Kanye deibuka, teleb ubuka ulamice, ninye nirya ara, malye winin ning talibuka, pia kum unyake. Tonda, Allah Yahweh elce, “Aning ara, wininamlume. Aning ara, pia kum wininamlulume,” nyalisilye yupu nirya ara, pia moubuka kekenyakce, aninguk talibuka, el amu tam unyakce, dobolbanyak ninye ara, pia kamuk unamake.
Yakobus 1:27 - Eipomek27 Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake. အခန်းကိုကြည့်ပါ။ |
Yakobus 1:27
36 ပူးပေါင်းရင်းမြစ်များ
Tonda, Allah Yahweh arye, sik mutuku kum unyak bukni, yuk mutuku noutam, ninye asik nang unyak ninye ati, moubuka dilirye, kalikilule. Aning dem kum bukni, Allah arye kwaknamne mapu ap, youwak kilapu ap nirya ati, tuba-tuba melibuka kalikilulce, sik patan ning ati, talye arelule. Bukni, sik pia malye-malye weik wininyak nang arye, ‘Winipnamabe,’ tenenyak ning ara, Allah arye, yupu sekelulba, nong kum ulule.
Anggun Israel yala nang nirya ara, Allah ati, “Anda pia teleb ulyame,” nyabuka, mot deice arye, el siuk erenamlume. Ara, im deice arye, dua deice bukuka banmalanye, nun ni Allah ati, kanye lon mot nyamunyak arye, el siuk erenamlume! Nun ni koproba Allah, el si ara, Yahweh ulule. Ati, Allah Yahweh el dam yamunyopura, kanye deibuka unamlume.
Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.
Yata nang do nirya, sikce nada Ninye Mi Koprop Atonunye ati, malye yupu nyapnice ninye ara, sik malye nyapnice ning ara batakikceba, Allah arye sik malye nyanyak yupu kum daneiplirye, aninye ati namin kipnamle. Bukni, sik anang arye, Allah El Dib Kanye, el pil dolye ning ati, “Aning ara, Isa Mutuku Dongonye el mikip deice arye pil donyake,” nyabuka, malye yupu nyabikcopura, atalak noutamak ababye, aminyan doyanamle talak nirya ababye, Allah arye sik malye nyanyak yupu ara, kum daneiplirye, kum namin kipnamle. Aning pia tuba awamlyeba, aninye wenepnamle. Ayupu nyanyak ning ara, kum lyepmanto ning unyaka ati nyapsine. Yesus arye nyabuk. Yesus arye ayupu nyalamuk ara, Musa sekamuk yupu peterena deiyok nang arye, “Yesus ara, Isa Mutuku Dongonye talibuka mikip deice arye pil dolule nyanmeka ati,” nyabuk.
Sik kanye deibuka, telebuk un nang ara, ani. Ara, sik kanye talima bitinye bokoltona kum diparyuk, ‘Na talima ap, nonge ap nirya, Allah akunum arepsa ati, malye winin ning tonok ning babye, kum wininamne,’ tenenyakce, el yupu uk kekebuka unyak nang ara, Allah eipnamake. Ara, sik talima kanye dukdongopra, Allah ap, neika ulamikirye, Allah ap epdakirye, kanye deibuka epdanamke. Aning ati ara, sik kanye deibuka telebuk unyaka atonun, pia unamake.
Zakaria ap, el kil Elisabet ap, Allah yupu nyalilye atouk ubuka diksukumuk ulamrikce, Allah arye, “Wininamlulume, aning kum wininamlulume,” nyapdeiamuk yupu, moubuka talyamrikce, dolbalamrik. Ayupu nyalul touk ning nirya atonun, sirya dakuka pil dolamdik, malye una deice tenebuk ning ababye, kum winilamrik ara, Allah arye sikti, kanye deiamuk.
