Yehezkiel 26:16 - Eipomek16 Aning nirya winiplyeba, eibikirye, bikikcak arye, mek kup-kup talibuka unyak deiyok nang, sik laut lilun unyak Raja-Raja nang nirya ara, sik weik bona talinyak ning batakikirye, sik ninye deiyok nang ongonyak baju, urasin pia teleb juba, kwiribuka bataknamake. Tonda, sik baju urasin teleb kibuka wiamikce ning ara, kwiribuka donokikirye, sik nong nirya, sirem taliplya deice buknamake. Atalak ara, sik ilil pia weik uplyeba, yupu nyana kumce, talye tunim abuka bukikirye, anggun Tirus nang, ikin weik upnamsil ning ara, eibikirye ‘Se,’ nyabuka ngaluknamsiake. အခန်းကိုကြည့်ပါ။ |
Yehezkiel 26:16
32 ပူးပေါင်းရင်းမြစ်များ
Tonda, sikce nati, “Winipmanto ara, moul li talak ara, ninye arye deice tam kiniklamak baju, el si ara jaket, tuba-tuba kiniklamak touk, Daud birye, yuk nang ati, malye yupu ap, sulamak nang yupu ap, asum-asum nirya, weik arye nyalamuk. Aning ati ara, winipmanto, mekwen pum tam wekipnyeura, amek nun nong nirya, moul kilamsil touk, ninye kir don yupu ap, sulamak nang yupu ap, Daud el nong deice yanuka uptuba, ikin weik upnamtue. Tonda winipmanto ara, ninye nong bol deice, nintong teleb minyak likikcak arye, sik anang nong, tup pum tam weklamle touk, “Ninye sulamak nang yupu ara, el nong noutam nirya wektuba, dadiptue,” nyabuka, ayu nang arye, nati tenebikirye, nyaninyake.
Tonda, nati talye minin yupu ap, malye yupu ap, nyaninyak nang ara, ance wenepmince, sikti, ikin ning arepminyeura, Sikda alye weik dakdanamake. Tonda, yuk nang arye anang ati, ‘Sikda dipkoprob malye nang unyake,’ tenebikirye, kel bikikceura, anang ati batakikirye, tuba si kum erenamake. Winipmanto ara, ninye arye moul li talak, deice tam ongolamak baju, el si jaket kiniklamak touk kibuka, sik alye dakdanamak ning ara, weik kiplyeba, sik nong nirya deice, siknilongonamle. ‘Ance anang ati, winibuka wenepnamlam’ tenen ati, moropkine, na ni Allah.
Daud biti, ‘Anye nun lik’ tenen, mal pinamak nang nirya ati, na Allah arye, wenebuka, sik anang nirya, amu tam kipdeipyeura, sik pia alye weik dakdanamake. Bukni, narye wipdeipsinye Daud bira, el ninye deiyoknye kina ati, lak kin ning, el si mahkota ara, ninye arye aning dobuka, Daud el kisok deice deibikceura, el mahkota deice ara, dirina pia weik upnamle! Allah arye ayupu nirya nyabukba, sik mot nyana deiyok nang arye sekik.
Diba na ni Allah, yata nang do nirya, sikce nati, “El ikin weik unmala ara, nunce kanye deipmabe,” nyabuka, akutuninyak nang nirya ara, ‘Ance anang wenebuka opminyopura, sikda kanye teninauk ukirye, alye weik dakanamak’ tenen, moropkine na nio. Tonda na ni Allah, yata nang do nirya, sikce nati, “Anye obuka, nun amu tam kipdeiptibirye, nunuk ara, erepdabirye, amutuku nirya nuncuk talibuka, ninye deiyok nang unamabe,” nyabuka, nati, ‘Lik’ teneninyak nang nirya ara, ‘Ance anang wenebuka opminyopura, sikda alye weik dakikiba, yuk nang nirya eibikirye, anang ati, ‘Dauaplye, sikda pia malye nang uka,’ tenebikirye, ‘Anang ati, tonap si erebuka, kum kinamak’ tenen, moropkine na nio.
Winibiceura, sik Yerusalem mutuku, tuba kam unamak nang arye, anyasik domikce bukni, bisik bublan wekelbanak ati, weik keil poka noutam, bisik bublan potopdeibikak ara, kat ning besi arye, bublan el si, Pintu Gerbang dobik dam, bulubuka wekelbikirye, yupu weik arye malye nyabikirye, engenamake. Winipmanto ara, kilapu baju kwiripdobiceba, bananguk bukikirye, tuku deice bukuka engelamak atouk kibuka, anggun Yerusalem mutuku nang babye wininamlume. Ara, Allah arye wenepsilirye, ikin ning weik arepsilyopura, anggun babye, aning atonun kibuka, imun kanye bobuka, engenamlume. Allah arye, sik Israel yala nang nirya ati, ayupu nyabuk.
