Wahyu 7:16 - Eipomek

¹⁶ Allah arye aninye ati, pia melilamlya ani, atalak arye dipdongobuka aminyan doryanamle talak nirya ara, din ap, mek ap, pia kum patanamle. Keting bupu din ning, sik nong deice pia kum teng-teng anamle. Aning atonun, yuk weik tin ning nirya arye, sikti, tin upliba, uk kum dinamle.

Wahyu 7:16 ပူးပေါင်းရင်းမြစ်များ

Mazmur 121:5

Allah Yahweh arye, nun damak ausilirye, melibuka dinamsile. Tonda, nun ni Allah Yahweh aniryuk, nun dobukapsilirye, nun diksukum tamuk kalikinamsile. Ara, winipmanto ara, keting deiplye talak, weik yo tikamlyak, amu tam keting koak bulamaka atonun, Allah Yahweh arye, erebuka deice tam uliba, nunda el amu tam unamabe.

Mazmur 121:6

Wininamsila ati ara, keting noutam talak ara, keting deiplirye, nun nong deice, keting pia kum dinamsile. Lukunyan talak babye, wala dirina uplye talak ara, arukuna nun nong deice kum yanganamsile.

Mazmur 143:6

Na ni Allah, ‘Ancuk melinamnilam’ tenen, na taruk erepnirye, anti morokunune. Tonda, na kanye talima nirya ara, antibuk pia patanulule. Winipmanto ara, mok ap, mek ap, pia kum ulul mutuku noutam unyak nang, mek weik tonun patalamliba, ikin weik ulamak touk, narye anti, weik tonun patanulule.

Mazmur 42:2

Winipmanto ara, rusa basam mek patapliba, kang-kang abuka, mek din dam balamle touk, na ni koproba Allah anti, ‘Se,’ tenenune.

Mazmur 63:1

Na ni Allah antibuk, si erekunune. Yuk ning ati, ‘Na ni,’ nyabuka kum talinune. Anda na ni koproba Allah, tonok unilyama ati ara, narye anti pataniliba, lukunyan talak nirya, ‘Yata nyapnunil do?’ tenen, kekebuka ekunune. Winipmanto ara, tin weik mutuku mek kum ululba, ninye arye mek pia patalamle touk, anti pia, ‘Se,’ tenenune. Tonda, miklamle tuku arye, ‘Mok opnutue,’ tenelamle touk, Allah anti narye pia patanmanilba, mikip kum unune. Na kanye talima ap, nong ap nirya arye, anti pataniliba, anti pia tenekunune.

Kidung Agung 1:6

Ati ara, anggun Yerusalem weik asik noutam ululum wel kilapu arye, nati eipnumunce, “Se, akil ara, el nong bol nirya ara, pia miribuke,” nyabuka, malye kum nyanamnulume. Kume, na nong bol miripnuka deiyok ara, bai tam wa win kil ulamse ati, keting buppu arye, na nong bol miripnuka atia. Na nin koproba arye deiamuk nang, na duyapu koproba ara, nati yu ubuka ati, “Anda, nun anggur wa tuku damuk binuka umince, nun wa win pil donamsilame,” nyabuka, wa tuku kalikin kil kipdeipnikba, ulamsa atia. Sik anggur wa ati, kalikin pil dem dolamse bukni, na anggur wa ara, teleb kibuka kum kaliklamse.

Yesaya 25:4

Aning babye talye ati kume. Deiyok ara, ance sik mikip mitang nang ap, aning-aning kum talikirye, pia bona utoto kum nang ap ara, ancuk sikti, kalikuka melinauk ulyame. Ati, ‘Elcuk melibuka kalikinamsilʼ tenen, an damuk wekelyanganyake. Aning-aning nirya patanauk unyak nang, sik bona utoto kum nang ara, sik kanye imun ning uplyopura, sikce an damuk wekelyakirye, tunim nyabuka talibukba, telebuk unyake. Weik kumanya ap, mok ap, yanganmalya babye, ancuk sik lelildongonanye ulyame. Tonda, keting buppu weik yu ning upmalya babye, ancuk sik lelilongonanye ulyame. Tonda, pia malye yu nang arye olyanamak talak ara, weik kumanya ap, mok ap arye yangalamle touk ubuka, olyanamak talak ara, ancuk sik mikip kum nang ati, kalikisilyame.

Yesaya 32:2

Sik adeiyok nang arye, yuk ninye nirya ati, teleb kibuka melilana uk unamak anya arye, winipmanto ning ara nyapnusine. Ara, pia mikip weik kumanya yaliba, lelimboka tam tikilbalamak touk, wininamake. Tonda, mok cena kum yini mutuku noutamak arye mek pu dobuka batuba, ninye nirya arye kanye deipting touk, wininamake. Tonda, yini mutuku noutamak ara, yo pia kum anya arye, keting tin weik upliba, weik keil deiyok keting koa bulbalamak touk wininamake. Ara, sik diksukum unamak deiyok nang arye, yuk talye ninye nirya teleb kibuka melinamaka ati nyapsine.

Yesaya 41:17

Tonda, yatanye do nirya, anggun talye bona utotoa talina kum ninye ap, mek kum upliba, mek pataplirye si bam bol sesal lepliba, imun kanye bobuka, ‘Mek dan do?’ tenen, pia elinamak bukni, kum eipnamake. Winibikirye, ikin kanye bobuka nati morobicopura, narye kekepnamsine. Nara Allah, Israel ninye anggun ni koproba unirye, anggunti pia kalikuka melisununa ati ara, narye anggunti melibuka lyepnamsine. Narye anggun Israel ninye ati pia kum bataknamne.

