Tonda, Allah Yahweh, elce Yerusalem mutuku ara, elce akunum nyapdeiamuk ara, “Yerusalem mutuku ara, na unamnak aulule. Tonda anyaik pum ara, ‘Naʼ tenen ninye arye, na si pia erenamniyak,” nyapdeiamuk bukni, Allah si eren aik dam, Raja Manasye birye, isa si erena ati, domba ato ning opnarye, dobuka uku dongonak, ton memepdeiamuk.
Yehezkiel 5:11 - Eipomek11 Ati ara, diba nara, anggun ni koproba Allah Yahweh, aning-aning nirya talibuka, deice tam erebuka, pia mikip weiknye unirye, ayupu ara nyapsine. Na dipkoprob pia kam unye touk, anyapnusin ning ara, dipkoprob upnamle. Dipkoprop wenepnamsila deiyok ara, ani. Anggunce na si eren aik pum tam, Pia Teleb Lek Aik ati, pia malye updeipnamlume. Anggunce, pia malye weik ning, talibuka winilulum ning ap, talye ning ati, ‘Nun ni koprobaʼ tenen, isa si erebuka moromunye ning ap deice arye, na si eren aik, akunum malye kilinamlume. Winimunya ati ara, narye anggun nirya ati, pia bico tenena kumce, wenebuka oplopnamsine. Tonda, narye anggunti, ‘Se, anggunda ‘Naʼ tenen, nang umunya anya arye, bico tenepsinirye, anggunti teleb kibuka melilamsise touk, tuba kum wininamsine. Aning kum bukni, oplopsinirye, kum kipdeipnamsine. အခန်းကိုကြည့်ပါ။ |
Yehezkiel 5:11
48 ပူးပေါင်းရင်းမြစ်များ
Asyera isa kil, el urasin atonun ubuka, dobuka kintinip deiamik ning ara, Allah si eren aik noutam deiamuk. Allah Yahweh arye, Raja Daud ap, el mi Salomo ap ati, sik deice nyapdeiamuk. “Amutuku noutam ara, Yerusalem mutuku ati, anyasik kota Yerusalem ap, amutuku noutam, na si eren aik dopnamlumak ara, na Allah Yahweh, na si asukum pia erenamniyake. Ura, Israel yala ninye unyakak ara, asik weik aupmal bukni, anyasik Yerusalemuk wipdeipne. Sik dua belas (12) nang, yala-yala yuk ukirye, sik unyak mutuku yuk-yuk aulamikca babye, ‘Yerusalem mutuku tonok ati, na si eren aik ara, asukum dopnamakʼ tenen, akunum wibuka akwamse,” Allah arye nyapdeiamuk.
Tonda, minop talak ara, yuk ninye deiyok nang arye, Yehuda tam taleamik nang Raja-Raja yuk nang, Allah el si erena ati, kam ning obuka arenak, pala keil yangabukabikce kintiniamik. Ton ning ara, ninye si Ahaz el alip aik dam bukni, kat aruma domik ning deice arye, pala keil yangapdeiamik. Aning ara, Raja Yosia birye uluplobuk. Ton ning ara, minop talak, Yehuda yala nang, sik ninye deiyoknye el si Manasye, kam ning obuka, Allah el arena ati, elce nyapdeibukba, pala keil yangabukabikce, bitinye deibikce kintiniamik. Apala keil yangapdeibik ning ara, Allah el si Yahweh, el si eren aik buru tam lilun deibik. Apala keil yangabukabikce kintinip deiamik ning bitinye ara, Raja Yosia birye, daklobukce, yamubuka pouplobuk. Winibuka atue buklobukopura, Kidron mekin donokuk.
Allah Yahweh arye, “Yerusalem mutuku weik asik noutam ara, na siuk pia erenamniaka ati, anyaik noutam ara, na si akunum deipsa ati, na si eren aik tuba aupnamle,” nyabuk. Winibuka nyapdeiamuk bukni, Manasye birye, amutuku taleamuk talak ara, Allah el si eren aik noutam ara, talye isa si erena ati, kam ning obuka, aning el si mesba ton dobuk.