Tonda, sik diba kum tenenyak ninye arye winilamaka atonun, tuba kum wininamlum bukni, Allah arye anggun malye kanye tenen ning nirya dangupsilirye, kanye talima winiryuk ning punubuka arisilya deice arye, anggun winin ning nirya ara, telebuk wininamlulume. Anggun kanye talima winiryuk ning akunum upmasilyopura, Allah arye, ‘Wininamake,’ tenesilye ninguk, moubuka kel kinamlulume. Ara, ‘E, dipkoprop teleb winin ning ara ani. Winibibiba, Allah arye kanye deilisilye ning ani. Malye ning tonok babye kum winiplirye, diksukum winin ning ani, kel kinamlum’ tenen, nyapsine.
Allah arye, ‘Aning ara wininamlulume, aning ara kum wininamlulume,’ nyapdeibukba, Musa birye sekeiyamsuk yupu deice arye, Yahudi yala ninye ati wenepnamla deiyok ara ani. Ara, Allah el kanye ara, ‘E, aninye ara, Musa sekamuk mem yupu ara, amul deiceuk kekenyaka anya arye, sikda diksukum ninye unyaka ati, teleb kipdeipnamsine,’ kum tenelule. Aning kum bukni, Allah el kanye ara, ‘Narye nyapsiba, Musa sekamuk yupu nirya ayupu kekebuka, dipkoprop talibuka dobolbanyak ninye ara, “Sikda telebe,” nyabuka, diksukum ninye kipdeipnamsine,’ tenesulule.
Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.
Kume, na kayapu, aning ara laka upsile. Allah yupu noutamak arye ayupu ton sekiamuk. Ayupu ara ani, ‘Allah arye ninye ati kanye deiplirye, diksukum kililul ati, telebuk unamak ninye ara, diba tenebica deice aryuk kam pia unamake.’ (Habakuk 2:4) Allah arye nyapdeibukba, Habakuk arye ayupu sekeiyamuka anya arye, adeice arye laka akunum usulule. Yata ninye do nirya, Musa sekamuk yupu, mem yupu kekebuka diksukumuk dobolbanyaka deice arye, Allah arye, “Aninye ara, diksukum ninye akunum unyake,” nyabuka, teleb un ninye kum ulinamle. Sik bidamang mikip deice aryuk, pi dobuka pirilenyaka anya arye, aninye ara pia tuba-tuba malyeuk unamake.
Yesus Kristus ap talima dukdongobuka neika unyaba noutam ara, Allah eipsilirye, el kanye ara, ‘Den bola mouse ning sekna babye, sekna kum babye, mambule pia kume. Aning babye, aning babye nong kum danamle ning atia,’ tenelule. Allah eipsilirye, kanye delinamsil ning ara, tonok ninguk ulule. Ara ani. Yesus ati diba tenenyaba deice arye, yuk ninye ati, ‘Bico’ tenen, melinauk winibibibuk, Allah eipsilirye, a deiceuk kanye delisulule. Mambul ning ara, anyuka. Yuk ning ton kume.
Narye yata ning do nirya, kanye deipnirye merkapang kum donamne. Bukni, tonok ning atibuk, si erebuka kanye deipnirye, merkapang donamne. Ara, nun Deiyoknye Yesus Kristus wanwanun yo deice obikura, nun lyena ati dipsuk ning ati, kanye deibuka, pin-pin asa arye merkapang donamne. Yuk ning nirya ara, pia kume. Yesus Kristus wanwanun yo deice obikba, nati dipnuk ara, na ap dukdongopnukce, na malye ulamse ning pununa ati dipnuke. Na lyena ati akunum dibuka anya arye, adeice arye na kanye ara ani. ‘Tukwak mutuku ulul ning, malye ning nirya ara, nati ara, aning nirya akunum kum danmala anya arye, na talima lipropnuturye, malye kum kipdeipnutue,’ tenenune. Tonda, ‘Na tenenuna ara, tukwak ulul ning, malye ning nirya ara, pia kum patanamnile’ tenen, unune. Nara, akunum dibikce ninye nirya kum patalamle atonun unune.
Minop talak ara, sik Yesus ati dib tenena kum ninye arye, malye-malye winilamak touk, anggun babye, atonun malye winilalume. Asing arye, kum eilinyap bukni, im noutamak balamak Isa mere, sikti, talipsinaba, sik weik deiyoknye Isa Mutuku Dongonye, el yupu kekebuka ulalume. Ara, Allah el yupu yaniltalamak ninye ara, Isa Mutuku Dongonye elcuk sik kanye talima taliliba, malye weik wininyake.
