Nyabukura, Raja Daud elce tamubuka nyabuk. “Se, aning nyapdeipmanilama ati ara, na pia kanye imun upnile. Bukni, na kanye ara, tukwak ninye arye ikin ning dobuka, na deice delina ara, na pia like. Ati, pia teleb ning ara, Allah Yahweh, elcuk na deice ikin ning deipnetupa, doproptinye. Ara, na ni koproba Allah Yahweh, nun tukwak nang ati, weik tonun arye bico tenesululnye ulula ati nyapne,” Daud birye, nabi Gad biti nyabuk.
Yakobus 5:11 - Eipomek11 Anggun kele, ikin ning weik ulamu bukni, sik batakna kum arye, diba tenelamikce, pia pi dobuka, pil dolamik nang ulamik. Winilamika ati, Allah arye sikti, teleb ubuka kipdeiamukbuk, kanye deibuka ulamik. Tonda, nunce, ‘Anang ara, weik mambule, sik pia telebuk ulamik,’ tenenyabe. Anggunda ayupu akunum kekelamlume. Ayub ara, el nong deice ikin ning pia weik ulamu bukni, teniltona kum arye, pia palibuka tunim abuka ulamuk. Daulamukba, Allah arye ila tamubuka aribuk ning ara, akunum kekelamlumce kel biklume. Nun ni Allah ara, pia bico tenepsilirye, nun malye wininyap ning ati optapsitu bukni, lubakipsilirye, nun patapsilye ning nirya ati, talye arisulule. အခန်းကိုကြည့်ပါ။ |
Yakobus 5:11
53 ပူးပေါင်းရင်းမြစ်များ
Anggun tamubuka, Allah Yahweh el dam yatumce, elce, “Wininamlume,” nyasilye touk, umunyeura, teleb uptume. Winiptum toura, anggun kayapu nang ap, anggun mapu ap nirya ara, anggun mal olan nang arye tapu koubukabikce, tomobuka wenen aik dongobikak, unyak nang nirya ara, abobinuka deibik nang, sik talima Allah arye pil doptuba, sikce tapu koubik nang ati, bico uptuba, tamubuka lopdeipsitingba, sik mutuku tamubuka asukumuk yanganamake. Anggun ni Allah el si Yahweh ara, ninye ati bico teneplirye, nun melina ati, teleb kilina deiyoknye ulule. Anggunce Allah el dam yatumura, elce anggun kum bataksutue. Dipkoprop dopropsilirye, melinamsile.” Raja Hizkia birye nyapdeibukba, ayupu nirya ara, surat deice arye sekik.
Ance sikti, bico tenebuka, teleb una ati winilalum ning ara, luba kiyamike. Tonda, sik dam ninye winipmanto kum pil dolalum ning nirya ara, tuba kum tenilamikce, luba kiamik. An nyalalum yupu yanibikce, mandipna kanye bobikce kwalilamikce, ‘Mesir mutuku tuba tamubuka bobisiliba, sik amu tam talye pil don nang unamap’ tenen, sik bidamnye arye, ninye deiyoknye wipdeibik. Malye weik winilamik bukni, Allah anda ninye nirya malye wininyak ning namin kina deiyoknye ulyame. Min pola kum wenesilyamce, an kanye aryuk weik bico tenepsimince, weik arye melisilyame. Bico tenesiminye ning ara, weik arye bico tenesilyame. Winilyama arye, nun apu yapu kum bataklamlume.
Sik yuk mutuku nang arye, Israel nang ati olyangalamik bukni, ance sikti, pia bico tenelalumce, kum bataklamlume. Ance, ‘Anang ara, pia malye nang anya arye, adiparyuk oplopnamne,’ tenelamtum bukni, sikti, pia kum bataklamlumba, yuk mutuku nang arye obuka, sirya kum dakamik. Nun ni Allah, anda dipkoprob ninye ati pia bico tenepsimince, tuba wini talak babye melisilyame. Nun malye winilamap touk, kum wenebuka osilyame. Mitik tonunuk wenesilyame.
