Yakobus 5:13 - Eipomek

¹³ Anggun kan-kan noutam arye, tonoknye ton kanye imun ning uplyopura, adiparyuk elce Allah moronamle. Tonda, yuknye ton, kanye deiplyopura, kanye deibuka Allah ati, “Telebe,” nyabuka, Allah si erebuka mot nyanamle.

Yakobus 5:13 ပူးပေါင်းရင်းမြစ်များ

1 Tawarikh 16:9

Allah Yahweh atibuk, kanye lon mot nyan deice arye, “Allah elda, ninye nirya arye kum winipmanto ning nirya, Elda apil dolulnye,’ nyabuka, el siuk eremunya deice arye, elti, ‘Telebe,’ nyanamlume.

Ayub 33:26

Nyapnye ura, anye elcuk Allah ati, “Naio, melibuka lyepnilyame!” nyabuka, moroplyeura, Allah arye anye biti, bico teneplirye, ‘Telebe, anye bira, na dam yangana telebe,” akunum nyaplyeura, adiparyuk melilule. Nyaplyopura, el anye birye Allah el tibuk kanye deiplirye, Allah dam akunum yalyopura, Allah ati si erenamle. Winiplyeura, Allah arye anye el diksukumuk ulamuk ning ati, dekna areplirye, anye tamubuka teleb kipdeipliba, min arye teleb ulamuk touk, tamubuka telebuk unamle.

Mazmur 105:2

Allah el tibuk, kanye lon mot sena deice arye, “Allah elda ninye kum winipmanto ning nirya, pil dolulnye,” nyabuka, el siuk erebuka nuknin banamlumba, ninye nirya arye, ‘Ayupu ara, mambul yupu’ tenen, kel kipnamake.

Mazmur 118:5

Na ton imun kanye wamnuk talak ara, Allah Yahweh atibuk, malye nyabuka ngaluksirye, moropse. Moropse ning ara, elcuk kekepnukce, na kanye imun upmanuk ning nirya ara, elcuk lyepropnukce, teleb updeipnuk.

Mazmur 18:6

Atalak ara, dipkoprob dipmanto wamse. Winipmanto ara, akunum diamik nang banyak mutuku, el si Sheol mutuku arye, mikip weik tapu arye, yanuka koulongolamak touk upnukba, dipmanto wamse. Atalak ara, nara dipkoprob akunum dipmanto wamsa ati, lyepdanmanto kum wamse. Winipmanto ara, talye bai tam kam ulamle ning, mangkau kanye bobuka, bisik balamakak, ninye arye wena wepmakirye, akunum kintinibuka wepmakcak bakiba, abai kam ning youlamle touk, na babye winipnikba, dipmanto wamse.

Mazmur 50:15

Tonda, na Allah arye nyapsine. “Ikin weik upsilye talak ara, anggunce nati, ‘Naio melibuka lyepropsilyame!’ nyabuka, moropnumunyeura, dipkoprob narye yanuka, lyepropnamsine. Akunum lyepsiminyeura, anggunce na si erebuka kina ati, “Nun ni Allah, pia teleb ulule,” nyabuka, yuk nang kekenak, lakak arye nyanamlume.

Mazmur 91:15

Anye bira, el ikin ning doproplirye, kanye imun uplye talak nirya ara, elce, “Na ti melipnilyame,” nyabuka, moropnilyopura, na kekepnirye, elti, pia kalikuka melinamne. Tonda, anye bira, el ikin ning dololamlye ning ati, lyepnirye, el dobuka ereipnamne. El anye bira, erebuka deipnyopura, yuk ninye nirya arye, el tibuk, si erenamake.

Mazmur 95:2

Aning ati ara, nun nirya arye, el damak bulubuka wekibirye, kanye deibuka, elti, “Telebe,” nyabuka, mot sebuka, telep mot yupu nyanamabe. Tonda kanye deibibirye, mot sena ati, pong-pong ana ap, mot yupu nyana ap ati, yuk ning ap deice arye, “Allah ulul ning nirya ara, pia telebe. Elda weik mambulnye,” nyabuka, Allah el si erebuka, si eren mot nyanamabe.

