Tonda, na Nehemia ap, na kwit capu ap, na mapu ap nun nirya arye, sik yuk Yahudi yala ninye, sik melina ati, uang yo bok ap, gandum ap, tia talak ati arenyabe. Bukni, nunce auang yo bok dolonyak ninye ati, ‘Weik arye tabakuka arenamsulume,’ kum nyanyabe. Ati ara, anggun amutuku deiyok talibuka ululum nang arye, sik yuk Yahudi yala ninye anggun amu tam unyak ninye ati, ‘Tia ati doproplum uang yo bok tamubuka arenamsulum talak ara, weik arye tonap tabakuka arenamsulume,’ nyaplum ning ara, adiparyuk bataklulume.
Yehezkiel 18:7 - Eipomek7 Tonda yuk nang arye, el yo bok do, yuk ning do, tia talak ati doprobikirye, dabolamica talak ara, elce sik nong deice, ikin ning ton kum delilule. Yuk nang ati, ikin pil kum dilule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniak ca, tenepnamsil’ tenen, el bona ning pununa ati, areamikce ning ara, ateleb ululnye birye, ubula kum dololule. Sikce el ning tia talak ati dopromice ning, tamubuka arebicopura, elce sik ning tia talak ati, dadeiamlye ning dobuka, adiparyuk tamubuka arelule. Tonda, ateleb ululnye bira, yuk nang ning, talye ubula kum dololule. Tonda, yuk nang din patapliba, elce melibuka arelule. Yuk nang ton, baju kum ati, nong banang ulamice ninye ati, melibuka arelule. Atonye bira, pia telebnye ulule. အခန်းကိုကြည့်ပါ။ |
Yehezkiel 18:7
61 ပူးပေါင်းရင်းမြစ်များ
Ara, minop talak dodarapce dipdongobuka, winipnin yangalamika ani, wini talak babye, ance an kayapu koproba ap, an yala nang koproba ap, yuk nang ap ati, nyalamlume. “Anda patapmakila ati, na yo bok ara, tia talak ati arepsine. Bukni, ‘Anggunce na yo bok tamubuka, kum arepnamnulumʼ tenen, anggun talilulum teleb ning, baju do, yuk dengna weik ning do, aning dobuka, arepnumunyeba, narye aning nirya talinmanya ani, aminyan talak, anggunce namin ning yo bok tamubuka arepnumunyopura, anggunce arenamnulum dengna weik ning ara, tamubuka arepnasinarya!” nyalamlume. Nyalamluma deice arye, an tam nang, sik nong deice ara, ikin weik ning delilamlume. Tonda, anang arye, winilamikba, an yo bok kum tamubuka arepman kumto upkikopura, ance sik anang baju ap, yuk bona ap, adiparyuk ubula alubuka dololamlume. Winilamluma deice arye, pia malye ulamlume.
Sik ni yapu akunum dibikirye, batakiceba kwaknamnanye, el bidamnye weilul keledai basam ati, sik malye unyak nang arye, alubuka doprobikirye, libuka bobanyake. Tonda, amalye nang aryuk, youwak kil ati, “Anda nunti, “Yo bok arepnutume,” nyabuka, moropsulumba, arebupu ning ara, tamubuka min kum arepmasila ati, amoropmasulum ning enamsilam talak ara, nunce arepkupu ning pununa ati, nunce an sapi basam dobuka, nun aik dam deipnamabe,” nyabuka, alubuka doprobikirye, delilbanyake. Aning wininyaka ara, pia malye wininyake.
Tonda, pia malye winin nang arye, sik ni ap, sik nin ap, pia kum ulamdiceba, kwaknamne mapu ara, alubuka dolonyake. Ara, yuk kilapu arye, kwaknamne mapu ati, moum yung tuba arebice talak ara, mikip arye amapu dolonyake. Tonda, aning-aning kum talenyak nang, talye bona utotoa kum nang arye, yo bok pataplyopura, malye nang dam binuka, “Tia ati arepsutume,” nyabuka morobikiba, arebikcopura, dolonyake. Bukni, aminyan talak, sik bona utotoa kum nang, ayo bok tamubuka arepmanto kum ubikcopura, sik malye winin nang arye, sik mitik mapu ara, alubuka dolonyake. Ara, sik ning doprobicopura, abona utotoa talina kum nang arye deibikce mi ara, aning pununa ati, alubuka dolonyake.
