Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




Yehezkiel 6:9 - Eipomek

9 Yuk pera mutuku nang arye, anang tomobuka bobinuka, deipnamakak ara, amutuku-amutuku unamak Israel yala nang arye, dabinuka unamak talak ara, sikce nati kanye moubuka teninamake. Tenipnikirye, moubuka biknamniyak ara, ‘Se, Allah arye nunti, wenepsuk ning deiyok ap, elce nunti, talima uk dilamukba, ‘Na like,’ tenelamsuk ning ap, adeiyok ara, nun tia.’ Ara, nunce, nun talima noutam, Allah ati kanye pia kum deiamuba ati, el batakamuburye, talye isa ati wibuka, aning si erelamupu. Tonda, nunce pia malye un ning talibuka, winilamupu ning ara, dipkoprob malye ninguk winilamupu. Tonda, Allah arye, ‘Aning ara, na pia like. Aning nirya ara, mem ning anya arye, pia kum wininamlume,’ nyabuka, lak nyapdeiamsuk bukni, nunce amalye ninguk talibuka, winilamupa deice arye, Allah Yahweh arye wenepsukce, bataksuke. ‘Aning nirya ara, ila tamubuka teninamak’ tenen, winipsuke

အခန်းကိုကြည့်ပါ။ ကော်ပီ




Yehezkiel 6:9
37 ပူးပေါင်းရင်းမြစ်များ  

Aning nirya akunum winibukopura, Ahas adiparyuk, Damasyik mutuku biyuk ara, ‘Asyur mutuku taleamunye, Raja Tiglat-Piliter ap epdanamanʼ tenen, biyuk. Amutuku noutam ulamuk talak arye, Asyur mutuku ninye ara, sik tam isa arena ati, moupdeiamikce, domba ato ning obuka, uku dongolbalamikak, aning si mesba, aning memepdeiamik ning ati dilbiyuk. Dilbiyukce, amemepdeiamik ning nirya ara, moubuka dipdeyukce, dekuka gambar sekdobuk. Winibukopura, ‘Yerusalem mutuku noutam babye, atonunuk memepnamakʼ tenen, Raja Ahas bira, ‘Agambar ap, amesba dona ara, winibuka-winibuka donamake,’ nyabuka laka nyan yupu ap sekukabukce, imam Uria dam dopdeibuk.


Ati ara, ayupu nyapmanilamba kekepmana deice arye, ‘Na nyalamse yupu ara, dipkoprob malye yupu nyalamse,’ kunum tenepne. Utenepmana ati, ‘Yata deiyok ati nyalamse do?’ tenen, ikin kanye bobuka, alye dakdana anya arye, arup malye nyanmanu ning ara, bataknirye atu dobuka, na kisok deice deipna arye, butbuta deice bukmane. Ara, pia walwal arye nyanmanuba, winira kel kipmana ati ara, na malye ning batakna arye, ikin kanye bobuka abukmane. Ayub birye nyabuk.


Ara, nun Israel ninye nirya ara, Babel mutuku bobinamsikba, amutuku noutamak ulamupu talak ara, amutuku balamuk mek lilunak bukmance, Sion mutuku ati tenipdenopura, pia weik arye engenauk ulamupu. Ara, minop talak, nun mutuku koprop, Yerusalem mutuku ati, tuba tenenauk ulamuburye, engelamupu.


Bukni, sik Israel nang ara, ninye kum sukum, pia pata mutuku noutam balamik talak ara, sikce, ‘Kume Allah arye, ‘Aning ara, wininamlume. Aning ara, pia kum wininamlume,’ nyapdeiamsuk yupu ara, nun lik,’ tenelamikce, ayupu yaninauk winilamik. Pia weik tonun, malye-malye winilamik. Sikda, pia mek kum sukum balamik talak ara, malye weik winilamika deice arye, Allah el kanye ara, ‘Se, yata ati, na bataknikce, malye-malyeuk tuba wininyak do?’ tenelamukce, mambul kanye bobuka, el bouku sukulamuk.