Yesaya 65:14

Dipkoprop na si tuba erepnikirye, na amu tam pil dobuka unyak ninye ara, na si erebikirye kanye deibuka unamake. Bukni, anggun malye-malyeuk ululum ninye ara, engelamunce, imun kanye bobuka unamlume. Tonda, kanye talima pia uk dilamsiliba, ikin kanye bopmunce, engenamlume.”

Daniel 5:4

Sik nirya kanye wangalamak mek, anggur mek dinmek talak aniryuk, mot senmekce, sik Isa Mutuku Dongonye si eren ati, memebuka deiamik ning, kat ning emas ap, perak ap, tembaga ap, yo ap, keil ap, deice arye memamik ning ati, si erenmek.

Hosea 6:1

Nabi Hosea birye, sik Israel ninye ati, nyabuk. Ara, na kayapu, anggun Israel ninye ati nyapsine. Wini talak ara, nun nirya arye, nun malye wininyap ning batakuka, tuba tamubuka, nun ni koprop Allah Yahweh, el damuk binuyabe. Nun malye wininyap ning wenena ati, weik arye wenyamsuke. Bukni, nun malye wininyap ning batakibirye, el dam tamubuka bibyopura, Allah arye kanye deipsilirye, kwetelinamsile. Tonda, nun wenena ati, pia kanye imun weik suse areamsukba, suse dilamsuk ning nirya babye, elcuk suse kweten ning arye likdongobuka, kitipdongopnamsile. Winipsilirye, nun suse kwetelinamsile.

Yunus 2:2

Na ni Allah, an si Yahweh, na imun upmanila ati, anti moropmakinaba, ance akunum kekepmanilame. Diplamik nang unyakak atonun unmana ati, “Nai Allah ance melipnilyame,” nyabuka moropmakinaba, kekebuka melipmanilame.

Yunus 2:7

Na nong mitang upnukce, dipmanto upse talak ara, na ni Allah, an si Yahweh ati tenepkisirye, “Melipnilyame,” nyabuka moropkise. Moropkiseba, kekepnulume. Na moropkise yupu ara, an si erena ati, wipdeipluma aik, an si eremna teleb aik dam yayuke.

Mika 4:5

Yuk mutuku-mutuku nirya daunyak ninye nirya arye, ‘Aning ara, nun ni yapu’ tenen, isa el siuk yuk-yuk si nyabuka, erenyake. Bukni, nun Israel ninye uk ara, diksukumuk teleb ubuka ubirye, na ni Allah Yahweh, el siuk erebirye, el amu tamuk pia aunamabe. Nun ni koproba Allah ati, pia kum batakanamabe.

Matius 26:30

Yesus arye nyabukopura, el ap, el mapu ap, sik nirya Allah yupu mot sebikce, alip aik Yerusalem mutuku sik bukmek aik batakuka, banmeka ani, Zaitun mutuku deice welebik.

Lukas 22:44

El opnamik ning ati, kanye imun upmokce, malye kanye bobuka, mikip arye Allah moronmokura, el nong mek bongobukce, mek tuku deice sakanmok ning ara, ninye opdakceura, ining weik balamle touk, nong mek weik bongobukce sakanmok.

Lukas 23:42

Nyabukopura, anyanmoknye aniryuk Yesus ati nyabuk. “Yesuso, ance ninye nirya ap, aning-aning nirya ap, talibuka unalamak, wekminyopura, nati tenepnamnilyame,” nyabuk.

1 Korintus 14:15

Aning ati ara, yata wirinamne do? Ura, aning ton nyapnusine. Allah moron talak babye, Allah el si eren ati, mot nyanamne talak babye, Allah El Dib Kanye mikip deice melipniliba, na kanye arye, yuk mutuku yupu deice Allah moronamne talak nirya ara, na kanye tenen deice arye moronamne. Tonda, na tam nang nun nyanyap yupu deice arye, kekepmanto yupu ton tabakuka Allah moronamne. Ara, Allah El Dib Kanye melinilya deice arye, yupu nyanamne bukni, ninye kekepmanto yupu deice aryuk nyaptinyetoura, aninguk ara, telebe. Yuk ninye arye, kum kekepmanto yupu ara, talye nyana kume.

