Ura, Zedekia birye nyabukba, sik awekmek nang, Allah el yupu lak nyan nang, nabi-nabi nang nirya arye, “Aning ara dib nyapmakile. Nun ni koprop, ance Ramot Geleat mutuku unyak ninye nirya olbimince, sirya daknamalame. Sik unyak mutuku babye alapnalame. Ara, talye kume, Allah el si Yahweh arye, mikip arepkilya deice arye winipnamalame,” nyanmek.
Yehezkiel 13:6 - Eipomek6 Sik tilila yupu nyanyak nabi-nabi nang arye, ‘Tuba-tuba lengdar mana deice arye, “Allah Yahweh arye, laka kipdeipmasil yupu, lak nyasinyabe,” nyabuka, tilila yupu nyanyak bukni, aning nirya ara, talye ning uka. Na Allah arye, anang wibuka, sik Israel nang dam kum dopkwecamse. Tonda, sikcuk tenibuka nyanyak yupu babye, kum nyapse. Sikce talye nyanyak bukni, sikce, ‘Kume, nunce lak nyasiyap yupu ara, dipkoprob nong upnamle’ tenen, tuba nyanyake. အခန်းကိုကြည့်ပါ။ |
Yehezkiel 13:6
28 ပူးပေါင်းရင်းမြစ်များ
Nabi Mikha akunum nyabukura, sik bitinye tamubuka Ahab bukmoka dam birikopura, Israel nang sik deiyoknye birye, asibuk. “Mikhao, yatato do? Na ap, Yosafat ap, nun bitinye arye Ramot Geleat mutuku olbinamanam ning ara, teleb nyapsiminba, olbinamanam do, kume nyapminba, bataknamanam do?” nyabuk. Nyabuk bukni, Mikha birye tamubuka nyabuk. “Olbana uka, na deiyoknye anti Allah arye, ‘Telebe dawiniplule,’ tenepmakila ati ara, ance Ramot Geleat mutuku nang opmince, sik unyak mutuku babye dopropnalame. Allah el si Yahweh arye, melipkilya deice arye sik anang obuka sirya daknalame,” nyabuk.
Ayupu nyabukce, ayupu ton dukdongobuka nyabuk. “Sik anang dam bobimunyeba, wenen aik akunum dongopdicopura, teleb din ning aning-aning nirya kum arenamake. El ti ara, talye roti ap, mek ap, aninguk arenamake. Mitik-mitik uk arelamdiki bukni, nara Ramot Geleat mutuku binuka amutuku nang ati opnirye, teleb aryuk tamubuka yanyopura, anye bataknamne. Ati ara, na Raja Ahab birye akunum nyapdeipne. Ati anggunce, Amon ap, Yoas ap, sik dam nyalbinamlulume,” nyapdeibukba, ‘Mikha bobinuka nyalbinuyap’ tenen, kintinibik.
Nyabukopura, Israel mutuku taleamuknye Ahab birye, Allah el yupu nyalilamukba lak nyalamik nang, sik nabi-nabi nang yupa ara empat ratus nang nirya, ‘Buluplulume,’ nyapdeibukba, bulubuka yayikopura, asipdeyuk. “Ur teleb nyapnamanulum do, kum do? Narye Ramot Geleat mutuku unyak ninye olbinun do, kum do? Aning ati asipsine. Anggunce nyapnululume,” nyabuk. Nyabuka asibukba, sik nabi-nabi nang nirya, “Telebe ur olbinulyame. Ara, nun ni koproba Allah el si Yahweh, melipkilya deice arye, sik anang unyak mutuku ara, ance obuka sirya dakmince dopropnalame,” nyabik.
Walwal ninguk tenebuka unyak ninye nirya ara, yuk nang arye talye yupu nyaltakakiba, moubuka tenena kumce, anyapmace yupu nirya talye lukparabuka, dib tenebuka kekena uk unyake. Bukni, diksukumuk unyak nang ara, kanye pia moubuka tenebikirye, ‘Aning winipnamne do, kum do? Aning akunum winipnyopura, aminyan talak, yata ning na dam yanganamnil do?’ tenen, moubuka unyake. Aninye ara, moubuka tenina kumce, talye lukparabuka malye un ning, pia kum unyake.
