Sikce malye winilamik ning ara, weik bukni, ton ning ara, sik mutuku dup, mutuku dubak ara, talye isa si erena ati, mem aik dolamik. Tonda, amutuku dubak ara, ‘Isa si erenamapʼ tenen, weik yo tikamna amu tam nirya ara, weik cang yo webuka deipne sukum ara, “Asukum ara, memak,” nyabuka, yo ton iklamikce, isa si erelamike. Aning ato ning ton, bikilina ning ati, si ara tugu ap, patung-patung isa ner el si Dewi Asyera ati, el si erelamik aik ton, memepdeibikce, si erelamik deice arye, pia malye weik winilamik.
Yehezkiel 6:6 - Eipomek6 Anggun Israel noutam ululum nang nirya ara, wenebuka opsikirye, kum kipdeipnamsiyake. Ara, anggun ululum mutuku nirya ara, weik asik doplumak, ulubuka sikce buklopnamake. Atalakuk anggunce, si erelulum isa si erenak ap, isa arena ati, mesba doplumak ap, tonda anggunce, ‘Isa si erenamapʼ tenen, puturubuka deiplum patung ap, tonda, ‘Isa mer arye kekepnamsiyakʼ tenen, sik si eremunce, siltong lena teleb ning dobuka, uku dongopmunyak babye, sikce buklopnirye, kum kipdeipnamne. Tonda, yata ning do nirya, anggunce, ‘Isa si erepnamapʼ tenen, kintinibuka deiplum ning nirya babye, uluplopnirye, sirya daknamne. Aning nirya ara, sikce bukuka bataknamne. Allah Yahweh arye nyabuk အခန်းကိုကြည့်ပါ။ |
Yehezkiel 6:6
38 ပူးပေါင်းရင်းမြစ်များ
Yata ninye do nirya, atalye ning puturubuka delinyak nang ara, atalye ning kanye bona kumce ulul touk, sik babye talye kanye bobuka unamake. Sik babye taruk mikip adiparyuk, pil donyak ning nong ulye touk, sik babye atonun unamake. Tonda, atalye ning ati, “Nun ni koprop,” nyabuka, dib tenebikirye, si erenyak ninye babye, talye kanye bobuka unamake. Teleb winin ning, pia kum wininamake. Talyeuk wininamake.
Narye anggunti wenepnamsin talak ara, min yuma talak mikip weik nang ulamik bukni, sekne elima atonun unamake. Aning atonun, sekne panmaca ani, pubikiba, uku buk palamle touk, sik mambul pil dolamik ning nirya ara, winipnamle. Ara, narye sik malye wininyak ninye nirya wenepnirye, uku pakalyak dongopniba, uku arye dibuka, sirya daknamle. Amalye wininyak ninye ap, sik pil dolamice nang ap nirya ara, uku dipnamle. Auku ara ninye arye, kum tangaptinge. Pia dinamle.
Tonda, asum akunum winiplyopura, ninye nirya ara, sikce talilamik dekna weik kat ning, perak ap, emas ap, dopromikce, ‘Isa si erepnamapʼ tenen, aning deice arye, ninye urasin atonun kibuka, memepdeiamik ning, isa si erena ati, talye ning nirya ara, adiparyuk batakuka bindopnamake. Winipnamaka ara, sik anang ulamicak ara, yamba maka ap, bai tam balamle ayam mana ap ulyakuk, isa si erena ati, memebuka delinyak patung ara, batakuka bindopnamake.
Winibuka weik tonun, Israel nang arye malye weik winilamik ning ara, namin kibukce, kum kipdeibuk. Yakub el yala nang malye weik ulamik ning nirya ara, Allah arye pera mutuku inibuka donokuka deice arye, sik malye-malye weik winilamik ning nirya ara, akunum kum kipdeibuk. Tonda, Allah arye sik minop talak isa mer si erena ati, keil pala taplakuka deiamikce, mesba moubuka kintinip deibikce, isa si erelamik ning ara, sikce buklopbukba, talye tuku deice butbuta atonun kipdeibuk. Tonda, sikce isa kil el Si Dewi Asyera, el urasin atonun puturubuka memepdeiamik ning ap, tonda ‘Isa arye nun moronyap ning moubuka kekepnamsiyakʼ tenen, isa si erenak bukni, siltong teleb ning uku dongonyakak, el si mesba dup ap, aning nirya dakuka bataklyopura, aning nirya kum kipdeipnamle.
