Yehezkiel 3:11 - Eipomek11 Ati wini talak ara, an yala nang ap, an kayapu Israel yala ninye ap, Babel mutuku yin talin nang arye, sirya obikce, tapu koubuka delilyayikba, Babel mutuku noutamak daunyak mutuku bimince, narye anti, nyalinamkin yupu nirya ara, sik kekena ati, peterelbinamlame. Sik ti nyanamlyame. ‘Allah el si Yahweh, aning nirya talibuka deice tam, Weik Erena Deiyoknye ulirye, el tenelul touk ululnye birye, nyapnuk yupu ara, ani,’ nyabuka peterelbinamlame. Ara, sikce an yupu kekenamkiyak talak babye, sikce an yupu kum kekebikirye, batakanamkiak talak babye, peterenauk wininamlyame. ‘Kum kekepmaniyak ati, bataknamne,’ pia kum tenenamlyame.” Allah arye, na Yehezkiel, nati nyapnuke. အခန်းကိုကြည့်ပါ။ |
Yehezkiel 3:11
20 ပူးပေါင်းရင်းမြစ်များ
Tonda, dadeipdanin yangalamik ninye babye, wini talak unyak Israel ninye nirya ara, kisok yung kat ubuka unyak ninye anya arye, nati si erebuka kum kininyake. Ati, anti nyalikinye yupu dopropmince aninye ati, peterenalame. Allah el si Yahweh arye, aning nirya talibuka, deice tam ulul Weik Erenanye birye, nyasilye yupu ara, ani. Allah arye tenelul touk, aning-aning nirya talibuka, pil dolule. Allah Yahweh arye wipdeipkuka ati, ‘El yupu peterepnusine,’ nyabuka, peterepra banamlame.
Anda luba kina kume. Sik Israel ninye nirya ara, kanye kat bonyaka ati ara, na yupu yaniltakanauk unyake. Ati ara, ance peterepra balamin bukni, sikce kekenamkiyak talak babye, an yupu kum kekenamkiyak talak babye atonun, narye melipkinirye, aminyan talak upnamle ning, laka nyan yupu nyapminba, adeice arye, ‘E dipkoprob anye bira, nabi ulule’ tenen, sik kel kipnamkiake. Tonda, ‘Se, dipkoprop, Allah el yupu lak lena deiyoknye, nun noutamakuk ulirye, Allah el yupu nyasulule’ tenen, biknamake.
Ati ara, narye nyapdeipnukin yupu ara, Israel ninye noutamak malye tenebuka, talye mangkau kibuka peterepmin bukni, anang arye kekepnamaka babye, kum kekepnamaka babye, na yupu peterenauk unalame. Aninye ara, kat kanye bokirye, mandipna kanye bobuka, na yupu kekena kum ninye unyaka ati, ance nyanalam yupu ara, kum kekenamkiyake, nyapkine. Aning ara, luba kina kume. Allah arye, Yehezkiel nati nyapnuke.
Nyabukopura, ayupu ton dukdongobuka nyabuk. Aning nirya ati ara, diba, Yehezkiel anda, ninye sirika arye deipkiknye ulyame. Ati, ance sik Israel yala nang nirya ati, lak nyalbinulyame. Ara, ance, ‘Anggun ni koproba Allah, el si Yahweh arye nyapsilye.' Ura, na Allah Yahweh ara, aning-aning nirya talibuka, deice tam erebuka, pia mikip weik ununye birye nyapsine. Ara, sik Israel yala nang, anggun apu yapu nang arye winilamik ning ton, nati, ‘Allah ara, nun like. El nyapsilye yupu, pia kum kekenamabe,’ nyabuka batakamnikce, malye yupu weik nyalamnik. Sikce na ap, na yupu ap ati, moubuka kum taleamikce, bataklamnik. Na si ati, malye kipdeipnikce, na siuk kum erelamnike. Sikce malye weik winilamik ning ara, ani.
Atalak aniryuk, Allah arye ayupu tonap dukdongobuka nyapnuk. “Se, anda ninye arye deipkikba, tukwaknye ulyame. Ati, anyanamkin yupu nirya ara, an amul arye kekebuka, pia moubuka tenipmince, ‘Se, aning ara, Allah arye nyapnuka,’ tenebuka unalame. Na nyanamkin yupu nirya ara, an kanye noutamak delinamlyame. Pia moubuka akunum talepminyopura, aminyan sik dam laka nyalbinamlyame.