Tonda, Manasye birye nyabukba, el pil don nang arye, ninye urasin atonun kipdeipnarye, si erelamik ning ara, el si patung, memebuka kintibikce arebikba, Manasye birye aning dobuka, Allah el si eren aik noutam deibukba, elce aning si erelamuk. Minop talak arye, Allah arye, Raja Daud ap, el mi Salomo ati, nyapdeiamuk. “Yerusalem weik aik dolamik ning noutam ara, akunum wipdeipse. Israel yala 12 nang arye unyak mutuku weik ton aupmal bukni, amutuku kan-kan noutam arye, akunum wipdeipse. Amutuku Yerusalem wipdeipse deiyok ara, ‘Israel nang, sikce amutuku noutam arye, na siuk pia erenamniakʼ tenen, wipdeipse. ‘Aning ara apia aupnamlarya,’ tenyamse.
Aninguk kum bukni, Allah Yahweh arye, “Anyaik ara, na Allah, na si eren aik ulule. Yerusalem mutuku noutam pia anunamla ati, anyaik ara, mambul weik ulule. Na ninguk ulule,” nyapdeiamukce, teleb yupu nyabuka deice arye, anyaik teleb kipdeibuk. Nyapdeiamuk bukni, sik Yehuda tam ulamik nang, sik imam-imam nang, sik deiyok-deiyok nanguk, amutuku noutam talye daulamik Yehuda yala nang nirya ap, sik nirya aryuk, Allah arye, ‘Wininamlume, aning ara kum wininamlume,’ nyapdeiamuk yupu yaniltaknauk ulamikce, Allah ati kum talebuka dobolbalamik. Tonda, sik Israel nang ulamik mutuku dana-dana tam ulamikce, Allah kum bikamik nang arye, pia malye weik ulamik ning ara, Israel nang arye, ‘Nun babye, aning talebuka unamabe,’ tenelamikce, malye ning pia weik ulamik. Ara, sik imam-imam nang arye, malye ulamik atouk, amutuku ulamik nang nirya babye, sik deiyok nang arye ulamik touk kibuka, talye isa siuk erebuka ulamik. Aning nirya winilamika deice arye, Allah Yahweh, el si eren aik malye kipdeiamik.
Allah arye sik anang ati, tuba bico kum tenelula ati, elce mikip weik kumanya areplyopura, akumanya mikip weik arye doplirye, anang ara, tomobuka donoknamle. Sik anang arye, ‘Se, mikip weik kumanya arye opsilyakʼ tenen, sik anang ara, ‘Adibaryuk yukak bikbik abuka bindopnuyapʼ tenen, ilil weik upliba, yuk ning ton tenina kumce, sik lyelana ati, bikbik abuka, yuk pera sukum bindopnamake.
Aning ati ara, na ni Allah ance, nunti wenepnamsilam bukni, nun ni Allah, an yu weik upkilye talak arye, nun deice weik kanye imun ning deibuka wenebuka ona kume. Dipkoprop, an yu upkilye talak arye, wenepsiminyeura, nunda adiparyuk, an dam arye, kum kipdopnamsile. Ati, ‘Mitik ikin ninguk, nun deice deibuka wenepsutumeʼ tenen, moropkine na nio.
Sik malye wininyak ning nirya ara, yu weik unulula ati, narye tamubuka, anggun amutuku nang ati, like bitinye deice arye wenepnirye, kwang daknamne. Deiyok ara ani. Ara, sikce talye isa ati, “Nun ni koproba,” nyabuka, si erenyak deice arye, na mutuku koproba nirya, akunum malye kipdeipnika ati, amutuku noutam ara, na dam yakirye, na si kum erepnitinge. Sikce, ‘Nun ni,’ nyabuka, isa si erenyak ning ara, talye ning, kam ton kum ulul ning ati, si erenyake. Narye, ‘Amutuku ara, pia talipnamne,’ tenyamse mutuku, na mutuku koproba noutam ara, sik isa si eren ning, weik tonun akunum delilamika deice arye, amutuku akunum malye kipdeibike. Sikce amalye wininyak ning ap, aisa mer nirya si erena ati, patung ning delilamik ning ara, ‘Na pia like, tenenune. Allah arye na Yeremia biti, nyapnuk.
