“Biyikura, Elisa birye, sik anang winilye ati, wenebukce nyabuk. “Anggunda, na dam, ‘Yata deiyok ati melipsutueʼ tenen, morolyanmanulum do? Anggun ni yapu ap, anggun nin yapu ap arye, talilamik nabi-nabi nang, sikda Allah ati diba kum tenenyak nang, sik damuk asilbinamlume!” nyabuka, Elisa birye, Israel ninye deiyoknye, Raja Yoram biti nyabuk. Nyabukbuk, Raja Yoram birye, tamubuk nyabuk. “Se, aning ara, nyana pia meme. Deiyok ara, Allah Yahweh arye, akunum tenyamuk touk, nun winilye nang nirya ara, Moab mutuku dam akunum boyanmasile. Bukni, nun kanye imun upsil ning ara, wini talak ara, Allah Yahweh arye, ‘Moab mutuku talibuknye, Raja Moab birye, ayanmangu Israel tam winilye Raja nang ap, sik yin talen nang ara, opnamle,’ akunum tenepmasile, nyabuk.
Yehezkiel 14:3 - Eipomek3 “Se, Yeheskiel, anda ninye sirika arye deipkikba ulyame. Anda, sik ayanuka asipmakiyak nang ara, sik talima noutam nirya ara, talye ning isa si erenyak nang unyake. Anang ara, sik si erenyak ning dobuka, sik asing dinak deibikirye, tuba-tuba si erenyake. Amalye unyak ning deice arye, tuba malye winilinauk unyake. Winipmanto ara, ninye arye bisik banmanbuk, keil arye yan kisok duklyeba, sakuka poulbalamak touk unyake. Wininyaka ati, sikce nati yanuka asipdenetinga babye, yata deiyok ati, sik anang arye moropnamak yupu, kekepnamne do? အခန်းကိုကြည့်ပါ။ |
Yehezkiel 14:3
37 ပူးပေါင်းရင်းမြစ်များ
Narye talye-talye ning ap, nong kum upnamle ning ap, malye winin ning ap, yuk-yuk ning nirya ara, pia kum elinamne. Aning nirya ara, narye ton, pia kum teninamne. Yuk nang do nirya, Allah arye, “Aning ara, telebe, aning ara, pia malye,” nyapdeiamsuk yupu nirya ara, sikce aning yanibikirye, malye winin ninguk talibuka, pia malye wininyak ning nirya ara, nara ‘Pia likʼ tenenuna ati, aning nirya ara, pia kum elinamne.
Ninye kanye talima diksukumuk ubuka unyak ninye arye, Allah morobiceura, Allah Yahweh arye sik morobice yupu kekenamle. Bukni, tuba malye-malyeuk upra banyak nang arye, moronyak ning ara, Allah arye kum kekenamle. Deiyok ara, sikce Allah ati, “Melipsilyame,” nyabuka moronyak bukni, tuba malyeuk unyaka ati, Allah elda sik damak pia kum ulula anya arye, sik pataliba moronyak ning ara, pia kum kekelule.
Allah Yahweh elda, malye winin ninye arye elti, morona ap, ‘Nun malye un ning kilipsilirye, namin kipnamsil’ tenen, teleb ning weik arye arena ap, wininyak ning nirya ara, el kanye deibuka kum dolonamle. Allah arye anang ati yu tenelule. Bukni, ninye ton Allah arye, “Wininamlulume, aning ara pia kum wininamlulume,” nyabuka, nyasilye touk kekebikirye, moubuka wininyak ninye nirya ara, el kanye delilule. Sikce Allah ati, arena ning pia teleb ning kum upmalya babye, sik aninye arye morobice ning ara, Allah kekebuka dopdoplirye, sikti, kanye delilule.
Malye ninguk talibuka ulinye birye, ‘Na malye unun ning, Allah arye kilipnuturye, namin kipnamnil’ tenen, teleb ning boyalirye, Allah ati areplya babye, Allah arye anye biti el kanye pia kum delilule. Aninguk kum bukni, amalye ulinye birye, ‘Aning dobuka Allah ati arepnyopura, Allah arye teleb ning arepnilirye, weika arye melinamnile,’ teneplirye, el kanye talima pum tam ulul ning duknuplirye, atenena deice arye, Allah ati areplyopura, Allah Yahweh arye anye biti kanye pia kum delilule. ‘Anye na like,’ tenelule.