Nyabukopura, narye tamubuka asipdese. “Se, na ni Allah, kum kekepmanto unamak talak ara, yata talak arye talima kat ninye uk unamak do?” nyabuka asipdese. Asipdesiba, Allah arye, tamubuka nyapnuk. Amul arye kekena kum ap, asing arye el lina kum ap, talima kat ap unamak ara, weik tonun tonap pia aunamake. Ilil kum asa winilamice buk, sik wenena ati, narye nyapniba, yuk mutuku yu nang arye yacopura, sik aik dolamikce ning nirya, dakuka atu kiplopnamake. Sik aik ulamikcak nirya ara, ninye una kum ati, asik oldemuk upnamle. Sik wa wilamik ning nirya ara, yu nang arye alapdobikirye, yaniptabikiba, tuku nirya babye, malyeuk upnamle. Sik koulamak ning tonok ning babye, teleb ton kum upnamle. Aning nirya ara, kum danamle.
Allah ance, ‘Na tenen mutuku’ tenen, wipdeiamlum mutuku ara, telebuk ulamuk mutuku bukni, yuk pera mutuku ninye yayikce, daklomikba, oldem uamuk mutuku nirya ara, anyaik oldemuk yamince tamubuka donamlyame. An si deice arye si dolum mutuku, Yerusalem mutuku, tonda Sion nyanyap mutuku ara ninye pia kum unyaka anya arye, asik oldemuk ulule.
Wini talak anggun kekeplulume! Moubuka kekepmunce, anggun ton biknamlume. Weik lelim nyanmalak, kekenamaba ara ani. “Dabu tam arye (arah utara) unyak nang ara, kintinipmakirye, lelim weik nyanamake. ‘'Amutuku unyak yin talin nang arye, nun Yehuda tam unyap nang dam yakirye, nun weik asik dobuka, deiamupurye, aunyab mutuku nirya ara, yanuka kum kipdeipsikceba, din bulung unamabe. Tonda, amutuku nang ton pia kum upnamake. Nun mutuku nirya ara, asik oldem upnamsile. Winipyeura, nun mutuku ara, bai tam yu ulamle kam yanuka aunamake. Israel nang arye nyapnamake.
Tonda, weik asik dobuka, ulamikak arye batakuka, bai tam bukni, buta mutuku dup balulume. Ara, amutuku noutam nirya, mutuku kon deice ara, anggunce isa si eren ati, akunum memebuka deiamlumce, aisa ati arelbalamlume. Adeice arye, anggunda akunum malye weik winilulume. Ati ara, narye nyapniba, anggun on nang arye, anggun ululum mutuku noutam nirya yanuka, anggun talilulum ning ap, delilulum dekna weik ning nirya ara, mikip arye alubuka dobikirye, bobinamsiake.
Israel ninye sik oldan nang arye sikti, weik yu ning, el si singa kus yalirye, bai tam kam ulul ning obuka dilamle touk, unyake. Ara, yuk pera mutuku ninye, yu ninye arye yanuka, sik olonyaka ati nyapne. Tonda, Israel ninye unyak mutuku ara, yuk nang arye, uluplobikirye, malye kilinyake. Tonda, sik asik dobuka unyak mutuku nirya ara, uku dongobikiba, uku arye dibuka sirya dakliba, amutuku noutamak ara, Israel ninye ton pia kum unyake. Lo uk ulule.
Ara, na Allah Yahweh arye, ‘Winiplulume!’ nyabuka, yupu mikip arye nyapdeipnyopura, sik anang kekebikirye, anang ara, amutuku tamubuka yanamake. Ara, amutuku weik asik dolamlum ning, Yerusalem mutuku warikina ap, ninye ona ap, ukula dolona ap ati, tamubuka yanamake. Tonda, amutuku obuka doprobikirye, anyasik nirya uku dongopnamake. Aninguk kum bukni, na Allah arye, Yehuda mutuku noutam, weik asik dobuka unyakak nirya ara, mutuku kata atonun kiplopniba, oldem uplirye, ninye kum kum ulamne sukum atonun kipnamle. Na Allah Yahweh arye, ayupu akunum nyapmasina ati, aning ara, dipkoprob nong kipnamlarya, nyapsine!
