Yehezkiel 5:10 - Eipomek10 Apia kanye imun weik ning, akunum arepsinyopura, ikin weik unamsila ati, anggunce obuka dinamlum ning ara, anggun aumunye nang kan-kan arye, anggun wisi nang arye, anggun bidamnye delilamunye mapu, obuka dinamlume. Aning atonun, anggun kan-kan arye, yuk mapu arye, sik ni yapu koproba bukni, obikirye, dinamake. Aning atonun, anggun Yerusalem mutuku ululum nang nirya ara, wenebuka kanye imun weik ning dobuka, anggun deice deipsinyopura, ninye weik dipnamak bukni, sik tuba batakniba, mitik tonun tuba kam unamak nang ara, yukak yakuka dopkweteptiniba, yuk mutuku im sirya, mutuku sirya nirya, binuka unamake.” Kumanya dana-dana tam arye dolamle touk, anggun babye dana-dana tam mutuku noutam bikbik abuka binuka unamlume. အခန်းကိုကြည့်ပါ။ |
Yehezkiel 5:10
36 ပူးပေါင်းရင်းမြစ်များ
Narye anggun Israel ninye obuka yanilongolamsik nang ati, opnyopura, sik mining mamun arye sik mining mamun uk obuka dilanamake. Winipmanto ara, obuka dilanmakirye, sik mining ininguk obuka dilakiba, kanye walwal kinamle. Narye winipnyopura, ninye mutuku-mutuku nirya ara, kel biknamake. Ara, ‘Allah Yahweh arye sik Israel ninye, Lyena Deiyoknye bira, el aulule’ tenen, kel kipnamniake. Tonda, Israel ninye sik malye wininyak ning ati, Allah arye wenebuka oploptu bukni, ‘Sik pununa ati, aninye akunum dekuka lyepsuke’ tenen, kel kipnamake. Nara, aning-aning talibuka deice tam Pia Mikip Weik Allah unirye, Israel ninye ati, pia kalikuka melinunye, Pia Telebnye unune. Winipniba, Israel yala ninye arye na si ereninyake. Na Allah unune. Israel ninye sik malye wininyak ning nirya kum Kilina Deiyoknye bira na aunune. Ninye mutuku-mutuku nirya aning kel kipnamaka ati nyapsine. Allah arye nyabuk.
Atalak ara, kwaning weik patan li kibuka ati, tonok asik nang arye, sik sirik tam unyak nang ati, obinuka obikce, sik din ning alubuka doprobikopura, dibuka sirya dakdobik. Bukni, kum boubukba, tuba kwaning patanuk ulamuk. Ati, sik sirik tam neika ulamik nang ati, obinuka obikce, sik din ning babye, alubuka doprobikopura, dibuka sirya dakdobik. Bukni, aning dibika babye, kum boubuka ati, tuba kwaning patanuk ulamuk. Pia kwaning patana weik ulamuka ati, sikcuk deiamik mapu ap, sik tam nang ap nirya ara, obikce, sik nong babye dipdobik.
Ati ara, na Allah arye tonoknye dopropnirye, tonye deice dobuka donoknyeba, pia malye kibuka opnamle. Tonda, sik wisi nang ap, mapu ap nirya ara, dopropnirye, sik deice donoknamne. Na Allah arye sikti, bico tenepnirye, kum bataknamne. Narye anggunti, bico kum tenepnamsine. Pia kum kipdeipnamsine. Ayupu ara, na Allah arye, akunum nyapdeipne.
Tonda, sik oldan ninye arye, ‘Amutuku unyak ninye nirya, obuka sirya daktibye’ tenen, mikip arye yanuka, warekinamake. Yanuka wariknamak ning ara, pia weik kanye imun kipnamsila anya arye, anggun amutuku noutamuk unamlume. Anggun wa wina ap, lina ap, din ning elbana ap, mek kwelbana ap ara, pia kum winipmanto upsilye talak ara, dina pia patanauk usilibuk, ‘Se, yata wiriptibye do?’ tenen, amutuku unamlum ninye nirya ara, kanye imun ning, pia weik upsiliba, ninye arye sik mining mapu obuka dipnamake. Tonda, wisi nang arye, sik kayapu nang ap, sik aik mining dam unyak nang ap, obikirye, aninye sik mining nonguk, kalibuka dinamake. Ara, sik mal olan ninye arye, weik kanye imun weik ning, sik nong deice deibice talak ara, ikin pia weik unamsila ati, weik malye ninguk, pia weik arye wininamlume. Na Allah arye, dipkoprob nyapmasin touk, nong upnamle. Allah arye na Yeremia biti, “Ayupu nyalbinulyame,” nyapdeipnuke.
