Allah arye, nun tukwak mutuku unyap nang nirya ati, nyasulule. “Dipkoprob, weik kel bikna deiyok ning ara, ani. Ara, anggun ni koproba Allah, el si Yahweh ati, ‘Se, elda pia mambule,’ tenepnulumce, nati ilil unamsile. Tonda, Allah arye, “Teleb winin ning ara, aniʼ tenen, kel bikin ning bukni, el nong noutam ara, ani. Ara, yata malye winin ning do nirya, anggunce aning bataklumce, anang dam arye kisik dakuka, yukak bimunyopura, kel weik nang unamlulume,” nyapdeipsuke. Ayupu nirya ara, Ayub birye, el kwit capu sik winilye nang ati nyabuk.
Yakobus 3:13 - Eipomek13 Anggun kan-kan noutam arye yata nang do, pung teleb un bisik kel nang ap, aning-aning nirya weik kel nang ap unyak do? Sik awinitingopura, sik teleb winin ning nirya deice arye lakak nyanamsiake. Tonda, Allah arye weik kel bikna deiyok ning, sikti, aribuk deice arye, talima mitang ubuka teleb winin pil dolamaka deice arye, lakak nyanamsiake. အခန်းကိုကြည့်ပါ။ |
Yakobus 3:13
46 ပူးပေါင်းရင်းမြစ်များ
Yatanye do, weik kel bikna deice arye, pia moubuka kel kipmantonye bira, anyapman yupu nirya teneplirye, moubuka kel kipnamle. Tonda, el anye birye, ‘Allah ara, dipkoprob aulule. Allah Yahweh arye, nun tukwak ninye ati, weik arye bico tenesilya ara, pia kum kum danamle’ tenen, moubuka tenenamle. Daud birye, ayupu nyabuk.
Deiyok ara, Yahweh arye wipdeiamsuk nang, el ‘Naʼ tenen nang ara, kanye deibuka unyabe. Tonda, yata nang do nirya, sikce sik bidamang kanye erelana kumce, sik talima namin asa ukirye, ‘Allah aryuk melipsutue,’ tenenyak nang ati, Allah arye teleb kilisululce, nun ikin usulul noutam ara, lobuka lyelosulule.
Tonda, sik talima erelana kumce, amu tam kibuka talima namina asa unyak nang ara, Allah arye, ‘Teleb winin bisik ani, diksukum winin ning ara, ani,’ nyabuka peteresulule. Atonun, sik maknya kintinina kumce, talima namin asa wininyak nang ati, ‘Na diksukum ban bisik ara, ani. Teleb winin ning ara, ani,’ nyabuka, peterelule.
Anda pia mikip weiknye ulyama ati, ance winilyam ning ara, ninye nirya kekebikirye, ‘Se, elda pia mikip weiknye ulule,’ tenekinyake. Ati, an ninye on parang dobuka, an keil deice lipdongobuka lapkwetepmince, kintinipnalame! Ara, anda urasin pia teleb una ap, mikip una ap, mambul nin winina ap ulyama ati, ninye nirya arye anti, ‘Se, elda pia telebe,’ nyabuka, si erebuka kinyake.
Kel weik bikinyak nang ara pia telebe. Yata nang ton, sik kel weik nang atonun unyak do? Ton kum unyake. Tonda, yata talye nang arye, mambul weik ning nong deiyok ning ara, laka nyapsiting do? Kume, sik kel weik bikinyak nang aryuk, nong weik noutam ara, kel bikikirye, sikcuk aning laka nyapsitenge. Kel weik bikin nang ara, sik kanye delilamikirye, sik si ara liltakana uk unyake. Winibuka libikiba, sik urasin ara teleb ulule. Yu nang arye, sik urasin yu tenen nang ara, atonun kum unyake.