Ninye taruk arye, talye memenyak ning ati, “Nun deiyoknye ani,” nyabuka, patung berhala si erenyak ning nirya ara, nong pia kum upnamle ati ara, pia kum melipsitinge. Aning nirya ara, moubuka tenena kume. Tonda kanye bona kume, walwal nang arye memebuka delinyak ning ati, Allah arye, ‘Asum akunum tenipnamle talak ara, atalye ning nirya, kum kipdeipnamle. Winiplyopura, sik atalye ning si erelamikce nang arye, ‘Se, aning ara, yata ati kum melipsuk do?’ tenen, malye nyabuka, ikin kanye bobuka unamake. Allah arye aning nirya ara, kum kipdeipnamle.
Allah arye, na Yeremia biti, ayupu laka nyapdeipnukba, narye nyapsine. “Na yupu kekenululum nang nirya ara, engenauk umunce, ngalukunamlume. Ara, anggun umunyak weik bukuk mutuku nirya ap, bai mutuku ap, luh mutuku noutam palamle maning ap, mutmuta ap nirya ati tenepmunce, engenamlume. Ara, Allah arye anggun wenena ati, amutuku nirya malye kipdeipnamle. Winiplyopura, yata mutuku nang do nirya, sikce amutuku-amutuku noutam ton, kum banamake. Tonda, amutuku noutam nirya ara, ninye arye weilamak ning, sapi basam yupu ton nyanmaliba, kum kekenamake. Tonda, amutuku noutam nirya ara, maka yala-yala nirya babye, bai tam ulamle kam ning yala-yala nirya babye, bai sakuka pia yukak bidobikiba, kum upnamle. Ati anggun nirya arye, anggun mutuku ati tenipmunce, engenamlume,” nyapsine.
Allah Yahweh arye, ayupu ton nyapsuke. Anggun moubuka kekeplulume! Narye, anggun wenena ati, Yudea mutuku noutam nirya, ninye arye asik domikce ulamik mutuku nirya ara, uluplopniba, asik oldemuk upnamle. Ninye nirya wenepnirye, obuka sirya daknamna ati, amutuku noutam ton, pia kum unamake. Tonda, weik asik domik, Yerusalem mutuku babye, uluplopnirye, sice buklopnyopura, amutuku anyasik nirya ara, uluplopniba, tuku deice ara, keiluk upnamle. Tonda, amutuku noutam ninye nirya ara, kum kipdeipniba, ninye ton amutuku noutam kum ukcopura, bai tam ulamle yu kam arye, amutuku noutam yanuka, pia unamake,” Allah arye nyabuk.
Weik tonun engenamluma ara, talye ati kum bukni, wini talak ara, Sion mutuku noutam arye, akunum deiyok koubuka engebikiba, kekelulume. Sik Sion mutuku unyak nang arye, imun kanye bobikirye, malye nyabuka, engebikirye, nyanamak yupu ara, ani. ‘Se, nun nirya kum kipdeipsiliba, nun asik oldemuk upsila ati, nun nirya ara, alye dakdanamabe. Deiyok ara, nun mal olan nang ara, sik pera mutuku nang arye yanuka opmasiakce, nun asik nirya ulubuka, sice buklopmasiake. Nun asik domupu ning nirya ara, akunum ulubuka, kum kipdeipmasiakce, sirya daknamsiaka ati, nun alye dakdanamabe. Nun unyap mutuku noutam nirya ara, adiparyuk batakuka bindopnamabe.’ Sik Sion mutuku unyak nang arye nyabuka nyanmak anyak, kekenmalume,” Allah arye nyabuk. Nyabukce, ayupu ton nyabuk.
Winipkilyopura, ance amutuku noutam tuba kam unyak Israel nang nirya ati, sik dam binuka, ayupu lak nyapnalyame. Ara, Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye ulirye, sik Yerusalem mutuku, weik asik domika noutam tuba ululum nang ati, nyapsile. Ara, anggun anang nirya, din dinamlum talak nirya ara, ilil pia weik upsilyeba, anggun nong nirya sirem talinamsile. Atonun, anggun mek kwebuka dinamlum talak nirya ara, ‘Se, ikin weik ning, nun dam yanamsila ati, yata winiptibye do?’ tenen, kanye teniltonauk upsilyeba, anggun nong bol nirya ara, bol tililing apsilyeba, anggun nong nirya sirem talinamsile. Winipnamaka ara, talye ati kum bukni, deiyok ara ani. Ara, aminyan talak ara, sik unamak mutuku ap, amutuku noutam ulye ning ap nirya babye, pia malye unamle. Deiyok ara, wini talak sik mutuku noutam unyak nang nirya arye, pia yu weik uplirye, ‘Nun lik,’ tenelanauk ubikirye, pia tuba-tuba malye unamake. Wininamaka ati, ninye mal olana ap, walana ap, malye kililana ap, ubula dona ap, upnamaka deice arye, amutuku teleb ulye ning nirya ara, pia kum danamle.