Winipmanto ara, ninye arye, weik weisa ubikceba, dirina weik uplyeura, yuk nang dana-dana tam nirya, teleb kibuka eililamak touk, sik diksukumuk wininyak nang babye, sikti, teleb wininyaka deice arye, yuk nang weik arye melikinyake. Ara, sik diksukum wininyak ning, yuk nang eibikceura, ‘E, teleb winin ning ara ani,’ tenen, kel biklamaka atia. Tonda, sik diksukum telebuk wininyak nang arye, yuk nang ati, bico tenekirye, teleb kibuka melikinyake. Tonda, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu moubuka talikirye, telebuk wininyake. Ati, yuk nang nirya ati ara, teleb kibuka wininyake.
Tonda, Allah ati diba tenebuka, pia teleb diksukumuk wininyak nang arye, yuk talye kankan nang, aning-aning nirya, kum talinyak nang ati, bico tenekirye, anang sik patan ning weik arye, talye lukdanuka melibuka arenyake. Allah arye, “Aning ara, wininamlume. Aning ara, pia kum wininamlume,” nyapdeipsuk yupu, aninguk talibikirye, sik diksukum telebuk wininyak nang ara, sik diksukum wininyak ning babye, pia min kum upnamle. Tuba aupnamle. Tonda, yuk nang nirya arye sikti, ‘E, aning ara, dipkoprob teleb nang unyake’ tenen, sikti, si erebikirye kinauk wininamake.”
Na mapu koproba, anggun Israel nang ara, anggun talilulum yo bok noutam arye, kankan nang ati kintinibuka, tia arelamlum ning ara, sik kankan nang, ayo bok tamubuka arepnamak talak ara, ‘Yuk yo bok ton eitam ap tabakuka arepnilyame,’ kum nyapnamlulume. Ara, yuk nang, sik yo bok weik talibikirye, atalak-atalak nirya noutam ara, kankan nang tia talak ati, arelamak nang arye, ‘Na ning areamse ning ara, tamubuka arepnamnilam bukni, minpola yo bok weik tonun ton, uang bunga ton tabaknimince, tamubuka arepnilyame,’ nyalamak touk, na mapu koproba arye, aning kum nyanamlulume.
Winipmanto ara, an kwit birye yo bok pataplyeba, ance ayo bok tia ati arepmince, elti, ‘Aning dipkoprob tamubuka arepnamnilamʼ tenen, “An teleb ning, cang baju, buppu kin ning ara, tia ati dopropnirye deipmanya ani, ance na yo bok ton tamubuka arepnamnilam talak ara, acang baju ton tamubuka arepnamkine,” nyana meme. Aning ara, kum nyanamlum bukni, el baju tia ati dopropmaminyopura, asum keting kum kumupmalye talakuk, adiparyuk tamubuka arenamlulume.
Anggunce ninye asik nang ati, ikin ning, sik nong deice kum deipnamlume. Aning ara, talye ati kum nyapsine. Deiyok ara, anggun babye Mesir mutuku ulalum talak ara, amutuku nang arye, ikin pil dilamsikba dolamlumba, pia mambul kanye bomlum ning ara, anggun akunum bikamlume. Minop talak ikin ulamlum ning ara, luba kina meme. Ati ara, anggun mutuku noutam unamak ninye asik nang ati, teleb ubuka melinamlume. Ikin ning, sik nong deice delina meme.
Yatanye do, talye bona utotoa talina kum ninye ati, sik nong deice ikin ning weik arye delilulnye bira, bona utoto talina kum ninye kwepdeiamuka deiyoknye, Allah ati, ‘Na like,’ tenena atonun ulirye, Allah ati yanilule. Bukni, yatanye do nirya, mitang ati imun kanye bobuka ukirye, talye bona utotoa talina kum unyak ninye ati, bico tenelirye, teleb ubuka melilulnye bira, bona utoto talina kum ninye kwepdeiamuka deiyoknye Allah atibuk, kibuka si erelule. Allah arye anye biti, kanye delinamle.