Tonda, ‘Nun ni Allah kanye deipsitue,’ tenen, anggunce nati siltong teleb ning dekuka kum boyanganululume. Tonda, anggun malye un ning dekna ati, ‘Anggun weilulum ning obuka nong kalimna teleb ning boyanganamnululume,’ nyabuka anggun deice kum deipsiseba, aning na arena ati kum boyanganululume. Aning nirya ara na ton kum patanulule. Bukni, anggunce malye winiluluma deice arye, nati ikin ning delinululume. Tonda, angguncuk tenepmunce, malye winilulum ning nirya ara, na lik weik unulule. Allah arye nyabuk.


Allah arye Israel ninye weik tonun meliamuk bukni, sikce elti, ‘Nun like’ tenen, el yupu yaniltalamikba, Allah el Dib Kanye arye, ‘Se yata ati wininyak do?’ tenen, malye kanye bobuka talima uk dilamuk. Winilamukba, Allah el Dib Kanye aryuk Israel ninye sik wenena ati obuka sirya daklamuk.


Nun nirya ara, Allah ance, ‘Aning ara, weik malye ning anya arye, na walwale,’ tenesiminye ning atonun wininyabe. Tonda, nunce, ‘Teleb unyap ning ani’ tenen, teleb winin ning winiptibya babye, dipkoprob weik malye ninguk unyabe. Nunda, pia weik malye ning baju deice bol pipliba, bataklamaka atonun, nunda malye ninye uk unyaba anya arye, malyeuk usulule. Tonda, weik kumanya yalirye, pubuka dopliba kolulamle yo bok dakuka bobalamle touk unyabe. Ara, nun minopce malye ulamepya ani, wisi dapyopura, dibinyabe. Ara, nun bidamang malye wininyaba deice arye winisulule.


Nyabukura, nabi Yesaya birye, tamubuka nyabuk. Se, nun apu koproba, Daud birye deibukba, dadeipdanin yangalamlum ninye nirya ara, kekeplulume. Anggunce yuk nang ati, ‘Derepsicak do?’ tenena kumce, winililulum ning ara, mitik malye winilulum bukni, ‘Allah arye derepsilyak do?’ tenena kum diparyuk, elti, winililulum ning ara, pia malye weik anya arye, yata ati winilulum do?


Ance moubuka, ‘Se, nara, Allah Yahweh dam malye winilamse,’ tenepnulyame. Tonda, Na ni koproba Allah arye nyapdeiamuk yupu, kum kekelamse,’ tenepmince, na damuk yanamlame. Tonda, an babye, ‘Se, na ni Allah ati, kum si erelamsirye batakuka, weik yo tikamuka amu tam balamsirye, yuk mutuku nang arye, si erelamik isa ati, “Na deiyok ning,” nyabuka, atalye ning si erelamsirye, na ni Allah ance nati, “Aning-aning wininamlyame,” nyapdeiamnulum ning ara, akunum yanyamse,’ tenepnalame. Ayupu ara, na Allah Yahweh arye, akunum nyapdeipmasina ati, aning nirya ara, dipkoprob upnamle.


Yosia birye, amutuku nang, sik ninye deiyoknye kibuka, taleamuk talak ara, Allah Yahweh arye, na dam yanuka nyapnuk. “Israel nang ara, sik wininyak ning ara akunum eiplum do? Winipmanto ara, sal yupu, moubuka kum kekelamlye kil ulamle touk, ulirye pil dolul ning nirya ara, an akunum elilyam do? El akil ara, na batakuka biyukce, weik erebuka bukuk mutuku kon ap, yo tikamlayak arye, yo bok weik poulamya dam amu tam duknubuka bilyeba, talye yolamak kil atonun ulule.


