Minop talak Yerusalem mutuku ulamlum ninye nirya ara, ‘Na ka,’ tenebuka tonok kanye bobuka, nati kanye talima dukdongobuka ulamnulum bukni, wini talak ara, na bataknulumce, talye-talye yolalamak kilapu atonun ululume. Minop talak ara, diksukumuk ulamlumce, pia telebuk ulamlume. Ninye ati yupu lipsisikuka bokolilamlumce, teleb yupu uk nyalamlum bukni, wini talak ara, olan ninye uk ululume.
Yehezkiel 5:13 - Eipomek13 Akunum oplopsicopura, narye anggunti, yu weik upnilyopura, kum danamle. Narye anggun malye ululum ning ati, kanye imun weik wenen ning akunum arepsiniba, ninye weik akunum opnyopura, wini talak yu weik upnilyopura, aminyan talak kum daniliba, na kanye lopnamnile. Bukni, na yu weik upmanilya deice arye, sik tibuk, akunum wenebuka opnyopura, adeice arye, sik moubuka biknamake. Aning nirya akunum winipnyopura, anggun Yerusalem mutuku ululum nang arye, nati utenepnamnulume. Ara, ‘Se, elda Allah Yahweh, aning-aning talibuka, pia mikip weiknye birye, deiyok kum uamukba wenepsuka kuma. Deiyok ara, nun bidamnye malye ulamupu ning ati, yu weik ulamuka deice arye wenepsuke. Wenepsuka deiyok ara, elce, ‘Se, sikda yata deiyok ati, malye-malye unyak do?’ tenepsukce, kanye imun kanye bobukce, wenena weik ning dobuka, nun deice uk deipsukeʼ tenen, anggunce moubuka bikinamlume. အခန်းကိုကြည့်ပါ။ |
Yehezkiel 5:13
33 ပူးပေါင်းရင်းမြစ်များ
Ati, na Allah Yahweh, aning-aning nirya talibuka Pia Mikip Weik unirye, narye, ‘Winipnamne,’ tenenye touk unune. Nara, im deice yin talin malaikat nirya, sik weik deiyoknye unune. Narye nyapnusine. Nara, pia telebnye ununye birye, Israel ninye ati pia kalikuka melisununye, na Allah arye nyapnusine. Se, Israel ninye anggunce nati, mal pinululuma ati, narye anggun wenebuka opnamsine. Nati, ‘Nun like,’ tenenikirye, malye yupu nyaninyak ninye nirya ati, tamubuka kwang daknamne.
Allah elda, el pia dipsukumuk ulula ara, winipmanto ara, yin talin nang arye, ‘Marapsikirye opsikcakʼ tenen, sik taram deice ara, ting kiniklamaka atonun ubuka, Allah el nong taram deice arye, diksukum winin ning deibuk. Winipmanto ning ton, sik yin talin nang arye, ‘Keil dopsikirye, nun kisok deice opsikcakʼ tenen, besi ning arye kat topi memepdeibikirye, galubuka ongolamak touk ubuka, Allah arye ninye lyena deiyok ning boyanuka, el kisok deice deibukce, ongobuk. Tonda, ninye arye, cang baju ongobuka balamak touk, Allah arye baju ongona atonun ubuka, sik malye-malye winilamik nang arye, teleb nang ati malye kipdeiamik ning ati, ‘Tamubuka kwang daknamnaryaʼ tenen, yayukce, anang ati wenebuka obuk. Winipmanto tonok ton, ninye arye tin baju dobuka, sik nong dam ongopnamak baju deice ongobikirye balamak touk, Allah arye, sik malye winin ninguk, talibuka ulamik nang ati, yu weik ubuk ning ara dobuka, el nong deice kwetep deibukabukce, sik amalye nang ati, yanuka wenebuka olamuk.