Dipkoprob ning ara, yata kel weik bikinyak nang do nirya ara, ninye deiyoknye Raja arye, “Anggunda wininamlume, aning ara kum wininamlume,” nyabuka nyapsilye yupu ara, adiparyuk wininyake. Anang ara, yu kum tenenamla ati, anang wenebuka kum opnamle. Ikin ning sik dam kum yanamle. Sik kel weik bikinyak nang ara, moubuka tenebikirye, ‘E, elce nyapmasil yupu ara, akunum kekepmaba ati, winibuka-winibuka unamabe. Anyapmasil yupu ara, wini talak arye winipnamapʼ tenen, moubuka tenenlamake.
Mikip nang arye yanibikiba, ikin kanye bobuka, talye kankan unyak nang ap, tonda bona kum talibikceba, yuk nang arye, ‘Sikda talye nang unyaka,’ nyabuka, malye kinyak nang ara, Allah Yahweh arye, sik kanye tamubuka teleb kipdeipliba, sik kanye delinamake. Ara, Pia Teleb, Lek Deiyoknye, Israel nang sik ni koproba Allah arye, sik pia talye kankan Israel nang ati, tamubuka teleb kipdeiplyeba, kanye teleb deice arye unamake. Sikce elti, ‘Allah ara, pia telebe,’ nyabikirye, pin-pin asa arye, el siuk erenamake.
Aning atonun, Midian mutuku ap, Efa mutuku ap arye, boyanganamak unta basam nirya, arebikiba, dopropmunce, anggun mutuku nirya ara, sikcuk yanuka langdipnamake. Tonda Syeba tam unyak ninye nirya arye, pia dekna teleb ning emas ap, pia nintong teleb un ning, el si ara kemenyan ap, anggun dam boyanganamake. Aning-aning boyanganamak talak ara, Allah arye weik mambul pil dobuk ning ati, sik aninye nirya arye, ‘Allah elda pia mambul ulule. Elda telebe,’ nyabuka, si erebikirye sik dam anyuk aning boyanamsiake.
Nabi Yesaya birye nyabuk. Allah aning-aning deice tam talibuka Weik Mikip Deiyok ululnye, Allah Yahweh arye, ‘Wininamne,’ tenelye touk winilule. El Sambala mikip weik ning na deice deipnuke. Allah Yahweh winipnukce, nati ‘Elce laka teleb yupu nyalbanamle’ tenen, wipdeipnuke. Ara, bona utotoa kum talinyak ninye ap, imun kanye bobuka, unyak ninye ap ati, nyanamlyame. Kanye talima uk dipliba ikin kanye bobuka unyak ninye ati, ‘Allah arye anggun kwa dibuka melinamsile,’ nyabuka laka nyanamlyame. Tonda malye kum winilamik buk, wenen aik noutam bunyak nang ati, ‘Allah arye lolinamsile,’ nyabuka laka nyanamlume. Tonda sik asing kubukba kwelakirye, kunukna noutamak unyak ninye ati, “Allah arye anggun asing laipnamsile,” nyabuka laka nyanamlyame. Anggun nirya ati, “Allah arye lyepnamsile,” nyabuka, ‘Nyalbanamle’ tenen, Allah Yahweh arye na wipdeipnuke. Nabi Yesaya birye nyabuk.
Nyabukura, na Yeremia birye, tamubuka Allah ati asipdese. “Se na nio, amutuku unyak nang nirya ati wenepnalam ning ap, amutuku-amutuku nirya, malye kipdeipnalam ning ap ara, yata nang arye, aning moubuka teneptingce, bikting do? Awinipnamle ning nirya ati, moubuka bikmantonye ton, aunmal do? Tonda, anda Allah Yahweh arye, awinipnalam ning ara, minop talak arye, yatanye biti laka nyaplumba, kekebukce, yanuka laka nyapsutuba, biktibye do? Yatanye birye, adeiyok ning ati, an Allah arye, amutuku-amutuku nirya, tuku malye kipdeipsiminba, pia oldemuk upnamle ning ara, laka nyapsutumura, biktibye do? Tuku malye uplyopura, tuku pum tam arye palamle ning nirya, kel-kel abuka sesal seplirye, koluplyopura, mek pia kumak, pata mutuku atonun upnamle ning ap, amutuku noutam ninye nirya ton, kum banamak ning ap, asik oldemuk upnamle ning ap ara, Allah ance yatanye biti akunum laka nyalamlumba, nunti yanuka laka nyapsutu do? Kume, ninye aryuk aning nirya, kum laka nyapsitinge.” Na Yeremia birye, Allah ati nyabuka asipdesiba, Allah Yahweh arye tamubuka nyapnuke.
