Yehezkiel 7:2 - Eipomek2 “Se anda ninye sirika arye deipkiknye ulyame. Nara, Allah Yahweh, aning-aning nirya talibuka, deice tam erebuka, pia mikip weik ununye birye, dipkoprob sik Israel tam unyak nang nirya ati, nyapne. Sirya tam akunum yanamale! Ara, anggun amutuku dana-dana tam noutam nirya ululum Israel nang nirya ati ara, na adiparyuk, akunum kum kipdeipnamsine! အခန်းကိုကြည့်ပါ။ |
Yehezkiel 7:2
28 ပူးပေါင်းရင်းမြစ်များ
Ara, amutuku-amutuku noutam nirya babye, Raja Yosia birye, isa si erena ati, kam ning opnarye, uku dongolamikak mesba nirya ap uluplobuk. Tonda, isa si Asyera nyabuka, el si erena ati, cang yo iklamik ning nirya ap ara, lokuka batakukce, kum kipdeibuk. Aning atonun, aisa mer nirya ati, Nun ni,” nyabuka, si erelamik ning nirya babye, ninye urasin atonun ubuka memebuka deipnarye, si erelamik ning, gambar Nirya babye, dobukabukce, aning teikuka kum kipdeibuk. Tonda, isa morona ati, siltong teleb nyan ning uku dongolamik ning ap, kintinibuka deililamik ning nirya ara, kapak ya arye mitik-mitik kibuka sekuka, batakuk deice arye, kum kipdeibuk. Raja Yosia birye apil-apil nirya akunum winibuka, sirya dakdongobukura, tamubuka Yerusalem mutuku biyuk.
Min talak ara, anggun Babel mutuku ululum nang ara, maknya kintinibuka ululuma deice arye, anggunce nyalamlume. “Nun Babel mutuku nang aryuk, ninye deiyok kil atonun ubirye, sik mutuku sirya, im sirya nirya unyak nang nirya ati, nun diamuk talinamabe. Nunda pia ati, weik deiyok nang kibuka, yuk mutuku nang nirya talinamabe,” nyalamlume. Bukni, anggun babye moubuka kum tenibuka bikilamlume. Ara, narye pil dolamse ning ap, anggunce weik ikin ning dobuka Israel nang deice delilamlum ning ap, tonda aminyan talak narye sikti, dekna arepnirye, wenebuka winipnamsin ning ap ara, anggunce moubuka pia kum tenilamlume.
Yata sum arye tonap wininmapya ani, amutuku noutam ara, silal lepropnamle do? Tonda, wa win sukum tikilul yo mutmuta nirya ara, yalakuka kolupnamle do? Tonda, talye kam unyak ning ap, maka nirya ara, amutuku nang nun malye wininyaba deice arye, akunum dibik. Dibikopura, nunce ayupu nyanyabe. Ayupu nyananyap ning ara, “Nun ubirye, teninamap deice arye wininamap ning ara, Allah arye kum elinamsile,” nyanyabe. Na Yeremia birye, Allah ati nyapse.
Ara, na nyanun yupu laka nyan pil deiyok nang, sik nabi-nabi nang babye nyanyak yupu ara, tilila yupu deice aryuk nyanyake. Narye kum nyapdeipse yupu bukni, sikcuk, ‘Allah arye, ayupu nyapsukba, nyapsiabe,’ nyabuka, tilila nyanyake. Aninguk kum bukni, sik tilila yupu nyanyak nabi-nabi nang, sik kanye aryuk, ‘Winipnamlume, winipnalume,’ nyanyaka deice arye, na si eren aik pum tam pil dona deiyok nang, sik imam-imam nang arye, pil dokirye, na mapu Israel nang talibikirye, sik nong deice, ikin ning weik delinyake. Aning-aning nirya ara, dipkoprob malye ulul bukni, na mapu sik Israel nang, awinina ati, kanye deibuka winilulume. Winilulum bukni, anggun nirya kanye mouplulume! Aminyan sirya daknamle talak akunum dam uplyeura, anggunda yata wiripnamlum do?