Allah ap, ninye deiyok nang ap arye, “Aning ara wininamlulume, aning ara pia kum wininamlulume,” nyapdeipmace yupu, yaniltana uk unyak ninye ara, Allah ati moroptinga babye, Allah arye ato ninye arye moronyak yupu pia kum kekenamle. Ato ninye arye Allah ati morolamak yupu kekeplirye, ‘Sikce moroniyak yupu ara, na like,’ tenelule.
Na Allah arye nyasunune. Yata ninye do nirya, sikda teleb kibuka ubikirye, tilila yupu nyana kum diparyuk, dipkoprob yupu uk nyabuka, diksukumuk unamak ninye ara, amutuku noutamak unamtinge. Tonda, sikce, ‘Aning-aning nirya kum talinyakce, talye bona utotoa talina kum ninye ati, ‘Dauplye’ tenen, yaniltanyaka deice arye, nun dem aryuk amutuku ning nirya dobuka taleptibye,’ kum tenenyak ninye ara, amutuku noutamak unamtinge. Tonda, ninye yupu lipsisikuka bokolina talak ara, ‘Malye winipmakibuk, yo bok weik arepsitingba, aninye kum wenepnuyabe,’ kum tenenyak ninye ara, amutuku unamtinge. Tonda, yuk nang arye, ‘Ninye optibye,’ tenena ap, ‘Yuk malye ning winiptibye’ tenen, ning ap, yuk malye nang arye malye-malye wininyak ning ati, ‘Kum eipnuyabe,’ tenebikirye, sik bidamnye arye asing kulongonyak ninye ara, amutuku noutam unamtinge.
Aning ati ara, na Allah Yahweh arye, anggunti ayupu nyapsine. Ara, sik malye weik wininyak ning ati, menenga deknirye, ikin ning dobuka, sik deice deipyeba doropnamake. Winipnirye, sik deice aikin ning deipnamaka ara, kum lyepdanmanto upnamake. Aikin ning ara dipkoprob, sik nong deice yanuka dopropnamake. Sikce, nati, ‘Se, nun ni Allaho, ance nun dam yanuka lyepsutume,’ nyabuka moropnitingce, engeptinga babye, ayupu kum kekepnamsine. Anggun ti, kum lyepropnamsine.
Ninye kanye talima noutam arye, tenenyak ning ara, laka kibuka kum biktinge. Ninye kanye pum tam ara, dungnubuka talye-talye yupu uk nyasulula ati, pia yuk ulule. Yuk ning ton, tilila yupu nyalul bukni, ninye arye, sik talima noutam arye teninyaka ara, pia malye weik ulula ati, tilila ning ati, ‘Diba,’ tenebikirye, talye ninguk talibuka unyake. Ati ara, ninye arye, sik kanye pum arye teninyak ning babye, moubuka kum biktinge.
“Yeremiao, ‘Ance, Allah Yahweh ati asipdetumʼ tenen, moropkiyabe. Ara, nun Yerusalem mutuku unyap nang ara, yata wiripnamap do? Deiyok ara, Babel mutuku tam talibuka ulul ninye deiyoknye, el si Nebukadnesar, el ap, el yin talin nang ap, yanmakce, ‘Yerusalem mutuku nang opnamapʼ tenen, nun unyap mutuku dam yanuka warekmasiake. Ati, ‘Allah Yahweh arye, nun melibuka lyena ati, nun deice winipman kum pil dopsutua deice arye, Raja Nebukadnesar ap, el yin talin nang ap ara, namin kipturye, bataksitingba, sik mutuku tamubuka bitingeʼ tenen, ati moropmabe. Allah Yahweh arye, minop talak noutam, yata wiribukabarye talak ton, winipman kum pil domsuk deice arye lyepromsuka ati, ‘Aning ara, tuba tonap winipsutuʼ tenen, moropmabe. Ati, anda Yeremia birye nun melina ati, Allah dam moropnusilyame.” Yehuda mutuku tam ninye deiyoknye, Zedekia birye, ayupu nyapdeibukba, elce dopdeibuk bitinye nang arye, nabi Yeremia dam nyalbidik.
