Tonda, anggun ninye deiyok nang ara, sik pia malye wininyak Raja-Raja nang nirya babye, pia asukumuk, sik kama talibuka, kum unamake. Ara, Allah arye, “Na yupu uk talibikirye, pia diksukumuk wininyak nang ati, ‘Amutuku tuku ara, arenamsine,’ nyabuka, nyalin yupu deice arye, akunum nyabuka arepsuka atia. Ati ara, nuncuk, amutuku tuku pia talinamabe. Amutuku arepnamsila deiyok ara, ‘Amutuku dobuka, sik diksukum wininyak nang, kum areplyopura, sikce teleb winin ning ap, na yupu ap yanipnikirye, ‘Malye winin ninguk wininamap’ tenen, sik taruk bibikikirye, ‘Malye winin ninguk, talibuka wininamabe,’ tenenyaka ati, nyapne.
Yehezkiel 7:11 - Eipomek11 Anggun mutuku unyak deiyok nang nirya arye, talye bona utotoa talina kum nang ati, ikin weik ning, sik nong deice delinyake. Winibuka unmaca ani, sirya ara, ninye deiyok talibuka erepdakirye, sik amu tam bona talina kum ati, talye kankan ninye unyak ninye ati, yaninauk wininyake. Ati ara, na Allah arye, anggun Israel tam deiyok nang nirya, wenebuka opsinirye, sirya daknamsine. Tonda, sikce aning-aning nirya, pia teleb bona talinyak ning nirya ara, kum daneipnamsine. Aning atouk, sik dekna weik ning nirya babye, kum daneipnamsine. Teleb talin ning tonok ning babye, tuba kum upnamle! Sikce bona talina weik nang unyak ning nirya ap, ninye deiyok kibuka talinyakce, mambul weik nang unyak ning nirya ap, narye kum daneipnamsine. Sik bona weik talinyak nang ap, ninye deiyok kibuka talinyak nang ap nirya ara, wenepnirye, kum daneipnyopura, sik nirya ara, amu tam kipniba unamake. အခန်းကိုကြည့်ပါ။ |
Yehezkiel 7:11
28 ပူးပေါင်းရင်းမြစ်များ
Sik yupu talye-talye nyanyaka deice arye, yuk ninye nirya ati, akutubuka nalibikirye, yep-yep abuka kinyakce, malyeuk wininyake. Kanye talima erena deice arye, kwalinyakce, yuk talye ninye nirya ati ara, ‘Nunce nyanyap yupu kum kekepsumunyopura, nunce anggun deice, ikin ning weika arye, delinamsiabe,’ nyabuka kwalilanyake.
Tonda, mal olan talak babye, Allah si eren aik pum tam pil dolamik nang, sik imam-imam nang babye, pia weik tonun olamik. Ara, ninye mal olan ati parang dobuka, sik imam nang weik tonun olamik. Atalak ara, pia olanauk ulamika ati, imam nang arye domik kilapu ara, sik domik ninye olamikba, youwak dakik bukni, lo ton kum ubuka ati, sik domik ninye ati, engena kum upmanto ulamik. Tonda, ninye nong weina ap ara, teleb ubuka weipmanto kum ulamik.
Anggun Pilistin yala nango, anggunce, ‘E, Raja Ahas nun olamsuknye, tonok yo kung atonunye bira, ninye arye kat yo kama dobikirye, yuk nang, sik nong deice olamak touk ulamsuknye bira, akunum dipmale,’ teneplumce, pin-pin kanye bobuka, kum unamlume. Deiyok ara, Raja yu kwatima arye, ulamle touknye ulamsuk bukni, akunum dipmal ati, yu kwatima arye duk deiplyeura, aminyan talak pataplye ning ara, ninye on kwatima ton, pia yu ning panabuka balamak touk, aminyan talak ara, pia weik yunye ton tiklirye, min talilamsuknye, el punupnamle. Anye bira, pia weik imun kanye kipdeipnamsilanye tiknamle. Aning atonun, apia yu ninye on kwatima arye, duk deiplyopura, aminyan talak aning ton usupliryeura, ninye on kwatima ton, pia yu ning ton, panabuka balamle. Aning arye si topsilyeura, ninye adiparyuk dibinyake. Ati sirya talak yanamle yunye bira, weik kanye imun ning, anggun nong deice deipnamsil. Anggun Pilistin nang ara, weik kanye imun upnamsile.
Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.
Winipmanto ning ara, yu weik nang arye, sik obuka, sirya dakice ninye ati, kama arye debuka olamak touk, nun obuka sirya daksik ninye arye, ikin weik, nun nong deice delilamsik ning nirya ara, Allah an mikip deice arye, akunum kum kipdeipmasilama ati, kanye deibabe. Minop talak, Gideon ap, el yin talin nang ap, ninye mitik tonunuk ulamik bukni, an meliamluma deice arye, sik Midian tam ninye mikip weik ulamik bukni, anang nirya obuka, sirya dakik touk, wini talak ara, ance nunti akunum melipmasilamba, telebuk unamabe.
Ati ara, Raja Yosia, el mi Raja Yoyakim, Yehuda yala nang nirya ati, Raja kibuka taliplumnye bira, anti, na Allah arye ayupu nyapdeipnukine. An dipminyopura, an tam nang arye, teleb yupu nyabuka, kum engenamkiake. Ara, anggunce, “Se, nun Raja Yoyakim diplyopura, elti, kum engepnamlume. Tonda, yuk nang arye ton, “Se, na kwit, Se, na ka kil do, nun mutuku talibuka Raja kipmasunye bira, dipmala ati, bicoe tenepmunce, engenamlume,” kum nyanamake. Tonda, anggunce, “Se, nun ninye deiyoknye dipmasile. Nun Raja ara, pia sisinanye, teleb weiknye winilamuk bukni, dipmala ati, engenamabe,” pia kum nyanamake.
Asum ara, Allah arye mutuku sirya, im sirya nirya unyakce, malye winilamik nang opnamle nang ara, sik nong nirya, tukwak weik uplirye langdipnamle. Ara otam im sirya, ap mutuku sirya, dana-dana tam ap, anoutam ap, ninye weik opliba dipnamak nang, sik nong langdipnamle. Allah arye ninye weik tonun oplyopura, yuk nang arye adipmakce nang ati, eibikirye, ‘Se, sikda bicoeʼ tenen, malye kanye bobuka ukirye, kum engepnamake. Tonda, tonoknye babye, oplopmalye nang, sik nong bobinuka, kum weilbinamake. Anang nong, ‘Daupmalyeʼ tenebuka, opmaliba dipnamak nang, sik nong bobinuka, tuku pum kum weipnamake. Kume, tuku deiceuk batakikiba, talye kam ulul ning, dei siriklopliba, tuku deice lak sukum talye uplirye, tong welelamle atonun, upnamle.
Winipmanto ara, mek pu dobuka, mek tuba-tuba panabuka balamle touk, Yerusalem mutuku unyak nang arye, malye kibuka, malye winin ninguk, tuba wininyake. Sik amutuku unyak nang ara, pia malye kibuka malye yupu uk nyanyak ning ara, na Allah arye, akunum kekenune. Tonda, sik amutuku unyak nang, pia malye kibuka, yupu uk nyanyak ning ara, narye kekenune. Tonda, sikce, malye kibuka, aning-aning nirya, oplobikce ning ara, akunum elinune. Tonda, dan tam mutuku do, sik unyakak nirya ara, dila ulul ning ap, uk dilul ning ap nirya ara, na akunum elinune. Allah arye, Yerusalem mutuku nang, sik mal olan nang ati, nyapdeibuk.
Aninguk kum winipnamne. Tonda, sik Israel ninye wenena ati winipnamne ning ara, ani. Ara, sik unyak mutuku nirya noutamak ara, ninye arye kanye deibikirye, mot senmakirye, lelim nyalamak ning ap, kanye deibuka, akutunyak ning ap, pin-pin kanye bobuka, lelim nyalamak ning nirya ara, tuba tonap nyakiba, kum kekepnamake. Weik kanye imun ning arepnamsine ati, nyapsine. Tonda, Yerusalem mutuku noutamak ap, Yehuda yala ninye talibuka unyak mutuku noutamak nirya ara, tuku pia malye kipdeipnamne. Winipniba, aning-aning nirya koluplirye, aning nirya kum danamle. Amutuku ara, weik kanye imun ning dopdeipnamna anya arye, amutuku noutamak nirya ara, sal ap, kilapu ap, pia kum dolanamake. Sal ap, kilapu ap, dopdace talak, kanye deibikirye, lelim nyalamak touk, atalak ara, lelim nyakiba, pia kum kekenamake. Tunim abuka unamake. Narye arepneba, amutuku nirya malyeuk unamle ati, nyapsine. Na Allah arye nyapne.
