Yakobus 4:15 - Eipomek

¹⁵ Ati ara, “Wininamabe, wininamabe,” nyaluluma atonun kum bukni, teleb yupu nyaptum ning ara, nyapnusine. Nyanamluma ara, “Allah arye, ‘Wininamake, wininamake,’ tenepsutu opura, elce milipsitu deice aniryuk winilamibya ani, apil ton, apil ton donamape,” nyaptume.

Yakobus 4:15 ပူးပေါင်းရင်းမြစ်များ

Amsal 19:21

Ninye kanye talima noutamak arye, ‘Aminyan talak ara, wininamabe, winibuka unamap ning ara ani,’ tenebikirye, sik kanye tenena weik unyake. Bukni, Allah Yahweh elce, ‘Wininamake,’ tenyamsuk touk, ubuka unyak ning ara, pia nong upnamle. Elce tenesilye ninguk, wininamlulume. Ninye arye tenenyak ninguk, tenebuka una pia kume. Allah elce tenelul ning ara, ninye arye kum bisinyake. Ara, winipmanto kume.

Ratapan 3:37

Allah ara, elce aning-aning nirya talilirye, pia mikip weik deiyoknye ulule. Ati ara, winipmanto, Allah elce, ‘Aning ton winiptue,’ kum tenelam toura, dipkoprob yata ninye aryuk, aning-aning ton ulamtibye do? Kume, Allah arye, ‘Aning winipnamle,’ kum tenelye ning nirya ara, ninye arye dipkoprob kum winiptinge.

Rasul 18:21

Bukni, binuyuka ati, panabayuk talak ara, Paulus arye amutuku nang ati nyabuk. “Ara Allah arye, ‘Tamubuka bilule,’ tenepnilyopura, tamubuka yanamne. Kumopura, kume.” Paulus nyabukce, Kaisarea mutuku bana ati, Efesus mutuku mek bukna yo wekuka bukukce, laut mekwen deice biyuk.

Roma 1:10

Allah moronun talak noutamak nirya ara, aning ton moronune. Ara minop talak arye, kum winipmanto ulamse bukni, wini talak ara Allah arye, ‘Roma mutuku binamle,’ tenen, lo arepnuturye, buplan pakeipnutupa, “Sik Roma mutuku unyak ninye dam dilbinamne,” nyabuka, Allah pia moronune.

Roma 15:32

Tonda, ‘Paulus ara Allah arye tenelamuk touk, elce melibuka uruna ati, nun mutuku, Roma yalyeura, el ap, nun ap, kanye deibuka neika unamaba deice arye, el talima ap, nun talima ap kwa dib danamap’ tenen, Allah moronamnulume.

1 Korintus 16:7

Adip aryuk anggun dam yatinye bukni, ‘Anang ap eipdabirye, adiparyuk kirikuka yuk mutuku binamne’ tenen, kum patanulule. Aning kume. ‘Anggun ap, na ap neika mabuka, din dibuka, yupu talibuka weik arye, unamabe’ tenen, patanulule. Bukni, aning babye, nun Deiyoknye Yesus arye, ‘Aning telebe,’ tenepnutopura, wininamne. Kumopura kume. El kanye aryuka.

1 Korintus 4:19

Wininyak bukni, nun Deiyoknye Yesus arye, ‘Telebe dabetue,’ tenepnutopura, dipkoprop anggun dam minopce dilyanamsine. Anggun dam yatinyopura, sik kwalinyak ninye nyanyak yupu kel kipnamne. Aninguk kum bukni, ‘Anang ara, Allah El Dib Kanye arye, mikip aribukba, mikip ninye unyak do, talye ninyeuk unyak do?’ tenen, dipdenirye, kel biknamne.

Ibrani 6:3

Ati, ‘Allah arye melisilyeba, ayupu nirya kel bikuka sengabibyopura, yuk weik mambul yupu, nong noutamak tonap, kel kipra banamap’ tenen, nyapsine.

Yakobus 4:16

Winibuka nyaptum bukni, wini talak, ‘Wininamabe’ tenen, talye luba kibuka nyalulum ning ara, kwalina nang yupu nyalamak touk nyalulume. Ayupu atonun kwalina yupu nyana ara, pia malye. Ati ara aning winina meme.