Elda, aning-aning nirya ap, ninye nirya ap taliplirye, ninye deiyoknye pia aunamle. Elce aning-aning nirya, talibuka unamle talak ara, kum kumdanamle. Tonda, elce, ‘Allah ap, ninye ap, teleb ubuka neika unamak’ tenen, ansinilina deiyok kibuka unamsilnye bira, pia aunamle. Aning babye, kum kumdanamle. Minop talak ninye deiyoknye, Raja Daud birye taleamuk mutuku ap, ninye ap ara, el dem arye, pia taliplirye, ninye deiyoknye pia aunamle. Raja Daud ninye deiyoknye una ati, weik mambul bun ning deice bulamuk touk, anye babye, aning deice pia abunamle. Raja Daud birye taleamuk mutuku ap, ninye ap nirya ara, ayanamlanye, el si mikip deice arye, aning-aning nirya pia talinamle. Elce pia teleb kibuka, yupu lipsisikuka bokolinamsile. Tonda, el malye winin ning tonok babye kum winilirye, pia diksukumuk unamla deice arye, amutuku nirya ap, amutuku unamak ninye nirya ap, teleb arye talinamle. Elda ninye deiyoknye kiplirye, talinamle ning nirya ara, pia aunamle. Wini talak ap, yuk sum nirya ap, pia ati unamle. Elce pia teleb unamle ning nirya, sirya dakmanto kum unamle. Aning nirya ara, talye ati kum winipnamle. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah Yahweh, aning-aning nirya talibuka, deice tam ulirye, Weik Erenanye birye, pia pi dobuka, el mikip weik deice aniryuk, aning nirya dipkoprob pil dolya deice arye unamle. Allah arye nyapdeibukba, Yesaya birye sekeibuke.
Sik amalye winilamice ning nirya ati, ‘Se, nun malye wininyap ning ati, mambul kanye bopmabe. ‘Aning kilipsimince lyepnamsil,’ tenebikirye, din dina kumce, si tebuka ukirye, moronamniyaka babye, kum kekenamne. Tonda, Israel ninye arye, ‘Se, nun malye wininyap ning ati, Allah arye talye mangkau kibuka oplopsutu bukni, nun malye wininyap ning kilipsilirye, namin kipnamsil’ tenen, ‘Nun nong pununa ati, kam ning ap, koulamak ning gandum ap bobuka, yanuka uku danamabe,’ tenebikirye, winibica babye, adeice arye anggunti, kanye kum delinamsine. Yu tuba unamnile. Aning-aning nirya arepnikirye, moronamniyaka babye, sikce moronamniyaka babye, na kekepnirye, kanye kum delinamsine. Kwaning dina kumce, mambul kanye bobuka, arin ning arepnitinga babye, narye tamubuka, sik dam ara, oldana ap, din patana ap, wa wibuka kouamice ning kouluna ap, weik imun kanye bon uk dina ap, arenamsine. Ara, sik malye wininyak ning dekna ati, kanye imun ning weik arepnirye, wenepnirye, obuka sirya daknamne. Allah arye nyabuk.
Atalak noutamak ara, lo arepneba, ninye weik obicopura, kil tonok, el mapu tekbarye deiamli bukni, sik amapu nirya dibicopura, akil, ‘Se’ tenen, teninmalirye, kanye kum dalirye, isin kum upliba, buku sukunamle. Keting noutam bukni, akilapu sik kanye ara, ‘Akunum inipmasilarye, lukunyan atonun upsile,’ tenenamake. Dipkoprop akilapu ara, sik mapu nirya dipnamake ati, alye weik upnamle. Minop talak arye kum obikiba, tuba kam unmace nang babye, narye lo arepneba, sik oldan nang deice, parang ya arye, aninye nirya obuka, sirya daknamake. Aning nirya ara, na Allah Yahweh arye, anggun wenena ati winipnamsine.” Allah arye nyabuk.