Ura, nara, Allah Yahweh, aning-aning nirya talibuka, deice tam erebuka, mikip weik ununye birye nyapsine. “Ara, anggun ninye deiyok nang, Raja-Raja nang arye, malye-malye winilulum ning ara, akunuma. Anggunce malye-malye winimunye ning ara, bataknululume! Se, sik Israel nang, anggun deiyok nango. Anggun amu tam unyak nang ati, olana ap, yu uplyeba yupu arye malye nyalulum ning ap, ikin ning, sik nong deice delilulum ning ap, awinilulum ning deice arye, sik kanye dakalsakasulule. Ati, aning nirya ara, adiparyuk bataknululume! Aning ara, batakmunce, pia teleb diksukum un ninguk wininamlume! Tonda, narye, ‘Wininamlume, aning ara, pia kum wininamlume,’ nyapsise touk, pia teleb ning ati wininamlume. Aning atonun, tuba-tuba ‘Naʼ tenen nang, sik tibuk, sik unamak tuku noutam arye, tuba kum yakalkwetenamlyame. Aning babye, bataknulyame! Nara, Allah Yahweh, aning-aning nirya talibuka, deice tam erebuka, mikip weik ununye birye, anggun ninye deiyok nang ati, akunum nyapsine.
Ati ara, diba nara, anggun ni koproba Allah Yahweh, aning-aning nirya talibuka, deice tam erebuka, pia mikip weiknye unirye, ayupu ara nyapsine. Na dipkoprob pia kam unye touk, anyapnusin ning ara, dipkoprob upnamle. Dipkoprop wenepnamsila deiyok ara, ani. Anggunce na si eren aik pum tam, Pia Teleb Lek Aik ati, pia malye updeipnamlume. Anggunce, pia malye weik ning, talibuka winilulum ning ap, talye ning ati, ‘Nun ni koprobaʼ tenen, isa si erebuka moromunye ning ap deice arye, na si eren aik, akunum malye kilinamlume. Winimunya ati ara, narye anggun nirya ati, pia bico tenena kumce, wenebuka oplopnamsine. Tonda, narye anggunti, ‘Se, anggunda ‘Naʼ tenen, nang umunya anya arye, bico tenepsinirye, anggunti teleb kibuka melilamsise touk, tuba kum wininamsine. Aning kum bukni, oplopsinirye, kum kipdeipnamsine.
Winipminyopura, apotong noutam arye, mitik tonun ton ap dopropnulyame. Apotong dopropmince, uku din malye noutam dongopnulyame. Winibuka batakmamin buk, uku buk arye, aning nirya dibuka, sirya daknamle. Ara, lak kilina ati winipnalyame. Bukni, aning nong ara, ani. Ara, aminyan talak narye arepkiniba, weik uku buk, Yerusalem mutuku noutam arye, deiyok koubuka dinmalya ani, Israel mutuku noutam nirya uamlye ning nirya ara, auku arye dibukaplirye, amutuku nirya dipnin banamle.
Tonda, na Allah Yahweh, aning-aning nirya talibuka, deice tam erebuka, Pia Mikip Weik Ununye birye nyapkine. Yeheskiel anda, adiparyuk, an taruk bokmince, an yan ara, tuku deice mikip arye yanipnulyame. Winipminyopura, engepmince, weik yupu deice arye nyapnulyame. ‘Se, anggun nirya moubuka teniplulume! Israel yala nang arye, anggun malye una ap, narye, ‘Aning ara, pia malye aning ara, winina telebe nyapsa ati, aning ara, pia kum wininamlume,’ nyabuka, lak nyapse ning bukni, sikce amalye winin ninguk, talibuka winilamik. Ati ara, narye, ninye oldana ap, kanye imun weik uk, yala-yala arepnamne ning ap, kanye imun weik din patana arepnamne ning ap deice arye, Israel nang, pia weik tonun dibinamake.