Aninguk kum bukni, tonda, minop talak sikce na Allah ati, “Nun ni koproba Allah, el siuk erenamabe,” nyabuka, teleb weik aik ara, dolamikce, “Anyaik ara, Allah el aik pia unamle,” nyalamik. Bukni, sikce anyaik pum isa si eren ning dobuka deibikce, talye isa ati, si erelamika deice arye, na si eren aik akunum malye kibuka yanipnike. Ati, wini talak ara, anyaik pum tam ara, ninye yakirye, na si ton pia kum erepnitinge. ‘Aning ati ara, na pia lik weik,’ unulule.
Narye anggun Israel nang, anggun apu yapu ap, anggun wini talak ululum nang ati, ‘Se, malye winibiceba, wenepsinyakʼ tenen, narye tuba-tuba tenilamsisirye, na yupu laka nyana ap, aminyan winipnamle ning laka nyana ati, pil don nang, sik nabi-nabi nang dobuka delilbinamsiba, anang arye, anggun amalye ulamlum Israel yala nang ati, dopdeiamsiseba, na yupu laka nyalamik. Sik nabi nang deice nyalamsise ning ara, “Anango, Allah arye, ‘Apia malye ning nirya ara, kum wininamlume. Aning nirya ara, na pia lik ati, winina pia kume,’ tenesulula ati, anggunda amalye wininmaluma ara, adiparyuk bataknamlume,” nyabuka, nabi nang deice yupu deipneura, sikce nyalamsike.
Min talak dodarapce, Allah arye, ‘Malye winibikceba, narye sik wenena ati winipnamne,’ tenebuka kintinyamukce, “Anggun dam ati winipnamne,” nyabuka, laka nyalilamsuk ning ara, wini talak akunum winipsuk. Allah elce nunti, bico tenena kum aryuk, dakuka bataksukce, atu buklopsuke. Ara, Allah elce nun mal olan nang, sik deice mikip arebukba, yan obuka bisipsike. Allah elce nun mal olan nang ati, ‘Kanye teleb kipdeiplirye, lo arepnyeba, Israel nang obikirye, malye kipnamake,’ tenyamuk touk, elce mikip arebukba, nun mal olan nang arye, nun ulamupu mutuku nirya ara, dakuka atu buklopsikce, teleb kanye bobuka ukirye, dipdanuka karye onyake. Elce, sik mal olan nang deice, mikip weik areamukba, sikce nunti, obuka malye kipsikce, nyek-nyek nyabuka nalisikirye, kanye delinyake.
Tonda, bisik noutam butbuta deiceuk, wisi nang babye, wel nang babye, ninye banyak bisik noutamuk, sakuka poulbanyake. Aning atonun, wel nang ap, wel kilapu ap nirya ara, nun mal olan nang arye, ninye on ya arye obuka batakanyake. Allah ance nunti, yu upkuk sum yanmala ati, anda nunti ton, bico kum tenesilyame. Ance lo arepsulumba, nun mal olan nang arye, talye lubakibuka oltaknauk usinyake. Aning nirya ara, ance teneplum touk winiyake.
Anggun yuk-yuk pera mutuku noutam arye, boyasinirye, tamubuka asukumuk, akunum deipnyopura, anang nirya arye, Yerusalem mutuku nirya ara, tuba tamubuka, teleb kilinamake. Ara, amutuku dam akunum tamubuka yakceura, anggun atam ululum nang arye, ‘Nun ni ani’ tenen, talye ning talibuka, si erelulum isa ap, isa si erena ati, memebuka deiplum ning ap, sik aik ap, sik patung ap, pia malye yupu nyalulum ning ap, yu kanye bolulum ning ara, kum kilinamake. Ara, na Allah arye, ‘Aning nirya ara, na pia lik,’ tenenun ning nirya ara, atalak yanganyak nang arye, aning nirya obuka, sice buklopnamake. Sikce aning nirya ara, adiparyuk bataknamake.
