Yakobus 1:26 - Eipomek26 Yatanye do nirya, elce el bidamnye ati, “Na diba tenepsa ati, diksukumnye unune,” talye nyaltakalul bukni, el nyalye yupu moubuka tenena kum arye, talye luba kibuka nyaplyopura, anye bira tilila yupu uk nyalalule. Atonye bira, el dib tenebuka talibuka ulul ning ara, deiyok kum ubuka ati, nong kum upnamle. Diba tenebuk ning ara, talyeuk ulule. အခန်းကိုကြည့်ပါ။ |
Yakobus 1:26
37 ပူးပေါင်းရင်းမြစ်များ
Aning ati ara, kuda basam do, sapi basam do, anggunce kum pataplye ning awaplyopura, pia malye weik winipliba, ninye yupu kekena ap, diksukum bisik bana ap, pia kum wininyake. Kekena kumce, malye weik wininyaka ati ara, ninye arye, ‘Kume, na tenepnye touk winipnamnil,’ tenebikirye, asapi basam u pum bisik tapu kirikikirye, lipdobikiba, talye kanye bobuka balamle. Bukni, sikda akekena kum ning winilamak touk, kum wininamlulume. Anggunda, pia moubuka tenepmunce, na nyasinye yupu kekebuka, aninguk talibuka wininamlume.
Dan ninye do nirya, anggun kan-kan noutamak arye, ‘Nunda lo tuba upsiliba, kam unamap talak nirya, teleb kanye deibuka unamabe. Tonda, nun kam unamap talak ara, weik lo arepsutuba, keting tamun weika arye, tonap kam uptibye,’ tenen, patasulul ninye nirya ara, narye nyapnusin yupu, moubuka kekenamlume. Anggunce teleb wininamlum ning ara, ani.
Anggun nirya kanye mouplulume. Yupu weika arye nyapra bamunya deice arye, dipkoprob malye un ning ton, upra banamlume. Ara, ‘Talye yupu weik nyapra bamunya deice arye, malye winipmunyak’ tenen, nyapsine. Bukni yatanye do, ‘Na mangkau arye malye yupu nyapnyak’ tenen, el sitang moubuka kalikdalirye, nimalya arye nyalulnye bira, dipkoprob pia weik kelnye ulule.
Ninye ton malye winin ning nirya batakikirye, diksukum kibuka unyak ninye ara, sik si bam bol pum bisik arye, teleb yupu nyanyak ning ara, pia weik kel bikna ninguk nyanyake. Bukni, malye ninguk talibuka ululnye, el si bam bol deice arye nyalul yupu ara, tilila yupu ap, minina yupu ap, nyalul yupu nirya ara kum danamle. El sitang babye, seklobikba, yupu kum nyapmanto unamle.
Ara, sik ninye nirya arye utenenyake. ‘Kume, nun wininyap ning ap, banyap bisik ap ara, diksukum bisikuk banyabe,’ tenebuka banyake. Bukni, tukwak ninye arye, malye ninguk talibuka unyak ninye ara, dipna damak bisikuk banyake. Kwalin bisikuk ulula anya arye, sik abisikuk banyaka deice arye, sirya talak ara, sik dibikcopura, uku dilamle bisikuk banyake.
Ninye ton weik kel bikilulnye birye nyalul yupu ara, ninye nirya arye kanye deibuka kekebikirye, ‘Se, anye birye nyasulul yupu ara, pia telebe,’ tenebikirye, sik kanye talima lilolibuk, sik babye, ‘Se, nun babye aning kel biktibye’ tenen, pataliba, weik arye tabakuka kel kipnamake. Weik kel deice arye nyalulnye ati, yuk ninye nirya arye elti, kanye delinamake. Bukni, ninye ton walwal kanye bobuka, ululnye birye nyalul yupu ara, moubuka kum tenenmalya deice arye, talye yupu uk nyalule. Elda, yupu canga arye nyalya deice arye, malye yupu weik nyanamle. Atonye bira, talye yupu weik nyaltakalule.