Bukni, yata nang do nirya, sik anang arye tuba-tuba, ‘Nun ni ani’ tenen, talye ning talibuka, si erenyak isa ap, isa si erena ati, memebuka deilinyak ning ap, aning si eren aik ap, patung ap, pia malye yupu nyanyak ning ap, yu kanye teninyak ning ara, aning nirya, pia talibuka unamak nang ati ara, weik tonun wenepnamsine. Ara, anggunce pia malye weike winiluluma deice arye, kanye imun weik dobuka, anggun nong deice delinamsine. Winapnamne deice arye, sik malye wininyak nang ati, wenepnirye, sirya opnamnarya! Nara Allah Yahweh, aning-aning nirya talibuka, eitam erebuka, Pia Mikip Weik Deiyoknye ununa ati, aning nyapmasin touk, dipkoprob nong upnamlarya, nyapsine. Allah arye nyabukba, na Yeheskiel birye, kekepse.
Ati ara, sik anang nirya ati nyapnulyame. Ara, Allah Yahweh el pia deice tam erebuka, aning-aning nirya talibuka, pia mikip ulul deiyoknye, elce nyapmasile. Sik Israel nang nirya arye, ‘Nun ni koproba ani’ tenen, sik talye ning si erenyak isa ati, pia diba tenebikirye, aisa bobuka, anggun kanye talima noutam ara, pia dongonyak nang ara, pia malye tuba wininyake. Wininyaka ati, anang kan-kan arye, tonoknye, na yupu lak nyana deiyoknye, dipkoprob nabi dam yalirye, nati moropnilyopura, na Allah arye, elti, tamubuka lak nyapdeipnamne yupu ara, ‘Isa si eren nang kekeptingʼ tenen, sik wenena ati, yupu nyapdeipnamne.
Ura, aning ara, talye ati kum nyapsine. Anggun moubuka kekepnululume. Yata nang do nirya, sik Israel yala nang do, yuk mutuku arye yanuka, sik ap neika unyak ninye asik nang do? Sikda nati, pera mutuku atonun umunce, isa ati, aning si erena ati, el si ara patung memebuka, anggun dinak deipmunce, si erelulum ning dobuka, anggun kanye talima noutam boplumce, aning ati, pia diba tenelulum nang ati nyapsine. Anggun kan-kan arye, na yupu dipkoprob lak nyana deiyoknye, nabinye el dam yalirye, “Allah tenelul ning ara, lak nyapnilyame,” nyabuka, morobuka, unyak nang ara, na Allah arye anggunti, lak nyapdeipnamne.
Narye, “Apia teleb mutuku kum binamlume,” nyapse deiyok ara, ani. Ara, sik Israel nang nirya arye, ‘Allah nyasilye yupu, nun lik,’ tenelamikce, na yupu moubuka kekena kumce, yaniltanauk ulamnike. Tonda narye, “Aning winina ara, teleb ning, aning winina ara, pia mem ning. Anggun nirya arye, ayupu moubuka talipmunce, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, sikce, ‘Aning ara, mambul weik,’ tenena kumce, asum noutam arye, malye pia weik winilamikce, malye ulamik. Winilamika deiyok ara, sik kanye talima noutam ara, talye ning isa si erenauk tenelamikce, aning atibuk, kanye deibuka, malye weik winilamika atia.
“An Yehezkiel bira, ninye koproba aryuk deipkikba, ulyamnye, ance sik Israel yala nang, sik ninye deiyok nang nirya ati, ayupu nyapdeipnulyame. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye ululnye birye, nyapsine. Anggunda, yata deiyok ning ati, ayanuka yupu nyabuka moropmalum do? Anggunda, talye luba kibuka, na dam yanuka, ‘Allah ati moropnuyapʼ tenen, yanamlum do? Kume, nara Allah, pia kam ununye birye, dipkoprob nyapsine. Anggun yanuka moropmanulum yupu ara, kekepsinirye, pia kum nyapdeipnamsine! Nara Allah Yahweh, aning-aning nirya talibuka, deice tam erebuka Pia Mikip Weik Deiyoknye ununye birye, akunum nyapsina anya arye, pia dipkoprob nyapne.
