Nyabukopura, Betel mutuku ulamuk nabi, wisinye birye tamubuka, Yehuda mutuku ulamuk nabi ati, tilila yupu nyabuka ara, “Na babye nabi unune. An uminye touk, na babye unune. Allah el im deice pil donanye, Malaikat arye, na dam yanuka, nyapdeipmanilce, ‘Anye bira bobinuka, an aik boyanulyame,’ nyapmanile. Ati ara, anda na aik din neika dipnuname,” nyabuka, tenepce, tilila yupu deice nyabuk.
Yehezkiel 13:9 - Eipomek9 Ati narye anggun talye-talye yupu nyalulum nabi-nabi nang nirya ati, na mikip taruk deice arye, ikin ning deipsinirye wenepnamsine. Winipnyopura, anggunda pia bicoe. Anggun talye-talye yupu nyalulum nabi-nabi nang ap, tonda talye ning tenilamunya ani, ‘Lengdar mana deice arye, aning ara elce lak kipdeipmasile,’ nyabuka, nyalulum nang nirya ara, wenepnamsine! Anggun anang nirya ara, na mapu koproba, Israel nang deiyok-deiyok nang arye, yupu tabikirye, ‘Aning ara, winipnamabe,’ nyabuka, sisikinyakak ara, sik ap neika wekelbana meme. Tonda, Israel yala nang, yala-yala yuk-yuk, si sekna buku deice sekuka deiamsikceba, wamsilya noutam arye, kiliplopnamsine. Winipsinyopura, Israel nang noutam bukni, sik mutuku noutam ara, tuba tonap, pia tamubuka kum yanuka wekenamlume. Winipyeba, anggunce, ‘Se, diba, Allah Yahweh elda, pia deice tam erebuka, aning-aning nirya talibuka, Pia Mikip Weik Deiyoknye, dipkoprob aulule,’ tenen, biknamnulume. အခန်းကိုကြည့်ပါ။ |
Yehezkiel 13:9
40 ပူးပေါင်းရင်းမြစ်များ
Ara, yuk nang ara, Tel-Mela mutuku ap, Tel-Harsa mutuku ap, Kerub mutuku ap, Adan mutuku ap, Imer mutuku ap, sik amutuku-amutuku nang ton tamubuka Yehuda tam yayik. Sik ayayik nang nirya ara, ‘Nun apu yapu ara, dipkoprob Israel yala nang ulamika ati, sikce deiamsika ati, nun babye Israel yala nang unyabe,’ nyabik bukni, Israel yala nang arye deipkirikdanin yangalamik nang, sik si nirya seklamik buku noutam ara, ayala nang ton, sik si kum sekik. Sik apu yapu ap, sik yala si ap ara, kum sekika ati, moubuka laka nyapmanto kum ubik.
Bukni, yata nang do nirya, sikce talye tenebuka arye nyan ning ap, talye-talye yupu nyan ning ap wininyak nang nirya ara, na ap neika kum unamabe. Aning atonun wininyak nang ara, yakuka dokwetepnamna ati, na amu tam ukirye, na pil melibuka kum donamniake. Diba, ‘Aning atonun wininyak nang ara, ‘Na pia lik,’ tenenuna ati, sik tilila yupu nyace nang nirya ara, na dam pia kum unamake.
Sik malye wininyak ning nirya ara, mangkau kibuka batakminba, sikda pia ati malye-malyeuk winipra bakiba, weik upra bana telebe. ‘Sik amalye wininyak nang ara, malye un ninguk, tonap tabakminba, pia atibuk, malye winipra banauk unamake’ tenen, moropkine. Sik aninye ati, ila tuba tamubuka lyepmince, teleb kibuka, kum delinamlyame. Yuk nang ara, lyepnalam bukni, sik ananguk ara, kum lyepnalame. Ati, narye na ni Allah, anti moropkine.
Na deiyok ton kum bukni, nati, ‘Optibye’ tenen, yu teneninyak nang ara, yupa ara, pia weik unyake. Winipmanto ara, na kisok deice potong papnuk ning atonun unyake. ‘Deiyok ara, aning,’ tenena kum aniryuk, sikda mikip weik nang unyaka ati ara, nati, ‘Anye obuka, kum daneiptibye,’ teneninyak ninye nirya, pia kum nukmanto unyake. Tonda, sik ning ton, narye ubula dolona kum bukni, “Tamubuka arepsilyame,” nyaninyake. Nyapnikiba, na ninguk, talye dobuka, sik anang ati, talye arenune.