Allah arye sik ninye deiyok talibuka unyak weik nang ati utenelule. ‘Narye sikti, na mikip weik arepneba, sik weik arye kel kin ning moubuka tenebikirye, sik mutuku noutamak unyak ninye nirya ati, teleb ubuka talinamake. Tonda, yupu diksukum ubuka yupu bokolinamak. Teleb yupu nyabikiba sik amu tam unyak ninye ayupu kekebikirye, telebuk unamake,’ tenelule. Ati sik ninye deiyok nang, Raja weik nang ara, Allah Yahweh arye, el mikip weik talibuka ulul ning ara, sikti, arepliba doprobice bukni, yupu bokolina talak malye yupu uk nyabikirye, sik amu tam ninye ati, malyeuk ubicopura, Allah arye pia malye kanye bonamle. Aning ara, pia malye weik unyaka anya arye, Allah arye aRaja nang ati, wenepnamle.
Ara, ninye nirya arye, sik tenebice bisikuk bakirye, ‘Kume, nun banmap bisik ara, teleb bisik anya arye, abisikuk banamabe. Nunda diksukumuk unyabe,’ tenebuka banyake. Bukni, abisik urasin teleb bisik upmatu babye, sikda moubuka kum tenipdekirye, malye bisikuk balamicopura, dipkoprob dipna damuk banyake. Dipkoprop teleb bisikuk wibuka kum banamake. Aminyan talak, sik banamak bisik nirya ara, uku din mutuku uk banamake. Ati, ‘Awininamap ning ara, teleb ning do, malye ning do?’ tenen, pia moubuka tenipdemunce, banamlulume. Talye lukparabuka bana meme.
Pil dona ati ara, ‘Na like, pil kum dopnirye, talye urdemuk unamne,’ tenelulnye bira, el patan ning nirya ati ara, pia tenena uk unamle. Yata ning do nirya, mitik tonun arye akunum doproplyopura, ‘Akunuma,’ kum tenelule. Elda, ‘Se, weika arye tonap tabakuka doptinye’ tenen, pia weik arye patalyeba, pirina uk unamle. Bukni, Allah arye, ‘Tukwak kili sal winibuka teleb unamake,’ tenyamsuk touk, aninguk tenebikirye, telebuk unyak kili sal ara, yuk nang ati bico tenebikirye, weika arye arinyake. ‘Na uk dopropnune’ tenen, kum unyake.
Anggunce delilyangamunye ning nirya ara, talye dem ati boyangalulume. Winibuka boyangamunye ning nirya ara, dukna dukikiba, tong ati ukinikilongolamak touk, usunune. Narye anggunti lik upniliba, kum dilisunune. Anggunce wala tikilongon talak ap, Sabat sum ap, weik mambul sum ap upliba, Allah yupu kekena ati, bulubuka wekelyangamunyak ara, na like.
Awininyak nang ara, mining uku sice dobuka dilamak touk wininyake. Aninye ara, sik walwal tenenyak deice arye, sikce sik mining ati malye winililanyake. Ati, kum melipdatinge. ‘Ayo tonok deice arye na taruk deice talibuka pil donun ning ara, tilila yupu nyalinulule,’ kum tenenyake. Ati, aninye ara ‘Talya ninguk si erenyaba,’ kum tenenyake.
Ati ara, anggunce nati, malye yupu nyanululum ning ara, nyapnusine. Ara, anggunce nyalulume. “Nunce Allah el si erenyap ning ara, deiyok kum bukni, talye atibuk erenyabe,” nyalulume. Tonda, “Allah elda aning-aning nirya talibuka, im deice yin talin malaikat nirya, sik weik deiyoknye ulul bukni, elce nunti, ‘Wininamlulume, aning ara, kum wininamlulume,’ nyalisilye yupu ara, dobolbanyap bukni, winibibya deice arye, yata teleb ning ton dolonyap do? Urtalya ati wininyaba anya arye, aning ara, nun like,” nyanululume. Tonda, anggun nirya arye, ‘Nunda el nyapdeipsuk yupu talibuka unamap’ tenen, winilelamupu bukni, ila tuba ton malye winibipyopura, Allah el dam ati, “Se, nunda malye wininyap nang anya arye, namin kipsimince, lyepsilyame,” nyabuka, “El dam anyuk binuka loplobibirye, el amu tamuk una ara, deiyok yata ning ati wininamap do? Aning nirya ara, nun like,” nyabuka, malye yupu nyanululume.