Allah Yahweh arye, sik Israel nang ati nyabuk. Anggun Israel nang, Babel mutuku noutam tuba kam ululum nang ati, nyapsine. Sik Babel mutuku yin talin nang arye, ninye ona ati parang ya bobuka, sik Israel nang yupa pia weik, akunum olamik bukni, anggun tuba kam unmalum nang ara, adiparyuk bikbik abuka bindopnamlume! Anggun Israel yala nang arye, ‘Malye, nunda aminyan talak binamabe,’ tenena pia meme. Wini talak arye, Babel mutuku batakuka, adiparyuk, bikbik abuka binululume. Anggunda, sik mutuku koproba noutam kum unamlum bukni, minopce, anggun mutuku koproba noutamuk umunce, na Allah atibuk, tenepnumunce, na siuk erenamnulume. Ara anggun ni koproba Allah Yahweh ap, Yerusalem mutuku ap atibuk, moubuka tenenamlume. Allah arye nyabuk.


Sik Israel nang kan-kan arye, ninye dekna ara, mitik tonun bobuka, ‘Naʼ tenen deipnyeba, kam tuba unamake. Sik anang ara, mal olalamik talak ap, weik kanye imun din patan talak ap, weik kanye imunuk, yala dipnamle talak ap, anang boknirye, lyebuka teleb kipdeipnamne. Winipyeba, sik yuk pera karin mutuku noutam, ninye asik nang atonun kibuka unamake. Atalak noutam ara, anang nirya, sik ikin weik unamak ning nirya ap, pia malye ning, sik dam yalyeba, ikin weik unamaka nirya ara, aminyan talak sikce lak nyalanamake. Winibikcopura, sik Israel yala nang nirya arye, nati, ‘Se, Allah Yahweh ara, elda dipkoprob eitam erebuka, pia mikip weiknye ulule’ tenen, biknamake.


Bukni, wini talak ara, ayupu nyapsine. Narye anggun ikin ning deibuka wenepnamsin ning ara, deiyok talye ati kume. Ara, anggun min wel ulamlum talak arye, ‘Nun ni Allah arye, weik tonun melilamsuk,’ tenena kumce, pia malye weik ninguk talibuka, pia weik tonun winilamlum ning ara, na yu arye wenepnamsine. Anggunce moubuka tenina kum, pia malye un ninguk talibuka, winilamluma deice arye, wenelamsise. Anggunce malye weik winiluluma atonun, narye weik ikin ning, anggun deice deipnamsine. Nara Allah Yahweh, aning-aning talibuka, deice tam erebuka, Pia Mikip Weik Deiyoknye birye, nyapsine ati, aning ara, dipkoprob nong upnamle! Se, anggun ton tenipdelulume! Anggun pia malye un ninguk, talibuka winilamlum ning nirya ara, aupmal bukni, aninguk kume! Tonda, anggunce ton tabakuka talye yolana weik ulamlume! ‘Aning-aning nirya ara, narye pia lik’ tenen, lik weik unulule. Aning nirya ara, pia malye un ning ati, na pia like. Allah arye, sik Israel nang ati nyabuk.


Anggun, tuba tamubuka, anggun min talak malye weik winilamlum ninguk, tenipnamlume. Tenepmunyeura, anggun ilil upsilyeba, alye weik dakdanalume. Ara winipmanto, anggun kwitcapu kilapu atonun unyak nang ara, weit kil ap, du kil ap, narye tamubuka anggun damuk boyaniba, anggun adiparyuk ilil upnamsile. Aning winipyopura, amutuku bitinye urudak nang, sikda anggun kwitcapu kilapu atonun kipkipnirye, sik amu tam deipnyopura, unamake. Narye, ‘Sik Israel nang ap, na ap epdanuka, teleb kibuka neika unamap’ tenen, nyalin yupu deice nyapsise ning ara, anggunce ayupu talibuka, diksukumuk winilamluma deice arye kume. Tamubuka teleb kipdeipnamsina deiyok ara, na kanye aryuk winipnamsine.