Aning ara, talye ati kum nyapsine. Anggunce, atalak babye, isa uk talibuka ulamlumce, kam ning opnarye, aning bobuka arelyanganmalum ning ap, tonda anggun mapu koproba obuka bopnarye, isa si erena ati, uku dongobuka arelamlum deice arye, pia malye wininmalume. Dotalak arye dipdongobuka, wini talak babye, tuba winimunya deice arye, anggunce malye kipdanmaluma ati, na dam ton pia kum yanamlume. Isa si eremunya deice arye, malye kipdalum ati, pia na like. Ati ara, anggun Israel yala nang ara, ilil tenena kumce, ‘Allah arye aminyan winipnamle ning ton, lak nyapsutueʼ tenen, na dam yanuka moroptuma babye, kekepnamsin do? Ara, kum winipmanto. Kume, nara Allah, pia kam ununa ati, na dipkoprob nyapsine. Nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, nyapsine. Anggunda, na dam kum yanuka moropnutume. Anggunce, ‘Se, elce nunti, lak nyapsutueʼ tenen, moroptuma babye, kum kekenamsine.
Tonda, yata ninye do nirya, diksukumuk ulamikca ani, aning batakikirye, tuba tamubuka malye winin ninguk ubicopura, narye, “Aning ara, kum wininamlyame,” nyapdeipkise yupu tuba winipminyopura, “Dipkoprop wenebuka opnamsine,” nyapne bukni, na yupu batakuka kum kekepnicopura, sik dipkoprob dipnamake. Bukni, malye ubikiba, narye nyakinye touk, ance, “Na kayapu, anggun malye winilulum ning bataktume. Kumopura, Allah arye wenebuka opsilyake,” nyabuka, akilisal ati, wenebuka kum peterepminyopura, sik malye wininyak ning noutamak arye, talye kanye bobuka dipnamake. Sik malye wininyak ning dekna ati, dipnamak bukni, ance, “Aning bataklulume,” kum nyapminyopura, sik dipnamak ara, an nong deice deipnamkine. Tonda, minop talak sikce teleb winin ning, winilamik ning ara, tuba tamubuka tonap, pia kum tenenamne. Aning deice arye, sikce sik bidamnye ati, kum melipdatinge. Bukni, ance amalye unyak ninye ati, ‘Allah arye wenebuka opsilyak’ tenen, dipnilibuka, wenena yupu kum nyapminyopura, sik dipnamak ninye ining saknamle ning ara, an nong deiceuk upnamkilarya. Winibuka wenepnamkin ati, batakana kum diparyuk, Israel ninye ati, pia wenebuka peterenamlyame.
Allah Yahweh arye, na Yeheskiel biti, nyapdeiamnuk. Se, anda ninye sirika arye, deipkiknye ulyame. An mutuku nang arye, anti yupu nyakikce talak ara, nyalanyake. Ara, sik mutuku noutam, weik asik dobuka ukirye, bai tam poka dam, ara weik cang keil poka tembok dukdongobuka dobik ning dam ap, tonda sik asik yuk-yuk dam ap, bulubuka epdakirye, anti nyalanyake. Tonye birye, tonye biti, sik bidamnye nyalanyake, “Winira yalulume. Arup ara, nun ni koproba Allah Yahweh arye, nyapdeiamsuk yupu, kekena ati, nabi Yeheskiel dam binuka kekepnuyabe,” nyalanyake.
Akunum boyasinyopura, anggun nong nirya ara, narye pia mek diksukum arye, anggun nirya mek likuka, teleb kipdeipnamsine. Winipsinyopura, anggun malye winimunce, Isa Mutuku Dongonye si erelulum ning nirya batakmumce, telebuk unamlume. Ara, narye mek diksukum busubuka, anggun nong deice purupdonoksinya deice arye, anggun talima pum tam malye winilulum ning ap, Isa Mutuku Dongonye si eremunye ning ap nirya ara, kum daneipnamsine.
Aminyan talak ara, Lewi yala nang bukni, mitik tonun bokuka, dopropnamne nanguk, apil dopra unamak bukni, sik Israel yala nang nirya arye, na batakuka isa siuk erelamik talak ara, Lewi yala nang kan-kan arye, ton nang arye deiyok koubuka, isa si eren pil ton melibuka dolamika deice arye, Israel nang nirya babye, atouk malye-malye pia weik ulamik. Isa si erelamika ati, Israel yala nang nirya ara, aning arye tapu koulamukba, malye ninguk winilamik. Lewi yala nang arye, isa si eren pil melibuka dolamika ati, weik tonun wenepnamsine. Ara, na Allah Yahweh, aning-aning nirya talibuka, deice tam erebuka, mikip weik deiyoknye birye, dipkoprob nyalin yupu deice, weik tonun nyapsine. Lewi yala nang, isa si erelamik nang ati, dengna arepnirye, weik tonun wenepnamsinca! Aning akunum nyapsina ati, nong kunupnamle!
