Ati ara, an moropmalam atonun arepnamkine. Narye weik kel bikna deiyok ning ap, tonda ‘Teleb ning ani, malye ning ani,’ tenen, kel bikna deiyok ning ap arepnamkine. Winipkiniba an pil donalama ara, pia teleb unamle. Aminyan talak unamak nang ara, an pil donalama atonun kum donamake. Tonda, minop talak ulamik nang babye, an atonun kum ulamik. Anda pia teleb ubuka pil donamlama atia.
Yakobus 3:17 - Eipomek17 Amalye un ning akunum nyapmasin bukni, Allah arye weik kel bikilina deiyok ning arisulula ara, winira nyapnusine. Minop ara, el kel bikilina deiyok arisilye ning ara, yuk malye ning tonok babye tabakuka kum ulule, diksukumuk ulule. Ton anang ara, ‘Nun nirya talima nimalye aryuk, telebuk neika ulamtibye’ tenen, patalule. Tonda, sikce, ‘Na yupu nyapnikcopura, yuk nang kekebikirye, alye una ap, ilil una ap, kanye ikine ap, kanye delina ap, unamak do, kum do?’ tenen, minopce moubuka teniltonyake. Tonda, ninye arye yupu nyabikibuk, moubuka kekebikirye, nimalye aryuk unyake. Tonda, yuk nang malye ubicopura, ‘Na adiparyuk wenebuka optinye,’ kum tenebikirye, anang ati, bico tenebuka luba kilongonyake. Sik yupu nirya ara, duknuna kum arye, lak akuk laka nyanyake. Ton ninye urasin eibikirye, sik kanye kum bokolinyake. Sik teleb ubuka diksukum unyak ning noutam nirya ara, duk telebuk moulule. အခန်းကိုကြည့်ပါ။ |
Yakobus 3:17
63 ပူးပေါင်းရင်းမြစ်များ
Aning winibuk ning ati, ninye arye nyanmekba, Israel ninye kekebikce utenebik. ‘Se, nun Raja Salomo wininmal ning ara, elcuk kum tenebuk. Nun ni Allah arye, weik kel kina deiyok ning arebukba, adeice arye Salomo birye, ‘Dipkoprop teleb winina ara ani, diksukum ning ara ani,’ akunum tenebukce, akilapu bitinye ati, yupu teleb ubuka bokipmale,’ tenen, kel kibik. Winibuka tenelamikce, ‘Se nun Raja Salomo bira pia weik mambulnye,’ tenelamikce ilil ulamuk.
Ati na ni ance kel bikna deiyok ning arepniminba, na talimak weknutopura, an wiamlum ninye ati, ‘Sik winibice ara, malye ning ara ani, teleb ning ara ani,’ tenebuka, nyaptibye. Anyapmakin ara, talye ati kum nyapne. Yatanye birye, teleb ubuka an wiamlum ninye talipturye deiyoknye kiptu do? Na dem aryuk kum winiptinye,” Salomo birye Allah ati nyabuk.
Tonda, an ni koproba Allah Yahweh, elce anti, kel weik kina deiyok ning ap, tonda ‘Anye una teleb ning ap, tonda aning ara malye un ning, ani, teleb un ning ani tenen bikilina deiyok ning ap nirya ara, an deice deipkiliba, sik Israel yala nang unyak mutuku ap, Israel yala nang nirya ap talibuka umince, yupu nyanamlam talak nirya ara, Allah el yupu uk moubuka talipmince, aninguk winipnin banamlame. Ara, ance el si erelyam Allah, Yahweh arye, ‘Aning winipnamlum, aning ara pia kum winipnamlume,’ nyapdeiamsuk yupu uk, ‘Ance ayupu moubuka talipmince, unamlamʼ tenen, narye nyapkine.
