Nyabukopura, Allah Yahweh el pil donanye, malaikat arye, Elia biti nyabuk, “An ilil una kume! Anyapmakin touk kekebuka, amutuku kon arye, mangkau asa koulukmince, Raja Ahasia dam binulyame.” Nyabukopura, Elia adiparyuk koulukukba, ayin talena deiyoknye, like winilinye yanmoknye ap, neika ansinibuka, ninye deiyoknye, Raja Ahasia dam birik.
Yehezkiel 2:6 - Eipomek6 Nyabuka nyanamlam bukni, mandipna kanye bobuka, kum kekepkicopura, anda ninye arye deipkiknye ulyama anya arye, sikti, eipmince, ilil una kume. An yupu kekebuka batakica babye, sikce anti, ‘Anda nun like,’ nyabuka, malye yupu nyanamkiyaka babye, ilil una kume. An yupu ati, bisipnamkiyak ninye unyaka atie. Ati sik ulamaka noutamak talye kanye bobuka, na piluk donamlyame. Winipmanto ning ara, ninye ara, sik unyak mutuku ara, tace ning ap, mumundik ninye si tolamle ning ap, ninye on ning aning-aning ap, weik aulula noutamak ulamice talak arye, ilil ulamle touk, anda aning atonun, ilil kum unalame. Aninye ap, ikin ning an nong deice deipnamkiyaka ati, ilil una kume. Pin-pin asa arye kanye deibuka, ilil una kum diparyuk unalame. Luba kilongona kume, sik Israel yala ninye ara, yupu bisipnin yangan ninye unyaka ati nyapkine. အခန်းကိုကြည့်ပါ။ |
Yehezkiel 2:6
31 ပူးပေါင်းရင်းမြစ်များ
Allah arye, sik Israel nang ati nyabuk. Nara Allah aunune. Narye ayupu nyapsinirye, anggun kanye talima melipsinirye, teleb unamlume. Naryuk anggun nirya ati, kanye pia teleb kipdeipnamsine. Winipnane ati ara, anggunda, yata ning deiyok ati, tukwak mutuku noutam malye unyak nang ati, ilil usulul do? Tukwak nang nirya ara, dibinauk unamake. Winipmanto ara, talye yo mutmuta, keting tin arye opliba, sesal sepmalye touk, unyaka anya arye, sik talye tukwak nang ati, ilil una kume.
“Anggunda moubuka kekepnululume! Anggunce, ‘Se, diksukum winina ara, weik tonun patasululeʼ tenen, moubuka kel biklum nang ati nyapsine. Ara, narye, ‘Aning ara wininamlume, aning ara pia kum wininamlume. Teleb una ara ani,’ nyabuka peterelamsise yupu akunum taliplumce, anggun kanye talima noutam boplumce, aninguk talibuka ululum nang ati nyapsine. Anggunce na yupu kekepnululume! Sik yuk talye unyak nang, tukwak mutuku unyak nang arye, talye-talye yupu nyabuka, nalisinyak yupu ap, nalibuka ik-ik nyasinyak yupu ap, minin yupu nyasinyaka ap nirya babye, ilil una pia kume. Tonda, talye nang arye anggunti ara, ‘Sikda malye unyake. Sikda talye ning ati, diba tenenyake,’ nyapsikirye, malye yupu anggun deice nyasinyak nang ati ara, anggunce, ilil una kumce, ‘Se, yata ning deiyok ati ayupu nyasinyak do?’ tenen, kanye teniltona pia kum unamlume. Atalye nang arye, anggunti, malye yupu nyapnamsiyak bukni, anggunda ilil una ap, mikip mitang una ap ara pia kum unamlume. Deiyok ara, ani.