Tonda, Babel mutuku nang arye kum omikba, anggun Yehuda yala nang, tuba mitik tonun unmamunye nang arye, ‘Mesir mutuku uk, bibirye, unamapʼ’ tenen, binamak nang nirya ara, Mesir mutuku noutamuk dipnamake. Ara, sisin nang babye, sisina kum nang babye, sik nirya ara, Mesir mutuku aryuk dipnamake. Ara, mal olan deice ap, din ton kum daliba, din patan deice arye, sik anang nirya ara, dipnamake. Sik anang dibikiba, yuk nang arye aning eibikirye, “Se, anang winibuk touk, winipsilyake!” nyabuka, ilil unamle. Tonda, ton nang arye, yuk nang ati ara, “Allah arye, anang subuka atonun, sik babye suptue,” nyabuka, yuk nang ati, malye yupu nyanamake.
Winibuka unyaka ati, sik anang arye talibuka weinyak kam ning, aning-aning nirya ap, unta basam ap, sapi basam ap, yuk ning nirya ap, alubuka dopropnamlume! Tonda, anang ap, tonda amutuku noutam, sik potong ara bumang arye kobik nang nirya ara, narye yuk mutuku dana-dana yakuka dopkwetepnirye, ikin ning weik arepnamne. Ara, na Allah aryuk, kanye imun weik ning dobuka, sik anang deice deipnamna ara, sik unyakak bukni, dana-dana tam nirya arye, yuk-yuk yala nang nirya babye, ikin ning ara dobuka, sik deice deipnamake.
Winipnamne talak ara, na Allah arye, ‘Elam mutuku noutam unyak nang nirya, yakuka dopkwetepniba, dana-dana tam nirya, bikbik abuka bikiba, kum danamakʼ tenen, narye im deice ulye mikip weik kumanya dobuka, dana-dana tam nirya ara, dopkwetepnamne. Ara, narye winipniba, Elam mutuku dana-dana tam arye, yuk mutuku yu nang arye, yanuka opnamake. Winibikcopura, Elam mutuku noutam unyak nang nirya ara, ilil upliba, dana-dana mutuku nirya, bikbik abuka bindopnamake. Winipnyopura, sik mutuku batakikirye, amutuku dana-dana ulye mutuku nirya ara, sik amutuku binuka unamake. Tonok mutuku babye, ‘Amutuku binuka kum unamabeʼ tenen, kum luba kipnamake.
Allah arye nyabuk. Winipmanto ara, anggun Israel nang nirya ara, domba basam ding tonok ulamik bukni, bai tam ulamle yu kam, el si singa arye, doplamukba, dabinuka wangapdanamik touk, ulamika ani, wini talak ara, yuk-yuk mutuku bindomika ati, yuk-yuk mutuku noutam arye daunyake. Aning atonun, min talak ara, Asyur mutuku taleamuk ninye deiyoknye Raja arye, minop deiyok kibuka, Israel nang dam yanuka, obukce dobolbinamuk. Winilamuka ani, dotalak ara, Babel mutuku taleamuka deiyoknye, Raja Nebukadnesar bira, elce aminyan talak, Israel nang nirya omukce, taleamuk. Winipmanto ara, Nebukadnesar bira, yu singa arye, yuk kam ning oplirye, tup diplyopura, aminyan talak aning yok nirya ara, si tolamle touk, ulamuk.