Yuk pera mutuku nang arye, anang tomobuka bobinuka, deipnamakak ara, amutuku-amutuku unamak Israel yala nang arye, dabinuka unamak talak ara, sikce nati kanye moubuka teninamake. Tenipnikirye, moubuka biknamniyak ara, ‘Se, Allah arye nunti, wenepsuk ning deiyok ap, elce nunti, talima uk dilamukba, ‘Na like,’ tenelamsuk ning ap, adeiyok ara, nun tia.’ Ara, nunce, nun talima noutam, Allah ati kanye pia kum deiamuba ati, el batakamuburye, talye isa ati wibuka, aning si erelamupu. Tonda, nunce pia malye un ning talibuka, winilamupu ning ara, dipkoprob malye ninguk winilamupu. Tonda, Allah arye, ‘Aning ara, na pia like. Aning nirya ara, mem ning anya arye, pia kum wininamlume,’ nyabuka, lak nyapdeiamsuk bukni, nunce amalye ninguk talibuka, winilamupa deice arye, Allah Yahweh arye wenepsukce, bataksuke. ‘Aning nirya ara, ila tamubuka teninamak’ tenen, winipsuke
Aninguk kum bukni, sik dekna kat weik ning, si emas ap, perak ap, mambul weik ning bukni, ninye weik bisik banyakak talye ning bataklamaka atonun, abisik noutamak yamuplobuka binamake. Deiyok ara, sikce, ‘Se, aning babye, mambul kume. Nun lyena ati, aning babye, dipkoprob pia kum melipsutueʼ tenen, yamuplopnamake. Allah Yahweh el kanye imun weik yu ara, asum arye, sik deice akunum deipnamla ati, sik talinyak dekna weik ning, emas ap, perak ap, deice arye, pia kum lyepdatinge. Aning ara, pia mem ning atonun akunum upliba, Allah arye, ‘Aning ara, na pia lik,’ tenelye touk, akunum winipmale. Dipkoprop, emas ap, perak ap arye, kum lyepdatinge, sik mun kum buklirye, kum boupnamle. Sik din patana weik unamle ning ara, adekna kat ning diptinga deice arye, din patana min kume, kum datue. Dipkoprop ning ara, adekna weik ning talilamika deice arye, sik bidamnye ati, malye weik kipdeipdanamikce, malye winin ninguk talibuka winilamik.
Nyabukce, ayupu ton dukdongobuka nyabuk. Anggunda, malye weik winilulum ning dekna ati ara, luba kanye bon ning arepnamsine. Winipniba, anggun imam-imam nang arye, keting noutam babye, lukunyan babye bisik teleb ubuka kum banamlume. Anggunda, talye kwepdanin bamunyeba, anggun keil yan dum duksiliba, saknamlume. Lukunyan noutam bisik banmamunce, kuna ati dengkepdanin bamunce, anggun keil yan dum duknamsile. Aning atonun, keting noutam babye, anggun imam-iman nang babye, mangkau arye kwepdanin bamunba, anggun keil yan dum dukunamsile. Tonda, narye, ‘Nyanamlulume,’ kum nyapsise bukni, anggun kanye aryuk, ‘Allah el yupu laka nyabuka peterenusiyabe,’ nyabuka tilila yupu nyanyak nabi nang babye, atonun keil yan dum dukliba, saklamak touk unamake. Ara, ‘Dipkoprop teleb bisik banamap ning ara, ani,’ tenen, kum biknamaka ati nyapsine. Anggun malye winimunye ning dekna ati, Israel yala ninye wenebuka opsinirye, sirya daknamsine.
Ara, tukwak unyak nang ap, talye tukwak kam daunyak ning yala-yala nirya, tonda maka yala nirya ap, ikan ap, aning nirya ara, kum kipdeipnamne. Tonda, malye-malye un ninguk talibuka wininyak nang nirya ara, narye lo arepnyeura, yuk nang arye, anang yanuka, obuka sirya daknamake. Winipye deice arye, na Allah Yahweh arye, tukwak nang nirya ara, obuka kum kipdeipnamne. Winipnamne talak ara, tonoknye babye ton, kum kam bataknamne. Na Allah Yahweh arye, ayupu ara, akunum nyapdeipmana ati, aning ara, pia dipkoprob nong upnamle!