Yata ninye do nirya, sikce bona utotoa talina kum ninye patanmalye ning ati melibuka arelamak ninye ara, sik bona utoto talina kum ninye melinamaka deice arye, sik bidamang patanamle ning nirya, pia kum danin banamle. Bukni, yata ninye do nirya, bona utoto talina kum ninye sik patanmalye ning ati, ‘Nunce kum melinamabe’ tenen, asing kulongonyak ninye ara, ikin upnamle. Ara, yuk nang arye sikti, ‘Sik anang ara malyeuk unyake. Yuk ninye ati bico kum tenesinyaka anya arye, sikti, supnamabe,’ tenenamake. Ati, aminyan talak ninye melina kum ninye ara, ikin kanye bobuka unamake.
Yatanye do nirya, ‘Bona talina ninguk taliptinye,’ tenebuka ulamlinye bira, malye winin ninguk ulule. Anye birye, yuk nang ati, ‘Yo bok arepkiniba, tia talak noutamak taleamniminye ani, aminyan talak ayo bok tamubuka arepnamnilame,’ nyanyak bukni, ayo bok tamubuka arepnamak talak ara, “Uang yo bok weik tonap tabakuka arepnululume,” nyabuka, ikin weik ning anang nong deice delinyake. Wininyak ninye ara, ‘Weik arye tabakuka doproptinye,’ tenenyak bukni, aminyan talak ara sikce dopropnamaka yo bok ap, yuk bona weik talin ning ap nirya ara, kum danin banamle. Allah arye, ikin ning sik nong deice deipliba, ‘Bona weik talinye uptinye,’ tenelulnye bira, aminyan saknamle. Bukni, Allah arye melipliba, ninye bona utotoa talina kum ninye ap, mikip pia kum ulamice ninye ap ati, bico tenebikirye, teleb ubuka melinyak ninye ara, Allah arye erepdeipnamle. Aminyan sirya talak ara, sikcuk bona weik talin ning dopdopnamake.
Winipmunyopura, teleb ninguk winipra banamlume. Ara, diksukum un ninguk, kel bikra banamlulume. Ninye ati yupu lipsisikuka bokolin nang babye, diksukumuk nyanamlulume. Tenepce arye, tilila yupu nyabuka, kum nyanamlulume. Winipmunyopura, youwak kilapu do, kwaknamne mapu do, yuk nang arye, sik nong deice ikin ning delinamak talak ara, angguncuk lipsisikilinamlulume. Sik bidamang arye kum melipdanmanto ninye ati, melipnamlulume.
Na Allah arye nyasunune. Yata ninye do nirya, sikda teleb kibuka ubikirye, tilila yupu nyana kum diparyuk, dipkoprob yupu uk nyabuka, diksukumuk unamak ninye ara, amutuku noutamak unamtinge. Tonda, sikce, ‘Aning-aning nirya kum talinyakce, talye bona utotoa talina kum ninye ati, ‘Dauplye’ tenen, yaniltanyaka deice arye, nun dem aryuk amutuku ning nirya dobuka taleptibye,’ kum tenenyak ninye ara, amutuku noutamak unamtinge. Tonda, ninye yupu lipsisikuka bokolina talak ara, ‘Malye winipmakibuk, yo bok weik arepsitingba, aninye kum wenepnuyabe,’ kum tenenyak ninye ara, amutuku unamtinge. Tonda, yuk nang arye, ‘Ninye optibye,’ tenena ap, ‘Yuk malye ning winiptibye’ tenen, ning ap, yuk malye nang arye malye-malye wininyak ning ati, ‘Kum eipnuyabe,’ tenebikirye, sik bidamnye arye asing kulongonyak ninye ara, amutuku noutam unamtinge.
Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.