Dipkoprob anggun Israel nang ati, wenepnamsina ara, ani. Narye sik amutuku unyak nang ara, dobukapnirye, sik apu yapu nang babye, pia kum bikamik mutuku nang, yuk pera mutuku nang deice deipnamne. Ara, narye yuk pera mutuku nang ati, lo arepnyopura, anang arye, sik Israel nang dam yanuka obikirye, dobuka tapu koubikirye, sik yuk pera mutuku tamubuka bobinamake. Tonda, mal olan talak arye, ‘Se, nun nirya obuka, sice buklopnamsiak’ tenen, ilil weik upliba, bai sakuka bindobikirye, bokdanuka mutuku yuk-yuk balona ati, bikbik abuka banamake. Bukni, narye yin talin nang ton, tuba dobuka deipniba, Israel nang yuk pera mutuku dabinamak nang nirya ara, ninye on parang ya arye, obuka sirya daknamake. Ara, yin nang dopdeipniba, yanuka opnamaka ara, sik asa arye kum wininamake. Ara, Israel nang, sik wenena ati, na Allah arye mikip weik arepniba, adeice yuk mutuku yin talen nang arye, yanuka obuka sirya daknamake. Allah arye nyabuk.
Se, nun ni Allah, ance aning-aning nirya talimince, pia mikip weiknye ulyama ati, nun dam ikin ning deipsulamak, doprobupurye, ikin kanye bobuka unyap ning ara, an eipmince tenipdenalame. Yuk mutuku nang ati ara, aikin atonun ning ton, sik nong deice deiamlum do? Nun deice deipsulum ning ara, weik ikin ning ulul do? Na nio, ebuka tenipdenamlyame. Sik mapu deiamik kilapu arye, sik mining mapu obuka dinyake. Aning ara, pia kum winiptinge! Tonda, imam nang ap, nabi nang ap ara, Allah an si erenak, anyaik pum tam, pia lek aik noutam aryuk, yu nang arye yanuka, obuka batakanyaka ara, teleb do na nie? Na kanye ara, aning kum winipmanto ning tenepne. Na nio, aning weik ikin ning arepsulum ning ara, An min arye ton winilamlum ning winiplum do? kume tenepne.
Allah el mapu, sik deice yayukba doprobik ikin ning ara, pia kanye ikin ning ubukura, adeice arye, sik mapu delilamik kilapu ara, ninye kum winipmanto ning, pia malye ning wininyake. Ara, yu weik nang arye, Allah el ‘Naʼ tenen nang ati obikirye, anang nirya, sirya dakanamak talak ara, Israel nang nirya, sik din ning, pia kum ubuka ati, pia kanye imun uplyeba, sik Israel kilapu ara, kanye namin kilapu ulamik bukni, sik mining mapu uk, obikirye, yubuka dinyake.
Ara talye ati kume. Deiyok ara, Allah Yahweh elcuk, imam nang ap, nabi nang ap, yakdonokukba, sikda yuk-yuk mutuku noutam banauk ulamik. Allah arye anang nirya ati, tuba kum talinamle. Tonda, sik malye weik ulamik imam pil don nang ap, Allah yupu laka nyalamik nabi nang ap, amutuku talibuka yupu nyalamik nang ap, minop talak ninye deiyok kibuka ulamik bukni, Allah arye anang wenebuk talak arye, dipdongobuka dotalak nirya ara, yuk nang arye sikti, ‘Anggunda nun lik,’ tenelamikce, “Anggunda nun deiyok nang ati, telebe,” nyabuka, kum kilamikce, anang ati, si erebuka ton kum kilamik.
Bai tam ulamlye kil kam arye, el mapu ati bico tenelamlirye, moubuka moum arelule. Bukni, Allah el mapu, Israel nang ati ara, tukwak mutuku ulamle sanip maka ara, yu weik ulamlirye, el maka duk talye batakuka balamle touk, wini talak ara, Allah el mapu koproba Israel nang babye, yu kanye bobuka, sik mapu ati pia malyeuk unyake.
Tonda, wini talak ara, na Allah arye, el taleamuk mutuku noutam ulamik nang ap, el melilamik deiyok-deiyok nang ap, el yin talin nang nirya ara, sik wenena ati, yakuka dopkweteptinyeura, mutuku sirya, im sirya, yuk-yuk mutuku noutam dabindopnamake. Bukni, narye lo arepyeba, yuk mutuku yu nang arye, sik deiyoknye Raja, amu tam pil dobuka melilamik nang nirya ati, dobolbanauk ulamikca ani, adiparyuk anang nirya, yu parang ya arye, obuka sirya daknamake. Aning nirya ara, na Allah arye!
