilamik ning ara, kum batikik. Tonda, sikce, ‘Aisa si erenamapʼ tenen, kanye deibuka, delilamik patung-patung nirya babye, pia kum batakamik. Sikce Mesir mutuku noutam ulamik talak arye, isa mer si erelamik ning, el si berhala-hala nirya ara, kum batakamik. Atalye ning kum batakamika ati, narye, ‘Ura, sik Mesir mutuku noutam tuba unmak talak ara, narye sik Israel yala nang wenebuka, pia ikin ning, sik nong deice deipnamne. Sik malye wininyak ning ati, na yu weik unilye ning ara, sik nong deice deipnirye, sikti, weik tonun wenepnamne,’ tenipsirye kintinip deiamse.
Ati wini talak ara, narye anggun Israel tam ululum nang ati, yu unulul ning ara, dobuka, sik deice aryuk, dipkoprob deipnamne. Winipmanto ara, sik anang unyak ning nirya ati, na yu uku buk dilamle atonun unulul ning ara, sik deice deipnyeba diplyeura, sik nirya kum danamake. Sik malye-malye weik winilamik atonun kibuka, ikin ning weika arye, sik kisok deice deipnamnarya. Nara Allah Yahweh, aning nirya deice tam erebuka, Pia Mikip Weik Deiyoknye ununa ati, naryuk ayupu akunum nyapmasina ati, aning nirya ara, dipkoprob nong kunupnamle.
Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsine. Ati, na nyapmasin touk, dipkoprob winipsinyeura, aning dipkoprob upnamlarya. Na tenyamse talak akunum kiplyeura, aning nirya winipnamnarya. Anggun malye umunye ning ara, narye kum lubakipnamsine. Tonda, anggun wenen noutam ara, ‘Se, daupmalye, aning ara, akunum bataknulume,’ pia kum nyapnamne. Tonok malye winilamlinye babye, kum bataktinye, anggun nirya wenepnamsine. Tonda kum lyepdopnamsine. Tonda, ‘Se, anggunti ara, bicoe,’ kum tenepnamsine. Anggun malye winilulum ning yala-yala nirya, awininamluma atonun, anggunti wenebuka opnamsine. Nara, Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsina ati, aning nirya dipkoprob nong upnamle. Allah arye, na Yeheskiel biti, nyapnuke.
Winipnirye, na yu weik teninun ning ara dobuka, Pelusium mutuku nang deice deipnamne. Amutuku ara, sik Mesir mutuku nang arye, ‘Nun mal olan nang olyanganamsiyak talak ara, Pelusium mutuku yin talen nang eibicopura, minopce laka nyanamsiyakeʼ tenelamikce, anyasik, Mesir mutuku bukni, weik laut mekwen, el si Mediterania dam dolamik. Ara, Mesir mutuku sik kalikna ati dolamik. Tonda, Tebes mutuku ninye yupa weik unyak bukni, weik tonun opnyeba, sik babye ton kam kum upnamake.
Winipnamle bukni, sik Israel mutuku noutam unyak nang arye, ayupu nyanyake. “Kume, Allah Yahweh, elce yupu bokeipsilirye, wenebuka osulul ning ara, teleb winin ning kume. Nun tenenyaba atonun ning, kum winisulule,” nyaninyake. Ati, na Allah arye, anggun Israel nang nirya ati, anggun winilamlum touk, moubuka dipdenirye, yupu bokeipnirye, wenepnamsine.
Anggun anang nirya ara, yu kanye tenepsinirye, anggun deice ikin weik ning deipnamsina deice arye, kel biknamake. Winibikirye, yata nang do nirya, yuk pera mutuku noutam daunyak Israel nang ara, kanye imun weik uk, dinamla deice arye dipnamake. Yerusalem mutuku tuba sik damuk unyak Israel yala nang ara, yuk mutuku yu yin talin nang arye, sik dam yakirye, parang ya bopmaca arye oplopnamake. Sik Israel yala nang bukni, akanye imun ning bitinye deice arye, biknamak bukni, sik kum dipnamak nang arye biknamake. Ara, batakniba, sik tuba kam unamak nang ati, sik mutuku noutam kanye imun weik din patana deice arye, dibinamake. Aning-aning ikin ning nirya ara, na yu weik upnamnila deice arye, sikti wenen ning arepnamne.
