Tonda atabakdongobuka dobuk aik tingkat ara winilye kibuka dobuk. Aning nirya ara, weik aik buru tam bukni, abilinga dam dobuk. Ati, tukwak aik bukni, noutam aik ton uamukba, anirye lang winilye kibuka im dup aik ton ubuk. Tukwak aik wekelbana ati ara, outam arye aik bublan botobik. Anyaik arye, noutam aik welena ati, abyok dibuka morop welebik. Aning atonun, noutam aik bukni, alip aik welena bana ati ara, abyok dibuka dobik. Ara, ninye tukwak unyapce eiwelebana ati abyok dibuka dobik.
Yehezkiel 40:6 - Eipomek6 Aning akunum kiklipdeyukopura, abisik bublan kirikuka bikyukce, keting panalyangan tam botopdeiamikce, cang weik aik wekelbana ati, bisik bublan dam wekuk. Ara, bai tam keil poka kirikuka biyukce, cang weik aik wekelbana ati, bai tam arye, aik tam wekelbana bisik ara, anyaik welena ati moropdeiamik ning welebuka biyuk. ‘Acang aik binunʼ tenen, kintinibuk talak ara, anyaik wekenak bisik bublan yanina ati, pala keil memebuka deiamikce domik ning ara, kiklipdeyuk. ‘Apala keil, el lebar yata barye ubuk do?’ tenen, kiklipdeyukura, akeil arye dipdongobuka otam ara, tonok pina arye, kiklipdeyukura, 3.12 meter kibuk. အခန်းကိုကြည့်ပါ။ |
Yehezkiel 40:6
24 ပူးပေါင်းရင်းမြစ်များ
Tonda, anang ara, minop talak Allah el si eren aik, wekena ati ban bisik bukni, keting yangan tam botopdeiamika ara, ninye deiyoknye Raja wekelamuk bisik bublan dam kalikna nang ulamik. Anang nirya ara, Israel nang weik pata mutuku ulamik talak ara, sik Lewi yala nang nirya arye, tenda arye domik aik ulamikak, kalekna deiyok nang ulamik.
Asukum ara, ninye si Imer el mi Zadok birye, acang keil poka el aik dam arye, dukdongobuka domuk. Abinuka dopnin balamuka ani sukdongamukak ara, yuknye ton el si Sekhanya, el mi Semaya birye, dukdongobuka dopnin balamuk. Semaya bira, keting yangan tam botopdeiamik bisik bublan dam, kalikina deiyoknye ulamuk.
Ara sik ap, an ap, neika Hinom birye deibuk mi, el lyu weik mutuku si ati, Ben-Hinom mutuku nyabuka, si nyalulum mutuku lyuak binamlulume. Bimunyopura, weik cang keil poka, bublan botopdeibikba, bai tam bakirye, kiri tuku dobuka, memelinyak mek makau colopmalye ning dobuka, donokolbalamak bisik, wekuka binamlulume. Akunum wekuka bimunyopura, narye nyapnamkin yupu nirya ara, sik anang dam nyapnalyame.
Aning nirya, akunum winibukba eibukopura, aning ara, Allah el Pia Teleb, Lek Dip Kanye arye, na Yeheskiel biti, inibuka bobinukce, mitik otam deipnuke. Elce deipnuka ara, Allah Yahweh el si eren aik dam bukni, keting panalyangan tam ara, keil arye cang poka domik, anyasik dam wekna ati, bisik bublan botopdeiamik ning ara, bisik bublan dam deipnuke. Asukum ara, narye dilamsak, bisik bublan dam bulubuka tikmek nang ton, eipse. Ara, anang nirya ara, dua puluh lima (25) nang unmikak eipse. Aunmeka noutam ara, sik amutuku taleamdik nang, deiyok nang bitinye eipse. Ara, ninye si Asur, elce deiamuknye Yaazanya ap, tonda Benaya elce deiamuknye Pelaca ap, unmikak, narye eipse.
Allah el si eren aik bai tam bukni, dana-dana tam nirya, antanap dongobuka keil deibuka poka domik ning wekelbana ati, botopdeiamik bisik bublan bukni, dabu tam (arah utara) domikba uamuk ning babye, anye birye otam binuka, pina arye deibuka, kiklipdeyukura eipse. Awekelbana ati bisik bublan, el si gapura ton, cang weik keil arye deibuka domik aik eipse. Anye birye anyaik el pala ap, el cang ap ati, yuk-yuk kiklipdeyuk.