Yesaya 49:10

Sik aninye ara, din ap, mek ap, ton kum patapnamle. Tonda, mek kumak, pia pata mutuku unamak bukni, sik nong deice keting kum dinamle. Ara, narye sikti, bico tenebuka lyepromsinye, na Allah arye sikti, pia tuba kalikuka melinamne. Pata mutuku noutam unamak bukni, narye sik aninye bobukapnirye mek pu dam delilbanamne.

Yesaya 65:13

Anggunda pia malyeuk umunya ati, na Allah Yahweh arye, aning-aning nirya talinirye, ‘Winipnamne,’ tenenye touk wininune. Nara Weik Erena Deiyoknye arye nyapsine. “Dipkoprop na si tuba erepnikirye, na amu tam pil dobuka unyak ninye ara, din dinamake. Bukni, anggun malyeuk ululum nang ara, tuba patana uk unamsile. Na si tuba ereninyak nang ara, mek dinamak bukni, anggun malyeuk ululum nang ara, mek tuba patana uk unamsile. Aning atonun, na si tuba ereninyak ninye ara, kanye deibuka pin-pin asa uk unamake. Bukni, anggun malyeuk ululum nang ara, tuba imun kanye bobuka unamlume. Winipmunce, alye dakalanamlume.

Yunus 4:8

Keting akunum panalyayukura, Allah arye kumanya weik, buppu ning dopkwetebukba, keting panalyangan tam arye, weik kumanya welebukce, kumanya dobuka yayuk. Akumanya dobukce, keting tin weik deibuk deice arye, Yunus kisok buppu arye, biribiri abuka, dipmanto ubuk. Awininmok deice arye, el dipmanto ubukce, tonda el kisok nirya, uku dipmanto ubuk. Winibukba, ‘Na kam unye ning ara, kume, dipnune,’ tenebukce, nyabuk. “Weik teleb ning ara, dipnune. Kam una ara, na like,” nyabuk.

Matius 13:21

Dolonyak bukni, yo yating tukwak teleb ubuka kum biyuk arye, koulubuka atonun, aninye ara, Allah yupu pia talipmubuka kum dolonyakce, minopce batakanyake. Ara, dib tenenyaka ati, yuk nang arye yu upliba, ikin ning sik nong deice deibica ati, adiparyuk batakaldongonyake. Tonda, ikin ning yalyopura, aninye ara ikin kanye bobuka, Allah yupu kekemakce ning ara, adiparyuk batakaldongonyake.

Matius 13:6

Pabuk bukni, yating tukwak teleb ubuka kum binmanto uamuka ati, keting yanuka donokukura, keting bupu arye sisal lebuka koulubuk.

Matius 5:6

Sik kanye deibuka, telebuk winin nang ara, ani. Ara, Allah arye, “Diksukumuk wininamlulume,” nyasilye yupu ati, ‘Aninguk winiptibye’ tenen, pia patalul nang ara, sik kanye talima noutamak diksukum winin ning, pataplye ning nirya, Allah arye tuba melibuka arenamle. Ati ara, sik kanye deibuka, telebuk unyaka atonun, aminyan talak babye, apia unamake.

Markus 4:17

Dolonyak bukni, yala ning yating tukwak teleb ubuka kum banmokbuk, koulubuka atonun, anang ara, Allah yupu moubuka kekena kumce, kum dolonyakce, minopce batakalongonyake. Diba tenebikca ati, yuk nang arye yu uplibuk, ikin ning sik nong deice deibicopura, anang arye minopce batakalongonyake.

Markus 4:6

Pabuk bukni, yating tukwak teleb ubuka kum biyuka ati ara, keting eibuka bupu arye, kel-kel abuka koulubuk.

Lukas 1:53

Tonda, sik aning-aning nirya patalamuk ninye ara, Allah arye sik patapne ning weika arye aribnabuk dololamikura, boulamuk. Winilamukura, sik bona weik talin nang ara, arena kumce talye nonguk dolkwetelamuk.

Lukas 6:21

Anggun aning-aning nirya pataplibuk ulalum ninye ara, aminyan ara Allah arye arepsilyeura, boupnamsil ati, anggun kanye deibuka unamlume. Anggun wini talak kanye imun usiliba engelulum ninye ara, aminyan talak kanye deibuka agu tunamlum ati, kanye deibuka unamlume. Allah arye lyesilibuk teleb unamlum ati, kanye deibuka unamlume.

Yohanes 4:14

Bukni, yata ninye do nirya, narye arebsinye mek dobuka dibikcopura, tuba tamubuka tonap mek kum patapnamle. Anggun mek patana kum bukni, na arebsinye mek dopropmunyopura, anggun kanye talima noutamak arye, mek pu atonun upsilyeura, mek pu doplirye, panabuka saklamle atonun winipnamsile. Winipnin balamlya ani, aminyan talak ara, pia kam unamlume,” Yesus arye nyabuk.

Yakobus 1:11

Keting deiplirye, bupu weik uplyopura, akapye yo kita, sisal seplirye, lulsaklamle. Lupsaklirye, kita saklyopura, el urasin teleb ulamle ning ara, kum ulule. Aning kum ulamle touk, sisin nang babye, sik pil dolamaka noutam arye, sik nong kum upnamle.

Wahyu 21:4

Allah arye aninye nirya ati, kanye imun ning nirya kum kipdeipliba, pia telebuk unamaka anya arye, tuba tonap pia kum engenamaka ati, sik asing maka cepdeipnule. Minop talak ulamuk ning nirya, akunum kum danmala ati, dipna ap, ninye dipnaba engena ap, kanye imun upsiliba engena ap, uk disilya deiyok ning nirya ap, amalye ning nirya ara pia kum upmala ati, tonap pia kum unamle,” Allah arye nyabukba, kekepse.