Allah arye sikti, wenena weik ning arebuka deice arye, sikda kanye imun ubuk. Winipmanto ara, amutuku noutam, sik malye winilamik ning ara, talye palamle ning ap, tatce ning ap atonun ubukba, uku buk dilamlirye, atalye ning nirya, dilolamle atonun ulamik. Tonda, ninye arye, bai mutuku noutam, uku sekiceba, weik uku buk ara, bai mutuku nirya dilamlirye, weik tulum im tam bukuka welelamle touk, ubuk. Ara, Allah arye sik malye winilamik ning ap, sik ap, obuka kum kipdeibukce, winibuk.
“Ati ara, Yeremia an adiparyuk kintinipnamlyame. Aninye sik unyakak bimince, na nyapmakin yupu nirya binuka laka nyapnulyame. Ance sikti, ilil una kume. An baju ongopdopmince, yaribuka, ayupu nirya sik kekena ak binuka nyapnulyame. Abinuka nyapnuminye talak ara, na mikip weik an deice arepkiniba, binuka nyanamlyame. Bukni, ance sik aninye ati, ilil upkilyeura, narye alye un deiyok ning arepkiniba, amutuku ninye elinamakak arye, alye dakanamlyame. Ati, sik Yerusalem mutuku unyak ninye ati, ilil tenena kume.
Sik ayupu kekenamak ninye ati, anda ilil una kume. Ara, urdem ati kum nyapkine. Deiyok ara, narye anti melibuka kalikiniba, yuk ninye arye, opnamkiyaka babye, narye lyepropnamkine. Na yupu laka nyalbinamlame. Anyapkin ning ara, talye kum nyapkine. Na Allah Yahweh arye dipkoprob nyapkine,” Allah arye, na Yeremia biti nyapnuk.
Allah arye, Yeremia biti nyabuk yupu dobuka, sik un dam laka nyalbiyukopura, sik Israel ninye, Yudea mutuku noutamak ulamik ninye arye, ayupu talinmek. Sikce sik kayapu yuk nang ati, “Anggun nirya yangalulume. Nun nirya arye, Yeremia biti binuka wenebibirye, opnuyaba ati, yupu talinamabe,” nyabuka, yuk nang nirya yukubik. Tonda, ayupu ton nyabik. “Yeremia elcuk, Allah yupu laka nyalya ati do? Kume, nun dam ara, Allah el si eren aik pum tam, pil don deiyok nang, imam-iman ap, Allah yupu laka lena deiyok nang, nabi-nabi ap, tonda, nun mutuku weik kel bikamik nang ap, tuba aunyak nang aryuk, ‘Wininamsile,’ nyabuka, sik yupu yanuka nyapsitinge. Yeremia bira, el talinye bukni, nyasulula anya arye, nun mutuku yupu bokolina deiyok nang arye, ‘El nong dobuka, wenena aik dongolbinamak’ tenen, Yeremia biti, ‘El malye nyalul yupu ara, anye,’ nyabuka, malye yupu nyapnamabe. Ati, Yeremia birye nyasulul yupu, ton kum kekenamabe.” Sik Israel ninye arye, Yeremia biti, nyabik.
Sik Israel ninye nirya ara, pia mandipna kanye bobokirye, na nyanye yupu nirya, yaniltanauk wininyake. Sikce na Allah ati, ‘Nun like,’ tenekirye, batakaninyake. Sik ap, yuk nang ap, neika banyak nang ara, pia malye wininyaka anya arye, sik kayapu nang ara, yuk ninye ati, minina yupu nyanyake. Sik babye atonun wininyake. Aninye, sik kisok yung, pia kat ninye anya arye, na yupu kum kekelninyake. Sik kanye tenina ara, pia kat ning, besi ap, perunggu kat ulamle atonun ninye unyake. Ati sik nirya arye, tilila yupu nyana ap, minina yupu nyana ap, ubula dona ap, wininyake. Awininyak ninye ara, sik talima noutamak ara, pia malye winin ninguk, pia talibuka wininyake.