“Tilila yupu uk nyanyaka ati ara, na Allah Yahweh arye nyapsine. Na si deice, sik anang arye, ‘Israel ninye ululum mutuku ara, mal oldana ap, din patana ap, kum upnamsile,’ nyanyake. Nyalamsiyak ning ara, na Allah arye, ‘Nyalbinamake’ tenen, nyabuka, kum nyapdeiamse. Tonda, atilila yupu nyanyak nabi nang ara, narye kum dopdeiamse. Anang ara, tilila yupu uk nyanyaka anya arye, sik anang wenena ati, na Allah Yahweh arye nyapsine. Tilila nabi-nabi nang ara, narye sik dam arepnamne ning ara, mal oldana ap, din patana ap deice arye, aninye obuka batakneba, dipnamake. Anang nirya, obuka sirya daknamne.
Se, Allah anti, an mapu Israel nang, nun nirya arye, ‘Nun ni Allah Yahweh el dem melibuka lyepropnamsile,’ tuba tenenamabe. Nun kanye pum tam nirya ara, an deiceuk deilinyabe. Ton nang ara, anti, batakanamkiak nang ara, ikin ning, sik dam yalyeba, dipkoprob alye upnamle. An Allah ati, ‘Nun likʼ tenen, batakikirye, yuk bisikuk banamak nang nirya ara, dibikcopura, sik akunum dibikce, unyak nang unyak mutuku uk, tuku amu tam, sik dam wekelbinamake. Ara, talye ati kum bukni, sik anang arye, an Allah ati akunum batakikce, donga tam kilongokinyaka ati, dibikcopura, akunum diamik nang dam binuka unamake. Na nio, anda Allah Yahweh, Kam Una Deiyoknye ulyame. Winipmanto ara, anda tukwak mutuku nang nirya ati, kam mek pu atonunye, Allah Yahweh ulyame. Bukni, sik malye wininyak nang arye anti, batakinyake.
Allah Yahweh ara, el yu ubukba, ‘Amalyeuk wininyak ninye ara, wenebuka opnamne’ tenen, kintinibuk ning ara, pia kum bataknamle. Kume, Allah arye, ‘Winipnamne,’ tenelamuk touk, aning nirya ara, akunum uplirye, sirya daklyeura, bataknamle bukni, aning nirya min kum winipmalye talak ara, dipkoprob kum bataknamle. Wini talak ara, moubuka kel kum biknamlum bukni, doyanamle talak, sirya talak ara, Allah el mapu nirya ara, ‘E, deiyok ani,’ tenen, pia moubuka kel biknamake.” Yeremia birye nyabuk.
Allah Yahweh arye nyabuk. “Atalak kiplyopura, Raja ninye deiyok nang ap, tonda ninye deiyok kibuka, amutuku talebik nang ap nirya ara, pin-pin kanye kum upnamle. Lik-lik asa uk upnamle. Tonda, Allah el aik pil don nang, sik imam-imam nang ara, ilil uplirye koulkoula daksaknamle. Tonda, Allah el yupu laka nyana deiyok nang, sik nabi-nabi nang ara, lukdakirye ilil upnamle.
Winipsiniba, yu ninye asik nang arye yanuka, anggun amutuku ulamik nang weika arye, opnamake. Ara, sik yu parang ya arye, anggun amutuku ululum nang, yupa weik tonun obuka, sirya daknamake. Opsikcopura, weik tonun dipnamlume. Diba, anggun amutuku atam, yuk pera mutuku otam, danoutam, mutuku yuk-yuk bikilina ati, wililamik dam ara, narye anggun atam ululum nang wenebuka, weik tonun opnamsine.
