Ati ara, na ni Allah, an si Yahweh ati moropkine. ‘Ance, nun Yehuda tam unyap nang ati lyepsutum’ tenen, moropkine. Asyur mutuku ninye deiyoknye birye, nun ona ati akunum kintinip deipmala ati, ance lyepsilyame na ni. An mikip deice arye, lopdeipsiminba, tukwak mutuku nang mutuku-mutuku nirya arye, eibikirye moubuka kel biknamake. Ara, ‘Se dipkoprob Allah el si Yahweh ara, elda Allah tonoka. Yuk ton pia kum ulule,’ tenebikirye kel biknamake. Hizkia birye Allah ati moronmokce nyabuk.
Yehezkiel 6:7 - Eipomek7 Dan sukum do, anggun Israel yala nang ululum mutuku-mutuku noutam nirya ara, narye sik anang weik tonun opnyopura, aning eipnamlum deice arye, anggunce, ‘Se, dipkoprob aning nirya ara, Allah Yahweh, el pia mikip weiknye binya. El mikip pia weik ulule,’ tenepmunce, asum-asum nirya moubuka bikinamnulume အခန်းကိုကြည့်ပါ။ |
Yehezkiel 6:7
43 ပူးပေါင်းရင်းမြစ်များ
Winibice talak ara, na Allah arye kintinip deipnyopura, Firaun talima malye uplirye, anggunti dobolyanamsile. Bukni narye weiknye Firaun ap, Mesir ninye nirya ap, sik nong deice weik ikin ning deipnamne. Tonda, Firaun el yin talin nang weik, na mikip deice arye opnyopura, ninye nirya arye na Yahweh ati, ‘Se weik mambulnye ulule’ tenen, kel kipnamake.” Allah el si Yahweh arye nyabukopura, sik Israel nang arye aning nyabuk touk winibuka bindobik.
Aning nirya akunum winipnyopura, adeice arye, Mesir mutuku nang eibikirye, kel biknamake. Ara, ‘Se, anye mikip weik arye, kanye imun ning weika arye deipmasilnye bira, ara dipkoprob Allah Yahweh, elda Allah ulule. Atalak ara, ‘Na Allah arye, Mesir ninye noutamak arye, Israel ninye, sik ayala-yala nirya lobuka bobinyopura, Mesir mutuku ninye nirya kel kipnamniyake.’ Allah arye, Musa biti nyabuk.
Weik ikin ning, sik nong deice yanamle ning ara, urdem ati kume. Deiyok ara, na Allah ati, si erebuka kininyak aik pum tam, pil dona deiyok nang, imam nang ap, narye yupu nyaipneba, na yupu laka nyana deiyok nang, nabi-nabi nang ap arye, pil teleb ubuka kum donyake. Narye, ‘Aning wininamlulume. Aning ara, kum wininamlume,’ nyapdeiamse atonun kum bukni, sik nirya pil donyaka ara, ‘Deiyok asukum’ tenen, kel bikna kum diparyuk, talye donyake. Wininyaka ati ara, narye lo arepneba, yu nang arye, Israel ninye ati yanuka obikiba, dipnamak ninye weik upnamake. Tonda, bai tam bindobice nang babye, parang ya arye, oplopnamake. Winibice nang, sik nong eipnamne. Aning atouk, sik weik asik dopra, ulamik mutuku noutamak babye, binuka eipnyopura, weik kanye imun din patana ap, uk dina ap deice arye, dipmakce ninye, sik nong dana-dana nirya, batakmace nang ara, eipnamne.” Allah arye nyabuk.
Ati, wini talak ara, Allah ance sikti, batakmimba, din patana ap, mal oldana ap deice arye, sik mapu nirya dipna teleb uka. Tonda, oldana deice arye, sik aninye nirya oltakana teleb uka. Tonda, yuk mutuku nang yakirye, sik akanye yapu nirya obikiba, kum dalyopura, sik amutuku noutamak nirya ara, kilapu youwak dem unamake. Tonda, mapu kum delinamake. Tonda wisi-wisi nang ara, weik kanye imun uk, dina deice arye, dibinamake. Sik kam nang ara, mal olan noutamak, ya arye seklobikiba, dibinamake, nyapne.