Bukni, winibuka daulamunya ani, na tenyamse talak, keting tamun tujuhpuluh (70) tahun akunum mapmunyopura, Babel mutuku ninye talibuknye ap, elce talilul nang, sik Kasdim yala nang ap ara, sik pia malye wininyak nang ati, na Allah arye sikti, wenebuka opnamne. Na Allah arye, Babel mutuku ap, Babel nang nirya ara, oplopnyakarye, sice buklopnyopura, sik mutuku ara pia, oldemuk upnamle. Na Allah Yahweh arye, ayupu akunum nyapmana ati, dipkoprob nong upnamle!
Israel nang arye pia malye weik ulamik ati, Allah el yu pia weik ubukura, ‘Sion mutuku ap, amutuku unyak nang nirya ap ara, tonok ning babye kum bataknune,’ tenebukce, lo arebukba, sik mal olan nang arye, uku dinibikba, amutuku nirya uku arye dibuka sirya dakuk. Asukum nirya ara, ‘Nun aik mikip kipnamsileʼ tenen, sik aik amu tam deiamik keil babye, uku dibukba, sice uk buklobuk.
Bukni, anggun Sion mutuku nang ara, anggunce malye ulamluma, adeice arye menenga ning, kanye ikin ning yayukba doproplume. Atalak noutam arye, anggun mal olan nang arye, anggun amutuku ulamlum nang tapu koubikce, sik mutuku tamubuka deibikce, ikin pil dilamik. Bukni, anggun wenen talak ara, akunum sirya dakmanto kiple. Ati, yuk mutuku nang arye dipkoprob ton ap, yuk mutuku pia kum bobuka delilbinamake. Bukni, Allah Yahweh arye, anggun Israel nang, anggun mal olan nang, sik si Edom tam nang ati ara, Allah elce pia namin kina kumce, yu weika arye wenenamle. Tonda, sik Edom tam nang arye, malye na weika arye dungnubuka ulamlume. Anggun Edom tam ninye nirya, anggun malye winin ning duknukuka ulamlum bukni, Allah Yahweh arye, aning nirya elilula ati, elcuk anggun malye winin nang ara, lake kipsilirye, wenepnamsilarya. ‘Elce kum wenepnamsilʼ tenena kume.
Yerusalem mutuku dana-dana tam domik keil poka ap, akeil poka deice mek likna, el si cat mek aryuk likuka, kurun mek cat arye, liklamik nang ap, amutuku noutam ulye ning nirya ara, na yu arye akunum uluplopnirye, sirya obuka, sice buklopnamne. Aning winipnyeura, naryuk tamubuka, sikti nyapnamne. “Anggunce domlum keil poka ara, akunum kum kipmalce, sirya dakmale. Tonda, “Akeil poka namin kipmal ning ara, ‘Moubuka kum eipnamak’ tenen, mek koproba, el si kurun mek cat aryuk, likuka liklamik nang ara, akunum kum kipdeipmane. “Nyapnamnarya!’ tenen, nyapmane.
Ura, na Allah arye, sik mutuku imun kanye bona uk areptinyeba, ninye nukmanto kum dipting bukni, aning ara, mitik tonun winiptue. Bukni, ninye ara, yupa pia weik, nukmanto kum dipnamtinga ara, ani. Ara, na Allah Yahweh arye, weik tonun erebuka, aning-aning nirya talibuka, Pia Mikip Weik Deiyoknye ununa ati, narye kanye imun wenen ning, dumbarye dopdeiptinyeura, ninye nukmanto kum diptinge. Ara, pia kanye imun ning ara, Yerusalem mutuku noutam adumbarye wenen ning arepnyeba, amutuku noutam unyak nang ap, sikce weinyak kam ning ap, nirya kum kipdeiptinye. Awenen ning ara, ani. Ara, yuk mutuku yu nang wibuka, sik dam arepnyeba, anggunce Yerusalem mutuku noutam ululum nang ati, adiparyuk olyasitinge. Tonda, weik din patana deice arye, ninye weik diptinge. Tonda, yu weik talye bai tam daulul ning arye, ninye weik ton obuka diptinge. Tonda, imun kanye bobuka, Yerusalem mutuku noutam dobuka, deiptinyeba, ninye weika arye diptinge. Winiptinye deice arye, ninye nukmanto kum ap, kam ulye ning ap, weika arye opnirye, kum kipdeiptinye. Dipkoprob ning ara, sik Yerusalem mutuku noutam tuba unyak nang, malye weik wininyaka ati, sik wenena ati, imun kanye nirya bobuka, sik deice deipnamle!