Na Allah Yahweh arye, anggun nirya ati nyapsine. Anggunce, yuk nang sik dam ara, diksukum teleb piluk donamlume. Ara, narye, ‘Aning wininamlum. Aning ara, pia kum wininamlume,’ nyapdeipsise yupu atouk winibuka, pia diksukumuk wininamlume. Tonda, ninye yupu bokolin talak ara, dipkoprob sik winilamak touk bikmunce, teleb kibuka yupu nyapmunce, wenepnamlume. Talye-talye winina kume. Mikip unyak nang arye, anggun amu tamuk unyak nang ati, ikin ning, sik nong deice deibikcopura, anggun deiyok nang arye, aikin unyak nang ati, lobuka melipmunce, lyelinamlume. ‘Teleb mutuku noutamuk uptibyeʼ tenen, yuk mutuku arye, anggun mutuku yanuka, tikilyangan nang ap, tonda winiryuk nenmace nang ap, yuwak kilapu ati, ‘Sik ning alubuka doproptibyeʼ tenen, pia kum moronamlume. Tonda, ‘Anang ati, yanipdongobuka optibyeʼ tenen, sik dam ikin ning kum delinamlume. Tonda, yata nang do nirya, sikce deiyok kum ati, malye kum winipmace buk, anggun deiyok nang arye, anang ati, talye lukparabuka, kum opnamlume. Sikda, malye kum wininyak nang ati, amutuku noutam arye, ninye kum onamlume.
Sik Sodom mutuku noutam ulamik nang nirya arye, malye winilamika deiyok ara ani. Ara, diltaknauk ulamik. Tonda, sik din ning yala-yala nirya ara, pia weik tonun, kintinip deiamik ning arye dilamikce, maknya kipdanuka ulamikce, namin arye, talye tunim abuka, kanye deibuka, teleb aryuk, pia dukdongobuka, neika ulamik. Bukni, sik aning-aning nirya, kum uamuk nang, sik pia talye kankan nang ap, aning-aning kum uamukba, pia patanauk ulamuk nang ati, ‘Sik anang ara, dauplye’ tenebuka, bataklamikce, pia kum melilamik.
Tonda, yuk bona utotoa talina kum nang arye, anye bira el yo bok do, yuk ning do, tia talak ati doprobikirye, sik patan ning dekuka doprobikirye, dabolamica talak ara, elce sik nong deice, ikin ning weik delilule. Tonda yuk nang ati, ikin pil arukulule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniakce, tenepnamsil’ tenen, el ning dekna pununa ati, areamice ning ara, amalye ululnye birye, ubula dololule. Sikce el ning, tia talak ati dopromice ning, tuba tamubuka arebicopura, elce sik ning tamubuka kum arelule. Tonda, amalye ululnye bira, yuk nang, sik ning talye ubula dololule. Tonda, yuk nang din patana ap, baju kum ati, nong banang una ap, ulamice talak ara, elce melibuka kum arelule. Tonda, anye birye, amutuku unyak Israel ninye arye, Isa Mutuku Dongonye si erebikirye, ‘Nun ni yapu ukirye, melinamsiyak’ tenen, aisa urasin atonun ubuka memamice ning ati, el asing dilamlirye, ‘Aning ara, nati melinamnile,’ tenelule. Atonye bira, pia malye weik ulule. Ati, na Allah arye, ‘Aning ara, na pia like,’ tenenun ninguk, winilule.
Tonda, anye birye yuk ninye nirya ati, malye kum ulilule. Atonun, yuk nang arye, el uang yo bok do, yuk ning do, tia talak ati doprobikirye, dabolamica talak ara, elce sikti, ayupu kum nyalule. “Aminyan talak, ‘Dipkoprop aning tamubuka arepnamniak’ tenen, na ning dekna pununa ati, anggun mambul ning arepnululume. Kumopura, na ning tia ati, kum doproptume.” Aning kum nyalul bukni, sik ning dolona kum diparyuk, yuk nang sik patan ning ati, talye mangkau kibuka melilule. Ateleb ululnye birye, ubula kum dololule. Tonda, yuk nang din patapliba, elce melibuka arelule. Yuk nang ara, baju kum ati, nong banang ulamice ninye ati, melibuka arelule. Atonye bira, teleb winilulnye ulule nyapne.