Allah arye ayupu nyabukopura, ayupu ton dukdongobuka nyabuk. Nara Allah Yahweh arye, nyapsine. Sik kel weik bikamik nang arye, ‘E, nunda kel weik bikupu ati, nunda mambul weik nang,’ tenena kume. Winibuka tenebikirye, sik talima babye erebuka, kwalina kume. Tonda aning atonun, anggun mikip weik nang ara, “E, nunda mikip weik nang unyaba, ati, nunda mambul weike,” nyabuka, maknya kintina kume. Aning atonun, sik bona weik talin nang babye, ‘E, nunda aning-aning yala-yala nirya talinyabe. Tonda, bona weik talin nang unyabe. Tonda, nunda mambul weik nang unyabe,’ tenebuka, maknya kintina ap, kwalina ap, pia meme.
Allah ancuk wini talak ara, ‘Winipnamle’ tenen, kintinilisilyame. Tonda, ‘Atalak ara, aning li upnamle’ tenen, kintinilisilyame. Ancuk minop talak, deice tam erebuka ulamikce nang ara, dobuka amu kipdeipmince, sik ulamica ning pununa ati, winiryuk ning wibuka, erelilyamnye bira, an uka. Tonda, weik kel kina deiyok ning ap, nong noutamak kel bikna ning arelyamnye bira, Allah anuk ulyame.” Daniel birye, nyabuk.
Se, anggun amutuku noutam ululum nang kan-kan arye, anggun kanye amu tam kibuka ululum nango, anggun adiparyuk, Allah Yahweh el dam tamubuka yalulume. Tonda Allah arye, ‘Aning ara, wininamlume, bukni aning ara, pia kum wininamlume,’ nyabuk ning, talibuka winilulum nang ara, tamubuka Allah dam yamunce, Allah elce tenelul touk, winipnamlume. Tonda, ‘Atalak ara, nun ni Allah arye, yata nyapnamsil do?’ tenen, Allah dam tamubuka yamumce, moubuka kekedenamlume. Ara, kanye lamapdongobuka, Allah dam yamunce, kanye erelana kum aryuk, namin kanye bonamlume. Tonda, Allah arye, ‘Wininamlume, wininamlume. Diksukum winin ning ara, ani, aninguk talibuka, telebuk wininamlume,’ nyabuka laka nyapdeiamsuk yupu kekebuka, aninguk talibuka, telebuk wininamlume. Winipmunyopura, Allah Yahweh el yu, ‘Anggun Israel nang deice deipnamsin,’ tenebuk sum ara, anggun telebuk winilulum nang deice, ‘Bico tenepsuturye, wenen ning kum arepnamsil do? Arepnamsil do?’ tenena atia. Bukni, el kanye ara, nun walwale.
Sik abitinye nang ara, kanye talima erena ap, malye kina ap, ubukba, adeice arye nyalamdik bukni, Musa bira kanye talima namin asa arye tenebuka, ulamuknye binya. Winilmuka anya arye, elda ninye mutuku-mutuku nirya ulamika ara, el atonunye ton kum ulamuk. Tonda, Musa kanye talima namin asa arye ulamuk atonun nang ton, tukwak mutuku-mutuku nirya noutamak kum unyake. Elda kanye talima erenye pia kum atia.
Sik kanye deibuka, telebuk unyak nang ara, wininyake. Ara, sik kanye erena kumce, mitang arye unyak nang ara, Allah arye ninye weike lyeplirye, sik talima talinamle talak ara, mutuku-mutuku nirya wiryuk ning, kintinibuka arepliba, anang arye talinamake. Aning ati ara, sik kanye deibuka, telebuk unyaka atonun, aminyan talak babye, apia unamake.