Aning-aning nirya akunum winipyopura, narye anggun malye winilamlum ning wenena ati, yu weik upnuka ara, adiparyuk mitang upnamnile. Akunum wenebuka opsinyopura, wini talak, na tuba tamubuka, talye kanye deipnirye, tunim abuka, namin aryuk unamne. Ati wini talak, narye anggunti, yu upnuk ning ap, ‘Se, sikda, ‘Naʼ tenen nang unyake bukni, yata deiyok ati, yuk talye ning si erenyak do?’ tenen, malye kanye bopsise ning ap, kum dalyeba, aning ton pia kum unamne.
Ati, narye anggun malye weik winilamlum ning ara, narye, ‘Teleb dauplye. Namin kibuka kilipnamsine,’ nyabuka, anggun malye winin ning kum kipdeipsinyopura, anggunce tuba tonap, ‘Se, nunda pia malye weik winilamupu,’ tenepmunce, alye weik dakdanalume. Anggun malye winilamlum ning ara, pia kum luba kipnamlum ati, anggunda pia ilil upsilyeba, alye dakdanamluma ati, aminyan doyanamle talak ara, yatato yupu do nirya, anggunce yupu ton, pia kum nyapnamlume. Aning nirya, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye unune. Ati ara, narye ayupu nirya nyapmasina ati, aning nirya ara, dipkoprob nong upnamle! Allah arye, sik Israel nang ati, nyabuk.
Anye wenebuka opnamne talak ara, narye lo arepyeba, sik Babel mutuku yin talin nang arye, el dam yakirye, el yin talin pia teleb nang babye, yu parang ya arye, opnamake. Ninye weik tam nang ara, opmakcebuk, tuba kam unamak nang ara, bai sakuka bendobikirye, im sirya, mutuku sirya ara, yuk-yukak bindopnamake. Aning nirya akunum winiplyeura, anggun nirya arye, nati biknamnululume. Ara, ‘E diba, nun ni koproba Allah, aning-aning talibuka, deice tam erebuka, pia mikip weiknye birye, ‘Winipnamneʼ',’ nyapsuk touk, akunum upmal atia,’ tenepmunce, moubuka biknamnulume. Ayupu ara, akunum nyapdeipsine.
Nyapse bukni, wini talak, sik wel nang arye winilamik. Sik atalak wel Israel nang nirya arye, aweik kata mutuku noutam, padang pasir mutuku noutam arye, tuba ulamik talak nirya ara, ‘Allah nyapsilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina malye ning,” nyapdeipse yupu nirya ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,’ nyapdeiamse yupu nirya ap ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik winilamikce, malye ulalamik. Malye weik ulamika ati ara, narye, ‘Ura akunuma, akata mutuku noutam aryuk, sik malye winin ning ati, yu weik upnilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.
Ayupu nirya, mikip arye nyapse bukni, sikce na nyapse yupu kekena pia kumce, ‘Allah arye nyapsilye yupu kum wininamabeʼ tenen, nati bataknike. Winipnyopura, anggun kan-kan noutam arye, tonoknye babye, sikce si erelamik isa si, patung-patung pia malye winilamik ning ara, kum batikik. Tonda, sikce, ‘Aisa si erenamapʼ tenen, kanye deibuka, delilamik patung-patung nirya babye, pia kum batakamik. Sikce Mesir mutuku noutam ulamik talak arye, isa mer si erelamik ning, el si berhala-hala nirya ara, kum batakamik. Atalye ning kum batakamika ati, narye, ‘Ura, sik Mesir mutuku noutam tuba unmak talak ara, narye sik Israel yala nang wenebuka, pia ikin ning, sik nong deice deipnamne. Sik malye wininyak ning ati, na yu weik unilye ning ara, sik nong deice deipnirye, sikti, weik tonun wenepnamne,’ tenipsirye kintinip deiamse.