Asum ara, Allah arye mutuku sirya, im sirya nirya unyakce, malye winilamik nang opnamle nang ara, sik nong nirya, tukwak weik uplirye langdipnamle. Ara otam im sirya, ap mutuku sirya, dana-dana tam ap, anoutam ap, ninye weik opliba dipnamak nang, sik nong langdipnamle. Allah arye ninye weik tonun oplyopura, yuk nang arye adipmakce nang ati, eibikirye, ‘Se, sikda bicoeʼ tenen, malye kanye bobuka ukirye, kum engepnamake. Tonda, tonoknye babye, oplopmalye nang, sik nong bobinuka, kum weilbinamake. Anang nong, ‘Daupmalyeʼ tenebuka, opmaliba dipnamak nang, sik nong bobinuka, tuku pum kum weipnamake. Kume, tuku deiceuk batakikiba, talye kam ulul ning, dei siriklopliba, tuku deice lak sukum talye uplirye, tong welelamle atonun, upnamle.
Mal olanak arye olanmakirye, ya arye obikce nang dibikce ara, telebe uka. Bukni, din patalamlyebuk unyak nang ara, pia kanye imun deiceuk ulamikca ani, dibinyake. Ara, sik wa wiamikca nong kum uplyeba, din ning babye, ton kum dipmakirye, din patalamyeba, pia ati ikin kanye bobuka ulamikca ani, dibinauk unyake.
Winipsiniba, yu ninye asik nang arye yanuka, anggun amutuku ulamik nang weika arye, opnamake. Ara, sik yu parang ya arye, anggun amutuku ululum nang, yupa weik tonun obuka, sirya daknamake. Opsikcopura, weik tonun dipnamlume. Diba, anggun amutuku atam, yuk pera mutuku otam, danoutam, mutuku yuk-yuk bikilina ati, wililamik dam ara, narye anggun atam ululum nang wenebuka, weik tonun opnamsine.
Winipsinyopura, anggun adiparyuk biknamnulume. Ara, anggunce, ‘Se, dipkoprob Allah Yahweh ara, aulule. Elda aning-aning talibuka, Pia Mikip Weik Deiyoknye ulule,’ tenen, moubuka biknamlume. Diba, nara Pia Mikip Weik Deiyoknye unirye, anggunti, “Aning ara wininamlume. Aning ara, pia kum wininamlume,” nyapdeipsise yupu nirya ara, anggunce yaninuk unululume. Narye, “Teleb winin ning ara, ani. Malye winin ning ara, mem,” nyabuka, sekuka areamsise yupu ara, moubuka pia kum kekelulume. Anggunce, talye bataknauk ulamlume. Aninguk kum bukni, tonda anggun mutuku dana-dana tam arye, antanap dongopsuk mutuku noutam unyak nang, yala-yala nirya, anggun kanye aryuk, ‘Diba’ tenebuka talinyak yupu ara, aninguk taleamlumce, ulamlume. Ati ara, na Allah arye, anggun Israel yala nang nirya ati, wenepsinirye, ikin ning anggun deice deipnamsine. Allah arye, na Yeheskiel, na kanye talima noutam nyapdeipnukba, ayupu tuba nyanmase talak ara, mambul ton ubukba eipse.