Atalak noutam ara, Israel yala nang ululum mutuku nirya ara, pia malye uplyopura, aik oldem upnamle. Anggun weik asik dolamlumak nirya babye, yuk mutuku yu nang arye yanuka opsikirye, sice bukuka bataknamsiake. Atonun, anggun wa wilulum tuku nirya babye, adiparyuk malye kipdeipyeba, aning-aning nirya kum mutuku upnamle. Anggun wenena ati, arepnamsin ikin ning nirya ara, anggun kam tuba unamlum nang nirya arye, ‘Se, Allah Yahweh, elda dipkoprob aning-aning nirya talibuka, Pia Mikip Weik Deiyoknye ulule’ tenen, biknamnulume.
Anggunce, ‘Ninye moubuka eibikirye, ninye arye dipkoprob kum teninamak’ tenen, kurun mek cat dobuka, likamlum keil poka ara, narye pia yu tenepnamne talak ara, aning nirya ulultaknauk upnamne. Amutuku arye, doplum keil poka ara, daluplopniba, el ayukumna ikuka dolalum ninguk, lak uplyeba, ninye nirya arye eipnamake. Acang keil poka ara, adiparyuk dalubuka saklirye, anggun nong deice opsilyopura, anggun nirya kum kipdeipnamsine. Obuka bataksilyeba, tuba kam unamak nang ara, eibikca deice arye, ‘Se, Allah Yahweh elda, dipkoprob aulule’ tenen, biknamake.
Ati ara, wini talak arye dipdongobuka, doyanamle talak nirya ara, sikce, ‘Kume nun lengdar mapmaba deice arye, mambul ning elinyabe,’ nyabuka, tuba kum nyanamlume. Tonda, anggunce, “Kume, nun ap, akunum diamik nang, sik kanye ap, yupu sisikinmapce, sikce nyanmasiak yupu ara, ani,” nyabuka, pia tuba kum nyanamlume. Anggun kanye aryuk, talye tenebuka nyanmalum ning nirya ara, kum kipdeipnamne. Winipye deice arye, na mapu koproba, sik Israel yala nang ara, anggun malye winin ninguk, talibuka ulamluma kan-kan, ulamik nang ara, naryuk lyepdopnamne. Aning nirya akunum winipnyopura, sik amutuku ulamik nang nirya arye, nati ara, ‘Se, diba, Allah Yahweh ara, dipkoprob aulule’ tenen, biknamnulume.
Aning atonun, anggun anang kan-kan nirya arye, na yupu ati, ‘Nun like. Aning kum winipnamabe,’ tenenyak nang ap, na yupu yanibikce yu nang nirya ara, sik ninye asik nang atonun unyak kan-kan arye wibuka, dopnirye, Israel nang unyak mutuku dam deipnamne. Sikce nati, ‘Nun lik,’ tenenyak nang ara, tiya talak ati, na dam deipnamne bukni, sik anang ara, Israel yala nang aminyan talak unamak mutuku noutam ara, pia kum binuka unamake. Anang ara, wenepnirye, yakdonoknamne. Winipnyeura, anggun tuba aunamlum Israel yala nang arye, nati, ‘Se, nun ni Allah ara, dipkoprob Yahweh ulule. Elda dipkoprob tonokaʼ tenen, biknamnulume.
Daniel birye nyabuk, “Malaikat arye, ayupu nyapnukopura, ayupu ton dukdongobuka nyapnuke.” Anyabuk yupu ara, ani. “Siria mutuku taleamuknye, akunum diplyopura, atalak noutam ara, Allah el pil donanye malaikat, el si Mikael, laka kipnamlarya. Mikael bira, sik Israel yala nang ati, melibuka kalikilule. Atalak ara, Daniel an mutuku nang, sik Israel nang kalikinamle bukni, atalak noutam ara, kanye imun weik talak ton yanamle. Aning ara, minop talak ara, kanye imun weik ning ton yangalamuk bukni, aning nirya ara, mitik ikin uka. Asirya talak yanamle ning ara, pia ikin weik upnamle. Minop talak ulamik nang arye dipdongobuka, wini talak unyak nang babye, aning atonun ikin ning ton yanamukba, kum dopromik ning yanamle. Bukni, an mutuku nang, Israel nang kan-kan noutam arye, ninye weik ton, Allah arye lyepropnamlarya. Ara, yata nang do nirya, sik si Allah kam deiyoknye, el buku noutam si sekuka deiamlye nang nirya ara, dipkoprob lyepropnamle.