Tonda, winipnamlula ati, anggun mutuku talibuka, ninye deiyok nang Raja ara, ‘Se, yata wiriptibye do?’ tenen, pia engenamake Aning atonun, Raja el mi babye, el talima sakliba, ‘Se, nun mutuku noutam ara, ila ton ap, teleb kum unamle,’ tenepnamle. Tonda, amutuku noutam unyak nang nirya ara, ilil weik upliba, ‘Se,’ tenebikirye, sik taruk ap, yok ap, serem talipnamle. Ati ara, narye anggun malye ulalum ning eipnirye, awamuk atonun, narye kanye imun yu ning deipsinirye, wenepnamsine. Tonda, sik nirya ati, weik wenen ning arepnirye, anggunti kum kipdeipnamsine. Ara, minop talak anggunce, anggun kayapu nang ati, wenemunce, kum kipdeiamlum atonun, anggunti, narye winipnamsine. “Winipnamsina deice arye, anggun nirya arye, nati ara, ‘Se, kume, dipkoprob el Allah Yahweh ara, Pia Mikip Weiknye dikoprop ulule,’ tenepnamnulume. Allah arye nyapdeibukba, Yeheskiel kekebukce, sekuk.
Dipkoprop sik Israel yala nang nirya ati, narye, ‘Pia bico kum tenepnamne. Anang ara, pia ikin ning, sik nong deice kum deipnamneʼ tenen, kanye kum tenepnamsine. Tonda, kanye talima kum arepnamsina ati, ‘Sik daupmalyeʼ tenen, anggun malye winilulum ning ati, dipkoprob kum bataknamsine. Aning kum bukni, narye dipkoprob, anggun malye winilamlum ning, akunum eibuka kel bikamsisa ati, awinilamluma atonun, dekna dolona atonun wenebuka opnamasine. Tonda, narye, ‘Awinin ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamsine. Winibuka wenepsinya deice arye, anggun damnye, ‘Se, Allah Yahweh ara, elcuk nun wenena ati, akanye imun ning, akunum arepmasileʼ tenen, bikinamnulume.
Anang arye, nyanyaka ati ara, na Allah arye, sik anang nirya ati, eipnyopura, sikti bico pia kum tenepnamne. Kume, sik Israel nang nirya ara, yuk nang ati, pia malye-malye weik wininyak touk, narye sik anang ati, sik malye unyak ning ara, sik nong deice deipnamne. Winibuka pia wenebuka opnamne” Allah arye, na Yeheskiel biti, lengdar mapsa deice arye nyapnuke.
Anang tuba onmek talak ara, na Yeheskiel bira, na tonok amutuku noutam tuba unmase. Na yuk, aunmase talak arye, na mambul kanye bobuka, ‘Se tenenmasirye, Allah si erebuka kina ati, tuku deice mapmasirye,’ ayupu nyanmase. ‘Se, anda na si erenun Allah Yahweh, anda aning-aning nirya talibuka, deice tam erebuka, mikip pia weik ulyamnye biti, asipdekine. Ance Yerusalem mutuku unyak nang ati, yu weik ukilye ning dobuka, anang nong deice deipmince, weik tonun wenebuka opnuminye talak ara, Israel yala nang nirya, obuka sirya daknulam do, kum do? Ara, Babel mutuku arye batakuka, Yerusalem mutuku tamubuka yanmek nang ara, mitik tonunuk tamubuka yayike. Minop talak ara, anang, weik tam nang ara, Babel mutuku daulamik talak arye, akunum diamik. Ati, sik Israel yala nang, amutuku noutam mitik tonunuk tuba kam unmak nang nirya babye, obuka sirya dakipnalam do, kum do?” nyabuka asipdese.
Nun Israel yala ninye nirya ara, ance, ‘Aning wininamlulume. Aning ara, pia kum wininamlulume,’ nyapdeiamsulum ning ara, moubuka kekebibirye, moubuka kum talinyabe. ‘Allah nyapdeipsuk yupu, nun like’ tenen, anti balye tam kibuka, talye batakanyabe. Adeice arye, nun ni Allah, an dam malye winilikinyabe. Ara, an amu tam pil donanye Musa, el dam nyapdeiamlumba, sekamuk yupu buku noutamak, lak nyalamlum yupu ara, ‘Allah na yupu yanimunyopura, narye kanye imun weik ning, anggun nong deice delinamsine. Tonda, weik arye wenepsinirye, supdongopnamsine,’ nyapdeiamsulum ning ara, wini talak nun deice akunum yangalule. Ara, talye ati kume. Nunce pia malye winilamupu buk, ance nunti, ‘Malye uk wininamak’ tenen, supdongopsulume. Asupdeipsuluma deiyok ara, nun malye winilamupa atia.