Bukni, yatanye do ninye nirya, el li koprop arye, tilila yupu nyalamuk ning ap, yuk nang ikin ulamik talak, sik yo bok tabakuka, ubula arye dololamuk ning ap, el kayapu nang, sik ning ubula dololamuk ning ap, el yala ninye noutamak, yuk malye winin ning, ayala-yala nirya, winilamuk ning nirya ap ati ara, adeiyok ati dipnamlarya. Anye bira, elcuk malye ulamlya deice arye, wenebuka opnyopura, dipnamlarya. Ara, urdem ati kume. Deiyok ara, el malye winilamuka atia. Na Allah arye nyapsine, nyabuk.
Teleb winin ning ara, winipmanto ning ton nyapnusine. Ara, anye, ‘Min dipnamne,’ teniplirye, diksukum winin ning winipnamle ning ara, ani. Elce ninye yuk nang ning alubuka dololye ning, anang ati, ila tamubuka arepnamle. Tonda, aning-aning pataplinye birye, ‘Amio, yo bok tia ati, arepnutumba, aminyan talak aning nirya tamubuka arepnamkine,’ nyabikiba, el anye birye, ‘Yo, yo bok tia arepkitinye bukni, ‘Aning nirya tamubuka arepnamnilamʼ tenen, el lakina ati, abona dobuka, na dam deipniminba, aminyan talak, na yo bok arepniminyopura, abona tamubuka arepnamkine,’ nyalin yupu nyaplyopura, dipkoprob abona dobuka, aning deiyok nang ati, tamubuka arepnamle. Tonda, ninye deiyok nang arye do, na Allah arye do, ‘Aning winipnamlume. Aning ara, pia kum winipnamlume,’ nyapdeipmap yupu, kekeplirye, aninguk talibuka winipnin yanganamlanye bira, aning tenipnirye, anye biti kam una deiyok ning arepnyeura, dipmalya babye, aminyan talak dipkoprob kam pia unamle.
Ati ara, na deiyoknye, ance na nyapnye yupu kekepnilyame. Winipmince, ninye bona utotoa talina kum nang ati, sik dam teleb kibuka pil dopmince, sikti noutam wilibuka delinamlame. Aning winipminyeura, Allah arye anti, pia kanye delinamkile. Bukni, narye nyapkise yupu luba kipmince, aning kum winipminyopura, tamubuka kanye ikin upnamkile. Daniel birye, weik deiyoknye Nebukadnesar biti, nyabuk.
“Ton ning ara, anggun yala nang babye, anggun damak unyak nang babye ati, tilila yupu nyana deice arye, minina yupu nyana ap, tenepce arye nyana ap, sik ning ubula dolona ap ara, pia meme. Tonda sikce, ‘Anggun melina ati, pil dobibiba, dekna ning dopropnamabe’ tenen, pil melibuka dosinyak ninye nirya ara, malye ulina kume. Sik pil akunum dobikcopura, asum aryuk, sik dekna ning arepnamlulume. Anggun pil donmasica ati, dekna dolon ning ara, mapmamunya ani, beren tam arye arena meme. Pil donmace sumuk, arenamlulume.
“Anggunda, ‘Pia dipkoprob unamap’ tenen, diksukumuk wininamlulume. Ara, ‘Teleb upmak do, kum do?’ tenen, yupu talina ap, yupu bokolin talak ap nirya ara, diksukum yupu uk talibuka wininamlulume. Atalak ara, bona utotoa kum ninye ati, ‘Se, bicoe, sik malye ning daupmalye,’ tenebuka winina kume. Tonda, ‘Sik weik tonun melipnamabe,’ tenebuka winina meme. Aning atonun, bona weik talin nang babye ati, ‘Malye winipnamak bukni, sikda bona weik talin nang ati, daupmalye’ tenen, anang ati, ilil tenena pia meme. Bona utotoa kum nang babye, bona weik talin nang babye, diksukum ubuka, yupu teleb kibuka, lipsisikuka bokolinamlulume. Sik malye winibice nang ati, ‘Na kwit capu awinipmace,’ tenebuka, ‘Sik malye ning daupmalye’ tenena kume. Yuk ninye nirya ati, diksukum yupu uk, talibuka lipsisikuka bokolinamlulume,” Allah arye nyabuk.