Bukni, pia dipkoprob winipnamkin ning ara, ani. Ance sal deipnamlame. Anye bira, pia namin arye dakeiam asa unanye unamle. Elda yuk nang ap yu upliba kum olanamake. Tonda, na Allah arye elti, pia melipniba, elti, mal olan nang ara, dana-dana tam mutuku nang ara, el dam kum olyanganamake. Aning wininmale ning deiyok ara, el si Salomo nyanamake. Tonda, na Allah arye arepnyeba, an mi Salomo birye, deiyok kibuka Israel nang talipnamle talak noutam nirya ara, elcuk yupu nyalamliba unamake. Tonda, na Allah arye arepnyeba, dana-dana tam unyak nang ap, Israel nang ap, mal olana kumce, namin arye teleb kibuka neika unamake. Salomo birye talibuka yupu nyapnamle talak nirya ara, olana kumce, telebuk unamake.
Allah arye, nun tukwak mutuku unyap nang nirya ati, nyasulule. “Dipkoprob, weik kel bikna deiyok ning ara, ani. Ara, anggun ni koproba Allah, el si Yahweh ati, ‘Se, elda pia mambule,’ tenepnulumce, nati ilil unamsile. Tonda, Allah arye, “Teleb winin ning ara, aniʼ tenen, kel bikin ning bukni, el nong noutam ara, ani. Ara, yata malye winin ning do nirya, anggunce aning bataklumce, anang dam arye kisik dakuka, yukak bimunyopura, kel weik nang unamlulume,” nyapdeipsuke. Ayupu nirya ara, Ayub birye, el kwit capu sik winilye nang ati nyabuk.
Ayupu akunum nyabukopura, Musa birye, Bezaleel ap, Aholiab ap, tonda, sik kayapu nang, sik pil dona ati kel weik nang nirya ati yukubukba, yayik. Ara, anang bitinye ap, tonda, yuk pil deiyok ning, kel weik nang ap, kanye deibukabikce, ‘Nun babye Allah el si eren aik melibuka donamabeʼ tenen, kintinibik nang ap yayik. Apil don nang nirya ara, Allah Yahweh arye, pia teleb pil dona deiyok ning ap, kel weik bikina deiyok ning ap, akunum areamuk nang ulamikce, apil deiyok koubik.
Anyapmasina ara, talye ati kume. Deiyok ara, pia weik kel bikna deiyok ning ara, Allah Yahweh elcuk aresulule. Winibuka arisilye ning ara, ‘Teleb una ani, malye winina ani’ tenen, moubuka kel bikna deiyok ning aresulule. Elce kel bikna deiyok ning ap, moubuka tenena deiyok ning ap, ninye nong deice arisiliba, dib tenebuka kel kinyabe.
Mutuku-mutuku nirya unyak ninye ati, ‘Teleb ninye ani, malye ninye ani,’ nyabuka, Allah arye yupu lipsisikuka bokolinamsile. Tonda, ninye mutuku-mutuku nirya arye, ‘Olanamap’ tenen, yupu deice nyapdeipdakirye, wililalamak ning ati, elce yupu lipsisikuka bokolinamsile. ‘Ninye opnuyap’ tenen, yo tace lubuka, si ketelinyak ning ap, sik parang ya ap, kapak ya ap ara, dopdobikirye, uku dongobikiba, uku diplirye, mitang uplyopura, tuku palin ning memena ati, tekinamake. Wininamak talak ara, mutuku-mutuku nirya unamak ninye arye, tonap kum olanamake. Ton tam nang arye, ton tam nang ati, ‘Olbinuyap’ tenen, ya dobuka kum olbanamake. Tonda, ninye olbana ati, peterelalamak ning ara, tonap tamubuka, kum wininamake.