Akintinip deipnamlum din nirya ara, Lewi yala nang arena ati, deipnamlume. Ara, Allah arye, sik Lewi yala nang ara, sik talibuka wa win tuku ton kum kintinibuka arepnamle. Ati, akintinip deipnamlum din, yala-yala nirya ara, anggun mutuku noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, el li ap akunum dibikba, kwaknan mapu ap, kilapu weiamikce nang ap ati, anggunce, ‘Naʼ tenen, delinamlum din ning, noutam bokuka anyapmasin nang ati arenamlume. Akintinip deipmamunyopura, sik anang yakirye, sik pataplye touk, yanuka doprobikirye, sik weik tonun dinamnyake. Anggun Israel nang arye, aning nirya winipmunyopura, anggun ni koproba Allah Yahweh arye, anggun pil donamlum ning nirya ara, telebuk kilinamsile.
“Winiplyame,” nyapmakin yupu deiyok ara, yuk ton kume. ‘Ara, nunce yuk ninye ati, bico tenebuka melinamap’ tenen, nyapmakin ning uka. Yuk nang ati, bico uplyopura, melildana deiyok ara, ani. Ninye kanye talima mingne atonun una ap, nun kanye tenen ning noutamak, malye ning duknuna kum, diksukumuk una ap, tenepce arye talye nyana kum bukni, pia dib tenena ap, aning nirya wininyaba deice arye, yuk ninye ati kanye arisulule.
Wininalam bukni, dan youwak kilapu do nirya, sik mapu ap, sik mapu arye deiamikce mapu ap, tuba ulamicopura, talye parabuka melina kume. Ayouwak kilapu, sik mapu nebikcopura, sik adiparyuk sik babye, sik nin yapu koprop ati, melinamake. Ara, minop kel bikting ning ara, ‘Allah dib tenenyaba ati ara, talye kum nyaplopnuyabe’ tenen, kel biknamake. Allah diba tenen ninye arye, sik tam ninye nirya ati, melilamak atonun, ‘Nun babye wininamap’ tenen, kel biknamake. Winipnamaka deice arye, anggun ni yapu ap, anggun nin yapu ap arye, sik mitik talak, bico tenebuka melilamsik atonun, anang pununa ati, kam nang arye sik nin yapu ap, sik ni yapu ati adiparyuk melinamake. Tonda, winipnamake nyabuka, Allah arye pia kanye deilinamsile.
Nun ni Allah, el bico tenepsilirye, talye melisilya deice arye, peteresiliba kel bikinyabe. Ara, Allah yanibuka kanye talima malye winina ap, talye nang arye tukwak malye ning tenebuka kanye engena ap, ati, “Kume, aning pia kum wininamlume,” nyabuka peteresululba kel bikinyabe. Tonda, nyanamlyame. Allah bico tenesilirye, lyesulul anya arye, “Anggun patasilye ning. ‘Talye kanye bobuka winipnuyap,’ tenena kume. Anggun bidamnye ati moubuka dilanamlulume. Allah pia funguk ulirye, pia teleb ulye touk, anggun babye diksukumuk ubuka teleb nang unamlulume,” nyabuka peterepsine. Wini talak babye, aning atonun wininyabe.
Amalye un ning akunum nyapmasin bukni, Allah arye weik kel bikilina deiyok ning arisulula ara, winira nyapnusine. Minop ara, el kel bikilina deiyok arisilye ning ara, yuk malye ning tonok babye tabakuka kum ulule, diksukumuk ulule. Ton anang ara, ‘Nun nirya talima nimalye aryuk, telebuk neika ulamtibye’ tenen, patalule. Tonda, sikce, ‘Na yupu nyapnikcopura, yuk nang kekebikirye, alye una ap, ilil una ap, kanye ikine ap, kanye delina ap, unamak do, kum do?’ tenen, minopce moubuka teniltonyake. Tonda, ninye arye yupu nyabikibuk, moubuka kekebikirye, nimalye aryuk unyake. Tonda, yuk nang malye ubicopura, ‘Na adiparyuk wenebuka optinye,’ kum tenebikirye, anang ati, bico tenebuka luba kilongonyake. Sik yupu nirya ara, duknuna kum arye, lak akuk laka nyanyake. Ton ninye urasin eibikirye, sik kanye kum bokolinyake. Sik teleb ubuka diksukum unyak ning noutam nirya ara, duk telebuk moulule.