Anggunti bico tenen, anggun talima areamsuk nang ati, narye anggun deiceuk, dobuka arepnamsine. Bukni, sik bobuka anang ati arepnyeba, sik anang nirya arye, yu uplyeba, anggun dobuka, talye-talye yolamsik aik, tonda mutuku kon deice isa si erelamlumak nirya ara, uluplopnamake. Tonda, anggun urasin teleb baju nirya kwiriplopsikirye, anggun urasin teleb una ati, dekna weik kweirya nirya, aulubuka dopropnamake. Winibikceba, anggunda nong bananguk unamlume.
Aning ara, na Allah Yahweh, aning-aning nirya talibuka, deice tam erebuka, pia mikip weik ununye birye, ayupu nyapsine. Mesir mutuku noutam mambul weik asik domik ning, el si Memfis mutuku noutam unyak nang arye, isa si erenyake. Isa si erena ati, ninye urasin atonun ning puturubuka, isa si erenyak ning ap, tonda aisa ap babye, aning nirya kum kipdeipnamne. Winipnyopura, tonda Mesir mutuku noutam ara, ninye deiyok nang, Raja nang ton kum kipdeipniba, ninye deiyok nang babye, pia kum unamake. Aning winiplya deice arye, Mesir mutuku noutam unyak nang nirya ara bikikirye, sik ilil pia weik unamle.
Minop talak doprapce dipdongobuka, wini talak noutam nirya, anggunce weik asik dobuka ululum mutuku nirya ara, na Allah arye, ulubuka bataknamsine. Winipsiniba, anggun mutuku nirya ara, oldem upliba, tunim abuka, kum danamle. Winipsinya deice arye, anggunce nati, ‘Se, elda dipkoprob Allah Yahweh, eluk ululeʼ tenen, biknamlume.
Ati ara, na Allah arye, anggun Yerusalem mutuku noutam ululum nang nirya ati obuka, kum kipdeipnamsine. Winipnamsina deice arye, anggun mutuku antanap dongopsik mutuku nang nirya ara, anggun ap, anggun mutuku ap eipsikirye, ‘Se tenen, malye kanye bobuka nalinamsiyake. Sik dana-dana tam unyak nang nirya, anggun mutuku dam binuka eipnamsiyak nang arye, anggunti, ‘Se, anang ara, dipkoprob malye ulamika anya arye, Allah arye sikti, wenebuka, kum daneibuke,’ nyabuka eipsikirye, anggun dam arye, kisik dakuka yukak bindopnamake.
Ara, anggunce isa si erena ati, kam ning obuka uku dongolulumak, el si mesba-mesba ap, tonda, ‘Nun moronyap yupu kekenamsiyakʼ tenen, anggunce siltong teleb ning dobuka, uku dongomunyak babye, uluplopnamake. Tonda, adiparyuk anyaik ap, auku dan kata ap, nirya ulubuka bataklopnamak talak aryuk, isa si erenak unamak nang nirya babye, aisa si erenyakak urasin dinmakce tamuk, anang obuka sirya daknamake.
Dan sukum do, anggun Israel yala nang ululum mutuku-mutuku noutam nirya ara, narye sik anang weik tonun opnyopura, aning eipnamlum deice arye, anggunce, ‘Se, dipkoprob aning nirya ara, Allah Yahweh, el pia mikip weiknye binya. El mikip pia weik ulule,’ tenepmunce, asum-asum nirya moubuka bikinamnulume
Sik Israel nang arye, sitang deice arye, teleb yupu nyanyak bukni, sik kanye pum tam teninyak ning ap, ‘Wininamabe,’ tenenyak ning ap ara, malyeuk ulula ati, sikda tilila nyan nanguk unyake. Ati ara, sik nirya arye, malye un ninguk upra banyaka dengna ati, Allah arye ikin ning arepnamle. Allah Yahweh arye, anang wenepnamle talak ara, sikce domik mesba-mesba nirya ara, ulubuka sice buklopnamle. Winiplyopura, sikce, ‘Asyerah isa si erenamapʼ tenen, moubuka iklamik cang yo, el si ‘tugu berhalahʼ babye, aning nirya ara, ulubuka daklopnamle.