Tonda weik laut mekwen arye dana-dana nirya sekdongobuk mutuku nirya, sik weik yukak unyak ninye nirya arye, na mambul pil dolamse ara, elinyake. Ati aning-aning winipneba eibikirye, nati ilil ulule. Na mambul pil doniba, mutuku sirya, im sirya daunyak ninye ara, eibikcopura, lukdakirye, ‘Se’ tenen, sirim talilule. Winiplyopura, sik nirya tonokak bulubuka, na dam yanamake.
Allah arye, sik Babel mutuku nang ati nyabuk. “Se, anggun Babel mutuku nang kekepnululume! Anggunda kouluklulume! koulukmumce, tuku deice yanuka buklume. Anggunce mikip weik nang ulamlum bukni, aminyan talak ara, anggunce yuk mutuku unyak nang ton ap kum talipnamlume. Winipmanto ara, sik Kasdim mutuku nang ara pia urasin teleb wel kil atonun ulamlum bukni, wini talak ara, aning nirya akunum kum kipdeipsina anya arye, weik deiyok nang arye, teleb weik bunak bulamakak atonun ning arye koulukmunce, kanye lamapdongopmunce, tuku deice buklulume! Narye anggun dobuka amu tamuk kipdeipnamsina anya arye, ninye nirya ara anggunti, ‘Sikda pia mambule, pia teleb nang unyake,’ nyalamsik nang ara, ton ap kum nyanamsiyake.
Yerusalem ninyeo, anggun malye kanye bona ati, butbuta deice umunyeba butbuta palipsuk ning ara, kiliplopmunce, weik kota mutuku noutam teleb kibuka ulamak touk unamlume. Sik ninye deiyok nang arye, pia teleb bun ning deice bulamak touk, narye ereipsiniba, telebak unamlume. Tonda yuk mutuku nang arye, malye kipsikce, tapu kouamsik ninye, anggun Sion mutuku umunye ninye ara, anggun ngang dam tapu koubuka wenen aik deiamsikba bulalum ning ara, wini talak ara lopdalulume. Anggun Sion mutuku deice arye deiamsik ninye ati nyapsine.
Se, anggunda bicoe! Narye, Moab mutuku uamuk ning nirya ara, sice kibuka bataknamne! Winipnyopura, yuk-yuk mutuku nang arye, sik Moab mutuku noutam unyak nang nirya ati, nalibuka akutunamake. Winibikcopura, sik Moab mutuku nang nirya ara, alye dadakirye, engenamake! Narye, Moab mutuku nang wenebuka opnyopura, yuk-yuk mutuku unyak nang eibikirye, Moab mutuku nang ati, ‘Kume, sikda pia malyeuk unyaka ati, obuka ara, teleb uka!’ tenebikirye, ilil unamle. Tonda, antanap dongobik mutuku, im sirya, mutuku sirya nirya unyak nang arye, Moab mutuku ati, nalibuka, akutunamake. Allah arye nyabuk.
Wini talak ara, Yerusalem mutuku unyak wisi-wisi nang, deiyok koubuka yupu nyasinyak ning ara, Allah el yupu talibuka, pil donyak nang arye, nun Israel yala nang ati, yupu nyasinyak nang nirya ara, atalak ara talye tunim abuka, tuku deiceuk bunyake. Aning ara, sikce, ‘Se, yata ning ati winipsuke do?’ tenen, ikin kanye bobuka, talima uk diplyeba, laka kina ati ara, sik anang arye, tuku bum dobuka, sik kisok deice deibuka unyake. Tonda, pia malye baju uk kinikuka unyake. Tonda, amutuku unyak wel kilapu nirya babye, Se, yata wiripnuyap do?’ tenen, sik urasin ara, tuku deiceuk luknupdongobuka bunyake.