Nyabukba, Ayub birye tamubuka nyabuk. “Anda walwal kilapu arye nyalamak atonun nyanmanilama ara, yata ati do? Ance tenepnalama ara, ‘Allah arye teleb ninguk arenamsile,’ tenepmalamce, amalye yupu nyapmanilam do? Anda, ‘Nun dam ara, Allah arye teleb ning arepsutopura, doproptibye bukni, ikin ning ton kum arenamsile,’ tenepmalamce, ayupu nyanmalam do? Winipsiliba, ‘Allah arye ikin un ning arepsiliba kum doldonamabe,’ tenepmalamce, nyanmalam do?” Ayub birye el kil ati nyabuk. Ayub el yupu nyana deice arye ton, Allah ati malye yupu tonok ning babye, kum nyalamuk.
Bukni, Allah elda, na banun bisik nirya ap, tonda, na yanibuka banun sukum nirya ara, Allah el akunum bikilule. Allah arye nati, ‘Teleb upnamle do, malyeuk unamle do? Tonda, ‘Anye bira, el talima noutam ara, yata ulul do?’ tenen, dinulule. Akunum dipdenilyopura, pia teleb, diksukumuk unamne. Winipmanto ara, ninye arye dengna weik ning, el si emas ara, malye ning taplakamlyeba, aning nirya dobuka, uku dongobikceba, uku arye amalye ning nirya akunum dibuka sirya daklyopura, emas pia teleb ninguk memelamak touk, nati Allah arye dipdenilyopura, malye ning ton kum upmanilya ati, tuba kum eipnamle.
Tonda, ninye tukwak nang kankan arye, ninye nirya, sikce delilamak mapu ati, weik tonun bico tenelamak touk, Allah ati, nunti, ‘Se, elda pia mambule. Mikip Weiknye ulule’ tenen, elti, ilil tenekirye, el yupu uk moubuka talinyak nang ati ara, Allah Yahweh arye, aninye nirya ati, weik tonun bico tenesulule.
Allah el si Yahweh arye, ninye nirya ati, kanye talima arisiliba bico tenenanye ulula anya arye, nun malye wininyap ning ati, adiparyuk wenebuka oplopsutu bukni, minopce yu upliba, kum wenesulule. Aning kum bukni, weik tonun bico tenepsilirye, ‘Winibuka teleb kipdeipnamsine,’ nyabuka, nyalin yupu deice arye nyasilye yupu nirya ara, aninguk dipkoprob, tuba-tuba winisulule. Elce nunti, weik tonun bico tenesulul ning ara, nukmanto kum ulule.
An si erebikirye, an deiceuk, sik kanye delinyak ninye ati, minopce wana kum diparyuk, ance bico tenesimince, pia teleb ubuka melipsilyame. Aning kel kipse anya arye, narye Allah anti, ‘Na ni koprop’ tenen, na kanye an deiceuk delikununa anya arye, ‘Ance nati, bico tenepnimince, melinamnilam’ tenen, moropkine.
Allah Yahweh, anda tukwak ninye nirya ati, weik arye kanye talima arekiliba, bico tenenanye ulyame. Ati, nun malye wininyap ning ati ara, adiparyuk wenebuka oplopsutum bukni, an adiparyuk, minopce yu tenebuka, kum osilyame. ‘Malye wininyak ninye arye, sik malye winin ning batakikirye, na damuk tamubuka yatinge,’ tenesilyame. Ance nun tukwak ninye nirya ati, bico tenesimince, pia tuba-tuba melisiminye ning ara, pia kum batakasilyame. Ance tenelamsulum touk, asum-asum nirya, pia melisilyame.
Sik malye wininyak ninye uk, tenena meme. Teleb ning ara, sik diksukumuk wininyak ninye ati, moubuka dinamlulume. Sikda, malye winin ning, tonok ning babye kum wininyaka anya arye, yuk ninye arye, ‘E, sik malye wininyake,’ kum nyapmanto unyake. Na dipkoprob nyapsine. Kanye talima lamapdongobuka arye ululnye bira, yuk ninye nirya ati, ‘E, kanye deipdabirye, kanye talima dukdongobuka, teleb kibuka neika winiptibye,’ tenelula ati ara, Allah arye anye atonun ninye nirya ati, melilamliba, aminyan talak, sikda pia telebuk unamake.