Na si erenyak nang ara, talyauk wininyake. Sik peterelamik yupu ara, ‘Winina telebe, winina meme,’ nyabuka nyalamak yupu ara, ninye kanye aryuk peterenyak yupu uk peterenyake, nyabuk.’ (Yesaya 29:13) “Allah arye nyapdeibukura, Yesaya arye sekamuk.” Yesus arye Yesaya nyamuk yupu dobuka, anang ati nyabuk.
Aning ati ara, na peterepsin yupu ara, talye amul deice arye kum kekenamlulume. ‘Talya amul arye kekeltakanyap do, moubuka kekenyap do?’ tenen, moubuka tenenamlulume. Na yupu peteresinibuk kekemunce, ‘Deiyok anye,’ tenenepmunce talibuka unamlume. Ara talye ati kume. Allah yupu kekena ati, Allah arye kel kina deiyok ning arisilyeura, moubuka kekekirye, aninguk batakna kum arye, talibuka unyak nang ara, Allah arye kel kina deiyok ning weik arye tabakuka arilibuk, weik arye kel biknin banamake. Bukni, yata nang do nirya, lik ati, amul deice kekeltakanyakce, Allah yupu kum talibuka wininyak nang ara, sik min arye mitik anunuk kel bikamice ning babye, kum upnamle,” Yesus arye nyabuk.
Aninguk kum bukni, nunce Allah el winibuk ning ati, “Kristus obikbuk, dibuk bukni, Allah arye kam bukeibuk,” nyabuka peterenyaba anya arye, dipkoprop ara, Allah arye, Kristus ati kum kam bukeiptu toura, nunce Allah winibuk ning ati ara, tilila yupu uk nyanyabe. Nunce, “Dipkoprop Allah arye, Kristus kam bukeibuk,” nyabuka peterenyaba anya arye, aning kum uptuopura, tilila nyan nanguk unyabe. Allah arye, akunum diamik ninye ati, kam kum bukeipnamtuopura, aning deice arye, Kristus babye kam kum bukeibuk, tenetibye.
Narye ayupu bobuka peterelamsisiba, kekelulum ning ara, kanye teniltona kumce, pia pi dobuka talipmunyopura, Allah arye, lyepnamsile. Ara, apeterepsise yupu, ninye lyena ati, Yesus el laka teleb yupu ara, dib teneluluma deice arye, Allah arye, lyepnamsile. Ayupu nirya ara, pia pi dobuka kum talipmunce, ‘Dauplye’ tenen, batakmunyopura, minopce dib tenemunye ning babye, kum dasilirye, nong kum upnamsile.