Yesus arye nyabuk. Ura, ‘Na nie,’ nyabuka, talya nyaltakaninyak nang ati, “Anggunda na walwale,” nyapnamne, nyapmasina aning ati ara, yupu tonap nyapnusine. Yata ninye do nirya, na nyasinye yupu kekebikirye, aninguk wininyak ninye ara, aik dona pia weik kel nang atonun unyake. Anyaik dona kel nang ara, ‘Anyaik dopnun’ tenen, tuku palibuka mutuku yangan keil deice ayukumna yo ikuka aik dobuke.
“Diba tenen, nang bukni, weik mambul kum nang babye, erena telebe,” nyapmasina ara, ‘Kekepmunce, alye dakdanamlum’ tenen, nyapmasine. Dib tenena nang bitinye arye, malye kanye bobuka, wamdaricopura, sik kan-kan arye, tonok kel bikamuknye, ayupu talibuka lipsisikmantonye, tonok babye ton dipkoprop kum ulul do? Aning ara, kum winipmanto tenepne.
Ara, yuk yupu ton nyapnusine. Kristus el bidamnye kanye erena kumce, talima mitang ubuka una ap, ‘Na kwit malye kanye boplyak’ tenen, nimalye arye una ap arisilya deice arye, ayupu ton nyabuka moropnusine. Na Paulus arye nyapsine. Na kele, anggun kan-kan ton nang arye nyaninyake. “Kume, Paulus ara, neika bukuka dilanyap talak ara, ilil asa unyak nang atonun ulul bukni, nun neika kum unyap talak ara, mikip weik nang ulye touk, mikip arye nyasulule,” nyaninyake.
Yuk nang ati, ‘Se, tenebicak’ tenen, namin asa arye teleb yupu nyana ap, ‘Malye winipyak’ tenen, talima kalikdanuka una ap, aning-aning nirya ara, Allah El Dib Kanye el mikip arye melisilyeba, telebuk unyabe. Awinin ning nirya ati ara, pia teleb un ning anya arye, ‘Ninye im sirya, mutuku sirya nirya arye, winibicak’ tenen, ninye nirya arye yupu kum sekenyake. ‘Winina ara telebuka,’ tenenyake.
Winira yuk yupu ton nyapnusine. Na weit yapu atonun ninye, anggun kayapu arye malye winibica, eipmunyopura, Allah El Dib Kanye arye, anggun talima talisilye ninye umunya anya arye, anggun namin asa arye malye winipmace ninye ati wenepmunce, lipsisikuka peterenamlulume. Yu upu deice arye kum wenenamlulume. Malye wininyak ninye ati, namin asa arye wenenamlum bukni, anggun bidamang talima noutamak malye ning lilosululba, ‘Malye winibibyak’ tenen, anggun babye, anggun bidamang ati, pia moubuka kalekelanamlulume.
Anggun nirya, yuk-yuk bukni, anggun bidamang winilulum ning ara, ‘Teleb wininun do, malye wininun do?’ tenen, asilanamlulume. Winipmunyopura, anggun bidamnye arye winimunce, anggun teleb un ning ati, ‘Aning teleb’ tenen, kanye deipnamlulume. Ara yuk nang, sik wininyak ning dipdebuka, ‘Aning telebe, aning malye. Aning ara na unye touk winipmoe. Aning ara, na ning atonun kum bukni, elda pia yuk winipmale,’ tenena kum aryuk, anggun bidamnye arye, anggun winin ning atibuk, dipdandemunce, moubuka unamlulume.