Nyapsiba, Allah el si Yahweh arye tamubuka nyapnuk. “Anang arye, nyasikce yupu ara, narye kum nyapse bukni, sikcuk tilila yupu nyanyake. Atilila nabi nang, sikcuk, ‘Allah arye nyapdeipsuk yupu nyanyabe. El si deice arye ayupu nyasinyabe,’ nyalamik bukni, dipkoprob narye kum nyapdeiamse yupu, tilila yupu uk nyanyake. Narye sik atilila yupu nyanyak nang ati, ‘Ayupu nyalbinamlyame,’ kum nyapdeiamse. Tonda na ap, sik ap neika, yupu kum taleamupu. Sik dam lengdar deice eibikce, ‘Aning winipnamle do, aning winipnamle do?’ tenen, nyalamak yupu ara, sik mining kanye aryuk tenebuka nyasinyake. Sik tilila nabi nang arye, nyanyak yupu nirya ara, tilila yupu uk nyalisinyake. Ayupu dib tenena kume.”
“Nara Allah Yahweh, aning-aning ap, im deice yin talin malaikat nirya ap, sik weik deiyoknye unune. Nara, weik erena ap, mikip weik ap, uninye birye nyapsine. Amutuku noutamak ululum Israel ninye, ayala-yala nirya ati nyapsine. Tilila yupu nyanyak nabi-nabi arye, anggun nong deice kum upnamle yupu nyalisinyak ning ara, kum kekenamlume. Sikce, ‘Aminyan talak ara, winipnamsile,’ nyanyak bukni, atilila yupu ara, pia kekena kume. Sikce nyalisinyak ning ara, sik bidamang aryuk, ‘Aning nyapnamabe’ tenen, kintinipmace ninguk, talye yupu nyasinyake. Ara, na Allah Yahweh arye, ‘Nyapnamlume,’ nyapdeipse ning ara, yanuka kum nyalisinyake. Sikce, sik kanye aryuk nyanyake.”
Aketing tamun noutamuk, Zedekia bira, ninye deiyoknye Raja kibukce, Yudea tam talibuka unmok talak, wala pamubarye deice, keting tamun dumbarye kibuk talak ara, ninye si Asur birye deiamuknye, el si Nabi Hananya ulamuk. Gibeon mutuku noutamak ara, nabi Hananya pil talibuka dolamuknye birye, na Yeremia dam yanuka, Allah el si eren aik dam arye, laka nyapnuke. Ara, sik imam-imam nang ap, amutuku noutam ulamik nang ap, sik kekenmek noutam arye, laka nyapnukba, sik nirya arye kekebik buk, el nyapnuk yupu ara, ani.
Ayupu nirya lak nyabukura, nabi Yeremia birye, el nabi Hananya dam, nyabuk. Nyabukopura, nabi Yeremia birye, nabi Hananya biti, ayupu ton dukdongobuka nyabuk. “Se, Hananya anda kekepnulyame! Allah Yahweh arye, an kum wipdeipkukce, nun Israel nang dam ton kum dopdeipkuke. Ati, an kanye deice aryuk, nyapsiminye yupu nirya ara, tilila yupu uk, nyasilyame. Nyapmanuma ati, sik amutuku Israel nang arye, atilila yupu ati, akunum dip tenekinyake.
Ara, Allah Yahweh Pia Mikip Weiknye ulirye, im deice yin talin malaikat nirya, sik deiyoknye ulule. Israel yala nang nirya, melibuka kalikilulba, sikce el siuk erenyake. Israel yala nang, sik ni Allah, elce nyabuk yupu ara, ani. “Babel mutuku ninye deiyok kibuka taleamuknye, el mikip ara, akunum kum kipdeipmane. Ninye arye, ‘Sapi basam ara, nun wa tuku palinamsiakʼ tenen, ikin yo kintinibuka, sapi basam un dam delilamak touk, Babel mutuku ninye deiyoknye birye, sik Israel nang ati, kanye imun ikin pil aruklamsuk bukni, aning ara, akunum kum kipdeipmasine.