Winipkilyopura, ance amutuku noutam tuba kam unyak Israel nang nirya ati, sik dam binuka, ayupu lak nyapnalyame. Ara, Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye ulirye, sik Yerusalem mutuku, weik asik domika noutam tuba ululum nang ati, nyapsile. Ara, anggun anang nirya, din dinamlum talak nirya ara, ilil pia weik upsilyeba, anggun nong nirya sirem talinamsile. Atonun, anggun mek kwebuka dinamlum talak nirya ara, ‘Se, ikin weik ning, nun dam yanamsila ati, yata winiptibye do?’ tenen, kanye teniltonauk upsilyeba, anggun nong bol nirya ara, bol tililing apsilyeba, anggun nong nirya sirem talinamsile. Winipnamaka ara, talye ati kum bukni, deiyok ara ani. Ara, aminyan talak ara, sik unamak mutuku ap, amutuku noutam ulye ning ap nirya babye, pia malye unamle. Deiyok ara, wini talak sik mutuku noutam unyak nang nirya arye, pia yu weik uplirye, ‘Nun lik,’ tenelanauk ubikirye, pia tuba-tuba malye unamake. Wininamaka ati, ninye mal olana ap, walana ap, malye kililana ap, ubula dona ap, upnamaka deice arye, amutuku teleb ulye ning nirya ara, pia kum danamle.
Anggunce, ‘Ninye moubuka eibikirye, ninye arye dipkoprob kum teninamak’ tenen, kurun mek cat dobuka, likamlum keil poka ara, narye pia yu tenepnamne talak ara, aning nirya ulultaknauk upnamne. Amutuku arye, doplum keil poka ara, daluplopniba, el ayukumna ikuka dolalum ninguk, lak uplyeba, ninye nirya arye eipnamake. Acang keil poka ara, adiparyuk dalubuka saklirye, anggun nong deice opsilyopura, anggun nirya kum kipdeipnamsine. Obuka bataksilyeba, tuba kam unamak nang ara, eibikca deice arye, ‘Se, Allah Yahweh elda, dipkoprob aulule’ tenen, biknamake.
Ati ara, na Allah arye, anggun kilapu ara, kisok deice kouna ati wilulum ning, el si kerudung nirya ara, narye kwilikuka bataknamne. Winipnirye, ‘Naʼ tenen nang, sik Israel yala nang ara, bobuka yuk telebak deipnamne. Atalak arye dipdongobuka, doyanamle talak nirya ara, anggun mem pil dolulum kilapu arye, anang ton kum onamlume. Aning winipyopura, anggun malye winin kilapu ap, anang nirya arye, ‘E, diba Allah Yahweh ara, dipkoprob aulule’ tenen, biknamnulume.
Ati ara, wini talak arye dipdongobuka, doyanamle talak nirya ara, sikce, ‘Kume nun lengdar mapmaba deice arye, mambul ning elinyabe,’ nyabuka, tuba kum nyanamlume. Tonda, anggunce, “Kume, nun ap, akunum diamik nang, sik kanye ap, yupu sisikinmapce, sikce nyanmasiak yupu ara, ani,” nyabuka, pia tuba kum nyanamlume. Anggun kanye aryuk, talye tenebuka nyanmalum ning nirya ara, kum kipdeipnamne. Winipye deice arye, na mapu koproba, sik Israel yala nang ara, anggun malye winin ninguk, talibuka ulamluma kan-kan, ulamik nang ara, naryuk lyepdopnamne. Aning nirya akunum winipnyopura, sik amutuku ulamik nang nirya arye, nati ara, ‘Se, diba, Allah Yahweh ara, dipkoprob aulule’ tenen, biknamnulume.