Tonda, acang keil arye deibuka domik aik, dabu tam botopdeiamikba, uamuk noutam ara, otam keting panalyangan tam wekelbana ati, bisik bublan botopdeiamik noutam uamuk touk kibuk. Ati, sik kalikin nang tikinak ati, lo ap, alo kup-kup abilinga deice botopdeiamik jendela kin-kin ap, alo mitik tonun wililona ati, anoutam arye domik abilinga nirya ap, abilinga deice arye, korma yo, tonda, el si kelapa yo, urasin atonun memepdeiamik gambar nirya ap ara, urasin atonun uamukba eipse. Ara, dabu tam wekelban bisik bublan, cang weik keil arye deibuka domik aik ap, keting panalyangan tam arye, wekelbana ati botopdeiamikba, uamuk bisik bublan ap, sik kiklina ara, atouk kibuk. Tonda, awekelban bisik bublan welebana ati ara, el tekbarye morona domikce, kintinip deiamik ning eipse. Tonda, acang keil arye, deibuka domik aik akunum biyukopura, lo mitik tonun dana-dana tam uamuka anoutam ara, ninye bana ati, mitik bisik botopdeiamik ning, el si ara lorong, el cang ara (panjang), pina arye deibuka kiklipdeyukura, dua puluh lima (25) meter kibuk. Atonun, dabu tam (arah utara) uamuk ning ara, keting panalyangan tam akunum eipmase ning, el kiklina nirya ara, atouk uamuk. Ati, el cang ara, 25 meter ubuk. El pala (lebar) ara, 12,5 meter kibuk.
Aning nirya akunum eipsopura, anye birye, na bobinuka, Allah el si eren aik dam wekelbana ati, bisik bublan botopdeiamik bukni, iknapnye tam (arah selatan) tam bublan tamuk, bobinuka deipnukba, aning ton eipse. Allah el si eren aik dam, lo weik batakamika dam wekelbana ati, bisik bublan botopdeiamikce, cang weik keil aik domik ning eipse. Anye birye aning ton, pina arye deibuka kiklipdeyukura, eipse. Aning babye, otam keting panalyangan tam bisik bublan babye, tonda, dabu tam bisik bublan babye uamuk touk, aning babye, iknapnye tam babye, el kiklilena nirya ara, atonun dem kibuk. Ati ara, iknapnye tam wekelbana ati, bisik bublan cang keil arye, deibuka domik aik pum tam ara, anyaik kalikin nang tikinak ati lo ara, mitik tonun, dana-dana tam winilye memepdeibika ati, aning nirya ara, pinbarye uamukba eipse. Tonda, alo mitik tonun nirya ara, atonun empat segi 3.12 meter kali 3.12 meter kibuk. Alo mitik tonun pinbarye bukni, alo-alo noutam wililona ati, deibuka dobik abilinga kiklipdeyukura, abilinga nirya ara, anyapce otam bana ati, el pala ara, 2.7 meter kibuk. Tonda, alo mitik tonun dana-dana tam uamuk anoutam, ninye bisik bana ati bisik mitik tonun botopdeiamik ning, el si ara lorong, el cang ara (panjang), pina arye deibuka kiklipdeyukura, dua puluh lima (25) meter kibuk. El pala ara, dua belah setengah (12.5) meter kibuk.
Awekelban bisik bublan, iknapnye tam cang keil arye deibuka domik aik uamuk ning babye, el wekelbana ati morona ara, tekbarye memepdeiamikce domik ning ton eipse. Tonda, anyaik akunum bise talak ara, anyaik noutam lo weik ton uamukba eipse. Acang keil arye deibuka domik aik noutam babye, sik kalikin nang tikinak lo mitik tonun ap, alo kup-kup abilinga deice botopdeiamik jendela bisik ap, alo mitik tonun wililona ati, anoutam arye domik abilinga nirya ap, abilinga deice ara, korma yo, tonda, el si kelapa yo urasin atonun memepdeiamik gambar nirya ara, yuk-yuk ara cang keil arye, deibuka domik aik pum tam urasin uamuk touk, iknapnye tam ton atonun uamukba eipse. Tonda, alo mitik tonun dana-dana tam uamukba, anoutam ninye bisik bana ati, memepdeiamik bisik el si ara lorong, el cang ara (panjang), pina arye deibuka kiklipdeyukura, dua puluh lima (25) meter kibuk. El pala ara, dua belas setengah (12.5) meter kibuk. Ati, keting panalyangan tam botopdeiamik bisik bublan ap, dabu tam wekelbana ati botopdeiamik bisik bublan ap, cang weik keil arye deibuka domik aik ap, anoutam uamukak, ninye balamik sukum nirya ara, sik urasin ap, sik kiklilena ap ara, atouk ubuk.