Aning nirya bataknamluma ara, talye ati kume. Deiyok ara, nyapnusine. Ara, malye yupu uk nyalulnye bira, el talima pum tam ara malye ninguk ulul ati, kanye bona kumce talye yupu uk nyaltakalule. Aninguk kum bukni, tonda, yata ning do nirya, el winilul ning ap, nyalul ning ap nirya ara, Allah el si Yahweh ati, tilila yupu uk nyalulba, walwal nang kekebikirye, ‘Aning ara diba,’ tenenyake. Tonda, tenepce arye talye tilila yupu uk nyalula deice arye, din patanmaliba imun kanye bobuka unyak ninye ati din kum arelule. Aning atonun, mek patalibuk imun kanye bobuka unyak ninye ati, mek kum arelirye, mangkau kilolongana uk ulule. Anang nirya batakalongona uk ulule.
Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.
Ati anggun babye narye, ‘Israel ninye ati namin kanye bobuka peterelanamak,’ tenebuka, anggun nong deice deipsise bukni, anggunce na yupu kekebuka kum winilulume. Narye anggunti, ‘Teleb bisikuk moubuka peterenamak’ tenen, nyapsise bukni, anggunce nati batakanululumce, yuk ninye ati, peterelulum talak ara, kirikukapmunce talye yuk yupu uk tabakuka peterelulume. Tonda, yuk ninye ati yupu moulin talak ara, ‘Na kwit ani, tonda anye bira na like’ tenen, lipsisikuka yupu kum moulilulume. ‘Teleb tenepnamsiak’ tenen, yupu moulin talak ara, talye kwalin yupu nyamunce, moulilulume. Winiluluma ati ara, narye anggunti malye kipdeipsiniba, sik yuk Israel ninye nirya eipsikirye, anggunti, ‘Se, sik Lewi yala deiyok nang, imam-iman nang ara, malyeuk unyake,’ nyapsicopura, anggunda ikin kanye bobuka, alye dakalanamlume. Allah arye sik Lewi yala deiyok nang ati nyabuk.
Na yanamne sum ara, malye ulamice ninye ap, teleb ulamikce ninye ap ati, yupu lipsisikuka bokolina ati yanamne. Nara, yupu lipsisikuka bokolina deiyoknye unune. Winipmanto ara, dekna weik ning el si perak, uku dabikirye, moubuka dinmakibuk, uku arye malye wamlye nirya uku diplirye, teleb ninguk laka upliba, aning dobuka, moubuka memelamak touk, narye malye ning aning-aning nirya, kum kipdeipnirye, teleb kipdeipnamne. Malye ning bataknamne. Teleb ning ara, ‘Naʼ tenen, deipnamne. Aning atonun, dekna pia weik ning emas do, perak do, malye wamlibuk, teleb kililamak touk, narye sik Lewi yala nang, imam-imam nang nirya ati, yanuka yupu lipsisikuka bokeipnirye, teleb kipdeipnamne. Winipnyopura, sik Lewi yala deiyok nang arye, ila tuba tamubuka, na Allah Yahweh ati, kam ning obuka arelyakirye, na si erena ati, uku dongopnamake. Winibikiba, na Allah arye kanye deipnamne. Narye sikti, teleb kipdeipniba, na tenenye touk wininamake.
Akeil deiya buru tam urasin teleb ulul bukni, pum tam ara, malye ning ulamla atonun, anggun babye atonun ululume. Anggunda yuk nang asing eipsikirye, ‘Anang ara diksukum teleb ubuka wininyak nang,’ tenesinyak bukni, dipkoprop anggun talima noutamak ara, pia malye ning aupsukba, bola deiceuk teleb pil dobuka winilulume. Bukni, anggun talima noutamak ara, pia malye ning aupmasil bukni, malye ninguk winilulume. Yesus arye nyabuk. Nyabukopura, ayupu ton nyabuk.