Ati narye anggun talye-talye yupu nyalulum nabi-nabi nang nirya ati, na mikip taruk deice arye, ikin ning deipsinirye wenepnamsine. Winipnyopura, anggunda pia bicoe. Anggun talye-talye yupu nyalulum nabi-nabi nang ap, tonda talye ning tenilamunya ani, ‘Lengdar mana deice arye, aning ara elce lak kipdeipmasile,’ nyabuka, nyalulum nang nirya ara, wenepnamsine! Anggun anang nirya ara, na mapu koproba, Israel nang deiyok-deiyok nang arye, yupu tabikirye, ‘Aning ara, winipnamabe,’ nyabuka, sisikinyakak ara, sik ap neika wekelbana meme. Tonda, Israel yala nang, yala-yala yuk-yuk, si sekna buku deice sekuka deiamsikceba, wamsilya noutam arye, kiliplopnamsine. Winipsinyopura, Israel nang noutam bukni, sik mutuku noutam ara, tuba tonap, pia tamubuka kum yanuka wekenamlume. Winipyeba, anggunce, ‘Se, diba, Allah Yahweh elda, pia deice tam erebuka, aning-aning nirya talibuka, Pia Mikip Weik Deiyoknye, dipkoprob aulule,’ tenen, biknamnulume.
Ara naryuk, na yupu deice arye, anang ati asibuka, wenepnamsine. Tonda, ‘Yuk nang arye ton, anang malye wininyak ning eibikirye, atonun winibikcak’ tenen, weik ikin ning, sik nong deice deipnyeba, bikna atonun kipdeipnamne. Winipnyeba, yuk nang arye aning eibikirye, ‘Kume, aning atonun winipsilyak’ tenen, ‘Isa si pia kum erenamabe,’ tenepnamake. Tonda, winipnamne talak ara, narye anang dobukapnirye, na mapu koproba, sik Israel yala nang dam arye, bobuka deipnirye, obuka sirya dakamne. Winipnyopura, na mapu koproba, sik Israel nang nirya arye, ‘Se, diba nun ni koproba Allah Yahweh ara, dipkoprob aulule’ tenen, sikce nati biknamniake.
Narye, sik amutuku noutam tuba unyak nang nirya ati, wenepnamne. Ara, Babel mutuku nang ati, lo arepnyeura, weik uku dilamle touk, ayu nang arye, Yerusalem mutuku yanuka, anang pia weik tonun arye, obuka sirya danamake. Winipnamne ati, sik anang ara, uku dilamle noutam ara, tonoknye babye, pia binmanto kum upnamake. Weik uku arye, yo nirya dibuka, sirya daklamle touk, Babel mutuku nang arye, sik anang nirya ara, obuka, malye kipnamake. Aning nirya ara, sik Yerusalem mutuku kam tuba unyak nang ati, weik tonun wenepnyopura, anggun anang nirya arye, ‘Se, diba nun ni koproba Allah Yahweh ara, dipkoprob aulule’ tenen, biknamnulume.
Tonda, sik anang ati, ‘Dauplye,’ tenyamsirye, batakse deice arye, sik babye, ‘Winipnamabe,’ tenebik ning talibuka ulamik. Winilamika deice arye, sikti, malye kililalamik. Ara, sik babye, min talak deiamik mapu dobuka, talye isa si erena ati, obikce, uku dongolamik. Narye lo arepsiba, apia malye ning talibuka ulamik deiyok ara, ani. Ara, ‘Narye kanye imun weik ning dobuka, sik nong deice deipnirye, yu weik arye, anang wenebuka oplopnamne,’ tenyamsa ati, winipse. Winipse ning nirya deiyok ara, ani. Ara, ‘Weik tonun sik anang wenebuka oplyeura, sik tuba kam unamak nang arye, ‘Se, Allah ara, dipkoprob, Yahweh ululeʼ tenen, ‘Biknamakʼ tenen ati, anang bataksirye, lo arepsiba, sik bidamnye aryuk, malye weik winilamik. Allah arye Yeheskiel biti, lak nyabuk.