Nyabukce, ayupu ton dukdongobuka nyabuk. Anggunda, malye weik winilulum ning dekna ati ara, luba kanye bon ning arepnamsine. Winipniba, anggun imam-imam nang arye, keting noutam babye, lukunyan babye bisik teleb ubuka kum banamlume. Anggunda, talye kwepdanin bamunyeba, anggun keil yan dum duksiliba, saknamlume. Lukunyan noutam bisik banmamunce, kuna ati dengkepdanin bamunce, anggun keil yan dum duknamsile. Aning atonun, keting noutam babye, anggun imam-iman nang babye, mangkau arye kwepdanin bamunba, anggun keil yan dum dukunamsile. Tonda, narye, ‘Nyanamlulume,’ kum nyapsise bukni, anggun kanye aryuk, ‘Allah el yupu laka nyabuka peterenusiyabe,’ nyabuka tilila yupu nyanyak nabi nang babye, atonun keil yan dum dukliba, saklamak touk unamake. Ara, ‘Dipkoprop teleb bisik banamap ning ara, ani,’ tenen, kum biknamaka ati nyapsine. Anggun malye winimunye ning dekna ati, Israel yala ninye wenebuka opsinirye, sirya daknamsine.
Se, anggunda, Israel mutuku noutam ululum nango. Anggun ni Allah Yahweh arye, ‘Pia teleb mutuku arepsiniba, asukumuk unamlume,’ nyabuka, kintinipsukce areamsuk mutuku noutam ara, pia asukumuk kum unamlume. Efraim yala nang arye deiamikba, dadeipdanin yangalamikce, delinyak nang ara, amutuku kum unamlum bukni, anggunda adiparyuk tamubuka, Mesir mutuku uk binuka unamlume. Tonda, anggun yala nang bukni, yuk nang bokuka, Asyur mutuku bobisikiba, amutuku noutam arye, malye kwaning dinamlume. Ara, na Allah arye, ‘Na mapu ara, adin ning pia kum dinamake,’ nyapdeiamsisirye, ‘Aning dina ara, meme. Aning dipmunyopura, na dam ton kum yanamlume,’ nyapdeiamsise ninguk, talye mangkau asa dobuka dilulume.
Mika birye nyabuk. Allah Yahweh arye, anggun tilila yupu talibuka nyalulum deiyok nang ati, “Winibuka-winibuka,” nyasulule. Na mapu koproba, Israel ninye arye, anggun tilila yupu nyamunye, nabi-nabi nang ap, Allah yupu laka len deiyok nang ap ati, anggun laka nyalulum yupu dekna ati, din ning weik arepsicopura, anggunce, “Yo, telebe. Dotalak noutamak ara, urdem kanye bobuka, telebuk unamlume,” nyalulume. Bukni, yuk ninye ati, dekna teleb ning kum arisinyak ninye ara, anggunce nyalulume. “Kume, dotalak noutamak ara, anggun mal olan nang arye, yanuka opnamsiyake,” nyabuka, malye yupu nyabuka, sik nong deice ikin ning delilulume. Winiluluma deice arye, talye tilila yupu nyaplumce, Israel ninye, sik nong deice ikin kililulume. Ati, anggun winilulum nabi-nabi nang nirya ati, Allah arye ayupu nyapdeipsuke.
Se, anggun malye yupu nyalulum nabi-nabi nang nirya, anggun ikin yupu laka nyabuka ululum talak ara, akunum sirya daknamal talak dam uple. Ati, wini talak arye dipdongobuka, aminyan talak babye, na Allah arye anggunti, dotalak unamle ning ara, laka kum lepnamsine. Winipmanto ara, keting wekliba, kunuklamle toukm winipnamsila ati, nyapsine. Winipnamsil talak winipnamle ning nirya ara, anggunce laka kum elinamlume. Tonda, lengdar mana deice arye, laka nyapniba, anggunce, “Aning ara, winipnamle atia,” nyabuka, laka nyalulum touk, pia kum nyanamlume. Aning nirya ara, narye laka kum lenamsina ati, anggun babye, aning kum kekenamlume.
Anggunce yupu nyapmunyeura, isa mer nirya kekebuka kutuksakuka bura banyak ning ati, ‘Se aning ara weik mambule’ tenen, kanye kum delinamlulume. Dipkorop weik mambul ning ara, Allah arye anggun si dobuka im deice bukuu noutamak akunum sekeipsuka ati, aning ara kanye delinamlulume,” Yesus arye, sik 70 nang ati nyabuk.