Nyabukba, Allah Yahweh arye, ayupu ton dukdongobuka nyabuk. Israel nang nirya ara, na yupu pia kum kekelamikce, aninguk talibuka, kum ulamika ati ara, na Allah arye, ‘Anggunda, na yupu kekepnululume!’ nyapdeiamsise talak ara, sikce na yupu kum kekelamnik touk, sikce nati, ‘Se, nun ni Allah melibuka lyepsilyame!’ nyabuka, morolamnik talak babye, narye anggun yupu pia kum kekelamsise. Na, Allah Yahweh, im deice yin talen malaikat nirya talibuka, sik weik deiyoknye ununye birye, nyapsine.
Amalye winin ning nirya, “Kum wininamlume,” nyapmasina ara, urdem ati kum nyapsine. Pia dipkoprop tenenamlulume. Anggun talye yolana ap, malye-malye winin ning yala-yala nirya ap, ‘Aning-aning nirya, weik arye, taliptinye’ tenen, kanye talima pum tam ‘Se,’ tenenauk, unyak ninye ara, Allah ap, Kristus ap, neika kum uptinge. Ara, Allah ap, Yesus ap lyepsirikirye, nun talima talisirikceba, pia teleb kibuka unamabak ara, amalye winin ning wininyak ninye tonok babye, ansinibuka kum unamabe. Allah arye, amalye wininyak ninye dobuka, pia yukak deipliba, talyeuk unamake. ‘Aning-aning nirya weik arye doproptinye’ tenen, mun tululul nang ara, ‘Dip’ tenena, kum nang arye, ‘Nun ni koprop’ tenen, talye ning ap, Isa Mutuku Dongonye si erelamak nang atonun unyake. Aunyak ninye babye, Allah arye, arenamsil ning dobuka, el ap, neika kum unamake.
Tonda ayupu dipdelulume. Yesaya arye ayupu sekeipsuke. ‘Akeil ara, ninye balelamice anyak, yan dum duklyopura, kwelanyake. Tonda akeil arye, yan dum duklyopura, sakanyake.’ (Yesaya 8:14) Sik diba tenena kum nang arye, Yesus el yupu kum kekenyakce, talibuka kum dobolbanyak anya arye, ninye arye yan dum duklyopura, sakalamak atonun, malyeuk unyake. Ara, talya ati kume. Allah arye aninye ati, ‘Wininamak,’ tenyamuk touk unyake.
“Ikin ulamsuka babye, nati kum bataknulumce, teleb winilamlum bukni, ton ning ara, malye winiplum ning ati, wenebuka yupu bokeipnamsine. Tonok ning ara, anggun kan-kan noutamak ara, ton nang arye minopnye Bileam el nyalamuk yupu talibuka dobolbanyake. Bileam birye, yuknye el si ara, Balak biti laka nyabukba, Balak birye Israel ninye sik kanye talima lipdobukba, malye-malye winilamik. Peterebuka deice arye malye winilamik ning ara, Isa Mutuku Dongonye si erena ati, kam ning obuka arilamik ning tup dobuka dilamik. Tonda, ubula yolana ning aning-aning nirya winilamik. Bileam malye yupu peterelamuka deice arye, Israel ninye amalye ning winilamik touk, anggun Pergamus mutuku noutamak ton ninye arye atonun wininyake.”
Winibukba, Saul birye, Allah el si Yahweh ati, moron deice arye, “Naio, yata wiriptinye do?” nyabuka asipdeyuk. Asipdeyuk bukni, Allah arye elti, yupu tamubuka lak kum nyabuk. Tonda, ‘Yata wiripnaman do?’ tenen, dililamik ning, el si Urim aning ton dipdeyuk bukni, aning bisik arye, Allah arye yupu ton, laka kum nyabuk. Aning atonun, lengdar mana deice arye ton, yupu laka kum nyabuk. Tonda, aminyan winipnamuk ning, laka lena deiyok nang, Allah el nabi nang babye, Allah arye kum melibukba, anang arye Saul biti, yupu lak kum nyabik.