Aning atonun, anggun anang kan-kan nirya arye, na yupu ati, ‘Nun like. Aning kum winipnamabe,’ tenenyak nang ap, na yupu yanibikce yu nang nirya ara, sik ninye asik nang atonun unyak kan-kan arye wibuka, dopnirye, Israel nang unyak mutuku dam deipnamne. Sikce nati, ‘Nun lik,’ tenenyak nang ara, tiya talak ati, na dam deipnamne bukni, sik anang ara, Israel yala nang aminyan talak unamak mutuku noutam ara, pia kum binuka unamake. Anang ara, wenepnirye, yakdonoknamne. Winipnyeura, anggun tuba aunamlum Israel yala nang arye, nati, ‘Se, nun ni Allah ara, dipkoprob Yahweh ulule. Elda dipkoprob tonokaʼ tenen, biknamnulume.
Tonda, min talak, narye anggun apu yapu nang ati, nyalin yupu deice arye, “Pia teleb mutuku arepnamsine,” nyabuka, nyalin yupu deice kintinyamsise mutuku noutam, akunum boyanuka bulup deipsinyeura, anggun Israel yala ululum nang nirya arye, nati biknamnulume. Ara, ‘Se, nun ni Allah, elda dipkoprob Yahweh ulule,’ tenen, biknamnulume.
Bukni, narye na si teleb kilina ati ara, anggun malye winilamlum ning ati biknirye, anggun malye winin ning kum kipsinirye, tuba tamubuka teleb kipdeipsinyopura, anggunce nati, moubuka biknamnulume. Ara, anggunce, ‘Se elda dipkoprob Yahweh ulule,’ tenen, biknamnulume. Anggun pia malye winilamlum ning ap, malye kilalamlum ning ap ati, adiparyuk wenebuka opsilirye, sirya daknamsiting bukni, aning kum winipsise. Na si teleb ulina ati ara, anggunti, akunum biksirye, tuba tonap teleb kipdeipnamsine. Winipsinyeura, anggun Israel yala nang nirya arye, nati moubuka biknamnulume. Ura, anggun Israel mutuku noutam unamlum nang nirya arye, ‘Se akunuma, nun ni koproba Allah Yahweh ara, aning-aning nirya talibuka, deice tam erebuka, Pia Mikip Weik Deiyoknye ululnye birye ulule! El tonok ulule,’ tenepmunce, moubuka biknamnulume. Na Allah Yahweh arye, akunum nyapmasina ati, aning nirya ara, dipkoprob nong upnamle nyapsine. Allah arye Yeheskiel biti, ayupu nirya nyabuk.
Winipsinyebuk, yuk mutuku nang nirya arye, Yerusalem mutuku ati ara, malye nyabuka, akutukirye, nalinamake. Winibikceura, anggun Yerusalem mutuku ululum nang ara, alye weik dakdanalume. Aning eipmunyopura, bita biknamlume. Na Allah Yahweh arye, “Winipnamne,” nyalin yupu deice arye, nyapsin yupu nirya ara, dipkoprob winipnyeba, nong kunupnamsile. Aning eibuka bikmunye, deice arye, anggunce nati, ‘Se Allah ara, mikip weiknye ulula ati, el tenelye touk, aninguk ululeʼ tenen, moubuka biknamnulume. Allah arye nyabuk.
Se, sik Ohola ap, Oholiba ap, anggunda ninye talye-talye yolamsik ning ap, na batakuka, talye isa si erelamlum ning ap, yuk malye winin ning nirya ap, winilamluma ati, na Allah arye, anggunti wenepnamsine. Anggun malye winina deken ning ati, weik arye wenepnamsine. Winibuka akunum winipsinyopura, adeice arye, anggunce nati, ‘Se, elda, Allah Yahweh, aning-aning nirya deice tam erebuka, Pia Mikip Weik Deiyoknye ululnye bira, dipkoprob ululeʼ tenen, moubuka bita biknamlume. Na Allah arye, nyapsine.