Sikda malyeuk winilamik bukni, Allah arye sikti, weik tonun bico tenelamuka ati, sik malye winilamik ning ara, mangkau kibukce, tuba melinauk winilamuk. Allah arye, sik malye winilamik ning nirya ati, anang wenebuka obukce, sirya kum dakuk. Dipkoprop, sik malye-malye weik winipnin balamik talak ara, Allah ara, yu weik ubuk bukni, el adiparyuk sikti, ‘Kume sikda minopce kum wenebuka opnune,’ tenelamukce, talye tunim anauk ulamuk. Ati ara, el yu weik uamuk bukni, elce anang ati, adiparyuk talye mangkau asa, kum oplobuk.
Bukni na ni Allah, na kele, anda aning-aning nirya talimince, tenesimince, deice tam erebuka, mikip weiknye ulyame. Bukni, nun malye winin ning ati, adiparyuk oplopsutum buk, namin kinauk usilyamce, telebuk kilisilyame. Tonda, nun malye wininyap ning ati, minopce yu kum tenesilyame. Tonda, ance, ‘Weik tonun pia bico tenesimince, pia teleb kilinamsine,’ nyabuka, nyalin yupu deice ara, weik tonun nyasilyam ning nirya ara, batakna kumce, pia teleb kibuka kilisilyame. Tonda, ance, aning nirya ati ara, narye, ‘Winipnamsine, winipnamsine,’ nyabuka, nyasilyam atonun kibuka, pia tuba melisilyame.
Narye an Allah Yahweh ati, ‘Melibuka lyepdopnilyame!’ nyabuka, morokununa deiyok ara, ani. Ara, anda aning-aning nirya talimince, deice tam erebuka, mikip weik deiyoknye ulyam bukni, ance kanye deipsimince, nun malye wininyap ning ati, namin kipsimince, kum danalilyame. Anda pia telebnye ulyama atia. Tonda, yata ninye do nirya, sikce antibuk, ‘Naio, ancuk melibuka lyepsilyame!’ nyabuka, morokinyak nang ati, lyepmince, pia teleb kililyame. Tonda, anda, ‘Weik tonun bico tenesimince, pia telebuk kilinamsine,’ nyapdeiamsulum yupu ara, weik tonun nyasilyama ati nyapkine.
Bukni, nun ni Allah arye, yata nang ati do nirya, sikce malye wininyak ning ati, “Anda, aning bataknulyame. Aning ara, meme!” nyabuka, wenelule. Allah arye wenelul nang ara, akunum kekebikcopura, kanye deibuka, telebuk unamake. Tonda, ance, “Aning wininamlume, aning ara, pia kum wininamlume,” nyapdeiamsulum yupu deice peteresilyam nang nirya ara, kanye deibuka telebuk unamabe.
Allah arye Musa tikmokak urasin tam yayukce nyabuk. “Na si ara Yahweh, Allah unune. Narye ninye ati bico tenebuka, weikto arye melinune. Malye ubica babye, min pola arye yu kum unulule. Tonda min pola aryuk kum wenesunune. Aning kum bukni, narye, ‘Wininamsine,’ nyapsise touk, ninye ati bico tenena ap, batakna kum diparyuk melina ap, weik unune.
Na kanye ara, yata un ning do nirya, deiyok koun talak ara, mitikto telebuk ulule. Bukni, pia teleb ning ara, sirya dakan talak anyak pia teleb tenepne. Tonda, ninye talima noutam ara, maknya kintinina ap, kwalina ap, talima erelana ap ara, pia malye bukni, yuk nang ning ara, ‘Aminyan talak yata wiripnamsil do?’ tenen, namin asa arye, talye tunim abuka ukirye, kanye deibuka unyak nang ara, pia telebuk unyake.
Allah Yahweh, el kanye aryuk, Israel ninye ati teleb kibuka melilamuk ning ara, ‘Ninye nirya kekenamak’ tenen, laka nyanamne. Amambul pil dolamuk ning nirya ati, ninye nirya arye, Allah ati, el si erebuka kinamake. Nun ni koprop Yahweh arye meliamsuk ning ara, kum nukmanto ulul touk pia weik tonun laka nyanamne. Yuk yala ninye ara, pia kum meilyamuk bukni, nun Israel yala ninye ati, weik tonun melilamsuke. Nun malye ulamupu ning ati, talye lukparabuka opsutu bukni, bico tenelamsukce, lyelolamsuke. Allah arye nun Israel ninye ati, batakna pia kumce, weik tonun bico tenesilirye, melisulula deice arye, lyesulule.