Narye, anggun akunum dopropsise ara, anggun Yerusalem mutuku ululum nang ara, winipmanto ara, bona weik talin nang arye, kil dobuka ulamak touk, narye winipsise. Ara, bona weik talin Israel nang ara, kil dolamak touk winipse. Min ara, urasin pia teleb dekna weik baju ton arepsiseba, ongolulume. Tonda, urasin pia teleb sapi basam bol, pia namin ning arye, moubuka kintinip deibikce, yan kinikna, el si sandal ton, arepsiseba ongolulume. Tonda, anggun kisok kaluna ati ara, pia teleb namin baju, el si kain lenan arye koupdongopse. Tonda, anggun nong bai tam ongona ati, dekna weik baju, el si juba, pia teleb ning dobuka, ongopdeipse.
Anggun Tirus mutuku noutam ululum nang ati, narye anggun wenena ati, aning nirya winipnamsin ning ara, weik imun kanye bon ning, pia kum tenipmanto ikin ning, anggun deice deipnyeura, yuk kam unamak nang arye biknamake. Biknamak bukni, sikda, tonap pia kum eipnamake. Tonda amutuku tuba kam unmakce nang arye, ‘Se, sik Tirus mutuku ulamik nang ara, dan sukum unyak do?’ tenen, anggunti epnamsiak bukni, pia kum eipnamake. Nara Allah Yahweh, aning-aning nirya, deice tam erebuka, Pia Mikip Weik Deiyoknye ununye birye nyapsina ati, aning nirya ara, dipkoprob nong kunupnamle, pia kum bataknamle. Allah Yahweh arye nyabuk.
An nong bol urasin pia teleb upkuka deice arye, kanye pum tam erebuka kwalilyame. Tonda, an kanye pum tam erebuka, kwalilyama deice arye, ‘Pia urasin teleb ton tabakuka winipnamnarya,’ tenyamlum bukni, malye kipdeipdaluma deice arye, an pia moubuka, kel bikamlum ning nirya ara, akunum pia malye kipdeipdalume. Ati ara, narye an nong tukwak dopkwetepkisiba saklumba, sik mutuku sirya, im sirya nirya unyak Raja ninye deiyok nang, sik asing dinak arye winipkisiba, sik nirya arye, an malye winilamlum ning ara, akunum eibuka bikike.
Narye Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye nyapsine. Ayo weplopsiba, tukwak poulbinamukce, tuku pum tam bukni, ninye dibiceura, dibin nang unyakak, el si Sheol, asukumuk binamuk talak ara, na Allah arye, tuku amu tam balamle mek, tirikdongopsiba, ceprobukba, tukwak nang nirya ara, ‘Seʼ tenen, malye kanye bobikce, engelamik. Tonda, tuku pum tam biyuk mek nirya ara, bublan tirikdongopsiba, amek biyukak uamuk ning ap, amutuku uamuk ning babye engebik. Winibuka akunum winipsirye, mitik mek biyuk bisik nirya tirikdongopsiba, ceprobukba, amek ton ap kum balule. Akeipyal yo webikba, tukwak poulbinamuka deice arye, Libanon mutuku noutam bukuk mutuku konak nirya ara, ‘Seʼ tenen, malye kanye bobikce, engebikba, narye amutuku nirya, deice kuna arepsiba, pia kunukuk. Winibukba, amutuku noutam tiklamuk yo kan-kan nirya ara, mun-mun dakuka, kum dayuk.
Dipkoprob, narye aning nirya, anti winipnamkin talak ara, anang yuk-yuk nang nirya eibikirye, ‘Se, anye bira, el wenena ati, kanye imun ning dopropmala adano,’ nyabuka, ilil weik upnamle. Tonda, mutuku sirya, im sirya nirya unyak Raja-Raja ara, narye an dam ati winipnamne ning eipnamake. Narye, ‘Anang nirya eibikirye, biknamakʼ tenen, ninye on parang ya, ereptalibuka bobanamkin talak ara, aning nirya eipnamkiake. Eibikcopura, sik Raja-Raja ap, sik amutuku nang ap ara, narye an dam winipnamne ning eipnamake. Eibikirye, sikce, ‘Se, anye bira, el wenena ati, kanye imun ning dopropmala adano,’ nyabuka, ilil weik upnamle. Tonda, mutuku sirya, im sirya, nirya unyak Raja-Raja ara, ilil upliba, sik yok sirimtalipnamle. Narye anti obuka sirya daknamkin talak ara, sik anang nirya arye, ‘Se, nun babye, wenepsilirye, opsiliba, dipnamap do?’ tenen, ilil weik unamake.