Wini talak talye ninye arye, ‘Se ayupu ara, weik kel yupu. Weik mambul yupu,’ tenenyak ning ara, Allah el kanye ara, ‘Aning nirya ara, talye ning uka,’ tenelule. Na kayapu, anggun bidamang winilulum ning ati, tilila yupu nyapdamunce, dib kum tenenamlulume. Yatanye do nirya, wini talak dib tenena kum, weik kel ninye arye kel kiyamice ning ati ara, aning kel bikmunce, ‘Nara, weik kelnye akunum unune,’ tenebuka ulyamnye bira, kanye moupnulyame. Atalak ara, dib tenena kum ninye arye, ‘Se, aning ara, weik mambule. Aning ara, weik kel bikne ning ara, anye,’ tenebikirye, erenyak ning nirya ara, Allah el kanye ara, ‘Aning nirya ara, talya talye ning uka. Aning nirya ara, nong kum uplirye, kum danamle,’ tenelule. Aning ati ara, yatanye do nirya, sik dib tenena kum, talye ninye arye, ‘Aning weik mambule,’ tenenyak ning ati batakliba, talye nang arye elti, ‘Anye bira walwalnye,’ tenebikirye, nyabikca babye, mambul kume. Allah arye, talye tukwak ning bataklinye biti, ‘Na kanye ara, elda weik kelnye,’ tenelule. Allah arye anye biti, ‘Telebe,’ teneplyopura, ara weik mambule. Aning atonun, Allah yupu noutamak arye ayupu ton sekik. ‘Diba tenena kum ninye, aning-aning nirya kel bikamikce ninye ara, ‘Nunda, weik kel nang,’ tenelanyak bukni, atenelamaka noutamak arye, kabang mankau arye wena pum bisik wekliba youlamle touk, Allah arye anang ati wenepnamle. Ara, sik weik kel bikamikce ning deice arye, tenepce arye winilamice ning ati, wenepnamle.’ (Ayub 5:13)
Ura, na peterelamse yupu, Allah el kai teleb yupu, akunum langdibuka anya arye, kum suktalipnuke. Ati, sik mambul nang, Yerusalem mutuku peterena deiyok nang ara, yuk yupu ap tabakuka kum peterepnike. Tonda, ‘Anang ara, weik nang do, kum do?’ kum tenenyake. Na kanye ara, atenena atonun ning ara mambul kume. Allah arye ninye winilamice ning nong bol deiceuk elcuk, ‘Anang ara weik mambul nang, anang ara mambul kum nang’ tenen, yupu kum bogolisulule. Allah arye ninye nirya ati talima kum wililule.
Kel kipnik ning ara, yuk nang arye, “Anang ara, weik deiyok nang,” nyalamikbuk, aulamik nang, sik si ara Yakobus ap, Peterus ap, Yohanes ap, sik nirya arye, na ap, Barnabas ap ati, sirik taruk arye telebe nyabuka arepsikce kipsik. Ara, sikce nunti, ‘Anang ara nun pil donyap touk, sik babye atonun pil donyake’ tenen, sirik taruk arye talipsikce, kipsike. Taruk talibuka kipsika ara, na laka nyalamse yupu kekebikce, ‘E, Allah arye Paulus biti bico tenyamukce, el kanye aniryuk Paulus biti weika arye melyamukba, Paulus birye Allah el pil teleb ubuka dolule’ tenen, kel biknikce, taruk talipsik talak ara, sik Yerusalem mutuku unyaka deiyok nang nirya eibike. Winipsikce, yupu talibupu talak ara, nyapnik. “Ura, nunda, ‘Yahudi yala ninye diba tenenamak’ tenen, peterelbinamap bukni, Paulus ap, el neika unyak nang ap arye, yuk yala ninye nirya, Yahudi yala kum ninye nirya ati, peterelbinamak,” nyabuka, yupu nyapdapu. ‘Aning ara telebe,’ tenen, neika atonun tenebupe. Na Paulus birye laka nyapsine.
Teleb pil donamak talak ara, tenebuka tilila yupu kum nyanamake. Dib yupu uk nyabuka, teleb kipdanuka pil donamake. Malye nang arye, yupu nyakibuk, yuk ninye kekenyakce, malye kanye bolamak yupu atonun yupu nirya ara, kum nyanamlulume. Aning kum bukni, anggunce yuk ninye ati, ‘Sik ikin upyle ning yata ning do? Yata teleb yupu nyaptinya deice arye, sik talima kwa diptinye do?’ tenepmunce, ninye talima kwa dina yupu uk nyanamlulume. Ara, ‘Na yupu teleb ubuka nyapnya deice arye, sik kekepnamake ninye melipnamne’ tenen, yupu moubuka nyanamlulume.