Ayupu ara, narye sik wenena ati, Babel mutuku donoksiseba, tuba daunyak nang, sik kekena ati, surat ton sekuka dopreipnune. Anang ati nyapnulyame. Allah Yahweh arye Semaya biti ara, ‘Winipnamle,’ nyabuka, nyapdeipnuk yupu ara, anggun dam laka nyapnusine. Ayupu ara ani. “Na Allah Yahweh arye, Nehelam mutukunye, el si Semaya biti, kum nyapdeipmase yupu bukni, el kanye aryuk, tilila yupu deice arye, ‘Allah arye nyapmasile,’ nyabuka, anggunti, tilila yupu nyapdeipsuke. Winibuka ati, anggunce ayupu kekelamlumce, adiparyuk diba teneplum bukni, narye ayupu kum nyapdeipse. Anggunda tilila yupu ap, minin yupu ap, akunum kekeplume.
Israel nango, nara Allah Yahweh unirye, im deice yin talin malaikat nirya, sik deiyoknye unune. Anggun Israel nang arye, anggun ni Allah Yahweh ti, si erenululuma ati, dipkoprob ayupu nyapdeipmasine. Anggun unamlum kan-kan arye, ‘Nunda nabi nang unyabe,’ nyabuka ‘Dotalak ara, winipnamle, winipnamle,’ nyabuka, laka nyanamsiak nang ara, sik nyanamsiak yupu ara, pia kum kekenamlume. Tonda, isa mikip deice arye, asing keten nang arye, Aning-aning winipnamla ara, winipnamsile,’ nyabuka, anggun dam laka nyanamsiak nang ap, sik lengdar mabikirye, nukunamak yupu babye, pia kum kekenamlume. Deiyok ara, ayupu nirya, tilila yupu arye nyapnamsiaka ati, nyapsine.
Nyabukce, ayupu ton dukdongobuka nyabuk. “Tonda amutuku deiyoknye, Raja Zedeikia, an mutuku mambul yupu laka nyana ap, aminyan upnamle ning laka nyana ap, weik kel bikamik nang arye, anti, ‘Kume na nio, sik Babel mutuku yin talin nang arye, nun dam kum yanuka opnamsiyake,’ nyabuka, an dam yanuka, laka nyapkik nang ara, wini talak dan tam unyak do?
Ara, na nyanun yupu laka nyan pil deiyok nang, sik nabi-nabi nang babye nyanyak yupu ara, tilila yupu deice aryuk nyanyake. Narye kum nyapdeipse yupu bukni, sikcuk, ‘Allah arye, ayupu nyapsukba, nyapsiabe,’ nyabuka, tilila nyanyake. Aninguk kum bukni, sik tilila yupu nyanyak nabi-nabi nang, sik kanye aryuk, ‘Winipnamlume, winipnalume,’ nyanyaka deice arye, na si eren aik pum tam pil dona deiyok nang, sik imam-imam nang arye, pil dokirye, na mapu Israel nang talibikirye, sik nong deice, ikin ning weik delinyake. Aning-aning nirya ara, dipkoprob malye ulul bukni, na mapu sik Israel nang, awinina ati, kanye deibuka winilulume. Winilulum bukni, anggun nirya kanye mouplulume! Aminyan sirya daknamle talak akunum dam uplyeura, anggunda yata wiripnamlum do?
Yehuda yala nang, sik dam dotalak winipnamle ning ati, Allah arye laka nyaplyeba, sik kekebikirye, laka nyasinyak nang, nabi-nabi nang arye nyanyak yupu ara, talye tilila yupu uk nyanyaka ati, nong kum upnamle aryuk, talye yupu uk nyasinyake. Anggun Israel nang, malye upmunye bukni, anabi nang arye, anggun malye ululum ning ara, ‘Ani,’ nyabuka, kum laka nyasikceba, anggun malye ululum ning nirya ara, batakmunce, tamubuka yamunyeba, Allah arye kum lyelosulule. Sik anabi nang arye, anggun dam laka nyasinyak yupu ara, ‘Dipsuksum una ati bisik ara, ani,’ nyabuka kum nyasinyake. Aning kum bukni, tilila yupu deice aryuk, malye un tam bisik ban ning ati ara, laka nyasikceba, anggun abisikuk balulume.