Ninye weik akunum obikceura, na Allah babye, kanye deipnirye, na taruk bokbokapnamne. Winipnamne ara, na yu kum upnamnile. Anggun malye ululum nang, weika arye, akunum wenebuka opnyeura, na kanye yu weik tenenun ning ara, kum kipnamnile. Aning nirya ara, pia dipkoprob nong upnamlarya! Na Allah Yahweh, aning-aning deice tam erebuka Pia Mikip Weik Deiyoknye Ununa ati, ayupu akunum nyapsina ati, dipkoprob aning nirya ara, nong upnamle nyapsine. Allah arye, na Yeheskiel biti, ayupu nirya nyapnuke.
Adeice arye, Yerusalem mutuku tam ati, sirik taruk arye bokuka, talipmalye ning deice lakakipnamle! Awinipnamle ning ara, Raja Babel birye, Yerusalem mutuku olbinulya atia. Winiplyeba, Raja birye, “Mal olalbinuyabe,” nyaplyeba, sik yanganamaka, yan lelim ara, weik nyabice kekepnamake. Atalak ara, Raja birye, el yin talin nang ati, sikda, anyaik dobuka ukirye, bai tam bisik arye domik bublan (pintu gerbang), tirikdongobik ning, binuka dakuka donokon ning ap, cang poka deice welena ati, cang yo moromna welen ning ap, poka dam tuku palibuka delinamak ning ap ati, “Anggunda aning-aning moubuka kintinip deipnululume,” nyapnamle. Winiplyeba, sik anang arye, anyasik domikirye, cang keil poka dopdongomikce ning ara, tuba libuka yan deibikiba, langdiplye deice arye, akeil poka deice welebuka bikirye, ninye olbinamake.
Nara, yu weik upnukba, narye anti, yu ning ara, an deice deipnamkine. Sik anang ati bikyeba, sikce anti, yu weik tenebikirye, ‘Winitibye,’ tenekinyak ning ara, an deice dobuka deipnamake. Tonda, an amul ap, an u ap ara, seklopnamkiake. Tonda, an mapu ara, tomobuka, tapu koubikirye, sik mutuku bobinamake. Winibikirye, obikceura, anggun tam nang tuba kam ululum nang ara, dobuka, kam kipman uku dongopnamake.
Ura, adomon yupu nong ara, nyapnusine. Anggunda, moubuka kekepnululume! Yerusalem mutuku ululum nango, anggunda pia malye un ning weik, malye winilamlum bukni, ‘Anang ara, tonap teleb kipdeipnamne,’ tenepsirye, pi dobuka piripdese bukni, anggunda mandipna kanye bobuka, umunya deice arye, anggun nong deice akunum malye kililamunyeba, narye anggunti kum teleb kipdeipsitinye. ‘Aning kum winipmanto,’ tenepse ati batakse. Bukni, anggun nong deice tuba malye dem usulule. Winisulula ati, sik malye ulamika ati, na weik yu arye, pia weik tonun wenepnamne. Ikin deice arye wenelamnya ani, na yu arye, ‘Winibuka anang wenepnamne,’ tenyamse ning, anggun deice deipnirye, ayu ning akunum kum kipyeura, sirya tam ara, narye tamubuka tonap, teleb kipdeipnamsine.