Bukni, yata nang do nirya, sik anang arye tuba-tuba, ‘Nun ni ani’ tenen, talye ning talibuka, si erenyak isa ap, isa si erena ati, memebuka deilinyak ning ap, aning si eren aik ap, patung ap, pia malye yupu nyanyak ning ap, yu kanye teninyak ning ara, aning nirya, pia talibuka unamak nang ati ara, weik tonun wenepnamsine. Ara, anggunce pia malye weike winiluluma deice arye, kanye imun weik dobuka, anggun nong deice delinamsine. Winapnamne deice arye, sik malye wininyak nang ati, wenepnirye, sirya opnamnarya! Nara Allah Yahweh, aning-aning nirya talibuka, eitam erebuka, Pia Mikip Weik Deiyoknye ununa ati, aning nyapmasin touk, dipkoprob nong upnamlarya, nyapsine. Allah arye nyabukba, na Yeheskiel birye, kekepse.
Allah Yahweh aning-aning nirya, deice tam erebuka unirye, Pia Mikip Weik Deiyoknye birye, ayupu nyapne. Moubuka eipmince biklyame! Min talak ance, anang ap neika talye yolalamlum bukni, aminyan talak ara, sikti, ‘Na like,’ teneplumce, yu upkukba, anang bataklume. Bukni, narye an dobuka, anang sik deice deipnamkine.
Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsine. Ati, na nyapmasin touk, dipkoprob winipsinyeura, aning dipkoprob upnamlarya. Na tenyamse talak akunum kiplyeura, aning nirya winipnamnarya. Anggun malye umunye ning ara, narye kum lubakipnamsine. Tonda, anggun wenen noutam ara, ‘Se, daupmalye, aning ara, akunum bataknulume,’ pia kum nyapnamne. Tonok malye winilamlinye babye, kum bataktinye, anggun nirya wenepnamsine. Tonda kum lyepdopnamsine. Tonda, ‘Se, anggunti ara, bicoe,’ kum tenepnamsine. Anggun malye winilulum ning yala-yala nirya, awininamluma atonun, anggunti wenebuka opnamsine. Nara, Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsina ati, aning nirya dipkoprob nong upnamle. Allah arye, na Yeheskiel biti, nyapnuke.
Tukwak mutuku noutam, yuk-yuk mutuku nang arye, weik deiyok talibuka, mikip unamaka nirya ara, Mesir nang anggunda, mikip mitang nanguk kipdeipsiniba, amu tam atouk unamlume. Tonda, anggunce deiyok kibuka, yuk mutuku nang ati, kum malye kibuka talepnamlume. Aning atouk, anggun talima erebuka, maknya kintinipmunce, sik yuk nang ati, pia kum talinamlume. Ara mitik kipdeipsinyopura, yuk mutuku nang kum talibuka unamlume. Amu tamuk unamlume.
Nyapminyopura, an Yeheskiel birye, sikti, ayupu ton tabakuka nyapnalame. “Na Allah ara, dipkoprob pia kam unune. Aning ara, dip ulamle touk, adeice arye, adipkoprop yupu ton nyapsine. Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Sik malye wininyak nang ara, sik tuba malyeuk unyak talak aryuk, dekenyak nang ara, na kanye kum delinune. Kanye teleb unulul ning ara, ‘Sik malye unyak nang arye, sik malye winin ning ara, bataktingirye, tamubuka na dam yakirye, teleb aryuk ubikirye, kam unamakʼ tenen, kanye deibuka teninune. Ati ara, “Se, anggun Israel yala nango, anggun tuba malye winilulum ning ara, adiparyuk batakmunce, tamubuka na damuk yalulume! Yata ning deiyok ati, malye winipmunye deice aryuk, anggunda dipnamlum do?” nyabuka laka nyapnalame.
Tonda, minop talak ara, sik Israel yala nang, sik deiyok-deiyok nang arye, sik aik domikce, bisik bublan dana-dana tam, yo deibuka domik ning ap, abublan wekelban bisik yanina ak ap, na aik dam atonun domik. Winilamika ati, sik aik otam, na aik atam ara, tonok keil poka domik bukni, sik aik ara, pia mening dam ubuka ati, winilamika deice arye, na leknye si ati, pia malye kililamnike. Winilamnik ning nirya ara, narye, ‘Aning-aning nirya, pia na like. Aning nirya ara, pia na likʼ tenenun bukni, aning tenina kumce, talye mangkau asa, malye winin ning weik ulamik. Winilamika ati, sikti, yu weik upnukba, amutuku ulamik nang nirya obuka, sirya dakse.