Allah bico tenelamsukce, ‘Israel ninye lyenamne,’ tenelamsuka ati, Israel ninye nun dam ikin ning yangalamsukba, ikin weik ulamupu talak noutam nirya ara, el babye ikin kanye bolamuk. Winilamuka ati, ikin ulamsuk bukni, lyepsuk ning ara, ara el dam ulamuk malaikat dopdeipmokba, kum lyepropsuke. Tonda, yuk melin nang ton dolilamukba, kum lyepromsike. Aning kum bukni, nun ikin ulamsuk ning nirya ara, Allah elcuk lyelolamsuke. Allah arye, ‘Na mapu bicoe, minopce kum wenepnamne’ tenen, melibuka lyelolamsuke. Minop talak keting tamun yupa weik noutam nirya, Allah arye nun apu Yapu Israel ninye ati, melibuka bobalamsuke.
Nara, ton ap tenenun ning ara ani. Ara, Allah elce tuba nunti pia bico tenesulule. Tonda, Allah elce nunti, “Winipnamsine, anggunce na yupu talibuka upmunyeura, narye anggunti winibuka-winibuka teleb kipdeipnamsine,” nyabuka, nyalin yupu deice arye nyapdeipsuk ning nirya ara, kum bataknamle. Aning nirya dipkoprob nong upnamle. Allah arye, ‘Na tenen nang ati ara, tuba telebuk kipdeipnamsine,ʼ tenesulul ning ara, min kum winipmanto. Aning ara, pia ati aunamle.
Winibiba, nun ni Allah, nun malye winina ati ara, ance talye lukparabuka, wenebuka opsutum bukni, ance dipkoprob nunti, bico tuba tenesimince, kanye teleb arepkiliba, nun malye winin ning ati, kum kipdeipsimince, nunti namin kibuka, melisilyame. Dipkoprop nunda, pia weik malye winibirye, an nyapdeiamsulum yupu yaninyap nang bukni, bico tenebuka melisilyame.
“Anggunce, ‘Se, nun malye wininyap ning dekna ati, nun ni Allah arye wenepnamsil do?’ tenen, anggun baju bol deice ning, kwiribuka batakalulum ning ara, bataknamlulume. Talye bol deice ning kum bukni, anggun talima pum tam, malye tenemunye ning nirya batakmumce, ikin kanye bobuka, engepmunce, tamubuka anggun ni koproba Allah Yahweh, na dam anyuk yalulume. Ara, ‘Allah elce nun malye winibibye ning ati, adiparyuk kum opnamsil’ tenen, yanululume. Ara, urdem ati kum nyapsine. Nara, ninye malye wininyak ning ati, adiparyuk minopce wenepnirye, kum onune. Dipkoprop anggun malye winina dekna ati, adiparyuk wenebuka oplopsitinye bukni, ‘Sikce tamubuka, na dam yanamak do, kum do?’ tenen, disunune. Nara ninye ati kanye talima areniliba, bico tenen, nimalyap arye, anggunti disinirye, kalikuka tuba-tuba melisunune. Winisununa ati, anggun malye ululum ning batakmunyopura, ‘Narye aninye ati wenebuka opnamsine,’ tenepse ning ara, tuba ton batakname.” Allah arye nyabuk. Ayupu nyabukba, nabi Yoel arye nyabuk.