Sik kanye deibuka, telebuk un nang ara, ani. Ara, sik kanye talima bitinye bokoltona kum diparyuk, ‘Na talima ap, nonge ap nirya, Allah akunum arepsa ati, malye winin ning tonok ning babye, kum wininamne,’ tenenyakce, el yupu uk kekebuka unyak nang ara, Allah eipnamake. Ara, sik talima kanye dukdongopra, Allah ap, neika ulamikirye, Allah ap epdakirye, kanye deibuka epdanamke. Aning ati ara, sik kanye deibuka telebuk unyaka atonun, pia unamake.
Sik kanye deibuka telebuk un nang ara, ani. Ara, ninye olanmace talak, ‘Namin uptinge’ tenen, ‘Olana ap, walana ap ara, bataklulume,’ nyabuka, teleb ubuka bita dilamice nang ara, Allah diba tenebuka unyaka anya arye, aminyan talak ara, anang ati Allah arye nyapnamle. “Anang ara, na mapu unyake,” nyapnamle.
Anggunda, Allah el mapu ulaluma anya arye, anggun ni Allah arye, ‘Malye nang ara, daupnyake,’ kum tenesilirye, kanye aresulul touk, tonda, talye melisulul touk, anggun babye, atonun wininamlulume. Elda pia telebnye ulula anya arye, teleb ninye babye, malye ninye babye, bico tenebuka kanye aresulule. Anggunda el mapu ulaluma ati, anggun babye, wininamlume. Yesus arye el mapu ati nyabuk.
Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.
Yuk nang arye, anggunti, ‘Nun ap, anggun ap neika teleb ubuka kum unamap’ tenen, malye kipdeipsicopura, anggun deiyok uka. Aning ara anang anggun deice aupnamle bukni, anggun diba tenelulum ninye, anggun bidamang deice aupnamle ning nirya ara, ‘Kume, derelana ap, olana ap kum diparyuk, nun ap, yuk ninye nirya ap, kanye talima dukdongobuka namin asa arye, teleb ubuka neikauk unamap’ tenen, pia pi dobuka pirilenamlulume.
Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.
Ura amapo, yuk yupu ton nyapnusine. Na kele, anggun Roma mutuku ululum ninye ara, teleb ubuka ululume. Anggunda, weika arye akunum kel kilamlumce, anggun mutuku kopropa ninye ati, teleb kibuka peterelalulume. Yesus arye peterelamsuk ning nirya ara, anggunce moubuka kel kiluluma anya arye, anggun kel bikna ning ara, kum sukmasile.
Allah El Dib Kanye arye, tonoknye biti, Allah el ulul ning ap, el laka teleb yupu deiyok noutamak ning ap laka nyana deiyok ning ariliba, anye bira weik kelnye ulule. Yuknye ati ara, Allah El Dib Kanye melipliba, Allah el yupu kekeplinye bira, “Ayupu nong noutamak ara, ani. Ati winibuka unamabe,” nyabuka, nyalina Deiyoknye usulule.
Ara, yuk yupu ton nyapnusine. Kristus el bidamnye kanye erena kumce, talima mitang ubuka una ap, ‘Na kwit malye kanye boplyak’ tenen, nimalye arye una ap arisilya deice arye, ayupu ton nyabuka moropnusine. Na Paulus arye nyapsine. Na kele, anggun kan-kan ton nang arye nyaninyake. “Kume, Paulus ara, neika bukuka dilanyap talak ara, ilil asa unyak nang atonun ulul bukni, nun neika kum unyap talak ara, mikip weik nang ulye touk, mikip arye nyasulule,” nyaninyake.
Yuk nang nirya arye, ‘Anang ara teleb nanguk unyake, tenenamsiyak’ tenen, wininyap ning ara, ani. Nun kanye talima noutamak ara, malye winina pia kum, diksukumuk una ap; ‘Deiyok ani’ tenen, moubuka kekena ap; kel bikna ap unyabe. Tonda, ikin usilye ning do, malye winisinyak ning do, aning ati pola-pola yu una kumce, nimalye arye winina ap; yuk ninye sik patana ati melina ap wininyabe. Tonda, Allah El Dib Kanye mikip deice winina ap; tenepce arye winina kum bukni, yuk ninye ati dipkoprop bico tenebuka melina ap wininyabe.