Sik anang ara, malye winin ning, pia weik wininyaka deice arye, na si eren aik pia malye weik kililanyake. Na si erena ap, na si erebuka kina ap ati, sikce domba basam opnarye, abasam el meta ap, ining ap tuba arepnulum bukni, anggunce apia malye-malye weik ululuma deice arye, aning nirya, pia malye kililulume. Tonda, sik Israel yala nang arye, yuk yala nang, talye-talye daunyak nang ara, sik den bama mouse kum sekenyak bukni, sikce, ‘Kume, Allah el si eren aik dam talye mangkau asa wektume,’ nyaluluma deice arye, pia malye ululume. Aning atouk, anang ara, yuk mutuku ninye asik nang unyakce, narye, ‘Aning ara, wininamlume, aning ara, pia kum wininamlume,’ nyapdeiamsise yupu ati, diba kum tenebikirye, yanininyake. Tonda, na siuk kum ereninyaka ati, na dam pia kum yanmanto nang unyake. Sikda, den bama mouse kum sekikirye, sik kanye talima ap, sik nong nirya ara, malye tuba unyaka ati, na dam kum yatinge. Ati, sik Israel nang arye, na si erena ati, kam ning nirya obuka, ining ap, meta ap dobuka, nati arelyanganinyak talak ara, sik aninye asik nang ap ansinipmunce, na si eren aik dam kum yatume. Amalye ning weik winimunya deice arye, na si eren aik, pia malye kipdeipnuluma deice arye, na pia like unulule. Narye sik Israel nang ati, ‘Aninguk wininamlume, aning ara, pia kum wininamlume. Winipmunyopura, naryuk, winibuka kaliksinirye, pia melinamsine,’ nyabuka, nyalin yupu deice arye nyapdeiamsise ning nirya ara, anggunce akunum yaniltanauk ululume.
Ati ara, na Allah Yahweh, aning-aning nirya talibuka deice tam erebuka, pia mikip weik ununye birye nyapsine. Se, anggun Yerusalem mutuku ululum ninyeo, moubuka kekepnululume! Anggun anang nirya ara narye, ‘Aning ara, wininamlume. Aning ara, pia kum wininamlume. Teleb una ara ani, malye una ara, ani,’ nyapdeipse yupu nirya ara, moubuka kum tenelulumce, kum talilulume. Aning nirya ara, yaniltanauk ululume. Tonda, aninguk kum bukni, sik dana-dana tam yuk-yuk mutuku nang arye antanap dongopsikirye, anggunce, ‘Teleb un ning ara, ani,’ nyabuka nyalamsiyak yupu babye, anggunce aning talibuka, pia kum ululume. Sik amutuku-amutuku noutam unyak nang arye, mitik tonun malye unyak bukni, anggun Yerusalem mutuku ululum nang ara, pia weik tonun arye, malye un ning weik talibuka ululume.
Israel yala nang ara, sikce memebuka deiamikce, talilamik urasin pia teleb kwerya ara, cicin do, gelang do, permata do, aning nirya ati, sikce, ‘Se, aning nirya ara, urasin pia teleb ning ululule,’ tenelamik. Tonda, ato ning boyanuka, talye ning bukni, sikce, ‘Nun ni bira aniʼ tenen, isa si erena ati, urasin teleb ning ton, memebuka delilamik. Winilamik bukni, na Allah arye, ‘Aning ap, aning dobuka malye ning, sikce puturubuka delinyak ning nirya ap ara, na pia like,’ tenenune. Ati ara, na Allah arye, aning sik talinyak urasin teleb ning emas ap, perak ap ati, ‘Aning nirya ara, na pia like,’ tenenune. Aning talinyaka ara, na dam ton boyakirye, nati telebe nyabuka, na si kum ereninyak diparyuk, nati ton kanye kum delininyake.