Nyapnukba, narye aning nirya dinmasirye, eipse ning ara, ani. Allah el si eren aik dam bukni, bai tam dana-dana tam nirya ara, cang weik keil poka akunum dobuka antanap dongamikba eipse. Dinmasiba, awelnye birye, cang weik kiklin pina bopmuk ning, el cang ara 3.12 meter bopmuk. Abopmok pina arye, ‘Akeil poka el cang ara, tukwak arye dipdongobuka eitam ara, yata barye ubuk do?’ tenen, tukwak arye, akeil poka deice tam kiklinmok. Tonda, ‘Akeil poka ara, el pala weik ning deibuka domik ning, tebal nyalamaka ara, yata barye ubuk do?’ tenen, apoka pala ati kiklinmok. Wininmokba, akeil poka, tukwak arye dipdongobuka deice tam, el cang ara, tonok pina arye kiklipdeyukura, 3.12 meter kibuk. Atonun, apoka el pala babye, tonok pina arye kiklipdeyukura, 3.12 meter kibuk.
Abisik bublan akeil pala deice otam akunum wekukopura, lo mitik tonun tekbarye kintinip deiamik ning ara, binuka eibuk. Ara, kwanim tam ara, lo winilye kintinip deiamik. Tonda atonun, sirik tam babye, lo winilye kintinip deiamik. Alo mitik noutam nirya ara, ‘Anyaik kalikin nang asukumuk tikinamakʼ tenen, kintinip deiamik. Amitik lo yuk-yuk bukni, tonok-tonok kiklipdeyukura, kalikin nang tikinak el pala ara, tonok pina arye kiklipdeyukura, 3.12 meter kibuk. Atonun, kalikin nang tikinak anirye dipdongobuka, aik pum tam otam cang ara, tonok pina arye, kiklipdeyukura, 3.12 meter kibuk. Tonda, ‘Akalikin nang tikinamikak ara, lo yuk-yuk upnamleʼ tenen, alo-alo noutam wililona ati, deibuka dobik abilinga, kiklipdeyukura, abilinga nirya ara, anerye otam bana ati, el pala ara, 2.7 meter ubuk. Tonda, anyasik otam bana ati, memepdeiamik mitik bisik, el si ara lorong, el cang ara (panjang), tonok pina arye kiklipdeyukura, 3.12 meter ubuk. Asukum arye bai tam lakdeiamik atolonga domik ning ara, el pala ara, tonok pina arye kiklipdeyukura, 3.12 meter kibuk. Atolonga deice tiknumurye odinmanumuba, Allah el si eren aik dam otam ara, pala weik lo uamuk tuku eipnumu.
Allah el si eren aik noutam, yuk-yuk wilibuka domik aik bukni, minyuma ning ara, el si Teleb Lek Aik ap, tonda, Allah si eren aik bisik bublan dam lapdeiamik atolonga domik ning ap eipse. Ura, minyuma domik aik bublan dam bukni, tikuka otam dinmasiba, mambul ning, ‘Naʼ tenen delina ati, mitik marikna memebuka, abilinga taram deice deiamik ning eipse. Amarikna, el lelilongon ning, teleb kain lapkwecamikba, lelyamuk ning eipse. Amarikna deice tam ara, ‘Anyaik abilinga taram urasin, pia teleb upnamleʼ tenen, mitik yo winilye, el si ara bingkai, abilinga taram deice lelepdeiamikce, taplak dongamik. Tonda, alo weik aik, el abilinga taram deice nirya ara, ‘Urasin teleb upnamleʼ tenen, pala yo lakase, el bukam pia mitik uamuk ning, el si ara tripleks, atonun taplak dongamik. Aning ara, amsuna deice utam arye dipdongobuka, jendela botopdeiamika dam amu tam domik. Tonda, mitik jendela botopdeiamika ara, el lelin ning, el si ara kain tirai arye, lapkwecamik.
Anye birye, Allah si eren aik bukni, aik pum tam akunum kiklipdeyukopura, na bobuka, cang keil arye deibuka domik aik, el si ara gapura, bukni keting panalyangan tam bisik bublan arye kirikuka, lo weik batakamikak bobinuk. Ara, Allah el si eren aik, bai tam lilun lo uamukak ap, awamuk ning nirya ap, ‘Kiklipnunamʼ tenen, bobinuka deipnuke.
Ining ning opnarye, Allah arena ati, uku sekikirye dongonamakak ara, el nong dana-dana nirya ara, empat segi 7 meter kiklipdeipnamake. Ati, aning el cang ap, el pala ap atouk, 7 meter upnamle. Aning deice tam antanap dongobuka lilun deipnamak ning ara, outam arye dipdongobuka, eitam ara, 25 sentimeter kiklipdeipnamake. Aning ara, kam ning kalebuka delinamak ning ara, ‘Tukwak saklyakʼ tenen, barina ati, keil arye deipnamake. Uku sekenak amu tam ara, ‘Ining saklirye banamleʼ tenen ati, mek bisik sekdeipnamake. El bukam pala ara, 50 sentimeter upnamle. Allah aren ning opnarye, uku dongolbanak, eitam welebana ati, keil arye morona ara, keting panalyangan tam arye morobuka, mesba taram dam delinamake.