Allah Yahweh arye, sik Babel mutuku tam unyak nang ati, ayupu ton akunum nyapmale. “Anggunda, teleb mutuku noutam ara, bona utotoa weik nang ululume. Anggun mutuku dam ara, weik mek ton balule. Bukni, wini talak ara, anggun kam un talak ara, akunum sirya daknamsine. Narye, anggun kam una deiyok ning dopropnamsine. Winipnyopura, anggun nirya, adiparyuk dibinauk upnamlume.
Malye winin ning lakak kipliba, bakanyake. Bukni, ninye ton aminyan el nong noutam ap, baju bol deice palipnamle ning ap ara, el pia moubuka kum tenelula deice arye, amuak weklirye, sakalule. Anye elti, ara winilul koproba melibuka, ‘Bico,’ kum teneptinge. Na Allah Yahweh ati ara, ‘Se, anye birye bico nyapnutua’ tenen, moropnutua babye, narye anye biti, kum meliptinye. Aning ara, el ap mal olan nang ara, akunum bisilula ati, narye anye biti, pia kum melipnamne.
Na Yeheskiel birye, adiparyuk ayupu nirya tuba nyanmase talak ara, bikna kum, adiparyuk tonoknye, el si Benaya birye deiamuknye, Pelaca, elda tuku deice lokuka poulbiyukce, adiparyuk dibuk. El akunum dibukopura, na babye, ilil weik upnuka deice arye, adiparyuk tuku deice sakuka poulbisirye, weik yupu deice arye, nyapse. Ara, “Se na ni Allah, anda aning-aning nirya talibuka, Pia Mikip Weik Deiyoknye ulyame! Nun Israel yala nang ara, mitik tonun tuba kam aunmab nang nirya ara, adiparyuk opsimince, sirya daknamsilam do?” nyabuka, ngaluksirye, malye nyapse.
Se, Yeheskiel anda, ninye sirika arye, deipkiknye ulyame. Yata deiyok ati, sik Israel yala nang nirya arye, ayupu, winipmanto yupu ati, tuba tenekirye, si pia tuba-tuba nyanyak do? Sikce nyanyaka ara, ani. “Allah arye, nyalye yupu kekebikirye, lak nyanyaka deiyok nang ara, sik nabi-nabi nang arye nyasinyak yupu nirya ara, talye-talye nyasinyake. Keting tamun yupa weik upnamtibya babye, sikce nyasinyak yupu nirya ara, nong pia kum unamle,” nyabuka, malye nyanyake.
Se, anda ninye arye deipkiknye ulyame. Ance Yerusalem mutuku domik tam dipdemince amutuku ati, wenen yupu nyapnulyame. Ara, narye sikti, ikin ning arepyeba, Israel nang ap, Israel nang dam unyak tam nirya ap, na si erena ati domik aik ap ati, sik wenena ati, malye kipdeipnamne. Winipnamne ati, yupu laka nyanamlyame. Aning ara, ance nyapnulyame. ‘Allah arye wenepnamsileʼ nyabuka, laka nyapnulyame. Winipminyeura, sik Israel mutuku noutam unyak nang nirya bikinamake.
Se, an Israel mutuku nirya talibuka unmalam ninye deiyoknye, Raja bira, anda pia malye ninguk talibuka ulyama ati, anda, ‘Na like,ʼ tenekunune. Anda na yupu moubuka, kum talibuka winimince, batakalyama ati, an wenen sum akunum yanmale. An pia malye winiminye ning ara, weik akunum kibuka ati, an weik wenen sum ara, akunum yale. Ati asum ara, wenepkinirye, sirya akunum daknamkine.
Ara, talye ati kum nyapsine. Kume, Israel mutuku unyak nang nirya kan-kan arye, malye wininyak nang babye, diksukum kibuka, teleb wininyak nang babye, weika arye opnamne. Winipnamne ati, na ninye on parang ya dopropnirye, dabu tam (arah utara) unyak nang arye dipdongobuka, iknapye mutuku tam (arah selatan) unyak nang nirya ara, opnirye sirya daknamne.
