Yakobus 3:3 - Eipomek

³ Ara, winipmanto yupu nyapnusine. Kuda basam ara, mikip weik ning ulul bukni, ‘Nun tenebibye touk winipnusil’ tenen, kat ning el si arikdongobibirye, dana-dana tam tapu kirikmapyopura, nunce lilobibibuk, nun tenepmabye bisikuk balule.

Yakobus 3:3 ပူးပေါင်းရင်းမြစ်များ

2 Raja-Raja 19:28

Ati ara, na nyapnukin yupu kekepnilyame. Ance nati tenibuka, derenimince, weik arye, malye yupu weik nyanilyam ning ara, na akunum kel bikisa ati, weik arye, wenepnamkine. Tonda, ance tenebuka kwalina arye, malye yupu nyaniminye ning nirya ara, na dam yangaliba, na amul arye, akunum kekepkise ati, weik arye, wenepnamkine. Ati, winipnamkine. Sapi basam kirikuka bobana ati, kat ning sik u pum bisik dongobikirye, tapu kirikuka bobalamak atonun, narye, an wenena ati winipnamkine. Tonda, kuda basam wein nang arye, ‘Akuda na tenepman bisikuk banamal’ tenen, kat ning sik si bama pum tam dongobikirye, tapu kirikuka bobalamak atonun, narye, an wenena ati, winipnamkine. Aning atonun, an kum tenepmalam ning bukni, narye, nyapdeipniba, ikin ning weik an nong deice upnamkile. Tonda, an banalam bisik nirya ara, naryuk bobanamkine. Winipkiniba, an yalum bisikuk tamubuka bobanamkine. Allah arye, Asyur mutuku taleamuka deiyoknye biti nyabuk.

Ayub 41:13

‘Yatanye birye, mania kanye bopturye, weik buaya bal el si Lewiatan, el nong bol bai tam ara, koplobuk do? Kume, el nong bol deice tam babye, nong noutam babye, bol pia kat weik ulula ati, ninye arye, aning kum koploptinge.

Mazmur 32:9

Aning ati ara, kuda basam do, sapi basam do, anggunce kum pataplye ning awaplyopura, pia malye weik winipliba, ninye yupu kekena ap, diksukum bisik bana ap, pia kum wininyake. Kekena kumce, malye weik wininyaka ati ara, ninye arye, ‘Kume, na tenepnye touk winipnamnil,’ tenebikirye, asapi basam u pum bisik tapu kirikikirye, lipdobikiba, talye kanye bobuka balamle. Bukni, sikda akekena kum ning winilamak touk, kum wininamlulume. Anggunda, pia moubuka tenepmunce, na nyasinye yupu kekebuka, aninguk talibuka wininamlume.

Mazmur 39:1

Raja Daud birye, ayupu Mazmur mot sekuk. Ara, Allah yupu mot nyana deiyoknye arenamika ati sekuk. Aning ara, Allah yupu mot, el si Jedutun lelim nyalamle touk, winibuka nyanamlume.

Yesaya 37:29

An weik tonun kanye eren deice arye, nati dereniminye ning ara, na akunum kekeknunune. Tonda, ance talima erebuka maknya kintinimince malye nyaminye yupu nirya babye, na akunum kekeknunune. Ati ara, wini talak ara an u pum bisik ara, narye besi cincin dongopkinirye, tapu kirikdongopnirye, an si bambol darapdongobuka koupdongopnamkine. Winipkinyopura, narye libuka an yanamlum bisikuk tamubuka bobinamkine. Allah Yahweh arye Asyur mutuku Raja ati akunum nyabuke,” Yesaya birye lak nyabukba, Raja Hizkia kekebuk.

Yakobus 1:26

Yatanye do nirya, elce el bidamnye ati, “Na diba tenepsa ati, diksukumnye unune,” talye nyaltakalul bukni, el nyalye yupu moubuka tenena kum arye, talye luba kibuka nyaplyopura, anye bira tilila yupu uk nyalalule. Atonye bira, el dib tenebuka talibuka ulul ning ara, deiyok kum ubuka ati, nong kum upnamle. Diba tenebuk ning ara, talyeuk ulule.

Yakobus 3:4

Ton ning ara ani. Laut mekwen deice balamak weik mek liya yo ton tenipdelulume. Nong weik mek liya yo ara, ikin weik ning ulul bukni, kumanya mikip aryuk doplibuk, mekwen deice balamak. Balamak bukni, gabung yo der tam mek bukna yo mitik ninguk bukni, pum potokuka ayo kintinibuka deiamica arye, mek liya yo deiyoknye birye bukulyeura, abisikuk balamake.