Tonda, aketing tamun noutam ara, anggunce anggun kwitcapu nang koproba, Israel nang arye taleamice tuku, patapsilirye, ‘Winipnuname,’ teneprumunce, sik tuku dekmunyeura, dipkoprob atuku winilamle touk, yo bok teleb kibuka arenalume. ‘Yo bok mitika aryuk arepnuneʼ tenen, kanye pum tam tilila yupu nyana kume. Tonda, tilila yupu nyana deice arye, yo bok mitika aryuk arena meme. Dipkoprob ninguk arepmunce, deknamlulume. Aning atonun, anggun kwit birye, “Amio, an taleamlum tuku deknune,” nyaplyopura, atuku el dekna dipkoprob wamlye touk, yo bok moropnamlulume. Lak ninye kekenak arye, laka nyapnulyame. Tuku malye upmalyebuk, kwinisa dobuka, tenepce tilila yupu nyabuka, yo bok weik tonun dolona meme.
Allah Yahweh arye, ayupu ton nyapdeibukba, Amos birye kekebuk. Sik Israel yala ninye arye, tuba-tuba weik malye wininyaka ati, dipkoprob narye, sik amutuku ninye ati, wenebuka opnamne. Sik malye winilamik ning ara, namin kiyamsirye, adiparyuk wenebuka kum oplopse bukni, wini talak ara, sik malye winin ning weik wininyaka ati, aninye opnamne. Aninye opnamne ning ara, pia dipkoprob kum bataknamne. Deiyok ara, sik Israel ninye arye, pia diksukumuk unyak ninye ati, ‘E nun kayapu nang anye,’ tenena kumce, ‘Kume, anang ara, nun pil donamsiyaka ati, aninye tapu koubikirye, bobuka sik aik binuka deibipyopura, Pil donamsiyake. Sik dekna ati, sikce dekna weik ning, el si perak arepnamsulume,’ nyabuka bobanyake. Aning wininyaka atonun, aning-aning nirya kum upmale bukni, talye bona utotoa talina kum unyak ninye babye, atonun ubuka, ‘Nun pil talye donamsiyak’ tenen, tapu koubikirye, bobinuka yuk nang ati, ‘Dekenyak ning kum bukni, yan ongona ara, sandaluk arepsumunce, aninye dopropnamlume,’ nyabuka bona utotoa talina kum ninye dekenyake. Yuk nang arye, bona utoto talina kum ninye, akunum dekicopura, ikin pil dinyake.
Sik Israel ninye ara, yata talye ning do nirya, aning si erena ati, yuk nang arye, ‘Kam ning obuka, si erenyap ning arenamap’ tenen, pala keil taplakuka, delilamakak nirya ara, aning dam talye kanye bobuka manyake. Tonda, talye ning ati, si eren aik noutam talye-talye mapnin bakce talak ara, ubula dolamik baju deice arye manyake. Ara, yuk ninye ati, uang yo bok tia arebikirye, ‘Ayo bok tamubuka arepnamsiyak’ tenen, “Anggun teleb baju arepsupu ning ara, nun uang yo bok tamubuka arepsumunyopura, abaju tamubuka arenamsiyabe,” nyanyak bukni, dipkoprob tamubuka kum arinyake. Tonda, Allah, na si eren aik noutam, pil donyak talak ara, ubula dolamik uang yo bok deice arye, deklamik anggur mek kwebuka dinyake. Winibuka unyaka deice arye, sikce na Allah ati, si yaniltakaninyake. Allah arye nyapdeibukba, Amos kekebuk.
Allah Yahweh arye nyalule. Sik Israel ninye ara, pia dipkoprob teleb ton kum unyake. Teleb winin ning ara, akunum luba kibik. Bukni yu weik upliba, sik yuk nang ning nirya dalubuka dolonyake. Yu upliba, ninye ona ap, sik ning ubula dolona ap, ulamika deice arye, yuk mutuku ninye taleamik ning weik dopromik. Winilamikce, abona-bona nirya, sik keil arye deibuka, domik aik pum tam dongolamik. Ati, sik Israel ninye ara, pia diksukum winin ning ara, ton kum wininyake. Sikda pia malye-malye ninguk wininyake.” Allah arye nyabukba, Amos kekebukce sekuk.