Na kayapu Israel nang, Babel mutuku ululum bukni, sik batakamlumba, Israel mutuku noutam, tuba unyak nang ati, nyapsine. Sikce na yupu kum kekenyakce, nati lik uplyeba, batakaninyake. Ati, anda Yeheskiel, domon yupu tonok ton, na Allah arye, anti nyapkinyeba, ance sik Israel nang ati, nyalbinulam yupu ara, ani. Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, anggunti, winipmanto yupu deice arye, laka nyapnusine. Ara, din yun makau pum tam, mek kwebuka dikdongopmunce, amek makau ara, uku deice deipnamlume.
Aminyan talak ara, Israel yala nang ara, sik dam dana-dana tam unamak nang nirya arye, anggunti kum mal pinamsiyake. Winipmanto ara, taice ning nong noutam wekmalirye, lebum-lebum alamle touk, sik dana-dana tam unyak nang arye, ton ap mal pibikiba, ilil weik upnaba, talima uk, dilamsuk ning ara, tuba tonap, uk kum dinamsile. Min arye, sik dana-dana tam ulamik nang arye, ‘Sik Israel nang ara, malye ninguk wininyake,’ tenebuka nalibuka malye weik ulamikba, ‘Naʼ tenen nang, ikinuk ulamik bukni, narye aning nirya winipnamna deice arye, sikce, ‘Se, dipkoprob Allah Yahweh, el mikip deice aryuk, ninye mutuku sirya, im sirya nirya, sik weik deiyoknye ulule,’ tenen, biknamake.
Anggun tilila yupu peterelulum nabi-nabi nang ara, wininamlum bukni, na Mika bira, Allah Yahweh arye, nati bico tenenilirye, el Dib Kanye ap, el mikip ap areniliba, na talima pum tam weknilirye, langdinulule. Wininulula deice, elcuk nati, moubuka kel bikna deiyok ning ap, diksukum winina deiyok ning ap, dipkoprob kibuka, yupu lipsisikuka bokolina deiyok ning ap areniliba, moubuka tenepnirye, teleb diksukum winibuka unune. Wininuna deice arye, Israel ninye nirya ati, “Anggun malye winilulumce, Allah el yupu yanilulum ning ara, ani,” nyabuka, lakak arye nyanamne. Aning atonun, na ilil una kum kanye bobuka, adeice arye, Yakub elce deiamukba, dadeipdanin yangalamika ani, wini talak amutuku noutamak unyak ninye ati, “Anggun pia malye weik winilulum ning ara, ani,” nyabuka, lakak narye nyabuka delinamne. Nabi Mika birye nyabuk. Nyabukopura, ayupu ton dukdongobuka nyabuk.
Ati, sik amalye weik wininyaka deiyok nang arye, yuk nang nirya ati, malye winilinyake. Winipmanto ara, taca ning luksiliba, lik ulamsil touk, malye winilisinyake. Tonda tace ning, weika arye papliba, cang weik akunum upliba, tilib weik uplirye, ninye arye abisik kum binmanto ulamap touk, sikce teleb ban bisik sekelongosinyake. Mitik teleb ubuka unyak deiyok nang babye, pia kwanim bisik banyaka ati, sik nirya ara, dipkoprob malyeuk wininyake. Winimunya ati, Allah arye anggunti. weik arye wenepnusile. Anggun malyeuk winimunya dekna ati, Allah arye yupu bokeipsilirye, wenebuka oplopnamsile. Wini talak akunum dam uple nyapsine. Ara, Allah arye, “Sik amalye unyak ninye ati, malye kipdeipnamle,” nyapdeiamuk talak akunum dam uple.
Ninye kanya kum opsitinge bukni, nong ara opnamsiyak nang ati, ilil una kume. Bukni, ninye malye-malye weik unyakba, weneplirye, uku din mutuku dongoplirye, ninye nong ap, kanya ap, obuka sirya daknamsilanye, elti, ilil unamsile. Ara urdem ati, kum nyapsine, ‘Allah arye wenebuka opsilyak’ tenen, elti, ilil unamsile.