Bukni, atalak-atalak nirya ara, anyapmasin atouk do, yuk winipnamsil ning do, yatato winipnamsil do nirya, weik mambul tenenamlum ning ara, nyapnusine. Ara, ‘Kristus el laka teleb yupu, ninye lyena yupu nyasilye touk, pia moubuka kekebibirye, ayupu uk teleb-teleb ubuka, diksukumuk unamabe,’ tenenamlume. Winipmunyopura, na dilyasitinye talak babye, dilyangana kum arye, kekenauk upsitinye talak babye, na biknamsine. Ara, ‘Sik Pilipi mutuku ninye ara, sik kanye talima ap, kanye ap, ansinibuka kanye lamabuka unamak’ tenen, kel biknamsine. Tonda, anggun nong ara, yuk-yuk ululum bukni, tonok kanyeuk bobuka, tonoknye ato kibuka, Yesus el laka teleb yupu pil dona ati, pia pi dobuka, neika pil donamlume.
Aning ati ara, Allah arye anggun nirya ati, bico tenenyamsukce, ‘Aninye ara, na tenen, ninye na mapu unamak’ tenen, wibuka deiamsuka anya arye, malye una pia kum aryuk, anggun teleb-teleb ubuka wininamlum ning ara, nyapnusine. Ara, winiryuk baju ongolamaka atonun, bico tenebuka melilana ap, yuk nang ati namin kibuka melina ap, yuk nang ati kanye talima lamabuka amu tam una ap, ting-tingana kumce, namin asa arye unamlulume.
Tonda, yuk nang arye, anti, “Anda kamnye atonun ulyama ati ara, an yupu kum kekepnukiyap ati, dauplye,” nyapkicopura, sik anang ati yupu sekenamlyame. ‘Dauplye,’ tenena kume. Aning kum bukni, an winilaminye ning, yuk nang eipkikirye, ‘Kel biknamak’ tenen, winipmantonye bira anuk unamlame. Ara, an yupu nyana ap, an winin ning nirya ap, yuk nang ati bico tenebuka melina ap, Allah ap, el yupu ap, diba tenelulum ning ap, mingne ubuka, diksukum una ap, winipminye deice arye yuk nang kel biknamkiake.
Aninye malye ulilalamik bukni, anda Allah el yupu nyasilye touk ubuka, el pil donanye ulyama ati, amalye winin ning nirya dam una meme. Bik-bik abuka yukak balamak atonun, amalye ning batakuka, ‘Pia telebuk winiptinye’ tenen, patapkilyeura, pi dobuka wininalyame. Ara, diksukum una ap, Allah diksukum ulye touk una ap, Allah dib tenena ap, yuk ninye ati bico tenebuka melina ap, ‘Ikin ning aupmanil’ tenena kum arye, batakna kum pia pil dona ap, yuk ninye ati, namin arye una ap, anirya ara, an adiparyuk pia piribuka wininalyame.
Yuk nang arye, Allah el yupu peteren nang ati, ‘Nun lik’ tenen, el yupu yanibikirye, malye kibuka bisibikcopura, elce anang ati, teleb yupu nyabuka, nimalye arye peterenamle. Sik walwal arye wininyak ning ati lipsisikuka peterenamlyame. Ara, talye ati kume. Ara, ‘Allah arye anang ati, sik kanye noutamak pil melibuka doptubuk, sikce, “Nun malye un ning batakape,” nyaptingce, Allah el bisikuk tamubuka yanamak do?’ tenen, nimalye arye peterenamlume. ‘Sik malye ning batakikcopura, Allah el dipkoprop yupu kel biktingce, teleb uptinge,’ tenenamlame.
Tonda, “Yuk ninye ati, yuk nang arye, ‘Aninye ara, malye nang tenepnamak’ tenen, yupu malye nyabuka, deililana meme. Yupu deice waldana ap, ninye nong oldana ap, pia kum wininamlulume. Aning kum wininamlum bukni, yuk nang, sik patalye ning tenebuka, nimalye arye, melibuka unamlulume. Yata ninye do nirya, tenepce arye winina ap, kanye talima eremna ap kum bukni, dipkoprop sik amutamuk umunce, nimalye arye telebuk wininamlume,” nyabuka, peterenalyame.