Ara, anggun Korintus ninye ton tenipdelulume. Wenen surat dopdeipsukba, Allah arye anggun talima noutamak pil dobukba, anggunda mambul kanye bobuka engepluma deice arye winipsuk ning ara, telebuka. Ara ani. Anggunce nati, ‘Anang ara, teleb nang tenepnamsil’ tenen, pia pi dobuka yupu nyalamnulum ning ap, tonda, ‘Malye winipsuk ning kum daneiptibye’ tenen, pi dobuka pil dolamlum ning ap, tonda, ‘Se, yata ati malye winin ning nun noutamak tuba upmasil do?’ tenen, ilil kanye bobuka ululum ning ap, tonda, ‘Malye winin ning batakuka, teleb ninguk wininamabe’ tenen, patana ap, ‘Malye usilye ning batakuka, teleb kibuka mupdeipnamap’ tenena ap, tonda, malye usilye ning ati, “Dauplye,” kum nyanamap bukni, malye ning nirya ati ‘Yupu bokeibibirye, lipsisiknamap’ tenena ap, anirya ati ara, na kanye ara, telebuka. Adeiyok nirya ati ara, anggunce apil nirya dolamluma deice arye, ‘Anang ara, teleb winin ninyeuk unyak’ tenen, laka upsilaba akunum kel kisinyabe.
Aning ati ayupu ton nyapsine. Sik wa koun ninye yala ning nirya arilula deiyoknye bira, Allah arye nun patapsilye kwaning din ning nirya aresulule. Anye biryuk, sik yala ning nirya arisilibuk, anggun yala ning weik upliba, kum ekuka dililum ning babye, weik arye arenamsile. Elcuk melisilyeba, anggun diksukum winin ning pil domunyeba, nong weik unamsile.
Deiyok ara, ani. Duk moulamle yo arye, el yo yala ulye touk, duk moulule. Duk moulamle atonun, diksukum una ap, teleb ninguk winina ap ati, dirina usilibuk, duk moulamsil ning ara, nyapnusine. Ara, teleb winin ning, yala nirya ap, Allah ara, malye ning tonok ning babye, kum ulirye, pung ulye touk, diksukum winin ning nirya ap, tilila nyana kum aniryuk, dipkoprop yupu uk nyana ap ara, aning-aning nirya ara, dirina ning ulule. Teleb yo arye, teleb duk moulamle atonun, anggunda dirina atonun ninye ululuma anya arye, ateleb winin ninguk, pia ati wininamlulume.
Atalak noutam nirya ara, anggun ap, Yesus Kristus ap, talima dukdongobuka neika ululumbuk, Kristus el mikip deice melisiliba, pia diksukumuk winilamlum ani, ‘Teleb winina ati, duk weik moupnamsile’ tenen, Allah morosunune. Diksukumuk winilamunyebuk, duk weik moupsilyopura, ninye nirya eipsikirye, “Allah elda pia telebe,” nyabuka, el si erebikibuk, Allah el si weik upnamle. Winiplyopura, ‘Ninye weik el si kel kibikirye, el siuk erepnamak’ tenen, Allah morosunune.
Telebe na kayapu, asurat sirya dakana ati ayupu nyapnusine. Ara, yata teleb ning do nirya, pia dipkoprop mambul ning ap, kwalina kumce diksukum una ap, malye ning pia kum mingne ning ap, ninye nirya arye, ‘Aning dipkoprop teleb,’ tenenyak ning ap, apia teleb ning niryauk ara, tenenauk unamlulume. Yata ning do nirya, awinin ning ati ara, ‘Allah arye kanye delilule,’ tenenyap ning nirya ara, aninguk tenebuka unamlulume. Malye winin ning yala-yala nirya ara, kum tenenamlulume.
Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.