Bukni, nara Allah Yahweh arye nyapsine. Anggunce, sik Israel yala nang ati, ‘Kume, Allah Yahweh arye, ayupu lak nyapsukba, nunce anggun dam laka nyanyabe,’ nyabuka, nyalulum ning ara, talye-talye nyalulume. Narye, aning nirya dipkoprob kum nyapsise. Tonda, anggunce, “Lengdar mana deice arye, Allah arye nyapsuka ara ani, ani,” nyabuka, nyalulum yupu deice arye, tilila yupu nyalulume. Narye lengdar deice arye, pia kum nyasununa atia.
Bukni, sik Yerusalem mutuku unamak nang arye, aning nirya eibikcopura, ‘Kume, aning ara, tilila ati unmale. Ara, kanye imun ning yanamsila ati, kum uple. Raja Babel birye, el si erena isa, asipdenamle ning ap, elce mirye nyanmalye ning ap, adeice arye winipmalba, el deice lakakipmal ning ara, talye ati winilule,’ tenenamake. Tonda, sikce, ‘Kume, nun ap, Raja Babel ap, pia mikip nyalin yupu deice arye, Raja Babel an ap, nun israel nang ap ara, kum olanamabe. Teleb arye unamabe. Akunum nyapdapu ati, Raja Babel birye nunti, kum yanuka opnamsile. Weik ikin ning ara, nun dam ton kum yasutue,’ tenenamake. Bukni, na Allah arye, sikce malye-malye weik ulamik ning ati, tonap laka nyapnamne deice arye, aminyan kanye tenebikirye, moubuka bikinamake. ‘Se, dipkoprop, nun malye weik ulamupu bukni, wini talak ara, Allah arye wenebuka opnusileʼ tenen, moubuka bikinamake. Anggunce, ‘Se, aning nirya ara, Allah arye nun wenena ati, akunum winipmasilʼ tenen, moubuka bikinamake. Aning nirya winiplyeura, Babel mutuku Rajanye birye, Yerusalem mutuku bilirye, amutuku nang nirya, malye kiplye ning ara, binuka tomoplyeura, elce anggun tapu koupsilirye, el mutuku bobinuka deiplyeura, ikin ning weik, anggun nong deice delinamsile.
Tonda, sik Israel mutuku nang, tilila yupu nyanyak nang arye, anggunti, talye yupu weika arye nyapsike. Ara, sik nabi palsu nang arye, ‘Kume, anyapmap yupu ara, Allah aryuk arepsukba, lengdar mapmuka deice arye, akunum nyapmasilak, kekepmabe. Israel nang ati ara, winibuka-winibuka winipnamsile,’ nyabuka, laka nyalamik bukni, sikce nyalamik yupu nirya ara, nong kum upnamle. Aning atonun ton, sik nabi palsu nang ara, isa ap yupu talilanyak nang do, isa merye sik deiyok nang do, sik dam binuka, asipdeyikba, anang sik isa mikip deice arye, ‘Aning ton, aning ton dipkoprob winipnamsile,’ nyalamik bukni, anang babye, talye tilila yupu deice aryuk nyalamik. Aning ati ara, Allah arye, lo areplyeba, anggun olan tam nang arye, ninye on parang ya dobikirye, yanuka, sik tilila yupu nyalamik nang ap, tilila yupu kekelamik nang ap ati, oplopnamake. Atalak ara, Allah arye, lo areplyeba, sik mal olan nang arye, parang ya bobikirye, sik pia malye-malye weik wininyak nang ara, ngang yok sekuka bataknamake. Sik pia malye weik wininyak ning ati, weik wenen sum ara, akunum yale. Ati, asum deice ara, Allah arye, amalye weik unyak nang ati, wenelirye, sirya akunum dakanamle. Allah arye anggunti, sirya ning wenepnamsile.