Ati, narye anggun malye weik winilamlum ning ara, narye, ‘Teleb dauplye. Namin kibuka kilipnamsine,’ nyabuka, anggun malye winin ning kum kipdeipsinyopura, anggunce tuba tonap, ‘Se, nunda pia malye weik winilamupu,’ tenepmunce, alye weik dakdanalume. Anggun malye winilamlum ning ara, pia kum luba kipnamlum ati, anggunda pia ilil upsilyeba, alye dakdanamluma ati, aminyan doyanamle talak ara, yatato yupu do nirya, anggunce yupu ton, pia kum nyapnamlume. Aning nirya, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye unune. Ati ara, narye ayupu nirya nyapmasina ati, aning nirya ara, dipkoprob nong upnamle! Allah arye, sik Israel nang ati, nyabuk.


Ara talye ati kume. Aning nyapsa deiyok ara, ani. Sik Israel nang nirya ara, ‘Allah arye nyasilye yupu ara, nun like,’ tenelamikce, na yupu moubuka kekena kumce, yaniltanauk ulamike. Tonda narye, “Aning ara, winina teleb ning, aning ara winina mem ning,” nyapdeipse yupu ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, bataklamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning mambul weik,’ tenena kumce, asum noutam arye, pia malye weik winilamikce, malye ulamik. Tonda, anggun apu yapu arye, talye ning ati, si erelamik isa si eren ning, patung-patung dobuka, si erelamik ning atibuk, sik babye, ‘Aisa aryuk melipnamsiakʼ tenen, dilamikce, aning siuk erelamik.


Ara, narye sik anang ati, “Narye anggun dobuka, pia teleb mutuku bobinamsine,” nyabuka, nyalin yupu deice arye nyapdeiamse mutuku noutam bobinamse. Amutuku noutam arye bobinuka deipsopura, sikce, ‘Naʼ tenen, kumce, amutuku noutam arye dilamikak, weik cang mutuku kon bukamukak eibikce, adiparyuk isa si erena ati, kam ning obuka, arelbalamikak, eipseura, yu weik ulamnukba, ‘Na pia lik,’ tenyamse. Tonda, atonun, yata yala tikamuk yo do nirya, taruk ap, pia weik tonun uamuk yo eibikopura, sik adiparyuk amutuku dam kam ning obuka, beyanarye uku dongobuka, isa si erelamik. Tonda, atalye si erena ati, siltong teleb ning ton dobuka, uku dongolamikce, isa ati morolamikce, ‘Nun arenamap ning ati, weik arye kanye deipnamsilʼ tenen, anggur duk purubuka kintinibik mek dobuka, aning deice dikiltaklamik.


Amutuku noutam binuka deipsinyeura, daunamlum talak ara, anggun Israel yala nang, min talak pia malye-malye lwiniamlum ning atibuk, tamubuka teninamlume. Tenipnamlum ning ara, anggunda, ‘Se, nunce malye-malye weik winilampu ning ap, isa si erelamupu ning ap, mem ning talibuka malye winilampu deice arye, nun bidamnye atibuk, malye weik kilalamupuba, Allah el dam kum yanmanto ulamupu. Ati nunda, atalak ara, dipkoprob pia malye nang ulamlumpu,’ tenenamlume.


Tonda, ayupu ton nyapse. “Ati ara, sik Israel nang nirya, anggunce talye isa si erepmunce, aning ati, kanye deiplumce, si erelulum patung-patung nirya ara, dobuka bataklopnamlume. Aning nirya ati ara, pia mem ning ati, aning ara, pia na like. Moubuka tenipdelulume! Sik Mesir mutuku unyak nang arye, talye ning, isa mer si erenyak ning, anggun ton melibuka erepmunyopura, na dam ton pia kum yanuka moropnutume! Tonda, narye anggunti, kum melipnamsine. Nara anggun deiyoknye Allah unirye nyapsine.”


Pia alye un ning ara, an dam yalyeba, doropnamlame. Anda ninye nirya talye yolalamluma deice arye, anda sik amutuku nang, sik si erelamik isa, si erelamlume. Adeice arye, an dam malye kilalamlume.