Ura, Timotiuso, na winiryuk nyapmakin ning nirya ara, pia moubuka talipminyak arye, peterenalyame. Allah ap, Yesus Kristus ap, Allah arye el im deice pil melin nang, wipdeibuk nang malaikat ap, sik nirya arye pia kekebuka disinyaka ati ara, na nyapkin yupu moubuka talinalyame. Tonda, ‘Anang ara, na kwityapu nang ati ara, kum wenepnune, dauplye,’ tenepminyak arye, yuk onang ati, ‘Mikip arye nyanamne,’ tenena kum aniryuk, yata ninye do nirya ati, atonun tenebuka, kanye wililana kum arye, teleb kibuka peterepra unamlame. Na Paulus arye nyapkine.
Tonda, Allah el pil dona ati melina ninye ara, yupu deice arye yu uplirye, derelana ara, pia meme. Yu uplirye, malye yupu nyaldana kum bukni, Allah el pil melina ninye arye yuk nang ati, nimalye arye teleb ubuka adiparyuk melinamake. Yuk nang ati, adiparyuk teleb ubuka peterepnamake. Yuk nang arye, Allah el pil don nang ati, malye updeisikca babye, ‘Malye winipdeipmaniak,’ kum tenenamake. Aning ati lubakibikirye, tuba tenena kum unamake. Kanye nimalye aryuk teleb unamake.
Yata ninye do nirya, sik kanye talima etekdop unyak ninye ati ara, pia telebuk ulule. Bukni, yata ninye do nirya, sik kanye talima pia malye ninguk tenebuka, patalye ninye ati ara, aning-aning nirya, pia malyeuk ulule. Aninguk kume. Sik kanye tenen ning ap, sik talima noutam ning ap ara, pia malyeuk akunum uplibuk, ‘Aning telebe, aning malye’ tenen, moubuka kum teneptinge. Sik kanye talima akunum kwalinmala ati, teleb ubuka pia kum tenebtinge. Pia walwal nanguk akunum unyake, nyapkine.
Tonda, “Yuk ninye ati, yuk nang arye, ‘Aninye ara, malye nang tenepnamak’ tenen, yupu malye nyabuka, deililana meme. Yupu deice waldana ap, ninye nong oldana ap, pia kum wininamlulume. Aning kum wininamlum bukni, yuk nang, sik patalye ning tenebuka, nimalye arye, melibuka unamlulume. Yata ninye do nirya, tenepce arye winina ap, kanye talima eremna ap kum bukni, dipkoprop sik amutamuk umunce, nimalye arye telebuk wininamlume,” nyabuka, peterenalyame.
Ura, asilen ning ap, wenena ap, peterena ap usinyak talak noutamak ara, kanye deibuka kum unyabe. ‘Se, na ikin unulule’ tenen, engenauk unyabe. Bukni, ikin kanye bobuka, wa wibikiba, aminyan talak aning-aning weik, nong upliba, teleb kanye bobuka, weika arye lilamak touk, winilena ap, wenena ap, peterena ap usiliba, adeice arye moubuka kekekirye, kel kinyak ninye ara, aminyan talak kanye deibuka, diksukumuk unyakce, yuk nang nirya ap, teleb ubuka neikauk unamake.
Ura, na kayapo. Anggun nirya arye, ‘Yuk ninye nirya ap, kanye deibuka neika ubibirye, malye winina ap, olana ap, yupu deice walana ap, aning nirya pia kum diparyuk, diksukumuk unamap’ tenen, pia pi dobuka, pirilenamlulume. Malye winina ning nirya, kum batakikirye, diksukumuk kum unyak ninye ara, nun Weik Deiyoknye Allah, el ap neika ansinibuka kum unamake.