Se, anggun nirya arye tenemunce, nyaluluma ara, “Allah arye nun malye wininyap ning ati, nun nong deice ikin ning deipnamsil sum ara, kum tenenamabe. Atalak aryuk, kanye imun ning kum yanamsile. Aning kum bukni, pia ouku weikto daunamabe,” nyalulume. Bukni, anggun ayupu nyalulum ninye nirya arye, anggun malye-malye weik winilulum ning deice, Allah arye wenepnamsil talak ara, akunum dam uple. Weik arye wenepnamsil ning ara, anggunce, anggun bidamnye arye, batakaldalulume. Allah arye anggunti, wenebuka, ikin ning deipnamsil sum ara, akunum dam uple.
Yata ninye do nirya, sikce talye bona utotoa weik talina kum ninye ati, ikin ning dobuka, sik nong deiceuk, delilulum ninye nirya ati, sikda bicoe. Allah arye anggunti, weik tonun wenepnamsile. Lukunyan mapnukce talak arye, ‘Ninye yuk nang ati, ikin pil dipnamabe,’ nyabuka, yupu talenmaca ani, bereklyopura, beren tam talak ara, adiparyuk asisikmakce touk, ikin ning dobuka, sik bona utotoa kum ninye, nong deice delinyake. Ara, sik anang arye, deiyok koubuka, yupu mikip arye talipmaca deice arye, wininyake. Sikda weik deiyok nang unyaka anya arye, talye-talye daunyak ninye nirya ati, ikin ning weik, sik nong deice dobuka delinyake.
Anggunda, teleb arye diksukumuk ubuka winitum bukni, sikce diksukum kanye tenibuka, pil donyak nang ati, ‘Nun like’ tenen, yu weik usulule. Atonun, teleb winina babye, ‘Nun like’ tenen, batakalulume. Utenemuyopura, pia malye pil talibuka dolulume. Adeice arye winipmanto ara, na mapu koproba, Israel yala ninye nirya ati, anggunce kam tuba unmacebuk, anggun bol deice ning nirya kolulume. Atonun, sik yok deice ulamle bol nirya koplobuka, tup likuka dololulume.
Ara, talye ati kume. Sik anang arye, ‘Nun talipsukba, si erenyapnye birye, el kanye teleb kilinamsilʼ tenen, sik tilila yupu nyabikirye, talye bona talina kum nang, sik aik pum tam, mikip arye wekelbikirye, anang sik talinyak ning, alubuka dolonyake. Doprobikirye, sik deiyok nang ati, abona ubula doprobikcopura, sik aik weknukce talak ara, abisik bublan noutam ara, kum yanipnamapʼ tenen, kaplibuka poulbikirye, anyaik pum moubuka wekelbanyake. Anang arye, yuk nang talinyak ning ara, mikip arye alubuka dolonyake. Tonda, tenebuka tilila yupu weik nyanyake. Yuk nang ning duknubuka ubula doprobikirye, abona bulubuka, sik isa si eren aik dam yanuka, arebikcopura, anyaik langdilule. Sikda, tilila yupu nyana ap, ubula dolona ap, deice arye, malye weik winiyaka ati ara, na Allah arye, amalye wininyak nang nirya ara, wenebuka opnirye, sirya daknamne!
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Nyabukce, ayupu ton nyabuk. “Anggun mutuku noutamak unyak bukni, tikilyangan nang ap, kwaknamne nang ap ati, diksukumuk wininamlulume. Tonda, youwak kilapu arye, sik patan ning kum upliba, yuk nang ning, tia dopropnamake ati, anggun ning tia arepmunce, ‘Dipkoprop tamubuka, na ning arepnamnil’ tenen, youwak kilapu, sik nong deice ongolamak baju dolona meme. Ato ninye nirya ati ara, ‘Meme, sik talye nang ati, dauplye, sik ning ubula doproptibya babye, yata nang arye nyapsiting do?’ tenen, sik ning ubula dolona meme. Anang nirya ati ara, diksukum ubuka yupu lipsisikuka peterenamlulume.
ကြော်ငြာတွေ