Tonda, Awen mutuku noutam bukni, mutuku kon deice arye, ‘Nun isa si erenamapʼ tenen, isa si eren aik dolamik ning nirya ara, Allah arye lo arepliba, mal olan nang arye, aning nirya dakuka, sice buklopnamake. Israel nang arye, isa el si berhalah, erelamik mutuku kon deice nirya ara, sice bukuka batanirye, kum kipdeipnamne. Israel nang arye, aning deice arye, malye weik winilamik. Winiplyopura, sik isa si erena ati domik ning, mesba-mesba nirya ara, tace ning ap, dola ap, maning ap, paplirye tiknamle. Winipyopura, sik anang nirya arye, weik yupu deice arye, ngalukuka mutuku kon ati yukunamake, “Se, nun kanye imun bopmaba ati, sik weik mutuku-mutuku dana-dana uamuk ning nirya ara, nun yanuka singinipsilyame,” nyabuka moronamake! Tonda, mutuku kon deice nirya ara, tobuka yamince, nun siknibuka opsilyame!” nyabuka moronamake.
Aning atonun, anggunce mutuku kon deice memebuka deiplumce, anggun ning nirya bobuka, mutuku kon deipmunce, isa si erena ati, uku dongolulumak nirya ara, narye uluplopnamne. Tonda, isa si erena ati, kin-kin tong ning dobuka, uku dongolbalamlumak nirya ara, dakuka uluplopnirye, kum kipdeipnamne. Winipnyeura, isa si erena ati, weilbalamlum ning, anggun si eren ning nirya ara, sik nong nirya dakukapnirye, donoknamne. Anggun ton oplopsinyeba, dipmunyopura, anggun nong dopropnirye, anggun talye ning si erelulum ning ap, isa si erena ati, memebuka delilulum ning, el si patung ap, dakukapnirye, adeiceuk, anggun nong dobuka, adeice deiplopnamsine. Na kanye talima noutam ara, pia malye weik winilulumba, na lik unulule ati, dukmanto kanye unirye, aning nirya ati ara, ‘Anang ap, aning ap nirya ara, na like,’ tenenune.
Tonda, anggun umunye asik, kota noutam nirya, anggun aik weik domluma nirya ara, narye malye kibuka uluplopnirye, kum kipniba, talye louk kipdeipnamne. Anggunce, teleb sukum teneplumce, domba basam ato ning opmunyakarye, isa si erena ati, arelulumak nirya ara, narye daklopnamne. Tonda, na si erena ati, arelyanganamnulum ning nirya ara, arepnutuma babye, narye siltong kum kekenirye, dipkoprob kanye deibuka, kum dolonamsine. Aning ara, batakniba, talye daupnamle.
Tonda, amutuku noutam umunce, talye ning ati, ninye taruk deice arye, puturubuka memepdeipmunce, kam kum ulul ning bukni, anggunce, ‘Aning ara, weik mambul ning’ tenen, “Nun ni koproba,” nyabuka, aning ati, si erelulum ning nirya ara, kum kipdeipnamne. Atalye ning si erenyakce, talibuka unyak ning nirya ap, tonda talye-talye yolanyak ninye nirya ap ara, obuka atu kiplopnirye, uku dongopniba, dibuka atu buklopnamle. Atonun, sikce dekna weik deklamik ning nirya ara, ‘Pia aunamsil’ tenen, ‘Naʼ tenen, moubuka, aik pum tam delilamik ning nirya ara, aning babye daklopnirye, aning nirya dobuka, uku dongopniba, uku arye diplirye, kum danamle. Winipnamna deiyok ara, ani. Sik dekna weik ning, dokola delilamik ning nirya ap, tonda, “Nun ni koproba,” nyabuka, si erenyak ning nirya ap ara, yo bok weik tonun, dekamikce delilamik. Ayo bok ara, talye-talye yolamak kilapu dekuka yolalamikce, deklamika deice arye, dololamik. Ati, adekna weik ning nirya ara, dobukapnirye, yuk mutuku ninye ak arepneba, amutuku ninye babye, adekna weik ning dopdobikirye, talye-talye yolamak kilapu ati, arenamake. Allah arye, nabi Mika biti, lak nyapdeibukba sekamuk.