Amalye unamlanye, ninye deiyok kibuka talinamlanye birye, ninye weik bulubuka wekmacak arye, “Na yupu kekepnumunyopura, narye anggunti, wininamsine,” nyabuka, sik dam nyalin yupu deice arye nyapnyopura, ninye weika arye, ‘Telebe, an yupu kekenamabe,’ nyabuka, el tam kipnamake. Ara, tekbarye talak noutamak arye unamake. Atalipnamle talak noutamak ara, el anye birye, “Sik malye winin ning pununa ati, ‘Allah arye kum kipdeipsilirye, nunti namin kipnamsil’ tenen, Allah ati kam ning obuka, arelyangalulum ning ap, tonda Allah el si erena ati, arelyangalulum ning ap nirya ara, bataknamlulume. Aning kum wininamlulume,” nyabuka, yupu seknamle. Winiplyopura, el anye birye, Allah el si eren asik deice tam ara, pia weik malye ning deipnamle. Aning ara, malye winina deiyok ning dobuka, Allah el si erena asik deice deipnamla deice arye, anyaik pia malye upnamle. Tonda, aning ara, asukumuk deiplyopura, dauamlya ani, Allah arye, ‘Apia malinye bira, wenebuka opnirye, kum kipdeipnamne,’ tenebuk talak akunum uplyopura, weik wenen ning arepliba, anye kum daneipnamle. Aning nirya ara, malaikat Gabriel birye nyabukba, Daniel birye kekebukce sekuk.
Sik Israel yala nang bukni, Yehuda tam unyak nang ap, Yakub yala nang ap ati, Allah arye, “Anggunda, malye winin ning talibuka winilulume,” nyabuka wenepnamle. Sik abitinye yala nang ara, sik malye winin ning talibuka winilamak touk, Allah arye, anang nirya ati wenepnamle. Sik malye winin ning ati, dengna arepnamlarya.
“Anggun Yehuda tam ninye deiyok nang talibuka ululum nang nirya ara, ubula don nang atonun ululume. Winipmanto ara, ninye, ‘Yuk nang yakirye, nun wa tuku ubula alapsikcak’ tenen, keil do, yo do, lak kin ning deibikiba, yuk nang yanuka eibikirye, ‘Atuku ara, mitik uptuba, nunce weik tam doproptibye’ tenen, lak kin ning dobuka yukak delilamak touk, winilulume. Ati ara, na yu weik unilya ati ara, weik wenen ning, anggun nong deice delinamsine. Winipmanto ara, weik mek makau arye, mek weik kwebikirye, adiparyuk dikiltaklamak tonun, anggun wenen ning tonok talak aryuk, anggun nong deice yanamle.
Allah Yahweh el yu tenepnamle talak ara, yata nang nirya, ilil kumce, el dam yanuka tikting do? Kume, el yu upliba, kanye imun weik wenen ning, uku weik tonun dinmaliba, keil lyeiplirye butuklamle touk ubuka, atu buklopnamle. Winiplye talak ara, yata nang ton, el yu upnamle talak, el dam yanuka tikting do? Kume, ara kum winipmanto. El yu weik uplyopura, kat weik keil babye, el dam arye, atu butbuta atonun kipdeipnamle.
Ara talya ati kume. Allah arye aninye nirya ati, yu pia weik upliba, weneplirye, sik nong deice ikin ning pia weika arye deiplirye, opnamle. Awininamle ning ara, winipmanto ning ati nyapne. Ara, yu weik arye ninye kanye wangalamak mek kwebuka, urdem mek ap tabakna kumce, tonok mek makau pum bisik weika arye dikdongobikiba, langdelsaklamle touk, Allah arye aninye weika arye wenenamle ning ara, ikin pia weik upliba, lyepdanmanto kum unamake. Allah arye kumasan bol kel, el si ara belerang, ara, uku buk tin weika arye dipliba, keil but-buta tong ara, siltong atonun weik lelamle ning dobuka, aninye sik nong deice deipliba, uku arye sik nong bol dilamliba, uk dilamlya ati pia donmakirye, engenamake. Engebuka donmakibuk, Domba Mi Atonye ap, Allah el im deice pil don nang, sik pia diksukum unyak malaikat nirya ap arye dinamake.
ကြော်ငြာတွေ