Yata teleb ning do nirya, pia teleb diksukum winina ning nirya ara, Allah elcuk arepsilyeura, im deice arye yangasulule. Ara, im deice dirina ulul ning nirya kwepdeibuknye, Allah elcuk pia teleb ning arisulule. Tonda, Allah elda, keting deiplirye, kanya urasin yuk-yuk kinim-kinim alamle touk, pia kum ulule. Allah el pil dobuka ulul ning nirya ara, pia tuba telebuk ulule.
Aninguk tenebuka wininamluluma deiyok ara, ani. Ara, yata nang do nirya, yuk nang arye sikti, malye ubiceura, bico tenebuka luba kina kum arye, malye ubuka wenebmace nang ara, Allah arye anang sik malye winin ning ati, talye luba kinamle do? Kume, Allah arye awenebice nang ati, sikce yuk nang ati wenena yupu nyalamak touk, bico tenebuka luba kina kum arye, tamubuka weik arye wenebuka opnamle. Bukni, yuk nang arye, sik malye upsikiba, bico tenebuka lubkinyak nang ati ara, Allah el babye anang ati, bico tenebuka, lupakilongonamle anya arye, weik arye kum wenepnamle.
Ato yupu dipkoprop nyaptuma deice arye, anggun kan-kan noutam arye, ton nang ati ara, ‘Telebe,’ ton nang ati ara, ‘Malye’, tenebuka, akunum kanye bokolilalulume. Tonda, ato yupu nyaptuma deice arye, yupu bokolin nang atonun bukni, malye ning tenebuka, malye nang atonun akunum ubnalume. Ati ato winina ara, pia meme nyapsine.
Winin ning ara, nun ni Allah im deice arye kum arisulule. Ara Allah arye, ‘Wininamake,’ tenesilye touk winin ning kume. Ara nun babye kanye talima noutam patapsilye ning uka. Amalye usilye ning ara, sik diba tenena kum ninye ara, Allah El Dib Kanye nyasilye yupu kum kekenyakce, yaniltanauk wininyak ning ati nyapsine. Tonda aning ara, Isa Mutuku Dongonye arye nyalibuk, malye ubibyopura, malye ulisulule.
Allah el tam kipdopmunyopura, Allah elce anggun dam unamle. Sik malye ning paliplibuk, taruk mek liklamak touk, anggun malye winimunye nang ara, anggun malye ning batakanamlulume. Anggun kanye bitinye kisululbuk, kanye bokoltosulul nang ara, anggun kanye talima noutam malye upsilye ning nirya batakanamlulume. Allah arye nyasilye yupu kekebuka wininamlulume. ‘Tonok kanye bobuka unamlum’ tenen, nyapsine.
Ara, Allah el dipkoprop yupu talibuka dobolbalamunya deice arye, malye un ning nirya akunum batakluma anya arye, yuk diba tenena ninye ati, dipkorop kanye deipdanuka, melilanauk ululume. Aning ati ara, pia dipkoprop anggun talima ap, kanye ap, arepdamunce, bico tenebuka, weik arye melinlanauk unamlulume.
Allah el pia ati, upnamle yupu peterelamsika ati, malye winin ning nirya ara, batakanamlulume. Ara, yuk nang ati, yu una ap, ‘Na’ tenen arye, talye nyana ap, ‘Yuk nang ning, na ton doproptinye’ tenen, talima noutamak pataplibuk tenena ap, malye winin ning aupmalye bukni, nong bol deiceuk teleb una ap, yuk nang ati talye yupu nyabuka lulundana ap, amalye winin ning yala-yala nirya ara, batakanamlulume.
Anggun yuk nang ati pil melin nang ara, anggun deiyok nang ati nimalye arye, sik yupu kekebuka, sik amutamak unamlulume. Ara, nun patapsilye ning tenebuka, nunti teleb unyaka deiyok nang atibuk kume. Tonda yuk deiyok nang arye anggunti yu nyabuka, ikin pil deipsikce nang babye, anggun tibuk sik amutamak bukuka nimalye arye unamlulume.
ကြော်ငြာတွေ