Anyasik noutamaik ara, weik uk ap, din patana ap, ninye bai tam arye daunyak nang arye, olanamaka deice arye, ninye weik tam ara, dibinamake. Bukni, mitikto tam nang arye, bai sakuka, mutuku-mutuku kon bukuk noutam, bikbik abuka bindopnamake. Abinuka unamakak ara, sum maka ara, weik mutuku amu tam, lu ubukak bukuka engelamaka atonun, binuka engenamake. Winipnamaka deiyok ara, sik anang nirya ara, ‘Se, nun bidamnye malye ulamupa deice arye, wenepsukba, dibinauk unyabe,’ tenebikirye, malye yupu nyabuka, malye kanye bonamake.
“Se anda ninye sirika arye deipkiknye ulyame. Nara, Allah Yahweh, aning-aning nirya talibuka, deice tam erebuka, pia mikip weik ununye birye, dipkoprob sik Israel tam unyak nang nirya ati, nyapne. Sirya tam akunum yanamale! Ara, anggun amutuku dana-dana tam noutam nirya ululum Israel nang nirya ati ara, na adiparyuk, akunum kum kipdeipnamsine!
Allah Yahweh arye, na Yehezkiel biti nyapnuke. “Se, anda ninye koprop arye deipkiknye ulyame. Sik awininmak ning ara, ance moubuka eilinmalam do? Ara, sik Yehuda yala nang arye, pia malye weik unyak ning ati ara, ‘Aning ara, ilil kume. Daupmalye,’ tenen, bataktinye do? Kume, awininmak ning ara, dipkoprob malye unmake. Bukni, aninguk kum bukni, sikda amutuku-amutuku noutam nirya ara, sikce pia malye-malye winin ning, weik tonun ton tabakuka wininyake. Ara, ton nang arye yuk nang ati, oldana ap, walana ap, mikip weik yu kililana ap, weik wininyake. Wininyaka deice arye, na yu pia weik unulule. Yu unulul bukni, sikce, aning tenina kum aryuk, siltong teleb yo taruk, sik u pum bisik liptalibikirye, asiltong kekebikcopura, isa mer siuk erenyake. ‘Wininyaka anya arye, aning ara pia na lik ati, narye sikti, yu weik unulule,’ nyapkine
Allah Yahweh arye nyalule. Sik Israel ninye ara, pia dipkoprob teleb ton kum unyake. Teleb winin ning ara, akunum luba kibik. Bukni yu weik upliba, sik yuk nang ning nirya dalubuka dolonyake. Yu upliba, ninye ona ap, sik ning ubula dolona ap, ulamika deice arye, yuk mutuku ninye taleamik ning weik dopromik. Winilamikce, abona-bona nirya, sik keil arye deibuka, domik aik pum tam dongolamik. Ati, sik Israel ninye ara, pia diksukum winin ning ara, ton kum wininyake. Sikda pia malye-malye ninguk wininyake.” Allah arye nyabukba, Amos kekebukce sekuk.
Se, anggun nirya arye tenemunce, nyaluluma ara, “Allah arye nun malye wininyap ning ati, nun nong deice ikin ning deipnamsil sum ara, kum tenenamabe. Atalak aryuk, kanye imun ning kum yanamsile. Aning kum bukni, pia ouku weikto daunamabe,” nyalulume. Bukni, anggun ayupu nyalulum ninye nirya arye, anggun malye-malye weik winilulum ning deice, Allah arye wenepnamsil talak ara, akunum dam uple. Weik arye wenepnamsil ning ara, anggunce, anggun bidamnye arye, batakaldalulume. Allah arye anggunti, wenebuka, ikin ning deipnamsil sum ara, akunum dam uple.