Tonda, minop talak ara, sik Israel yala nang, sik deiyok-deiyok nang arye, sik aik domikce, bisik bublan dana-dana tam, yo deibuka domik ning ap, abublan wekelban bisik yanina ak ap, na aik dam atonun domik. Winilamika ati, sik aik otam, na aik atam ara, tonok keil poka domik bukni, sik aik ara, pia mening dam ubuka ati, winilamika deice arye, na leknye si ati, pia malye kililamnike. Winilamnik ning nirya ara, narye, ‘Aning-aning nirya, pia na like. Aning nirya ara, pia na likʼ tenenun bukni, aning tenina kumce, talye mangkau asa, malye winin ning weik ulamik. Winilamika ati, sikti, yu weik upnukba, amutuku ulamik nang nirya obuka, sirya dakse.
‘Sik Israel nang arye, aminyan talak tuba biknamak’ tenen ati, ‘Se diba, nun ni koproba Allah Yahweh, el tonok ulule,’ tenen, binamake. Nara, Allah Yahweh ununa ati, minop talak ara, anggun bikna ati, narye, ‘Kume, malye winin ninguk talibuka winipmunyopura, aminyan talak, narye anggun nong deice, pia ikin weik ning arenamsine. Weik tonun wenepnamsine,’ nyapdeipse ning ara, talye yupu nyaltakana ati, kum nyapse. Na nyanun yupu nirya ara, dipkoprob wininirye nyanune. Nyanuna arye, anggun wenen ning arepsisa ara, talye wenena ati kume. Anggun bidamnye malye winin deice arye, aning pia ikin weik ning ara, anggun deice delinune.
Anggun anang nirya ara, yu kanye tenepsinirye, anggun deice ikin weik ning deipnamsina deice arye, kel biknamake. Winibikirye, yata nang do nirya, yuk pera mutuku noutam daunyak Israel nang ara, kanye imun weik uk, dinamla deice arye dipnamake. Yerusalem mutuku tuba sik damuk unyak Israel yala nang ara, yuk mutuku yu yin talin nang arye, sik dam yakirye, parang ya bopmaca arye oplopnamake. Sik Israel yala nang bukni, akanye imun ning bitinye deice arye, biknamak bukni, sik kum dipnamak nang arye biknamake. Ara, batakniba, sik tuba kam unamak nang ati, sik mutuku noutam kanye imun weik din patana deice arye, dibinamake. Aning-aning ikin ning nirya ara, na yu weik upnamnila deice arye, sikti wenen ning arepnamne.
Se, anggun Israel nang, wini talak ara, anggunti kum kipdeipnamsin talak ara, akunum dam uple. Ati, na Allah yu weik upnilyopura, anggun deice deipnamsine! Ati, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilulum ning ap, anggunce malye-malye winin ninguk weik winilamlum touk, dekna ati, yupu bokeipsinirye, weik tonun wenepnamsine.
Wini talak ara, na yu weik unilya deice arye, anggunti kanye imun weik ning arepnusine! Dipkoprop, yu weik unilye ning nirya ara, anggun nong deice deipsinirye, wini talak wenepnusine! Winipsinyopura, anggunda ‘Se tenen, imun kanye bopnamlume. Ati, narye, ‘Awinin ning ara, na pia song ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenepnamsine. Tonda, anggunce malye-malye winin ninguk, weik talibuka winilamlum touk, anggun tamulina ati, yupu bokeipsinirye, weik tonun wenepnamsine.