Tonda, winipnamlula ati, anggun mutuku talibuka, ninye deiyok nang Raja ara, ‘Se, yata wiriptibye do?’ tenen, pia engenamake Aning atonun, Raja el mi babye, el talima sakliba, ‘Se, nun mutuku noutam ara, ila ton ap, teleb kum unamle,’ tenepnamle. Tonda, amutuku noutam unyak nang nirya ara, ilil weik upliba, ‘Se,’ tenebikirye, sik taruk ap, yok ap, serem talipnamle. Ati ara, narye anggun malye ulalum ning eipnirye, awamuk atonun, narye kanye imun yu ning deipsinirye, wenepnamsine. Tonda, sik nirya ati, weik wenen ning arepnirye, anggunti kum kipdeipnamsine. Ara, minop talak anggunce, anggun kayapu nang ati, wenemunce, kum kipdeiamlum atonun, anggunti, narye winipnamsine. “Winipnamsina deice arye, anggun nirya arye, nati ara, ‘Se, kume, dipkoprob el Allah Yahweh ara, Pia Mikip Weiknye dikoprop ulule,’ tenepnamnulume. Allah arye nyapdeibukba, Yeheskiel kekebukce, sekuk.
Wini talak ara, na yu weik unilya deice arye, anggunti kanye imun weik ning arepnusine! Dipkoprop, yu weik unilye ning nirya ara, anggun nong deice deipsinirye, wini talak wenepnusine! Winipsinyopura, anggunda ‘Se tenen, imun kanye bopnamlume. Ati, narye, ‘Awinin ning ara, na pia song ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenepnamsine. Tonda, anggunce malye-malye winin ninguk, weik talibuka winilamlum touk, anggun tamulina ati, yupu bokeipsinirye, weik tonun wenepnamsine.
Allah arye, ayupu nyabukce, ayupu ton dukdongobuka nyabuk. ‘Na tenen ninye ara, tuba tamubuka, na damuk yanamak’ tenen, nara weik singa kuse arye, yupu weik nyalamle touk nyanamne. Yupu weik arye nyapnyopura, keting wekelban tam mutuku noutamak daukirye, na mapu malye kanye bobuka, ‘Se nun ni Allah Yahweh, el bira mambul weiknye ulule’ tenen, morobikirye, na damuk tuba tamubuka yanganamake. Sikce minop yakirye, yanuka nong kanupdongobuka, na damuk tamubuka yanganamake.
Niniwe mutuku, sik ninye deiyoknye, sik Raja babye, awininmek ning kekebuka, kel kibukce, el pil donak, weik bun ning deice batakuka koulukukce, ninye deiyok nang ongolamik baju kwiribuka, deibukopura, el babye, malye baju ongobuka, tuku butbuta pakdanuka, yanuka bukuk. Awinibuk ning deiyok ara, ‘Se, nun malye winilamupu’ tenen, ikin kanye bobuka winibuk.
Aning-aning nirya luluknamle talak ara, tukwak mutuku unyak ninye arye, ninye deiyok kibuka talinyak nang nirya ap, tonda tukwak nang mikip weik arye, yuk pera mutuku unyak ninye nirya talinyak deiyok nang ap nirya ara, bisibuka malye kipnirye, kum kipdeipnamne. Tonda, sikce ninye olbana ati, kuda basam arye lipdobikiba, tuku deice bana ati, memebuka deibik ning, el si kereta kuda ap, aning deice bukikirye, bikbik abuka balyebuk, ninye olbanyak nang ap, kum kipdeipnamne. Tonda, kuda basam balye deice bukikirye, olbalamak yin talin nang ap, sik kuda basam ap opnirye, aning nirya ara kum kipdeipnamne. Ara, sik aning deice arye bukuka banyak nang nirya ara, sikce, sik bidamang nanguk, parang ya doprobikirye, opdanamake. Winipnamaka deice arye, narye sik nirya kum kipdeipnamne.
Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.
Aim deice arye nyanmoknye birye, ayupu tonap dukdongobuka nyabuk. “Allah arye, Babel mutuku ninye ati, wenebuka opliba, uku arye amutuku ulul ning nirya dilirye, weik tulum welepliba, yuk mutuku unyak ninye nirya eipnamake. Yuk mutuku weik ninye deiyok nang, Raja-Raja nang babye eipnamake. ARaja-Raja nang arye, Babel mutuku ninye ap yolalamikce, amutuku noutamak bona weik talin ning ulamuk ning, kanye delilamak ning ap, dekna weik ning ap, talibuka neika ulamik ning ap, uku diplirye, tulum welepliba, sik Raja-Raja nang arye, awelepnamle tulum eibicopura, pia ikin kanye bobuka, weik arye engenamake.
ကြော်ငြာတွေ