Anyapman ning nirya ara, winipnamsila ati, nabi Yehezkiel birye, anggun bikna ati, anggun dam winipmalba, anggunce akunum eipmalume. Atalak winilina ati, anggun dam winipmasin ning ara, dolyanamle talak anggun dam yasilyeba, winipnamlume. Ati, nyapmasin ning nirya, akunum dam uplyeura, adeice arye anggunda moubuka biknamlume. Ara, na Allah arye, anggunti nyapdeipsine. Aning nirya winiplyeba, anggun aning winilulum Israel nang arye, ‘Se, aning ara, Allah arye yanuka nyapdeiamsuk touk, akunum winipmasileʼ tenenamlume. Tonda, ‘Se, Allah Yahweh arye, aning-aning nirya deice tam erebuka, Pia Mikip Weik Deiyoknye ulule,’ tenen, moubuka biknamnulume.” Allah arye nyabuk.
Asum babye, anda yupu tunim abuka, kum upnamlam bukni, asum ara, ance tamubuka, elce an dam yanamlanye biti, yupu nyapnamlame. Awinipnamlama deice arye, sik Israel nang nirya ati, laka kipdeipnamle. Winipminyeba, sik Israel nang arye nati, utenapnamniyake. ‘Se, Allah Yahweh ara, aning-aning deice tam erebuka, Pia Mikip Weik Deiyoknye ulule, tenebikirye, moubuka biknamake.” Allah arye nyapdeipnukba, na Yeheskiel birye kekepse.
Narye sikti, yu weik upmanila ati, sik wenena ara, weik ikin ning, sik deice deipnamne. Tonda narye sikti, ‘Aninye kwang daknamne,’ tenepse ning dobuka, sik deice deipnyeura, kanye teleb upnamle. Atalak na yu weik upmanila arye, sikti weik tonun wenepnamne. Winibuka kwang daknyeura, sik Pilistin nang nirya arye, nati, ‘Se, dipkoprob Allah ara, aning-aning deice tam erebuka, Pia Mikip Weik Deiyoknye ulule. Ara, ‘El ukaʼ tenen, moubuka biknamake. Ara, na yu deice arye, sik tibuk weik tonun wenepnirye kwang daknyeura, adeice arye, na Allah ati, ‘Se, elda dipnyeʼ tenen, moubuka biknamake.
Tirus mutuku mek lilun bukni, mitik tuku uamuk tam, asik dobuka unyak nang nirya ara, yuk mutuku mal olan nang arye yu uplyeba, parang ya bobuka, Tirus mutuku nang obikceba dipnamake. Winibikceura, sik Tirus mutuku tuba kam unmakce nang arye, ‘Se, dipkoprob Allah ara, mikip weiknye ulule. El uka,’ tenebikirye, na Allah ati biknamake.
Aning ara, talye ati kum nyapne. Deiyok ara, sik dam ara, kanye imun weik uk ton, dopdeipnamna atia. Tonda, sik mal olan nang ara, dana-dana tam arye yakirye, obikiba, sik ining ara, bisikak uk, sakuka poupnamle. Ninye ara, mal olan ning ara, pia yu weik ya arye, obikceba, ninye weik tonun, sik weik asik noutam dipnamake. Aning nirya winipnamne deice arye, nara Allah Yahweh, na mikip deice aryuk, ninye mutuku sirya, im sirya nirya, sik weik deiyoknye unune. Aning ara, sikce biknamake.
Mesir mutuku nang nirya ara, sik mutuku noutam arye, narye yakuka donokniba, sik yuk nang yala-yala nirya noutam binuka unamake. Aning atonun, yuk mutuku nang ulamice mutuku-mutuku nirya, dabinuka neika unamake. Sik yuk, sik mutuku noutamuk kum unamake. Winipnamna deice arye, sik Mesir mutuku nang arye, ‘Se, el Allah ara, dipkoprob Yahweh ululeʼ tenen, nati biknamniake.
Dipkoprob nyapne. Atalak ara, narye Mesir mutuku ara, asik oldemuk kipdeipnamne. Tonda, narye Mesir mutuku unamak nang nirya babye, kum kipdeipnamne. Winipniba amutuku noutam teleb wamlye ning, akunum kum kipdeipyopura, amutuku nirya ara, tunim apnamle. Adeice ara, sikce nati, ‘Se, Allah Yahweh ara, el uk mikip weik ulula ati, aning nirya taleluleʼ tenen, biknamniake.