Anggunda, Allah el tonok kanye deibuka dobolbalamtum bukni, yuk ning patapsilyeura, kanye delilulama anya arye, sik donyak kil batakuka, yuk kil dololamak nang atonun winilulume. Ara, Allah ti batakuka, yuk ninguk teneluluma atia. Anggunce aning kum tenipmalum do? Talya tukwak ubuk ning ap, diba tenena kum nang arye, Allah El Dib Kanye nyasulul yupu yaniltakirye, malye unyak ning ap, malye ning patapsilye ning ap ara, ‘Allah lik,’ tenebuka winina atonun nyapsine. Yata nang do nirya, ‘Talye tukwak ubuk ning nirya, anyuk talibuka unamne,’ tenebuka ulamice nang ara, atenenyak deice arye, ‘Allah na like,’ tenebuka akunum unyake. Ara tukwak malye ning ap, diba tenena kum ninye arye, malye unyak ning ap, Allah ap neika talibuka kum upmanto atia.
Allah weik mambul ulirye, pia teleb-teleb ubuka ulula deice arye, “Weik mambul pil donamsine,” nyabuka, pia teleb nyalin yupu akunum nyalilamsuke. Ayupu areamsuka ara, talya urdem ati kume. Deiyok ara, Allah arye, “Wininamsine, aning ton wininamsine,” nyalisilye yupu deice arye, nun nirya ara, ‘Nada Allah pia diksukumuk unye touk unamak’ tenen, areamsuke. Tonda, adeiyok ton aupmale. Ara, sik yuk ninye, Kristus ati diba kum tenenyak ninye arye, ‘Malye un ninguk wininamap’ tenen, pataplibuk tenenyake. Wininyaka deice arye, dipkoprop sik kanye talima, pia malye-malye uplibuk malyeuk unyake. ‘Aninye ara, pia malye unyaka atonun, na mapu ton kum unamak’ tenen, Allah arye nunti, el teleb nyalin yupu areamsuke.
Sikti lila yupu nyan nang ara, nun Deiyoknye Yesus Kristus, nun Lyenanye kel bikika deice arye, diba tenena kum ninye malye wininyak ning bataklamik bukni, ila tamubuka tonap aninguk talibuka, wininmacebuk, aning arye sik talima koupdongoplirye, bisibuka pia malye-malye wininyake. Ara, diba min kum teneabik talak ara, mitik malye winilamik bukni, wini talak ara pia weik malye-malye wininyake.
Aning ati ara, na kayapu, anyapmasin ning nirya ara, ‘Allah arye winamsil’ tenen, kanye deiplumce, kintinibuka dinauk ululuma anya arye, ‘Allah nyasilye touk, diksukumuk wininamap’ tenen, pia pi dobuka pirilenamlulume. Wininamluma deiyok ara, ani. Ara, ‘Allah arye ninye nirya ati wenebuka bokeipnamsil talak ara, dipdesilirye, “Aninye ara, malye un ning kum upmale. Sikda diksukumuk unyakce, na ap dukdongobuka, teleb-teleb ubuka neika unyabe,” nyabuka deipnamsil’ tenen, teleb ubuka unamlulume.
Nun kele, Allah arye sik talima kam bukeibuk ninye nirya ara, tuba-tuba malye kum wininyake. Allah el Mi Koprop wibuka deibuknye bira, Yesus, elce aninye ati, ‘Malye winibicak’ tenen, pia melibuka kalikilule. Yesus arye sikti, winiplyopura, pia Malye Deiyoknye, Isa Mutuku Dongonye, malye kum kipdeipsutue. Ton, dalubuka kum dopropsutue.
ကြော်ငြာတွေ