1 Korintus 14:26

Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anyapmasin yupu nirya ati ara, Allah yupu keken aik binuka, el si ati erenamlum talak ara, “Teleb winin ning ani,” nyabuka kel bikna ati ara, ‘Yata nyaptibye do?’ tenena kume. Aning ara, nyapnusine. Anggun bulubuka Allah yupu kekenamlum talak nirya ara, anggun nirya yuk-yuk bukni, tonye bira, Allah arye, elti, aribuk mot nyapnamsile. Tonye birye, “Diksukum una ati, winibuka unamabe,” nyabuka peterenamsile. Tonye birye, Allah el yupu duknyamuk bukni, anye biti lak nyabukura, kel bikuk ning ara, anggun kekena ati Allah duknyamuk yupu nong noutamak ara, lak kibuka peterenamsile. Tonye birye, el kum kel bikamuk bukni, Allah El Dib Kanye arye, areplibuk yuk mutuku yupu deice nyapnamsile. Bukni, elce peterepsilyopura, tonye bira, Allah El Dib Kanye arye, “Ayupu nong ara, ani,” laka nyabuka melipsilyopura, ayupu kekebuka kel bikilinye birye, “Ayupu deiyok ani,” nyabuka, ayupu lak kibuka laka nyapnamsile. Aning-aning nirya ara, deiyok tonokuk aupnamle. Ara, Allah dib tenena ninye kekebikca deice arye, ‘Sik talima kwa baribuka mikip kilinamap’ tenen, wininamlume. Yuk ton kume. Na Paulus arye, nyapsine.

Efesus 5:19

Anggun nirya arye, anggun ap, neika ululum nang ati, mot sebuka, kanye talima kwa dilanamlulume. Ara, Mazmur Allah yupu deice sekeipsuk ning ap, ‘Allah el si erepnuyap’ tenen, anggun kanye aryuk mot sekuka nyamunye ning ap, Allah arye, anggun talima noutam, ‘Winibuka nyanamlulume,’ nyabuka laka nyasiliba, mot nyamunye ning ap, amot yala-yala nirya nyanamlulume. Amot-amot nirya nyanamlum talak ara, anggun kanye talima noutamak arye, Allah el si erepmunce, elti, kibuka si erenamlulume.

Ibrani 5:7

Yesus ara, tukwak mutuku noutamak ulamuk talak ara, elce el dipnamuk ning ati tenebukce, el lyepmantonye Allah ati morobuke. Elce morobuka ara, “Naie, ance melipnilyame,” nyabuka, asing maka deice ap, weik malye nyana ap deice arye morobuke. Morobukce, el Yesus ara, ‘Allah ara, weik mambule anya arye, elti, si kipnirye, el amutamuk pia unamne,’ tenelamukce, talima naminye ulamuka ati, Allah arye, Yesus morobuk yupu kekebukce melilamuk.

Yakobus 5:10

Na du weit atonun ululum nang ati nyapsine. Allah el si deice arye, el yupu laka nyalamik nang, sik nabi-nabi nang arye ulamik ning ara, ila tonap nyapsinibuk, tenipdenamlume. Sik kanye imun kanye bomik talak noutamak ara, kanye teniltona kum arye, tunim abuka winilamik ara, tenipdelulume. Ikin ning weik ulamu bukni, sik kanye deibuka ulamik ara, pia teleb ulamika anya arye, anggun aninguk tenepmunce, sik ulamik atonun wininamlulume.

Wahyu 14:3

Anirya kekepmaseba, sik 144.000 ninye, Domba Mi Atonye birye akunum lyebuk ninye arye winiryuk mot senmek. Winiryuk mot senmekce unmekak ara, Allah el weik bun ning deice bukmokak damak nyanmek. Tonda, sik dumbarye teleb kam unyak ning ap, sik 24 wisi deiyok nang ap asukumuk, Allah el urasin tam tikmeka damak mot senmekba, kekepse. Sik yupa weik 144.000 ninye nirya arye, winiryuk mot senmek bukni, yuk nang nirya arye sik senmek mot, winiryuk ning ara, kel kum bikmanto unmek. Bukni, Domba Mi Atonye birye, sik yupa weik 144.000 ninye, tukwak mutuku noutamak arye akunum lyelamuk ninye, sikcuk amot bikamikce nyanmek.

Wahyu 7:10

Wininmekce, weik yupu deice arye nyanmek. “Weik Ninye Deiyoknye bun ning deice bululnye, nun Ni kopropa Allah ap, Domba Mi Atonye ap, sik bitinye ara Ninye Lyena Deiyok nang ururake. Sikcuk lyesururake.”