Winiminye ati, sik Israel nang wekmakirye, yupu kekebikceura, sikce anti asipdenamkiake. Ara, ngalukuka malye nyabuka engepminyeba, Israel nang arye, ‘Se, yata deiyok ati, ngalukuka malye nyanmalam do?’ nyabuka asipkikceura, ance sik anang ati, nyapnulyame. Kume, dotalak ara, kanye ikin yupu ton boyasikceura, kekepnamaba atia. Ayupu nirya yanuka nyabikceura, kekepnamak nang ara, ‘Se, yata wiriptibye do?’ tenen, ikin kanye bobuka, sik talima dakalsanamle. Tonda, sik anang nirya ara, taruk mitang uplyeba, daksaknamle. Sik kanye bobuka unyak nang nirya ara, kum kipnamle. Tonda, sik anang yok sirim taliplya deice arye, sik yok babye, sirim talibuka, mikip kum upnamle. Sik kanye tenen ning ap, sik kisok yung ap ara, mek atonun uplyeba, pia mikip kum upnamle. ‘Weik ikin ning yanamle,’ nyapmasina ara, pia dipkoprob yanamle. Anggun dibinauk unamlume. Aning yalyopura, aning nirya ara, winipnamle. Na Allah Yahweh, aning-aning deice tam erebuka, Pia Mikip Weik Deiyoknya ununye birye, akunum nyapdeipsine. Allah arye, na Yeheskiel biti nyapnuke. Nyapnukopura, yupu tonap dukdongobuka nyapnuk.
Ara, min talak arye, deiyok kouamlumce, anggunce Israel tam nang nirya ati, yu ulamsukce, ‘Anang ara, nun pia like,’ tenebuka ulamlume. Atenena ara, pia kum batakalamlume. Pia tenenauk ulamlume. Tonda, minop talak ara, yuk mutuku nang arye, anggun Israel nang ati, ikin ning boyanuka, sik deice deibikba, ‘Se yata winiptibye do?’ tenen, talima dakalsaklamsukba, bikbik abuka biyik talak ara, anggun Edom mutuku nang arye, Israel nang kum melilamlume. Anggunce, anggun mal olan nang tam kipdoplumba, yuk pera mutuku nang arye, ninye on parang ya dopdakuka, Israel nang weik tonun olamikba, kanye imun weik ulamik. Winimunya ara, malye weike.
Atalak ara, Babel mutuku tuba ulamse talak bukni, lengdar atonun mapsirye dinmasiba, Allah arye na bobuka, Israel nang ulamik mutuku noutam bobinuke. Winipnukba, amutuku noutam weik tonun bukamuk mutuku kon deice binuka deipnuke. Atalak ara, narye dana-dana tam dinmasiba, na dam bukni, weik asik atonun ning, weik ning domika, ara weik kota kilamak mutuku atonun ton, iknapnye tam (arah selatan) awamukba eipse.
Se, anggun Israel nang, wini talak ara, anggunti kum kipdeipnamsin talak ara, akunum dam uple. Ati, na Allah yu weik upnilyopura, anggun deice deipnamsine! Ati, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilulum ning ap, anggunce malye-malye winin ninguk weik winilamlum touk, dekna ati, yupu bokeipsinirye, weik tonun wenepnamsine.
“Tonda anggun talima malye ning, tuba upmasilibuk, kwalina kwalibuka dipmunce, na si erenululum talak nirya ara, na lik ati, narye aweik sum nirya kum kipdeipnamne. Winipnirye asum ara, anggun engen sumuk kipdeipnamsine. Tonda, kanye teleb mot, teleb-teleb selulum ning nirya ara, tamubuka engelamak ning atonun kipdeipnamsine. Aning atonun, narye anggun kisok potong nirya kobuka, kum kipdeipsiniba, kisok delo ninyeuk unamlume. Ikin ning weik, anggun nong deice deipsiniba, anggun nirya arye, imun kanye bobuka unamluma anya arye, malye baju arye, pakupdanuka bukmunce, engenamlume. Winipmanto ara, el lin ap, el li ap arye, sik min yuma deiamdice mi ati, dipliba engelamak tonun, ikin ning weik, anggun nong deice deipsinyopura, engenamlume. Atalak ara, kanye imun deiceuk unmamunba, akunum sirya daknamle.” Allah arye, sik Israel ninye ati nyabuk.