Akunum oplopsicopura, narye anggunti, yu weik upnilyopura, kum danamle. Narye anggun malye ululum ning ati, kanye imun weik wenen ning akunum arepsiniba, ninye weik akunum opnyopura, wini talak yu weik upnilyopura, aminyan talak kum daniliba, na kanye lopnamnile. Bukni, na yu weik upmanilya deice arye, sik tibuk, akunum wenebuka opnyopura, adeice arye, sik moubuka biknamake. Aning nirya akunum winipnyopura, anggun Yerusalem mutuku ululum nang arye, nati utenepnamnulume. Ara, ‘Se, elda Allah Yahweh, aning-aning talibuka, pia mikip weiknye birye, deiyok kum uamukba wenepsuka kuma. Deiyok ara, nun bidamnye malye ulamupu ning ati, yu weik ulamuka deice arye wenepsuke. Wenepsuka deiyok ara, elce, ‘Se, sikda yata deiyok ati, malye-malye unyak do?’ tenepsukce, kanye imun kanye bobukce, wenena weik ning dobuka, nun deice uk deipsukeʼ tenen, anggunce moubuka bikinamlume.


‘Sik Israel nang arye, aminyan talak tuba biknamak’ tenen ati, ‘Se diba, nun ni koproba Allah Yahweh, el tonok ulule,’ tenen, binamake. Nara, Allah Yahweh ununa ati, minop talak ara, anggun bikna ati, narye, ‘Kume, malye winin ninguk talibuka winipmunyopura, aminyan talak, narye anggun nong deice, pia ikin weik ning arenamsine. Weik tonun wenepnamsine,’ nyapdeipse ning ara, talye yupu nyaltakana ati, kum nyapse. Na nyanun yupu nirya ara, dipkoprob wininirye nyanune. Nyanuna arye, anggun wenen ning arepsisa ara, talye wenena ati kume. Anggun bidamnye malye winin deice arye, aning pia ikin weik ning ara, anggun deice delinune.


Anyasik noutamaik ara, weik uk ap, din patana ap, ninye bai tam arye daunyak nang arye, olanamaka deice arye, ninye weik tam ara, dibinamake. Bukni, mitikto tam nang arye, bai sakuka, mutuku-mutuku kon bukuk noutam, bikbik abuka bindopnamake. Abinuka unamakak ara, sum maka ara, weik mutuku amu tam, lu ubukak bukuka engelamaka atonun, binuka engenamake. Winipnamaka deiyok ara, sik anang nirya ara, ‘Se, nun bidamnye malye ulamupa deice arye, wenepsukba, dibinauk unyabe,’ tenebikirye, malye yupu nyabuka, malye kanye bonamake.


Nyabukopura, ayupu tonap dukdongobuka nyabuk. Allah arye, ‘Se, anggun malye winimunye ning ati, wenenamsine,’ tenesunun bukni, na kanye mitik anun teniltona tuba unulule. Ara, narye anggunti utenesunune. Se, Efraim yala ninye ara, yata wiribuka narye sikti, bataktinye do? Bataksineba, yuk pera mutuku unyak yu nang arye obuka, sirya daknamsiyak do? Aning atouk, anggun Israel yala ninye babye, yu arye bataksineba, yu nang arye obuka, sirya daknamsiyak do? Tuba bico tenesununa ati nyapsine. Tonda, sik wenena ati, Adma mutuku ulamik ninye ap, Zeboim mutuku ulamik ninye ap ati, weik arye wenebuka oplopse touk, anggun babye aning batakuka wenepnamsin do? Narye, ‘Diba malye weik wininyaka anya arye, weik arye wenepnamne,’ tenenye deice arye, na kanye bokoltonulule. ‘Aning winipnamne do, kum do?’ tenen, kanye bokoltonulule. Ara, urdem ati kume. Na Allah arye, anggun Israel ninye ayala-yala nirya ati, weik arye bico tenesununa ati, nyapsine. Bico tenesununa deice arye, na talima noutamak ara, tamunulule. ‘Malye weik winibikirye, anggun ati batakuka wenepnamsine,’ tenepse bukni, weik arye bico tenesununa anya arye, wini talak ara, na kanye tuba ton yuk tenepne.