Allah arye nun diba tenenyap ninye nirya ati, el yupu deice arye nyapsuke. Ayupu ara ani. ‘Doyanamle talak nirya ara, anggun batakuka, yukak kum binamne. Na ap, anggun ap neikauk unamabe. Anggun patan ning nirya ati, pia kum bataknamsine. Melibuka arenauk unamsine. Allah arye nyabuk.’ (Ulangan 31:6)
Aning ati ara, anggun kanye malye tenelulum ning nirya ap, anggun kan-kan malye un ning weik aupmalye ning nirya ap, batakanamlulume. Batakmunce, Allah arye, ‘Na yupu sik talima noutam duk moupnamle’ tenen, arepsuk ning ara, kanye talima dukdongopmunce, nimalye umunyak arye, kekebuka dolonamlume. Allah el yupu arepsuk ning ara, lyepnamsila atia.
Bukni, tonoknye birye, nati nyapnutue. “Kume, tonye bira, diba tenen ninguk upmale. Yuknye bira, diksukum winin ninguk upmale,” nyapnutue. Bukni, narye tamubuka nyapsine. Anggunce, anggun winin ning laka nyana kum arye, “Na diba tenepse ning ara, ani,” nyabuka, talye yupu deice arye, laka peterepnutum bukni, lakak nong kum kel kipsitinye. Nara anggunti, na diksukum wininun ning, laka nyapsitinyopura, na winin ning deice arye, diba tenepse ning ara, nong lakak uplibuk, aning deice arye, kel kipnamlume.
Na kayapu, nun du weit atonun kipdeipsuk ninyeo. Ninye nyanyak yupu deice arye, malye ning yala-yala weik weleplirye, malye ulisulula anya arye, ayupu ton nyapnusine. Anggunce, ‘Nun kan-kan arye nun peterena deiyok nang weik unamabe,’ tenena bataknamlulume. Aning ara, deiyok nyapnusine. Anggun kele. Allah arye talye nang ati, yupu bokeipnamle atonun kum bukni, nun peterena deiyok nang ati ara, tonok ning babye lubakina kum arye, nun wininyap ning nirya lilibuka asipdesilirye, winipdesilyeura, yupu mikip arye bokeipnamsil ati nyapsine.
Amalye un ning akunum nyapmasin bukni, Allah arye weik kel bikilina deiyok ning arisulula ara, winira nyapnusine. Minop ara, el kel bikilina deiyok arisilye ning ara, yuk malye ning tonok babye tabakuka kum ulule, diksukumuk ulule. Ton anang ara, ‘Nun nirya talima nimalye aryuk, telebuk neika ulamtibye’ tenen, patalule. Tonda, sikce, ‘Na yupu nyapnikcopura, yuk nang kekebikirye, alye una ap, ilil una ap, kanye ikine ap, kanye delina ap, unamak do, kum do?’ tenen, minopce moubuka teniltonyake. Tonda, ninye arye yupu nyabikibuk, moubuka kekebikirye, nimalye aryuk unyake. Tonda, yuk nang malye ubicopura, ‘Na adiparyuk wenebuka optinye,’ kum tenebikirye, anang ati, bico tenebuka luba kilongonyake. Sik yupu nirya ara, duknuna kum arye, lak akuk laka nyanyake. Ton ninye urasin eibikirye, sik kanye kum bokolinyake. Sik teleb ubuka diksukum unyak ning noutam nirya ara, duk telebuk moulule.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Aning ara, kum bukni, anggun kanye talima noutam, teleb-teleb ubuka ulamunye deice arye, dipkoprop teleb kilapu unamlulume. Anggun nimalye arye tunim abuka una ap, yupu weik arye nyana kum, kanye dukdongobuka nimalye arye una ap ara, talima noutam usulul ning anya arye, nong bol deice usilye ning, wisi dakirye suruklamsil ato kume. Aning ara, talima noutam pia usilibuk, Allah el kanye ara, ‘Aning ara, pia mambule,’ tenelirye, kanye deilisulule.
ကြော်ငြာတွေ