Tonda, asurat dopropnalamnye, na kum bataknulumce, pil neikauk pia dolamnumunye, na kwit anti moropnukine. Ara, abitinye kilapu ara, Allah el laka teleb yupu, ninye lyen yupu pil dona ati, na ap, sik ap, pia pi dobuka, neika pil dolamubua ati, ance sik bitinye kilapu ati melipnamlyame. Aning atouk, na kwit Kelemen ap, na ap, neika pil dolamubu ninye nirya ap, ati, melinauk unamlyame. Anyapmakin ninye nirya sik si ara, Allah el kanye talima pum tam Pia Kam unamak Ninye ati, si seklamuk buku noutamak akunum sekdeipsuke.
Anggunda, Allah arye, ‘Aninye ara, mambule. Anggunda, na mapu kopropa unamak’ tenen, minyuma talak akunum wipdeiyamuk ninye dam yanganmalume. Aninye ara, Allah el Mi Kopropa Yesus arye talilule. Allah arye aninye sik si sekuka im deice akunum deiyamuk. Ura, ninye im sirya, mutuku sirya nirya ati, ‘Teleb ning ani, malye ning ani,’ nyabuka, yupu lipsisikuka bokeipnamsil Deiyoknye Allah, el dam yanganmalume. Tonda, diksukum ulamik ninye delilamikba, Allah arye sik dib kanye dobuka, akunum pia ansinibuka, teleb updeibukba, sik unyakak dam yanganmalume.
Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.
‘Kurun kuda basam deice bukuka balulnye, malye kipnuyap’ tenen, pirilenmek bukni, kum winipmanto unmekak eipse. Ara, kurun kuda basam deice bukuka balulnye, el yin talin nang arye, Kam Ulirye, Pia Malinye ati tomobikce tapu koubik. Tonda, Tilila Nyana Deiyoknye ton tomobikce, tapuko koubik. Anye bira, tilila nabi ulamuk. Elce, ‘Malye Kam Ulul Ning, na ni kopropa ulula ati, el melipnun’ tenen, min arye ninye kum winipmanto ning mambul pil dolamuknye, el si ara, Tilila Yupu Nyana Deiyoknye tomobik. Minop talak ara, aTilila Nyana Deiyoknye birye, ninye kum winipmanto pil dolamukba, ninye weika arye tilila ninguk diba tenelamik. Elti diba tenelamik ninye ara, Kam Ulirye, bukni, Pia Malinye el pitin kilina ning, el nomor sik nong bol deice sekikce, el urasin aton ning puturubuka deiyamikba, elti, si erelamik nang ati nyapne. Kurun kuda deice bukmoknye ap, el tam nang ap arye, Kam Ulirye, bukni, Pia Malinye ap, Tilila Yupu Nyana Deiyoknye ap, tilila nabi ap tomobikce, uku pia dilamukak pum tam dopkwetebik. Uku pia dilulak ara, mek kwen urasin atonun ulule. Bukni, amek kwem ara, mek kwen sirika kume. Ara kumasan bol keil, akeil si ara belerang, uku buk weika arye dipliba, keil but-buta tong ara, sikin tong atonun tong weik nyalamle ning ap, tin ap, welelamukce, mekwen atonun deiamukce, uku buk paklamukce, uku pia dilamukak noutamak dopkwetebik.
Dipdesiba, sik akunum diamik ninye mambul nang babye, mambul kum nang babye yanganmekak eipse. Sik nirya aweik kurun bun ning urasin tam tikilyanganmek ak, im deice tam ulul buku-buku nirya ara, yokeibik. Tonda, tonok buku ton, el si ara Kam Pia Unamak Ninye Si Sekna Buku ton yokeibmekbuk eipse. Abuku noutamak seklamik yupu nirya dipdeyikba, sik akunum diamik ninye nirya ara, sik kam tuba ulamik talak aning-aning nirya winilamik touk, sekuka delilamika ati ara, abuku sekeiyamika noutamak awamuk touk, sik akunum diamik ninye nirya ati, yupu lepsisikuka bokeibukce, wenebuk.
ကြော်ငြာတွေ