Derebukce, Allah el si Yahweh ati, morobukce nyabuk. “Ance Niniwe mutuku ninye kum opmalam ara, yata ati do? Na ni Allah, an si Yahweh ati nyapkine. Aning ara, na asik batakuka, amutuku yanuse talak ara, ‘Allah arye dipkoprob Niniwe mutuku ninye kum opnamle,’ tenebuka, kum nyalamse do? Adeiyok ati ara, na adiparyuk, bai sakuka, Tarsis mutuku minopce binamse. Nara, an winilyam ning, akunum kel bikamkise. Ara, Allah anda ninye malye ubica babye, adiparyuk kum oltakalyame. An kanye aniryuk, bico tenebuka lyesilyame. Tonda, minopce yu kum ukulul bukni, ninye malye winilamice ning ara, namin kisilyamce, weik arye bico tenesilyame. Anda ninye nirya ati, weik arye bico tenesilyame. Ati ara, malye wininyak nang arye, sik malye winin ning batakicopura, anda, ‘Ninye opnaman,’ tenepmanan ning ara, aning batakuka, teleb ulinanye usilyame,” Yunus birye Allah ati, nyabuk.
Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.
Ayupu ton nyabuk. “Nun ni Allah, ance nyapdeiamsulum ning ara ani. ‘Nara anggun ni Allah Yahweh unune. Na minpola yu kum unulule. Narye anggunti, bico tenena ap, melina ap usune. Ati ara malye wininyak ninye ap, nati yanininyak ninye ara, sik malye ning batakicopura, anang nirya ara, namin kinune. Namin kinamne bukni, dipkoprob kekena kumce, malye pia wininyak nang ati wenenune. Tonda, sik ni yapu arye malye weik winibicopura, dodeipranin, banamak mapu generasi ke tiga ap, ke empat ap, ati ikin ning sik nong deice deibuka wenepnamne.’ Winibuka nyapdeiamsulume,” nyabuka, Musa birye morobuk.
Yata ninye do nirya, atalak babye, yuk dotalak babye, Allah elti, ilil uplirye, amutamukirye, ‘El ara, weik mambul’ tenen, el siuk erebuka unyak ninye nirya ara, Allah arye aninye ati luba kina kumce, pia bico tenebuka melilule. Ara, atalak unyak ninye babye, sik arye mapu deibikirye, dadeipdanin, balamice ani, ninye yupa weik upninbanamak kili sal bapye, melilule.
Wininamluma ara, talye ati kume. Na dipkoprop nyapsine. Yata nang do nirya, Allah ati morolulnye bira, Allah arye areplyeura, dopropnamle. Elsusululnye bira, Allah arye meliplyeura, eipnamle. ‘Anyaik wektinye’ tenen, lourum-lourum abuka pirilulnye bira, Allah arye abuplan pakeipsilyeura, weknamlume.
Anggunda, Allah el mapu ulaluma anya arye, anggun ni Allah arye, ‘Malye nang ara, daupnyake,’ kum tenesilirye, kanye aresulul touk, tonda, talye melisulul touk, anggun babye, atonun wininamlulume. Elda pia telebnye ulula anya arye, teleb ninye babye, malye ninye babye, bico tenebuka kanye aresulule. Anggunda el mapu ulaluma ati, anggun babye, wininamlume. Yesus arye el mapu ati nyabuk.
Ura, Allah arye anggun nirya ati, ‘Se, sik malye winin ning bataknamak do?’ tenen, bico tenesilirye, adiparyuk minopce wenebuka kum osulule. Aning kum bukni, tia talak atibuk namin kisilya deiyok ara nyapnusine. Ara, Allah arye nun tukwak unyap ninye nirya ati, ‘Se, na namin asa arye teleb ubuka melipsiniba, lo tuba awaplyopura, adeice arye sik malye wininyak ning moubuka tenebikirye batakikcopura, tamubuka na tam kipropnamak do?’ tenen, kalikuka disulule. Winisulul bukni, anggun dan do? Aning, moubuka kum tenelulumce, ‘Talya luparabuka malye winin ninguk talibuka wininamap’ tenen, ululum do? Anggunce, aning tenelulum do? ‘Allah bico tenesilirye, adiparyuk wenebuka kum osulul ning ara, elce, ‘Lo arepniba, sik malye winin ning bataknamak’ tenen, patalyeba namin kisilya ara, mambul kum ati, dauplye,’ tenemunce malye tuba winilulum do?
Aning nirya akunum winipsuka ati ara, ninye nirya kel kibicopura, “Se, Allah bico tenepsilirye, el kanye aniryuk melibuka arisilye ning ara, weik mambule. Allah ara, pia teleb ulule,” nyabuka, el si weik arye, erenamake. Allah bico tenepsukce, talyeuk arisilye ning nirya ara, el mi koprop deice arye, arepsuke. Allah arye, el Mi Koprop Yesus ati ara, kanye talima aribuka pia kanye delilule.