Dipkoprop anggun Israel yala nang nirya ati, narye, ‘Pia bico, anang ara, ikin ning sik nong deice kum deipnamne,’ kum tenepnamsine. Tonda, ‘Daupmalyeʼ tenen, anggunti pia kum bataknamsine. Ati, narye dipkoprob, anggun malye winilamunya atonun, tamulina ara, aning atonun wenebuka opnamasine. Tonda, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamasine. Winibuka wenepsinya deice arye, anggun kanye aryuk, ‘Se, Allah Yahweh ara, aning-aning nirya talibuka, el deice tam ulirye, dipkoprob Pia Mikip Weiknye ululeʼ tenen, bikinamlume.
Dipkoprop sik Israel yala nang nirya ati, narye, ‘Pia bico kum tenepnamne. Anang ara, pia ikin ning, sik nong deice kum deipnamneʼ tenen, kanye kum tenepnamsine. Tonda, kanye talima kum arepnamsina ati, ‘Sik daupmalyeʼ tenen, anggun malye winilulum ning ati, dipkoprob kum bataknamsine. Aning kum bukni, narye dipkoprob, anggun malye winilamlum ning, akunum eibuka kel bikamsisa ati, awinilamluma atonun, dekna dolona atonun wenebuka opnamasine. Tonda, narye, ‘Awinin ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamsine. Winibuka wenepsinya deice arye, anggun damnye, ‘Se, Allah Yahweh ara, elcuk nun wenena ati, akanye imun ning, akunum arepmasileʼ tenen, bikinamnulume.
Eipsiba, Allah Yahweh arye, nati asipdenuke. “Se anda ninye koprop arye deipkiknye, anda aning ara, moubuka eilinmalam do?” Aning akunum eipmalam ning ara, dipkoprob malye upmal bukni, aminyan talak ara, pia weik tonun malye unyak ning, ton ap eipnamalame. Aning babye, pia na like,” Allah arye, na Yehezkiel biti nyapnuke.
Nyapnukce, adiparyuk Allah arye, na boyanuka, Allah Yahweh el si eren aik domik ning, lilun dam bobinuke. Ara, anyaik dam wekelban bisik bublan, botopdeiamika dam bobinuka ara, ani. Ara, Allah el si erena ati, kam ning opnarye, uku dongona ati, kintinip deiamik ning, el si mesba, otam upmokba eipse, atalak ara, anyaik kup-kupak unmek nang ton eipse. Asukum ara, ninye yupa ara, pia weik, dua puluh lima (25) nang unmekba, eipse. Sik aunmek nang ara, Allah el si eren aik, Pia Teleb Lek Aik, sik donga tam unmokba, sikce asukum wekmekce, keting panalyangan tam, urasin deibuka, sik kutam tuku dipdongobuka, keting panalyangan tam unmekce, si erebuka kinmekce, keting si erenmekak, eipse.
Wininyaka ati ara, nara, na yu weik tuba unilya ati, sik nong deice, ikin weik ning deipnamne. Tonda, narye sik anang ati, ‘Se sikda bicoe, ‘Naʼ tenen, nang unyaka ati, sik malye wininyaka ara dauaplye’ tenen, talye kanye bobuka, namin kipnamane, kum nyapnamne. Tonda, narye sik anang ati, kum namin kipnamne. Sikti, weik tonun wenepnamne. Tonok nang babye, kum bataknamne, sik nirya ati, pia ikin weik ning, sik deice deipnirye, wenepnamne. Wenebuka opnyopura, sik Israel nang arye, yupu weik tonun, nati moronmaniyak talak ara, mikip arye yukubuka, engenamaka babye, dipkoprob na pia kum kekepnamne! Allah arye, na Yeheskiel biti, nyapnukba, kekepse.
Anang arye, nyanyaka ati ara, na Allah arye, sik anang nirya ati, eipnyopura, sikti bico pia kum tenepnamne. Kume, sik Israel nang nirya ara, yuk nang ati, pia malye-malye weik wininyak touk, narye sik anang ati, sik malye unyak ning ara, sik nong deice deipnamne. Winibuka pia wenebuka opnamne” Allah arye, na Yeheskiel biti, lengdar mapsa deice arye nyapnuke.