Nyalongoyuk talak aryuk, Allah el Dib Kanye arye, na dobuka ereipnuke. Winipnuk talak arye, na balye tam arye, yupu weik asa arye ton nyabukce, lelim weik lenmokba kekepse. Nun ni Allah, anda im deice tam ulyam mutuku ara, ei unyak malaikat nirya arye, an si erebikirye, ‘Allah ara, pia telebuk ulule, nyanamak’ tenen, patanulule.
Aning nirya winipse talak ara, talye karin arye, Babel mutuku yin talin nang arye, Yudea mutuku noutamak ulamik ninye omikce, bobuka delilyanamikba, ulamik mutuku, mek si Kebar mek lilun bobinukba unmase. Tonda, amutuku si ara, Tel-Abib mutuku nyalamikak yanuka unmase. Amutuku bobinuka deipnukopura, daunmasi bukni, amutuku uk like tekbarye (7) sum, aninye ap neika ulamupu. Atalak noutamak ara, mambul ning eipmase ning ap, Allah el Dib Kanye arye bobinmanuk ning nirya ap ati, kanye bona kum, ‘Yata wiripmanil do?’ tenen, teniltonauk unmase. Yupu kum tanmasirye, talye unmase.
Winipnamkil bukni, yuk talak ara, narye yupu nyana deiyok ning, tuba tonap arepkiniba, tamubuka yupu nyaminyopura, narye mambul yupu ton arepkiniba, ance awenena yupu dobuka, sik Israel ninye ati, nyanamlyame. Sik ti nyanamlame. Allah el si Yahweh, aning-aning nirya deice tam talibuka, Weik Erena Deiyoknye ulula anya arye, elce, ‘Winipnamne,’ tenelul touk winilule. ‘Anye birye nyapnuk yupu ara, atia,’ nyabuka, peterenamlyame. Ayupu nyanamlam bukni, sik Israel yala ninye nirya ara, pia malye tenebuka, kanye talima kat nang ukirye, na yupu yaniltakan ninyeuk unyake. Ati, ton tam ninye ara, ance nyanamlam yupu moubuka kekenamake. Bukni, ton tam nang ara, na Allah arye nyapdeipkiniba, nyanalam yupu moubuka kum kekenamkiyake. Winibicopura, ance, ‘Anggun mandipna kanye boubuka, ninye yupu kum kekeluluma ara, bataklulume. Allah el yupu kekeplulume,’ an mikip asa arye, nyana kume. Sik kanye aryuk tenebikirye, wininamake ara, sik bidamnye daunamake. Sikda ninye yupu kekena kum unyaka anya arye, dawininamake. Na Allah arye, an Yehezkiel ati nyapkine. Allah arye nyapnuk.
Nyapminyopura, anda ninye sirika arye deipkiknye birye, ayupu ton tabakuka, an yala nang, Israel nang ati nyapnalame. “Na Allah arye, ‘Aning ara winipnamlume. Aning ara, pia kum winipnamlume,’ nyapdeipsise yupu, ton nang ara, aninguk kekebikirye, moubuka talibikirye, diksukumuk unyake. Bukni, anang arye, na yupu yanibikirye, malye ubicopura, sik mince teleb winilamik ning deice arye, tamubuka kum teleb kipdeipdatingce, kum lyepdatinge. Tonda, sik malye winilamice nang ara, na yupu yanilobikirye, malye wininyak bukni, aning nirya batakikirye, tamubuka na dam yanamak nang ara, diksukumuk wininamake. Ati mince malye winilamik ning ara, namin kipnirye, anang wenebuka kum opnamne. Atonun, mince ton nang ara, na yupu taleamikce, diksukumuk upnin yangalamik bukni, aminyan talak aning nirya batakikirye, tuba ton ap, malye-malye ubicopura, mince teleb ulamik ning deice arye, kam tuba kum unamtinge. Anang ara, wenebuka opnamnarya. Tonda telebuk upnin yangalamlinye bira, aminyan malye upnamlanye bira, tamubuka kum teleb kipdeipnamne.