Tonda, sik amalye unyak deiyok nang melina ati, Israel mutuku noutam unyak nabi-nabi nang arye, tilila yupu ap, talye nyaltakna yupu ap, weika arye nyanyake. Ara, sik deiyok kibuka talinyak nang, malye winipmace ning ara, tuba aupmalyebuk, sik melina ati, tilila yupu nyanyake. Winipmanto ara, aik pum tam ara, malye ning weik aupmalyebuk, ninye arye, ‘Anyaik ara urasin teleb unamleʼ tenen, bai tam abilinga deice arye, kurun cat likuka deibikirye, teleb kilamle touk sikce lelinyake. Adeiyok nang arye malye winipmace ning siknilongona ati, sik nabi nang, tilila yupu deice arye, ‘Kume, Allah arye arepsukba, nun lengdar mabupu deice arye, aning winibuka eipmabe. Tonda, Allah el Pia Teleb Lek Dip Kanye arye nyapmasil ati, winipnamabe,’ nyabuka, tilila yupu dem nyanyake. Bukni, sikce nyanyak yupu nirya ara, talye yupu uk nyaltakanyake. Sik anang arye, Allah Yahweh, aning-aning nirya deice tam erebuka, Pia Mikip Weik Ululnye birye, nyapsuka ati, el si deice arye, ‘Aning ara winipnamle, aning ara kum winipnamle nyabuka, talye nyaltakanyake. Bukni ayupu ara, na Allah arye, aning-aning deice tam erebuka, Pia Mikip Weik Ununye birye, pia kum nyapse. Tonda, narye sik anang dam, kum nyapmanye yupu nyanyake.
Tonda, ninye arye si erenyak Isa Mutuku Dongonye si ara, deiyok kum ubukba, talye-talye yupu uk nyanyake. Isa arye ninye ati, tilila yupu uk nyanyake. Tonda, dibilamice ninye, dib kanye ap yupu talilbanyak ninye ara, tilila ati nyanyake. Wininyak ati, sik asing keten nang arye, tamubuka nyanyak yupu ara, dipkoprob yupu ton kum nyanyake. Aning atonun, Isa Mutuku Dongonye si erenyak nang arye, “Lengdar manyaba deice arye eilinyap ning ara ani, ani,” nyabuka laka nyanyak yupu babye, talye yupu uk nyanyake. Anang arye, ‘Aminyan talak aning-aning nirya, telebuk unamsile,’ nyanyakba, kanye deibuka kekelulum bukni, anang ara tilila ati nyaltakanyakce, nong kum yupu uk nyaltakanyake. Tonda, lengdar mapmace ning ati, talye nukultakanyake. Atilila yupu nyabice nang, sik yupu kekemunya ara, winipmanto ara, domba basam ara, sik weina deiyoknye kum ati, ‘Dan bisik binuyab do?’ tenen, kanye walwal upliba, talye-talye balamak touk ululume.
Ara, ninye weik yakirye na si sisibuka nyabikirye ayupu nyanamake. “ ‘Ninye lyena ati, Mesias yanamle,’ nyalimiknye bira na uka. Na akunum yanmana atia,” nyanamak deice arye, ninye weik atilila yupu kekebikirye mangkau kanye bobuka, diba tenenamake. Atilila nang nyanamsiaka deice arye, anggun kanye talima nirya libuka, yuk tam dobanamsiaka ati, ‘Mankau asa arye tilila yupu diba tenebibyak’ tenen, anggun kanye talima moubuka unamlulume nyapsine.
Allah arye anang dobuka, pia kunuknak dongopnamla ara, talya urdem ati kume. Ara, atilila yupu nyaninye arye, “Nunda weik mambul ning winipnamabe,” nyabuka, talye yupu uk nyaltakanyakce, sik kanye erebuka kwalinyake dilanyaka atia. Tonda, talye tukwak ninye nirya ara, talima noutamak malye ning aupsuka anya arye, yuk ninye malye winin ning pataplibuk, tenenyak ning ati ara, atilila nang arye, nyanyake. “Kume. Winina ara, telebe uka,” nyanyake. Nyabica deice arye, yuk nang sik kanye lilonyake. Sikce talima lolonyak ninye ara, winiryuk deiyok kibuka diba tenepmak bukni, kanye min kum wisibuk nang ati nyapne. Anang arye, sik malye nang winilamak ning batakuka, ‘Diksukumuk unamap’ tenen, winiryuk deiyok kipmak bukni, talima wisina kum ninye ati nyapne.
ကြော်ငြာတွေ