Peterus arye nyanmokura, akekenmek nang arye, Peterus ap, Yohanes ap, sik ilil kum arye mikip aryuk wininmarikak eibikopura, ‘Anang ara, sekolah deice arye kum kel bikamrik nang, sik talye nang ururake,’ tenebikce lukdayik bukni, ‘E ara, Yesus ap, abitinye nang ap, neika ulamika deice arye, mikip yupu arye nyanmasirake,’ tenebik.
Nyabuka wenebik bukni, Peterus ap, Yohanes ap, sikce tamubuka nyaprik. “Anggun bidamnang tenebuka wipnalume. Allah el kanye pia teleb tenesilye ning ara, anggun deiyok nang arye nyanmasulum yupu kekebuka dobolbanamap do? Allah arye elce nyalisulul yupu kekebuka dobolbanamap do? Ati, ‘Teleb winina ara dan ning do?’ tenen, anggun bidamnye tenepnululume.
Tonda na kayapu, nati Allah moronamnulume. Ara, ‘Paulus bira yupu nyanamle talak nirya ara, Allah arye, teleb yupu arepliba, teleb kibuka peterenamle’ tenen, Allah moronamnulume. Tonda, Paulus birye, ‘Ayupu ati derepnamniyak do?’ tenen, ‘Ilil kumce, mikip asa ubuka, Allah el laka teleb yupu, teleb kibuka petereptue’ tenen, anggunce nati Allah moronamnulume. Allah arye, el laka teleb yupu deiyoknye bira, minop talak duknyamuk bukni, wini talak akunum laka kipdeipsuk ati peterenyabe.
Winibuka unamlum talak nirya ara, yuk nang arye, ‘Aning ara, nun like’ tenen, yaninamsiake. Wininamsiak bukni, aninye ati, ilil pia kum unamlulume. Ilil pia kum umunye deice arye, anggun yanisikce nang ati, laka kinamlulume. Diba tenena kum nang arye, kel kipnamak ning ara, ani. Ara, diba tenenyak ninye ara, Allah arye, lyebuka dopropnamle bukni, sik diba tenena kum ninyeuk ara, kume. ‘Se, Allah arye wenebuka oplopnamsile’ tenen, kel kipnamake. Ara, sik malye nang kel kipnamak ning ati nyapsine.
Mikip arye pil donamlyame nyapmakina deiyok ara, Allah El Dib Kanye mikip arisilye ning ara, ‘Ilil asa unamak’ tenen, kum arepsuke, aning kum bukni, mikip una ap, yuk ninye nirya ati bico tenena ap, ‘Talye luba kibuka kum unune’ tenen, kanye kalikildana ap, ‘Ateleb ning nirya wininamak’ tenen, El Dib Kanye mikip arisulula ati nyapkine. Allah arye, ilil una ap, teniltona ap, tenen ning ara, kum arisulule. Talima darapdongobuka, mikip arye talye luba kibuka un ning arisulule.
Tonda Musa arye, Allah ati diba tenelamuka deice arye, ‘Mesir mutuku weik ninye deiyoknye Firaun arye derepnilyak’ tenen, ilil asa arye, Mesir mutuku batakuka, yukak biyuk. Talye ninye asing arye kum eipmantonye Allah ati, Musa arye eibuka anya arye, ikin ning weik el nong deice deiyamikba, ikin ulamuka babye, pia kum bataklamuk.
Bukni, anggun telebuk ubuka upmunyopura, sik malye nang arye ikin ning anggun nong deice deipsikcopura, kanye deibuka, ‘Telebuka,’ tenenamlulume. Allah arye kanye deipsilirye, anggunti teleb updeipnamsil atia. Yata ninye do nirya, sikti, ilil kum unamsile. Tonda sik diba tenena kum nang arye ilil ulul ning ati ara, anggun diba tenena ninye arye aning ati ilil kum unamsile.
ကြော်ငြာတွေ