Aning atonun, Allah el mapu ara, diksukum un ninye unyaka anya arye, anyapnusin ning ara, anggun babye, pia kum wininamlulume. Ara, yupu si dabuka derelamunce, ninye wan yupu ap, talye-talye yupu nyaplobikirye, yebyeban yupu ap, ‘Yuk nang akutupnamak’ tenen, talye kwalinyak yupu ap, teleb nang kum winipnamting ning yupu talina ap, anirya ara, pia kum nyanamlulum bukni, teleb ning ara, Allah atibuk, “Nun ni telebe,” nyabuka pia nyanamlulume.
Winibuka unamlum bukni, anggunda anggun kanye pum tam tenen ning ara, pia moubuka teninamlume. Ara, anggun ni Allah ap, el yupu ap batakmunce, tilila yupu uk, diba tenepmunyopura, adeice arye, yuk talye ning ati, si erebuka kipmunyopura, ikin weik upnamasile. Anggun wininamlum ning nirya ara, nong kum unamsile.
‘Anggun ap, diba’ tenena kum ninye nirya ap, yupu talinamlum talak nirya ara, yupu pia teleb-teleb ubuka nyanamlulume. Winipmanto ning ara, din ning dinyap talak ara, garam ua ap tabakibyopura, pia telebto ulye touk, anggun yupu talulum talak ara, Allah arye bico tenepsilirye, el kanye aryuk melisilye ning ton laka nyamunyopura, yuk nang kekebikirye, ‘Se aning ara, telebe’ tenen, kanye deipnamake. Ara, anang arye, ‘Se, ayupu ara, mambule, ati diba teneptibye, tenenamak’ tenen, anggunce nyanamlum yupu nirya ara, teleb-telebuk nyanamlulume. Winipmunyopura, adeice arye sik diba tenena kum nang arye, anggun Kolose ninye diba tenelulum ning ati, “Anggun diba teneplum ning ara, laka nyapsiabe,” nyabuka, yuk-yuk asipdenamsiake. Asipsikcopura, anggun moubuka tenipdemunce, ‘Anye bira el kekepmanto yupu ara, winibuka nyapnamne. Tonda anye bira, el kekepmanto yupu ara, winibuka nyapnamne,’ tenebuka kel kipmunce, teleb ubuka laka nyanamlulume.
Na kayapu, nun du weit atonun ululum ninye, anggun nirya ati, na bico tenesunune. Anyapnusin yupu ara, moubuka kekeplulume. Ninye nirya ara, ninye arye yupu nyabikbuk, ‘Adip aryuk kekenamap’ tenen, kanye kintinilinamlulume. Bukni, yuk nang arye yupu nyanmace bukni, ‘Sik yupu yaniptapnirye, minopce na yupu uk nyapnune,’ tenena kume. Yupu nyapnumunye talak nirya ara, minopce moubuka tenepmunce, yupu moubuka nimalye aryuk nyanamlulume. Tonda, minopce yu pia una meme.
Allah yupu nyapsicebuk, anggun amul deiceuk kekeplopmunce, ‘Akunuma,’ kum tenenamlulume. Ara, talye amul deiceuk kekeplopmunyeura, sik bidamnye aryuk, tilila yupu tenelalamak nang atonun ululuma ati, “Aning ara winina meme,” nyapsine. Allah el yupu deice nyasilye touk, moubuka kekepmunce, dobolbanlulume. Anyak winina kumura, tilila yupu nyan nang atonun unamlulume.
Se, anggun walwal arye, kanye bona kum nang atonun ululume. Narye, diba tenen ning aupmatu bukni, dipkoprop diksukum winin ning ton kum uplyopura, dipna atonun ulule nyapmasine. Anyapmasin yupu ara, ‘Deiyok aubtubuk kekeptibye’ tenen, patapmasilbuk, diba kum tenepmanulum do? Ati ara, deiyok ning tonok ubuk ning ton, laka nyapnusine.
ကြော်ငြာတွေ