Sik amalye ning wininyak nang arye, bona utotoa talina kum ninye nirya arye, sik wa tonok wiamikce ning ati, ‘Nuncuk ubula dopropnamabe’ tenen, talipmace yupu ara, kum batakanyake. Adiparyuk dekna kumce, lukdanuka ubula dolonyake. Atonun, sik malyeuk tenenyak nang arye, bona utotoa kum ninye arye tonok, wiamikce wa win dam ati, ‘Alubuka doproptibye’ tenen, mikip donyake. Aning atonun, bona utotoa kum ninye, sik aik tonok babye, ‘Adiparyuk dalubuka dopropnamabe,’ tenenyake. Utenelamica ani, tilila yupu nyanyaka deice ap, sik anyasik ninye nirya obikirye, bona utotoa talina kum ninye, sikce aik pum tam deiamikce ning nirya, talye dalubuka, ubula dolonyake. Yata ninye do nirya, sik talye yuk ninye, sik aik ap, sik aik deiamice ning ap, sik aik neika ulamikce, kili sal ap nirya ara, ‘E, nun mapu silip ap, nun talenyap ning ap ara, telebuk unamle,’ kum tenepnamake. Sik malye deiyok nang arye, talye bona utotoa talina kum kili sal, talinyak ning nirya ara, ubula don nang arye dalubuka dolonyake. Aning nirya dopdobikcopura, sik anyaik ulamikce ninye nirya arye, teleb kanye ton kum bonyake. Sik aninye nirya arye, malye kanye bobuka unyake.
Tonda, winipmanto ara, anggunce na mapu koproba Israel yala ninye ati, sik tup noutam, aubuk ning dobuka, dipnumunye talak ara, sik aninye nirya ati, yok cebuka batakmumce, sik tup kulolulume. Tonda, sik bol nirya sekuka, batakalulume. Winipmanto ara, basam tup toubukabikirye, makau pum bisik dongolamak touk winilulume. Aning atonun, basam toubuka mitik-mitik kibuka, yangalin ning, el si ara kuali deice arye, dabuka dilamak touk, anggunce na mapu koproba ati, winibuka dilulume.
Na kele. Sik bona utotoa kum noutam unyakce, weik bona talinyak ninye ara, pia malye wininyaka deice arye, bon-bona weik ubula dolonyake. Anang arye, sik amu tam unyak bona utotoa talina kum ninye ati, tilila yupu deice nyabikirye, ubula dolonyake. Tonda, sik amu tam unyak ninye obikirye, sik ning ubula dalubuka dolonyake. Wininyaka ati, tilila yupu lena ap, aunyak ninye ona ap deice arye, bona weik talin ninye unyake. Anang ara, sik tuba-tuba tilila yupu uk nyanyaka anya arye, wini talak ara, dipkoprob sik yupu kum nyapmanto unyakce, bona utotoa talin nang ara, tilila yupu nyan nanguk unyake.
Allah Yahweh, el yu ulul ning ara, tukwak uplyeba, aweik ikin upnamle sum areplyopura, sik bona weik talin nang arye, talinyak dengna weik ning emas ap, perak ap arye, amutuku nang ati, pia kum melinamle. Abona weik talenyak nang ara, sikce sik dengna weik talenyak ning arye, pia kum lyepdanamake. Allah el yu ara, weik uku dilamle touk ulirye, tukwak mutuku nirya ap, tukwak mutuku nang ap, nirya wenepnamle deice arye, malye kiplirye, bataknamle. Aning ara, ninye arye kum tenipnamak buk, sik mangkau kibikce talak, Allah minopce tukwak mutuku kam unyak ning yala-yala nirya ap, tukwak nang im sirya, mutuku sirya nirya ap, opsilirye sirya daknamsile! Tonok ning babye, pia kum bataknamle.
Aninguk tenebuka wininamluluma deiyok ara, ani. Ara, yata nang do nirya, yuk nang arye sikti, malye ubiceura, bico tenebuka luba kina kum arye, malye ubuka wenebmace nang ara, Allah arye anang sik malye winin ning ati, talye luba kinamle do? Kume, Allah arye awenebice nang ati, sikce yuk nang ati wenena yupu nyalamak touk, bico tenebuka luba kina kum arye, tamubuka weik arye wenebuka opnamle. Bukni, yuk nang arye, sik malye upsikiba, bico tenebuka lubkinyak nang ati ara, Allah el babye anang ati, bico tenebuka, lupakilongonamle anya arye, weik arye kum wenepnamle.
ကြော်ငြာတွေ