Aning nirya laka nyapmasin bukni, an mutuku nang, Israel nang arye, ayupu nyanyake. “Kume, Allah Yahweh, elce nunti nyasilye touk, kum ulule. Aning ara, teleb un ning kume. Nunce winilamupu touk tenibuka, kum wenepsulule. ‘Elce tenelye touk yupu bokeipsilirye, wenesulule,’ nyabuka, malye nyaninyake. Bukni, dipkoprob teleb kum winilul ning ara, sik Israel yala nang arye wininanyak nang ara, dipkoprob kum wininyake. Malye ninguk wininyake.
“Se, anda ninye sirika arye, deipkiknye ulyama ati, an mutuku nang ati, nyapnulyame. Yata mutuku do nirya, tonok mutuku noutam ara, na Allah arye, ton mal olana yu nang dopdeipniba, olyanganamak talak ara, amutuku nang ara, winipnamake. Amutuku ninye arye, ‘Nun mutuku mal olan nang, olyanamsiyakʼ tenen, sik kan-kan arye, kalikna deiyoknye ton wipdeibikiba, akalikinanye birye, pia moubuka dinauk unamle.
Allah Yahweh arye, na Yeheskiel biti, nyapdeiamnuk. Se, anda ninye sirika arye, deipkiknye ulyame. An mutuku nang arye, anti yupu nyakikce talak ara, nyalanyake. Ara, sik mutuku noutam, weik asik dobuka ukirye, bai tam poka dam, ara weik cang keil poka tembok dukdongobuka dobik ning dam ap, tonda sik asik yuk-yuk dam ap, bulubuka epdakirye, anti nyalanyake. Tonye birye, tonye biti, sik bidamnye nyalanyake, “Winira yalulume. Arup ara, nun ni koproba Allah Yahweh arye, nyapdeiamsuk yupu, kekena ati, nabi Yeheskiel dam binuka kekepnuyabe,” nyalanyake.
Daniel birye nyabuk, “Malaikat arye, ayupu nyapnukopura, ayupu ton dukdongobuka nyapnuke.” Anyabuk yupu ara, ani. “Siria mutuku taleamuknye, akunum diplyopura, atalak noutam ara, Allah el pil donanye malaikat, el si Mikael, laka kipnamlarya. Mikael bira, sik Israel yala nang ati, melibuka kalikilule. Atalak ara, Daniel an mutuku nang, sik Israel nang kalikinamle bukni, atalak noutam ara, kanye imun weik talak ton yanamle. Aning ara, minop talak ara, kanye imun weik ning ton yangalamuk bukni, aning nirya ara, mitik ikin uka. Asirya talak yanamle ning ara, pia ikin weik upnamle. Minop talak ulamik nang arye dipdongobuka, wini talak unyak nang babye, aning atonun ikin ning ton yanamukba, kum dopromik ning yanamle. Bukni, an mutuku nang, Israel nang kan-kan noutam arye, ninye weik ton, Allah arye lyepropnamlarya. Ara, yata nang do nirya, sik si Allah kam deiyoknye, el buku noutam si sekuka deiamlye nang nirya ara, dipkoprob lyepropnamle.
Nyabukura, sik anang arye, ninye deiyoknye Raja Darius biti nyabik. “Minop talak Yehuda yala ninye obuka sirya dakupurye, tongobuka boyanamuburye, yanuka deiamupu nang kan-kan noutamak arye, tonoknye el si Daniel aulule. Elda nun amu tam pil donanye ulul bukni, yata deiyok ati, nun ni an nyaplum ning ara, ‘Talya ning’ tenen, kum kekepkukce, el si erelye Allah atibuk, tonok sum ara, like winilye talak arye Allah morolule,” yanuka nyabik.
Ayupu arepnukce, nyapnuke. “Atalak aryuk, an minopce koulukuka bilyame. Sik Israel ninye, Mesir mutuku ulamikba, bobuka yanamlum ninye nirya arye, na yupu batakikce, pia malye winipdeipdanmake. Narye, ‘Aning ara, wininamlulume. Aning ara, pia kum wininamlulume,’ nyapdeipse yupu, minopce akunum batakmakce, kat ning doprobikce, sapi basam urasin atonun ning puturubuka deipmakce, atalye ning ati, ‘Nun ni koproba ani,’ nyabuka, si erenyake.” Allah arye nyapnuke.
ကြော်ငြာတွေ