Anye wenebuka opnamne talak ara, narye lo arepyeba, sik Babel mutuku yin talin nang arye, el dam yakirye, el yin talin pia teleb nang babye, yu parang ya arye, opnamake. Ninye weik tam nang ara, opmakcebuk, tuba kam unamak nang ara, bai sakuka bendobikirye, im sirya, mutuku sirya ara, yuk-yukak bindopnamake. Aning nirya akunum winiplyeura, anggun nirya arye, nati biknamnululume. Ara, ‘E diba, nun ni koproba Allah, aning-aning talibuka, deice tam erebuka, pia mikip weiknye birye, ‘Winipnamneʼ',’ nyapsuk touk, akunum upmal atia,’ tenepmunce, moubuka biknamnulume. Ayupu ara, akunum nyapdeipsine.
Anang obuka, kum sirya dakse bukni, sik amutuku noutam ara, padang pasir mutuku tuba unmek talak arye, sikti, nyapse. Dipkoprob, na si deice arye, nyalin yupu arye nyapse. Ara, “Kume, anggun atalak ululum nang nirya ara, yakuka dopkwetepniba, mutuku sirya, im sirya nirya, dana-dana tam unyak nang noutam arye binuka, daunamlume. Yuk-yuk pera mutuku nang ap, neika unamlume. Narye dopkwetepsinyopura, anggunda dana-dana tam mutuku noutamuk, binuka unamlume. Tonok sukum neika kum unamlume,” nyapdeipse
Narye, Yerusalem mutuku ululum nang ara, yakuka donoksinyeba, yuk mutuku nang unyakak binuka unamlume. Tonda, narye wenepnamsin deice arye, yuk mutuku tam noutam ara, dana-dana tam nang unyakak noutam arye, dabinuka unamlume. Winipnamsina deice arye, narye anggun malye winimunye ning nirya, mitik-mitika arye, kum kipdeipnamsine.
Narye sik anang obuka, wenelamse ning deiyok ara ani. Sik babye malye pil dolamik ning ati, malye weik ulamik touk, ikin ning weik, sik nong deice delilamse. Ati, lo areamseba, yuk mutuku ninye arye, Israel ninye yanuka olyangalamik. Tonda, Israel ninye ati malye kilamikce, sik nirya tapu koubuka, sik mutuku koproba bobinamikba, sikda amutuku noutamak daulamikce, pera mutuku noutam yuk-yuk ulamik. Sik nirya yuk-yuk mutuku noutam bobinamikba, ninye asik nang atonun, binuka ulamik.
Narye anggunti, kanye imun weik ning arepsinyopura, anggunce talibuka ululum mutuku nang bokuka, winilye uplyopura, ton ning sepertiga ton, kanye imun weik uk yalanye yalirye, anggunti talibuka dinmasilya ani, ninye weik toun arye dipnamlume. Tonda, aning atonun, kanye imun weik din patana ton, anggun Yerusalem mutuku noutam yaliba, din kum daliba, din ning ton dina kumce, talye daunamluma deice arye, anggun kan-kan ara, ninye pia weik ton ap dipnamake. Aning atonun ton, anggun aumunye nang noutam bukni, sepertiga nang ton, sik mutuku batakuka, cang weik keil poka domlum ning, bai tam unamlum nang ara, sik yu yin talin nang arye, yu weik parang ya dobuka yakirye, anggunak sekuka oplopnamsiyake. Tonda, aning atonun, anggun amutuku ululum nang kan-kan arye bokuka, sepertiga nang ara, ‘Ninye arye opsikcakʼ tenen, Yerusalem mutuku batakuka, bai sakuka, dana-dana tam bikbik abuka binamak nang babye, sik mal olan nang arye, ‘Anang opnamakʼ tenen, bikbik abuka dobolbikirye, sik dam yanuka, yu parang ya arye, sekuka opnamake. Ara, kumanya dana-dana tam arye dolamle touk, narye sik wenena ati, mutuku sirya, dana-dana tam nirya ara, yakuka dopkwetepnamsin bukni, anggun mal olan nang arye, adopkwetepnamne nang nirya ati, yu parang ya boyanuka dobolbikirye, anggun Israel nang weik tonun opnamsiyake.