Bukni, aning-aning min kum kipdeipnamle talak ara, Siria tam mutuku talipnamle Raja birye, el kanye aryuk tenipnamle touk, aninguk wipnin banamle. Tonda, el talima eren deice arye, maknya kintiniplirye, nyanamle. “Kume nara, pia deice tam ulinye unune. Ninye arye si erenyak ning, dewa-dewa ap, ninye arye, ‘Nun ni koproba ani’ tenen, si erenyak talye ning nirya ap, tonda aning-aning nirya, deice tam erebuka ululnye, Allah Yahweh ara, na amu tamuk ulule. Ninye arye, si erenyak ning nirya ara, mambul kume. Na uk ara, mambul weiknye unune. Na tonok ara, weik deiyoknye unune,” nyapnamle. Utenepdalirye, el siuk weik tonun erenamle. Tonda, elce Allah Yahweh ati, pia malye-malye yupu weik tonun nyanamle. Ura, amutuku deiyoknye, Raja Siria bira, elce aning winipnamla ara, Allah arye, ‘Anye winipnamle,’ akunum tenyamuk touk ati, aning winipnin balamlya ani, Allah arye, ‘Atalak akunum,’ tenyamuk touk, akunum uplyopura, Raja malye weik ulamuka ati ara, Allah arye anye el deice, ikin weik ning deipnamle. Adeice arye, Allah el yu tenyamuk ning ara, sirya daknamle. Allah arye, akunum tenyamuk ning nirya ara, dipkoprob nong upnamle!
Babel mutuku ninye deiyoknye, Darius birye, keting tamun tonok deice, Babel mutuku nirya taleamuk talak ara, na Daniel birye, Allah yupu moubuka, yinilamsirye kel bikse. Ara, Allah el si Yahweh arye, el yupu Yeremia, dam nyapdeibukba, nabi Yeremia birye sekamuk buku noutamak, moubuka yinilamsirye eipse. Ara, yu nang arye, Yerusalem mutuku ninye nirya obuka, sirya dakikce, amutuku aik nirya uluplobikba, aik olonguk daupra balamuka ani, Yerusalem mutuku ara, keting tamun tujuh puluh tahun (70) akunum uplyopura, aminyan talak Yerusalem mutuku aik, tamubuka teleb kibuka dopnamake. Aning nirya ara, Allah el yupu lak nyalamuknye, Yeremia biti lak nyalamukba, Yeremia arye, sekdeipsuk buku noutamak, yinilamsirye kel bikse.
Ati ara, na Allah arye lo arepniba, yu nang arye, sik malye-malye wininyak nang nirya ati, olyanganamake. Winipnirye ikin ara, sik anang deiceuk deipnamne. Tonok mutuku nang kum bukni, mutuku-mutuku weik, yuk-yuk bukni, sik nirya arye ansinibuka, sik Israel nang ati olbinamake. Tonda, sikti, wenepnamne deiyok ara, sikce malye winin ning weik wininyaka ati, pia weik tonun wenebuka opnamne.
Tonda, Allah Yahweh, elce anggunti, kanye deipsukce, teleb kipdeipsukba, anggunce deiplumba, dadeipdanin, yangalamunya ani, anggun mapu ara, pia weik, nukmanto kum ulamlume. Bukni, anggunce, Allah el nyabuk ning moubuka kum talipluma ati, anggun dam ikin ning arepsiliba, dopropnalume. Ara, ikin ning doropnamluma deice arye, anggun yala nang ara, mitik tonun upnin banamlume. Anggun yupa weik ulamunye ning ara, kum danamsile. Tonda, anggunce, ‘E amutuku wekibirye, talibuka teleb asa unamabeʼ tenen, binuka tia talak unamlum mutuku ara, Allah arye, tamubuka dopropnamsile. Amutuku noutam ara, weik kum unmamunye buk, tamubuka dopropnamsile.
Allah el si Yahweh arye, el mapu sik malye ning ati, yupu lipsisikuka, wenenamle bukni, sik mikip kum daliba, anang akunum kum danin bacopura, ila tuba tonap, bico tenepnamle. El mapu, yuk nang amu tam unyakce, talye piluk donyak nang babye, ura, sik bidamang kanye aryuk, pil donyak nang babye, kum dacopura, Allah eiplirye, bico tenepnamle. Bico teneplirye, el amu tam unyak nang, Israel ninye ati, tuba tonap, kanye namin upliba, bico teneplirye, lyepnamle.
ကြော်ငြာတွေ