Nyanmokba, na Yeheskil birye, kekenmasiba, Allah arye, sik yuk-yuk nang, sik Yerusalem kalikina ati yanmek yin nang nirya ati, ayupu ton nyabuk. Ara, “Aseken ning lipmalinye bira, Yerusalem weik asik noutam eipnuminye talak ara, sikda eluk melibuka, amutuku noutam nirya bobimunce, Yerusalem mutuku weik asik noutam unyak nang nirya ara, moubuka dipdemunce, anye birye, sik urasin deice lak kina ati, seken ning kum sekmalye nang ara, adiparyuk oplopnulyame. Tonda, anang nirya ati ara, sikce ‘Se, anang ara, pia bicoe ati, kum opnuyabe’ tenen, kum bataknamlume. Amutuku unyak nang nirya ara, opnamalyame.
Allah Yahweh arye Musa biti, ayupu nirya nyapdeibukopura, “Anyadeippne ning ara, ance Israel nang nirya ati, nyapminyeura, kekebikirye, moubuka ukirye, ato malye winin ning ara, dan talak uptu do, kum do, aning winiplye talak ara, na Allah Yahweh, na aik pum tam, pia kum yanganamake. Malye ning aupmalye touk, sik mangkau arye, na aik dam yakcopura, adiparyuk narye sikti, wenebuka opnamne. Ati, ‘Winipnamsilyakʼ tenen, sik malye kum wininamniake. Na si eren aik ara, sik unamaka kan-kan noutamuk unamle bukni, sik ap, malye ning ap, auplyopura, na si eren aik dam yangana pia meme. Ara, sik Israel nang arye, malye ning aupmalye talak ara, na aik koproba yanuka wekmunyeura, na si eren aik babye, malye kiplyake. Winibikcopura, anang nirya dipnauk unamake.
Nyabukce, ayupu ton dukdongobuka nyabuk. “Amalye ning nirya, tuba winiluluma ati, nara Allah Yahweh, Israel ninye arye, na si erenyak Allah, na si deice arye dipkoprob nyapsine. Sik malye unyak ninye arye, wininyak ning ara, dipkoprob kum luba kipnamne. Aning ara, luba kipnirye, kum bataknamne. Pia tuba tenenamne.
Narye, ‘Anda sik domba basam weina deiyoknye atonun upnamlame,’ nyapmakina deiyok ara, ani. Narye amutuku, Yudea noutam unyak nang nirya ati, na bico tenen ning ton pia kum deipnamne. Na babye amutuku unyak nang, sik talima noutam, ‘Nun dam unyak nang ara, nun like,’ tenelana deiyok ning arepniba, sik nirya arye, ‘Anang ara, nun like,’ tenelanamake. Tonye birye, el dam ululnye biti, olana ap, walana apuk unamnyake. Winibibcopura, narye arepniba, sik tam talibuka unyaka deiyok nang arye, amutuku nang nirya ati, ikin ning deipnamake. Sik amu tamuk ukirye, imun kanye bobuka unamake. Winipnyopura, sik amutuku deiyok-deiyok nang malye upnamaka deice arye, sik mutuku nirya, malye dem kipdeibikirye, amutuku ning nirya, sikce malye kibuka bataknamake. Amutuku nirya malye kibuka sice buklopnamake. Winipnamak bukni, na Allah arye, amutuku nang nirya ati, bico tenepnirye, lobuka kum lyepnamsine. Sik ti ‘Lik,’ tenenuna ati, batakana uk unamne.
Winibikopura, Allah Yahweh aning nirya talibuka, im deice yin talin malaikat nirya, sik weik deiyoknye birye eibukce, ayupu nyabuk. “Sikce na si tuba ereninyak ninye nirya ara, na mapu koproba, ‘Naʼ tenen, ninye unamake. Tonda, na tenepse sum akunum uplyopura, ninye nirya ati, yupu lipsisikuka bokeipnirye, wenepnamne. Atalak ara, sik aninye ara, na mapu koproba, na kanye delin ninye unamake. Ara, narye sikti, tuba bico tenenamne. Winipmanto ara, el mapu deiamlinye bira, tonok mi arye, ‘Na ni koproba’ tenen, el nyapmalye yupu kekebuka melilamlye mi ara, el li birye, ‘Na mi koproba,’ tenebuka melilamle touk, nati tuba diba tenenyak ninye ati, atonun tenebuka wininamsine. Ara, nati diba tenebuka, na si ereninyak ninye ati bico tenen, lyepropnamne. Sik wenebuka kum oplopnamne.