Ara, anggun kwang dakna ati, winipnamsine. Anggun Edom mutuku nang arye, Israel yala nang talilamik ning nirya ati, ‘Kume nuncuk aning alubuka dopropbibirye, nuncuk aning talibibyakarye, kanye deibuka unamabe,’ tenelamlume. Aning nirya ara, na Allah arye, anggun Israel nang ap, Yehuda yala nang ati, bokuka arepsirye, ‘Aning ara, sikcuk pia talinamake. Amutuku ara, sik ning diamuk unamleʼ tenen, arepse. Bukni, anggun Edom mutuku nang arye, na mapu Israel nang, sik mutuku alubuka doproplumba, akunum tunim anauk ubukopura, anggunce kanye deiamlume. Ati, Israel nang ap, sik mutuku ap, pia tunim anauk uamuk touk, narye anggun Edom mutuku nang ati, wenebuka opsinyopura, anggun babye, anggun mutuku noutam babye, pia kum kipdeipsinyopura, asik oldemuk upnamle. Tunim abuka, oldemuk upnamlarya! Narye, kum kipdeipsiniba, tunim anauk upsilyopura, Seir mutuku noutam ap, Edom mutuku noutam ap, unyak nang nirya arye, ‘Se, dipkoprob Allah Yahweh ara, eluk Pia Mikip Weik Deiyoknye ululaʼ tenen, na siuk Yahweh biknamake.
Aning nirya winipnye deice arye, ‘Yuk-yuk mutuku nang mutuku sirya im sirya nirya ati, na mikip weik ap, mambul pil donun ning ap, malye un ning kumce, pia teleb, lek diamuk unun ning ap, sik nirya biknamakʼ tenen, aning nirya sikti, wenepnirye, peterepnamne. Adeice arye, sikce nati, ‘Se, Allah Yahweh ara, dipkoprob eluk ululeʼ tenen, moubuka biknamniake. Ayupu nirya ara, Allah arye, nabi Yehezkiel dam yanuka nyapdeibukba, kekebukce, laka nyabuka sekuk.
Winipyopura, anang weik tonun oplopnyopura, anang sik ongon ning nirya ara, sik si erenyakce, kam ning obuka arenyak ning, isa mer ati, ninye urasin atonun puturubuka delinyak ning damak, bobuka deipnamne. Tonda, sik tam nang opnirye, sik ongon ning dobuka, sikce sik isa si erena ati, domik mesba-mesba deiyok damak dobuka deipnamne. Tonda, narye Israel nang ton opnyopura, sik anang, sik nong ara bobuka, weik mutuku kon deiceuk binuka delilbinamne. Aning atonun, yuk mutuku bumang-bumang deice arye, na opnamne nang, sik nong ara dobuka, amutuku kon bukukak delilbinamne. Tonda, anang sik nong dopropnirye, weik tonun nemlirye tikamlye yo, el taruk yangamlye yo kwa ak binuka deiplopnamne. Tonda, sik bidamnye arye, dan sukum do nirya, kam ning obuka, boyanarye siltong teleb ning uku dongobuka, isa si berhalah-halah si erelamikak, narye sik ongon ning dobuka, asukumak deipnamne. Aning nirya eipnamaka ati, sik anang nirya arye, nati, ‘Se, elda dipkoprob Allah Yahweh, pia mikip weiknye ulula anya arye, elce, ‘Wininamne,’ nyalul yupu ara, dipkoprob uk nyaluleʼ tenen, moubuka biknamake.