Winipmince, daulaminya ani, ‘Asum-asum ulye touk bukni, keting tamun 390 deice arye, Israel nang pera mutuku noutam arye, ikin unamak ning, tenebuka biknamakʼ tenen, anda like 390 sum deice arye, an kwanim tam taruk tuku deice mapdeipmaminya ani, atalak akunum uplyopura, winipnamlyame. An kisok potong, minop talak sekaminye ning bokuka, winilye bokdeipnamlam ning noutam bukni, tonok ning sepertiga ton dopropnulyame. Apotong dobuka, batu bata keil deice kintininyamlum gambar, Yerusalem mutuku gambar noutam deipmince, uku sekuka dongopnulyame. Winipminyopura, an potong sekamlum ning ara, sepertiga ton, Yerusalem mutuku gambar kintiniyamlum ning ara, dana-dana tam antanap dongobuka deipnulyame. An kisok potong sepertiga akunum deipminyopura, an parang ya dobuka, apotong deice akunum winipminyopura, lak kilina ati winipnalam bukni, el nong deiyok ara, ani. Ara, narye lo arepkiniba, Yerusalem mutuku nang, sik olan talak yin talin nang yakirye, parang ya arye opnamake. Tonda, an kisok potong min arye kopmaminye ning ara, sepertiga ton sirik ning ara, kum doplirye yamubuka dopkwetepminba, kum arye bobinamle. Winipnamlam ning ara, lak kilina ati ‘Wininalam bukni, aning el deiyok ara, ani. Ara, Israel nang arye, ‘Nun mal olan nang arye opsikirye, sirya daknamsiyakʼ tenen, bikbik abuka yukak binamaka babye, narye lo arepniba, sik mal olan nang arye, tuba olyanganamake. Sik Israel nang, pia weik tonun opnamake.
Ura, Na dipkoprob nyapsine na ap, narye sik dopdeipnamne yin talin nang ap arye, sik Israel yala nang, weik tonun opnamak bukni, sik kan-kan noutam bukni, mitik tonun ara, kum opnamake. Deiyok ara, narye anggun mutuku koprop noutam arye dobuka yakwetepsinirye, weik tam ara opnamne bukni, mitik tam nang ara, bai sakuka bindobikirye, dana-dana tam unyak mutuku nang, kan-kan binuka daunamake. Ton tam nang ara, sik pera mutuku yin nang arye, tomobikirye, sik mutuku bobikirye, pia ikin pil dinamake.
Ati, na ni Allah, aning-aning nirya talebuka, pia deice tam erebuka, Pia Mikip Weik Deiyoknye ulyame. Anda dipkopropnye, pia diksukumuk umince, nun dam teleb ninguk ubuka, diksukum piluk dosilyame. Bukni, nunce nun bidamang ati, malye winipdeipdabiba, pia malye weik unyaba ati ara, alye dakalanyabe. Ara, nun nirya, Yehuda yala ninye ap, Yerusalem mutuku noutamak unyap ninye ap, Israel ninye nirya ap, alye dakalaninto unyabe. Tonda, nun yala nang arye, an dam malye weik winilamububa, ance nun yala bokeiplumba, yuk pera mutuku daunyak ninye ap, dam mutuku unyap ninye ap nirya ara, malye wininyap ning ati, alye dakaninto unyabe.
Aninguk kum bukni, anggun Israel nang arye, nati, ‘Elda nun like ati, elce nyapdeipsuk yupu ara, kum kekebuka talinamabe,’ teneplumce, na yupu tuba yaniplopnumunyopura, na Allah arye, anggun unamlum mutuku nirya ara, olana deiyok ning arepnyeba, yuk mutuku yu weik yin talen nang arye, sik parang ya ap, olan ning nirya ap bobikirye, anggun dam yanuka, obuka sirya daknamsiake. Obuka sirya daksikirye, anggun nirya tapu koupsikirye, anggun babye, pera mutuku bobinamsiake. Aning winipsikcopura, yuk pera lo mutuku yu nang arye, anggun Israel nang ara, dana-dana tam mutuku bobinamsiake. Atalak noutam ara, tonok mutuku ak, kum unamlume. Dipkoprob, malye kanye bonamlume. Malye kanye bopmunce, yuk mutuku ninye asik nang ulamak touk unamlum talak ara, anggun wa windam nirya babye, malye kipdeipnamsine. Tonda, anggun unamlum asik, weik kota mutuku nirya ara, batakmunyeba, talye louk uplyeura, dimbulanguk, walang yo uk upnamle ati, nyapsine.