Tonda, minop talak ara, sik Israel yala nang, sik deiyok-deiyok nang arye, sik aik domikce, bisik bublan dana-dana tam, yo deibuka domik ning ap, abublan wekelban bisik yanina ak ap, na aik dam atonun domik. Winilamika ati, sik aik otam, na aik atam ara, tonok keil poka domik bukni, sik aik ara, pia mening dam ubuka ati, winilamika deice arye, na leknye si ati, pia malye kililamnike. Winilamnik ning nirya ara, narye, ‘Aning-aning nirya, pia na like. Aning nirya ara, pia na likʼ tenenun bukni, aning tenina kumce, talye mangkau asa, malye winin ning weik ulamik. Winilamika ati, sikti, yu weik upnukba, amutuku ulamik nang nirya obuka, sirya dakse.
Allah el arena ati, mesba deice uku dongopnamak ning ati, akunum laka nyapnukopura, na dam yanmoknye biryuk, na Yeheskiel dobuka, Allah el si eren aik dam bukni, mitik lo batakamikak, dana-dana tam antanap dongobuka keil arye deibuka, poka domika dam bobinuk. Asukum ara, Allah el si eren aik otam wekelbana ati, keting panalyangan tam botopdeiamik bisik bublan, el si ara gapura dam bobinuk. Abobinuk tam wekelban bisik bublan, keting panalyangan tam ara, akunum tirikdongamukbuk eipse.
Ura, sik ninye deiyok nang Raja birye, el kanye aryuk, ‘Se, na ni koproba, Allah Yahweh ati, pia telebe nyapnamne ati, na tenepmanye touk, aning ton tabakuka, talye arepnamneʼ tenen, kintiniplyeura, aninguk arelyanganamle. Ara, dipkoprob kam ning obuka, uku arye dongon ning do, malye ulamlyeba bikuka, dukulongona ati aren ning do? ‘Na ap, Allah ap, teleb kibuka neika unamnameʼ tenen, aren ning do, aning nirya arena ara, sik Raja nang arye, aning arelyanganamaka ati, sik imam nang arye, Allah el si eren aik bublan, keting panalanyangan tam arye, botopdeibik bisik bublan damuk, kukulinamake. Ara, Raja birye aik pum tam wekelbana ati, abublan kukulinamake, nyapne. Aning arenamak talak nirya ara, min arye Sabat sum deice yanuka, arelyangalamik touk, abisik bublan damuk arelyanganamake. Bukni, Raja birye teneplye touk, aning nirya akunum arebuka bindopnukceura, aketing panalyangan tam bisik bublan arye bindoplyeba, sik imam nang arye abublan adiparyuk tirikilongonamake.
Malaikat birye, na Yeheskiel dobuka, Allah Yahweh el si eren aik wekelbana ati, bisik bublan dam delilbinuk. Winipnukba, dinmase talak ara, mek pu tonok bisik bublan amu tam bukni, iknapye tam (arah selatan) arye, kutukuka binamuk ara, keting panalyangan tam balamukak eipse. Aning atonun, Allah Yahweh el si eren ati tenda aik babye, keting yangan tam, urasin deibuka domik. Winibuka domikak, aminyan Allah Yahweh, el aik weik pala bisik bublan dam arye, kutukuka balamukak, iknapye tam (arah, selatan) tam, urasin deiamukce balamuk. Ara, kam ning opnarye, uku dongonak mesba dobuka deiamik tam, (arah selatan) lilun tam aryuk, kutukuka keting panalyangan tam banmokak, eipse.
Nyapnukce, adiparyuk Allah arye, na boyanuka, Allah Yahweh el si eren aik domik ning, lilun dam bobinuke. Ara, anyaik dam wekelban bisik bublan, botopdeiamika dam bobinuka ara, ani. Ara, Allah el si erena ati, kam ning opnarye, uku dongona ati, kintinip deiamik ning, el si mesba, otam upmokba eipse, atalak ara, anyaik kup-kupak unmek nang ton eipse. Asukum ara, ninye yupa ara, pia weik, dua puluh lima (25) nang unmekba, eipse. Sik aunmek nang ara, Allah el si eren aik, Pia Teleb Lek Aik, sik donga tam unmokba, sikce asukum wekmekce, keting panalyangan tam, urasin deibuka, sik kutam tuku dipdongobuka, keting panalyangan tam unmekce, si erebuka kinmekce, keting si erenmekak, eipse.
ကြော်ငြာတွေ