Aning akunum eipsopura, Allah arye, na Amos biti nyapnuk. “Amos anda yata ning ton upmoba eipmamum do?” nyabuka asipnuk. Nyapnukba, narye tamubuka nyapse. “Tonok tower tapu arye wiamik aling pum bisik ara, yo duk buppu li arye, duk eklamuk ning ayala-yala nirya weik lipmoba eipmanue,” nyapse. Nyapsiba, Allah Yahweh arye, tamubuka nyapnuk. “Tonok tower tapu pum tam yo duk eklamuk ning, ayala-yala nirya weik lipmoba, eipmamu ning deiyok ara, ani. Ayo duk akunum eklamuk touk, Israel ninye, sik wenen talak akunum wisina atonun upmala anya arye, sik wenen talak dam upmala ati, ayo duk eipmalame. Tuba-tuba malyeuk wininyaka ati, minop talak aning nirya, namin kibuka luba kiamse bukni, wini talak ara tuba tonap, kum namin kipnamne. Narye, ‘Sik malye wininyak ning wenena ati oplopnamne’ tenen, kintinipse ning ara, kum bataknamne. ‘Dipkoprop Israel ninye wenebuka opnamne,’ tenelamse talak ara, akunum dam uple.
Tonda, aminyan talak ninye arye, “Ton tam nang ap, yuk tam nang ap olanamake,” nyabuka, talya nyanamake. Tonda, ton tam nang arye, yuk tam nang ap dipkoprop olakiba, laka nyapnamak ning ap, yanuka nyabikiba, kekepmunyopura, ayupu ati ilil asa kum unamlulume. Allah arye, ‘Aning atonun ning wininamle’ tenen, akunum tenelamuka ati, dipkoprop wininamle bukni, ‘Sirya talak sirya daknamle talak ara, kabula,’ tenenamlulume.
Yu ubuka ati ara, Allah arye nyapsuk. Sik dam arye, na nong ara duknupniba, sik tonap kum eipnamniake. Winipniba, sikda upra balamikca, sirya talak ara, ‘Yata wiripnamak do?’ tenen, dinamne. Sik bataknamna ara, talye ati kum bukni, deiyok ara, sik wini talak unyak nang ara, dipkoprob ning ton, kum wininyake. Malye mapu arye, sik ni yapu kum kekekirye, malye ninguk winilamak touk, atalak ninye arye, na batakuka, na nyapse atonun kum dukdongobuka unyaka ati, narye sik bataknamne.
Isa Mutuku Dongonye lopdongopliba, atuku pum arye weleyalyopura, tukwak mutuku dana-dana tam unyak ninye ati, tilila yupu nyalbinamle. Atalak ara, sik tukwak mutuku dana-dana tam unamak ninye sik si ara bitinye. Ton ninye yupa, sik si ara Gok nyanamake. Ton ninye yupa sik si ara, Magok si nyanamake. Isa Mutuku Dongonye eltilila yupu nyapliba kekebikirye diba tenebicopura, elce sik nirya ati bulubuka deipnamle. Ara, weik olana talak kintinina ati, aninye yupa bitinye bulubuka deipnamle. Aninye sik yupa ara, nukmanto kume. Ara, laut mekwen kup-kup ak, keil wenenga pia weik aulye touk, yupa nukmanto kum unamake.
Aning nirya eipsopura, aminyan eipse ning ton nyapnusine. Ara malaikat dumbarye nang arye, tukwak mutuku koluka biyik. Ton malaikat ara, mutuku sirya im sirya bukni, keting yangan tam tikilbiyuk. Tonye bira keting wekelban tam tikilbiyuk. Tonye bira outam, tonye itam bukni, mutuku sirya im sirya tikilbirik. Sik malaikat dumbarye nang arye, dana-dana tam nirya yangalye kumanya ati, talibuka kalikil biyik. Ara, kumanya arye tukwak mutuku deice ap, yo kan-kan noutamak ap, laut mekwen tam nirya ap, ‘Min doplyak’ tenen, kumanya kalikil biyik.
ကြော်ငြာတွေ