Anggun Israel noutam ululum nang nirya ara, wenebuka opsikirye, kum kipdeipnamsiyake. Ara, anggun ululum mutuku nirya ara, weik asik doplumak, ulubuka sikce buklopnamake. Atalakuk anggunce, si erelulum isa si erenak ap, isa arena ati, mesba doplumak ap, tonda anggunce, ‘Isa si erenamapʼ tenen, puturubuka deiplum patung ap, tonda, ‘Isa mer arye kekepnamsiyakʼ tenen, sik si eremunce, siltong lena teleb ning dobuka, uku dongopmunyak babye, sikce buklopnirye, kum kipdeipnamne. Tonda, yata ning do nirya, anggunce, ‘Isa si erepnamapʼ tenen, kintinibuka deiplum ning nirya babye, uluplopnirye, sirya daknamne. Aning nirya ara, sikce bukuka bataknamne. Allah Yahweh arye nyabuk
Ura, Na dipkoprob nyapsine na ap, narye sik dopdeipnamne yin talin nang ap arye, sik Israel yala nang, weik tonun opnamak bukni, sik kan-kan noutam bukni, mitik tonun ara, kum opnamake. Deiyok ara, narye anggun mutuku koprop noutam arye dobuka yakwetepsinirye, weik tam ara opnamne bukni, mitik tam nang ara, bai sakuka bindobikirye, dana-dana tam unyak mutuku nang, kan-kan binuka daunamake. Ton tam nang ara, sik pera mutuku yin nang arye, tomobikirye, sik mutuku bobikirye, pia ikin pil dinamake.
Dipkoprop anggun Israel yala nang nirya ati, narye, ‘Pia bico, anang ara, ikin ning sik nong deice kum deipnamne,’ kum tenepnamsine. Tonda, ‘Daupmalyeʼ tenen, anggunti pia kum bataknamsine. Ati, narye dipkoprob, anggun malye winilamunya atonun, tamulina ara, aning atonun wenebuka opnamasine. Tonda, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamasine. Winibuka wenepsinya deice arye, anggun kanye aryuk, ‘Se, Allah Yahweh ara, aning-aning nirya talibuka, el deice tam ulirye, dipkoprob Pia Mikip Weiknye ululeʼ tenen, bikinamlume.
Dipkoprop sik Israel yala nang nirya ati, narye, ‘Pia bico kum tenepnamne. Anang ara, pia ikin ning, sik nong deice kum deipnamneʼ tenen, kanye kum tenepnamsine. Tonda, kanye talima kum arepnamsina ati, ‘Sik daupmalyeʼ tenen, anggun malye winilulum ning ati, dipkoprob kum bataknamsine. Aning kum bukni, narye dipkoprob, anggun malye winilamlum ning, akunum eibuka kel bikamsisa ati, awinilamluma atonun, dekna dolona atonun wenebuka opnamasine. Tonda, narye, ‘Awinin ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamsine. Winibuka wenepsinya deice arye, anggun damnye, ‘Se, Allah Yahweh ara, elcuk nun wenena ati, akanye imun ning, akunum arepmasileʼ tenen, bikinamnulume.
Allah arye, sik amutuku kalikina ati, deiyok yin talin nang nirya ati, nyabuk. “Na si eren aik dam bukni, bai tam aik dam nirya ara, akunuma. Adiparyuk anggunce pia malye kipdeipnamlume! Narye, ‘Aning ara, pia na like,’ nyamse ning bukni, anggunce opnamalum nang nirya, sik ongon ning boyanuka, na si eren aik dam boyanuka, delilyanamlume. Delilyangalamunya ani, anyaik dam bai tam aik dam nirya, langdipnamle. Ati, adiparyuk deiyok koupmunce! Anang olbilulume!” nyabukopura, sik ayin talin nang nirya ara, minopce deiyok koubuka, Yerusalem mutuku weik asik domik noutam ulamik nang, weik tonun opnin banmek. Ara, lak kina seken ning, sik urasin deice tam kum uamuk nang ati, nirya onmakak, lengdar deice arye eipse.
ကြော်ငြာတွေ