Malye-malye weik winilamubu ning ap, malye tuba wininyap ning ap ati, wenebuka oplopsutue. Akunum opmasutu bukni, Allah arye, nun nirya ati, pia weik arye, bico tenepsukce, lyepsuke. Lyepsukce, Kristus ap, talima dukdongopsuka deice arye, kam bulina atonun, teleb kipdeipsukce lyepsuke. Allah arye, nun malye winina ati talye oplopsutu bukni, ‘Se sikda bicoe’ tenen, namin kibuka mitang asa arye, kanye talima arisilya ara, mitik tonun arye kume. Weika arye, bico tenesulule.
Amambul yupu ton nyapnusine. Nunce Allah ati, winiryuk diba tenebupu talak ara, kanye bokoltona kum arye, mikip arye diba tenebupu touk, tuba-tuba diba tenepra balamibya ani, dorsirya talak babye, batakna kum arye, Allah eluk moubuka talibibirye, tuba diba tenenamabe. Winibuka winibibyopura, wini talak babye, aminyan talak babye, Kristus ap, talima dukdongobuka neika unamabe. Bukni, kanye boktopsilyeba, Allah ati batakipyopura, Yesus Kristus ap, neika kum unamabe.
Musa ara, Allah el pil melinanye ulamuk bukni, Yesus Kristus ara, talye pil melinanye kume. El Yesus ara, Allah el mi kopropa ulirye, Allah el mapu nirya ati, anggun weik deiyoknye usulule. Apil dona babye, Kristus arye batakna kum, pia teleb ubuka dolule. Ura, Allah el mapu nyapmasina ara, nunti nyapsine. Ara, nun diba tenenyap nang arye, ilil una pia kum arye, ‘Allah dipkoprop lyesulule’ tenen, diba tenebuka kanye teniltona kum arye, pia talibuka ubibyopura, ‘Allah el mapu dipkoprop unyabe,’ teneptibye. Allah arye dipkoprop lyepnamsil ati, el laka teleb yupu, ninye lyen yupu teleb asa arye, kanye deibuka peterenyabe.
Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.
Aning ati ara, diksukumuk una ati, anggun kanye moupmunce, ‘Allah el piluk donamap’ tenen, kintinibuka dinauk unamlulume. Tonda, ‘Malye ubibyak’ tenen, kanye moubuka kalikildanamlulume. Aning pia wininamlulume. Allah arye, Yesus laka kiplibuk, Yesus Kristus tamubuka yanamle talak ara, bico tenepsilirye, talyeuk arenamsil ning ati, ‘Dipkoprop wininamsil’ tenen, diba tenebuka, anggun kanye Allah deiceuk delinamlulume.
Bukni, anggun telebuk ubuka upmunyopura, sik malye nang arye ikin ning anggun nong deice deipsikcopura, kanye deibuka, ‘Telebuka,’ tenenamlulume. Allah arye kanye deipsilirye, anggunti teleb updeipnamsil atia. Yata ninye do nirya, sikti, ilil kum unamsile. Tonda sik diba tenena kum nang arye ilil ulul ning ati ara, anggun diba tenena ninye arye aning ati ilil kum unamsile.
Ura, arup anyapmasin ning nirya ara, Allah aning nirya ubuka deice arye, bitinye ning lakak upsiliba, diba tenebuka kele kiptume. Tonok ning ara, diksukum un nang, kanye imun ning ap, talima winin winildena ning ap upsile talak noutam, ikin kanye bobikcopura, Allah arye aninye, sik lyen ning ati ara, el kele. Bitinye ning ara, elti, diba kum tenebikirye, pia malye wininyak ninye ara, Allah arye sikti, atalak noutam babye wenelul bukni, sirya daknamle talak, ninye bokuka oplopnamle talak, aning ati ara, ‘Sirya talak arye, pia malye kibuka oplopnamne,’ tenelule. Bukni, wini talak ara, tia talak ati, anang sik weik wenena ning tenepce delina ara, el kele.
ကြော်ငြာတွေ