Nyabukce, ayupu ton dukdongobuka nyabuk. “Ayupu nirya ara, narye urdem ati, kum nyapsine. Deiyok ara, na Allah arye anggun Israel ninye wenena ati, yupu nyapdeipnyopura, yuk pera mutuku unyak yu ninye yakirye, anggunti opnamsiake. Winipmanto ara, ninye arye, gandum duk wina ati, ‘Teleb ning ara, tukwak saknamle, bukni, malye ning ara, kumanya arye bobinamle’ tenen, gandum duk wilamak touk, narye na mapu Israel ninye ati, ‘Teleb ninye dan do, malye ninye dan do?’ tenen, wipnamsine. Yu nang yakirye, obuka sirya daknamsiyaka deice arye, anggunti wenepnamsine. Awipnamne talak arye, teleb ning nirya wipnirye, malye ning ara bataknamne. Bukni, teleb ning ara, tonok ning babye, kum kum danamle. Teleb ning ara, lyepnamnarya.
Allah Yahweh arye nyapnukopura, ayupu ton dukdongobuka nyabuk. Ara, el mapu koproba, sik Israel nang nirya ati, nyabuk. “Ara narye anggun Israel yala nang nirya, malye-malye winilamluma ati, yakdonokamsisiba, Babel mutuku nang arye, yanuka obuka bobinamsikba, pera mutuku, Babel mutuku noutam ulamlum nang ara, wini talak ara, buklulume! Wini talak ara, anggun yuk mutuku dabinuka ulamlum nango, Babel mutuku arye tamupmunce, adiparyuk bikbik abuka, Yerusalem mutuku tamubuka yalulume,” nyabuk.
Ura, sikce na yupu nyapdeiamse ning nirya ati, kum kekelamnika ati, sik dekna wenena ati winipse. Winipmanto ara, weik kumanya mikip yalirye, pu aplyeba, aning-aning bobuka, yuk mutuku dana-dana tam bobalamle touk, na mikip weik arye, sik Israel nang nirya ara, dobuka, yuk pera mutuku dopkwetepsiba, yu nang yanuka obikce, tapu koubukabikce, yuk pera mutuku noutam dabinuka deiamikba, ikinuk daulamike. Sikda, ninye asik nang atonun ulamika ati, sik mince kum bikamik mutuku nang kan-kan noutamuk, ikin kibuka daulamike. Narye winilamsa deice arye, anggun mutuku ara, min talak, pia telebuk ulamuk bukni, atalak noutam ara, yuk amutuku tuku noutam, pia teleb sukum tuku uamuk bukni, narye aning nirya ara, kum kipdeipsiba, anggun mutuku ara oldiamuk uamukba, amutuku noutam ara, ninye ton kum ulamikce, abinuka, oyanuka kum winilamikba, amutuku noutam nirya ara, pia malye dem upnin balamuk. Aning nirya ara, na Allah deice uka! Allah arye nyabuk. Allah arye nyabukba, nabi Zakaria kekebukce, sekdeibuk
Amutuku yanuka obisipnamak nang arye, Yahudi yala ninye weik parang ya arye olonamake. Ton nang ara tapu koubukabikirye, yuk karen mutuku bobikirye pil dinamake. Yerusalem asik dokcak nirya ara, Yahudi yala kum ninye arye, ‘Amutuku ara mambul ak,’ tenena kum aryuk, talye yan yanibuka unamake. Winibuka daulamiceura, Yahudi yala kum ninye weik ninye deiyok nang kibikirye, mutuku-mutuku nirya pia talinamake. Allah arye tenyamuk talakuk wininamake.
Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.
Tonda, malye winipmunyopura, Allah el si Yahweh arye, anggun talye bataksilirye, amutuku noutam arye, yuk mutuku dopkwetepsiliba, anggunda mutuku-mutuku nirya unyak ninye noutamak binuka unamlume. Talye tikilyangan nang atonun unamlume. Yuk mutuku noutamak unamlum talak, ninye pia weika arye dipnamlum bukni, anggun yupa mitik tonun dem kam unamlume.
ကြော်ငြာတွေ