Ati, na nabi Mika birye nyapsine. Anggun weik malye winimunye ati, Sion mutuku ara, tuku palibuka, wa win dam atonun upnamle. Ara, Allah arye lo arepliba, Yerusalem mutuku noutam asik domik ning nirya ara, yuk mutuku nang arye yanuka, uluplobikiba, asik oldem upnamle. Winibikirye, Yerusalem mutuku noutam ulul asik nirya ara, uluplobikiba, sice butbuta atonun upnamle. Amutuku noutam dolamik asik nirya ara, kum danamle. Winiplyopura, aminyan talak yo mutmuta paplirye tiklyopura, talye bai mutuku atonun upnamle. Allah Yahweh, el si eren aik amutuku deice ulul bukni, aminyan talak, anyaik babye uluplobikiba, kum danamle. Amutuku deice ara, talye yo mutmuta palamla atonun upnamle. Na nabi Mika birye, anggun amutuku deiyok nang ati nyapsine.
Aning atonun, anggunce isa el si Dewi Asyera, isa kil si erena ati, anggun ululum mutuku noutam arye, cang ayukumna yo atonun yo ikukapmunce, isa si Asyera ati, si erelulumak nirya ara, daklopnirye kum kipdeipnamne. Tonda, isa si erena ati, isa el aik dobuka deiplumak ap, aisa si erena ati, weik aik dolulumak nirya ara, dakuka uluplonamne. Winipniba aning nirya ara, pia kum danamle.
“Tonda, narye nyapnusin yupu ara, moubuka kekepnululume. ‘Nun ni koprop unamsil’ tenen, ninye arye kat ning dobuka, kintinibuka deiamikirye, si erenyak ning nirya ara, aning ara dipkoprob weik mambul ulul do, kum do? Yata deiyok ati, ninye urasin atonun ning memelalum do? Si erenyak ning nirya ara, talye ning uka. Aning ara, ikin pia kume. Deiyok ara, anang aryuk, kat yo dobuka, sikce puturubuka delinyake. Deibikirye, ‘Se, aning ara, nun melinamsil’ tenen, dib tenenyake. Bukni, sikcuk puturubuka delinyaka anya arye, aning ara, talye ning uka. Tonda, ninye aniryuk kintinibuka deipne ning aniryuk, ‘Teleb yupu nyanamsil’ tenen, puturubuka delinyak bukni, aning ara, dipkoprob yupu nyapmanto kum ning anya arye, talye ninguk ulule. Ati, ninye arye, ‘Aning arye nyapnamnil yupu ara, anye,’ tenenyaka babye, talye ning uka. Ara, tilila uka.”
Allah Yahweh, el yu ulul ning ara, tukwak uplyeba, aweik ikin upnamle sum areplyopura, sik bona weik talin nang arye, talinyak dengna weik ning emas ap, perak ap arye, amutuku nang ati, pia kum melinamle. Abona weik talenyak nang ara, sikce sik dengna weik talenyak ning arye, pia kum lyepdanamake. Allah el yu ara, weik uku dilamle touk ulirye, tukwak mutuku nirya ap, tukwak mutuku nang ap, nirya wenepnamle deice arye, malye kiplirye, bataknamle. Aning ara, ninye arye kum tenipnamak buk, sik mangkau kibikce talak, Allah minopce tukwak mutuku kam unyak ning yala-yala nirya ap, tukwak nang im sirya, mutuku sirya nirya ap, opsilirye sirya daknamsile! Tonok ning babye, pia kum bataknamle.
Atalak ara, atam mutuku nirya, na Allah, mikip weik deice arye, isa si erenyak ning nirya ara, kiliplopnamne. Winipnyeura, ninye nirya arye, aisa si nirya, tamubuka tonap, pia kum bikinamake. Lubakinuk unamake. Tonda, yuk nang arye, ‘Na Allah arye nyalul yupu, laka nyana deiyoknye, nabi unune,’ nyabuka nyanyak bukni, sik anang ara, isa siuk erenyake. Anang ap, isa nirya ap ara, amutuku nirya, narye yaknamne.
Min arye deiamikakuk, delilbinmek buk, ila tuba mapmika ani, berekukopura, yanuka delelamikop unyak talye ning ati, ‘Nun ni,’ nyabuka, si erelamik ning Dagon ara, ila tuba tonap, Allah el nyalilamuk yupu deiamik marikna, Peti Perjanjian dam, daksakuka poulbinmokce, el asok urasin ara, amsuna deice lumlumubuka poulbinmoke. Atalak ara, gambar ara amarikna dam sakuka poupmokce, el taruk yuk-yuk bitinye ap, el kisok ap bongobuka yuk-yuk poulbinmok. Bukni aDagon patung ara, el nong pia kum colopmok.
ကြော်ငြာတွေ