Bukni, na kayapo, anyapnusin yupu moubuka teneipdelulume. Sik Israel ninye arye, Allah yupu kum kekelamika deice arye, lo ubukba, Allah arye arisilye teleb ning ara, yuk yala ninye, mutuku-mutuku nirya dolonyake. Allah arye sik Israel ninye ati, kintinyamuk lyena ning bisik ati, ‘Nun like’ tenen, yaniltalamika deice arye malye ulamik. Malye winilamika deice arye, sik lyena talak lo kum uamuk. Aning ati ara, wini talak ara sik buru tam ninye, Israel yala kum ninye, pia mambul ning, ninye lyena deiyok ning dolonyake. Ati, Israel ninye malye winilamika deice arye lo ubukba, yuk yala ninye ati, pia teleb ning yanmala ati ara, Allah tenyamuk touk, aminyan talak sik Israel yala ninye weika arye diba tenebikirye, lyena ning doprobicopura, aminyan talak pia teleb ning weika arye yanuka unamsile.
Ati, “Ilil asa arye unamlulume,” nyapmasina deiyok ara, talye ati kum nyapsine. Ara luba kina meme. Yo kouamica deiyoknye Allah arye, el minyuma wiamuk yo ati, ‘Na,’ tenyamuk bukni, akunum kolubukce, malye ubuka ati, seklobuk. Winibuka seklobuk bukni, aseklobuk yo ati, ‘Talya namin kipnamne,’ kum tenebuk. Ayo taruk seklobuk. Ati, anggun aminyan dukdongobuk yo taruk atonun ninye ara, anggun babye ton malyeuk winipmunyopura, Allah arye Israel ninye malye ulamikba, bataklamuk touk, anggun wini talak umunce dib tenelulum ninye arye malyeuk winipmunyopura, dipkoprop Allah arye bataknamsile. Anggunce, ‘Malye winibibya babye, talye namin kipnamsile,’ kum tenenamlulume.
Anggun ton teneipdelulume. Allah ara, el Mi Kopropa tonokuk ulul bukni, ‘Na mi ara tonoknye anya arye, na tenen kum arepnune,’ tenena kumce, nun lyena ati, arepsuk. Ati, el mi kopropa dobuka, nun lyena ati akunum arepsuka anya arye, yatato ning do nirya, nun patasulu ning nirya bico tenesilirye, el kanye deibukap, talya demuk kum arenamsil do? Kume, nun patasilye ning nirya ara urdem arenamsile.
Anyalin yupu akunum kekepmalya babye, yata nang arye do, malye un ning winiplinye bira, Allah arye, ‘Anye bira, namin kiplirye, teleb kipdeipnune,’ pia kum tenenamle. Bukni, atouk winiplinye bira, Allah yu weik uplyeura, ikin ning tamubuka, el nong deice delinamle. Ara, “Anggunce, malye winipmunye nang ara, aikin weik ning, anggun dam yanganamsile,” nyapdeipsiba, abuku noutam sekeibik touk, ubuka yasiliba, donamlume. Adeice arye, amalye winin nang nirya ara, Allah arye sik malye winin nang ati, namin kina kumce, obuka sirya daknamle.
Ura, yuk yupu ton nyapnusine. Allah arye, nun apu kopropa Abraham biti, “Winipnamkine,” nyabuka, yupu nyalilamuk talak ara, ‘Abraham birye diba tenepnunil’ tenen, Allah arye el bidamang si ap, tabakuka nyabuk. El si nyabuka ara, elda aning-aning deice tam, weik mambulnye ulula anya arye, yuk si tabakuka kum nyapmanto. Weik ning ara, el si koprop uka. Allah arye nyabuk.
ကြော်ငြာတွေ