Ati wini talak, narye anggun deice ikin ning weik deipsinyopura, aikin ning arye darapdongopsiliba, tuku deiceuk, ganupdongopnalume. Aning atonun, winipmanto ara, kuda basam arye libuka, tuku deice balamle ning, el si ara kereta kuda, gandum pia weik bobuka, aning pum tam, ikin pia weik arye deipmakiba, ikin upliba, aning kum binmanto ulamle touk, narye anggunti wenepsiniba, anggun babye, ikin weik unamlume.


Aning atonun, anggunce isa el si Dewi Asyera, isa kil si erena ati, anggun ululum mutuku noutam arye, cang ayukumna yo atonun yo ikukapmunce, isa si Asyera ati, si erelulumak nirya ara, daklopnirye kum kipdeipnamne. Tonda, isa si erena ati, isa el aik dobuka deiplumak ap, aisa si erena ati, weik aik dolulumak nirya ara, dakuka uluplonamne. Winipniba aning nirya ara, pia kum danamle.


Na tenen ninye arye, malye weik winilamikba, aminyan talak sik wenena ati, lo arepneba, yuk mutuku ninye arye yanuka obikirye, tapu koubuka, sik Israel ninye tonok-tonok bokuka, yuk pera mutuku noutam dadelilbinamake. Winibuka bobikiba, yuk pera mutuku noutamak daunamak talak babye, sikce nati luba kum kipnamniyake. Tuba tenena uk unamniyake. Tonda sik ap, sikce dadeipdanin banamak mapu ap, natibuk tuba tenenamniyake. Winipnamna ara, yuk mutuku ninye arye, ‘Naʼ tenen, ninye kum obuka sirya dakanamake. Tuba aunamak talak ara, sikce mapu weik deipnamake. Winibicopura, minop talak ninye yupa weik ulamik touk, ila tuba tonap dukdongobuka pia weik upra banamake. Winibicopura, aminyan talak, narye sikti, lyepsinirye, tamubuka sik mutuku koproba boyanamne.


Benang tapu arye, urasin teleb ubuka yangapdeipnamlum ning ara, ‘Nun ni koproba Allah arye winyamsukʼ tenen, anggun kel bikna ati, lak kelinamlume. Winipmunya deice arye, narye anggunti, “Aning wininamlume. Aning ara, pia kum wininamlume,” nyapdeipsise yupu ara, anggunce bikilina ati, tupa-tupa tenipmunce, wininamlume. Adeice arye, anggunda na nyapdeipsise yupu, lubakipmunyopura, benang tapu wipnamlum ning eipmunce, tamubuka teninamnuluma ati, lak kipdeipnamlume. ‘Anggun bidamnye, kanye tenina deice arye, malye winipmunyak’ tenen ati, narye “Aning wininamlume. Aning ara, pia kum wininamlume,” nyapsise ning kum winipnin bamunce, luba kipmunyak tenen ati nyapsine.


Sikti lila yupu peteren nang arye, yuk nang kilapu eibikirye, ‘Se, akilapu ara, dalubuka yoptibye’ tenen, pataplibuk, pia tenenauk unyake. Malye winina pia tuba-tuba wininyakce, sik kanye teniltonauk unyak ninye ara, ‘Nun tam kipropsiting’ tenen, sik nyanyak yupu deice arye, benbenepdongbuka lilonyake. Atilila yupu nyanyak nang ara, ‘Yuk ninye, sik ning weika arye dalubuka doproptibye’ tenena ning ara, weik arye kel kiyamik bikamik. Anang atonun wininyak ninye nirya ara, Allah arye dipkoprop wenebuka oplopnamle.


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